Кондак 1
     Избраннии чудотворцы, страстотерпцы Христовы и врачеве премудрии, туне подающии здравие в болезнех сущим, похвальная восписуем вам, заступником нашим и в скорбех помощником: вы бо сосуди благодати суще, исцеляете душевныя и телесныя наша язвы. Темже славяще Бога, дивнаго во святых Своих, вас усердно ублажаем:
     Радуйтеся, Космо и Дамиане, святии безсребренницы и преславнии чудотворцы.

Икос 1
     Ангельскому жительству поревновавше, вся земная презрели есте и, подвигом мученичества венчавшеся, лицезрения Господа сил сподобилися есте. Молитеся убо за ны прилежно, к помощи вашей притекающих и похвальная вам вопиющих:
     Радуйтеся, молитвенницы теплии о чтущих святую память вашу;
     Радуйтеся, оставленных врачами неоскудно исцеляющии.
     Радуйтеся, яко дом, имение и вся родителей стяжания ни во чтоже вменили есте;
     Радуйтеся, нищия милосердием вашим препитавшии.
     Радуйтеся, страждущия сердоболием утешавшии;
     Радуйтеся, чистотою и святостию Ангелом уподобившиися.
     Радуйтеся, светильницы Божественнаго света;
     Радуйтеся, небеснии человецы, земнии Ангели.
     Радуйтеся, яко христианом есте прибежище непостыдное;
     Радуйтеся, все житие свое даже до последняго издыхания в служении Господу истощившии.
     Радуйтеся, всесветлое благодати приятелище, Духа Святаго сосуди;
     Радуйтеся, всем, призывающим вас, скории помощницы.
     Радуйтеся, Космо и Дамиане, святии безсребренницы и преславнии чудотворцы.

Кондак 2
     Видя Господь Бог добрая ваша начинания и велие ко благочестию усердие ваше, яко вся земная и благая мира сего уметы вменивше, в непрестаннем труде любве ради ближняго пребысте и души своя благими нравы украсили есте, преисполни вас Духа Святаго, Егоже лучею озаритися и нам испросите у Христа Бога, да купно с вами поем Ему: Аллилуиа.

Икос 2
     Разумом истиннаго богопознания царя нечестиваго научили есте, вразумив того силою словес ваших, имиже дерзновенно Христа проповедаете. Темже дерзновение ваше похваляюще, взываем сице:
     Радуйтеся, лестию нечестиваго царя не уловленнии;
     Радуйтеся, истину Христову дерзновенно пред ним исповедавшии.
     Радуйтеся, прещения его не убоявшиися;
     Радуйтеся, нечестивых соборища посрамившии.
     Радуйтеся, небоязненнии проповедницы истины;
     Радуйтеся, служения идольскаго потребителие.
     Радуйтеся, веры православныя поборницы;
     Радуйтеся, исповедницы непоколебимии, духа терпения и ревности о славе Божией исполненнии.
     Радуйтеся, немолчнии велений Господних провозвестницы;
     Радуйтеся, вернии наставницы богомудрия.
     Радуйтеся, Царствия Христова надежднии нам ходатаи;
     Радуйтеся, и по смерти вашей нас не оставляющии.
     Радуйтеся, Космо и Дамиане, святии безсребренницы и преславнии чудотворцы.

Кондак 3
     Силою Вышняго, данною вам еще во временней жизни, прияли есте власть чудесно исцеляти всякия недуги; по смерти же вашей наипаче прослави вас Бог многими чудотворении, да вси притекаим к вам, молящеся о исцелении от недугов телесных, паче же душевных, и Богу велегласно вопием: Аллилуиа.

Икос 3
     Имуще, яко многоценное сокровище, многоцелебныя мощи ваша, радуемся и, любовию воспевающе данную вам от Бога благодать исцелений, благодарно зовем:
     Радуйтеся, теплии о нас к Богу предстателие;
     Радуйтеся, еллинская мудрования ни во чтоже вменившии.
     Радуйтеся, Рима светильницы всесветлии;
     Радуйтеся, омраченных стран просветителие.
     Радуйтеся, мужества и терпения наставницы;
     Радуйтеся, яко неповинне каменное побиение претерпевше, кончину мученическую улучили есте.
     Радуйтеся, любве ради Христовы пострадавшии, и нас небесных благ причастники приимите;
     Радуйтеся, раби Божии, от Господа Христа венцы победы приемшии.
     Радуйтеся, дивный и прекрасный смирения и кротости образ всем показавшии;
     Радуйтеся, непоколебимое православия основание.
     Радуйтеся, светлая страстотерпцев славо;
     Радуйтеся, добрии целебницы, ни от когоже мзды за исцеления вземшии.
     Радуйтеся, Космо и Дамиане, святии безсребренницы и преславнии чудотворцы.

Кондак 4
     Буря ярости велия царя Карина не возможе поколебати души вашея, и егда вернии в некоей пещере вас скрыта от яти вас ищущих, волею воином предстали есте, вопиюще: нас поимите, мы бо есмы ихже ищете, неповинных же отпустите. Таже веригами обложени бывше, в Рим отведостеся. Мы же, веру вашу и вериги лобызающе, поем Богу: Аллилуиа.

Икос 4
     Слышавше римстии людие велию вашу ко страждущим любовь и чудесное врачевание ваше, отвсюду устремляхуся к вам с верою в целебную благодать Божию, в вас действующую; приемлюще же скорое исцеление, прославляху Бога, вас же, милосердых целителей своих, величаху, воспевая сице:
     Радуйтеся, Бога истиннаго непреборимии проповедницы;
     Радуйтеся, оружие креста Христова добропобедно вземшии.
     Радуйтеся, блазии врачеве, страждущим скории помощницы;
     Радуйтеся, вся немощныя туне врачующии.
     Радуйтеся, и ныне исцеления обильно источающии;
     Радуйтеся, милостивии утешителие в бедах и скорбех сущим.
     Радуйтеся, во всяких обстояниих нас защищающии;
     Радуйтеся, безпомощных спасительное призрение.
     Радуйтеся, праведных преславное украшение;
     Радуйтеся, предстательство наше крепкое.
     Радуйтеся, прилежнии о нас к Богу молитвенницы;
     Радуйтеся, всем, верою призывающим вас, скории помощницы.
     Радуйтеся, Космо и Дамиане, святии безсребренницы и преславнии чудотворцы.

Кондак 5
     Боготечным воистинну путем шествовасте, раби Христовы, егда во узах в Рим ведоми, за еже идолом не послужисте, Христови же единому поработасте, горькая испытания терпели есте, святии; но вся претерпесте за возлюбльшаго вас Христа. Темже великому терпению и крепцей любви вашей ко Господу дивящеся, купно с вами поем Ему: Аллилуиа.

Икос 5
     Видев царь, яко силою Христовою исцеле, хвалу Тому воздаде; мы же, славяще Бога, ублажаем вас, славных угодников Его, вопиюще сице:
     Радуйтеся, горняя паче дольних возлюбившии;
     Радуйтеся, ангельскому житию на земли поревновавшии.
     Радуйтеся, яко, многобожие отринувше, родительскаго благочестия не отступили есте;
     Радуйтеся, яко вся имения своя, по словеси Господню, нищим раздали есте, да Христа приобрящете.
     Радуйтеся, не словом точию, но множае паче делом и непрестанною к Богу молитвою иных поучившии;
     Радуйтеся, неоскудный источник исцелений и ныне являющии.
     Радуйтеся, излиянием чудес, данных вам от Бога, нас обогащающии;
     Радуйтеся, в самих себе храм Богу уготовавшии.
     Радуйтеся, скорое нищих услышание;
     Радуйтеся, скорбных приятное попечение.
     Радуйтеся, ненадежных известное надеяние;
     Радуйтеся, болящих скорое врачевание.
     Радуйтеся, Космо и Дамиане, святии безсребренницы и преславнии чудотворцы.

Кондак 6
     Проповедницы имене Христова в животе своем бывше, и ныне силу того свидетельствуете чудесы, от иконы вашея источаемыми, и якоже веры иногда жены некия не презресте, но во сне явльшеся ей, облегчение в недузе даровали есте; сице и наших молений и пений гласы услышите, о, святии безсребренницы! Вере же и любви людей ваших внемлите и покров нам свыше даруйте, хвалящим вас и поющим Богу: Аллилуиа.

Икос 6
     Возсия, яко свет, правда ваша, егда укоряема на судищи царя, дерзновенно рекосте к нему: не волшебною хитростию врачуем болезни, но силою Спаса нашего Иисуса Христа, якоже Той заповеда, глаголя: болящия исцеляйте, прокаженныя очищайте, туне прияете, туне дадите. Темже дерзновению вашему дивящеся, ублажаем вас сими:
     Радуйтеся, образ твердости и веры нам показавшии;
     Радуйтеся, райския радости присно наслаждающиися.
     Радуйтеся, премудрии сеятелие благочестия;
     Радуйтеся, славнии проповедницы православия.
     Радуйтеся, учителие, к небеси наставляющии;
     Радуйтеся, чистаго и непорочнаго жития неусыпнии хранителие.
     Радуйтеся, теплии послушателие молящихся вам;
     Радуйтеся, ко спасению изящнии и вернии путеводителие.
     Радуйтеся, благочестно и богоугодно жити хотящим блазии наставницы;
     Радуйтеся, ходатаи благих всем, почитающим память вашу.
     Радуйтеся, добре течение свое скончавшии;
     Радуйтеся, венцы правды от Владыки Христа приявшии.
     Радуйтеся, Космо и Дамиане, святии безсребренницы и преславнии чудотворцы.

Кондак 7
     Хотяще силу Христову злочестивому царю открыти, Духа Святаго исполнени рекосте: буди посрамлен, о Карине, и с богами твоими! И абие ему лице изменися, и выя совратися, и, молящеся к вам, глаголя: се ныне вижду, яко раби есте истиннаго Бога. Молю убо вас, да якоже иных уврачевасте, сице исцелите и мене, да и аз купно с вами воспою Богу: Аллилуиа.

Икос 7
     Дивнии о нас молитвенницы, целителие душ и телес наших и ходатаи спасения вечнаго, благодарным сердцем воспевающе хвалебную песнь Богу, даровавшему нам таковых великих чудотворцев, приносим и вам похвалы сицевыя:
     Радуйтеся, Ангелов терпением вашим удивившии;
     Радуйтеся, божественным сиянием чудес своих вся просветившии.
     Радуйтеся, скории от всяких болезней и безмезднии врачеве;
     Радуйтеся, заступлением вашим разслабленныя исцеляющии.
     Радуйтеся, от неисцельных болезней здравы воздвизающии;
     Радуйтеся, достойне совершившии земный подвиг жития вашего.
     Радуйтеся, о нас, обнаженных добрых дел, присно к Богу предстательствующии;
     Радуйтеся, яко сиянием премудрости, от Господа вам данныя, всех верных просвещаете.
     Радуйтеся, молитвенницы о нас и заступницы наши предивнии;
     Радуйтеся, доблии страстотерпцы Христовы.
     Радуйтеся, кровми своими землю освятившии;
     Радуйтеся, идольское безумие обличившии.
     Радуйтеся, Космо и Дамиане, святии безсребренницы и преславнии чудотворцы.

Кондак 8
     Странное мирови житие ваше видяще, устранимся и мы того сует и, ум на небеса преложше, возопиим к вам, святии безсребренницы: утолите болезни, источая благодатная врачевания всем, усердно к помощи вашей притекающим и вопиющим Богу: Аллилуиа.

Икос 8
     Все житие ваше на земли любовию к Богу и к ближним исполнивше, святии безсребренницы Космо и Дамиане, скории и ныне помощники являетеся всем, с верою призывающим вас; не точию бо близ притекающим ко святым мощем вашим, но и далече сущим исцеления источаете. Темже приносим вам похвалы сия:
     Радуйтеся, Единому Богу, в Троице славимому, верно послужившии;
     Радуйтеся, единое еже на потребу премудро избравшии.
     Радуйтеся, яко в неустанном труде и подвизе дни и нощи ваша без всякаго уныния препроводили есте;
     Радуйтеся, яко ситцевым вашим тесным и скорбным житием славу Божию в человецех умножили есте.
     Радуйтеся, доблии Христовы последователие;
     Радуйтеся, яко научители и творцы Христовых заповедей явилися есте.
     Радуйтеся, яко именами велиих в Царствии Небеснем наречени бысте;
     Радуйтеся, славою Христовою весь мир озарившии.
     Радуйтеся, яко страданием вашим безстрастие прияли есте;
     Радуйтеся, яко мученическою смертию безсмертие стяжали есте.
     Радуйтеся, яко Ангели, на небеси и на земли прославленнии;
     Радуйтеся, яко Богу ныне венценосни предстоите.
     Радуйтеся, Космо и Дамиане, святии безсребренницы и преславнии чудотворцы.

Кондак 9
     Всякое естество человеческое удивися сиянию в вас благодати Божией, святии Космо и Дамиане, егда нечестивый царь Карин, узрев чудеса, от имени Господа Иисуса Христа вами творимая, уверова и прослави Бога. Темже и мы, славяще давшаго вам сицевую силу, поем Ему: Аллилуиа.

Икос 9
     Вития многовещанная недоумеют довольно изобразити обилие любве вашея, еюже преисполнени бысте, святии угодницы, к человеком о Господе. Сего ради из глубины сердец наших вопием к вам:
     Радуйтеся, Господу своему даже до смерти поработавшии;
     Радуйтеся, огнем любве Божия воспаляеми, огнь жертв идольских угасившии.
     Радуйтеся, ближняго паче самих себе возлюбившии;
     Радуйтеся, яко болящия и недужныя посещали есте.
     Радуйтеся, нужды убогих предварявшии;
     Радуйтеся, печальных утешителие.
     Радуйтеся, отчаянных заступницы;
     Радуйтеся, сирых питателие.
     Радуйтеся, люте страждущим помощницы;
     Радуйтеся, угнетенных свободителие.
     Радуйтеся, яко, добре течение скончавше, ко Христу вознесостеся;
     Радуйтеся, яко в Царствии Его водворяетеся.
     Радуйтеся, Космо и Дамиане, святии безсребренницы и преславнии чудотворцы.

Кондак 10
     Спасти хотя многия, яви нам Господь вы, чудотворцы Своя: кто бо не умилится, видя ваше безмерное ко всем сострадание; кто ли вы не ублажит, яко не токмо человеки от недуг исцеляете, но и скоты милуете; не отрините убо и наших молитв, но на вся ны неоскудно великия и богатыя ваша милости излейте, да вопием Богу: Аллилуиа.

Икос 10
     Стены есте всем, похваляющим чудеса ваша, о безмизднецы, и к заступлению вашему прибегающим; стены и забрала есте, ограждающия от всех бед, усердно в помощь вас призывающим. Темже убо и нас от нищеты, напастей, недугов и скорбей оградите, молимся и тепле вопием к вам:
     Радуйтеся, адамантов крепость в терпении превозшедшии;
     Радуйтеся, неповинно от зависти сребролюбца пострадавшии.
     Радуйтеся, славнии в бедах заступницы;
     Радуйтеся, немощных и обидимых укрепление.
     Радуйтеся, крепцыи в напастех защитителие;
     Радуйтеся, убогих и нищих всещедрии обогатителие.
     Радуйтеся, алчущих милостивии кормителие;
     Радуйтеся, болезньми и тяжкими недуги одержимых премудрии уврачевателие.
     Радуйтеся, с верою к вам притекающим от всех скорбных обстояний теплии защитителие;
     Радуйтеся, яко память ваша всеми славима на земли.
     Радуйтеся, яко имена ваша написана суть на Небесех;
     Радуйтеся, яко от Бога препрославлени есте.
     Радуйтеся, Космо и Дамиане, святии безсребренницы и преславнии чудотворцы.

Кондак 11
     Пение всеумиленное, ныне нами приносимое, несть довольно к похвалению преславных подвигов и трудов ваших, яже Христа ради подъяли есте в животе своем; обаче дерзающе просим, усердное моление наше приемше, и нас от бед своими молитвами избавите, да умиленным сердцем воспоим Богу: Аллилуиа.

Икос 11
     Светозарный и небесный ум явили есте иногда пред Карином, заблуждение того обличая; ныне же нетлением мощей ваших и множеством чудес православие утверждаете. Темже благодарственно зовем:
     Радуйтеся, Ипостасное Слово дерзновенно проповедавшии;
     Радуйтеся, силу идольскую добропобедно упразднившии.
     Радуйтеся, яко вами попрася служение бесом;
     Радуйтеся, яко вами поклонение Христу проповедася.
     Радуйтеся, учителие премудрии;
     Радуйтеся, всех добродетелей неленостные исполнителие.
     Радуйтеся, яко по трудех земных в селениих небесных ликовствуете;
     Радуйтеся, яко и по преставлении своем нас не оставляете.
     Радуйтеся, яко всем, с верою призывающим вас скорую помощь подаете;
     Радуйтеся, святии врачеве, яко болезни наша исцеляете.
     Радуйтеся, молитвы верных не отревающии;
     Радуйтеся, и о нас недостойных у Престола Божия ходатайствующии.
     Радуйтеся, Космо и Дамиане, святии безсребренницы и преславнии чудотворцы.

Кондак 12
     Благодать, юже даде вам Господь Бог, целити вся недуги душевныя же и телесныя, днесь собра нас, да почтим память вашу, святии безсребренницы Космо и Дамиане, благоговейно убо взирающе на честную икону вашу и со умилением сердца к ней припадающе, молим избавитися всем нам от всяких зол и болезней, да воспоем вси Богу: Аллилуиа.

Икос 12
     Поюще чудеса ваша, восхваляем труды и подвиги, ублажаем мученическую кончину, почитаем ходатайство и сильное заступление ваше о всех, требующих помощи вашея; величаем подателя всех благ Бога, даровавшаго нам толико дивных молитвенников, и со умилением зовем:
     Радуйтеся, Иисуса Господа верно проповедавшии;
     Радуйтеся, истины Его доблии свидетелие.
     Радуйтеся, теплии о нас у Престола Его предстатели;
     Радуйтеся, телес наших благосострадательнии врачеве.
     Радуйтеся, Царствия Небеснаго и вечных благих наследницы;
     Радуйтеся, по Бозе все наше упование.
     Радуйтеся, миро благовонное исцелений источающии;
     Радуйтеся, страстей злосмрадие молитвами своими отревающии.
     Радуйтеся, исцелений дателие и чудес источницы;
     Радуйтеся, светоноснии столпи церковнии и забрала недвижимая.
     Радуйтеся, винограда истинного божественныя лозы;
     Радуйтеся, двоице световидная мудрых безсребренников.
     Радуйтеся, Космо и Дамиане, святии безсребренницы и преславнии чудотворцы.

Кондак 13
     О предивнии безсребренницы, чудотворцы, целителие и славнии угодницы Божии, Космо и Дамиане, приимите моления сия наша, от сокрушеннаго сердца возносимая; исцелите многообразныя недуги наша и теплым предстательством вашим испросите нам от Христа Бога избавление от всех бед и напастей, прощение прегрешений наших и благую надежду вечнаго спасения, да сподобимся с вами и со всеми святыми в безконечныя веки воспевати Богу, Спасителю нашему: Аллилуиа.
Этот кондак читается трижды, затем икос 1-й и кондак 1-й

Молитва святым бессребреникам и чудотворцам Косме и Дамиану
     Чудотворцы славнии, врачеве безмезднии, Космо и Дамиане! Вы от юности Христа Бога возлюбивше и Того повеления всем сердцем соблюдающи, аще и вдасте себе учению врачебному, но добродетельнаго ради жития и чистоты душевныя, силою Христа Бога, не врачевания токмо искусство, но паче неоскудную благодать исцеления всяких недугов от Бога прияли есте. Отонюдуже любовию и милосердием к недугующим подвизаеми, не токмо людем, но и скотом исцеления болезней подаваете, неисчетным множеством чудес ваших весь мир наполняете, и не телесныя токмо недуги исцеляете, но и верою Христовою души просвещаете, в терпении болезней укрепляете, в тяжких недузех о исправлении жития вразумляете и ко Христу покаянием привлекаете. Тем же ныне и нас, припадающих к Вам пред честною иконою вашею, скоро услышите, юныя дети, вашей помощи во учении книжном просящия, вашими молитвами наставите, да вашему житию ревнующе, не земное точию научение приобрящут, но паче во благочестии и правой вере выну да преуспеют. На одре болезни лежащим, человеческая помощи отчаянным, к вам же тепле с верою и усердною молитвою прибегающим, исцеление болезней вашим милостивым, чудодейственным посещением даруйте. Многажды в болезни впадающия и от лютых недугов в уныние, малодушие и роптание пришедшия, данною вам от Бога благодатию в терпении утвердите, и наставите, да уразумеют волю о них Божию святую и благую и сами себе и живот свой воли Христа Бога предают. В недузех сущих, о исправлении же жития не радящих, во гресех не раскаивающихся, сердцем ожесточенных сокрушите во спасение и к покаянию призовите, да немощни суще телом, здрави пребудут душею, и причастницы соделаются Божия спасительныя благодати. Братию Святаго Храма сего, вашему Святому заступлению от Бога врученную, и всех к вам усердно прибегающих невредимы сохраните от долгонедужия, от болезней лютых и неисцельных, от разслабления тела, от иступления ума, от смертоносныя язвы, от внезапныя смерти, и всемощным ходатайством вашим к Богу соблюдите в правой вере твердых, во благочестии преспевающих, в добрых делах усердных, в молитве к Богу прилежных, да с Вами вкупе сподобятся в будущем веце присно воспевати и славити всесвятое и великолепое имя Отца, и Сына, и Святаго духа, во веки веков. Аминь.

Тропарь безсребреникам Косме и Дамиану
Тропарь, глас 8:
     Святии безсребреницы и чудотворцы, Космо и Дамиане, посетите немощи наша: туне приясте, туне дадите нам.

Кондак, глас 2:
     Благодать приимше исцелений, простираете здравие сущим в нуждах, врачеве, чудотворцы преславнии, но вашим посещением ратников дерзости низложите, мир исцеляющи чудесы.

Величание
     Величаем вас, чудотворцы славнии, Космо и Дамиане, и чтим святую память вашу, наставницы заблуждшим, исцелители болящим и собеседницы Ангелом.

Ино величание
     Величаем вас, чудотворцы славнии, Космо и Дамиане, и чтим святую память вашу, наставницы заблуждшим, исцелители болящим и собеседницы ангелом.
 

Акафисты zvonnitsa.ru/orthodoxy/akafisti/416/13324/

Кондак 1
     Избранней в последняя лета от народов Российских, Божией праведнице, страннице Петрова града, Христа ради телом и духом обнищавшей, и юроду себе сотворшей составим похвалу. Ты же, о блаженная мати, яко имущи ко грешным милосердие велие, не возгнушайся молением нашим, да вси взываем: Радуйся, блаженная мати Ксение, молений наших скорая послушательнице!

Икос 1
     Ангельския Силы возрадовашася на небесех, зряще тебе, новую угодницу Божию, земною воинствующею Церковью прославляему и многи люди от жития твоего Евангельскому благочестию поучающияся. Мы же, аще и недовольно вемы о житии твоем, обаче добродетельми твоими во гресех обличаеми и просвещаеми, радующеся, тя восхваляем:
     Радуйся, Ксение блаженная, на небесех ныне истинно блаженствующая;
     Радуйся, Русския земли благовонный крине;
     Радуйся, града Святаго Петра достойное украшение;
     Радуйся, горлице Божия, себе в благоуханную жертву принесшая;
     Радуйся, ластовице Богогласная, многим сладкую весну покаяния и спасения возвестившая;
     Радуйся, страннице Господня, странничеству духовному ны научающая;
     Радуйся, звездо-путеводительнице наша к Мысленному Солнцу;
     Радуйся, немощным христианом последних времен утверждение и утешение;
     Радуйся, к падшим на дно погибели милостивно нисходящая;
     Радуйся, и мене, помраченнаго, светом Христовы веры просветившая;
     Радуйся, токмо помыслившим о тебе скорейшую помощь подающая;
     Радуйся, и не ведущим тя чудесне пособствующая;
     Радуйся, блаженная мати Ксение, молений наших скорая послушательнице!

Кондак 2
     Видяще родители твои и сродницы такову младу отроковицу Богом им даровану, здравием и лепотою украшену, веселящеся к пастырю церковному текоша, иже тя святым Крещением просвети и в честь преподобныя странницы Ксении-Римляныни нарече. Или бысть тамо некий Божий человек, иже будущая твоя исправления провиде, или иным образом Господь рабы Своя вразуми, да тако тя возыменуют, обаче по имени твоему бысть житие твое. Мы же, Богу, о всех и о всем промышляющему, взываем: Аллилуия.

Икос 2
     Разум недоумеющ, о Ксение, имамы о делех Божиих, в тебе явленных, и что есть буйство о Христе и Духа Свята дарования. Аще и не вемы, кто есть, иже тя в Божественнем законе настави, и каково бысть во младенчестве и возрасте девичестем житие твое, обаче веруем, яко ревностно во благочестии пожила еси, и яко чрез все житие твое воспитоваше тя Всесвятый Господь, тесным путем рабы Своя ведый, во еже возмощи ти скорбь невольную и подвиг вольный понести. Сего ради возглашаем ти сицевая:
     Радуйся, Святей Руси дщере истинная, духом тоя напитанная;
     Радуйся, некоего славнаго рода отрасле благоуханная;
     Радуйся, храма Божия теплая рачителънице;
     Радуйся, молитвы, милостыни и всякаго доброделания добрая любительнице;
     Радуйся, благочестивыми наставники во истиннем христианстем житии назданная;
     Радуйся, в чистоте, послушании и смирении юность проводившая;
     Радуйся, в честнем супружестве достойне жившая;
     Радуйся, внезапу овдовевши, превелию ревность о Господе возымевшая;
     Радуйся, во едином часе огнем Божия любве измененная и на подвиг вышеестественный изведенная;
     Радуйся, четыредесятъ и пять лет в подвизе проведшая;
     Радуйся, того ради благодать велию помогати верным стяжавшая;
     Радуйся, на небеси Церковнем, яко новая звезда пресветло воссиявшая;
     Радуйся, блаженная мати Ксение, молений наших скорая послушательнице!

Кондак 3
     Сила Вышняго яве осени тогда Ксению, егда супруг ея, здрав и крепок сый, внезапу, спасительнаго Таинства не прием, скончася. Абие отверзошася тогда очи душевней двадесятошестолетней вдовице, и вся суета и тление привременнаго мира сего до конца обнажишася. Сердце же ея печалию разгарашеся, еда како вечнаго спасения супруг не улучит. Темже себе умрети, вместо же того жити, покаяние приносящи в злостраданиих и молитве непрестанней изволила еси. Воле же Господней вся предала еси, поющи Тому: Аллилуия.

Икос 3
     Имущи, о Ксение, истинную в Бозе ко искреннему любовь, не плотскую, но паче духовную, уныние и мрачную печаль попрала еси, и мужним именем нарекшися, весело на подвиг тяжкий исшла еси, токмо на Единаго Бога и Пречистую Богородицу надеющися. Тем же мы, мужеству твоему дивящеся, воспеваем:
     Радуйся, с прежнею одеждею всея воли своея и разума совлекшаяся;
     Радуйся, с мужнею одеждею в терпение скорбей за того облекшаяся;
     Радуйся, яко стяжала еси тую любовь, больше коея никтоже имать;
     Радуйся, воистину душу за искренняго положшая;
     Радуйся, не себе ктому, но Христу и ближнему жившая;
     Радуйся, самый разум, яко начаток, благоприятне Богу принесшая;
     Радуйся, яко образовательне мужеским именем себе нарекла еси;
     Радуйся, яко женскую немощь отвергши, блаженным мужем соделалася еси;
     Радуйся, тленное имение гладным и нищим расточившая;
     Радуйся, сего ради в сокровищех небесных часть улучившая;
     Радуйся, самое жилище твое отдавшая, да вечную обитель обрящеши;
     Радуйся, не токмо избыточнаго чесо, но и самаго насущнаго не имевшая;
     Радуйся, блаженная мати Ксение, молений наших скорая послушательнице!

Кондак 4
     Бурею гнева и недоумения сродницы и знаемии твои смятошася, уведевше, яко ты вся имения твоя бедным расточаеши и, в мужнюю одежду облекшися, нища по стогнам града скитаешися, Андреем Федоровичем нарицающися и Ксениею глашати тя воспрещающи. Егда же тщахуся неции препятствовати ти, безумною тя именуя, Сам Господь Сил защити тя, да вси тобою ущедреннии возгласят: Аллилуиа.

Икос 4
     Слышавше благочестивии людие Петрова града, яко знатная вдовица Ксения нища и яко безумна по граду скитается, дивляхуся зело. Познавше же дивныя ея кротость, незлобие и смирение, еще же зноя и дождя, ветра и мраза, и поношении от злых человек вышеестественное терпение, паче же помощь чудодейственную от тоя бываемую, разумеша в ней истинную угодницу Божию и возопиша тако:
     Радуйся, в стужу в рубище и необувена ходившая, не имущи, где главы подклонити;
     Радуйся, яко токмо благодать Божия согреяние тебе бысть;
     Радуйся, злая поношения и надсмеяния от неразумных благодарне терпевшая;
     Радуйся, сладость молитвы за обидящих благодатне вкушавшая;
     Радуйся, на телесная и душевная страдания произвольне себе обрекшая;
     Радуйся, яко познала еси смирения Христова в души твоей благодатное действие;
     Радуйся, терпением лютых к состраданию многих подвигшая;
     Радуйся, благодеяния телеси твоему отвергавшая;
     Радуйся, приятыя тобою лепты абие прочим нищим подававшая;
     Радуйся, великому блаженному Андрею добре поревновавшая;
     Радуйся, на всяку нощь, в лето и зимний мраз коленопреклоненне вне града молившаяся;
     Радуйся, яко бысть молитва твоя, яко крове излияние;
     Радуйся, блаженная мати Ксение, молений наших скорая послушательнице!

Кондак 5
     Боготечною звездою моею дерзаю нарещи тя, о блаженная! Ты бо иногда образом честнаго жития твоего к Церкве истинней твердо мя привлекла еси, о твоей любве, самоотвержении и нищете уведевшаго. Аще же и ныне леностне во блате страстей низлежу, к самому деланию заповедей Господних доселе не приступая, чуждым смиреннаго Духа Христова и всякия добродетели обретаяся, но молю тя, нашу скоропослушницу: очи душевнеи всеяснейше отверзи ми и ко истинному покаянию настави, да, спасыйся, с тобою воспою Богови: Аллилуия.

Икос 5
     Видим в тебе, о мати Ксение, вернейший образ истиннаго Христу последования: самую бо душу твою возненавидевши, вся вящшая Евангельская заповедания в совершенней мере исполнила еси, изряднейший образ самоотвержения, простоты, кротости, всепрощения, милосердия и любве показующи. Обычныя же всим человеком скорби нивочтоже ты вменила еси, сугубейший крест юродства о Христе и от мира поругания подъемши, совершеннаго смирения ради. Темже таковыя песненныя венцы соплетем ти:
     Радуйся, истинная ученице Христова, путь творения заповедей Его яве указующая;
     Радуйся, в хладности и погибельнем нерадении тем ны обличающая;
     Радуйся, пред всякою тварию себе нивочтоже вменившая и всем под нозе себе повергшая;
     Радуйся, о чужих гресех, якоже о своих, злострадания, плач и моления Богу принесшая;
     Радуйся, не токмо небо, но и любовь к тебе людей наследившая и чрез сие к благотворениям тех привлекшая;
     Радуйся, правды Божией, а не человечестей ревностне взыскавшая;
     Радуйся, яко болезнованием о страждущих сердце твое раздирашеся;
     Радуйся, ангельским житием преискренне Богообщение стяжавшая;
     Радуйся, дщере Господня истинная, в домех верных мир и любовь водворившая;
     Радуйся, праведнаго обличения нетерпящими люте изгнонимая;
     Радуйся, яко выну хулима, стужаема и преследуема от бесов и злых человеков была еси;
     Радуйся, по словеси Господню, яко мзда твоя велия на небесех;
     Радуйся, блаженная мати Ксение, молений наших скорая послушательнице!

Кондак 6
     Проповедница Евангелия деятельная, о блаженная, явилася еси, чудесы многими свидетельствующи, яко едина есть вера истинная — Святая Православная, и един к Богу путь — добродетельное житие и во гресех покаяние. Тако бо купечестей жене близкую кончину предрекла еси, огнь же в доме жены благочестивыя молитвою твоею угасила еси, рекши: возьми пятак, зде Царь на коне,— потухнет; врача же, кончиною супружницы сокрушенна, утешила еси, подружие верное прозорливо тому пославши. Вся же научила еси непрестанно взывати Богу: Аллилуия.

Икос 6
     Воссия в тебе, о мати Ксение, яснейший свет благодати Духа Свята, егда, якоже инии глаголют, пребыла еси негде осмь лет духоносными старцы в подвизе твоем наставляема. Егда же паки во град Петров возвратилася еси, всяческими дары изобилующи, тогда наипаче явилася еси скорбящим — теплое утешение, болящим — врачевание, обидимым — заступление, нищим — обогащение, грешным — обличение и обращение, заблуждшим — на путь истинный возвращение, известия о грядущих или упреждения некоего требующим — истинная пророчица и воли Божией возвестительница, бедствия отвращающая. Вси же, помощь тобою обретшии, благочестно навыкоша вопити тебе тако:
     Радуйся, духовную помощь подающая и в насущных нуждех не оставляющая;
     Радуйся, во всяцем деле блазе добрая наша споспешнице;
     Радуйся, тайне нощию тяжкия камения для строения церковнаго носившая;
     Радуйся, купцем и возницем в делех преспеяние чудесне подававшая;
     Радуйся, всюду свет утешения и мира расточавшая;
     Радуйся, яко всякому месту и дому посещение твое благословение Божие бысть;
     Радуйся, страждущим и немощным младенцем, токмо коснувшися, исцеление подававшая;
     Радуйся, яко тобою одинокие — подружий, сироты — матерей обретаху;
     Радуйся, Царей благочестивых, яко Помазанников Божиих почитавшая;
     Радуйся, кровопролитие при Царстем дворе провидевши, горце восплакавшая;
     Радуйся, яко, аможе аще ты входила еси, тамо обретаху вси помощь и заступление;
     Радуйся, теплая о нас молитвеннице;
     Радуйся, блаженная мати Ксение, молений наших скорая послушательнице!

