ЖИВЫЙ В ПОМОЩИ

Живый
в помощи Вышняго, в крове Бога Небеснаго водворится. Речет Господеви:
Заступник мой еси и Прибежище мое, Бог мой, и уповаю на Него. Яко Той
избавит тя от сети ловчей, и от словесе мятежна, плещма Своима осенит
тя, и под криле Его надеешися: оружием обыдет тя истина Его. Не
убоишися от страха нощнаго, от стрелы летящия во дни, от вещи во тме
преходящие, от сряща, и беса полуденного. Падет от страны твоея тысяча,
и тма одесную тебе, к тебе же не приближится, обаче очима твоима
смотриши, и воздаяние грешников узриши. Яко Ты, Господи, упование мое,
Вышняго положил еси прибежище твое. Не приидет к тебе зло, и рана не
приближится телеси твоему, яко Ангелом Своим заповесть о тебе, сохрани
тя во всех путех твоих. На руках возмут тя, да не когда преткнеши о
камень ногу твою, на аспида и василиска наступиши, и попереши льва и
змия. Яко на Мя упова, и избавлю и: покрыю и, яко позна имя Мое.
Воззовет ко мне, и услышу его: с ним есмь в скорби, изму его, и
прославлю его, долготою дней исполню его, и явлю ему спасение Мое.

МОЛИТВА АНГЕЛУ ХРАНИТЕЛЮ

Ангеле
Христов святый, к тебе припадая молюся, хранителю мой святый,
преданный мне на соблюдение души к телу моему грешному от святого
крещения, аз же своею леностию и своим злым обычаем прогневах твою
препречистую светлость и отгнах тя от себе всеми студными делами,
клеветами, завистию, осуждением презорством, непокорством,
братоненавидением и злопомнением, сребролюбием, прелюбодеянием,
яростию, скупостию, объядением без сытости и опивством,
многоглаголанием, злыми помыслы и лукавыми, гордым обычаем и блудным
возбешением, имый самохотение на всякого плотское вожделение. О, злое
мое произволение, его же и скоти безсловесних не творят! Да како
возможеши воззрети на мя, или приступити ко мне, аки ко псу
смердящему? Которыма очима, Ангеле Христов, воззриши на мя, оплетшася
зле во гнусных делах? Да како уже возмогу отпущения просити горьким и
злым моим и лукавым деянием, в няже впадаю но вся дни и нощи и на всяк
час? Но молюся ти припадая хранителю мой святой, умилосердися на мя
грешнаго и недостойнаго раба твоего (имя), буди ми помощник и заступник
на злаго моего сопротивника, святыми твоими молитвами, и Царствия Божия
причастника мя сотвори со всеми святыми, всегда, и ныне, и присно, и
во веки веков. Аминь.
 

МОЛИТВА АРХАНГЕЛУ БОЖЬЕМУ МИХАИЛУ

Господи,
Боже Великий, Царю безначальный, пошли Архангела Твоего Михаила на
помощь рабам Твоим (имя). Защити, Архангеле, нас от всех врагов видимых
и невидимых. О, Господень Великий Архангеле Михаиле! Демонов
сокрушитель, запрети всем врагам, борющимся со мною, и сотвори их яко
овцы. И смири их злобные сердца и сокруши их, яко прах перед лицом
ветра. О, Господень Великий Архангеле Михаиле! Шестикрылый первый князь
и воевода небесных сил, Херувимов и Серафимов, буди нам помощник во
всех бедах, скорбях и печалях, в пустыне и на морях тихое пристанище.
О, Господень Великий Архангеле Михаиле! Избави нас от всякия прелести
диавольские, егды услышишь нас, грешных, молющихся Тебе и призывающих
имя Твое Святое. Ускори нам помощь и побори всех противящихся нам силою
Честного и Животворящего Креста Господня, молитвами Пресвятой
Богородицы, молитвами святых Апостолов, Святителя Чудотворца Николая,
Андрея Христа ради Юродивого, святого пророка Илии и всех святых
великомучеников, святых мучеников Никиты и Евстафия и всех преподобных
отцов наших, от века Богу угодивших и всех святых небесных сил. О,
Господень Великий Архангеле Михаиле! Помоги нам грешным (имя) и избави
нас от труса, потопа, огня, меча и от напрасной смерти, от великого
зла, от врага льстивого, от бури поносимой, от лукавого избавь нас
всегда, ныне и присно и вовеки веков. Аминь. Святой Архистратиг Божий
Михаил, молниеносным мечом Твоим отжени от меня духа лукавого,
искушающего и томящего мя. Аминь.

Из блога ГАЛИНЫ ШАДРИНОЙ