МОЛЕБЕН О ПУТЕШЕСТВУЮЩИХ

(мирянский чин)

 

Старший чтец:Молитвами святых отец наших, Господи Иисусе Христе Боже наш помилуй нас. Все: Аминь.

Старший:Слава тебе Боже наш, слава Тебе! Все: Царю Небесный...

Другой чтец:Трисвятое. Пресвятая Троице. Господи, помилуй (3 р.) Слава, и ныне. Отче наш...

Старший (отличен от священнического!):Яко Твое есть Царство, и Сила, и Слава во веки. Все: Аминь.

Чтец:Господи, помилуй. (12 р.) Слава, и ныне.

Приидите поклонимся…

Господь просвещение мое и Спаситель мой, кого, убоюся? Господь Защититель жизни моея, от кого устрашуся?(26/1) Ибо Той Бог мой и Спас мой, Заступник мой, не подвижуся наипаче (61/3). От Господа стопы человеку исправляются и пути его восхощет зело (36/23). Боже мой, не удалися от мене, Боже мой, в помощь мою вонми (70/12). Скажи мне, Господи, путь, воньже пойду, яко к Тебе взях душу мою (142/8). Стезю мою Ты еси изследовал и все пути мои провидел еси (138/3). Стопы моя направи (118/133), пути Твоя, Господи, скажи ми, и стезям Твоим научи мя (24/4). Вси путие мои пред Тобою, Господи (118/168). От всякаго пути лукава возбраних ногам моим (118/101). Исправи пред Тобою путь мой (5/9). На Бога уповах, не убоюся, что сотворит мне человек (55/12)? Аще бо и пойду посреде сени смертной, не убоюся зла, яко Ты со мною еси. Жезл Твой и палица Твоя, тии мя утешат (22/4). Рука Твоя наставит мя и удержит мя десница Твоя (138/10). Ополчится Ангел Господень окрест боящихся Его и избавит их (33/8). Открый ко Господу путь твой, и уповай на Него, и Той сотворит (36/5). Господь сохранит тя, Господь покров твой на руку десную твою. Господь сохранит вхождение твое и исхождение твое (120/5, 8).

Слава, и ныне. Аллилуиа (3).

 

Вместо мирной ектении: Господи, помилуй.(12 р.)  или прошения:

Господу помолимся. Молимся Тебе, Господи Боже наш, Вседержителю, Творче всех и Содетелю душ наших, и просим: молитвы дарование подаждь нам и ниспосли мир душам нашим.+

Сохрани, Господи, Церковь Твою Святую, укрепи ю и вся соедини познанием Своея истины, и нас в чадех ея соблюди. Патриарху нашему Кириллу и митрополиту Герману вспомоществуй, архиереи и иереи же укрепи, и нас спаси молитвами их. Даруй изобилие плодов земных и времена мирны, с плавающими сплавай, с путешествующими спутешествуй, болящих исцели, заблудших вразуми, избави нас от всякие скорби, гнева и нужды, сохрани нас Твоею благодатью от всякого греха и научи нас творити волю Твою.+

Дом сей сохрани от всякия беды и напасти. Благослови всех живущих в нем, всех входящих во онь и исходящих из него. Утверди нас в мире, благочестии и молитве, соделай нас храмами Духа Твоего Святаго. +

Помилуй Господи, прости вся прегрешения вольная и невольная и благослови, Господи, путешествие (нас, грешных) рабов Твоих (имена).+

Посли Господи (нам) им Ангела мирна, спутника и наставника, сохраняюща, защищающа, заступающа и невредимы соблюдающа от всякаго злаго обстояния.+

Покрый Господи рабов Своих (…) и невредимых соблюди от всех вражиих наветов и обстояний, и благополучно препроводи и возврати.+

Господи, безбедное и мирное путешествие и благополучное во здравии возвращение во всяком благочестии подаждь им.+

Господи, сих рабов Своих невредимыми и непреоборимыми от всяких козней лукавых и невидимых врагов и от злобы лукавых людей сохрани.+

Благослови благое их намерение и благополучно к пользе душевной и телесной устрой е Своею благодатию.+

Пресвятую Богородицу и вся святые, молящиися за нас грешных пред Престолом Твоея милости, тепле воспомянувше, Тебе предаем жизнь нашу Господи.+

Молитвами святых отец наших, Господи Иисусе Христе Боже наш помилуй нас.

Аминь.