Кондак 7
     Хотящим безумным отроком блаженную не токмо злыми словесы поношати, но и камением побити, внезапу устремися на ня, тростию яростне угрожающи. Вемы, о Ксение, яко не плотский гнев на сие подвиже тя, но веление Божие, еже от нас сокровенно, тебе же ведомо есть. Мнози убо делы святых мнятся миру соблазн быти, обаче по Бозе суть соделана. Мним, яко бысть сие, да потщатся людие милостивии от всякия обиды ограждати тя, или во образ ревности твоея противу духов нечистых и злых помыслов, или — да не помыслят ктому сии жестокосердии и инаго кого тако обидети. Мы же, выну гневом греховным и яростию побеждающиися, всеми сими наказани бывше, воспоим Богови: Аллилуия.

Икос 7
     Дивни твои глаголи явишася благочестивей Параскеве, еже: гряди на Смоленское кладбище, яко Господь ти сына послал есть. Обаче, верою к тебе понуждаема, скоро тамо тече и обрете новорожденно отроча, матере своея лишившееся, еже возрасте и бысть ей чадо доброе и послушливое, старости же ея упокоение. Таковое твое благодеяние воспоминающе, возглашаху тии:
     Радуйся, Божия милосердия к нам посланнице;
     Радуйся, яко всеблагий Того промысл тобою явися;
     Радуйся, благаго и спасительнаго жития нашего на земли устроительнице;
     Радуйся, о достойнем нашем к вечности приготовлении попечительнице;
     Радуйся, от деяний погрешительных или пустых нас удержавающая;
     Радуйся, благотворити ближним, непрестанне молитися и каятися ны подвизающая;
     Радуйся, многажды свое покровительство являющая;
     Радуйся, последствия грехопадений наших изглаждающая;
     Радуйся, от бед, напастей и обстояний наше ограждение;
     Радуйся, наглыя смерти отвращение;
     Радуйся, избавления муки вечныя наша ходатаице;
     Радуйся, на Страшнем Судищи Господни твердая наша надеждо;
     Радуйся, блаженная мати Ксение, молений наших скорая послушательнице!

Кондак 8
     Странна и пришелица на земли, о Ксение, пожила еси и, достойне течение скончавши, уз плоти твоея разрешилася еси, да выну со Христом будеши. Егда же на месте подвигов твоих, Смоленстем кладбище, погребению предана была еси, многия тысящи православных тамо притекаху, самую насыпь могильную на всякое лето на благословение разбирающе, земля бо тая обильне чудеса и исцеления источаше. Еще же и каменныя плиты, усердствующими положенныя, на мелкия части раздробиша помощи от тебе требующия. Обаче на лепты, теми оставляемыя, часовня на могиле твоей сооружена бысть, да вси чтущии тя возгласят: Аллилуия.

Икос 8
     Весь ум к Богу выну, о Ксение, ты имела еси. Аще же и образ иноческий восприяти недостойною себе помышляла еси, обаче житие поистине равноангельное проводила еси: всецелое от мира отречение, дивную чистоту, превелие самоотвержение, глубину смирения и высоту рассуждения, совершенную воле Божией преданность и любовь показующи, окрест же тебе уже благочестию оскудевающу и самому монашеству немоществовати наченшу. Сего ради вси монаси и целомудрия рачителие, изрядную любовь и веру к тебе имеюще, непрестанно воспевают:
     Радуйся, со апостолом и со пророком странницей и пришелицей в земнем изгнании пребывшая;
     Радуйся, яко по имени твоему бысть житие твое;
     Радуйся, выну ко отечеству небесному текшая;
     Радуйся, очи душевнеи непрестанно ко Горнему Иерусалиму имевшая;
     Радуйся, со святым Павлом мир себе и себе миру пропявшая;
     Радуйся, умершею себе именовавшая, мертвость миру сему и совершенную память смертную показующи;
     Радуйся, сыном мира отребие бывшая;
     Радуйся, человеком не угождавшая, да истинная раба Божия будеши;
     Радуйся, вси ступени Божественныя лествицы совершенства христианскаго претекшая;
     Радуйся, деятельными восхожденьми в видение первее и послежде в чертог небесный вшедшая;
     Радуйся, яко праведне блаженною именуешися;
     Радуйся, яко законне в подвизе юродства подвизавшися, блаженство неизреченное на небесех улучила еси;
     Радуйся, блаженная мати Ксение, молений наших скорая послушательнице!

Кондак 9
     Всякую надежду на сыны человеческия оставиша родители и сродницы трилетния отроковицы, вредом ушесе мучимыя, егда рекоша врачеве, яко аще не умрет, обаче слышати никакоже возможет. Егда же помазана бе отроковица елеем от блаженныя Ксении, пению заупокойному по той сотворену, абие страданий избавлена и совершенне исцелена бысть. Такожде и крестьянская жена, тяжко зубы страждущая, и военачальник, хождения лишенный, в храме твоем, Ксение, во единем часе недугов избавишася и воспеша весело: Аллилуия.

Икос 9
     Ветия суемудреннии подвига юродства ради Христа разумети не могут, слово бо крестное погибающим юродство есть: иудействующим — соблазн, язычником же и невером — безумие; самих же явных чудес благодати Господней сии вси безумне отвергаются, очеса и слухи затворяюще. Мы же, буйими о Христе со апостолом быти некогда чающе, части же Евангельских юродивых дев тщащеся убежати, святей блаженной Ксении воспеваем:
     Радуйся, мнящихся о себе мудрыми быти в безумии изобличающая;
     Радуйся, простых и смиренных рассудительными являющая;
     Радуйся, токмо обряды блюдущих, силы же благочестия отвергшихся вразумляющая;
     Радуйся, хладным и маловерным нам очеса душевная отверзающая;
     Радуйся, равнодушных от сна нечувствия восставляющая;
     Радуйся, смиритися под крепкую руку Господню и во всем Богу предатися ны побуждающая;
     Радуйся, тесный путь Креста Господня велегласно прославляющая;
     Радуйся, безропотне и благодарне вся скорбная терпети понуждающая;
     Радуйся, токмо себе самех во всех приключающихся виновными разумети научающая;
     Радуйся, от противления судьбам Господним, малодушия, ропота и уныния опасне предостерегающая;
     Радуйся, плотский разум, на Евангельский закон воздымающийся, посрамляющая;
     Радуйся, в смятении, страсе и отчаянии сущих умиротворяющая;
     Радуйся, блаженная мати Ксение, молений наших скорая послушательнице!

Кондак 10
     Спасти некогда восхотела еси воина юнаго от лютыя безвременныя кончины и вечныя погибели, аще и не ведяше о тебе, ниже Божией помощи призываше, — беша бо безбожная времена и гонения на Церковь Божию воздымашася. Сего ради в подклети дома некоего внезапу явилася еси ему, абие изыти оттуду повелевающи, храмина бо та вражеским орудием име разрушитися; себе же тому блаженною Ксениею наименовала еси. Егда же, многим летом минувшим, уведе воин, кто еси и где покоятся мощи твоя, радостно благодаряше Бога, взывая: Аллилуия.

Икос 10
     Стену нерушиму обретоша тя мнози жены и матери заблуждших и недугом пиянства отягченных: ты бо иногда чтившия тя дщери купеческия мужа, в пиянстве ожесточившася, страшным видением обличила еси, к твердому покаянию наставльши, самаго со чады огненнаго запаления избавльши, вместо же лютыя нужды и отчаяния, мир, благополучие и достаток сим доставивши. Темже и ныне в пагубе пиянства пребывающии и погибельными зелиями одурманеннии, к тебе, яко к последнему прибежищу притекают и тщи николиже от тебе отходят, с ними же и мы возглашаем:
     Радуйся, падших и заблуждших к Богу водительнице;
     Радуйся, всякаго порока, лукавства и лжи горькая обличительнице;
     Радуйся, из бездны падения чудесне восставляющая;
     Радуйся, со даром покаяния и земная благая щедре дарующая;
     Радуйся, чтущим тя чрез все житие многажды пособляющая;
     Радуйся, простым и знатным, в лишениих жилище и пропитание скоро доставляющая;
     Радуйся, кощунника некоего многими скорбьми, нищетою и гладом мудре наказавшая;
     Радуйся, токмо к покаянию обращшагося того абие ущедрившая и упокоившая;
     Радуйся, жене-полковнице тщетне о научении чад пекущейся непризываемая явившаяся;
     Радуйся, абие по исполнении повеленнаго тобою желаемое пославшая;
     Радуйся, самаго Государя Александра Третияго от смертнаго одра восставившая и о рождении дщери Ксении супруге того прорекшая;
     Радуйся, велию любовь твою и ныне на сродники земныя изливающая;
     Радуйся, блаженная мати Ксение, молений наших скорая послушательнице!

Кондак 11
     Пение неумолчное подобает приносити Господу за вся нам приключающаяся, добрая и злая, и восхвалити милости Его, чрез святых являемыя. Не токмо 6о в Российстей стране, но и в дальней Америце блаженная Ксения о чтущих ю попечение являет. Тако некая жена, в самодвижней колеснице со дщерию и зятем едущи, внезапу узре колесницу на краю страшныя пропасти; разумев же, яко не возможет водящаго остановити, абие ко блаженным Ксении и Пелагии мысленно воззва, и чудесне колесница удержана и невредимо повернута бе. Сего ради из глубины души благодарственне возгласиша тии: Аллилуия.

Икос 11
     Световодящую лучу зрим тя, о блаженная, во мраце последних времен, во тьме неведения нашего и забвения; яко овцы бо расточени есмы, и несть пророка или вождя, и мали суть истиннии советницы; токмо книги Святых Отец и жития угодников Божиих к научению имамы и в молебники тыя Господу усердне предлагаем, тебе же, единей от тех, с надеждею взываем:
     Радуйся, в годину лютую гонений беззаконным художеством века сего во храме твоем творитися не допустившая;
     Радуйся, христианом гонимым и во узах держимым верною помощию бывшая;
     Радуйся, пришедших помолитися тебе от злобных приставников избавльшая;
     Радуйся, затворену сущу храму твоему, чрез стены и землицу благодатная исцеления подававшая;
     Радуйся, чтущих тя ко взаимному назиданию и пользе тогда и ныне купно собирающая;
     Радуйся, заблуждшим юным, в неверии ожесточившимся, руку спасения простирающая;
     Радуйся, неверами прельщенным наследником безбожных времен ко благочестию мосте;
     Радуйся, в поисках Истины мятущимся доброе обретение;
     Радуйся, сомнений, недоумений и обстояний наших разрешение;
     Радуйся, тончайшаго гласа совести нашея выну послушати научающая;
     Радуйся, и ныне, якоже прежде, чудотворящая;
     Радуйся, яко чтущая тя девица Ксения, за всенощным бдением в память твою молишися, нечаемей смерти избавлена бысть;
     Радуйся, блаженная мати Ксение, молений наших скорая послушательнице!

Кондак 12
     Благодать подаждь ми, Даяй всяцей души брашно духовное, да не буду токмо плоть и кровь, и уразумею путь духовный, и возмогу прославити блаженную Ксению, толикую благодать Твою стяжавшую, яко страсти и недузи, и лукавии дуси трепетни и ужасни от нея отбегаху и ктому не возвращахуся, да взывают вси православнии людие Господеви: Аллилуия.

Икос 12
     Поющи Бога не оскудевай, душе моя, дондеже живеши, якоже и блаженная Ксения творяше, и сего ради ныне на небесех выну воспевает Господа и молится, во еже нам, немощным, благая не токмо глаголати, но и творити, и неуклонне и непреткновенне путем Господних повелений ходити. Темже сице ея прославляем:
     Радуйся, подвигом скитальчества твоего велицей преподобной Марии подобная;
     Радуйся, благодать велию, якоже и тая, стяжавшая;
     Радуйся, яко чтут тя православнии народи купно с древними велицыми чудотворцы;
     Радуйся, яко вси, любовью к тебе привлекаемии, изрядную пользу душам получают;
     Радуйся, немощствующим иноком последних времен в недоумениих ясное вразумление;
     Радуйся, утонченных козней лукаваго в нынешнем веце изобличение;
     Радуйся, многострадальней России ясносветящая звездо;
     Радуйся, града Святаго Петра и всих градов и весей русских теплейшая печальнице;
     Радуйся, отпадшим от церковнаго единства Российским чадом покаяния всемощная просительнице;
     Радуйся, гласа вечности в сердцах наших неумолчная возвестительнице;
     Радуйся, всем умом, помышлением и всею крепостию Бога возлюбити вся ны наставляющая;
     Радуйся, вся собрати во едино и ко Истине и блаженству вечному привести всеусильне тщащаяся;
     Радуйся, блаженная мати Ксение, молений наших скорая послушательнице!

Кондак 13
     О, святая блаженная мати Ксение, страннице Петрова града и наследнице горняго Иерусалима! Нынешнее наше приими убогое моление и теплейше Господа умоли: избавити нас нечувствия и сердечнаго ожесточения, даровати же нам плач и умиление, исполнити милосердия и смирения, и тако вся нам простити и помиловати нас, да с тобою купно во блаженстве вечнем воспеваем выну: Аллилуия, Аллилуия, Аллилуия!
Этот кондак читается трижды, затем 1-й икос «Ангельския Силы возрадовахуся...» и 1-й кондак «Избранней в последняя лета...».

МОЛИТВА блаженной Ксении Петербургской
     О, святая блаженная мати Ксение, страннице града Святаго Петра и всея России и всих православных народов дивная печальнице и чудотворице! Ты велиим и тяжким подвигом славы ради Божия на земли подвизалася еси, образ безумия на всеобщее посмеяние носящи, телесная же страдания, глад и хлад, жажду и наготу, и человечская и демонская стужания терпящи, благодать же Духа Святаго пребогатую еще в земнем житии стяжала еси. Сего ради сицевою благолепотою краснаго жития твоего, такожде и чудесы, многи и неверныя просветила еси и доселе просвещаеши, верным же многая всеразличная вспоможения, исцеления, утешения и всякая иная благодеяния подаеши.
     Темже и мы, немощнии и всякому злу и нечистоте причастнии, отонудуже во многи скорби, обстояния и болезни впадшии, скорая и безотказная, и щедрая твоя вспоможения добре ведуще, с теплейшею верою и любовию к тебе притекаем и усердно молим: испроси нам твоими благоприятными ко Господу молитвами наипаче вся ко спасению благопотребная: разум к познанию заповедей Божиих просвети, сердце в твердой воли ко благочестию утверди, руце наша на благая деяния вооружи, возбрани же всякому нашему ко греху поползновению, мир Христов, всяк ум преимущ, и царство небесное, еже внутрь нас, даруй, такожде и многообразныя язвы наша уврачуй, от обстояний разреши, и всея жизни нашея течение исправи. Ближним нашим помощь Божию, просвещение духовное и телесных недугов свобождение подаждь. Вся ны от лютых агарянских нашествии защити, плененныя свирепыми безбожники братия наша свободи и порази безумную и богоборную врагов гордыню. Гладным же и немощным, бесприютным и всеми оставленным вся благопотребная душевная и телесная даруй. Не имущим жилища или места, идеже труждатися, пропитания ради, тая подаждь. Да вси прославим Бога, дивнаго во святых Своих, и твое милостивное предстательство, во веки веков. Аминь.

Тропарь блаженной Ксении Петербургской
Тропарь, глас 7:
     Нищету Христову возлюбивши, безсмертныя трапезы ныне наслаждаешися, безумием мнимым безумие мира обличивши, смирением крестным силу Божию восприяла еси. Сего ради дар чудодейственныя помощи стяжавшая, Ксение блаженная, моли Христа Бога избавитися нам от всякаго зла покаянием.

Ин тропарь, глас 6:
     Мудрость высшую соуза брачнаго разумевая, раба Божия Ксение, Боговенчанный брак уцеломудрила еси, тем плоды покаяния возрастила еси, блаженство о Христе, яко талант, преумножив, Заимодавцу Благому возврати, Тойже богатством чудес тя одари, недуги целити и души спасати, поминающих тя.

Ин тропарь, глас 4:
     Суеты земнаго мира отвергшися, крест жития бездомнаго во странничестве прияла еси, скорбей, лишений, людскаго осмеяния не убоялася еси, любовь же Христову познала еси, еюже ныне на небеси услаждаешися, Ксение, блаженная богомудрая, молися о спасении душ наших.

Ин тропарь, глас 8:
     Тебе, о страннице, яви нам Христос Господь молитвенницу теплую за род наш, в житии бо твоем страдания и скорби восприявши, Богу же и человеком любовию послуживши, дерзновение велие стяжала еси. Темже тебе в напастех и скорбех усердно прибегаем, из глубины сердец наших взывающе: упования нашего не посрами, Ксение блаженная.

Кондак, глас 3:
     Днесь светло ликует град святаго Петра, яко множество скорбящих обретают утешение, на твоя молитвы надеющеся, Ксение всеблаженная, ты бо еси граду сему похвала и утверждение.

Ин кондак, глас 1:
     Юродством о Христе суемудрия века устранися, странствуя к Царству Премирному, Андреезвавшаяся, одежды падения праматери совлеклася еси, поругания порфиру царскую стяжала еси. Темже совершенную любовь твою ублажаем, раны сострадательныя твоя лобызаем, юродство Крестное твое величаем, мати блаженная Ксение.

Ин кондак, глас 3:
     На земли яко странна пребывши, о Небеснем же отечествии воздыхающи, юрода от буиих и неверных, премудра же и свята от верных познаваешися, и от Бога славою и честию венчавшися, Ксение мужеумная и богоумная, сего ради зовем ти: радуйся, яко по странствии земнем в дому Отчем водворяешися.

Величание
     Ублажаем тя, святая блаженная мати Ксение, и чтим святую память твою, ты бо молиши за нас Христа Бога нашего.

Акафисты zvonnitsa.ru/orthodoxy/akafisti/284/13326/

Кондак 1
     Избранная угодница и Христа ради юродивая, святая блаженная мати Ксения, избравшая подвиг терпения и злострадания, хвалебное пение приносим ти, чтущия святую память твою. Ты же заступи нас от враг видимых и невидимых, да зовем ти:
     Радуйся, Ксения блаженная, молитвенница о душах наших.

Икос 1
     Равноангельского жития взыскала еси, блаженная мати, по успении мужа твоего отвергла еси мира сего красоту и вся, яже в нем: похоть очес, похоть плоти и гордость житейскую, юродством разум Христов стяжала еси. Того ради услыши от нас похвалы, тебе возносимые:
     Радуйся, житием твоим Андрею, Христа ради юродивому равная;
     Радуйся, имени своего отрекшаяся, себе же умершей именовавшая.
     Радуйся, в юродстве имя мужа твоего Андрея приявшая;
     Радуйся, именем мужеским назвавшись, немощи женской отрешившаяся.
     Радуйся, все имение твое добрым людям и нищим раздавшая;
     Радуйся, нищету добровольную Христа ради приявшая.
     Радуйся, века сего суемудрия юродством твоим отвергатися нас научившая;
     Радуйся, благая утешительнице всех, в молитве к тебе прибегающих.
     Радуйся, Ксения блаженная, молитвенница о душах наших.

Кондак 2
     Видя странное твое житие, яко ты презрела еси дом свой и всякое мирское богатство, родные по плоти безумной тя полагаху, людие же града Петрова, видя смирение твое, нестяжание и вольную нищету, воспели Богу: Аллилуиа.

Икос 2
     Разум, от Бога тебе данный, ты, Ксения блаженная, в мнимом безумии скрыла еси; в суете града великого аки пустынница жила еси, молитвы Богу свои вознося непрестанно. Мы же, дивящеся таковому житию твоему, взываем тебе хвалебно:
     Радуйся, крест тяжкий юродства, от Бога тебе данный, на рамо свое принявшая;
     Радуйся, мнимым безумием сияние благодати скрывавшая.
     Радуйся, дар прозорливости смирением крайним и подвигом молитвы стяжавшая;
     Радуйся, дар сей на пользу и спасение страждущих являвшая.
     Радуйся, страдания людския прозорливо в дали необозримей зревшая;
     Радуйся, жене доброй о рождении сына прорекшая.
     Радуйся, яко жене той у Бога чадо испросившая;
     Радуйся, всех к Богу в молитве прибегати научившая.
     Радуйся, Ксения блаженная, молитвенница о душах наших.

Кондак 3
     Силою свыше, от Бога тебе дарованной, зной и люту стужу мужественно претерпевала еси, распиная плоть свою со страстьми и похотьми. Тем же Духом Святым просвещаемая, взывала непрестанно Богу: Аллилуиа.

Икос 3
     Имея, о блаженная, небо покровом себе, землю же ложем своим, отвергла еси плотоугодие Царства Божия ради. Мы же, зряще таковое твое житие, со умилением зовем ти:
     Радуйся, жилище свое земное людям отдавшая;
     Радуйся, небесного крова взыскавшая и получившая.
     Радуйся, ничто же земное имущая, а всех духовно богатящая;
     Радуйся, житием своим терпению нас научающая.
     Радуйся, любовь Божию людям показующая;
     Радуйся, плодами благочестия украшенная.
     Радуйся, терпение и незлобие миру явившая;
     Радуйся, теплая предстательница наша пред престолом Всевышнего.
     Радуйся, Ксения блаженная, молитвенница о душах наших.

Кондак 4
     Бурю житейскую, во граде Петрове мятущуюся, кротостию и незлобием преодолела еси, блаженная мати, бесстрастие же к тленному миру стяжала еси. Тем же и поеши Богу: Аллилуиа.

Икос 4
     Слыша о тебе, яко ты, злостражда Христа ради, скорбных утешаеши, немощных укрепляеши, заблудших на путь правый наставляеши, людие страждущия к помощи твоей прибегаху, воспевающе тебе:
     Радуйся, путь Христов всем сердцем возлюбившая;
     Радуйся, крест Христов радостно понесшая.
     Радуйся, всякое поношение от мира, плоти и диавола претерпевшая;
     Радуйся, даров Божиих преисполненная.
     Радуйся, любовь к ближним явившая;
     Радуйся, страждущим людям утешение подававшая.
     Радуйся, слезу плачущих отиравшая;
     Радуйся, благодатию Духа Святаго чудесно согреваемая.
     Радуйся, Ксения блаженная, молитвенница о душах наших.

Кондак 5
     Боготечной звездой явилася святость твоя, Ксения блаженная, осветившая небосклон града Петрова. Уже бо людем, гибнущим в безумии греха, ты явила путь спасения, всех к покаянию призывая, во еже вопити Богу: Аллилуиа.

Икос 5
     Видя подвиги твоя в молитве, терпении хлада и зноя, благочестивые люди пытахуся умалити страдания твоя, одежду тебе и пищу приносяще. Ты же вся сия нищим раздавала еси, желая в тайне подвиг свой сохранити. Мы же, дивяся вольней нищете твоей, взываем ти сице:
     Радуйся, зной и стужу Христа ради добровольно терпевшая;
     Радуйся, в молитве непрестанно пребывавшая.
     Радуйся, град Петров всенощным бдением от бед ограждавшая;
     Радуйся, гнев Божий многажды от него отвращавшая.
     Радуйся, во все дни года ночами в поле молившаяся;
     Радуйся, сладость райскую в нищете духовной вкусившая.
     Радуйся, яко в сладости сей вся земная оставившая;
     Радуйся, яко вся в Боге пребывавшая.
     Радуйся, Ксения блаженная, молитвенница о душах наших.

Кондак 6
     Проповедуют святость жития твоего, богоблаженная, вси избавленнии тобой от многоразличных болезней, бед и скорбей, богатии и убозии, старцы и юныя. Тем же и мы, прославляюще тя, Богу вопием: Аллилуиа.

Икос 6
     Воссияла слава подвигов твоих, блаженная мати, егда ты нощию строителям церкви Смоленской камни тайно носила еси, облегчая делателей церковных. Сия ведуще, и мы грешнии зовем ти таковая:
     Радуйся, тайно творити добродетели нас научающая;
     Радуйся, к подвигам благочестия всех призывающая.
     Радуйся, строителям храмов Божиих помогающая;
     Радуйся, святость церковную возлюбившая.
     Радуйся, труды наши на пути спасения облегчающая;
     Радуйся, к тебе прибегающих скорая помощница.
     Радуйся, всем скорбящим благая утешительница;
     Радуйся, града Петрова небесная заступница.
     Радуйся, Ксения блаженная, молитвенница о душах наших.

Кондак 7
     Хотя избавити от скорби плачущаго врача, жену хоронившего, ты повелела некоей девице на Охту бежати и тамо мужа себе обрести и утешити. И совершишася тако, якоже ты рекла еси. Они же в радости воспеша Богу: Аллилуиа.

Икос 7
     Новое чудо в молитве своей показала еси ты, блаженная мати, егда рекла еси жене благочестивой: «Возьми пятак, потухнет». Сим прорекла ей о пожаре дома ея. И по молитве твоей пламень огня угасе. Мы же, ведяще сия, вопием ти похвальная:
     Радуйся, скорби людские угашающая;
     Радуйся, дерзновение пред Богом за страждущих явившая.
     Радуйся, свеча неугасимая, в молитвах к Богу ярко горящая;
     Радуйся, предстательница наша в бедах и напастях.
     Радуйся, страстьми одержимых от гибели спасающая;
     Радуйся, благочестивых дев от брака неверного отвращающая.
     Радуйся, клеветою уязвленных от отчаяния избавляющая;
     Радуйся, на суде неправедном скорая защитница.
     Радуйся, Ксения блаженная, молитвенница о душах наших.

Кондак 8
     Странницей бездомной прошла еси путь жизни твоей в стольном граде отечества нашего, в велицем терпении скорби и поношения неся. Ныне же в горнем Иерусалиме пребывая, в радости поеши Богу: Аллилуиа.

Икос 8
     Всем вся была еси, Ксения блаженная: скорбящим утешение, немощным покров и защищение, печальным радование, нищим одеяние, болящим исцеление. Сего ради и вопием тебе:
     Радуйся, в горних, обителях пребывающая;
     Радуйся, о нас грешных тамо молящаяся.
     Радуйся, благий образ служения Богу явившая;
     Радуйся, униженных и гонимых покровительница.
     Радуйся, православный люд молитвами твоими заступающая;
     Радуйся, обидимых и молящихся тебе защищающая.
     Радуйся, обидящих вразумляющая;
     Радуйся, неверных и глумителей посрамляющая.
     Радуйся, Ксения блаженная, молитвенница о душах наших.

Кондак 9
     Всякия претерпела еси болезни, блаженная мати, нищету телесную, глад и жажду, еще же и поношение от людей беззаконных, иже мняху тя безумной быти. Ты же, Господу моляся, выну взывала Ему: Аллилуиа.

Икос 9
     Вития многовещанныя не могут разумети, како ты безумием своим безумие мира сего обличила еси и немощию своею посрамила еси крепкия и мудрыя. Не ведают бо в тебе Божией силы и Божией премудрости. Мы же, помощь твою получившия, поем ти таковая:
     Радуйся, Божественного Духа носительница;
     Радуйся, со апостолом Павлом немощию своею хвалившаяся.
     Радуйся, мнимым безумием своим мир обличившая;
     Радуйся, красоту века своего спасения ради отвергшая.
     Радуйся, небесная блага всем сердцем возлюбившая;
     Радуйся, на путь спасения нас призывающая.
     Радуйся, во грехе пьянства грозная обличительница;
     Радуйся, безмездным врачом и милостивым всем бывшая.
     Радуйся, Ксения блаженная, молитвенница о душах наших.

Кондак 10
     Хотя спасти душу, ты плоть свою со страстьми и похотьми распяла еси и, невозвратно себя отвергши, крест свой на рама своя возложила еси и Христу всем сердцем последовала еси, поя Ему: Аллилуиа.

Икос 10
     Стена еси твердая и прибежище необоримое явилась молящимся тебе, мати Ксения. Тем же заступай и нас от враг видимых и невидимых молитвами твоими, да зовем ти:
     Радуйся, на труд духовный нас воздвигающая;
     Радуйся, от сетей вражиих нас избавляющая.
     Радуйся, фимиам кадильный, Богу приносимый;
     Радуйся, мир Божий в сердца людей приносящая.
     Радуйся, дух злобы в сердцах озлобленных угашающая;
     Радуйся, детям благим благословение подающая.
     Радуйся, тайною молитвою их от болезней исцеляющая;
     Радуйся, миру озлобленному мудрость Божию явившая.
     Радуйся, Ксения блаженная, молитвенница о душах наших.

Кондак 11
     Пение хвалебное приносят ти, Ксения блаженная, спасшиеся твоими молитвами от бед и скорбей, и всяких напастей, и купно с тобою радостно поют Богу: Аллилуиа.

Икос 11
     Светозарным светом явилось житие твое, святая мати, во мраке жития сего освещающим люди. Ты бо падших из тины греха избавила еси и к свету Христову направила еси путь их. Тем же и зовем ти:
     Радуйся, православных людей Божиим светом просвещающая:
     Радуйся, Христова угодница, в мире надмирно пожившая.
     Радуйся, труды многими великую благодать стяжавшая;
     Радуйся, во тьме греха благодатию Божиею сиявшая.
     Радуйся, отчаявшимся на пути спасения руку помощи подающая;
     Радуйся, немощных в вере укрепляющая.
     Радуйся, духов злобы посрамляющая;
     Радуйся, житием своим ангелов удивившая.
     Радуйся, Ксения блаженная, молитвенница о душах наших.

Кондак 12
     Благодать обильно источаеши, Ксения блаженная, на чтущих память твою и прибегающих к покрову твоему. Тем же и нам, тебе молящимся, источи от Бога струи исцеления, да зовем Ему: Аллилуиа.

Икос 12
     Поюще многая чудеса твоя, блаженная мати, восхваляем тя и всеусердно молим, не остави нас грешных в скорбных обстояниях, но умоли Господа сил, да не отпадем от веры нашея православныя, в Нем же тобою утверждаеми зовем ти:
     Радуйся, сострадати страждущим нас научающая;
     Радуйся, немощи наша всеусердно врачующая.
     Радуйся, распинати плоть со страстьми и похотьми научающая;
     Радуйся, о чтущих память твою ходатаице и покровительнице.
     Радуйся, скорбный путь прошедшая;
     Радуйся, спасение вечное сим улучившая.
     Радуйся, ко гробу твоему притекающим отраду подающая;
     Радуйся, о спасении Отечества нашего присно ходатайствующая.
     Радуйся, Ксения блаженная, молитвенница о душах наших.

Кондак 13
     О святая блаженная мати Ксение, в житии твоем крест тяжкий понесшая. Приими от нас, грешных, моление сие, к тебе приносимое. Огради нас молитвами твоими от наветов духов тьмы и всех, мыслящих нам злая. Умоли всещедрого Бога подати нам силу и крепость, да кийждо от нас возьмет крест свой и во след Христу грядет, поя Ему с тобою: Аллилуиа.
Этот кондак читается трижды, затем икос 1 и кондак 1

Молитва к блаженной Ксении Петербургской
     О святая всеблаженная мати Ксение! Под покровом Всевышняго жившая, ведомая и укрепляемая Богоматерью, голод и жажду, холод и зной, поношения и гонения претерпевшая, дар прозорливости и чудотворения от Бога получила еси и под сенью Всемогущего покоишися. Ныне святая Церковь, яко благоуханный цвет, прославляет тя. Предстояще на месте твоего погребения, пред образом твоим святым, яко живей ти, сущей с нами, молимся ти: приими прошения наша и принеси их ко престолу милосерднаго Отца Небеснаго, яко дерзновение к Нему имущая, испроси притекающим к тебе вечное спасение, на благая дела и начинания наша щедрое благословение, от всяких бед и скорбей избавление. Предстани святыми твоими молитвами пред Всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом святого крещения озарити и печатию дара Духа Святаго запечатлети, отроки и отроковицы в вере, честности, богобоязненности воспитати и успехи в учении им даровати; болящия и недугующия исцели, семейным любовь и согласие ниспосли, монашествующих подвигом добрым подвизатися удостой и от поношений огради, пастыри в крепости Духа Святаго утверди, народ и страну нашу в мире и безмятежии сохрани, о лишенных в предсмертный час причащения Святых Христовых Тайн умоли. Ты наша надежда и упование, скорое услышание и избавление, тебе благодарение воссылаем и с тобою славим Отца и Сына и Святаго Духа, ныне и присно, и во веки веков. Аминь.

