О ПРОЗРЕНИИ СЛЕПЫХ ОЧЕЙ

Молитва пред иконою Пресвятыя Богородицы «Казанскою»

О пресвятая Госпоже, Владычице Богородице! Со страхом, верою и любовию пред честною (и чудотворною) иконою Твоею припадающе, молим тя: не отврати лица Твоего от прибегающих к Тебе: умоли, милосердая Мати, Сына Твоего и Бога нашего, Господа Иисуса Христа, да сохранит мирну страну нашу, церковь же Свою святую непоколебиму да соблюдет, и от неверия, ересей и раскола да избавит: не имамы бо иныя помощи, не имамы иныя надежды, разве Тебе, пречистая Дево: Ты еси всесильная христиан помощница и заступница: избави же и всех, с верою тебе молящихся, от падений греховных, от навета злых человек, от всяких искушений, скорбей, болезней, бед и от внезапныя смерти: даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси благодарне воспевающе величия и милости Твоя, являемыя над нами зде на земли, сподобимся и небеснаго царствия, и тамо со всеми святыми прославим пречестное и великолепое имя Отца и Сына и Святаго Духа во веки веков.

Молитва св. великомученику Димитрию Мироточивому, Солунскому

Святый и славный великомучениче Христов Димитрие, скорый помощниче и теплый заступниче с верою притекающих к тебе! Предстоя со дерзновением небесному Царю, испроси у Него прощение согрешений наших, и о еже избавитися нам от всегубительныя язвы, труса, потопа, огня, меча и вечныя казни. Моли благость Его, еже ущедрити град сей, храм сей и всякую страну христианскую. Исходатайствуй у Царя царствующих на враги победу и одоление благочестивому императору нашему, всей же державе его мир, тишину, твердость в вере и преспеяние во благочестии: нам же, чтущим честную память твою, испроси благодатное укрепление на дела благая, да, благоугодное Владыце нашему Христу Богу зде творяще, сподобимся молитвами твоими наследовати царствие небесное, для вечнаго прославления Его со Отцем и Святым Духом. Аминь.

Молитва блаженному Василию, Христа ради юродивому, Московскому чудотворцу

О, Великий угодниче Христов, истинный друже и верный рабе Всетворца Господа Бога, преблаженне Василие! Услыши ны, многогрешныя, ныне вопиющия к тебе и призывающия имя твое святое, помилуй ны, припадающия днесь к пречистому образу твоему, приими малое наше и недостойное сие моление, умилосердися над убожеством нашим, и молитвами твоими исцели всяк недуг и болезнь души и тела нашего грешнаго, и сподоби ны течение жизни сея невредимо от видимых и невидимых врагов и безгрешно преити, и христианскую кончину непостыдну, мирну, безмятежну, и небеснаго царствия наследие получити со всеми святыми во веки веков. Аминь.

Молитва святей благоверней великой княгине московской Евдокии, во инокинях Евфросинии

О преподобная княгине Евфросиние, добрая в женах подвижнице, прехвальная угоднице Христова! Приими моление нас недостойных, с верою и любовию к раце мощей твоих припадающих, и твоим теплым к Богу ходатайством испроси граду твоему и людем от бед и напастей сохранение, обители тобою созданней утверждение и благоспеяние: подвизающымся же во обители твоей споспешествуй, яко чадолюбивая мати, иго Христово во благодушии и терпении понести и ко исправлению жития своего добре подвизатися: в мире благочестно живущым испроси у Господа в вере твердость, во благочестии преспеяние, и всем с верою прибегающым к тебе и твоея просящым помощи и заступления, подавай всегда недугов исцеление, в скорбех утешение и во всем житии благопоспешение: наипаче же умоли Господа в мире и покаянии земное житие прейти нам, от мытарств же горьких и мук вечных избавитися и царство небесное твоим ходатайством получити, идеже ты со всеми святыми Господу предстоиши, да славим Отца и Сына и Святаго Духа, ныне и присно и во веки веков.

