Молитвы о ближних
МОЛИТВЫ за ближних КО ГОСПОДУ ИИСУСУ ХРИСТУ
Молитва 1-я
Всеблагий Господи, Спасителю наш! Призри милостивно на нас, недостойных рабов Твоих (имена), и не помяни беззаконий наших, но по безмерному благосердию Твоему прости нам вся прегрешения наша. Сам очисти и спаси нас: Сам умы наши просвети. Ей, Господи, Спасителю наш! Яви нам (имена) великую и богатую милость Твою.
Молитва 2-я
Господи Иисусе Христе, Боже мой, покрый мя и раб Твоих (имена) от злобы супостата нашего, зане сила его крепка, естество же наше страстно и сила наша немощна. Ты убо, о Благий, сохрани мя от смущения помыслов и потопа страстей. Господи, Пресладкий мой Иисусе, помилуй и спаси мя и рабов Твоих (имена).
Молитва 3-я
Господи Иисусе Христе, хотяй всем человеком спастися, услыши молитву мою, молитвами святых апостол Твоих, яко тии молятся за ны, молением их спаси мя, грешнаго, и рабов Божиих (имена), исцели болезни сердца моего, уврачуй струпы души моея, покрый мя и раб Твоих (имена) благодатию Твоего человеколюбия от всякого зла, да Тобою храним, избавлюся от многих сетей лукаваго. Спаси мя и раб Твоих (имена) по милости Твоей, да прославлю пресвятое Имя Твое со Отцем и Святым Духом, ныне и присно и во веки веков.
Молитва 4-я
Владыко Господи! Простри руку Твою невидимую от святаго жилища Твоего и благослови вся ны и прости нам всякое согрешение вольное и невольное, словом или делом содеянное. Даруй нам, Господи, умиление и слезы сокрушения во очищение многих грехов наших, даруй нам, рабам Твоим (имена) велию милость Твою. Яко благословенно и препрославленно есть Имя Твое, ныне и присно и во веки веков.
Молитва 5-я
О Господи Иисусе Христе! Не отврати лица Твоего от нас, рабов Твоих (имена) и уклонися гневом от рабов Твоих: помощник нам буди, не отрини нас и не остави нас.
Молитва 6-я
Господи Иисусе Христе, Спасителю наш! Пред иконою Твоею припадающе, всеусердно молим Тя: помилуй и спаси нас, недостойных раб Твоих (имена), от внезапныя смерти и от человеческого оклеветания; и от всякаго зла защити и помилуй нас, Господи. Яко Ты еси Бог наш, да не погубиши нас во веки веков.
Молитва 7-я
Многомилостивый и Прещедрый Господи, рекий: просите и приимите; и аз, надеяся тому словеси, понудихся проглаголати молитвы сии. Темже сице в которой молитве изгрубих или со другом глаголя праздными беседами, или в помыслех, прости ми, и всегда угодно буди Твоему человеколюбию и спаси мя, раба Твоего по милости Твоей и даруй ми добродетели: смирение, любовь, кротость, и рассудительность, да присно хвалю Тя до издыхания моего ныне и присно и во веки веков. Аминь.