Молитва иная
     О препростая образом жития своего, бездомная на земли, наследнице же обителей Отца Небеснаго, блаженная страннице Ксение! Якоже прежде к надгробию твоему недужнии и скорбнии припадавшии и абие утешениями исполняемии, сице ныне и мы (имена), обуреваемии тлетворными обстоянии, тебе прибегающе, с надеждою просим: помолися, благая небошественнице, дабы исправилися стопы наша по словеси Господню к деланию заповедей Его, и да упразднится богоборное безбожие, пленившее град твой и страну твою, повергающее нас, многогрешных, в смертное братоненавидение, гордое самовозбешение и хульное отчаяние. О, блаженнейшая Христа ради, посрамившая суемудрость века сего, испроси у Творца и Подателя всяческих благ даровати нам смирения, кротости и любве в сокровище сердца нашего, веры в укрепление молитвы, надежды в покаянии, крепости в многотрудном житии, милосерднаго исцеления души и тела нашего, целомудрия в супружестве и благопопечения о ближних и искренних своих, всего жития нашего обновление в чистительней бане покаяния, яко да всехвально воспевающе память твою, прославим в тебе чудодействующаго, Отца и Сына и Святаго Духа, Троицу Единосущную и Нераздельную во веки веков. Аминь.

Молитва третья
     О преславная святая блаженная мати наша Ксение, теплая о нас пред Богом молитвеннице! Якоже прежде к надгробию твоему припадавшии, сице ныне и мы по прославлении твоем к мощем твоим прибегающе, просим: помолися Господу, да освятит наши души и телеса, да просветит ум, очистит совесть от всякия скверны, нечистых помыслов, лукавых и хульных умышлений и от всякаго превозношения, гордости же и кичения, высокоумия же и дерзости, от всякаго фарисейскаго лицемерия, и от всякаго студнаго и лукаваго обычия нашего; да дарует нам искреннее покаяние, сокрушение сердец наших, смиренномудрие, кротость же и тихость, благоговение, разум же духовный со всяким благоразумием и благодарением. Утаившая себе от мудрых века сего, но Богу знаемая, испроси же стране нашей Российстей от бед лютых избавление, всего нашего жития обновление и исправление, соблюди нас во всяком благочестивом православном исповедании веры христианския, яко да ублажающе тя сподобимся во вся дни воспевати, благодарити и славити Отца и Сына и Святаго Духа, Троицу Единосущную, Животворящую и Нераздельную во веки веков. Аминь.

Молитва четвертая
     О святая угодница Божия блаженная Ксения! Призри милостиво твоим оком на нас, раб Божиих (имена), честной твоей иконе умильно молящиеся и просящие у тебе помощи и заступления. Простри ко Господу Богу нашему теплыя твоя молитвы и испроси душам нашим оставление прегрешений. Се бо мы сердцем сокрушенным, и духом смиренным тебе ходатаицу милостивую ко Владыце и молитвенницу за ны, грешныя, призываем, яко ты прияла еси от Него благодать молитися за ны и от бед избавляти. Тебе убо просим, не презри нас недостойных, молящихся тебе и твоей помощи требующих, и исходатайствуй всем вся ко спасению полезная, яко да твоими ко Господу Богу молитвами получивши благодать и милость прославим всех благих Источника и Дароподателя и Бога Единаго, в Троице Святей славимаго. Отца и Сына и Святаго Духа, ныне и присно и во веки веков.

Тропарь к святой блаженной Ксении Петербургской
Тропарь, глас 7:
     Нищету Христову возлюбивши, безсмертныя трапезы ныне наслаждаешися, безумием мнимым безумие мира обличивши, смирением крестным силу Божию восприяла еси. Сего ради дар чудодейственныя помощи стяжавшая, Ксение блаженная, моли Христа Бога избавитися нам от всякаго зла покаянием.

Кондак, глас 3:
     Днесь светло ликует град святаго Петра, яко множество скорбящих обретает утешение, на твоя молитвы надеющеся, Ксение всеблаженная, ты бо еси граду сему похвало и утверждение.

Величание
     Величаем тя, святая блаженная мати наша Ксение, и чтим святую память твою, ты бо молиши за ны Христа Бога нашего.

Акафисты zvonnitsa.ru/orthodoxy/akafisti/284/13328/

Кондак 1
     Избранная угоднице Христова, святая блаженная Ксение, хвалебное пение ти приносим, чтуще терпение твое и злострадание вольное: ты же, имеющи дерзновение ко Господу, во всяких бедах и напастех заступай нас грешных, взывающих к тебе:
     Радуйся, Ксение блаженная, молитвеннице о душах наших.

Икос 1
     Равноангельски на земли пожила еси, блаженная мати, по успении мужа твоего, без приуготовления христианскаго внезапу скончавшегося, отвергла еси жизнь мирскую, молящи Бога супруга твоего душу помиловати, подвиг юродства на себе приявши, стяжала еси совершенство духовное. Того ради услыши от нас похвалы сия, тебе возносимыя:
     Радуйся, Христова угоднице, в мире надмирно пожившая.
     Pадуйся вся прилоги мира, плоти и диавола победившая.
     Радуйся, нищету вольную на всю жизнь избравшая.
     Pадуйся, сокровище на небеси имети возжелавшая.
     Радуйся, житием твоим Андрею Христа ради юродивому, равная.
     Pадуйся, от всех людей православных любимая и славимая.
     Радуйся, о часе смертнем помнити нас призывающая.
     Pадуйся, ближняго душу паче мира сего любити нас научающая.
     Радуйся, Ксение блаженная, молитвеннице о душах наших.

Кондак 2
     Видяще странное житие твое, блаженная, яко во цвете младости твоея во одежду мужа твоего усопшаго облеклася еси, именем его нареклася еси, себе умершую быти глаголющи, дом же твой и вся благая земная оставивши, скиталицу себе сотворила ей, сродницы твои безумную тя быти мняху, людие же боголюбивии воспеша: Аллилуия.

Икос 2
     Разум, от Бога ти дарованный, в безумии мнимом сокрыла еси, блаженная Ксение: в суете же града великаго, аки пустынница пребывала еси, молитвы своя к Богу возносящи непрестанно. Мы же, дивящеся житию твоему, воспеваем ти сице:
     Радуйся, крест тяжкий юродства, от Бога ти данный, на рамо свое приявшая.
     Pадуйся, мнимым безумием сияние благодати сокрывшая.
     Радуйся, именем мужеским нарекшися, немощи женския отрешившаяся.
     Pадуйся, печали и скорби кротце терпевшая.
     Радуйся, все имение твое бедным людем раздавшая.
     Pадуйся, жилище Духу Святому в сердце твоем уготовившая.
     Радуйся, всем прибегающым к тебе благое утешение.
     Pадуйся, от смерти внезапныя избавление.
     Радуйся, Ксение блаженная, молитвеннице о душах наших.

Кондак 3
     Силою, свыше ти дарованною, благодатию и мужеством, зной и стужу лютую претерпевала еси, всенощно молящися и поклоны творящи: темже и прославлена бысть святость твоя, блаженная Ксение, во Отечестве нашем многострадальнем и во всем мире православнем, да зовем с тобою Богу: Аллилуиа.

Икос 3
     Имела еси, о мати блаженная, небо покров и землю ложе свое: о теле, во одежду ветхую облеченнем, небрегла еси, молитвы же к Богу пламенне возносила еси, сего ради воспеваем ти сице:
     Радуйся, век твой земный без крова проведшая.
     Pадуйся, небеснаго крова взыскавшая и того улучившая.
     Радуйся, по вся дни нощию в поли молившаяся.
     Pадуйся, поклоны земныя на вся страны света тамо творившая.
     Радуйся, град Петров всенощным бдением от бед ограждавшая.
     Pадуйся, гнев Божий от него многажды отвращавшая.
     Радуйся, благодатию Духа Святаго чудесно согреваемая.
     Pадуйся, хлад лютый душ наших молитвою твоею растаявающая.
     Радуйся, Ксение блаженная, молитвеннице о душах наших.

Кондак 4
     Бурю житейскую, на стогнах града твоего мятущуюся, кротостию и незлобием препобеждала еси, мати блаженная: безстрастие же посреде мира суетнаго стяжала еси, и тако, Духом Святым просвещаемая, взывала еси Подателю тишины сердечныя Богу: Аллилуиа.

Икос 4
     Слышаша людие дар прозрения чудный, тобою явленный, святая мати, и дивишася. Се, жене некоей рекла еси: «Возми пятак, — зде царь на коне, — потухнет». Та же не ведающи, яко ты запаление дома ея прозрела еси, притече во своя си и узре дом свой во огни горящ: и абие по молитве твоей пламень огня угасе. Мнози же страждущии к помощи твоей прибегаху, юже стяжавше, тако взываша ти:
     Радуйся, дар прозрения смирением крайним стяжавшая.
     Pадуйся, дар сей на пользу и спасение страждущым являвшая.
     Радуйся, свеще негасимая, к Богу в молитвах горевшая.
     Pадуйся, верою твоею пламенною запаление домов угашавшая.
     Радуйся, грядущыя скорби людския аки настоящыя зревшая.
     Pадуйся, врач безмездный и милосердый людем бывшая.
     Радуйся, яко и нас, немощных в вере, укрепляеши.
     Pадуйся, яко сиянием святости твоея люди православныя озаряеши.
     Радуйся, Ксение блаженная, молитвеннице о душах наших.

Кондак 5
     Боготечная звезда явися святость твоя на тверди града Петрова, угоднице Божия, зарею своею сердца просвещающая: уже бо людем, в безумии греха погибающым, путь спасения указала еси, к покаянию их наставляющи, во еже вопити Богу: Аллилуиа.

Икос 5
     Видяще подвиги твоя молитвенныя, терпение хлада и зноя великое, людие ослабити желаху злострадания твоя: ты же одежду и вся, ими приносимая, нищым раздавала еси, нищету свою, аки сокровище, храняще. Сего ради слышиши от нас сицевая:
     Радуйся, богатство твое токмо в любви к Богу и ближним полагавшая.
     Pадуйся, ничтоже земное имевшая и всех духовно богатившая.
     Радуйся, милостивым твоим сердцем страждущым сострадавшая.
     Pадуйся, помощь им чрез добрых людей посылавшая.
     Радуйся, чуждая миру, в мире живущым благо творившая.
     Pадуйся, века сего суемудрия отвергатися научившая.
     Радуйся, плакати с плачущими нас подвигающая.
     Pадуйся, от тяжкаго сна греховнаго пробуждающая.
     Радуйся, Ксение блаженная, молитвеннице о душах наших.

Кондак 6
     Проповедана бысть святость жития твоего блаженная, жителем града твоего, егда ты о младенце еще не рождшемся пекущися, жене добрей, в доме тобою дарованном, жившей, рекла еси: «Бог тебе сына посла, теки на кладбище Смоленское!» Тая же со тщанием притекши, сироту, рожденна материю, внезапу на пути пострадавшею и скончавшеюся, в дом свой прияла есть: вся же лета жития своего, тебе благодаряще, сия семья благодатная Богу Человеколюбцу взываше: Аллилуиа.

Икос 6
     Возсияла есть слава подвигов твоих, блаженная мати Ксение, егда нощию на верх храма Смоленскаго камение, таящися, носила еси, дому Пречистей возградитися пособствующи. Ныне же вси молящиися во святем храме сем и во всем мире Божием, взирающе на образ твой, воспевают ти таковая:
     Радуйся, тайно творити добро научающая.
     Pадуйся, к подвигом благочестия всех призывающая.
     Радуйся, строителем храмов Божиих помогающая.
     Pадуйся, святыню церковную возлюбившая.
     Радуйся, в делех благих усердное поспешение.
     Pадуйся, трудов наших на пути спасения облегчение.
     Радуйся, под кровом Божия Матере подвиги творившая, и тако почившая.
     Pадуйся, с Нею ныне на Небесех о нас Христа молящая.
     Радуйся, Ксение блаженная, молитвеннице о душах наших.

Кондак 7
     Хотяще судьбы людския во благая устроити, повелела еси деве кротцей на Охту тещи, прорекши, яко «муж твой тамо жену погребает». Та же, аще и недоумевашеся, обаче не ослушася глагола твоего, и тамо вдовца млада, над гробом жены рыдавшаго сретила есть и утешение в молитве ему подаде. Лету же минувшу, она венчастася, и тако многая лета в любви и согласии поживше, чад своих наставляху тебе, святая мати, чтити, Богу же воспевати песнь: Аллилуиа.

Икос 7
     Новое чудо показала еси, блаженная, посреде скверны людския душу твою, юродством сокрытую, в кротости ангельстей соблюдши. Научи и нас, мати Ксение, и малыя доли скорбей твоих не терпящих и в ропоте на Бога и ближняго дни наша иждивающих, вся свыше посылаемая в терпении сносити, да взирающе на подвиги твоя, чистым сердцем зовем ти сице:
     Радуйся, миру злохладному благодатную мудрость явившая.
     Pадуйся, нищеты духовныя блаженство вкусившая.
     Радуйся, образ терпения и благосердия нам подающая.
     Pадуйся, смирением и покаянием от бед избавлятися научающая.
     Радуйся, с молитвою и любовию детей благословлявшая.
     Pадуйся, прикосновением руку твоею чудесно их исцелявшая.
     Радуйся, уныние тяжкое, душу сокрушающее, от нас отводящая.
     Pадуйся, надеждою несумненною на милость Божию окриляющая.
     Радуйся, Ксение блаженная, молитвеннице о душах наших.

Кондак 8
     Странница бездомная протекла еси путь скорбный жития твоего в стольнем граде Отечества нашего, мати блаженная, взыскующи града вышняго, Иерусалима Небеснаго: ныне же в нем со Ангелы и всеми святыми поеши Богу: Аллилуиа.

Икос 8
     Вся в молитвах ко Творцу пребывающи, мати святая, до успения твоего, от страданий и подвигов к жизни блаженей и вечней невозбранно прешла еси. Сего ради, преклоняюще колена сердец наших, благоговейное пение ти приносим:
     Радуйся, во обителех горних с лики святых ликующая.
     Pадуйся, и нас, тебе молящихся, тамо не забывающая.
     Радуйся, чудеса неисчетная по успении твоем явившая.
     Pадуйся, смертно болящих, врачьми оставленных, исцелявшая.
     Радуйся, в пьянстве гибнущих устрашение и исправление.
     Pадуйся, места служения лишившымся благое поспешение.
     Радуйся, вдовиц и жен, супругом оставленных, покровительнице.
     Pадуйся, странников и безприютных питательнице.
     Радуйся, Ксение блаженная, молитвеннице о душах наших.

Кондак 9
     Всякия утоли болезни, блаженая мати Ксение, на тя надеющихся и к помощи твоей усердно притекающих: якоже поминавших прежде душу твою ради души своея спасения, по завету твоему, тако и ныне помяни всех, прославляющих тя, Богу же, в тебе дивно прославленному, вопиющих непрестанно: Аллилуия.

Икос 9
     Ветия суемудренныя разумети не могут, како ты безумием своим безумие мира сего обличила еси, и немощию своею сильныя и крепкия посрамила еси: не ведают бо в тебе силы и премудрости Божия. Мы же, тя почитающе, с любовию зовем ти сице:
     Радуйся, Божественнаго Духа селение.
     Pадуйся, велие к Богу дерзновение.
     Радуйся, у усыпальницы твоея молящымся являющаяся и им помогающая.
     Pадуйся, землею и елеем от нея многия освятившая и от недуг исцелившая.
     Радуйся, яко одержимых страстьми от гибели спасаеши.
     Pадуйся, яко отвергатися себе нас научаеши.
     Радуйся, любве и смирения путь во спасение нам указующая.
     Pадуйся, во храме Божием с нами незримо пребывающая.
     Радуйся, Ксение блаженная, молитвеннице о душах наших.

Кондак 10
     Спасти люди хотящи, блаженная мати Ксение, присно даруеши им заступление твое чудное. Се деву благочестивую с вдовицею материю ея, в канун венчания у гробницы твоея усердно молившуюся, от брака спасла еси со злодеем, иже ратнаго человека уби, имя же и чин его себе присвои. В день тойже убийца оный внезапу обличен бысть, и ужасом объят, исповеда пред всеми, яко сила Божия сироту от брака с ним избави, мы же, дивящеся силе молитв твоих, нас спасающих, воспеваем Богу: Аллилуиа.

Икос 10
     Стена еси нерушимая, преблаженная мати, и дом православных. Не остави и ныне супруги разлученныя, помози родителем, за грехи своя о чадех слезы проливающым, научи юноши и девы в чистоте себе хранити и всех нас святыню уз семейных почитати, да единеми усты воспеваем ти тако:
     Радуйся, дев благочестивых от брака невернаго избавляющая.
     Pадуйся, спутника жизни добраго им обрести помогающая.
     Радуйся, сродник враждующих благое примирение.
     Pадуйся, слез детских осушение.
     Радуйся, от убиения младенцев во чреве женам грозное прещение.
     Pадуйся, на камени любве и веры домов устроение.
     Радуйся, супругов, смертию разлученных, утешение.
     Pадуйся, в жизни безсмертней вечное их соединение.
     Радуйся, Ксение блаженная, молитвеннице о душах наших.

Кондак 11
     Пение благодарственное приносят ти, мати блаженная, людие православнии, от бед и болезней молитвами твоими избавленнии: и ныне, аще попустит нам Всеправедный Господь скорби грех наших ради, со слезами к тебе припадем, уповающе на милостивое твое о нас к Богу предстательство, да воспоем Ему: Аллилуиа.

Икос 11
     Светозарная луча во мраце жития сего, путь ко свету неприступному освещающая, явилася еси, богомудрая Ксение, чудес множеством просиявши. В лютую же годину гонений безбожных вернии от часовни твоея не отступиша, но презревше и страх смертный, с верою и упованием к тебе притекаху, сердцем воспевающе сице:
     Радуйся, безнадежных надеяние.
     Pадуйся, в бездне отчаяния погибающих спасение.
     Радуйся, униженных и гонимых покровительнице.
     Pадуйся, от клеветы и суда неправеднаго защитнице.
     Радуйся, обидимых и обездоленных утешение.
     Pадуйся, обидящих грозное вразумление.
     Радуйся, града святаго Петра заступнице.
     Pадуйся, чадом земли Российския мати и питательнице.
     Радуйся, Ксение блаженная, молитвеннице о душах наших.

Кондак 12
     Благодать утешений обильно изливаеши, блаженная Ксение, всем чтущым память твою и к заступлению твоему притекающым. Темже и мы, грешнии, на тя по Бозе надежду нашу возлагаем и молимся тебе усердно: не остави нас во обстояниих скорбных, умоли Господа сил, да не отпадем от веры православныя, в нейже тобою утверждаеми, зовем Ему верно: Аллилуиа.

Икос 12
     Поюще многая твоя чудеса, блаженная мати Ксение, восхваляем тя, яко теплую нашу заступницу и скорую предстательницу. Улучающе же от тебе помощь благодатную, неустанно воспеваем ти сице:
     Радуйся, светом кротости твоея вся концы земли озарившая.
     Pадуйся житием твоим постническим гордыню диавольскую посрамившая.
     Радуйся, дому царскому поможение и благословение.
     Pадуйся, мира Божия в сердца верных насаждение.
     Радуйся, о спасении Отечества нашего присно молящаяся.
     Pадуйся во Отечество Небесное нам путь указующая.
     Радуйся, по Богородице в скорбех и печалех наше утешение.
     Pадуйся, по Бозе грехов наших прощение и вечное спасение.
     Радуйся, Ксение блаженная, молитвеннице о душах наших.

Кондак 13
     О святая блаженная мати Ксение, в житии твоем крест тяжкий понесшая. Приими от нас, грешных моление сие, тебе приносимое, огради нас молитвами твоими от наветов духов тьмы, от бед и напастей, умоли Всещедраго Бога подати нам силу и крепость, да вземше крест свой, во след Христу грядем, поюще Ему с тобою во веки: Аллилуиа.
Этот кондак читается трижды, затем икос 1-й и кондак 1-й

Молитва святой блаженной Ксении Петербургской
     О святая всеблаженная мати Ксение! Под кровом Всевышняго жившая, ведомая и укрепляемая Богоматерию, глад и жажду, хлад и зной, поношения и гонения претерпевшая и дар прозорливости и чудотворения от Бога прияла еси и под сению Всемогущаго покоишися, ныне Святая Церковь, яко благоуханный цвет, прославляет тя. Предстояще на месте погребения твоего, пред образом твоим святым, яко живей ти сущей с нами, молимся тебе: приими прошения наша и принеси их ко Престолу милосердаго Отца Небеснаго, яко дерзновение к Нему имущая. Испроси притекающым к тебе вечное спасение, на благая дела и начинания наша щедрое благословение, от всяких бед и скорбей избавление. Предстани святыми твоими молитвами пред Всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом Святаго Крещения озарити и печатию дара Духа Святаго запечатлети, отроки и отроковицы в вере, честности, богобоязненности воспитати и успехи в учении им даровати; болящыя и недугующыя исцели, семейным любовь и согласие низпосли, монашествующих подвигом добрым подвизатися удостой и от поношений огради, пастыри в крепости Духа Святаго утверди, люди и страну нашу в мире и безмятежии сохрани, о лишенных в предсмертный час причащения Святых Христовых Таин умоли. Ты наша надежда и упование, скорое услышание и избавление, тебе благодарение возсылаем и с тобою славим Отца и Сына и Святаго Духа, ныне и присно, и во веки веков. Аминь.

Молитва иная
     О препростая образом жития своего, бездомная на земли, наследнице же обителей Отца Небеснаго, блаженная страннице Ксение! Якоже прежде к надгробию твоему недужнии и скорбнии припадавшии и абие утешениями исполняемии, сице ныне и мы (имена), обуреваемии тлетворными обстоянии, тебе прибегающе, с надеждою просим: помолися, благая небошественнице, дабы исправилися стопы наша по словеси Господню к деланию заповедей Его, и да упразднится богоборное безбожие, пленившее град твой и страну твою, повергающее нас, многогрешных, в смертное братоненавидение, гордое самовозбешение и хульное отчаяние. О, блаженнейшая Христа ради, посрамившая суемудрость века сего, испроси у Творца и Подателя всяческих благ даровати нам смирения, кротости и любве в сокровище сердца нашего, веры в укрепление молитвы, надежды в покаянии, крепости в многотрудном житии, милосерднаго исцеления души и тела нашего, целомудрия в супружестве и благопопечения о ближних и искренних своих, всего жития нашего обновление в чистительней бане покаяния, яко да всехвально воспевающе память твою, прославим в тебе чудодействующаго, Отца и Сына и Святаго Духа, Троицу Единосущную и Нераздельную во веки веков. Аминь.

Молитва третья
     О преславная святая блаженная мати наша Ксение, теплая о нас пред Богом молитвеннице! Якоже прежде к надгробию твоему припадавшии, сице ныне и мы по прославлении твоем к мощем твоим прибегающе, просим: помолися Господу, да освятит наши души и телеса, да просветит ум, очистит совесть от всякия скверны, нечистых помыслов, лукавых и хульных умышлений и от всякаго превозношения, гордости же и кичения, высокоумия же и дерзости, от всякаго фарисейскаго лицемерия, и от всякаго студнаго и лукаваго обычия нашего; да дарует нам искреннее покаяние, сокрушение сердец наших, смиренномудрие, кротость же и тихость, благоговение, разум же духовный со всяким благоразумием и благодарением. Утаившая себе от мудрых века сего, но Богу знаемая, испроси же стране нашей Российстей от бед лютых избавление, всего нашего жития обновление и исправление, соблюди нас во всяком благочестивом православном исповедании веры христианския, яко да ублажающе тя сподобимся во вся дни воспевати, благодарити и славити Отца и Сына и Святаго Духа, Троицу Единосущную, Животворящую и Нераздельную во веки веков. Аминь.

Молитва четвертая
     О святая угодница Божия блаженная Ксение! Призри милостиво твоим оком на нас, раб Божиих (имена), честной твоей иконе умильно молящиеся и просящие у тебе помощи и заступления. Простри ко Господу Богу нашему теплыя твоя молитвы и испроси душам нашым оставление прегрешений. Се бо мы сердцем сокрушенным, и духом смиренным тебе ходатаицу милостивую ко Владыце и молитвенницу за ны, грешныя, призываем, яко ты прияла еси от Него благодать молитися за ны и от бед избавляти. Тебе убо просим, не презри нас недостойных, молящихся тебе и твоей помощи требующих, и исходатайствуй всем вся ко спасению полезная, яко да твоими ко Господу Богу молитвами получивши благодать и милость прославим всех благих Источника и Дароподателя и Бога Единаго, в Троице Святей славимаго. Отца и Сына и Святаго Духа, ныне и присно и во веки веков.

Тропарь к святой блаженной Ксении Петербургской
Тропарь, глас 7-й:
     Нищету Христову возлюбивши, безсмертныя трапезы ныне наслаждаешися, безумием мнимым безумие мира обличивши, смирением крестным силу Божию восприяла еси. Сего ради дар чудодейственныя помощи стяжавшая, Ксение блаженная, моли Христа Бога избавитися нам от всякаго зла покаянием.

Кондак, глас 3:
     Днесь светло ликует град святаго Петра, яко множество скорбящых обретает утешение, на твоя молитвы надеющеся, Ксение всеблаженная, ты бо еси граду сему похвало и утверждение.

Величание
     Величаем тя, святая блаженная мати наша Ксение, и чтим святую память твою, ты бо молиши за ны Христа Бога нашего.

Акафисты zvonnitsa.ru/orthodoxy/akafisti/284/13330/

Кондак 1
     Избраный чудотворче и преславный угодниче Христов, предивный исповедниче и неусыпный о нас молитвениче, преподобне отче Кукшо, прославляюще прославльшаго тя Господа, хвалебное пение восписуем ти, недостойнии. Ты же, яко имеяй велие дерзновение ко Господу, от всяких нас искушений и бед свободи, зовущих ти:
     Радуйся, преподобне отче Кукшо, чудотворче и исповедниче Христов.

Икос 1
     Ангела во плоти, распеншая миру лукавому, зрим тя, блаженне отче. Святым бо преподобномученикам подражал еси, иже верою содеяша правду, угасившим силу огненную, заградившим уста львов, обративших в бегство полки чуждии. Темже с благословением вопием ти таковая:
     Радуйся, избранный быти светильником Отечества нашего.
     Радуйся, своими подвиги и чудесы утвердивый в нем веру православную.
     Радуйся, сию исповедавый даже до крове и уз.
     Радуйся, благий подражателю жития великих угодников святой Руси.
     Радуйся, в смутное время богоборческая шатания аки адамант непоколебимый явивыйся.
     Радуйся, неизреченных дарований сподобивыйся.
     Радуйся, Богодатный иноков путевождю и наставниче.
     Радуйся, всех притекающих к тебе Богомудрый духовниче и прозорливый учителю добротолюбия.
     Радуйся, преподобне отче наш Кукшо, чудотворче и исповедниче Христов.

Кондак 2
     Видящи мати твоя небесное избранничество, измлада на тебе почившее, радовашеся сердцем и прославляше дивнаго во святых Своих Бога, благослови же тя образом Казанския Пресвятыя Богородицы на прохождения теснаго и многотруднаго монашескаго жития, принесе тя яко плод благоуханен Господу, С сим же образом николиже расставался еси, пронеся благословение матерне чрез все поприще земное, со умилением вопия Богу: Аллилуиа.

Икос 2
     Разум стяжав Богопросвещенный от всемивластиваго Спаса, вся красная мира от юности твоея презрел еси, взем крест и последуя Христу. Притек же на поклонения во святый град Иерусалим и лобызая место, идеже страдаше Господь, благий обет добровольного крестоношения, иже во иночестем чине, принесл еси. Тем таковое произволение твое хваляще, вопием ти:
     Радуйся, благословение святаго града приемый.
     Радуйся, к небесному Иерусалиму душею прилепивыйся.
     Радуйся, небесных предзнаменований в паломничестве сем сподобивыйся.
     Радуйся, иже банею пакибытия бысть тебе, купель Силоамская, в нейже чудесно первым омовение приял еси.
     Радуйся, яко тая знамением твоего духовнаго благоплодия и многочадия явилася еси.
     Радуйся, на Гробе Господнем елей от лампады на тя внезапу излиялся еси.
     Радуйся, яко елея мнозии людие, к тебе прикасающеся, помазание прияху.
     Радуйся, яко чудо сие знамением бысть неиссякаемыя Божественныя благодати, чрез тебя верным подаваемыя.
     Радуйся, преподобне отче наш Кукшо, чудотворче и исповедниче Христов.

Кондак 3
     Сила Вышняго осени тя, преблаженне, егда во удел Богоматери, святую гору Афонскую вселился еси, да истиный послушник Пресвятыя Богородицы, всечестныя Игумении всех иноческих обителей будеши, поучаяся в равноангельном подвизе и восходя горе по лествице аскетическаго доброделания, непрестанно взывая Подвигоположнику Христу: Аллилуиа.

Икос 3
     Имеяше воистину попечение о спасении души, отвергся разумения своего и во всецелое послушание старцам святогорским вдался еси, да ум Христов приобрящеши. Сего ради посла тебе Бог авву преискусна и наставника нелестна, пустынножителя Мелхиседека, под его же старческим водительством от силы в силу возрастал еси, сподобльшеся пострижения монашескаго. Сего ради толикому усердию твоему дивящеся, умильно воскликаем:
     Радуйся, похвало святыя Афонския горы.
     Радуйся, любимиче вседержавныя Игумении иноческих обителей.
     Радуйся, преподобных отцев Афонских послушниче и последователю.
     Радуйся, подвигов их усердный рачителю.
     Радуйся, подъемый невидимую брань к духовом злобы поднебесныя.
     Радуйся, приемшый дар умныя молитвы Иисусовы.
     Радуйся, Первоначальнику русского монашества преподобному Антонию Киево-Печерскому уподобивыйся.
     Радуйся, благословение богоспасаемыя горы в матерь градов Русских принесый.
     Радуйся, преподобне отче наш Кукшо, чудотворче и исповедниче Христов.

Кондак 4
     Бурю воздвигше лютых искушений, враг рода человеча смуту всеяти на Святей Горе потщался еси, да изженет тя из пределов Афонских. Ты же, преподобне, со смирением сие гонение притерпел еси, и пришед в богоизбранный град Киев, в пещерной Лавре святых Антония и Феодосия вселился еси, да купно с преподобными отцами, зде мощами своими нетленно почивающими, поеши песнь Пресвятей Троице: Аллилуиа.

Икос 4
     Слышаша, отче достохвальне, братия лавры Киево-Печерския о Богоугодном житии твоем и видяще твердое во благочестии стояние, дивляхуся толикому к совершенству стремлению твоему, во всем следовати тебе хотяще, егда же пагубныя обновленческия плевелы диавол на ниве церковной всеял еси, непоколебимый столп чистоты православия показался еси, отче, еже и братию в сем утвердив, присно слышиши сия:
     Радуйся, светило веры Православныя.
     Радуйся, рачителю отеческих преданий.
     Радуйся, столпе огненный, среди мглы безбожия путь спасения показующий.
     Радуйся, в пагубное время еретических поползновений твоими молитвами батию утвердивый.
     Радуйся, всем людям пример истиннно богопочитания показывай.
     Радуйся, зельне разженную пещь богоборчества росою исповедания твоего угасивый.
     Радуйся, преподобному Кукше, исповеднику и мученику Киево-Печерскому уподобивыйся.
     Радуйся, вся подвиги угодников Киево-Печерских унаследовавый.
     Радуйся, преподобне отче наш Кукшо, чудотворче и исповедниче Христов.

Кондак 5
     Боготечная звезда сущим во мраце греховнем явился еси, святе, осиявая град и люди велии чудес светлостьми. Тако и пророческаго обетования от святителя Серафима Полтавскаго сподобился еси, егда старец богопросвещенный, благословение архипастырское подая ти, прорек: "в сих пещерах место тебе уготовано!", дал разумети, яко Господь прославит тя обретением нетленных мощей. Зряще же ныне исполнение дивнаго сего проречения, со благоговением лобызаем святыя мощи твоя, поюще: Аллилуиа.

Икос 5
     Видев тя подвижника веры и благочестия поборника, задумавша нечестивии погубити тя, вдавши на муки и в темницу заключиша. Ты же, яко мученик тверд, ни во что же вменил еси вражия уметы: взирая на Божественнаго Страстотерпца и следуя его долготерпению. Сего ради ублажаем тя сице:
     Радуйся, шествовавый за Господом даже до Голгофских мук.
     Радуйся, исповедничеством просиявый.
     Радуйся, многоразличныя страдания от богоборцев приемый.
     Радуйся, тии бо к татем и разбойником, аки овцу к лютым волкам, ввергоша тя.
     Радуйся, сих яко зверей дивиих смирением твоим укротил еси.
     Радуйся, мраз нестерпимый и жестокое изнурение в сибирстей тайге мужественно претерпел еси.
     Радуйся, утешение ти Господь яко Илии чрез врана небеснаго подавый и гладом мучима напитавый.
     Радуйся, от лютыя болезни, от неяже имеяши умрети, тя чудесне избавивый.
     Радуйся, преподобне отче наш Кукшо, чудотворче и исповедниче Христов.

Кондак 6
     Проповедник богоносный Божия благодати явился еси, пастырю благий, егда от епископа Киевскаго Антония Божественныя Дары приял еси, тайно в узилище посланныя, и не токмо сам благоговейно сих приобщивыйся, но и таинство исповеди устроив" содержимых во узах иночествующих братии и сестер причастники Животворящих таин сотвори. Бысть же сия святая Трапеза яко Вечеря тайная учеников Христа Бога, яко Пасха светлая среди юдоли скорбныя, яко Пятидесятница, излившая нань струи огневиднаго Духа. Получивший же таковую милость, возсылаху теплое благодаренне Богу и угоднику его, поюще: Аллилуиа.