Молитва святому благоверному царевичу Димитрию

О великий и милостивый страстотерпче, царевичу княже Димитрие! Услыши нас грешных, моление со усердием тебе приносящих, и помози нам в жизни сей, от грехов, бед и скорбей избавляя, и в будущем веце буди помощник и заступник, от мучений адовых свобождая и сподобляя купно с тобою покланятися и воспевати всесвятую Троицу, Отца и Сына и Святаго Духа, ныне и присно и во веки веков.

Молитва святителю Алексию, митрополиту Московскому и всея России

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Алексие! Предстоя у престола всех Царя, и наслаждаяся света единосущныя Троицы, и херувимски со ангелы возглашая песнь трисвятую, великое же и неизследованное дерзновение имея ко всемилостивому Владыце, молися паствы твоея спасти люди, единородный ти язык: благостояние святых церквей утверди: архиереи благолепием святительства украси: монашествующыя к подвигом добраго течения укрепи: царствующий град (сей и святую обитель сию) и вся грады и страны добре сохрани, и веру святую непорочну соблюсти умоли: мир весь предстательством твоим умири, от глада и пагубы избави ны, и от нападения иноплеменных сохрани: старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немощствующыя исцели, и везде тепле призывающыя тя и с верою притекающыя к раце честных и многоцелебных мощей твоих, усердно припадающыя и молящыяся тебе, от всяких напастей и бед ходатайством твоим свободи, да зовем ти: радуйся, Богоизбранный пастырю, звездо всесветлая мысленныя тверди, тайнаго Сиона необоримый столпе, миродохновенный цвете райский, всезлатая уста Слова, московская похвало, всея России украшение! Моли о нас всещедраго и человеколюбиваго Христа Бога нашего, да и в день страшного пришествия Его от шуияго стояния избавит нас, и радости святых причастники сотворит со всеми святыми во веки веков.

Молитва перед иконою Божией Матери «Взыскание погибших»

О, Пресвятая и Преблагословенная Дево, Владычице Богородице, Споручнице грешных и Взыскание погибших! призри милостивым твоим оком на нас, предстоящих пред святою иконою твоею и со умилением молящихся тебе: воздвигни нас из глубины греховныя, просвети ум наш, омраченный страстьми, и уврачуй язвы душ и телес наших. Не имамы иныя помощи, не имамы иныя надежды, разве тебе, Владычице: ты веси вся немощи и согрешения наша, к тебе прибегаем и вопием: не остави нас твоею небесною помощию, не предстани нам присно, и твоим неизреченным милосердием и щедротами спаси и помилуй нас погибающих. Даруй намы исправление греховныя жизни нашея и избави нас от скорбей, бед и болезней, от напрасныя смерти, ада и вечныя муки. Ты бо, Царице и

Владычице, скорая помощница и заступница всем притекающим к тебе, и крепкое прибежище грешников кающихся. Подаждь убо нам, преблагая и всенепорочная Дево, христианский конец живота нашего мирен и непостыден и сподоби нас твоим ходатайством вселитися в обителех небесных, идеже непрестанный глас празднующих радостию славит Пресвятую Троицу, Отца и Сына и Святаго Духа, ныне и присно и во веки веков. Аминь.

Молитва иконе Божией Матери «Скоропослушница»

О Пресвятая Дево, Мати Господа Вышняго, скоро-послушная заступнице всех, к Тебе с верою прибегающих! Призри с высоты небеснаго величия Твоего на мя непотребнаго, ко святей иконе Твоей припадающа: услыши скоро смиренную молитву мене грешнаго и принеси ю к Сыну своему: умоли Его, да озарит мрачную душу мою светом божественныя благодати Своея и очистит ум мой от помыслов суетных, да успокоит страждующее мое сердце и исцелит раны его, да вразумит мя на добрая дела и укрепит работати Ему со страхом, да простит вся содеянная мною злая, да избавит вечныя муки и не лишит Небеснаго Своего царствия. О преблагословенная Богородице! Ты благоизволила еси нарещися во образе Своем скоропослушница, повелевающи всем притекати к Тебе с верою: не презри убо меня скорбнаго и не попусти погибнути мне в бездне грехов моих. На Тя по Бозе все мое упование и надежда спасения, и Твоему покрову и предстательству поручаю себе во веки. Аминь.