Cтарший чтец:Молитвами святых отец наших, Господи Иисусе Христе Боже наш помилуй нас.

Все:Аминь.

Бог Господь (как обычно)

Бог Господь и явися нам, благословен грядый во имя Господне.

Исповедуйтеся Господеви, яко Благ, яко в век милость Его.

Обышедше обыдоша мя и именем Господним противляхся им.

Не умру, но жив буду и повем дела Господня.

Камень, Егоже небрегоша зиждущии, Сей бысть во главу угла, от Господа бысть Сей и есть дивен во очесех наших (и к каждому стиху припеваем: Бог Господь:).

Глас 2: Путь и истина сый, Христе, спутника Ангела Твоего рабам Твоим ныне, якоже древле Товии, посли сохраняюща и невредимых, к славе Твоей, от всякаго зла во всяком благополучии соблюдающа, молитвами Богородицы, Едине Человеколюбче.

Слава, глас 2:Луце и Клеопе во Еммаус спутешествовавый, Спасе, сшествуй и ныне рабам Твоим путешествовати хотящим, от всякаго злаго обстояния избавляя; вся бо Ты, яко Человеколюбец, можеши, аще токмо восхощеши.

И ныне, глас 6:Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас верно зовущих Тебе, ускори на молитву и потщися на умоление, предстательствующи, присно Богородице, чтущих Тя.

Обычным порядком Апостол и Евангелие.

Старший чтец:Молитвами, Господи, всех святых и Богородицы, Твой мир даждь нам и помилуй нас, яко Един щедр.

Прокимен, глас 4:Скажи мне, Господь, путь, воньже пойду, яко к Тебе взях душу мою.

Стих: Изми мя от врагов моих, Господи, к Тебе прибегох.

Деяний св. Апп. чтение, зач. 20 (8, 25–39).

Во дни оны Ангел Господень рече к Филиппу, глаголя: востани и иди на полудне, на путь сходящий от Иерусалима в Газу, и той есть пуст. И востав пойде: и се муж мурин, евнух, силен Кандакии царицы Муринския, иже бе над всеми сокровищи ея: иже прииде поклониться во Иерусалим. Бе же возвращаяся, и седя на колеснице своей, чтяше пророка Исаию. Рече же Дух к Филиппу: приступи и прилепися колеснице сей. Притек же Филипп, услыша его чтуща пророка Исаию, и рече: убо разумееши ли, яже чтеши? Он же рече: како убо могу разумети, аще не кто наставит мя? Умоли же Филиппа возшедша сести с ним. Слово же Писания, еже чтяше, бе сие: яко овча на заколение ведеся, и яко агнец прямо стригущему его безгласен, тако не отверзает уст Своих. Во смирении Его суд Его взятся: род же Его кто исповесть? яко вземлется от земли живот Его. Отвещав же каженик к Филиппу рече: молю тя, о ком пророк глаголет сие? о себе ли, или о ином некоем? Отверз же Филипп уста своя, и начен от Писания сего, благовести ему Иисуса. Якоже идяху путем, приидоша на некую воду и рече каженик: се вода. Что возбраняет мне креститися? Рече же Филипп: аще веруеши от всего сердца твоего, мощно ти есть. Отвещав же рече: верую Сына Божия быти Иисуса Христа. И повеле стати колеснице: и снидоста оба на воду, Филипп же и каженик, и крести его. Егда же изыдоста от воды, Дух Святый нападе на каженика. Ангел же Господень восхити Филиппа, и не виде его к тому каженик, идяше бо в путь свой радуяся.

Аллилуия, глас 1:

Стих: От Господа стопы человеку исправляются.

Стих: Открый ко Господу путь твой и уповай на Него, и Той сотворит.

Чтец:Господи, помилуй. (3 р.)

Старший:Молитвами, Господи, всех святых и Богородицы, Твой мир даждь нам и помилуй нас, яко Един щедр.

Старший (выходит с Евангелием как если бы был диаконом, но все читает РОВНЫМ голосом (как чтец) стоя лицом к людям, даже если служба в храме – взять обычное Евангелие, не престольное!).

От Иоаннасв.Евангелие, зач. 47 (14, 1–11).