Икос 6
     Возсия тебе свет милости Своея Христос избавитель, егда в день церковныя памяти великомученика Георгия Победоносца из мрачныя темницы изведен бысть, страдальче, никакоже побежден от врага, хотяща низложити тя. Обаче нов подвиг предстояше ти, отче праведный, яко сослан бысть далече на поселение, и претерпеваше тамо нужду велию, не имый где главы подклонити. Сего ради вопием ти:
     Радуйся, библейским праведникам подражавый.
     Радуйся, яко тех, иже проидоша в милотех и козиих кожах, житию поревновавый.
     Радуйся, в лишениих, озлоблениих и скорбех течение твое безропотно совершил еси.
     Радуйся, подобно тем, ихже не бе достоин весь мир, скитание по пустыням, вертепам и пропастем земным подъял еси.
     Радуйся, якоже и онем, иже послушествовани бывше верою, тебе обетование даровася.
     Радуйся, дар неизреченных чудотворений в награду ти от Господа низпослался.
     Радуйся, яко Бог утешаше тя, и добрых людей, якоже Илии вдовицу, тебе низпосылаше.
     Радуйся, якоже через Илию, велие благословение чрез тя на домы, тебе приявшая, нисхождаше.
     Радуйся, преподобне отче наш Кукшо, чудотворче и исповедниче Христов.

Кондак 7
     Хотя Всевидец Господь явити тя светильника державы нашея, и не под спудом, а на свещнице высоком постави, паки в Лавру Киево-Печерскую возврати, да явлен будеши мирови. Людие же православнии яки бисер многоценный обретший тя, радовахуся неизреченно и возсылаху благодарственное пение Богу: Аллилуиа.

Икос 7
     Новая чудеса показал нам тобою, преподобне, всех чудес Творец и Владыка, отовсюду бо притекающия к тебе от недугов душевных и телесных врачевал еси, бесныя от злых духов свобождал еси, грядущая яко настоящая прорицал еси, греховныя язвы обличал еси, всем подавая потребная ко спасению. Людие же, от толиких бед избавлении тобою, с веселием взываху ти:
     Радуйся, яко предивна чудотворца Церковь святая в тебе обрела еси.
     Радуйся, яко слава чудес твоих всю землю нашу осияваше.
     Радуйся, врачу душ и телес благодатный.
     Радуйся, покаяния учителю духоносный.
     Радуйся, схимниче прозорливый и святый.
     Радуйся, старче благостный и кроткий.
     Радуйся, духов злобы прогонителю дерзновенный.
     Радуйся, яко бесы, не терпяще светлости зрака твоего далече от тебе отбегаху.
     Радуйся, преподобне отче наш Кукшо, чудотворче и исповедниче Христов.

Кондак 8
     Странник многоскорбный явился еси, отче блаженне, исполнив на себе слова апостола, яко вси, хотящии жити благочестно, гоними будут. Власть бо имущия богоборцы изгнаша тя из Лавры пещерныя, и в Почаев изведоша. Обаче Божиим произволением исход твой из Киевския обители в Почаевскую совершися, да и тамо просияеши житием твоим, поя Богу: Аллилуиа.

Икос 8
     Вси иноцы святыя горы Почаевския в радостный трепет приидоша, видящи какова пречестна отца обретают, добродетельми монашескими презельне украшена и увязена венцы мученическими. Сего ради почитаху тя сими словесы:
     Радуйся, яко сама Пречистая Богомати, чудотворною иконою зде пребывающая и след стопы Своея на горе сей оставившая, во обитель прият тя.
     Радуйся, яко гора сия для тебя вторый Афон бяше.
     Радуйся, святому игумену Лавры Иову Почаевскому во всем уподобивыйся.
     Радуйся, невидимаго сослужения с преподобным Иовом многажды сподобивыйся.
     Радуйся, якоже и он, богопротивным течением униаткским и раскольническим твердо противостоял еси.
     Радуйся, ослепленных погибельными ересьми в лоно Единыя Истинныя Святыя Соборныя и Апостольския Церкве направлял еси.
     Радуйся, на Божественной евхаристии ангелоподобно в сиянии светлом Богу предстоял еси.
     Радуйся, и чадам твоим духовным благодать молитвеннаго общения с Богом даровал еси.
     Радуйся, по слезным молитвам чад твоих духовных от тяжкого недуга и преждевременныя кончины избавлен был еси.
     Радуйся, преподобне отче наш Кукшо, чудотворче и исповедниче Христов.

Кондак 9
     Всякое естество человеческое удивися превеликому на тебе Божию Благоволению, молитвенниче блаженне, неприступнаго бо Господа Славы, егоже и ангели зрети не могут, непрестанно зрел еси внутренними добрыми очесы, вперяя ум в горняя и выну поя Создателю своему: Аллилуиа.

Икос 9
     Витийствовати не искусен был еси, старче смиренный, обаче якоже Марию египетскую Бог Духом Своим просвещаше тя, Евангелие бо и псалмы давидовы изустно вся ведый, службу церковную никогда же претыкаяся на память совершал еси, и не имеяши богословского познания, Писание якоже богодухновенный богослов изрядно толковал еси, открывая священныя глубины тайн Божиих. Сему дивящеся, вопием ти:
     Радуйся, мудростию свыше озаренный.
     Радуйся, Духом Святым осененный.
     Радуйся, яко в немощи твоей сила Божия всемощно совершися.
     Радуйся, яко от богатства словес твоих нищии духом обогощаются.
     Радуйся, яко от отеческих наставлений твоих алчущии и жаждующии правды насыщаются.
     Радуйся, дея учивый презирати убо плоть, преходит бо.
     Радуйся, примером своим многих подвигнувый прилежати души, вещи безсмертней.
     Радуйся, темже со ангелы срадуется, преподобне, дух твой.
     Радуйся, преподобне отче наш Кукшо, чудотворче и исповедниче Христов.

Кондак 10
     Спасение от вечныя погибели избавление всем, с верою и надеждею приходящим к тебе был еси, отче священне, изымая от рова греховных страстей пагубных вожделений, и возводя к Небесному Царствию, идеже ты ныне с лики святых предстоиши престолу Господа Сил, молися о нас, чадех твоих, и Богу воспевая: Аллилуиа.

Икос 10
     Весь был еси в вышних, авво досточудне, совлекийся ветхаго человека с деяньми его и облекийся во Христа, его же всем сердцем возлюбил еси. Темже даровася тебе благодать велия от Господа, да вси молитвенно взывают ти:
     Радуйся, делателю неусыпный, мног плод сотворивый.
     Радуйся, древних отцев монашества Антония, Пахомия и Макария учениче и наследниче.
     Радуйся, якоже преподобный Сергий Радонежский, всеусердный служитель Пресвятыя Троицы бывый.
     Радуйся, подобно Серафиму Саровскому, пасхальным приветствием "Христос Воскресе!" каждого приходящаго к тебе лобызавый.
     Радуйся, преподобному Амвросию Оптинскому уподобляяся, всех детьми своими нарицавый.
     Радуйся, преподобному Силуану Афонскому в созерцании и богомыслии следовавый.
     Радуйся, яко стяжал дух мирен, и окрест тебе тысячи спасение обретоша.
     Радуйся, с тобою бо Господь, яко не оскуде преподобный в Руси Православней.
     Радуйся, преподобне отче наш Кукшо, чудотворче и исповедниче Христов.

Кондак 11
     Пение всеумиленное приношаху ти жителие Богоспасаемаго града Одессы, преподобне Кукшо, имже Господь яко злато неветшающее, в горниле бед искушенное и очищенное седмерицею, дарова тя, да будеши месту сему всемощный заступник и покровитель, сохраняя его от стихийных бед и многоразличных обстояний. Темже и обитель Успения Пресвятыя Богородицы, в ней же ныне мощи твоя святыя почивают, именем твоим красуяся, Богу приносит песнь хвалебно-благодарственную: Аллилуиа.

Икос 11
     Светозарная лампада, елей цельбоносныя благодати источающая, явишася честныя мощи твоя, преподобне, от них бо токи чудес изливаются, недуги отгоняя, от одра смертнаго возставляя, души возвеселяя, козни диавольския побеждая. Темже отцы и братия Свято-Успенския обители, каждодневно молебен пред ракою мощей твоих совершающе, с любовию возглашают ти:
     Радуйся, храмино преукрашенная Духа Всесвятаго.
     Радуйся, кадильнице благовонная, фимиам благих дел воскуряющая.
     Радуйся, честный ковчеже сокровищ неоскудеваемых.
     Радуйся, сосуде драгоценный даров неисчерпаемых.
     Радуйся, нетлением мощей зело от Бога прославленный.
     Радуйся, излиянием чудес от Господа возвеличенный.
     Радуйся, яко ни един тощ или неуслышан от мощей твоих исходит.
     Радуйся, яко многоцелебныя твоя мощи града сего бысть всемощное защищение и обители нашея благолепное украшение.
     Радуйся, преподобне отче наш Кукшо, чудотворче и исповедниче Христов.

Кондак 12
     Благодать подаждь нам, авво богомудре, и помощь Божию испроси, да возможем, поучаяся твоим исправлениям, творити волю Спасителя благую, благоугодную и совершенную, и поживше в преподобии, сподобимся с тобою в веце грядущем пети Создателю песнь нескончаемую: Аллилуиа.

Икос 12
     Поюще твое богобоязненное и чистое житие, похваляем многоболезныя исповедническия труды твоя, почитаем схимническия подвиги, превозносим в молитве пламенное горение и к Богу дерзновение, чтим многопопечительное верных окормление и пастырское вразумление, славим плоти умерщвление и безропотное скорбей понесение, яже любве ради Божия благодушно подъял еси, отче святый и превеликий. Явился бо еси нам, в последняя лета живущим, светильник горяй и согряваяй, да мало порадуемся при свете его. Не остави же сирыми чад твоих, сподоби отеческаго попечения твоего, да ведомии тобою к духовному совершенству, выну тебе воспеваем и зовем:
     Радуйся, к лику святых и преподобных сопричтенный.
     Радуйся, в горний Иерусалим досточестне приятый.
     Радуйся, в книзе жизни златыми буквами начертанный.
     Радуйся, со всеми, Богу угодившими, на брак Агнчий возшедый.
     Радуйся, ризу твою брачную паче снега убеливый.
     Радуйся, яко побеждающий венец правды унаследовавый.
     Радуйся, престолу Владыки предстояй, тепле о нас ходатайствуеши.
     Радуйся, о всех, имя твое святое призывающих, дерзновенно предстательствуеши.
     Радуйся, преподобне отче наш Кукшо, чудотворче и исповедниче Христов.

Кондак 13
     О преподобне и богоносне отче наш Кукшо, превеликий угодниче и предивный чудотворче! Призри на нас, во обстоянии греховнем сущих и во тьме неведения претыкающихся, и богоприятным твоим ходатайством страх Божий всели в сердца наша, плотское мудрование умертви, от искушений сохрани, Православие утверди, да во благочестии и правоверии иждивем малое число дний наших, и избавльшеся от вечных мук адских, сподобимся в безконечном веце совокупно с тобою славословити Бога, в Троице покланяемаго, воспевая ему: Аллилуиа, аллилуиа, аллилуиа.
Этот кондак читается трижды, затем икос 1-й и кондак 1-й

МОЛИТВА
     О преподобне и богоносне отче наш Кукшо, обители Успения Божией Матери похвало, Богоспасаемаго града Одессы неувядаемый цвете, кроткий пастырю Христов и великий за нас молитвениче усердно к тебе прибегаем и с сокрушенным сердцем просим: не отыми покров твой от обители нашей, в ней же подвигом добрым подвизался еси. Буди помощник благий всем благочестиво живущим и добре труждающимся в ней. О добрый наш пастырю и богомудрый наставниче, преподобне отче Кукшо, призри милостиво на предстоящия люди, умиленно молящиеся и просящие от тебе помощи и заступления.
     Помяни всех, веру и любовь к тебе имущих, имя твое молитвенно призывающих и на поклонение мощем твоим святым приходящих, и вся во благих прошения их милостивно исполни, осеняя их святоотеческим твоим благословением. Избави, святый отче, от всякаго навета вражия Церковь нашу святую, град сей, обитель и землю нашу, и не остави заступлением твоим нас немощных, грехами и скорбями многими обремененных.
     Озари, преблаженне, ум наш светом лица Божия, укрепи благодатию Господнею жизнь нашу, да в Законе Христове утвердившеся, неленостно по пути заповедей святых потечем. Осени твоим благословением нас, и всех в скорбех сущих, болезнями душевными и телесными одержимых, исцеление, утешение и избавление даруй. Над всеми же сими испроси нам свыше дух кротости и смиренномудрия, дух терпения и покаяния, отступившим от Православныя Веры и погибельными ересьми и расколами ослепленным вразумление, во тьме неверия блуждающим светом истиннаго Богопознания просвещение, раздоров и нестроений утоление, умоли Господа Бога и Пресвятую Богородицу даровати нам тихое и безгрешное житие.
     Поминай нас недостойных у престола Вседержителя, и испроси мирную христианскую кончину, и сподоби нас помощию твоею спасение вечное улучити и Царствие Небесное унаследовати, да славословим велия щедроты и неизреченныя милости Отца и Сына и Святаго Духа, в Троице поклоняемаго Бога, и твое отеческое заступление во веки веков. Аминь.

Тропарь преподобному Кукше Одесскому
Тропарь, глас 4:
     От юности мир суемудренный и лукавый оставил еси, Божественною свыше просветився благодатию, преподобне, многим терпением во временней жизни подвиг совершил еси, темже источаеши чудес благодать всем с верою приходящим к раце мощей твоих, Кукшо, преблаженне отче наш.

Кондак, глас 8:
     Подвижника благочестия искусна, новаго исповедника веры отеческия преподобнаго Кукшу верно вси ублажим, яко пастыря истиннаго, старца благостнаго, иноков наставника, утешителя малодушных, целителя недужных, и по кончине показующаго светлость жития своего. И днесь в память его притекше, радостно возопием: яко имея дерзновение к Богу, многообразных нас избави обстояний, да зовем ти: радуйся, утверждение людем православным.

Акафисты zvonnitsa.ru/orthodoxy/akafisti/290/13332/

Кондак 1
     Избранный страстотерпче и угодниче Христов Лаврентие, архидиаконе и непобедимый во страданиих великомучениче, песньми похвальными величаем тя нашего в бедах заступника, выну предстоящаго златозарному Престолу Царя славы. Ты же, яко огнем мучений вшедый в покой небесный, от огня страстей и скорби всякия свобождаяй нас, во уповании тебе взывающих:
     Радуйся, непобедимый великомучениче архидиаконе Лаврентие.

Икос 1
     Архангелов и Ангелов чины, Серафимов и Херувимов собори, и всех горних безплотных сил сонмы вельми удивишася толикому мужеству твоему, великомучениче Лаврентие, яко в немощнем телеси человечестем, безплотных сил явил еси образ, огнем бо на железнем одре жегомый и испекаемый, всесожжение живыя жертвы Христу был еси. Сие пачеестественное и страшное для единаго помысла человеческаго терпение точию воспоминающе, содрагаемся, и от всего сердца воспеваем тако:
     Радуйся, великомучениче, огнем и железом к небесному покою пришедый.
     Радуйся, во архидиаконстем чине служащий совершению безкровныя Жертвы, и сам всего себе в жертву Христови принесший.
     Радуйся, адаманте, ничим же одолеемый и не побежденный.
     Радуйся, каменю веры, на недвижимем основании заповедей Господних утвержденный.
     Радуйся, егоже подвигом дивящеся горния силы.
     Радуйся, егоже дивному терпению содрогаются человеческая множества.
     Радуйся, непобедимый великомучениче архидиаконе Лаврентие.

Кондак 2
     Видя святейший первосвятитель Римския Церкве богомудрый Сикст, твое велие дерзновение о Господе, святый великомучениче Лаврентие, возлюби тя, архидиакона своего, и прославляя Господа воздвизающаго на тя попечение о дому Божием, о нищих и убогих чадах Божиих, о всех скорбящих и озлобленных, милости Божия и помощи требующих и имея тя добраго делателя во храме святыни Господней, радовашеся духом, научая и нас воспевати о тебе благодателю нашему Богу: Аллилуиа.

Икос 2
     Разум богопросвещен имея, о доблий исповедниче Христов Лаврентие, и мира сего сладости презрев, устремился еси во след страждущаго учителя своего святаго Сикста и к нему от всея любящия души твоея взывал еси: «Камо, отче, без сына грядый? Камо, о архиерею святый, спешиши без архидиакона твоего? Ты никогдаже без мене приносил еси жертву, что во мне неугодно явися отеческой твоей милости? Егда ли не искусил мя еси, угодна быти тебе служителя? И аще общник бых тебе в действии Божественных таин Христовых, почто и во излиянии за Христа крове не общаюся тебе? Поими мя, отче, с тобою, сына твоего, поими, учителю, ученика твоего и даждь мя пред тобою в жертву Богу, якоже Авраам сына Исаака и яко верховный апостол Петр перваго архидиакона Стефана, и узрев мя совершившася мученичеством, сам послежде к венцу потщишися». Таковой любви твоей, великомучениче Христов, дивящеся, умиленно вопием ти похвальная:
     Радуйся, любовь к миру любовию Божиею в себе победивый.
     Радуйся, крепчайшую паче огня оную любовь явивый.
     Радуйся, возлюбивый всем сердцем, всею душею, всею мыслию, всем разумом Христа — небеснаго Учителя и Пастыреначальника.
     Радуйся, такожде возлюбивый и земнаго пастыря — отца, первосвятителя твоего и наставника.
     Радуйся, яко святая душа твоя серафимскою любовию пламенеющая, по апостолу: «вся любит, всему веру емлет, вся уповает, вся терпит».
     Радуйся, таяжде апостольския глаголы в себе вместивый, яко любы николиже отпадает.
     Радуйся, непобедимый великомучениче архидиаконе Лаврентие.

Кондак 3
     Силою Всевышняго укрепляеми, святии мученицы, дерзновенно проповедаху Света истиннаго Христа, Имже просвещаемии, ко славе небесней устремишася: глаголаше бо Сикст святый диаконом и соузником своим Феликиссиму и Агапиту: «Братия и своенственники мои, не убойтеся мук временных — весте кая мучения претерпеша прежде нас святии, да получат венец вечныя жизни. Сам Христос Бог наш оставил нам образ, не убойтеся убо пострадати за Христа да с ним воцаритеся». Сему убо исповеданию внемля и ты, великий страдальче Лаврентие, к достижению небесных чертогов устремился еси, воспевая сам, и нас воздвизая пети, вся промышляющему о нас Богу: Аллилуиа.

Икос 3
     Имеет весь мир христианстий молитвенницы о себе святии мученицы, радостию просвещается о сем, и тебе, великий страдальче Христов Лаврентие, прославляя, воздвизает храмы имени твоему, покланяется иконам лика твоего, ведяще тя, яко усерднаго печальника и заступника и в похвалу сицевая тебе вопиет:
     Радуйся, земный ангеле и небесный человече.
     Радуйся, мужу деланий святых.
     Радуйся, великий во страданиих, крепкий в терпениих, мужественный в скорбех.
     Радуйся, мощный силою десницы Господней, дивный в подвизех, славный в родех родов.
     Радуйся, имже красуется доблественный мученический полк.
     Радуйся, егоже непобедимому терпению дивятся Ангельския горния силы.
     Радуйся, непобедимый великомучениче архидиаконе Лаврентие.

Кондак 4
     Бурею ярости на имя Христово дышуще невернии людие, устремишася на христианы, во еже предавати их мукам лютейшим, растерзанию зверьми, усечению мечному и огню. Ты же, великомучениче, паче оных лютейшую смерть приял еси, испечен быв огнем, аки брашно печеное, на снедь кровожадным людем, зверьское существо имущим, обаче сила вражия ничтоже успе, любовию бо ко Христу пламенея, взывал еси со Апостолом: «Кто ны разлучит от любве Божия, скорбь ли, или теснота, или гонение, или глад, или нагота, или беда, или меч, якоже есть писано: яко Тебе ради умерщвляеми есмы весь день, вменихомся, яко овцы заколения, но во всех сих препобеждаеми за Возлюбльшаго ны», сию убо велию любовь имети испроси и нам, угодниче Божий, научая воспевати Подвигоположнику: Аллилуиа.

Икос 4
     Слышавши Сикст святый, твоя любовию понуждаемыя глаголы, и духом провидя будущая, сице отвещаше тебе: «Не оставляю тя, о чадо, но на множайшия муки блюду тя, предлежат бо тебе большия подвиги за веру Христову. Аз, яко стар, на легчайшее исхожду борение, тебе же подобает славнейшее показати над мучителем одоление и торжество; не плачи убо, но веждь, яко по триех днех скончания нашего, пойдеши, левите, за своим священником, не потребно есть тебе присутствия моего, аки бы каковыя помощи: Илия остави Елисея, но не отъя ему чудодейственныя силы. Иди тем временем и церковная сокровища раздаждь нищим и требующим — по твоему разсмотрению». Сие обетование и волю архиерея своего слышавше ты, яко послушлив архидиакон того, велиим тщанием устремися да сотвориши сия, поучая нас взывати тебе:
     Радуйся, любве и веры ради за Господа и послушания архипастырю к мучениям устремивыйся.
     Радуйся, в путь узкий шедый и прискорбный, и крест, яко ярем, вземший и Христу последовавый.
     Радуйся, надеждею вечнаго покоя водимый, к борению мужественно притекший.
     Радуйся, славы вечныя осияния, паче земных сластей вожделевший.
     Радуйся, обещание лютейших мук, яко райския утехи сладость из уст учителя твоего услышавый.
     Радуйся, яко обетованием тем утешивыйся и возвеселивыйся.
     Радуйся, непобедимый великомучениче архидиаконе Лаврентие.

Кондак 5
     Чудо велие помощию силы Божия действующия в тебе, по крепцей любве твоей ко Христу, сотворил еси, славный страстотерпче Христов, егда по скончании словес архипастыря твоего и учителя ты, святый Лаврентие, якоже повествует житие твое, «вся церковная утвари и сокровища взем, искаше по всему граду крыющихся клириков и убогих христиан, и еликих обреташе, даяше им на нуждныя потребы» и тамо, исцеляя вся недужныя очима и главою, чудотворец явился еси дивный во славнем житии твоем. Темже и по кончине святыми мощами своими и дивными чудотворящими иконами целиши всякия недуги, ко твоему заступлению вседушно притекающых, Богу же, Подателю всякия милости, поющих: Аллилуиа.

Икос 5
     Узре свет слепый Крискентион, емуже ты, помолившеся, рекл еси: «Господь наш Иисус Христос, отверзый очи слепорожденному, Той да просветит тя» и сотворив, якоже глаголет житие твое, «крестное знамение на очесех слепаго, и абие той прозре, и виде лице Лаврентиево, и возрадовася». Сие бяше в дому Наркисса христианина: пре сим же, абие по речении Сикста святаго, пришедый в дом вдовы Кириакии, к горе Хелион нарицаемой, идеже мнози христианы собрашася, исцелил еси тую от болезни главы, чрез возложение рук твоих и речение: «Во имя Господа нашего Иисуса Христа буди здрава», учредив убо довольны христианы тамо, такожде и в дому Наркисса сущия, пришел еси в пещеры Непотиановы, несый крыющимся тамо христианом «яже на пищу и иныя потребы», идеже бо собрани быша душ яко седмьнадесят и три, с ними же обрет и пресвитера Иустина. Мыслию убо и любовию, сретая тя на сем пути твоем, возглашаем тако:
     Радуйся, страннолюбче, нищым и убогим богатства церковная истощивый.
     Радуйся, церковная имения спасая от неверных хищения, Церкви живой — убогим вручивый.
     Радуйся, сокровищами земными небесное сокровище — славу святых приобретый.
     Радуйся, нищих и убогих, в беде сущих, теми сокровищами препитавый.
     Радуйся, рукама убогих богатство тленное в приобретение нетленних сокровищ предпославый.
     Радуйся, за страннолюбие и страдания венец нетления стяжавый.
     Радуйся, непобедимый великомучениче архидиаконе Лаврентие.

Кондак 6
     Проповедницы истины, богоноснии мученицы святии, сквозь огнь и воду внидоша к небесному покою, о нихже глаголати подобает словесы апостольскими, яко сии страстотерпцы велиими и неисчислимыми муки умучени «камением побиени быша, претрени быша, искушени быша, убийством меча умроша, ихже не бе достоин весь мир». Темже убо и мы, по сему глаголу апостолову, «толик имуще облежащ нас облак свидетелей, бремя всякое отложше и удобь обстоятельный грех, терпением да течем на предлежащый нам подвиг, взирающе на Начальника веры и совершителя Иисуса», Емуже с веселием, от всего сердца нашего, возопием: Аллилуиа.

Икос 6
     С светлым лицем представ судилищу Декиеву, святе Лаврентие, радовался еси грядущему венцу мученическому, паче венца мирския славы и вопрошаемь от него быв «где суть сокровища церковная», ничтоже отвещал еси безумному, подобяся Подвигоположнику Христу Богу, Иже не даде ответа вопрошавшему Его Ироду. Разгневася убо Декий, вдаде тя Валериану епарху, тойже в темницу заключи тя, идеже ты слепыя многия исцелив, подвизаеши всех верных взывати тако:
     Радуйся, врачу телесных немощей.
     Радуйся, ходатаю горних чертогов.
     Радуйся, слепоту телесную именем Христовым исцеляяй.
     Радуйся, слепоту душевную познанием истиннаго Бога отгнавый.
     Радуйся, истины Христова учения среди мглы неверия и безбожия прекрасный проповедателю.
     Радуйся, света Евангельскаго во тме и сени смертней безбожия седящим великий показателю.
     Радуйся, непобедимый великомучениче архидиаконе Лаврентие.

Кондак 7
     Мира дольняго красоту, богатство и славу земную оставил еси, непобедимый воине Христов, великомучениче архидиаконе Лаврентие, и к небесным горним селениям лютою стезею мучений мужественне востекл еси, идеже предстоя Престолу Господа славы с лики ангельскими, поеши Ему победную песнь: Аллилуиа.

Икос 7
     Егда узре Ипполит, начальник темницы, исцеленнаго тобою слепаго узника Лукиллия, егоже и крещением просветил еси, и иныя многия слепцы приходившия к тебе, яко ты, по словеси жития твоего, «призывая имя Иисус Христово и руку с знамением крестным на очеса их возлагая, творяше их прозрети», сим убо дивяся, обаче не оставляя и заблуждения неверных, испытовше тя: «покажи мне сокровища церковная»; к нему же ты, великомучениче, рекл еси: «О Ипполите, аще веровати будеши в Бога Отца всесильнаго и в Сына Его Господа Иисуса Христа, показано тебе будет сокровище и жизнь вечная дастся ти». Посем убо, изведен быв из темницы в дом Ипполитов и, огласив его, крести: просвещен же быв Ипполит крещением, рече: «Видех души неповинныя в велицей радости», якоже повествует житие, — «то бяху сокровища, о нихже Лаврентий ему извествоваше, яко будут откровенна, в час бо крещения показа ему Господь дивным видением небесная радования»; сим обрадован Ипполит быв, приведе ко Христу весь дом свой. От негоже похваляемый, великомучениче, такожде и от нас приими сия:
     Радуйся, великий мучениче, апостоле и проповедниче.
     Радуйся, скорый врачу, крестителю и исповедниче.
     Радуйся, в мучениих сущий, проповеди Христовы не оставивый.
     Радуйся, с венцем мученика звание апостола вместивый.
     Радуйся, устремляяйся к мукам, дела проповедания не оставивый.
     Радуйся, и самыя мучения в живую проповедь славы Христовы обративый.
     Радуйся, непобедимый великомучениче архидиаконе Лаврентие.

Кондак 8
     Сокровищем земным прилежа, Валериан мучитель истязаше тя, святый Лаврентие, емуже ты и обещал еси показати сокровища: «Даждь ми время на два или три дни и аз покажу ти сокровища». Отпущену же бывшу ти из темницы и извещенну бывшу о сем Декию царю, ты великомучениче, собрал еси многое множество нищих, и вдовиц, и сирот, и слепих, и хромых, и немощных в дом Ипполитов, по триех же днех, приведши оных пред лице Декия и Валериана, воззва к ним: «Се имате сокровища вечная в тех, ихже зрите сосудех вложенная, и кто имения своя в тыя сосуды влагает — приемлет оныя с лихвою в Небеснем Царствии». Даждь убо и нам молитвами твоими, святый великомучениче, сокровища наша земная, тленная, без сожаления влагати в таяжде честныя сосуды, чающе небеснаго воздаяния и поя Богу песнь хвалы: Аллилуиа.

Икос 8
     Видяще царь Декий и Валериан епарх себе постыжденных, разгневашася зело и уже не о сокровищах тебе, святый великомучениче, истязаху, но к поклонению идолом привлекаху, биему убо нещадно и устрашаему разновидными орудии мучений тебе бывшу, взывал еси Декию: «О, окаянне, всех сих аз давно желах, аки пиршества, то бо вам видятся быти мучения, нам же слава». Повелевающу мучителю, да приведеши на пиршество сие вся христианы, глаголаше: «Не достойна суть скверная очеса ваша видети тех, ихже имена написана суть на небесех». Биему же паки, и опаляему, и молящуся ти уже о исходе души твоея, слышашеся глас с небесе: «Еще множае страдати имаши», егоже аще слышаху невернии, но не можаху уразумети откуду есть, и паки лютейшия муки приложиша, ихже мы воспоминая, благоговейно тебе вопием:
     Радуйся, биение за Христа, нас ради биеннаго и страдавшаго, приемый.
     Радуйся, душу твою положивый за Господа и вечную жизнь обретый.
     Радуйся, узким путем страданий вшедый в покой небесный.
     Радуйся, опаляемый огнем, угасивый вечный огнь геенский.
     Радуйся, яко непрестанно в муках моливыйся, тем подражая в Гефсимании и на Кресте молившемуся Господу.
     Радуйся, непрестанно в молитве и любве пламеневый, даждь и нам сей дар молитвы ко Творцу всея твари.
     Радуйся, непобедимый великомучениче архидиаконе Лаврентие.

Кондак 9
     Всею душею твоею возлюбив Господа, Егоже и посреде лютых мучений, яко среди веселия, великий в мученицех Лаврентие, непрестанно прославлял еси: темже и Христос знамение силы Своея являше на тебе, посылая ангела Своего, егоже виде един от воин, именем Роман, возопи: «Святый Лаврентие, вижду юношу пресветла при тебе стояща и лентием отирающа язвы и все тело твое. Заклинаю убо тя Христом Господем, пославшим тебе ангела Своего, не остави мене». Сему дивному знамению мучители не восхотеша внимати, волшебством оное разумея, и заключиша тя паки в темницу, идеже ты крестив Романа, уготови его на подвиг мучения, он же, приклонив выю свою под меч острый, взываше якоже и ты, радостно Господу песнь хвалы: Аллилуиа.

Икос 9
     Вития многовещаннии не возмогут изобразити и уразумети лютейшия муки, егда, якоже глаголет житие твое, великий Лаврентие, «принесен бысть одр железный, и на том положиша мученика нага пред Декием и Валерианом, и углие огненное подложиша, железными же вилами слуги сверху пригнетаху на одре том тело мучениково и поджигаху пекуще, аки снедное мясо». Сие страдание твое точию воспоминая, содрагаемся, и прилежно приносим ти похвальная песни сия:
     Радуйся, на огни испекаемый и жегомый, огнь страстей палящий ны утоли молитвами твоими.
     Радуйся, на одре железном возлегий, от одра лености предстательством твоим возстави нас.
     Радуйся, лютыя страсти терпевый великодушно, от страстей облежащих ны исхити.
     Радуйся, страданиями небрегий да вечную славу приобрящеши, тоя же славы улучити и нам умоли.
     Радуйся, телесными скорбями вшедый в горняя обители, и нам помози оных достигнути.
     Радуйся, высоту терпения показавый, узкий и прискорбный путь терпения в житии сем нам облегчи.
     Радуйся, непобедимый великомучениче архидиаконе Лаврентие.

Кондак 10
     Спасти хотя душу твою, о телеси твоем небрегл еси, принося себе в жертву Господу, якоже и глаголал еси мучителем твоим: «Аз принесох мене самаго жертву Богу моему в воню благоухания в дусе сокрушеннем» и, егда мучителие разжигаху вельми одр, паки рекл еси царю: «Виждь, окаянне, яко углие то огненное мне прохладу готовит, тебе же — вечныя муки, весть бо Господь мой, яко о святем имени Его оклеветанный — не отвергохся, вопрошенный — исповедах Его, ныне жегомый — благодарю Ему». Сицевому благодушию в лютых страданиих научи и нас, доблестный великомучениче, да достигши обетованных благих, воспоем с тобою песнь победную Христу Богу: Аллилуиа.

Икос 10
     Стены безчувственныя твердее показася безбожный мучитель, повествует бо житие твое, Лаврентие славне, яко «вси тамо предстоявшии удивляхуся цареву мучительству таковому, яко жива человека испещи повеле». Ты же, великомучениче, глаголал еси молитвенно: «Благодарю тя, Господи Иисусе Христе, яко укрепил мя еси», и обращся к мучителем рекл еси: «Се, о окаяннии, испекосте едину тела моего страну, обратите на другую и ядите испеченное мясо мое», и паки ко Господу: «Благодарю тя, Господи Иисусе Христе, яко сподобил мя еси внити во врата Твоя» и сия рек, испусти дух. Поклоняяся таковей славней кончине твоей, умиленно вопием ти:
     Радуйся, кончиною своею посрамивый зело мучителей твоих.
     Радуйся, устыдивый вельми беззаконнующих.
     Радуйся, кротким терпением твоим удививый все естество человеческое.
     Радуйся, в терпении сем явивый себе, яко безтелесна, подобна горним силам.
     Радуйся, благодарственно вся терпевый, живота вечнаго явился еси славный наследниче.
     Радуйся, подвигом добрым подвизавыйся, показался еси вечныя славы сопричастниче.
     Радуйся, непобедимый великомучениче архидиаконе Лаврентие.