Молитва св. мученику Лонгину Сотнику

Святый угодниче Божий Лонгин Сотник! Подвигом добрым подвязався на земли, восприял еси на небесех венец правды, его же уготовал есть Господь всем любящым Его. Тем же взирающе на святый твой образ, радуемся о преславнем скончании жительства твоего и чтим святую память твою. Ты же, предстоя престолу Божию, прийми моления наши и ко всемилостивому Богу принеси, о еже простите нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков.

ОБ ИСЦЕЛЕНИИ БОЛЕЗНИ ОЧНЫЯ (ГЛАЗ)

Молитва св. мученику Мине Египетскому

О, страстотерпче святый мучениче Мино! Взирающе на икону и поминающе цельбы, тобою подаваемы всем, с верою и благоговеинством к тебе притекающым, припадаем ти и, приклонши колена сердец наших, от всея души нашея молим тя, буди нам ходатай пред Господем и Спасом нашим Иисусом Христом о немощех наших, сопутствуй и утешай нас во время скорбей наших, даруя нам память о гресех наших, помогай в напастех и треволнениях мира сего, и во всех бедах, в сей юдоли плачевней нас постигающих.

Молитва святому мученику архидиакону Лаврентию

О пресвятый и предивный страстотерпче Христов, архидиаконе Лаврентие! Восхваляюще веру и страдания твоя, почитаем победу и венценосное прехождение твое чрез горящее углие от тьмы века сего ко свету невечернему престола величествия Божия. Темже убо молим тя: якоже древле притекавшыя с верою к покрову твоему чудесы твоими утвердил еси, тако да приимеши и нас под кров твой, и в болезни и печалех наших заступник нам да будеши: и якоже от слепоты телесных очес Крискентиана преложением рук исцелил еси, тако да исцелиши предстательством твоим у престола Божия и нашу душевную слепоту: призри на разслабление наше телесное и душевное, и укрепи нас бодренностию противу враг наших видимых и невидимых, удручающих нас напастьми, да твоею помощию путь маловременныя жизни сея прешедше непобеждени от бед и скорбей и всякаго лютаго обстояния, достигнем неприступныя славы величествия Божия, идеже предстоя, молишися со дерзновением за люди прибегающыя с верою к тебе и воспевающыя дивнаго во святых Бога исраилева во веки веков.

Молитва праведному Симеону Верхотурскому

О святый и праведный Симеоне, чистою душею твоею в небесных обителех в лице святых водворяяйся, на земли же телом твоим нетленно почиваяй, по данней ти благодати от Господа молитися о нас, милостивно призри на нас многогрешных, аще и недостойне, обаче с верою и упованием ко святым и цельбоносным мощем твоим притекающих, и испроси нам от Бога прощение согрешений наших, в няже впадаем множицею во вся дни жития нашего: и якоже прежде овым убо от очныя зельныя болезни ни мало зрети могущым исцеление очес, овым же близ смерти бывшым от лютых недугов врачевание, и иным иная многая преславная благодеяния даровал еси: сице избави и нас от недугов душевных и телесных и от всякия скорби и печали, и вся благая к настоящему житию нашему и к вечному спасению благопотребная нам от Господа испроси, да тако твоим предстательством и молитвами стяжавше вся нам полезная, аще и недостойнии, благодарне восхваляюще тя, прославим Бога, дивнаго во святых Своих, Отца и Сына и Святаго Духа, ныне и присно и во веки веков.

Молитва святителю Никите, епископу Новгородскому

О архиерею Божий, святителю Никито! Услыши нас грешных, днесь во священный храм сей стекшихся, и честному образу твоему покланяющихся, и ко священней твоей раце припадающих, и умиленно вопиющих: якоже седя на престоле святительства в великом Новеграде сем, и единою належащу бездождию, дождь молитвою свел еси, и паки граду сему огненным пламенем обдержиму, молитвою избаву подал еси, тако и ныне молим тя, о святителю Христов Никито: молися ко Господу, еже избавити царствующыя грады, великий Новград (сей) и вся грады и страны христианския от труса, потопа, глада, огня, града, меча и от всех врагов видимых и невидимых, яко да изрядных ради молитв твоих спасаеми, славим Пресвятую Троицу, Отца и Сына и Святаго Духа, и твое милостивное предстательство, ныне и присно и во веки веков.