Рече Господь Своим учеником: да не смущается сердце ваше: веруйте в Бога, и в Мя веруйте. В дому Отца Моего обители многи суть: аще ли же ни, рекл бых вам: иду уготовати место вам. И аще уготовлю место вам, паки прииду, и поиму вы к Себе: да идеже есмь Аз, и вы будете. И аможе Аз иду, весте, и путь весте. Глагола Ему Фома: Господи, не вемы, камо идеши, и како можем путь ведети? Глагола ему Иисус: Аз есмь путь и истина и живот: никтоже приидет ко Отцу, токмо Мною. Аще Мя бысте знали, и Отца Моего знали бысте убо: и отселе познасте Его и видесте Его. Глагола Ему Филипп: Господи, покажи нам Отца, и довлеет нам. Глагола ему Иисус: толико время с вами есмь, и не познал еси Мене Филиппе! Видевый Мене, виде Отца: и како ты глаголеши, покажи нам Отца?. Не веруеши ли, яко Аз во Отце, и Отец во Мне есть? Глаголы, яже Аз глаголю вам, о Себе не глаголю: Отец же во Мне пребываяй, Той творит дела. Веруйте Мне, яко Аз во Отце и Отец во Мне.

Все поют (до и после чтения):Слава Тебе, Господи, слава Тебе.

 

Чтец или все: Господи, помилуй. (40 р.) или прошения:

Господи Боже наш, Луке и Клеопе во Еммаус спутешествовавый и весело во Иерусалим возвратитися Твоим преславным познанием сотворивый, спутешествуй Твоею благодатию и Божественным благословением и ныне (нам, грешным) рабам Твоим (имя рек), Тебе прилежно молящимся и во всяком деле благом, к славе пресвятаго Твоего имени благопоспеши во здравии и благополучии соблюдая и во время благоподобно возвращая.

Ангела Твоего Хранителя пристави рабом сим, благоуветливе Господи, и еже отъяти вся препятия видимых и невидимых врагов, поспешство же во всем ко благополучному совершению сотвори, Преблагий Спасе наш.+

Всех же нас, путешествующих и оставляющихся, в пути и в пождании сущих, благодатию Твоею соблюди, подвигаяй на молитву и моление и коленопреклонение, и вся благовременно соединитися целы и невредимы сотвори.+

Пресвятую Богородицу и вся святые, молящиися за нас грешных пред Престолом Твоея милости, Господи, тепле воспомянувше, Тебе предаем живот наш.+

Старший чтец:Молитвами святых отец наших, Господи Иисусе Христе Боже наш помилуй нас.

Чтец или все:Аминь. Господи, помилуй.(3 р.)

 

Старший:Господи Иисусе Христе Боже наш, истинный и живый путю, состранствовати мнимому Твоему отцу Иосифу и Пречистей Ти Деве Матери во Египет изволивый, и Луце и Клеопе во Еммаус спутешествовавый! И ныне смиренно молим Тя, Владыко Пресвятый, и рабом Твоим сим Твоею благодатию спутешествуй. И якоже рабу Твоему Товии, Ангела хранителя и наставника посли, сохраняюща и избавляюща их от всякаго злаго обстояния видимых и невидимых врагов, и ко исполнению заповедей Твоих наставляюща, мирно же и благополучно и здраво препровождающа, и паки цело и безмятежно возвращающа; и даждь им все благое свое намерение ко благоугождению Твоему благополучно в славу Твою исполнити. Твое бо есть, еже миловати и спасати нас, и Тебе славу возсылаем со Безначальным Твоим Отцем и со Пресвятым и Благим и Животворящим Твоим Духом, ныне и присно и во веки веков. Аминь.

 

 

Все:Честнейшую херувим...

Старший:Слава Тебе Боже наш, слава Тебе.

Все:Слава, и ныне. Господи, помилуй. (3 р.) Господи, благослови.
Старший: Господи Иисусе Христе, Сыне Божий. молитв ради Пречистыя Твоея Mатере, святаго... (упоминает святых дня, святых храма, др.святых), преподобных и богоносных отец наших и всех святых помилуй нас.

Все:Аминь.

И поют:Господи помилуй, Господи помилуй, Господи помилуй!

 

Серия сообщений "Молитвы на каждый день":
Часть 1 - Молебен о путешествующих
Часть 2 - Молитва об исцелении
Часть 3 - Молитва болящей( его )
...
Часть 43 - МОЛИТВА О ДЕТЯХ
Часть 44 - Молитва перед экзаменом
Часть 45 - Молитва св. праведного Иоанна Кронштадтского ко Господу об укреплении душевных сил.