Кондак 11
     Песнь исходную первее принесе тебе, страдальче Лаврентие, Ипполит темничник, крещенный тобою, иже похити в ту нощь тело твое и плащаницею со ароматы обви е и со Иустином пресвитером принесе в дом Кириакии вдовицы, пребыв в той день в пощении со слезами, в вечер же глубок, якоже повествует житие твое, «мощи твоя несоша в пещеру, яже на селе вдовы тоя. Собравшимся же многим христианом, и плачущим много, сотворивше тамо всенощная моления, погребоша честно мученика, а святый Иустин пресвитер и вси прочии быша причастницы пречистых Таин Тела и Крови Христовых». Воспоминающе сие и мы, вместо мира — слезы молитвы принесем тебе и песнем исходным воздыханьми подражая, воспоем о тебе Богу: Аллилуиа.

Икос 11
     Свет Христов, просвещаяй и освящаяй всяческая, озари душу твою, богомудрый великомучениче, темже и по кончине твоей честныя мощи и иконныя подобия лика твоего неоскудно источают исцеления, утешение и радость всем болящым, скорбящым и унылым, подвизая оных подражати тебе во исповедании, терпении, мужестве и крепцей любве ко Христу, еюже пламенея, дивный образ терпения в злостраданиих явил еси и нас научаеши воспевати тебе тако:
     Радуйся, велию любовь и веру ко Христу до последняго издыхания сохранивый.
     Радуйся, в любви сохранивый веру, верою стяжавый мужество и теми козни вражия победивый.
     Радуйся, путем тесным в горняя восшедый.
     Радуйся, праведным житием обители вечныя достигнувый.
     Радуйся, в мире живый, надмирную красоту очами духовными созерцавый.
     Радуйся, Рима великаго и мира всего славо и украшение.
     Радуйся, непобедимый великомучениче архидиаконе Лаврентие.

Кондак 12
     Благодать данную ти от Господа в земнем житии твоем, святый великомучениче, во еже исцеляти недужныя, почитая веруем, яко и по смерти ты целиши с верою приходящых ко всечестным мощем твоим и прославленным божественною благодатию иконам: уповаем же, угодниче Божий, яко исцеляя телесныя очи прибегающых к тебе недужных, вкупе просвещаеши и душевныя очеса и ныне, якоже и древле, научая просвещенныя тобою воспевати Творцу всяческих: Аллилуиа.

Икос 12
     Поюще твоя великая страдания, Лаврентие, великий Христов угодниче, хвалим твое непостижимое нам немощным долготерпение, ублажаем твердое исповедание Христово и, почитая священную и славную память твою, заступниче наш и целителю, ведаем, яко по слову псалмопевца, «в память вечную будет праведник». Темже любовию прославляя тя, от чистаго сердца и благоговейныя души, устнами, аще и грешными, но усердными, вопием со умилением сице:
     Радуйся, даров великих Божиих присный нам ходатаю.
     Радуйся, преизящный угодниче и непобедимый в мучениих страстотерпче.
     Радуйся, крепким терпением стяжавый душу твою, оным терпением и нам явивый образ спасения вечнаго.
     Радуйся, тем же терпением мучителеву дерзость победивый, научая оным и нас побеждати дерзость исконнаго врага нашего.
     Радуйся, в том же терпении себе равнаго серафимам безплотным явивый.
     Радуйся, сим величайшым терпением звание непобедимаго от всех родов христианских получивый.
     Радуйся, непобедимый великомучениче архидиаконе Лаврентие.

Кондак 13
     О великий, всехвальный, непобедимый во страданиих великомучениче и архидиаконе Лаврентие, приими от всея души нашея сия похвалы тебе возносимыя, и нас, чающых милости Божия, помощи и спасения, от всяких бед, болезней и зол соблюди: воздыханий наших в болезнех и скорбех не презри, слезы наши собери и Престолу Утешителя Господа принеси, в час же кончины нашея предстани нам и Престолу Господа славы нас представи воспети Ему в горних селениих песнь ангельскую: Аллилуиа.
Этот кондак читается трижды, затем икос 1-й и кондак 1-й

Молитва святому мученику архидиакону Лаврентию
     О всесвятый и предивный страстотерпче Христов, архидиаконе Лаврентие! Восхваляя веру и страдания твоя, почитаем победу и венценосное прехождение твое чрез горящее углие от тмы века сего ко свету невечернему Престола величества Божия. Тем убо молим тя: якоже утвердил еси миром и чудесы притекающых с верою к покрову твоему в бедах и напастех, ангел сый во плоти, тако да приимеши и нас под кров твой в болезнех и печалех наших, и якоже исцелил еси Крискениона приложением рук от слепоты телесных очес его и множайшими чудесы удивил еси прибегающых к тебе, тако да исцелиши предстательством ныне у престола Божия и нашу душевную слепоту; призри на всякое разслабление наше телесное и укрепи нас бодренностью противу врагов наших видимых и невидимых, удручающих нас выну бедами и напастьми, да путь маловременной жизни сей прешед неискушенны от бед, скорбей и всякаго лютаго обстояния, достигнем тобою и мы неприступныя славы величества Божия, идеже предстоиши, моля со дерзновением за люди прибегающия с верою к тебе, воспевая дивнаго во святых Своих Бога во веки веков. Аминь.

Тропарь святому мученику архидиакону Лаврентию
Тропарь, глас 4:
     Мученик Твой, Господи, Лаврентие во страдании своем венец прият нетленный от Тебе, Бога нашего; имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Тропарь, глас 8:
     Серафим во плоти явился еси Лаврентие, огнем бо божественныя любве распаляемь, ярящийся огнь мучителя ни во что же вменил еси и угасил еси того ревность безбожную, темже и венец победоносен о имени и страдании твоем от Христа приял еси мужественно, сего ради победительно взываем тебе: радуйся, мучениче непобедимый Лаврентие.

Кондак, глас 2:
     Огнем бежественным распалив сердце твое, огнь страстей до конца испепелил еси, страдальцев утверждение, богоносне мучениче Лаврентие, и в страданиих вопиял еси верно: ничтоже мя разлучит любве Христовы.

Величание
     Величаем тя, страстотерпче святый Лаврентие, и чтим честная страдания твоя, яже за Христа претерпел еси.

Акафисты zvonnitsa.ru/orthodoxy/akafisti/296/13334/

Кондак 1
     Избранный от Царя сил, Господа Иисуса, предивный в житии и чудесах, угодниче Христов Лаврентие! Восхваляем тя с любовию, милостиваго предстателя нашего; ты же, блаженне, яко имеяй дерзновение ко Господу, молитвами твоими от всяких нас бед и скорбей свобождай, да зовем ти:
     Радуйся, блаженне Лаврентие, Калужский чудотворче.

Икос 1
     Ангел земный и человек небесный был еси, блаженне Лаврентие, от юности твоей юродство Христа ради себе усвоивый, да в жизни временней от всех оскорбляем и поругаем будеши, во блаженней вечности мзду небесную да обрящеши. Темже яко истинный угодник Божий от верных слышиши благохваления таковая:
     Радуйся, от благочестивых родителей рожденный;
     Радуйся, от юности на служение Богу предъизбранный.
     Радуйся, миру и всем прелестем его поругавыйся;
     Радуйся, страстем греховным неповинувыйся.
     Радуйся, мудрый странниче, единаго Христа любовию усердно взыскавый;
     Радуйся, истинный нищелюбче, во единей раздранней ризе ходивый.
     Радуйся, яко поругания и биения сладце Христа ради претерпевый;
     Радуйся, яко буйством о Христе совершенство духовное стяжал еси.
     Радуйся, алкавый и жаждавый на земли;
     Радуйся, достойно насытивыйся брашна нетленного на небеси.
     Радуйся, праведниче, сияяй яко солнце во Царствии Небеснем;
     Радуйся, угодниче Божий, прославленный многими дарами благодатными.
     Радуйся, блаженне Лаврентие, Калужский чудотворче.

Кондак 2
     Видев непостоянство мира сего, Лаврентие блаженне, юродственное Христа ради житие возлюбил еси, и среди мира пребывая, чужд мирских страстей явился еси, и яко добрый воин Христов победоносно противу врагов спасения человеческаго ратовал еси, немолчно воспевая Подвигоположнику Господу Иисусу: Аллилуиа.

Икос 2
     Разумел еси добре, Лаврентие блаженне, вся козни врага диавола, имиже от злых человек поруганьми и биеньми доброе твое произволение сокрушити хотяще. Темже тому крепце противустал еси и за досадителя твоя молился еси, и нас вопити тебе научил еси:
     Радуйся, терпения столпе непоколебимый;
     Радуйся, незлобия образе предивный.
     Радуйся, истинный Христов последователю;
     Радуйся, биения благодушно претерпевый.
     Радуйся, о укорениях и осмеяниях небрегий;
     Радуйся, любовию святою злобу человеческую победивый.
     Радуйся, в мире премирно поживый;
     Радуйся, во плоти ангелам подражателю.
     Радуйся, буйством о Христе премудрости небесныя стяжателю;
     Радуйся, смирением высокая приявший.
     Радуйся, яко подвиги твоими миру светильник явился еси;
     Радуйся, яко страннообразным твоим житием Бога прославил еси.
     Радуйся, блаженне Лаврентие, Калужский чудотворче.

Кондак 3
     Сила Божия осени тя, святе Лаврентие, и ратоборца крепкаго христианам противу полчищ агарянских яви тебе, егда благовернаго князя Симеона от погибели смертныя явлением твоим избавил еси, секирою супостаты поражающа и в бегство неверныя обращающа, верныя же побуждающа победную песнь Христу Богу возносити: Аллилуиа.

Икос 3
     Имел еси огнь любве Божественныя в сердце твоем, Лаврентие богоблаженне, и яко некий пламеннообразный Серафим, непрестанно в молитве умной пребывал еси, сердцем и душею твоею выну ко Господу Иисусу Христу возношаяся. Темже и Господь дивными дарами духовными тя обогати, да вси тебе вопиют радостно:
     Радуйся, воине Христов, необязываяйся куплями житейскими;
     Радуйся, прозорливче дивный, будущее, яко настоящее, созерцавый.
     Радуйся, яко любимаго ти князя Симеона от посечения смертнаго избавил еси;
     Радуйся, яко от псов словесных того защитил еси.
     Радуйся, яко явлением твоим агарян неверных устрашивый и в бегство обративый;
     Радуйся, силою Господа сил победу верным даровавый.
     Радуйся, отечества твоего земнаго Богом данный заступниче;
     Радуйся, православному воинству добрый соратаю.
     Радуйся, воеводо победоносный людем христоименитым;
     Радуйся, врагов Церкве Христовы грозный карателю.
     Радуйся, смиренным и благочестивым тихое пристанище;
     Радуйся, подвизающимся добрый помощниче.
     Радуйся, блаженне Лаврентие, Калужский чудотворче.

Кондак 4
     Буря агарянскаго нашествия на град Калугу тобою, святе Лаврентие, умирися, и нечестивые полцы агарян зловерных от стада Христова тобою со студом отгнани быша; тако бо дарова тя Господь заступника изряднаго отечествию твоему, в нем же до ныне славится имя твое, и подвиги твои благодарственным чествуются пением Богу: Аллилуиа.

Икос 4
     Слышим многая и чудная исправления твоя, о праведниче, како уединенное о Бозе житие твое при храме Рождества Христова проходил еси, пещерную стезю от келлии твоея к тому ископав, да незримый человеки Богу молитвы твои совершаеши. Сему убо смиренномудрию и нас научи, преподобне, да зовем тебе хвалебно:
     Радуйся, уединения любителю;
     Радуйся, многослезный молитвенниче.
     Радуйся, всякую гордыню от сердца своего отгнавый;
     Радуйся, христоподражательное смирение искренно возлюбивый.
     Радуйся, подвиги твоя молитвенные от человек утаивый;
     Радуйся, юродством Христа ради сия благоискусно сокрывый.
     Радуйся, таинниче Пресвятыя Троицы;
     Радуйся, созерцателю Ангельских сил.
     Радуйся, пещерною стезею во храм Божий ходивый;
     Радуйся, путем тесным пространство Царствия Христова стяжавый.
     Радуйся, яко дни в юродстве, а нощи в молитве препровождал еси;
     Радуйся, яко постом и бдением душу свою просветил еси.
     Радуйся, блаженне Лаврентие, Калужский чудотворче.

Кондак 5
     Боготечное светило быв, согражданы твоя благочестию христианскому поучал еси, Лаврентие всеблаженне, образ равноангельного жития тем показуя. Кто убо, о твоем великом терпении слыша, не умилится и совершенное смирение твое воспоминая, како обидящим, по заповеди Христа Бога, вся прощал еси и Тому во умилении глубоцем воспевал еси: Аллилуиа.

Икос 5
     Видим был еси от человек, яко юрод и безумен, по стогнам града в раздранней одежде ходяй, от всех поругаем, Лаврентие праведне, обаче мудр о Христе пребыл еси и сие чудесы многими проявил еси. Темже от людей благочестивых, яко истинный угодник Божий почитаем, слышал еси похвалы таковые:
     Радуйся, словес Апостола Павла, еже о Христе юродства, добрый последователю;
     Радуйся, евангельских Христовых заповедей верный исполнителю;
     Радуйся, хлад и зной любве ради Божия претерпевый;
     Радуйся, всякое упокоение плотское возненавидевый, да покой вечный наследиши.
     Радуйся, в мире страннообразно поживый, да отечествие горнее приобрящеши;
     Радуйся, биения телу твоему радостно приявый, да безсмертныя славы сподобишися.
     Радуйся, мужу желаний духовных;
     Радуйся, делателю благий винограда небеснаго.
     Радуйся, плоды сладкие делания твоего Христу принесый;
     Радуйся, временными лишеньми богатство небесное стяжавый.
     Радуйся, изрядный праведнаго жития рачителю;
     Радуйся, преподобия и чистоты ревнителю.
     Радуйся, блаженне Лаврентие, Калужский чудотворче.

Кондак 6
     Проповедник был еси покаяния грешником и обличитель прозорливый беззаконий человеческих, Лаврентие преблаженне; слово бо твое многих ко спасению приведе и на путь исправления настави, их же с любовию обличал еси и к покаянию истинному призывал еси, Богу же учил еси воспевати: Аллилуиа.

Икос 6
     Возсиял еси, яко звезда пресветлая, во граде Калуге, угодниче Божий, и чудес благодатию согражданы твоя просветил еси и многия болящия преславно молитвами твоими исцелил еси, и вся верныя подвизал еси звати тебе:
     Радуйся, верующим врачу безмездный;
     Радуйся, молитвенниче всесильный ко Господу Богу.
     Радуйся, руце твои святыя цельбоподательно на недужныя полагавый;
     Радуйся, единым прикосновением к одежде твоей больным здравие подававый.
     Радуйся, яко чудотворения твоя юродством сокрыти тщался еси;
     Радуйся, яко тем искушения демонския победоносно отгнал еси.
     Радуйся, сострадательный и милостивый страждущим помощниче;
     Радуйся, любвеобильный и благосердный скорбящих утешителю.
     Радуйся, Богу всей душею твоею прилепивыйся;
     Радуйся, ближняя твоя зело возлюбивый.
     Радуйся, присно о обидящих тя молитвы возносивый;
     Радуйся, кротость совершенную себе усвоивый.
     Радуйся, блаженне Лаврентие, Калужский чудотворче.

Кондак 7
     Хотение присное имел еси, святе Лаврентие, да богоугодное и праведное житие твое от человек утаится. Темже всяко тщался еси от людей юродством сие сокрыти и радовался еси безчестиям и биениям, тебе наносимым, яко даром великим, присно зовый во смирении духа песнь Богу: Аллилуиа.

Икос 7
     Новаго тя Андрея Цареградскаго познаем, Лаврентие блаженне, град Калугу дивным юродственным житием твоим просветившаго: дадеся бо тебе благодать от Бога помыслы человеческие познавати и согрешения тайные обличати, согражданом же твоим духовно светити и на стези покаяния и спасения тех приводити. О сем тебе восхваляюще, поем:
     Радуйся, яко правда твоя в мире возсия немерцаемым Божия благодати светом;
     Радуйся, яко тайнии подвизи твои от Бога явно чудесы прославишася.
     Радуйся, древним пророкам подражавый;
     Радуйся, прозорливец воистину неложный явивыйся.
     Радуйся, приявый власть на духи нечистыя;
     Радуйся, смирением твоим вся козни их разрушивый.
     Радуйся, постом и молитвою сильно на диавола вооруживыйся;
     Радуйся, нищетою и уничижением всю гордыню его поправый.
     Радуйся, на земли небесный гражданине;
     Радуйся, среди молвы народныя безмолвия добный хранителю.
     Радуйся, землю одром упокоения имевый;
     Радуйся, безчестие в честь вменивый.
     Радуйся, блаженне Лаврентие, Калужский чудотворче.

Кондак 8
     Страннообразное юродственное житие твое, Лаврентие праведне, святою кончиною завершил еси, яко истинный угодник Божий, о Господе почив, душею же твоею в небесныя скинии Царствия Христова восшел еси, и тамо со святыми Пресвятой Троице сподобился еси воспевати приснохвалебную песнь: Аллилуиа.

Икос 8
     Весь град Калуга благоухания духовнаго в час скончания твоего исполнился, Лаврентие блаженне, и келия твоя, идеже о Господе почил еси, мироположница благоухания Христова явися, емуже благовернии людие радующеся, тебе похвальныя сия словеса воспевати научишася:
     Радуйся, величием чудес в житии и по смерти просиявый;
     Радуйся, праведно и свято житие твое совершивый.
     Радуйся, яко кончину твою благоуханием чудным ознаменовал еси;
     Радуйся, яко ароматы райскими святость души твоея показал еси.
     Радуйся, в сладкую воню Христову радостно востекий;
     Радуйся, нетленное тело твое, аки масть духовную, верным оставивый.
     Радуйся, град Калугу святыми мощами твоими освятивый;
     Радуйся, радости многим подателю.
     Радуйся, недугов душевных и телесных целителю;
     Радуйся, ближним и дальним дары целебныя подаваяй.
     Радуйся, чтущих тя прошения исполняяй;
     Радуйся, блаженне Лаврентие, Калужский чудотворче.

Кондак 9
     Всем людем во утешение и освящение явися святое место уединения твоего, идеже во храме Рождества Христова гроб твой честный чудеса многа и предивна силою Христовою совершает и вся верныя научает твоя богоугодный подвиги чествовати. Богу же, прославльшему тя, пети: Аллилуиа.

Икос 9
     Витийство мирское недовлеет к прославлению чудес, по молитве блаженнаго Лаврентия совершаемых и разумение человеческое превосходящих, о нихже мы, смиреннии, благохвалити угодника по достоянию недоумеем, но от усердия нашего приносим ему малыя нехитростныя похвалы сия:
     Радуйся, угодниче Божий, со святыми почиваяй;
     Радуйся, избранниче Христов, земнородным милосердие твое являяй.
     Радуйся, расслабленныя телом здравы возставляяй;
     Радуйся, бесныя от насилия диавольскаго свобождаяй.
     Радуйся, глухим слухи отверзаяй;
     Радуйся, немым уста разрешаяй.
     Радуйся, хромым право ходити устрояяй;
     Радуйся, бедствующих скоропредстательный помощниче.
     Радуйся, скорбящих благодатный утешителю;
     Радуйся, града Калуги небесный покровителю.
     Радуйся, святыя обители твоея неустанный хранителю;
     Радуйся, всея земли нашея заступниче.
     Радуйся, блаженне Лаврентие, Калужский чудотворче.

Кондак 10
     Спасительную Божию благодать подаеши всем, святе Лаврентие, с недугами человеческими и с верою крепкою молитвенно притекающим к цельбоносному твоему образу. Темже и мы, припадающе, молим тя недуги наша исцелити, грехом же нашим отпущение испросити, да зовем дивному во святых Своих Богу: Аллилуиа.

Икос 10
     Царя Небеснаго Христа Бога истинный раб и угодник был еси, Лаврентие блаженне, и от Него чудесы прославленный, отечествию твоему земному благотворения многая являеши, больныя исцеляя, расслабленныя укрепляя, слепыя просвещая. О немже радующеся, приносим ти сия радостныя пения:
     Радуйся, звездо немерцающая, чудес зарею верныя озаряющая;
     Радуйся, правды солнца Христа луче пресветлая.
     Радуйся, милосердия Спасова подражателю;
     Радуйся, милость твою болящим человеком являяй.
     Радуйся, верныя души благодатью посещаяй;
     Радуйся, в сониих и видениих земнородныя зраком лица твоего просвещаяй.
     Радуйся, от горних высот к ищущим заступления твоего милостивно принимаяй;
     Радуйся, от очес страждущих слезы отираяй.
     Радуйся, области Калужския духовная красото;
     Радуйся, Церкви Христовы светлая похвало.
     Радуйся, на небеси со ангелы и святыми славою нетленною украшенный;
     Радуйся, на земли от правоверных по долгу ублажаемый.
     Радуйся, блаженне Лаврентие, Калужский чудотворче.

Кондак 11
     Пение молебное у гроба твоего с верою некий разслабленный приношаше, руце и нозе недвижими и язык немый имеяй, но егда к целебней раце мощей твоих прикоснулся, абие здрав соделася, руце свои простре и ногами ходити нача и языком своим ясно проглагола; темже велию твою к нему милость прославляше и благодарственно взываше ко Господу: Аллилуиа.

Икос 11
     Светлостью чудес твоих, угодниче Божий Лаврентие праведне, помраченныя грехми души наша озаряеши и вся ны от сна лености возбуждаеши, да плоды покаяния принесем Христу, тебе в подвизех богоугождения подражающе, яко да возможем неосужденно благохвалити тя, предстателя нашего, сими песненными глаголы:
     Радуйся, лампадо, светом Христовым всех просвещающая;
     Радуйся, елеем милости твоего сердца болезненная умащаяй.
     Радуйся, руце согбенная и недвижимая целы и действенны устроивый;
     Радуйся, нозе неходящия к скорому и правому течению претворивый.
     Радуйся, язык, немотою связанный, благодатно разрешивый;
     Радуйся, разслабленнаго всеми уды крепка и здрава возставивый.
     Радуйся, алавастре целебный, на всякия недуги врачевство содержаяй;
     Радуйся, болящим милость сострадания твоего являяй.
     Радуйся, по Бозе и Пресвятей Богородице упование на тя возлагающих не посрамляяй;
     Радуйся, любящим тя и чествующим память твою предстательством небесным воздаваяй.
     Радуйся, молитвенно призывающим святое имя твое на помощь ускоряяй;
     Радуйся, поклоняющимся с верою честным мощем твоим дары целебные независтно подаваяй.
     Радуйся, блаженне Лаврентие, Калужский чудотворче.

Кондак 12
     Благодать Божию многоцелебную, от гроба твоего источаемую, некий муж уведев, сына своего, ногами болезновавша и отнюдь ходити не могуща, на плещах своих к целебной раце твоей, святе Лаврентие, принесе и со слезами о его исцелении к тебе моляшеся; и се молитве еще сущей во устех его, больной на нозе свои ста и ходити нача, скача и благодаря Бога, в тебе славно прославльшагося, благодарными усты взывая к Нему: Аллилуиа.

Икос 12
     Поюще подвиги твоя предивные и чудеса твоя преславная, Лаврентие праведне, молим тя, заступника нашего: приклонися милостивно к нашим молитвам смиренным и вознеси о нас ко Господу твоя благоприятныя молитвы, прося нам от благости Его дары благопотребныя душевному спасению нашему, да возможем и мы грешнии не токмо подвиги твоя прославляти, но и добродетелем твоим подражати, зовуще и глаголюще:
     Радуйся, светлый образе богоугождения в мире жительствующим;
     Радуйся, предивный наставниче в иночестве подвизающимся.
     Радуйся, девствующим подражания образе;
     Радуйся, нищелюбцем преуспеяния правило.
     Радуйся, мудрости суетныя мирския посрамителю;
     Радуйся, буйства о Христе благодатнаго проявителю.
     Радуйся, евангельских обетований наследниче;
     Радуйся, апостольских целебных даров преемниче.
     Радуйся, ангельских воинств собеседниче;
     Радуйся, всех святых сожителю.
     Радуйся, телеса наша безмездно врачуяй;
     Радуйся, о душах наших Господа умоляяй.
     Радуйся, блаженне Лаврентие, Калужский чудотворче.

Кондак 13
     О предивный чудотворче и заступниче всем нам премилостивый, святе блаженне Лаврентие! Приими с любовию сие малое, в похвалу тебе приносимое моление наше и помолися ко Господу Богу о еже избавится нам геенны огненныя и мучений вечных, Царствие же Небесное вкупе с тобою унаследовати, да в радости святых воспоем и мы, грешнии, Богу Спасителю нашему: Аллилуиа.
Этот кондак читается трижды, затем икос 1-й и кондак 1-й

Молитва святому праведному Лаврентию, Христа ради юродивому, Калужскому чудотворцу
     О святый и богопрославленный праведниче и чудотворче Лаврентие, скорый помощниче и усердный заступниче всех, с верою и любовию молитвенно к тебе прибегающих! Се и мы, смиреннии и грешнии, обремененнии игом тяжким многих беззаконий наших, во умилении глубоцем к тебе прибегаем, и припадающе к многоцелебной раце святых мощей твоих, молим тя: помолися за нас ко Господу Богу, да не погубит нас со беззаконии нашими, но обратит нас на стезю покаяния и спасения. Вемы бо, вемы, яко много может пред Ним молитва праведнаго. Тебе же воистину праведника суща на умоление к Нему предлагаем со упованием крепким, яко твоего ради небеснаго предстательства пред Ним и мы недостойнии помиловани будем. Испроси нам у Создателя нашего великия и богатыя дары благости Его: земли плодоносие, воздуха благорастворение, дожди благовременны, мир во днех наших, благочестия умножение, болящим здравие, скорбящим утешение, унывающим ободрение, сиротствующим призрение, убогим снабдение, подвизающимся преуспеяние, умирающим благую христианскую кончину и всем правоверующим вечное спасение. Богохранимую же землю Российскую молитвами твоими невредиму от всякаго зла сохрани, град же твой соблюди в мире и благоустроении, яко страж и хранитель их неотступный. Ей, угодниче Божий! Не посрами упования нашего, но яви нам святое твое заступление: да величаем тя немолчно, яко великаго предстателя нашего, и прославляем неизреченное человеколюбие дивнаго во святых Своих Триединаго Бога, Отца и Сына и Святаго Духа во веки веков. Аминь.

Тропарь блаженному Лаврентию, Христа ради юродивому, Калужскому
Тропарь, глас 4:
     Просветився божественною благодатию, Богомудре, и весь разум и сердце от суетнаго мира сего к Зиждителю неуклонно возложив, целомудрием и многим терпением во временней жизни течение добре скончал еси и веру соблюл еси непорочну. Темже и по смерти явися светлость жития твоего, источаеши бо чудесем источник неисчерпаемый верою притекающим ко святому твоему гробу, Лаврентие всеблаженне, моли Христа Бога, да спасет души наша.

Ин тропарь, глас 3:
     Святый праведный Лаврентие, моли Милостиваго Бога, да прегрешений оставление подаст душам нашим.

Кондак, глас 8:
     Избранному и дивному в праведницех, иже убо от Христа дар чудес приимшему похвальныя ныне принесем глаголы, но яко имея дерзновение ко Святей Троице, Юже моли избавитися от бед рабом твоим, да зовем ти: радуйся, Богомудре Лаврентие.

Величание
     Величаем тя, святый праведный Лаврентие, и чтим святую память твою, ты бо молиши за нас Христа Бога нашего.
 

Акафисты zvonnitsa.ru/orthodoxy/akafisti/295/13336/

Кондак 1
     Избранный угодниче Божий и преславный чудотворче, преподобне Лаврентие, повеление приим Царицы Небесныя приити в древний град Чернигов вселитися во обитель Пресвятыя Троицы, идеже праведно пожив, изгнание претерпев и стадо иночествующих собрав, словом Божиим их напитав и ко Христу приведый. Ты же яко имея дерзновение ко Пресвятей Троице, молися избавити ны от всяких бед и скорбей, да со умилением благодарственно зовём ти:
     Радуйся, преподобне Лаврентие, усердный и богоприятный о душах наших молитвенниче.

Икос 1
     Ангелов подражатель явился еси, преподобне и богоносне отче Лаврентие, свято и праведно пожив на земли, и нам оставив образ совершенства духовнаго. Мы же, видя тя сосуде изрядный, Божиею Материю возлюбленный, обитель Пресвятыя Троицы святым твоим житием и чудесы украсивый, благодаряще Бога, прославляем тя яко велие светило, прилежно зовуще ти сице:
     Радуйся, служителю Пресвятыя Троицы;
     Радуйся, предивный избранниче Божия Матери;
     Радуйся, любве ради Господа всякое наслаждение земное оставивый;
     Радуйся, вся блага мира сего Христа ради презревый;
     Радуйся, яко богатство нетленное обрел еси;
     Радуйся, иго Христово благое и легкое возлюбивый;
     Радуйся, во плоти яко безплотен поживый;
     Радуйся, тобою бо помыслы нечестия обличаются;
     Радуйся, дела благая и полезная тобою благословляются;
     Радуйся, тобою верным путь к Небеси указуется;
     Радуйся, преподобне Лаврентие, усердный и богоприятный о душах наших молитвенниче.

Кондак 2
     Видевше тя, отче Лаврентие, силою Господа умудренный преосвященный Антоний, повеле прийти во град Чернигов во обитель Троице-Ильинскую, идеже икона Пресвятыя Госпожи Владычицы Марии бе, ты же, внимая его прошению, усилил молитву, тогда Сама Царица Небесная благослови тя, ты же, пришед яко на гору высоку, место богоизбранна селения иноческаго обрел еси, обитель во славу Пресвятыя Троицы и Божией Матери: иночествующия в подвизех укрепил, ревнующия о восхождении на Небо, от веры в веру, и от добродетели к добродетели собрав купно с тобою пети в Троице Единому Богу: Аллилуиа.

Икос 2
     Разум божественный вразуми тя, отче Лаврентие, оставити мир и яже в мире, пришед во обитель Рыхловскую святителя Николая, желая подвизатися всем сердцем Христу Богу, Ему же усердно чтением и пением подвизаяся и в иных послушаниях работая ради ближних. Мы же, видя тя сосуд Святаго Духа, умильно зовем ти:
     Радуйся, от юности пламенно житие монашеское возлюбивый;
     Радуйся, старость матери твоея успокоивый;
     Радуйся, по смерти тоя во обитель святителя Николая пришедый;
     Радуйся, премудростию Божиею люди удививый;
     Радуйся, иночествующим правило и образ бывый;
     Радуйся, честную и боголюбезную чистоту непорочно сохранивый;
     Радуйся, узкими и тесными враты во Царствие Небесное возшедый;
     Радуйся, венец неувядаемый от Господа достойно приемый;
     Радуйся, на Небеси и на земли прославленный;
     Радуйся, яко житие, деяния и вещания твоя не точию в      России, но и по всей земле известна суть;
     Радуйся, преподобне Лаврентие, усердный и богоприятный о душах наших молитвенниче.

Кондак 3
     Силою свыше архиереи града Чернигова священномученицы Василий и Пахомий видевше тя украшена житием богоугодным, велие твое смирение, постом и молитвою сияющее, и верныя люди мудро наставляюща, зело возлюбиша тя и не возбраниша ти людей к тебе приходящих наставляти, воспоем разумно Пресвятей Троице: Аллилуиа.

Икос 3
     Имея истинное смирение, и велие послушание, пришед во святую обитель Пресвятыя Троицы и воззрев на образ Богоматери Троице-Ильинския, держащия Богомладенца Иисуса на пречистых Своих руках, узнав Ю Пренепорочную, тебе явльшуюся, пал на землю пред Нею, прося помощи и покрова. Мы же, видя твое предание воле Божией, вопием таковая:
     Радуйся, послушание Божией Матери явивый;
     Радуйся, послуживый верным во граде Чернигове;
     Радуйся, образ Тоя чудотворный во обители узревый;
     Радуйся, пред сим образом усердно моливыйся;
     Радуйся, алчущим и жаждущим правды глаголы живота вечнаго возвестивый;
     Радуйся, ищущим путь спасения указавый;
     Радуйся, мудрый в Горнее Царство предводителю;
     Радуйся, во благочестии труждающихся помощниче;
     Радуйся, немудрых благостный учителю;
     Радуйся, теплый о всем мире заступниче;
     Радуйся, преподобне Лаврентие, усердный и богоприятный о душах наших молитвенниче.

Кондак 4
     Бог, принесший Себе в жертву за грехи всего мира, и воскресший из мертвых со славою, вознесыйся на небо, сподоби тя путешествие сотворити во Иерусалим, идеже ты, треблаженне, усердно о Русской стране моляся и свеча в твоих руцех небесным огнем сама возжеся, ты же со всеми верными воспел еси Иисусу Христу, грядущему судити живым и мертвым богокрасную песнь: Аллилуиа.