Молитва святому великомученику и целителю Пантелеимону

О святый великомучениче и целителю Пантелеимоне, Бога милостиваго подражателю! Призри благосердием и услыши нас грешных, пред святою твоею иконою усердне молящихся, испроси нам у Господа Бога, Емуже со ангелы предстоиши на небеси, оставление грехов и прегрешений наших: исцели болезни душевныя и телесныя рабов Божиих ныне поминаемых, зде предстоящих и всех христиан православных, ко твоему заступлению притекающих: се бо грех наших ради, люте одержими есмы многими недуги и не имамы помощи и утешения: к тебе же прибегаем, яко дадеся ти благодать молитися за ны и целити всяк недуг и всяку болезнь: даруй убо всем нам святыми молитвами твоими здравие и благомощие души и тела, преспеяние веры и благочестия и вся к житию временному и ко спасению потребная, яко да сподобившеся тобою великих и богатых милостей, прославим тя и подателя всех благ, дивнаго во святых Бога нашего, Отца и Сына и Святаго Духа, во веки веков.

ОТ ЗУБНОЙ БОЛИ

Молитва священномученику Антипе, епископу Пергамскому

О преславный священномучениче Антипо и скорый помощниче христианом в болезнех! Верую от всея души и помышления, яко дадеся тебе от Господа дар болящыя врачевати и разслабленныя укрепляти: сего ради к тебе, яко благодатному врачу болезней, аз немощный (или немощная) прибегаю, и твой досточтимый образ со благоговением лобызая (или лобызающи), молюся: твоим предстательством у Царя небеснаго испроси мне болящему (или болящей) исцеление от удручающия мя зубныя болезни: аще бо и недостоин (или недостойна) есм тебе, благостнейшаго отца и приснаго заступника моего: но ты, быв подражатель человеколюбия Божия, сотвори мя достойна (или достойну) твоего заступления чрез мое обращение от злых дел ко благому житию: уврачуй обильно дарованною тебе благодатию язвы и струпы души и тела моего, даруй ми здравие и спасение и во всем благое поспешение, да тако, тихое и безмолвное житие пожив (или поживши) во всяком благочестии и чистоте, сподоблюся со всеми святыми славити всесвятое имя Отца и Сына и Святаго Духа во веки веков.

Молитва св. Иону, митрополиту Московскому и всея России чудотворцу

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Ионе! Предстоя у престола всех Царя и наслаждаяся света единосущныя Троицы и херувимски со ангелы возглашая песнь трисвятую, великое же и неизследованное дерзновение имея ко всемилостивому Владыце, моли спастися паствы христовы людем, помази во бранех и покори им ся противныя враги под нозе им: благостояние святых церквей утверди архиерее благолепием святительства украси: монашествующыя к подвигом добраго течения укрепи: царствующий град и вся грады и страны добре сохрани, и веру святую непорочну соблюсти умоли: мир весь предстательством твоим умири, от блага и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, пленныя возврати, немоствующыя исцели, и везде тепле призывающыя тя и с верою притекающыя к тебе и усердно припадающыя и молящыяся тебе от всяких напастей и бед ходатайством твоим свободи. Моли о нас всещедраго и человеколюбиваго Христа Бога нашего, да и в день страшного пришествия Его от шуияго стояния избавит нас, и радости святых причастники сотворит со всеми святыми во веки веков.

Также молятся Божией Матери пред иконою ее «Взыскание погибших» (см. «Опрозрении слепых очей»).