Икос 4
     Слышавшие пастырие Христовой Церкве, яко буря страстей и треволнение многомятежнаго мира не поколеба тя, в тихое пристанище спасения душу твою управив, преподобне отче, вся благая и красная мира презрев, иноцы других обителей стекахуся на поучения твоя и вернии российстии людие притекаху из дальних градов и весей в напастех и скорбех утешение и ободрение, болящия исцеление, и дары благости Божия молитвами твоими от Щедродавца Бога обильно приемлюще: архиерей освяти тя быти архимандрита, достойную почесть трудам твоим воздавая, и подвизая ны благохвалити тя сими похвалы:
     Радуйся, Агнца и Пастыря верный служителю;
     Радуйся, олтаря Господня непорочный предстоятелю;
     Радуйся, яко Царя Славы со Ангелы воспеваеши;
     Радуйся, богомудрый иноков и верных людей наставниче:
     Радуйся, слезнаго умиления преисполненный;
     Радуйся, даров Святаго Духа честное вместилище;
     Радуйся, совершеннаго терпения подвижниче;
     Радуйся, Пресвятыя Троицы избранное жилище;
     Радуйся, истиннаго смирения изрядный учителю;
     Радуйся, благочестия утверждение и Православия похвало;
     Радуйся, преподобне Лаврентие, усердный и богоприятный о душах наших молитвенниче.

Кондак 5
     Боготечную звезду видевше тя, преподобне отче Лаврентие, житием и учением светло сияюща, иноцы и вернии последоваша зари светлаго жития твоего, яко светильника держашася тебе, и се прииде безбожное иго и жидовское нечестие вкупе со тмами соборы самосвяты и живисты и прочие еретицы и раскольницы, попраша святыни, ты же яко пастырь добрый не оставив град Чернигов и верныя люди, противу церкве пророка Илии и пещер преподобнаго Антония живя в дому вдовы честныя и благоговейныя монахини Евлампии, вся верныя приводя к Неприступному Свету, моляся о стране Российстей, да управит ю Бог на возрождение царства православнаго, и приим от Архангела Гавриила о сем откровение, зело возрадовался, вопия вкупе со всеми верными Пресвятей Троице: Аллилуиа.

Икос 5
     Видеша благовернии людие града Чернигова исполнение твоих пророчеств: церквей Божиих открытие и возобновление, ты же, украсив боголепно дом Пресвятыя Троицы и Богородицы, и собрав велие стадо хотящих иночествовати и желающих последовати твоему истинному наставлению, их же нелестно поучая призывати непрестанно имя Божие и людем верным помогая, возвращение мощей святителя Феодосия предрек, и архиерею Борису совет преподав на прежнее место славно положити в Спасове соборе Преображения, еже он и содела. Мы же хвалим Бога, давшаго ти дух пророчества и премудрости и просим тя, молися, святе Лаврентие, о спасении нас грешных, поющих ти:
     Радуйся, иноков богомудрый руководителю;
     Радуйся, яко мощи святителя Феодосия обрел еси;
     Радуйся, пришествие мощей святителя Феодосия песньми пасхальными прославивый;
     Радуйся, устава церковнаго неленостный исполнителю;
     Радуйся, болящих врачу благоискусный и безмездный;
     Радуйся, скорбящих благоприятное утешение;
     Радуйся, унывающих благодатное ободрение;
     Радуйся, душетленных страстей прогонителю;
     Радуйся, бесноватых от насилия демонскаго свободителю;
     Радуйся, безпомощных скоропредстательный помощниче;
     Радуйся, преподобне Лаврентие, усердный и богоприятный о душах наших молитвенниче.

Кондак 6
     Проповедуя слово Божие всем, отче Лаврентие, научая словом и житием твоим безмолвию, братолюбию, странноприимству, смирению, посту, молитве и страху Господню, иже есть начало премудрости, ею же осененный, не изменив до старости маститыя иноческаго правила, неленостно подвизаяся в молитвах деннонощных, и воспевая, дающему ти крепость и силу, хвалебную песнь Богу: Аллилуиа.

Икос 6
     Возсия нам, яко звезда светозарная и путеводящая, воздержное постническое житие твое, преподобне отче Лаврентие, не тужил бо еси о брашне, еже не поставит ны пред Богом, не радел о одеждех ризных, предпочитая благоукрашати душу твою добродетельми. Кончину твою трикраты предрек и течение временнаго жития добре совершив. Нетлением и чудесы прославлен от Спаса Христа, от нас же приими сия хвалы:
     Радуйся, постническаго лика украшение;
     Радуйся, образе целомудрия и воздержания;
     Радуйся, звездо в сонме преподобных сияющая;
     Радуйся, иноков пастырю и мирских людей учителю;
     Радуйся, в мире живущих заступниче и покровителю;
     Радуйся, истинный Евангелия Христова последователю;
     Радуйся, благодатию Божией насыщенный;
     Радуйся, от Источника живота слова Божия напоенный;
     Радуйся, ризою спасения облеченный и одеждою нетления одеянный;
     Радуйся, прежде общаго Воскресения от Господа нетлением телесе во уверение всех человек прославленный;
     Радуйся, преподобне Лаврентие, усердный и богоприятный о душах наших молитвенниче.

Кондак 7
     Хотя верен быти подражатель Агнца Божия вземшаго грехи мира, кротость и смирение взем на себе, отче наш Лаврентие, вся скорби и обиды без ропота претерпев, ведый, яко скорбями временными искупуется вечное спасение, совершеннаго безстрастия достигнув, и егда прииде твоя честная кончина, ты еще на земли достойно и праведно воспел Ангельскую песнь Вседержителю Богу: Аллилуиа.

Икос 7
     Дивен Господь во святых Своих, дивно тя показа победоносца противу врагов спасения нашего видимых и невидимых, и по блаженнем успении прослави, ты же, преподобне отче Лаврентие, ожидая место погребения, пребывал плотию с нами четыренадесять дний и нощий, и во сие время не умолкаху у гроба твоего молитвы и слезы, душею предстоя Престолу Божию, моляся о Святей Руси и верных людех, показа нетление твоего телесе во уверение воскресения всех человек. От гроба же твоего исхождаше велие благовоние, уверяя ны в святем животе твоем. Мы же дивящеся, восхваляем ти тако:
     Радуйся, всякое сладострастие в себе искоренивый;
     Радуйся, плоть твою духу покоривый;
     Радуйся, бдении всенощными ополчивыйся противу искушений вражиих;
     Радуйся, постом неослабным обуздавый всякое нечистое желание;
     Радуйся, молитвою непрестанною очистивый себе от всякия скверны;
     Радуйся, всего себе Богу посвятивый;
     Радуйся, за словеса Господня пути жестоки сохранивый;
     Радуйся, слезами пожав радость присносущную;
     Радуйся, четыренадесятодневным стоянием телесе твоего ны утешивый;
     Радуйся, яко и по смерти нас не оставляеши;
     Радуйся, преподобне Лаврентие, усердный и богоприятный о душах наших молитвенниче.

Кондак 8
     Странника и пришельца помышляв себе быти в мире сем непостояннем, преподобне Лаврентие, и града небеснаго взыскуя, Царство Божие еще на земли устрояя, сохраняя верныя от безбожнаго нечестия, губительных автокефальных самосвятов и обновленных живистов, латинствующих и унии, и иных множества еретик и раскольник, вкупе с благочестивыми сладце воспевал победную песнь Животворящей Троице: Аллилуиа.

Икос 8
     Весь облеклся еси во вся оружия Божия, яко победоносный воин Христов, препоясав чресла твоя истиною, оболкся в броню правды, обув нозе твой во уготования мира, восприяв щит веры и шлем спасения и меч духовный, иже есть глагол Божий, им же победив вся наветы лукаваго. Ты же, святе Лаврентие, древним отцем подобен быв, верныя во благочестии укрепил, и многия заблудшия и неверныя к Богу обратил, веру Православную защитил и утвердил, еретицы, раскольницы и инако мыслящия посрамил и вразумил. Помози, преподобне, и нам твоим ходатайством у престола Пресвятыя Единосущныя и Нераздельныя Троицы устояти, темным силам антихриста и слуг его и противитися искушениям вражиим, веруя во Едину Церковь по твоему глаголу, иже во Святем Евангелии. Мы же от чиста сердца молим тя, приими сия похвалы:
     Радуйся, преподобному Антонию Печерскому уподобивыйся копанием пещеры;
     Радуйся, якоже и Феодосий стояти до смерти во Православней вере заповедавый;
     Радуйся, якоже Сергий Радонежский строителю и возобновителю иноческих обителей;
     Радуйся, отреватися унии, самосвятства и иных ересей поучаеши, якоже Иов Почаевский;
     Радуйся, верныя наставивый, якоже Серафим Саровский;
     Радуйся, грознаго времени возвестителю и покаяния проповедниче, якоже Иоанн Кронштадтский и преподобномученик Алипий;
     Радуйся, устава преподобных отец Феодора Студита и Саввы Освященнаго ревностный исполнителю;
     Радуйся, нарушителей церковнаго устава строгий вразумителю и наказателю;
     Радуйся, противу латинства стоявый якоже преподобномученицы Макарий Овручский и Афанасий Брестский;
     Радуйся, святым песнословием Роману Сладкопевцу подобен бывый;
     Радуйся, преподобне Лаврентие, усердный и богоприятный о душах наших молитвенниче.

Кондак 9
     Всем сердцем Единаго Бога возлюбив, тем же и Господь тя возлюби, и чудесы прослави, дарова нам тебе молитвенника пред благостию Его. Смиренно молим тя, умоли Судию Праведнаго в день Страшный за ны, да не помянет грехов и беззаконий наших, и сподобит ны участи блаженныя одесную стоящих и поющих Ему: Аллилуиа.

Икос 9
     Ветии многовещанныя не довлеют изглаголати вся подвиги и чудеса твоя, богомудре отче Лаврентие: ибо доброта жития твоего воистину превосходит похвалу человеческую: обаче мы, любовию к тебе побеждаеми, дерзаем смиренномудренно благохвалити тя пением таковым:
     Радуйся, святыя Православныя веры и Церкве светильниче немерцающий;
     Радуйся, Российския страны оградо необоримая;
     Радуйся, смирением гордыню душепагубную поправый;
     Радуйся, кротостию ярости пламень погасивый;
     Радуйся, сребролюбие возненавидевый;
     Радуйся, всякие досаждения и обиды без гнева претерпевый;
     Радуйся яко молитвами непрестанными уныние прогнавый от себе и достигнувый о Господе радования;
     Радуйся, победныя почести от Христа Бога свыше приявый;
     Радуйся, при животе и по смерти от Господа чудес даром обогащенный;
     Радуйся, во благоухании святыни во обители твоей почиваяй;
     Радуйся, преподобне Лаврентие, усердный и богоприятный о душах наших молитвенниче.

Кондак 10
     Спастися нам мучения вечнаго умоли Всевышняго Творца, угодниче Божий Лаврентие, и не лиши ны помощи твоея святыя в час кончины нашея, егда духи нечистыя смутят ны привидении своими: тогда явися нам заступник усерден, молитвами твоими избавляя ны от их наветов и сподобляя лицезрения Ангел, и пения с ними Богу: Аллилуиа.

Икос 10
     Стену заступления и молитвенника благоприятна к Богу обретше тя, отче Лаврентие, благодарение Отцу Небесному усердно возсылаем, за вся благодеяния Его, тобою нам обильно являемыя, тебе же предстоятелю нашему сице глаголем:
     Радуйся, обители Троице-Ильинския утверждение и похвало;
     Радуйся, града Чернигова покрове Богом данный;
     Радуйся, монашествующих ликов пречудная красото;
     Радуйся, христианскому роду присное утешение;
     Радуйся, обидимых сильный заступниче;
     Радуйся, сирых и убогих благонадежное пристанище;
     Радуйся, душевных и телесных недугов благий целителю;
     Радуйся, радости всем нам вечныя известный ходатаю;
     Радуйся, яко пророческия твоя слова и изречения исполняются;
     Радуйся, небесный наш покровителю;
     Радуйся, преподобне Лаврентие, усердный и богоприятный о душах наших молитвенниче.

Кондак 11
     Пение хвалебное воспеваем ти, преподобне отче Лаврентие, и с любовию припадаем раце святых чудотворных и многоцелебных мощей твоих, прославляя терпеливое твое житие, безмолвие твое высокое, смирение нелицемерное, молитву непрестанную, воздержание совершенное и чистоту боголюбезную души и тела; о всеблаженне, помози и нам подражати твоим добродетелем, да возможем богоугодно пети Создателю нашему Богу: Аллилуиа.

Икос 11
     Светильник добрых дел быв еще при животе, отче преподобне Лаврентие, светильник светозарный Божия благодати явился и по смерти, сияя чудесы и исцеления источаеши от нетленных мощей твоих, иже по четыренадесяти трех летех, яко сокровище драгоценное, целы и благоуханны обретошася и поставлены быша во храме Пресвятыя Троицы Троице-Ильинския обители, в ней же многа лета потрудился во благо и земное жительство благочестиве скончал. Тебе, прославленному от Господа, дары песней духовных приносим, умиленно зовуще сице:
     Радуйся, нетления цвете благоуханный;
     Радуйся, свято процветший крине Рая Иисусова;
     Радуйся, светлостию чудес твоих озаряяй мрак душ наших;
     Радуйся, от болезней многоразличных благодатный целителю;
     Радуйся, ран греховных врачу благоискусный;
     Радуйся, скорбящих утешителю радостотворный;
     Радуйся, грозный карателю обидящих;
     Радуйся, обители твоея страж неусыпный;
     Радуйся, житие твое всему миру явивый и пророчество ему предрекий;
     Радуйся, вся земли концы твоим святым житием Православныя люди удививый;
     Радуйся, преподобне Лаврентие, усердный и богоприятный о душах наших молитвенниче.

Кондак 12
     Благодати велия сподобився от Господа, треблаженне отче Лаврентие, и по достоянию чудотворец наречен быв: ибо не токмо при животе, но и по смерти, величием твоих чудес всех удивляеши, и ко славословию всемогущества Христова подвизаеши, во еже пети Верховному чудес Творцу Святых Святейшему Слову: Аллилуиа.

Икос 12
     Поем велия подвиги твоя, добропобедне воине Христов, отче наш Лаврентие, победоносно победивый видимыя и невидимыя враги, ублажаем блаженную кончину твою, и молитвенно торжествуем святую память твою, тебе усердно воспевая тако:
     Радуйся, яко память твоя с похвалами и успение со святыми;
     Радуйся, со безплотными силами Трисвятую песнь Богу поеши;
     Радуйся, со пророки и апостолы торжествуеши;
     Радуйся, со святители и мученики прославленный;
     Радуйся, со преподобными и праведными безсмертия венцем увенчанный;
     Радуйся, свете, мрак антихриста бесовских полчищ разгоняющий;
     Радуйся, Руси Святыя Богом данный заступниче и покровителю;
     Радуйся, благоверных поборниче и победоносче;
     Радуйся, тобою же Православная вера прославися;
     Радуйся, тобою же вражие нечестие посрамися;
     Радуйся, преподобне Лаврентие, усердный и богоприятный о душах наших молитвенниче.

Кондак 13
     О преподобне и богоносне отче наш Лаврентие, великий чудотворче и скорый помощниче, тя молим и тя просим: милостиво приими от нас похвальное пение наше, тебе усердно приносимое, ты же предстоя Престолу Царя Славы, Господу Богу всея твари Создателю, умоли Его благость за ны грешныя, да простит нам согрешения наша вольная и невольная, сохранит ны от лица богомерзкаго грядущаго антихриста и богопротивных слуг его, враг видимых и невидимых, от смертоносных ран и недугов, от всякия скорби и печали житейския, и вечнаго мучения избавит ны, и сподобитися во Царствии Небеснем со всеми святыми Пресвятей Троице пети: Аллилуиа.
(Сей кондак глаголется трижды, и паки чтутся икос 1 и кондак 1)

Молитва
     О всечестный и треблаженный отче наш Лаврентие, священная главо, велий и предивный чудотворче, Православныя веры ревнителю и учителю, ересей обличителю, Церкве поборниче, от юности твоея путем Креста шествовати возлюбил еси, в молитвах и трудех, пощениих, бдении и безмолвии подвизаяся, верный образ иноком быв: всего себе в жертву живу, святу и благоугодну Ему принес, толиких дарований от Бога сподобився, о Церкви Православней и Святей Руси во благое призирати и помышляти. Егда же по кончине твоей святая Троице-Ильинская обитель врагов безбожных злодействием разорению, осквернению и запустению предана бысть, ты велие дерзновение Царю Небесному имея, паки ходатайством Богоматери и твоим возобновися, еще же и мощи твоя святыя и честныя положиша. Тем же и мы, с верою приходяще священней раце чудотворных и многоцелебных мощей твоих, любезно целуем и молим тя, наш пастырю добрый и ходатаю, не престай моляся ко Господу Богу нашему, да погасит вся ереси и расколы бываемыя от злокозненнаго супостата нашего спасения, правоверныя утверждая во благочестии и чистоте, роса благодати твоея да умертвит пламень страстей наших, да укрепит и препояшет ны силою свыше на антихриста и вся полчища его, на видимыя и невидимыя враги наша, бесы отгоняя, болезней душевных и телесных избавляя и от всех зол сохраняя: паче же да укрепит и возвысит благословенное царство Святыя Руси, благоверно и благочестно его утверждая, истиною и правдою сие устрояя, изобилием благ и славою венчая, миром же и благостоянием ограждая, да мы вси, мирно, тихо и безмятежно пребывающе в любы и единомыслии, прославим Пресвятую Троицу, Единаго Бога, Отца и Сына и Святаго Духа, и твое милостивное о нас ходатайство во веки. Аминь.
 

Акафисты zvonnitsa.ru/orthodoxy/akafisti/290/13338/

Кондак 1
    Избранный угодниче Христов и чудотворче, преподобне отче наш Леониде, святостию жития твоего яко звезда богосветлая возсиявый в стране северней. Похвальная восписуем ти, любовию творяще память твою: ты же яко имеяй дерзновение ко Господу, молитвами твоими от всяких бед свободи зовущих ти:
    Радуйся, преподобне отче наш Леониде, пустынный жителю.

Икос 1
    Ангела образом, земнаго суща естеством зряще тя, отче преподобне, прославляем прославльшаго тя Господа, тебе угоднику Его преславному умильно вопием:
     Радуйся, в мире живый, Небеснаго Отечества взыскавый.
     Радуйся, путь широкий, ведущий в пагубу презревый.
     Радуйся, тернистым путем в Царствие Небесное шествовавый.
     Радуйся, надеждею вечных благ сердце свое увеселивый.
     Радуйся, дом и сродники ради Христа оставивый.
     Радуйся, иноческое житие возлюбивый.
     Радуйся, преподобне отче наш Леониде, пустынный жителю.

Кондак 2
     Видев сердце твое Господь, любовию к Нему пламенеющее, призва тя на путь монашескаго жития: ты же Пошехонский край свой оставив, стопы твоя в Кожеезерскую обитель направил еси, поя Господеви: Аллилуиа.

Икос 2
     Разум чист и свободен от страстей испроси нам угодниче Божий, да суетная в мире сем поправше, вопием ти, предстателю нашему пред Богом сицевая:
     Радуйся, смиренный подвижниче.
     Радуйся, постриг прием миру умертвивыйся.
     Радуйся, плоть свою возненавидевый.
     Радуйся, молитвой и постом ея духу покоривый.
     Радуйся, слез течением Бога умилостивый.
     Радуйся, вся козни вражия победивый.
     Радуйся, преподобне отче наш Леониде, пустынный жителю.

Кондак 3
     Силою Божиею укрепляемь, в обитель Соловецкую путь свой управил еси и тамо волю отсекая, послушанию монашескому вдался еси, во смирении поя Богу: Аллилуиа.

Икос 3
      Имея помысл чист и душу непорочную Божию и Матери Божией послушник привлекийся, в пустынь Моржевскую вселился еси и труды ко трудом прилагая, Божий избранник явился еси. Услыши нас поющих тебе таковая:
     Радуйся, с места на место преходил еси, да добродетели приобрящеши.
     Радуйся, Пречистою Девою направляемь, издалеча место верою облобызал еси.
     Радуйся, с иконою Одигитрия на реку Луза пришел и ту водворился еси.
     Радуйся, малую часовню, последи храм в честь Введения Пресвятыя Богородицы создал еси.
     Радуйся, край сей глухий и блатный освятил еси.
     Радуйся, диких пермцев просвятителю.
     Радуйся, преподобне отче наш Леониде, пустынный жителю.

Кондак 4
         Бурю искушений и бед от человек злобных с кротостию претерпевая, великия труды подъял еси: копаяй землю, ужален змием, безвреден пребыл еси, молитвою твоею укрепляемь, Богу вопиял еси: Аллилуиа.

Икос 4
     Слышавше христоименитии людие, яко пустынныя лесы их ангелоподобным житием твоим облагоухал еси, притекаху к тебе, и не отринул еси их, мудре паствил еси, собрав во имя Господне. Сего ради сицевую похвалу приносим тебе:
     Радуйся, Богородицы заступлению обитель твою вдавый.
     Радуйся, волю Господню сотворивый и ины творити научивый.
     Радуйся, лика иноческаго предстоятелю богомудрый.
     Радуйся, братии твоея отец чадолюбивый.
     Радуйся, всяким злостраданием плоть свою изнуривый.
     Радуйся, умертвивый твоими подвиги телесныя мудрования.
     Радуйся, преподобне отче наш Леониде, пустынный жителю.

Кондак 5
     Боготечною звездою претекл еси в мире, святе, из Устьнедумския обители Северному краю, блаженне отче Леониде, семена слова Божия в сердца людская посевая и Богови поя: Аллилуиа.

Икос 5
     Видев враг спасения человеческаго житие небесное твое на земли, стрелы разжженныя искушений меташе в тя, о Леониде, ты же побеждаше я, Божиею благодатию укрепляемь, услыши от нас сицевая:
     Радуйся, власяницею жесткою тело твое изнуряяй.
     Радуйся, исконнаго врага змия древняго побеждаяяй.
     Радуйся, и змиев вещественных далече от себе отгоняяй.
     Радуйся, всенощными стоянии Бога умилостивый.
     Радуйся, яко фимиам благовонный молитвы твоя пред Господа восхождаху.
     Радуйся, ангели небеснии от Престола Небеснаго к престолу храма твоего снисхождаху.
     Радуйся, преподобне отче наш Леониде, пустынный жителю.

Кондак 6
     Проповедует Прилузский край подвиги и труды твоя, преподобне отче, и светло красуется, стяжав тя помощника и покровителя себе. Особне к твоему бо заступлению в скорбех наших прибегаем и прославльшему тя Господу со умилением зовем: Аллилуия.

Икос 6
     Возсиял еси, преподобне Леониде, святостию жития твоего: пришед Прилузскому краю, воистинну светильник на свещнице поставлен еси, горя и светя. Темже свещением твоим и любовию согретая духовная чада взывают к тебе:
     Радуйся, от сердца твоего вся искушения юности отгнавый.
     Радуйся, Господа ради путь тесный и скорбный избравый.
     Радуйся, алчбою, жаждею, мразом и зноем тело свое изнуривый.
     Радуйся, терпением твоим злобу мира сего победивый.
     Радуйся, огнем молитвы твоея вся стрелы лукаваго попаливый.
     Радуйся, преподобне отче наш Леониде, пустынный жителю.

Кондак 7
     Хотение едино имел еси, преподобне, еже миру умертвитеся и духом пожити, бежал еси суеты и в пустыни водворился еси, поя Богу: Аллилуиа.

Икос 7
     Дивно бысть, угодниче Божий, зрети, како тебе, змием угрызена, Господь сохрани здрава и невредима, и своею благодатию наступати на всю силу вражию сотвори. Сего ради прославляем тя отче:
     Радуйся, невещественне в мире поживый.
     Радуйся, бесплотным ангелом собеседник явивыйся.
     Радуйся, гордость сатанинскую низложивый.
     Радуйся, смирение Христово возлюбивый.
     Радуйся, на высоту безстрастия возшедый.
     Радуйся, на земли сый, небесная созерцавый.
     Радуйся, преподобне отче наш Леониде, пустынный жителю.

Кондак 8
     Странствие земное скончавая, плотию изнемогл еси, духом же созрел в райская селения преселитися и тленная на нетленная пременив, поеши радостно Богу: Аллилуиа.

Икос 8
      Вся братия твоя со слезами и песнми надгробными провождаху тя: и изнесоша мощи твоя и положиша во храме, егоже создал еси, идеже и по ныне под спудом пребывают посещаемыя верными, приносящими ти сицевая хваления:
     Радуйся, во благоухании святыни сном смерти опочивый.
     Радуйся, в ризу нетления облеченный.
     Радуйся, ликовствуяй в чертозе Домовладыки.
     Радуйся, гражданине Иерусалима Горняго.
     Радуйся, святче Божий, всеми святыми прославляемый.
     Радуйся, от горних высот к нам милостивно приницаяй.
     Радуйся, преподобне отче наш Леониде, пустынный жителю.

Кондак 9
      Ангели небеснии радостно прияша душу твою, преподобне, во обители райския, идеже Господь Славы Христос венча тя и земным нам заступника дарова, поющым Ему: Аллилуиа.

Икос 9
      Витии многовещаннии не возмогут по достоянию изобразити славу уготованную святым Его, еяже причастился еси отче Леониде. Сподоби и нас достигнути молитвами твоими оныя небесныя славы, вопиющым ти:
     Радуйся, зерцалом разрещшимся непосредственне зриши Святую Троицу.
     Радуйся, яко молишися Ей о совершающих память твою.
     Радуйся, внемляй молитвам чад твоих.
     Радуйся, яко посещаеши их в скорбных обстояниих.
     Радуйся, яко дерзновенно предстоиши о нас пред лицем Божиим.
     Радуйся, яко преклоняеши к нам грешным милосердие Его.
     Радуйся, преподобне отче наш Леониде, пустынный жителю.

Кондак 10
      Спастися хотящым нам буди помощник, избавляяй нас заступлением твоим от грехов наших и всяких бед, низводяй на притекающих к тебе Божие благословение, поющих Богу: Аллилуиа.

Икос 10
      Стена верующым являешися крепка от лица вражия, защищая их от стрел демонских и болезни исцеляя. Темже сподобльшиися заступления твоего с любовию зовут ти:
     Радуйся, отче наш кроткий и милостивый.
     Радуйся, любовию к Богу и ближним пламенеяй.
     Радуйся, уединения поискавый и его в пустыни обретый.
     Радуйся, яко тамо многолетне подвизался еси в трудех мнозех и слезах.
     Радуйся, упокоение небесное унаследовавый.
     Радуйся, яко со ангелы песнь Богу немолчно вопиеши.
     Радуйся, преподобне отче наш Леониде, пустынный жителю.

Кондак 11
      Пение всеумиленное приносим ти, преподобне отче Леониде, на месте трудов и упокоения твоего, от тебе чающе милости получити, ты же посети нас и данною ти от Бога благодатию исцели вопиющих: Аллилуиа.

Икос 11
      Светоподательна светильника пред Престолом Божиим предстояща и мрак страстей наших лучами молитв твоих разгоняюща, видим тя, преподобне отче Леониде: озари убо и наша сердца, всеблаженне, да достойно вопием ти сице:
     Радуйся, лучу пресветлый, от Солнца Христа возсиявый.
     Радуйся, и по преставлении твоем с нами пребываеши.
     Радуйся, храм Пресвятыя Богородицы Ея Введения построивый.
     Радуйся, зело его возлюбивый.
     Радуйся, освятивый его иноческим песнопением.
     Радуйся, храм сей, мощи твоя и Недуму реку залог любве своея нам оставивый.
     Радуйся, преподобне отче наш Леониде, пустынный жителю.

Кондак 12
      Благодати тезоименитый и тою обогативыйся, победил еси враги и всякую злобу и в небесныя дворы преселивыйся, испроси нам от Христа Бога велию милость, да благодарно поем Ему: Аллилуиа.

Икос 12
      Поюще подвиги предивнаго жития твоего, колена преклоняюще пред честными мощами, под спудом почивающими, со слезами умиления вопием ти:
     Радуйся, почивый от всех трудов твоих.
     Радуйся, аще земля и покрывает честныя мощи твоя, дух же пребывает на небеси у Христа твоего.
     Радуйся, со всеми преподобными ожидаеши втораго пришествия и конечнаго прославления.
     Радуйся, моляйся о всех, почитающих память твою.
     Радуйся, просяй вечнаго спасения ревнующих святому житию твоему.
     Радуйся, любовию своею утешаяй прибегающих к молитвенному заступлению твоему.
     Радуйся, преподобне отче наш Леониде, пустынный жителю.

Кондак 13
      О преславный угодниче Божий, преподобне отче Леониде, почитающе святую память твою, восписуем ти похвальная: ты же яко предстояй Престолу Царя Славы, от всякия напасти и скорби и вечнаго мучения избави ны, да возможем вечно с тобою воспевати Богу: Аллилуиа.
Этот кондак читается трижды, затем икос 1-й и кондак 1-й

Молитва преподобному Леониду, Устьнедумскому чудотворцу
      О священная главо, преподобне отче Леониде! Земный ангеле и небесный человече, светильниче пресветлый, край наш Прилузский озаряяй! Тебе угодниче Божий, неистощимое от Всеблагаго Владыки благодати и даров дадеся сокровище: с верою к тебе приходящих утешати, телесныя и душевныя недуги отгоняти. К тебе убо прибегаем, припадающе молимся: не презри нас молящихся и твоея просящих помощи, испроси нам у Христа, да сотворит с нами знамение во благо и прообразит наше мрачное житие, сердце наше прокаженное очистит, и обитель сотворит для Своего вселения, яко без Него не можем творити ничесоже. Да всякое наше во благо желание исполнит. Да тако угождающе Богу победим борющаго нас диавола и да внидем в селения райская, идеже вси святии пребывают и прославляют Отца, и Сына, и Святаго Духа во веки. Аминь.

Тропарь преподобному Леониду Устьнедумскому
Тропарь, глас 1:
     Божественною любовию и житием духовным от юности распалився, преподобне, и вся, яже в мире красная, возненавидев, Христа единаго от души возлюбил еси, отче, легкое иго на рамо взем, Божественным Промыслом и Пречистыя Богородицы чудным явлением направляемь, достиже пустыни и в ней многолетне подвизался еси в трудех многих и слезах, всяким злостраданием плоть свою изнуряя. Отонудуже Бог, твоя труды видев, умножи тебе чада в пустыни, но яко имея дерзновение к Богу, моли о нас, рабех твоих, отче преподобне Леониде, да избавит нас от всех навет вражиих и спасет души наша.

Кондак, глас 8:
     Все свое умное желание к Богу вперив и Тому невозвратно от души последовав, в пустыню вселился и в ней многия труды в Бозе показал еси. В непроходнех местех источники водныя ископал еси и умертвил еси подвиги твоими телесная мудрования, многим путь был еси ко спасению. Темже молим тя: спаси нас и яже собра, мудре, да зовем ти: радуйся, Леониде преподобне, пустынный жителю.

Величание
     Ублажаем тя, преподобне отче Леониде, и чтим святую память твою, наставниче монахов и собеседниче ангелов.

Акафисты zvonnitsa.ru/orthodoxy/akafisti/290/13340/

Кондак 1
     Избранный чудотворче и изрядный угодниче Христов, Ростова просветителю, и усердный о душах наших молитвенниче, святителю отче Леонтие! Восхваляем тя с любовию, заступника нашего: ты же, яко имеяй дерзновение ко Господу, молися выну о спасении нас грешных и от всяких бед избавляй зовущих ти:
     Радуйся, Леонтие, Ростовский чудотворче.

Икос 1
     Ангелонравное житие возлюбив, отче Леонтие, в обитель Киево-Печерскую пришел еси, и от преподобных отец Антониа и Феодосиа во иночество прияв пострижение, свято и богоугодно пожил еси, подвизаяся в посте, бдении и молитвах непрестанных. Темже слышиши от нас благохваления таковая:
     Радуйся, земный ангеле, во плоти небесно поживый.
     Радуйся, небесный человече, о горних выну помышлявый.
     Радуйся, во мраце пещернем свет боговидения снискавый.
     Радуйся, подвиги великими плоть твою обуздавый.
     Радуйся, смирением высокая стяжавый.
     Радуйся, терпением вся искушения диавольския победивый.
     Радуйся, постом душу твою просветивый.
     Радуйся, молитвами непрестанными сердце твое освятивый.
     Радуйся, сосуде избранный Божия благодати.
     Радуйся, селение непорочное Духа Святаго.
     Радуйся, светильниче, сияяй дары божественными.
     Радуйся, луче пресветлаго Солнца Правды Христа.
     Радуйся, Леонтие, Ростовский чудотворче.

Кондак 2
     Видев Господь душу твою, святителю Леонтие, добродетельми благоукрашенну, благоволи поставити тя во епископа граду Ростову, идолослужением языческим потемненному: да право правиши в нем слово истины, и приводиши ко Христу заблуждшыя человеки, неведущыя пети Триипостасному Богу: Аллилуиа.

Икос 2
     Разум небесный тебе даровася, святче Божий, от Христа Бога, Иже посла тя в страну Ростовскую проповедати людям Евангелие Христово, и приводити к познанию веры истинныя идолослужением одержимыя человеки. Мы же тя, равноапостольнаго проповедника ведуще, приветствуем радостно сими достодолжными хвалении:
     Радуйся, первопрестольниче святыя Ростовския Церкве.
     Радуйся, Православия столпе непоколебимый.
     Радуйся, красныя нозе твои направивый к борению со враги спасения человеческаго.
     Радуйся, апостольски подвизавыйся во граде Ростове.
     Радуйся, терпеливо преносивый гонение велие от идолослужителей.
     Радуйся, любовию отческою злобу их побеждавый.
     Радуйся, мужеством души твоея вся злохитрости их посрамивый.
     Радуйся, благовременно и безвременно паству твою благочестию поучавый.
     Радуйся, старцев идолослужительных богомудрый обличителю.
     Радуйся, младенцев благий научителю.
     Радуйся, неутомимо подвизавыйся о спасении душ человеческих.
     Радуйся, просветивый Ростов светом познания Христова.
     Радуйся, Леонтие, Ростовский чудотворче.

Кондак 3
     Силою Христовою преисполненный, святителю Леонтие, не убоялся еси противустати сонмищу идолослужителей, со оружием и дрекольми на тя пришедшему, к нимже, в святительския ризы облеченный, из храма Божия кротко изшел еси, и с любовию их увещавал еси, обратитися ко Христу Богу, и вкупе с тобою пети Ему: Аллилуиа.

Икос 3
     Имел еси лице, яко ангельское, светом небесным сияющее, святителю Леонтие, егоже не терпяще зрети идолослужители, ови ослепоша, ови ови же разслаблени на земли падоша, и зело устрашеннии не дерзнуша озлобити тя, проповедника божественныя истины, воистинну достойнаго похвал таковых:
     Радуйся, светозарный Божия благодати таинниче.
     Радуйся, ангелоподобный человече.
     Радуйся, безоружный вооруженных победивый.
     Радуйся, небоязненно слово Божие проповедавый.
     Радуйся, яко лице адамантово свыше тебе даровася.
     Радуйся, яко тобою лица идолослужителей посрамишася.
     Радуйся, яко ангел Божий, светом лица твоего идолослужителей устрашивый.
     Радуйся, яко со злобою на тя устремившихся кротостию твоею смиривый.
     Радуйся, ослепших и разслабленных молитвою твоею изцеливый.
     Радуйся, благостию злобу победивый.
     Радуйся, апостоле земли Ростовския.
     Радуйся, пастырю добрый стада Христова.
     Радуйся, Леонтие, Ростовский чудотворче.

Кондак 4
     Буря гонения языческаго паки возшуме на тя, святителю Леонтие, и изгна тя из града Ростова на предградие его, идеже ты поселился еси, и храм Божий во имя Архистратига Сил Небесных тамо создав, при нем подвизался еси в трудех апостольских, зовый единому могущему спасти заблуждшыя человеки Христу, Царю и Богу: Аллилуиа.

Икос 4
     Слышавше благия твоя глаголы, святителю Христов, малыя дети прихождаху к тебе, на предградии Ростова живущему, ихже ты пшеницею с медом питая, насаждал еси в них учение Христово, да от уст младенцев совершиши хвалу Богу, внушающему нам звати тебе:
     Радуйся, озаривый светом Христовым люди во тме и сени смертней седящыя.
     Радуйся, призвавый ко Христу овцы заблуждшыя.
     Радуйся, гонение и изгнание Христа ради многажды претерпевый.
     Радуйся, терпением твоим гонителей твоих препобедивый.
     Радуйся, христоподражательно младенцы возлюбивый.
     Радуйся, сердца из невинныя Христовым познанием украсивый.
     Радуйся, сладким брашном их питая, душы их в любовь Пресладкаго Иисуса пленивый.
     Радуйся, мудро их в мрежу Евангелиа Христова уловивый.
     Радуйся, чрез чада родителей ко спасению призвавый.
     Радуйся, многих ко Христу обративый.
     Радуйся, делателю добрый винограда небеснаго.
     Радуйся, сладкия плоды делания твоего Христу принесый.
     Радуйся, Леонтие, Ростовский чудотворче.

Кондак 5
     Боготечное светило быв, святителю отче Леонтие, мрак идолослужения во граде Ростове просветил еси, сиянием немерцающим Солнца Правды Христа, и мрежею проповеди евангелькия уловил еси во спасение многия человеки, научив их православно веровати во единаго Бога, в Троице Святей славимаго и покланяемаго, и благоприятно пети Ему: Аллилуиа.

Икос 5
     Видевше тя людие Ростовстии, святителю Леонтие, терпеливо поучающаго их Евангелию Христову, и ни во что же вменяющаго гонение, изгнание и скорби, начаша приходити к тебе и послушати твоих поучений душеспасительных: ты же, святе, хвалу о сем Богу воздав, от предградия во град Ростов возвратился еси, и при соборнем его храме водворився, неленостно учил еси люди твоя благочестию христианскому. О сем тя хвалим и зовем:
     Радуйся, терние неверия языческаго в Ростове посекавый.
     Радуйся, лозу познания Христова тамо насадивый.
     Радуйся, день и нощь трудивыйся на ниве Господней.
     Радуйся, приведый Господеви люди пакибытием обновленныя.
     Радуйся, во имя Отца, и Сына, и Святаго Духа крестивый язычники ожесточенныя.
     Радуйся, троическою благодатию укротивый идолослужители озлобленныя.
     Радуйся, первопастырю Ростовския Церкве.
     Радуйся, звездо немерцающая, светом Христовым всех просвещающая.
     Радуйся, молитвенниче усердный о пастве твоей земней.
     Радуйся, Бога зело прославивый подвиги твоими равноапостольными.
     Радуйся, от Бога прославленный многими чудесы.
     Радуйся, сими утвердивый истину твоея проповеди божественныя.
     Радуйся, Леонтие Ростовский чудотворче.

Кондак 6
     Проповедником евангельския истины, апостолом Христовым, верно подражал еси, святителю отче наш Леонтие, и подобно им трудился еси во благовестии Христове, люди Ростовския поучая православно веровати во Святую Троицу и Божественную Единицу, Творца и Создателя всяческих, Емуже присно пел еси ангельскую песнь: Аллилуиа.

Икос 6
     Возсиял еси во граде Ростове светом добрых дел твоих, святителю приснопамятне, о нихже прославляху люди Отца Небеснаго Бога, укрепившаго тя на подвиги апостольския, и даровавшаго ти силу и власть на духи нечистыя, от ихже влияния пагубнаго свобождал еси человеки, тебе зовущыя и глаголющыя:
     Радуйся, Христу уневестивый многия душы человеческия.
     Радуйся, от Христа обогащенный многими благодатными дары.
     Радуйся, крине благоуханный небеснаго прозябения.
     Радуйся, маслино благоплодная сада Иисусова.
     Радуйся, града Ростова славо и похвало.
     Радуйся, веры Христовой в нем крепкое утверждение.
     Радуйся, благочестия учителю.
     Радуйся, православия наставниче.
     Радуйся, недугов душевных и телесных целителю.
     Радуйся, нищих и убогих питателю.
     Радуйся, священников рукополагателю.
     Радуйся, иноков покровителю.
     Радуйся, Леонтие, Ростовский чудотворче.

Кондак 7
     Хотение едино имел еси, святче Божий, еже Богу угождати и спасению людей твоих служити: темже не дал еси сна очима твоима, ни веждома дремания, но присно подвизался еси во благо святыя Ростовския Церкве, стяжавшия тя, столпа Православия непоколебимаго, и стража дому Божию вернаго, примером твоим и нас поучающаго неленостно возносити песнь хвалы Христу Богу: Аллилуиа.

Икос 7
     Новаго тя Николаа Мирликийскаго, стяжа град Ростов, святителю отче Леонтие, чудесы твоими зело имя Христово в нем прославльшаго, и ко Христову познанию люди заблуждшыя приведшаго, твоим учением божественным, емуже внимающе, люди Ростовстии научишася пети тебе:
     Радуйся, благий рабе и верный, данный тебе от Господа талант не сокрывый.
     Радуйся, многу куплю духовную им приобретый.
     Радуйся, сотворивый и научивый, и велий нареченный в Царствии Небеснем.
     Радуйся, величием чудес на земли прославленный.
     Радуйся, знамения дивная рукама твоима совершивый.
     Радуйся, туне приявый, туне подававый.
     Радуйся, исполнение обетований евангельских получивый.
     Радуйся, милосердия Спасова подражателю.
     Радуйся, щедродательный милостыни подателю.
     Радуйся, любвеобильный скорбящих утешителю.
     Радуйся, органе Духа Святаго.
     Радуйся, миро Христова благоухания на земли.
     Радуйся, Леонтие, Ростовский чудотворче.

Кондак 8
     Странствие земное мученическою кончиною совершил еси, святителю Леонтие, Христа ради от идолослужителей ожесточенных даже до крове пострадав, первый священномученик Российския Земли явлься, град Ростов освятил еси излиянием крове твоея, и Христу приусвоил еси, да просвещеннии тобою люди, чествующе подвиг твой апостольский, зовут Богу: Аллилуиа.

Икос 8
     Весь в жертву Богу принеслся еси, святителю достоблаженный, и со дерзновением многим Христу предстал еси во славе Царствия Небеснаго, идеже не забуди и нас, земных, усердно с любовию тя почитающих, но присно молися о спасении нашем, да тебе зовем хвалебно:
     Радуйся, первый священномучениче земли Российския.
     Радуйся, крове обагрением украсивый ризу твою святительскую.
     Радуйся, со страстотерпцы вшедый в радость Господа твоего.
     Радуйся, Агнцу Божию подвигом земным подражавый.
     Радуйся, за овцы твоя словесныя душу твою положивый.
     Радуйся, имя Христово кончиною твоею прославивый.
     Радуйся, смерть мученическую приявый, но тления не познавый.
     Радуйся, чудесы многими святость твою ознаменовавый.
     Радуйся, во гроб сошедый и от него зарею безсмертия возсиявый.
     Радуйся, во одежду благодатнаго нетления облеченный.
     Радуйся, воскресения Христова силу в мертвенном телеси твоем проявивый.
     Радуйся, во благоухании святыни опочивый.
     Радуйся, Леонтие, Ростовский чудотворче.

Кондак 9
     Всем телом цел и нерушимь, с лицем сияющим, лежащ во гробе яко жив, по летех мнозех в земли обретен был еси, святителю Леонтие, и чудес множество от нетленных и многоцелебных мощей твоих источил еси, ими святость твою знаменуя, и подвизая верныя благодарственно взывати Дивному во святых своих Богу: Аллилуиа.

Икос 9
     Ветийство человеческое не довлеет к прославлению многих и преславных чудотворений твоих, святителю Леонтие, имиже Церковь Ростовская благоукрасися, и сего ради гласы хвалебными усердно тя славим, яко своего первосвятителя, просветителя и предстателя ко Господу, зовуще к тебе благодарственно и хвалебно:
     Радуйся, алавастре целебный мира Христова преисполненный.
     Радуйся, реко чудес многоводная.
     Радуйся, источниче кипяй исцеленьми.
     Радуйся, кладезю, от негоже болящии здравие почерпают.
     Радуйся, нетления цвете благоуханный и прекрасный.
     Радуйся, безсмертия заре присносияющая.
     Радуйся, бисере драгий Божия благодати, в недрех земных обретенный.
     Радуйся, со славою и честию во храме Божием положенный.
     Радуйся, яко к тебе слепии приходяще, зрящии возвращахуся.
     Радуйся, яко к тебе хромии и ничащии ползуще, прямоходяще отхождаху.
     Радуйся, разслабленных благодатный укрепителю.
     Радуйся, бесноватых от насилия диавольскаго свободителю.
     Радуйся, Леонтие, Ростовский чудотворче.

Кондак 10
     Спасения душевнаго ходатай являешися верным, святителю Леонтие, и присно молишися Богу о пастве твоей земной, усердно тя почитающей. Сие уверяя в чудном видении явился еси в нощи, в соборнем храме Ростова, с подъятыми горе дланьми у престола Божия усердно моляйся и светом небесным сияяй, еже видев муж, таковаго видения достойный, возопи ко Господу: Аллилуиа.

Икос 10
     Царя Небеснаго Христа верный рабе и угодник был еси, святителю Леонтие, и от Него нетлением и чудесы прославленный, от великаго князя Андреа Боголюбскаго почесть посмертную восприял еси в мощах твоих святых, имже покланяющеся с верою и любовию, песненно тебе вопием:
     Радуйся, Православия утверждение.
     Радуйся, архиереев красото.
     Радуйся, в сониих и видениих верныя посещаяй.
     Радуйся, явлением твоим больным нездравие во здравие претворяяй.
     Радуйся, скорый помощниче молитвенно тя призывающих.
     Радуйся, усердный заступниче тя почитающих.
     Радуйся, правоверных благонадежное прибежище.
     Радуйся, по Бозе и Богородице крепкое наше упование.
     Радуйся, врачу безмездный, единыя веры токмо требуяй.
     Радуйся, ближним и дальним щедроты целебныя подаваяй.
     Радуйся, Ростова хранителю неотступный.
     Радуйся, всея России предстателю, Богом данный.
     Радуйся, Леонтие, Ростовский чудотворче.

Кондак 11
     Пение молебное от лет древних и доныне не умолче у гроба твоего, святителю отче наш Леонтие, и свеща неугасимо пребывает тамо, еяже погашение единым от клирик соборныя церкве ты грозно покарал еси, разслаблением телесным виновнаго наказав, дондеже не вразумися, и с покаянием не обратися к тебе целебнику благодатному, зовый тя прославляющему Богу: Аллилуиа.

Икос 11
     Светлостию чудес сияяй, святителю преподобне, благодатно озаряеши душы наша, страстьми греховными потемненныя, и вся ны приводиши на стезю покаяния и спасения. Сего ради ублажаем тя, наставника душеспасительнаго и по смерти, от гроба твоего чудесно нас поучающаго, и во умилении глубоцем воспеваем в похвалу тебе:
     Радуйся, друже Христов, до конца верен Ему пребывый.
     Радуйся, угодниче Божий, на небеси и земли прославленный.
     Радуйся, в сонме святителей сияющая звездо.
     Радуйся, со святители московскими в видении, во дни обложения татарами Москвы, таинственно представый.
     Радуйся, Пресвятей Владычице Богородице, в другом видении, спутник бывый.
     Радуйся, Ея волю святую в жизни и по смерти усердно творяй.
     Радуйся, свеще, в молитвах к Богу возжженная.
     Радуйся, вождю, путь ко спасению всем показующий.
     Радуйся, паству твою молитвенно назираяй.
     Радуйся, с верою к тебе прибегающих прошения исполняяй.
     Радуйся, Церкве Православныя благодатная лепото.
     Радуйся, любящих и чтущих тя присное радование.
     Радуйся, Леонтие, Ростовский чудотворче.

Кондак 12
     Благодати Божией сокровище, святая и всечестная рака твоя, святителю отче наш Леонтие, новая купель Силоамская для недужных явися: к ней бо не единожды токмо в лето, но на всякое время, с верою приходящии, исцеление болезнем своим приемлют, и тя прославляют, милостиваго и безмезднаго целителя, зоуще благих подателю Богу: Аллилуиа.

Икос 12
     Поюще подвиги твоя равноапостольныя, и многая преславная чудотворения твоя, чудотворче святый Леонтие, молим тя, милостиваго предстателя нашего: молися с нами и о нас ко Христу Богу, да пробавит к нам милость свою, и явит нам великия своя щедроты, да возможем благоприятно приносити тебе от усердия нашего сия песненныя похвалы:
     Радуйся, Пресвятыя Троицы верный исповедниче.
     Радуйся, Пресвятыя Богородицы достойный избранниче.
     Радуйся, ангельских воинств собеседниче.
     Радуйся, всех святых сожителю.
     Радуйся, в райских обителех пребываяй.
     Радуйся, от горних высот к земнородным милостивно приникаяй.
     Радуйся, любовь к пастве твоей неизменно сохранивый.
     Радуйся, чудес множеством и по смерти чада твоя озаривый.
     Радуйся, в вышних живый и о нижних промышляяй.
     Радуйся, град Ростов от всякаго зла соблюдаяй.
     Радуйся, телес наших немздоприимный целебниче.
     Радуйся, о душах наших благоприятный к Богу молитвенниче.
     Радуйся, Леонтие, Ростовский чудотворче.

Кондак 13
     О пресвятый и предивный чудотворче, святителю отче Леонтие, Ростова первопастырю и всех верных предстателю! Приими милостиво сие малое моление наше в похвалу тебе приносимое, и благоприятными молитвами твоими ко Господу Богу, сотвори нас наследники быти всесветлаго Царствия Христова: да предстательством твоим мучений вечных избавльшеся, сподобимся в радости святых, вкупе с тобою пети вечно Богу: Аллилуиа.
Этот кондак читается трижды, затем икос 1-й, и кондак 1-й

Молитва святителю Леонтию, епископу Ростовскому, чудотворцу
     О священная главо, преславный чудотворче, первопастырю святыя Ростовския Церкве, святителю отче наш Леонтие! К тебе припадаем и молимся мы смиреннии и грешнии, и яко отца чадолюбиваго просим: всели в сердца наша любовь твою, еюже к Богу и ближним твоим, при жизни твоей преисполнен был еси, яко и душу твою за паству твою положил еси, мученически пострадав от идолослужителей. Научи нас, отче, тебе подражати верно, Бога и ближних наших любити искренно, и заповеди Господни совершати непогрешительно: да будем и мы чада твоя, не по имени токмо, но самым делом и всем житием нашим. Молися, угодниче Божий, ко Христу Богу о святей православней Церкви и Державе Российстей: да пребудут в мире и благостоянии, и процветают в благочестии христианстем непоколебимы. Владыку всех умоли: страждущую страну Российскую от лютых безбожник и власти их да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезненных вопль да услышит и да изведет от погибели живот наш. Соблюди град твой Ростов, и вся грады и веси страны Российския невредимы от всякаго зла. Призри благоутробно на всяку душу христианскую, милости и помощи от тебе ищущую: буди всем нам в болезнех целитель, в скорбех утешитель, в печалех избавитель, в бедах помощник, в час смертный покровитель; да при помощи молитв твоих святых, сподобимся и мы грешнии спасение вечное получити и Царствие Небесное унаследовати. Ей, святителю Христов! Не посрами упования нашего, еже по Бозе и Пресвятей Богородице на тя крепко возлагаем, но яви нам твое многомощное заступление: да хвалим, славим и величаем великое человеколюбие дивнаго во святых своих Бога, Отца, и Сына, и Святаго Духа, во веки веков. Аминь.

Тропарь Леонтию, епископу Ростовскому, чудотворцу
Тропарь, Глас 4:
      Апостолом сопричастник и к Богу молебник верен, добродетельми возшед на небесная, и любовь возложил еси к Любящему тя, и неверныя люди обратил еси в веру. Тем ныне со Ангелы ликуя, предстоиши Престолу Славы всех Царя Христа Бога. Молися, святителю Леонтие, да спасет души наша.

Кондак, Глас 4:
      Жития ради чистоты, Всевидец Господь, свет Свой насади в души твоей, вразумити люди многия твоими учении, Леонтие преподобне.

Величание
     Величаем тя, святителю отче Леонтие, и чтим святую память твою, ты бо молиши за нас Христа Бога нашего.
 

Акафисты zvonnitsa.ru/orthodoxy/akafisti/291/13342/

Кондак 1
     Премудрым промыслом Божиим избранный, да благовествуеши светлость Христова Евангелия всему миру, Луко всеблаженне, велие дерзновение имаши пред лицем Господа, Чей земный живот и учение списал еси. Испроси и нам, немощным и слабым, прощение согрешений и утверди в нас надежду Царствия Небеснаго, да возможем ти всерадостно взывати:
     Радуйся, святый Луко, Евангелисте Христов и Апостоле.

Икос 1
     Всемилостивый Господь в грехе потопленному роду человеческому посла Сына Своего, да Он Своим животом, смертию и славным Воскресением изведет сей род из тьмы и направит к святости. Чрез тебя же, Евангелисте святый, начертаны тайны неба и земли, дабы вси человецы до конца века путь к той святости вели и, благодарни суще, взывали ти:
     Радуйся, Духом Святым просвещенный на списание Евангелия;
     Pадуйся, Феофилу достопочтенному и всем нам бисер драгий Евангелия Христова обретший.
     Радуйся, яко Богом избран был еси, да объявиши тайну спасения;
     Pадуйся, благовестителю Благия Вести.
     Радуйся, яко Христа пришедша грешныя спасти проповедавший;
     Pадуйся, яко един еси от четырех Евангелистов.
     Радуйся, яко Дух Святый и чрез тебе Четвероевангелие в мир излиял еси;
     Pадуйся, в тайны Божии духом воснесыйся.
     Радуйся, яко словеса твоя просветиша вселенную;
     Pадуйся, яко мрежею твоего Евангелия многи словесны души уловивый.
     Радуйся, изъяснителю Новаго Завета;
     Pадуйся, звездо, в Церкви Небесной сияющая.
     Радуйся, святый Луко, Евангелисте Христов и Апостоле.

Кондак 2
     В младости твоей возжелавше мирския мудрости, Луко премудрый, ей научился еси, пришедше же в Иерусалим из Антиохии, егда Господь Иисус Христос Свое Божественное слово на земли сеял еси, сердцем доброе семя восприял еси, исполнившись же небесной радости, воспел еси велегласно Богочеловеку Христу: Аллилуиа.

Икос 2
     Зерно божественной любве прозябе у тебе стократный плод, яко ты, слушая Его учение и чудеса видя, исполнился божественной мудрости и ведения, коликих эллинская и египетская училища дати ти тщетны бысть. Оттуду избра тя Господь и прочих седмьдесят Апостол и посла, да проповедите Благую Весть спасения рода человеческаго. Мы же чрез твое Святое Евангелие и доныне пия ту Божью премудрость, воспеваем ти тако:
     Радуйся, Христовой благодатию в сердце уязвленный;
     Pадуйся, яко божественная премудрость бе ти вместо мирской мудрости, ейже обучен бысть.
     Радуйся, яко вся оставивши, за Христом Господом последовал еси;
     Pадуйся, вестниче Господень.
     Радуйся, зиждителю веры Христовой;
     Pадуйся, самовидче, Его же чаяли языцы.
     Радуйся, родословие Христово до Адама возведший;
     Pадуйся, Владычицы икону первый написавший.
     Радуйся, Иисуса Сыном Божиим и Человеческим возвестивший;
     Pадуйся, неутомимый ратниче за истину Христову.
     Радуйся, искусный ловителю душ людских;
     Pадуйся, сеятелю добраго семени, стократный плод приносящего.
     Радуйся, святый Луко, Евангелисте Христов и Апостоле.

Кондак 3
     Вооруженный от Господа силою и властию, святый Луко, да проповедеши Евангелие и твориши чудеса, со прочими Апостолами гряде пред лицем Господа Христа, уготовляя Ему путь и проповедуя людем яко в мир пришел еси от века обетованный Мессия, Коему вси яко Богу от ныне и до века да взывают: Аллилуиа.

Икос 3
     В последния дни земнаго живота Господа Иисуса Христа, егда неправедныя судий Праведнаго Судию осудиша и на Кресте Господа распяша, ты, святый Луко, в Иерусалиме пребыл еси, со слезами взирая, како неповинная кровь Учителя твоего изливашеся на грешную землю. Плачуще едино с тобою, с печалию мы речем ти:
     Радуйся, яко страдания Христа Спасителя списал еси;
     Pадуйся, верный слуго Всецаря Христа.
     Радуйся, яко славу Божию возвестил еси;
     Pадуйся, луче небесная во тьме мира сего.
     Радуйся, противу врага, в Иуду вшедша, нас вооруживый;
     Pадуйся, Петром усеченным и Христом исцеленным рабом милосердию нас научающий.
     Радуйся, кладезе, из негоже водою живою напояемся;
     Pадуйся, яко радостно и без страха словеса Божии в люди приносивший.
     Радуйся, сердца обрезание прияти паче плотскаго обрезания возжелавший;
     Pадуйся, доброе гроздие винограда Господня.
     Радуйся, яко лицем к лицу Бога чрез Христа узрел еси;
     Pадуйся, яко Господа и ныне в Царстве Небеснем видиши.
     Радуйся, святый Луко, Евангелисте Христов и Апостоле.

Кондак 4
     Печаль твоя претворися в радость, богоубийц же радость обратися в печаль, яко да не мощна бысть смерть противу Источника Живота и камень гробный не можаше удержати Каменя краеугольнаго. Господь твой воскресе из мертвых и мирови дарова живот вечный. Ты же с братиею в радости всесильней до небес восклицаше: Аллилуиа.

Икос 4
     Егда с Клеопою в неделю Воскресения идоша в ближний Еммаус, явися вам Господь и идоша с вами. И бысть вам сердце горяще и душа трепетна, доколе Он вас поучал о Себе от пророк и писания, вы же Господа не познаша, дондеже на трапезе вечери преломи Он хлеб и благослови, и отверзлись вам очи и уразумеша, яко то бысть воскресый Господь. Познавая о том из твоего Евангелия, и ныне души наши притрепетны бысть, сего же ради радостно воспеваем ти:
     Радуйся, Воскресение Христово видевший;
     Pадуйся, от несмысленности к богомудренности Христом приведенный.
     Радуйся, яко Христос отверз ти разум, да уразумееши Писание;
     Pадуйся, яко бе ти сердце горяще, егда Господа слушал еси на пути во Еммаус.
     Радуйся, яко ти Христос Своима рукама хлеб преломленни преподал еси;
     Pадуйся, яко Христос словеса ваша о явлении Его на пути в Еммаус, паки явившись учеником, запечатлел еси.
     Радуйся, яко испив чашу премудрости, многих познанием Христа Спаса напоил еси;
     Pадуйся, яко всем Евангелие воскресшаго Христа проповедал еси.
     Радуйся, яко нам источник спасения отверзл еси;
     Pадуйся, яко Путеводительницу к жизни во образе нам преподал еси.
     Радуйся, светлосте разумнаго Солнца;
     Pадуйся, яко нас научиша веровати в Святую Троицу.
     Радуйся, святый Луко, Евангелисте Христов и Апостоле.

Кондак 5
     Егда воскресый Господь спасения нашего ради основа Церковь Свою и по обетованию низпосла в день пятидесятый по Воскресении Духа Святаго на Апостолы, да их запечатлеет свидетели непоколебимы веры христианския, и ты, святый Луко, пребываше в Иерусалиме. Купно с иными Апостолы верно свидетельствова Богочеловека Христа и воспевал Ему яко истинному Богу: Аллилуиа.

Икос 5
     В отечество послежде твое Антиохию направился еси, еже бе страна многими христианы населенная, но в Севастии умедлил еси, проповедующе Евангелие спасения, тамо же нетленныя мощи святаго Иоанна Предтечи почиваша. Узрев тии, возжелал еси с собою их понести, христиане же Севастийские не восхотевше лишитися сицевой святыни и тако вручиша ти десницу Иоаннову, под ню же Сам Господь приклони Божественную главу в крещении, ту же ты радостно понесл еси, мы же, дивящеся твоей любви к святым, восклицаем ти таковая:
     Радуйся, свидетелю снисхождения Духа Святаго;
     Pадуйся, яко нам како Церковь создана была есть описал еси.
     Радуйся, яко себе росою небесною явил еси и свет просветил еси;
     Pадуйся, яко Духом Святым Новый Завет начертася на сердце твоем.
     Радуйся, яко Духом Святым миру изъясни божественную истину;
     Pадуйся, Господа всех мирови благовестителю.
     Радуйся, от Бога избранный таинниче;
     Pадуйся, яко сердце свое очистил еси светлостию Духа Святаго.
     Радуйся, яко предстательство Предтечи обрел еси;
     Pадуйся, благочестиваго употребления вещей освященных начинателю.
     Радуйся, Закхея, сребролюбием уязвленнаго, очистившагося показавый;
     Pадуйся, яко многи тя заступником пред Богом имеют.
     Радуйся, святый Луко, Евангелисте Христов и Апостоле.

Кондак 6
     С десницею же Иоанновою, святый Луко, сребролюбец, бесценное сокровище стяжав, достиг своего отечества к радости велией христиан Антиохийских, коих в словесах божественных и радости Христоваго Евангелия паче утвердил еси, глаголаше же им Сына Божия чудесы, еже своима очима видел еси, и учение Спасителя мира, еже своима ушима слышал еси. Внимающе глоголам твоим премудрым, воспевали они радостно Богу: Аллилуиа.

Икос 6
     Пребывал же ты в Антиохии доколе Апостол Павел не призва тя, да будеши ему сотрудник и сопутник на пути Божием и вы в Еллинску страну на проповедь Евангелия не отправишася. Павел же святый остави тя в граде македоском Филиппы, да утвердиши и умножиши Церковь. Тамо же пребыл еси, проповедующе и насаждающе христианство. Дивящеся таковому твоему труду, взываем ти:
     Радуйся, неутомимый спутниче Апостола Павла;
     Pадуйся, со Павлом премудрым избранный учителем языков.
     Радуйся, яко неизреченно просвещаеши всю вселенную;
     Pадуйся, всех уязвленных утешителю.
     Радуйся, врачу, силою Вышняго Врача исцеление подающий;
     Pадуйся, яко ты Евангелием своим от смертоноснаго древа избавил еси нас.
     Радуйся, служение имением аки похвальное показующий;
     Pадуйся, Марии, Иоанны, Сусанны и прочих благоразумия несребролюбива возвестителю.
     Радуйся, Иосифа Аримафейскаго похвалителю;
     Pадуйся, яко уныние из сердец наших изгнал еси.
     Радуйся, молитвенниче наш пред Богом;
     Pадуйся, яко многих ко светлости Живота призвал еси.
     Радуйся, святый Луко, Евангелисте Христов и Апостоле.

Кондак 7
     Егда святый Павел при конце третияго апостольскаго путешествия паки Филиппу посети, он тя, святый Луко, в Коринф направил еси, да приимеши благословение сирым христианом, в Палестине сущим. С того часа не отступающе от великаго Апостола, воспевал еси с ним вкупе Всемогущему Богу: Аллилуиа.

Икос 7
     Обойдя в радости все Церкви в Асии и Иудеи, вы Палестины достигли есте, града Кесарийскаго, идеже евреи, от Лукаваго одержимыя, оковами от римския власти святаго Павла обложили есте, он же потребова суда кесаря в Риме. На пути же к оному, ты ему неотступно предстоял еси, многи беды претерпевающе на мори и на земли. Восхваляя за то, почитающе тя восклицаем:
     Радуйся, Павлов помощниче в служении;
     Pадуйся, яко его проповедание описал еси.
     Радуйся, врачу возлюбленный;
     Pадуйся, колоссян чрез Павла во узах приветствовавший.
     Радуйся, Христа словом и писанием свидетельствовавший;
     Pадуйся, яко горьку от безбожия соль Божественною солью усладивший.
     Радуйся, стрело благочестия Христова;
     Pадуйся, яко нас напояеши Евангелием Христовым.
     Радуйся, трубо Божественныя благодати;
     Pадуйся, таин неизреченных проповедниче.
     Радуйся, всех немощных укрепление;
     Pадуйся, от демонов избавителю.
     Радуйся, святый Луко, Евангелисте Христов и Апостоле.

Кондак 8
     Достигнув Рима, ты купно со Апостолами Павлом, Марком, Аристархом и прочими Христа проповедовал еси, вначале евреом, после же их, вашим словесам не верующим, распри меж собою имущим, и всем, не знающим Бога, кои услышав словеса спасения и Духом Святым просветленнии, радостно воспели Воплотившемуся Христу Господу: Аллилуиа.

Икос 8
     Во время оно в Риме ты, святый Луко, соверши то, на что Бог избра тя от века: списа Святое Евангелие, в коем начертал живот и род Господа Иисуса Христа, яко сам виде и слыша и яко от самовидцев и слуг Слова приял еси. В оном святом послушании Апостол Павел руководи тя, послежде он и твое Святое Евангелие похвали. В Риме же ти сущу и словеса Апостола Павла слушающу, и деяния апостольския списаны тобою бысть. Не вемы, яко тя инии восхваляют, мы же ти приносим таковая:
     Радуйся, яко безбожный мир Божественною благодатию напоил еси;
     Pадуйся, Духом Святым запечатленный.
     Радуйся, верный учениче неизреченных таин Христовых;
     Pадуйся, догматов церковных вразумителю.
     Радуйся, яко рукою Владычнею вышним ведением обогащен бысть;
     Pадуйся, яко от Апостола Павла многия тайны Христовы слышал и списал еси.
     Радуйся, Апостола языков сотрудниче неутомимый;
     Pадуйся, яко твое благовестие пройде по всей земли.
     Радуйся, яко нам вином Божией премудрости сердца увеселил еси;
     Pадуйся, яко ты един благоразумнаго разбойника покаяние в Евангелии списал еси.
     Радуйся, богатство стяжавшим благоразумие мытаря приведый;
     Pадуйся, самарян-язычников благодарных и милосердых показавший.
     Радуйся, святый Луко, Евангелисте Христов и Апостоле.

Кондак 9
     Егда Апостол Павел после двухлетних уз отпущен бе и потече из Рима обойти ранее основанныя церкви, ты, Луко святый, его верный спутник в том пути обретеся. Егда же Нерон жестокое гонение на христиан в Риме воздвиже, вы возвратистася во еже ободрите и укрепите гонимую Церковь, она же и в узах и в крови радостно воспевала еси Богу: Аллилуиа.

Икос 9
     Егда возбешенные безбожники Апостола Павла схватиша и заключиша в оковы, ты святый Луко, и прочее с ним верно и неотступно пребыл еси. Егда же наставник твой мученически предаваше чистую свою душу Господу, ты со слезами пребывал при нем. Соскорбя боли твоей, мы велегласно поем:
     Радуйся, яко единый Апостола Павла в узах не оставил еси;
     Pадуйся, яко мученическую кончину великаго Павла узрел еси.
     Радуйся, от Троады до врат райских Павлу последовавый;
     Pадуйся, богомудрым Павлом изрядно наставленный.
     Радуйся, деяний Апостолов изложителю;
     Pадуйся, светильниче Церкви.
     Радуйся, яко блистанием твоего духа просвещаеши сердца верных;
     Pадуйся, лесть демонскую теплотою веры отгнавый.
     Радуйся, яко Господь чрез тебя многия добродетели учини;
     Pадуйся, ризнице, дарований небесных исполненная.
     Радуйся, благочестия непоколебимый столпе;
     Pадуйся, яко имя твое святое вси языцы поминают.
     Радуйся, святый Луко, Евангелисте Христов и Апостоле.