ОТ ГОЛОВНОЙ БОЛИ

Молитва святому Ангелу Хранителю

Ангеле Христов, хранителю мой святый и покровителю души и тела моего, вся ми прости, елика согреших во днешний день: и от всякаго лукавствия противнаго ми врага избави мя, да ни в коемже гресе прогневаю Бога моего: но моли за мя грешнаго и недостойнаго раба, яко да достойна мя покажеши благости и милости всесвятыя Троицы, и Матере Господа моего Иисуса Христа, и всех святых, аминь.

Также молятся иконе Божией Матери «В скорбех и печалех утешение».

Молитва святому Иоанну Предтече

Крестителю Христов, проповедниче покаяния, кающагося не презри мене: но, совокупляяся с вои небесными, молися ко Владыце за мене недостойнаго, унылаго, немощнаго и печальнаго, во многия беды впадшаго, утружденнаго бурными помыслы ума моего. Аз бо есмь вертеп злых дел, отнюдь не имеяй конца греховному обычаю: пригвожден бо есть ум мой земным вещем. Что сотворю, не вем, и к кому прибегну, да спасена будет душа моя, токмо к тебе, святый Иоанне, благодати тезоимените, яко тя пред Господем, по Богородице, вем больша быти рожденных всех: ты бо сподобился еси коснутися верху Царя Христа, вземлющаго грехи мира, Агнца Божия: Егоже моли за грешную мою душу, да поне отныне, в первый-надесять час, понесу тяготу благую и прииму мзду с последними. Ей, Крестителю Христов, честный Предтече, крайний пророче, первый во благодати мучениче, постников и пустынников наставниче, чистоты учителю и ближний друже Христов, тя молю, к тебе прибегаю, не отрини мене от твоего заступления, но возстави мя, падшагося многими грехи: обнови душу мою покаянием, яко вторым крещением, понеже обоего начальник еси: крещением омываяй грех, покаяние же проповедуяй во очищение когождо дел скверных: очисти убо мя грехми оскверненнаго и понуди внити, аможе ничто же скверно входит, в царствие небесное. Аминь.

Также молятся великомученику и целителю Пантелеимону (см. «Обисцелении болезни очныя»), Божией Матери пред иконою Ее «Взыскание погибших» (см. «Опрозрении слепых очей»), «В скорбех и печалех утешение».

ОТ НЕДУГА РАССЛАБЛЕНИЯ

Молитва пред иконою Божией Матери «Утоли моя печали»

Надеждо всех концев земли, пречистая Дево, Госпоже Богородице, утешение мое! Не гнушайся мене грешнаго на твою бо милость уповаю: угаси ми пламень греховный и покаянием ороси изсохшее мое сердце, очисти ум мой от греховных помыслов, приими мольбу, от души и сердца со воздыханием приносимую тебе. Буди о мне ходатаица к Сыну твоему и Богу, и укроти гнев Его матерними Твоими молитвами: душевныя и телесныя язвы исцели, Госпоже Владычице, утоли болезни души и тела, утиши бурю злых нападений вражеских, отъими бремя грехов моих, и не остави мене до конца погибнути, и печалию сокрушенное сердце мое утеши, да славлю тя до последняго издыхания моего. Аминь.

Молитва преподобному Никите Столпнику, Переяславскому чудотворцу

О, всечестная главо, преподобне отче преблаженне, Никито преподобномучениче! Не забуди нищих твоих до конца, но поминай нас всегда во святых своих и благоприятных молитвах к Богу и не забуди присещати чад своих. Моли за ны, отче благий и избранниче Христов, яко имеяй дерзновение к небесному Царю, и не премолчи за ны ко Господу, и не презри нас, верою и любовию чтущих тя. Поминай нас недостойных у престола Вседержителева и не престай моляся за нас ко Христу Богу: тебе бо дана бысть благодать молитися за ны. Не мним бо тя мертва суща: аще бо и телом преставился еси от нас, но и по смерти убо жив пребываеши. Не отступай от нас духом, сохраняя и соблюдая нас от стрел вражиих и всякия прелести бесовския, заступниче и молитвенниче наш добрый. Аще бо и мощей твоих рака пред очима нашима видима есть всегда: но святая твоя душа со ангельскими воинствы, со безплотными лики, с небесными силами у престола Вседержителя Бога достойно веселится. Ведуще убо тя воистинну и по смерти жива суща, тебе припадаем и тебе молимся и милися деем, еже молитися о нас всесильному Богу о пользе душ наших, и испроси нам время на покаяние и невозбранно прейти от земли на небо, и горьких мытарств, и воздушных князей, и вечныя муки избавитися нам, и небесному царствию наследником быти со всеми праведными, от века угодившими Ему, Господу нашему Иисусу Христу: Емуже подобает всякая слава, честь и поклонение со безначальным Его Отцем и Святым духом, ныне и присно и во веки веков. Аминь.

Молитва преподобному Александру Свирскому

О, священная главо, ангеле земный и человече небесный, преподобне и богоносне отче наш Александре, изрядный угодниче Пресвятыя Троицы, являющий многия милости живущим во святей обители твоей и всем, с верою и любовию притекающим к тебе! Испроси нам вся благопотребная к житию сему временному и нужная к вечному спасению нашему. Пособствуй предстательством твоим, угодниче Божий, благочестивейшему государю нашему, Николаю Александровичу всея России, на враги видимыя и невидимыя, да в мире глубоце пребудет святая православная Церковь Христова и в благостроении зиждется царство его, во всяком благочестии нерушимо. Буди всем нам, чудотворче святый, помощник скорый во всякой скорби и обстоянии. Наипаче же в час кончины нашея явися нам заступник благосердый, да не предани будем на мытарства воздушных власти злобнаго миродержца, но да сподобимся непретковеннаго восхода в царствие небесное. Ей, отче, молитвенниче наш присный! Не посрами упования нашего, не презри смиренныя моления наша, и предстательствуй за нас пред престолом живоначальныя Троицы, да сподобимся вкупе с тобою и со всеми святыми мы недостойнии в селениих райских славити величие, благодать и милость единаго в Троице Бога, Отца и Сына и Святаго Духа, во веки веков. Аминь.

Также молятся Божией матери пред иконою Ее «Скоропослушница» (см. «О прозрении слепых очей»).

Молитва преп. Иринарху Ростовскому

О великий угодниче Божий и преславный чудотворче, преподобне отче наш Иринарше! Призри на ны грешныя, в скорбех и обстояниих наших усердно к тебе вопиющыя и на тя по Бозе все упование наше возлагающыя. Просим тя со умилением многим: твоим предстательством ко Господу Богу испроси нам мир, долгоденствие, братолюбие, земли плодоносие, воздуха благорастворение, дожди благовременны, и свыше благословение на вся начинания наша благая низведи. Избави же всех нас святыми твоими молитвами от всяких бед: глада, града, потопа, огня, меча, вредоноснаго червия, тлетворных ветров, смертоносныя язвы и внезапныя смерти, и во всяких скорбех наших буде нам утешитель и помощник, сохраняя ны от падений греховных и сподобляя наследники быти царствия небеснаго, да прославляя вкупе с тобою всех благих Подателя, триединаго Бога, Отца и Сына и Святаго Духа, во веки веков.

Молитва св. Иоанну, архиепископу Новгородскому

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Иоанн! Предстоя у престола всех Царя и наслаждаяся света Единосущныя Троицы и херувимски со ангелы возглашая песнь трисвятую, великое же и неисследованное дерзновение имея ко Всемилостивому Владыце, моли спастися паствы Христовы людем, помази во бранех и покори им Вся противныя враги под нозе им: благостояние святых церквей утверди, архиереи благолепием святительства украси: монашествующыя к подвигом добраго течения укрепи: царствующий град и вся грады и страны добре сохрани, и веру святую непорочну соблюсти умоли: мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, пленныя возврати, непоствующыя исцели, и везде тепле призывающыя тя и с верою притекающыя к тебе и усердно припадающыя и молящыяся тебе от всяких напастей и бед ходатайством твоим свободи. Моли о нас всещедраго и человеколюбиваго Христа Бога нашего, да и в день страшного пришествия его от шуияго стояния избавит нас, и радости святых причастники сотворит со всеми святыми во веки веков.

Также молятся Ангелу Хранителю (см. «От головной боли»).

ОТ РАЗНЫХ НЕДУГОВ И БОЛЕЗНЕЙ

Молитва иконе Божией Матери «Троеручница»

О Пресвятая и Преблагословенная Дево, Богородице Марие! Припадаем и покланяемся Тебе пред святою иконою Твоею, воспоминающе преславное чудо Твое, исцелением усеченныя десницы преподобнаго Иоанна Дамаскина от иконы сея явленное, егоже знамение доныне видимо есть на ней, во образе третия руки, к изображению Твоему приложенная. Молимся Ти и просим Тя, Всеблагую и Всещедрую рода нашего

Заступницу: услыши нас, молящихся Тебе, и якоже блаженнаго Иоанна, в скорби и болезни к Тебе возопившаго, услышала еси, тако и нас, скорбящих и болезнующих ранами страстей многоразличных, не презри, усердно к Тебе от души сокрушенныя и смиренныя усердно прибегающих: Ты зриши, Госпоже Всемилостивая, немощи наша, озлобление наше, нужду, во Твоей помощи потребу, яко отвсюду врази окружают нас, и несть помогающаго, ниже заступающаго, аще не Ты умилосердившися о нас, Владыце. Ей, молимтися, вонми гласу болезненному нашему и помози нам святоотеческую православную веру до конца дней наших непорочно сохранити, во всех заповедях Господних неуклонно ходити, покаяние истинное о гресех наших всегда Богу приносити, и сподобитися мирныя христианския кончины и добраго ответа на страшнем суде Сына Твоего и Бога нашего, Егоже умоли за нас матернею молитвою Твоею, да не осудит нас по беззакониям нашим, но да помилует нас по велицей и неизреченей милости Своей. О Всеблагая! Услыши нас и не лиши нас помощи Твоея державныя, да Тобою спасение получивше, воспоем и прославим Тя на земли живых и рождшагося от Тебе Искупителя нашего, Господа Иисуса Христа, Ему же подобает слава и держава, честь и поклонение, купно со Отцем и Святым Духом, всегда, ныне и присно и во веки веков. Аминь.

Молитва преп. Антонию Великому

О священная главо, преподобне отче, преблаженне авво Антоние! Не забуде убогих твоих до конца, но поминая нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуде посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя. Поминай нас недостойных у престола Вседержителева, и не престай моляся о нас ко Христу Богу: ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражьих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева предстоящи, достойно веселится. Ведуще убо тя в истину и по смерти жива суща, тебе припадаем и тебе молимся: молися у нас всесильному Богу, о пользе душ наших, и испроси нам время на покаяние, да не возбрано прейдем от земли на небо, от мытарств же горьких, бесов воздушных князей и от вечныя муки да избавимся, и небеснаго царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков.

Молитва преподобному Сампсону Странноприимцу

О предстателю наш пред Господем и теплый молитвенниче, преподобне отче Сампсоне! Зриши с небесе, яко погибаем во обстояниих и скорбех: прилагается бо посреде нас неверие ко отступтству и разделению, оскудевает любы, умножаются же беззакония и соблазны, болезни и скорби множества бездомных, гладных и сирых: откуду, отче, приимем силы, да устоим противу соблазнов мира, сохраним в сердцах наших любовь и веру Христову и упование православных и приложим попечение о больных и бедных, аще не ты заступиши нас твоим предстательством теплым, прося нам помощи от Бога в немощех наших: сохрани убо молитвами твоими крепость державы российския, мир и безмятежие святыя церкве, всех же нас огради и сохрани непоколебимы посреде неверных, поносящих веру нашу хулителей, огради от соблазнов, возбуди сердца имущих к милованию нищих, согреянию хладных, напитанию алчущих и презрению бездомных, утоли умножение скорбей и болезней, глада и прочих уязвляющих ны бед, даруй ослабу страждущым младенцем, низпосли от Господа укрепление, утешение и отраду женам, в муках деторождения сущым, и всем, в тяжких работах, в больницах, заточениих и темницах унывающым, да вси прославим в Троице славимаго Бога, Отца и Сына и Святаго Духа, во веки веков.

Также молятся Божией Матери пред иконою Ее «Целительница», великомученику и целителю Пантелеимону, преподобному Агапиту Печерскому, преподобному Дамиану Печерскому, мученикам Диомиду, Фотию, Аниките и Фалалею.

ОТ БОЛЕЗНИ В НОГАХ

Молитва праведному Симеону Верхотурскому (см. «Об исцелении болезни очныя»), Божией Матери пред иконою Ее, именуемою «Скоропослушница» (см. «О прозрении слепых очей»).

ОТ РАЗНЫХ БЕД И НАПАСТЕЙ

Молитва святителю Николаю архиепископу Мир Ликийских

О добрый наш пастырю и Богомудрый наставниче, святителю Христов Николае! Услыши нас грешных, молящихся тебе и призывающих в помощь скорое предстательство твое: виждь нас немощных, отвсюду уловляемых, всякаго блага лишенных и умом от малодушия помраченных: потщися, угодниче Божий, не оставити нас в греховнем плену быти, да не будем в радость врагом нашым и не умрем в лукавых деяниих наших: моли о нас недостойных Содеятеля нашего и Владыку, Ему-же ты со безплотными лики предстоиши: милостива к нам сотвори Бога нашего в нынешнем житии и в будущем веце, да не воздаст нам по делом нашым и по нечистоте сердец нашых, но по Своей благости воздаст нам: на твое бо ходатайство уповающе, твоим предстательством хвалимся, твое заступление на помощь призываем, и ко пресвятому образу твоему припадающе, помощи просим: избави нас, угодниче Христов, от зол, находящих на нас, и укроти волны страстей и бед, возстающих на нас, да ради святых твоих молитв не обымет нас напасть и не погрязнем в пучине греховней и в тине страстей наших: моли, святителю Христов Николае, Христа Бога нашего, да подаст нам мирное житие и оставление грехов, душам же нашым спасение и велию милость, ныне и присно и во веки веков.

Молитва Ангелу Хранителю

О, святый Ангеле, хранителю и покровителю мой благий! С сокрушенным сердцем и болезненною душею предстою ти, моляся: услыши мя, грешнаго раба своего (имя рек), с воплем крепким и плачем горьким вопиющаго: не помяни моих беззаконий и неправд, имиже аз окаянный прогневляю тя по вся дни и часы и мерзостна себе творю пред Создателем нашим Господем: явися мне милосерд и не отлучайся мене сквернаго даже до кончины моея: возбуди мя от сна греховнаго и пособствуй твоими молитвами прочее время живота моего без порока прейти и сотворити плоды достойны покаяния, паче же от смертных падений греховных соблюди мя, да не погибну во отчаянии, и да не порадуется враг о погибели моей. Вем воистинну и усты исповедую, яко никтоже таков друг и предстатель, защититель и поборник, якоже ты, святый Ангеле: предстоя бо престолу Господню, молишися о мне непотребнем и паче всех грешнейшем, да не изимет Преблагий души моея в день нечаяния моего и в день творения злобы. Не престай убо умилостивляя премилосердаго Господа и Бога моего, да отпустит согрешения моя, яже сотворих во всем житии моем, делом, словом и всеми моими чувствы, и имиже весть судьбами да спасет мя: да накажет мя зде по Своей неизреченней милости, но да не обличит и не истяжет мя онамо по Своему нелицеприятному правосудию: да сподобит мя покаяние принести, с покаянием же Божественное причащение достойне прияти, о сем паче молю и таковаго дара всеусердно желаю. В страшный же час смерти неотступен буди ми, благий хранителю мой, прогоняя мрачныя демоны, имущия устрашити притрепетную душу мою: защити мя от тех ловления, егда имам преходити воздушная мытарства, да храним тобою, безбедно достигну рая ми вожделеннаго, идеже лицы святых и горних сил непрестанно восхваляют всечестное и великолепое имя в Троице славимаго Бога, Отца и Сына и Святаго Духа, Емуже подобает честь и поклонение во веки веков. Аминь.

ИСТОЧНИК