Кондак 10
     После мученическия кончины Апостола Павла ты, святый Луко, в стране Италийстей, Далматстей, Галльстей, сугубо же – Македонстей и Ахайстей Христа проповедал еси, всюду мрак безбожия разгоняя и языки научая, да вси Богу Живому и Истинному восклицают: Аллилуиа.

Икос 10
     В старости твоей ты в Египет потекл еси, да проповедуеши Благую Весть спасения Господа Иисуса Христа. Проповедуя же, многая мучения претерпе и множества подвигов подъя. Возвратившуся же ти в страну Еллинску, ты Церковь устроял еси, священники с диаконами рукополагая, болящих телом и душею исцеляя, за что благодарни суще мы радостно ти взываем:
     Радуйся, яко Тело Христово – Церковь Святую – устроял еси;
     Pадуйся, заре новаго дне.
     Радуйся, путеводителю наш на небо;
     Pадуйся, древо доброе, многая плоды принесшее.
     Радуйся, награду за весть благую в Царствии Небесном восприемший;
     Pадуйся, обличителю безбожия.
     Радуйся, проповедниче Божиих преславных чудес;
     Pадуйся, яко нам новый закон Божий списал еси.
     Радуйся, нас на подвиг деятельныя любве подвизающий;
     Pадуйся, яко из уст твоих боготочныя воды истекоша.
     Радуйся, яко проповедию твоею солнцу подобно возсиял еси;
     Pадуйся, яко икона твоя украси храмы христианския.
     Радуйся, святый Луко, Евангелисте Христов и Апостоле.

Кондак 11
     Бе же ти осьмдесят лет и четыре, егда злобнии идолопоклонницы схватиша тя и бияше Христа Господа ради и возвесиша на масличном древе в Фивах Беотийских, тамо же и мощи твоя святыя погребены бысть. Святую душу твою Ангелам предающе, яко тии ю ко Господу вознесоша, Коему ты верно в сем животе послужил еси, ты и в оном свете воспевал Господу: Аллилуиа.

Икос 11
     Святая твои и чудотворная мощи многих исцелиша, сугубо же очами болящих. Констанций царь слышавше сие, с торжеством их в Царьград пренесл еси. Един от евнух, зле болящий, уведевше о том, повеле ся на ложе к раце со твоими мощами принести и с твердою верою раки прикоснулся еси, и с того часа здрав бе. Возрадовавшись он со иными мощи понесе, они же быша положени под святою трапезою купно с мощами святых Апостолов Андрея и Тимофея. Мы же чуду таковому дивящеся, взываем ти:
     Радуйся, яко и на твоей мученической крови Церковь Христова созиждена еси;
     Pадуйся, венцем мученическим увенчанный.
     Радуйся, врачу, от истления Христом добре уврачевавыйся;
     Pадуйся, сам себе в жертву благоуханную за благую весть принесший.
     Радуйся, яко многия поругания за Христа восприявший;
     Pадуйся, яко мученичеством веру в Христа засвидетельствовавший.
     Радуйся, яко в тиих мучениях стар бе и не изнемогоше;
     Pадуйся, яко твое течение доброе страданьми запечатлел еси.
     Радуйся, яко не неверен слуга Господа Христа явился еси, яко мнози от нас;
     Pадуйся, яко тя и земная и небесная Церковь славит.
     Радуйся, персте Духа Святаго;
     Pадуйся, яко радуешися купно со святыми в Царстве Небесном.
     Радуйся, святый Луко, Евангелисте Христов и Апостоле.

Кондак 12
     Купно со словесным Евангелием, святый Луко, Евангелие во образах ты нам оставил еси, яко христианам тех времен изволившим, живописа три иконы преблагаго лика Матери Божией, рекшей: «Благодать Родившагося от Мене и Моя милость с сими иконами да пребудут». Благодарив суще, яко и нас удостоил еси благоговейно взирати на лепоту Девы и Сына Ея, радостно Премудрому Господу взываем: Аллилуиа.

Икос 12
     Живописал еси, святый Луко, на дске иконы святых Апостолов Петра и Павла. И тако начаток положил еси и в сем дивном и богоугодном деле писания святых икон во славу Божию, Пресвятыя Богородицы и всех святых, они же до сих пор благолепно украшают храмы Божии и ко спасению призывают всех, благоговейно их почитающих. И за сие дарованное тобою нам благодарни ти суще, мы восклицаем:
     Радуйся, евангельских таин благовестниче;
     Pадуйся, весь род человеческий чающим Спасителя уяснивый.
     Радуйся, Матерь Божию на иконе изобразивый;
     Pадуйся, яко Она твое святое дело благословила еси.
     Радуйся, Девы лик увековечивый;
     Pадуйся, яко неизреченную радость нам тем в сердца донесший.
     Радуйся, яко тобою многи чудесы Царица Небесная от икон Своих предначала еси;
     Pадуйся, яко благий лик Матери Божией, тобою отображенный, уныние от нас отгоняет.
     Радуйся, яко ти Матери Божия тайны о Сыне Своем, в сердце носимыя, поведала еси;
     Pадуйся, яко величание Мати Божией в Ея честь воспеваем из твоего Евангелия.
     Радуйся, яко ти Мати Божия архангельское благовестие поведала еси;
     Pадуйся, яко Материю Божией благословенный.
     Радуйся, святый Луко, Евангелисте Христов и Апостоле.

Кондак 13
     О, святый Евангелисте и Апостоле Луко, трубо небесная, приими сия немощная наша словеса яко молитву и испроси нам у Бога, Господа Иисуса Христа, Коему ты тако неутомимо послужил еси и великую милость от Него стяжал еси, прощение всех согрешений наших, мирен и безболезнен конец живота и невозбранен преход в мир духовный, в нем же вси святии воспевают небесную песнь: Аллилуиа.
Этот кондак читается трижды, затем икос 1-й и кондак 1-й

Молитва святому Апостолу и Евангелисту Луке
     О, святый Луко, Богом избранный и Материю Божиею благословенный, проповедниче по всей вселенней Евангелия Христова, мучениче и Апостоле, помощниче всем молитвенно призывающим тя, помози и нам, непотребным рабом Господним, яко мы по многим прегрешениям нашим обретаемся во тьме и сени смертней, отдалече от Бога отстоя. Чрез то стыдом посрамленные не имамы дерзновения Господа молити о прощении, призываем тя, великий светильниче Божий, яко пребывающаго в непреходящем Его свете, моли о нас Господа, да помилует нас. Умоли Господа, святый Луко, да обновит в нас страх Господень, онже любы привлекает, а грех отгоняет. Яко мы тако навыкли грешити по всях день и час, и во сне, яко не вемы слов Господа: бдите, яко не знаете часа, егда хочу приити, Он же может на всяк час призвати нас из сего привременного живота в вечный. Пробуди в нас, святый Луко, страх и премудрость, о нихже святый царь и псалмопевец Давид рече. Да твоими молитвами получим покаяния слезы, имиже вси наши души от греха очистятся. Яко мы в духовной слепоте и дебелости суще не можем плакатися своего мертвеца, сиречь самих себе, многи же слезы, потоки слез потребно да пролием за множество содеянных грехов. Помози нам, неразумным, да уразумеем Писание, еже ты сам списал еси, яко истинным разумом уразумеем истинная словеса, да бежим от греха, яко от огня, и вси силы приложим, да приблизит ны Бог. Да уразумеем, яко грех есть смерть, Бог же живот. Помози нам, святый Луко, да то уразумевше, очистимся от греха и прейдем из смерти в живот. Да будет нам Бог вся во всем. И ныне и во веки да пребудем близ Него. Дабы и нам, яко ти с Клеопою, егда путешествовали во Еммаус, сердце и душа трепетны быша от присутствия Его. Отнюдуже да снидет на ны мир небесный, к Царствию Небесному ны руководящий и радостны ны творящий, да возможем стрелы Лукаваго, на всяк час в нас испущаемы, отгнати. С тем же получим и любы Божия, да руководит нас к вечному Отечеству, идеже вси силы небесные, вси святии, Мати Божия пред ними, Еяже благой лик в иконе тобою написанной, увековечен еси. Очи сердец наших да непрестанно взирают на ту лепоту и ею наслаждаются, да царит в нас Царство Небесное, в кое чаем молитвами твоими, святый Луко, преселитися, егда нас Господь призовет, да тамо вечно славим Бога во Святей Троице: Безначальнаго Отца, Единороднаго Сына и Пресвятаго Духа, во все бесконечные веки. Аминь.

Тропарь апостолу и Евангелисту Луке
Тропарь, глас 3:
     Апостоле святый и Евангелисте Луко, моли Милостиваго Бога, да прегрешений оставление подаст душам нашим.

Ин тропарь, глас 5:
     Апостольских деяний сказателя и Евангелия Христова светла списателя, Луку препетаго, славна суща Христове Церкви, песньми священными святаго апостола похвалим, яко врача суща человеческия немощи, естества недуги и язи душ исцеляюща и молящася непрестанно за души наша.

Кондак, глас 2:
     Истиннаго благочестия проповедника и таин неизреченных ритора, звезду церковную, Луку Божественнаго восхвалим: Слово бо его избра с Павлом мудрым, языков учителя, Един ведый сердечная.

Величание
     Величаем тя, апостоле Христов и Евангелисте Луко, и чтим болезни и труды твоя, имиже трудился еси во благовестии Христове.

Акафисты zvonnitsa.ru/orthodoxy/akafisti/293/13344/

Кондак 1
     Возбранный святителю Церкви Православныя и исповедниче, возсиявый стране нашей в земле Крымстей, яко светозарное светило, добре потрудивыйся и за имя Христово гонение претерпевый, прославляюще прославльшаго тя Господа, даровавшаго нам тебе новаго молитвенника и помощника, похвальное воспеваем ти пение; ты же, яко имеяй велие дерзновение ко Владыце небесе и земли, от всяких недугов душевных и телесных свободи нас и добре стояти в Православии укрепи, да вси во умилении зовем ти:
     Радуйся, святителю Крымский, исповедниче Луко, врачу благий и милостивый.

Икос 1
     Ангелов собеседниче и человеков наставниче, Луко преславный, подобне евангелисту и апостолу Луке, емуже тезоименит сый, от Бога дар целити недуги человеческия приял еси, во врачевании болезней ближних многия труды подъемля, и, плоть нося, о плоти нерадел еси, делы добрыми Отца Небеснаго прославил еси. Темже благодарне во умилении зовем ти:
     Радуйся, от юности разум свой игу Христову покоривый;
     Радуйся, пречестное Святыя Троицы селение бывый.
     Радуйся, блаженство милостивых, по Слову Господа, унаследовавый;
     Радуйся, верою Христовою и знанием богодарованным многия недужныя исцеливый.
     Радуйся, страждущих недугами телесными врачу милосердный;
     Радуйся, во дни брани вождей и воинов исцелителю.
     Радуйся, всех врачей наставниче;
     Радуйся, скорый в нуждах и скорбех сущим помощниче.
     Радуйся, Церкви Православныя утверждение;
     Радуйся, земли нашея озарение.
     Радуйся, крымския паствы похвало;
     Радуйся, града Симферополя украшение.
     Радуйся, святителю Крымский, исповедниче Луко, врачу благий и милоствый.

Кондак 2
     Видя в человецех во время врачеваний, аки в зерцале, премудрость и славу Творца всяческих Бога, к Нему духом выну возносился еси, богомудре, светом же богоразумия твоего и нас озари, да вопием купно с тобою: Аллилуия.

Икос 2
     Разум твой Божественными ученьми просветил еси, Луко всеславне, отвергнув всякое плотское мудрование, с разумом же и волю повинул еси Господеви, подобен апостолом быв. Тии бо по Слову Христову: «Грядита по Мне, и сотворю вы ловца человеком» — оставиша вся и по Нем идоша, и ты, святе, услышавав Господа Иисуса, зовущаго тя на служение чрез раба Своего архиепископа Ташкентскаго Иннокентия, абие приемлеши священство в Церкви Православней. Сего ради, яко богомудраго наставника, тя ублажающе, воспеваем сице:
     Радуйся, Ангела Хранителя увеселение;
     Радуйся, яко николиже того опечалил еси.
     Радуйся, во учении преспевавый и мудрецы мира сего удививый;
     Радуйся, от творящих беззаконие уклонивыйся.
     Радуйся, Божия Премудрости созерцателю и проповедниче;
     Радуйся, истиннаго богословия златословесный учителю.
     Радуйся, апостольских преданий блюстителю;
     Радуйся, свеще, Богом возженная, мрак нечестия разгоняющая.
     Радуйся, звездо, путь ко спасению показующая;
     Радуйся, Православия ревнителю.
     Радуйся, раскольников обличителю;
     Радуйся, свидений и оправданий Господних возжадавый.
     Радуйся, святителю Крымский, исповедниче Луко, врачу благий и милостивый.

Кондак 3
     Силою благодати Божия, еще во временней жизни приял еси дар, святе Луко, недуги целити, да вси, усердно притекающии к тебе, исцеления недугов телесных и, наипаче, душевных сподобляются, вопиюще Богу: Аллилуия.

Икос 3
     Имея неусыпное попечение о спасении душ, вверенных тебе от Бога, Луко блаженне, пастырски к душеспасительной жизни и словом, и самым делом непрестанно наставлял еси. Сего ради приими от нашего усердия похвалы, достойно тебе приносимыя:
     Радуйся, Божия разума исполненный;
     Радуйся, благодатию Духа Святаго приосененный.
     Радуйся, нищеты Христовы подражателю;
     Радуйся, пастырю добрый, уклоняющихся от веры православныя и блуждающих по горам суемудрия, взыскавый.
     Радуйся, делателю винограда Христова, чад божиих укрепляяй в истинной вере православней;
     Радуйся, щите, защищаяй благочестие.
     Радуйся, непоколебимое Православия основание;
     Радуйся, твердый каменю веры.
     Радуйся, душепагубнаго неверия и злотворнаго обновленчества обличителю и искоренителю;
     Радуйся, в делании духовнем подвизающихся мудрый укрепителю.
     Радуйся, от мира изгнанным пристанище тихое указуяй;
     Радуйся, яко приим крест, Христу последовал еси.
     Радуйся, святителю Крымский, исповедниче Луко, врачу благий и милостивый.

Кондак 4
     Бурю внутрь имея помышлений многих, недоумеваше раб Божий, что речет о нем Господь, егда проразумеваху его достойна быти епископом граду Ташкенту, обаче всего себе Христу Богу предав, Тому о всем благодарение возсылаше, зовый: «Благословен Бог, изливаяй благодать Свою на архиереи Своя», — и поя Ему: Аллилуия.

Икос 4
     Слышавше людие православнии, в гонении сущии, о благоплодных добротах души твоея, богоносе Луко, и видевше тя на степени святительства, яко достойный сосуд Божественныя благодати, вся немощная врачующия и оскудевающая восполняющия, дивляхуся чудному промышлению Бога о тебе и приношаху ти благохваления сицевая:
     Радуйся, архиерею, от Самого Господа пронареченный;
     Радуйся, о надписании сана епископскаго на книзе твоей предуказание мысленное приявый.
     Радуйся, иерархов украшение;
     Радуйся, пастырю, иже готов бысть душу положити за овцы своя словесныя.
     Радуйся, многосветлый Церкве светильниче;
     Радуйся, апостолов сопричастниче.
     Радуйся, исповедников украшение;
     Радуйся, всякое о себе попечение отвергнувый.
     Радуйся, скорбей утолителю;
     Радуйся, о людских невежествиих печальниче.
     Радуйся, искавших спасения правым учением оглашавый;
     Радуйся, житием твоим сего учения не посрамивый.
     Радуйся, святителю Крымский, исповедниче Луко, врачу благий и милостивый.

Кондак 5
     Боготочною Кровию от вечныя смерти искупленныя соблюдая, егда сан епископа во дни страшных гонений по благословению Святаго Патриарха Тихона от рук епископов православных приял еси, святителю Луко, дело благовестника добре сотворил еси, обличая, запрещая, умоляя со всяким долготерпением и учением и поя Богу: Аллилуия.

Икос 5
     Видевше Ангельстии чинове великия подвиги твоя, егда по заповеди Господней: «Блажени изгнани правды ради, яко тех есть Царствие Небесное», — в крепости сердечней безропотно понесл еси заточение и изгнание в Сибирь за имя Господа и святую Церковь Христову, терпением велиим устрояя спасение свое, примером же своим верных души назидая. Мы же тя, усердно любовию почитающее, чествуем похвалами сими:
     Радуйся, светильниче, на свещнице церковнем поставленный;
     Радуйся, яко слово Писания: «Любы долготерпит», — на тебе оправдася.
     Радуйся, защищати тя верным воспретивый;
     Радуйся, властем повинувыйся и сего ради волею в руки воинов нощию предавыйся.
     Радуйся, клевреты неправедных судей уничиженный;
     Радуйся, в заточение со смирением безропотно шедый.
     Радуйся, от паствы твоея Ташкентския правды ради изгнанный;
     Радуйся, яко вернии о разлучении с тобою рыдаху.
     Радуйся, за Господа распятаго изъязвленный и заушенный;
     Радуйся, уста лживых неверов заградивый.
     Радуйся, праведными усты твоими небесныя истины и в изгнании вещавый;
     Радуйся, яко мученицы на небесех о терпении твоем ликовствоваху.
     Радуйся, святителю Крымский, исповедниче Луко, врачу благий и милостивый.

Кондак 6
     Проповедник немолчный тайны Пресвятыя, Единосущныя и Нераздельныя Троицы был еси и в темнице, и во градех изгнания сибирскаго, терпя глад, мраз страны северныя и жестокость клевретов безбожных. Сего ради проповедует Церковь Крымская величия Божия, явленныя на тебе, святителю Луко, яко целил еси силою Божиею недуги душевныя и телесныя и в стране изгнания, да вси единым сердцем и едиными усты, воспеваем Богу: Аллилуия.

Икос 6
     Возсиял еси, яко звезда лучезарная, красноярстей пастве и тамбовстей, озаряя души верных и разгоняя тьму нечестия и безбожия. И исполнишася на тебе слова Христовы: «Блажени есте, егда поносят вам, и ижденут, и рекут всяк зол глагол на вы, лжуще, Мене ради». Ты бо, гонимый из града во град и клеветы терпевый, архипастырское служение усердно исполнял еси и сладостию писаний твоих вся алчущия и жаждущия правды насыщал еси, иже благодарне взывают тебе:
     Радуйся, наставниче, всех к небеси путеводяй;
     Радуйся, славы Божией истинный ревнителю.
     Радуйся, воине Христов непобедимый;
     Радуйся, за Христа Господа темницы и биения терпевый.
     Радуйся, смирения Его истинный подражателю;
     Радуйся, вместилище Духа Святаго.
     Радуйся, вшедый с мудрыми в радость Господа твоего;
     Радуйся, корыстолюбия обличителю.
     Радуйся, пагубу тщеславия показавый;
     Радуйся, беззаконники ко обращению призывавый.
     Радуйся, имже Христос прославися;
     Радуйся, имже сатана посрамися.
     Радуйся, святителю Крымский, исповедниче Луко, врачу благий и милостивый.

Кондак 7
     Хотя достойно совершити подвиг, от Бога на тя возложенный, облеклся еси вся оружия Божия и стал еси на брань противу миродержителей века сего, духов злобы поднебесных, препоясав чресла своя истиною и облекшись в броню правды, угасил еси, исповедниче Луко, вся стрелы лукаваго, поя Содетелю и Богу: Аллилуия.

Икос 7
     Новое гонение воздвигоша беззаконнии и безбожнии человецы на Церковь Православную и во глубину дальней таежной страны услаша тя, святителю Луко, и близ смерти быв, рукою Божиею сохранен, взывал еси со апостолом Павлом: «До нынешняго часа и алчем, и жаждем, и наготуем, и страждем, и скитаемся. Гоними, терпим; якоже отребие миру быхом, всем попрание доселе». Сего ради, ведуще о тебе таковая, ублажаем тя:
     Радуйся, исповедниче Христов блаженный;
     Радуйся, мраз лютый и глад во изгнании претерпевый.
     Радуйся, близ смерти бывый, Господом сохраненный;
     Радуйся, самоотвержение всецелое показавый.
     Радуйся, уневестивый душу твою Жениху Христу;
     Радуйся, Господа распятаго на Кресте, присно пред собою предзревый.
     Радуйся, яко во бдениих и молитвах неослабно пребывал еси;
     Радуйся, Единосущныя Троицы истинный ревнителю.
     Радуйся, от всякия болезни скорый и безмездный врачу;
     Радуйся, ломотныя и опухлыя уврачевавый.
     Радуйся, от неисцельныя гнойныя болезни костей и ран здравых возставивый;
     Радуйся, яко верою твоею и трудами врачебными расслабленнии исцелеша.
     Радуйся, святителю Крымский, исповедниче Луко, врачу благий и милостивый.

Кондак 8
     Странник во юдоли земней быв, терпения, воздержания и чистоты образ показал еси, исповедниче Луко. Егда отечество в опасности от нашествия иноплеменник пребываше, любовь евангельскую являя, деннонощно во врачевнице труждался еси, исцеляя недуги и раны вождей и воинов отечества земнаго, непамятозлобием и любовию удивляя всех творящих ти напасти, и многия сим обратил еси ко Христу, во еже пети Ему: Аллилуия.

Икос 8
     Весь исполнь любве Христовы, Луко благосерде, душу твою полагал еси за други твоя, и яко Ангел Хранитель свой был еси ближним и дальним, озлобленныя укрощая, враждующия примиряя и спасение всем устрояя. Поминая труды твоя во благо людей отечествия твоего, благодарне взываем ти:
     Радуйся, дивную любовь ко отечеству земному показавый;
     Радуйся, смирения и незлобия учителю.
     Радуйся, изгнание и жестокия муки мужемудренно претерпевый;
     Радуйся, за Христа страдавый и мучим бывый.
     Радуйся, твердо Его исповедавый;
     Радуйся, злобу врагов любовию Христовою победивый.
     Радуйся, отче благосердный, спасения многих взыскавый;
     Радуйся, великими скорбьми искушенный.
     Радуйся, в гонениих терпение дивное явивый;
     Радуйся, яко за враги Господа умолял еси.
     Радуйся, егоже любовь всяку вражду победи;
     Радуйся, егоже незлобие сердца жестокия покори.
     Радуйся, святителю Крымский, исповедниче Луко, врачу благий и милостивый.

Кондак 9
     Всем был еси вся, якоже и святый Павел, да всяко некия спасеши, святителю Луко, архипастырский подвиг совершая, в тамбовстем крае многими труды храмы обновляя и созидая, уставы святоотеческия строго соблюдая, спасению паствы твоея служити не престал еси, чисто Богови поя: Аллилуия.

Икос 9
     Витии человеческия не возмогут по достоянию изрещи твоих благодеяний множество, егда явися на Крымстей земли, яко отец чадолюбивый, святителю отче Луко. Щедродательная бо десница твоя всюду досязаше. Мы же, благосердию твоему подражати хотяще, во удивлении взываем к тебе:
     Радуйся, лучу любве Божия;
     Радуйся, сокровище милосердия Спасова неисточимое.
     Радуйся, яко вся своя неимущим раздавал еси;
     Радуйся, ближния твоя паче себе возлюбивый.
     Радуйся, безматерних сирот питателю и окормителю;
     Радуйся, безпомощных старцев и стариц попечителю.
     Радуйся, яко болящия и в темнице заключенныя посещал еси;
     Радуйся, яко нужды бедных во мнозех местах отечества своего предварял еси.
     Радуйся, яко нищия поминая, трапезы им устроял еси;
     Радуйся, яко коемуждо в горестех, аки Ангел-утешитель являлся еси.
     Радуйся, Ангеле земный и человече небесный;
     Радуйся, яко о глубине милосердия твоего Мати Божия возрадовася.
     Радуйся, святителю Крымский, исповедниче Луко, врачу благий и милостивый.

Кондак 10
     Спасению крымския паствы твоея служити многолетне не преставая, по образу Пастыреначальника Христа, на рамех заблудших взем, Богу и Отцу привел еси, надеждою бо на Божие милосердие утешая, ко исправлению жития словесы учительными твоими влекл еси вся, во еже сердцем чистым пети Богу: Аллилуия.

Икос 10
     Царя Небеснаго Христа Бога верный служитель быв, святителю отче Луко, неустанно возвещал еси слово истины во всех храмех земли Таврическия, душеспасительною пищею учения евангельскаго верныя чада питая и устав церковный строго исполняти повелевая. Темже тя, яко пастыря добраго, прославляем сице:
     Радуйся, неутомимый проповедниче евангельския правды;
     Радуйся, яко Богом врученное тебе стадо словесное добре пасл еси.
     Радуйся, яко овцы своя от душегубных волков охранявый;
     Радуйся, чина церковнаго строгий блюстителю.
     Радуйся, чистоты веры православныя охранителю;
     Радуйся, тобою бо Дух Святый написа словеса спасительная.
     Радуйся, яко мудрецам века сего бытие Божие проповедавый;
     Радуйся, яко слово твое, аки в ризы позлащены, в тайны веры одеяшася.
     Радуйся, молние, гордыню низлагающая;
     Радуйся, громе, беззаконно живущия устрашаяй.
     Радуйся, церковнаго благочестия насадителю;
     Радуйся, архипастырю, пастыри духовныя наставляяй и вразумляяй непрестанно.
     Радуйся, святителю Крымский, исповедниче Луко, врачу благий и милостивый.

Кондак 11
     Пение у гроба твоего, угодниче Божий, не умолкаше во днех блаженнаго успения твоего. Мнози бо ведуще тя богоносна и равноангельна, собрашася от всех предел земнаго отечествия твоего совершити моление соборное о души твоей, в горния обители отечествия небеснаго восходящей, воспевающе Богу: Аллилуия.

Икос 11
     Свещею в Церкви Христовой, горящей светом невещественным благодати Божией, был еси, святителю Луко, вся концы земли нашея озаряя. Егда же приспе время отшествия твоего, божественнии Ангели прияша святую душу твою и в небесныя обители вознесоша. Темже, поминающе блаженное успение и велие твое на небеси и на земли прославление, с радостию приносим ти благохваления сия:
     Радуйся, светильниче немеркнущий Света Невечерняго;
     Радуйся, яко мнози прославиша чрез твоя добрая дела Отца Небеснаго.
     Радуйся, угодниче Божий, течение благочестне скончавый;
     Радуйся, веру, надежду и любовь от Господа стяжавый.
     Радуйся, со Христом, Его же возлюбил еси, на веки соединивыйся;
     Радуйся, царствия небеснаго и славы вечныя наследниче.
     Радуйся, яко свет добрых дел твоих пред человеки просветися;
     Радуйся, научивый заповедем Христовым и сотворивый я.
     Радуйся, архиерею, от Вечнаго Архиерея Христа благодатными дарами исполненный;
     Радуйся, скорый помощниче призывающим тя.
     Радуйся, земли Крымския новое светило утверждение;
     Радуйся, рода христианскаго благодатный покровителю.
     Радуйся, святителю Крымский, исповедниче Луко, врачу благий и милостивый.

Кондак 12
     Благодать, свыше ти данную, познавше, благоговейно лобызаем честнаго лика твоего изображение, святителю Луко, чающе тобою получити просимое от Бога. Темже, припадающе ко святым мощем твоим, со умилением молим тя: укрепи нас добре стояти в вере православней и, угождающе благими делы, немолчно пети Богу: Аллилуия.

Икос 12
     Поюще Бога, дивнаго во святых Своих, хвалим тя, Христова исповедника, святителя и предстателя пред Господем. Весь бо еси в вышних, но и нижних не оставляеши, святителю отче Луко, присно со Христом царствуеши и о нас, грешных, пред Престолом Божиим ходатайствуеши. Сего ради во умилении зовем ти:
     Радуйся, света неприступнаго зрителю;
     Радуйся, емуже сорадуются Ангелы и о нем же веселятся человецы.
     Радуйся, делы и писаньми твоими неверующия просвещаяй;
     Радуйся, маловерныя и малодушныя укрепляй и утверждаяй.
     Радуйся, яко достоин явился еси царствия небеснаго;
     Радуйся, путем исповедничества райских селений достигнувый.
     Радуйся, поношения Христа ради терпевый и вечную с Ним славу приявый;
     Радуйся, души наша к царствию небесному путеводяй.
     Радуйся, предстателю пред Престолом Божиим за нас, грешных;
     Радуйся, Православия похвало и земли нашея радование.
     Радуйся, в сонме святых быти сподобивыйся;
     Радуйся, собору всех Крымских святых сопричастниче.
     Радуйся, святителю Крымский, исповедниче Луко, врачу благий и милостивый.

Кондак 13
     О великий и преславный угодниче Божий, святителю отче наш Луко, приими сие похвальное пение от нас, недостойных, с любовию сыновнею тебе приносимое. Предстательством твоим у Престола Божия и молитвами твоими всех нас в вере православней и добрых делех утверди, от всяких бед, скорбей, болезней и напастей, в сей жизни находящих, сохрани, от мучений в будущем веце избави и сподоби в вечней жизни купно с тобою и со всеми святыми пети Творцу нашему: Аллилуия.
Этот кондак читается трижды, а затем икос 1-й и кондак 1-й

Молитва святителю Луке, исповеднику, архиепископу Крымскому
     О всеблаженный исповедниче, святителю отче наш Луко, великий угодниче Христов! Со умилением приклоньше колена сердец наших и припадюще к раце честных и многоцелебных мощей твоих, якоже чада отца, молим тя всеусердно: услыши нас, грешных, и принеси молитву нашу к Милостивому Человеколюбцу Богу, Емуже ты ныне в радости святых и с лики Ангел предстоиши. Веруем бо, яко любиши ны тою же любовию, еюже вся ближния возлюбил еси, на земли пребывая. Испроси у Христа Бога нашего, да утвердит во Святей Своей Православней Церкви дух правыя веры и благочестия, пастырем ея да даст ревность святую и попечение о спасении паствы, вверенной им: право верующия соблюдати, слабые и немощныя в вере укрепляти, неведущия наставляти, противныя обличати. Всем нам подай дар, коемуждо благопотребен, и вся, яже к жизни временней и к вечному спасению полезная: градов наших утверждение, земли плодоносие, от глада и пагубы избавление, скорбящим утешение, недугующим исцеление, заблудшим на путь истины возвращение, родителем благословение, чадом в страсе Господнем воспитание и научение, сирым и убогим помощь и заступление. Подаждь всем нам твое архипастырское и святое благословение, да тем осеняеми, избавимся от козней лукаваго и избегнем всякия вражды и нестроений, ересей и расколов. Даруй нам поприще жизни временныя богоугодно преити, настави нас на путь ведый в селения праведных, избави воздушных мытарств и моли о нас Всесильнаго Бога, да в вечней жизни с тобою непрестанно славим Отца и Сына и Святаго Духа, в Троице славимаго Бога, Емуже подобает всякая слава, честь и держава во веки веков. Аминь.

Тропарь святителю Луке (Воино-Ясенецкому), архиепископу Крымскому, исповеднику
Тропарь, глас 1:
     Возвестителю пути спасительнаго, исповедниче и архипастырю Крымския земли, истинный хранителю отеческих преданий, столпе непоколебимый, Православия наставниче, врачу богомудрый, святителю Луко, Христа Спаса непрестанно моли веру непоколебиму православным даровати и спасение, и велию милость.

Акафисты zvonnitsa.ru/orthodoxy/akafisti/291/13346/

Кондак 1
     Избранный от Воеводы сил небесных и Господа Иисуса Христа, преподобне отче наш Макарие, яко имеяяй велие дерзновение к Богу, молися выну о спасении душ наших и избавлении нас от всяких бед и напастей, да зовем ти:
     Радуйся, Макарие, предивный чудотворче.

Икос 1
     Ангела на земли яви тя Творец небесе и земли, вся бо земная вменил еси за уметы, да приобретеши единаго Христа; темже вси, зряще твое христоподобное на земли житие, вопием ти:
     Радуйся, от утробы матерния предуготованный в чистое и непорочное жилище Пресвятыя Троицы;
     Радуйся, Богом Отцем предъизбранный.
     Радуйся, Богом Сыном искупленный;
     Радуйся, Богом Духом Святым освященный.
     Радуйся, Господа паче всего возлюбивый;
     Радуйся, отца и матерь ради Христа оставивый.
     Радуйся, званию духа благодати повинувшийся;
     Радуйся, отвергшийся себе ради Христа Иисуса.
     Радуйся, крест Христов на себе вземший;
     Радуйся, вслед Христа последовавший.
     Радуйся, до конца жизни твоея в терпении и подвизех неослабно пребывый;
     Радуйся, яко претерпевая мужественно временная и настоящая веселился еси будущими и вечными.
     Радуйся, Макарие, предивный чудотворче.

Кондак 2
     Преподобне отче Макарие, ты, сый еще младенец, егда бываше звон церковный, плача и детски крича, яко смысляй, изъявлял еси желание, да в церковь несен будеши. Совершающуся же церковному в храме Божием пению радовался и веселился еси. Сего ради благовернии родителие твои ношаху тя на каждое церковное пение и прославляху о тебе Господа Бога, вопиюще: Аллилуиа.

Икос 2
     Разум, неразумеваемый мудрствующим плотская, стяжал еси, и все сердце твое вперил еси в небесная, сего ради вопием ти:
     Радуйся, яко по вся дни в церковь Божию ходил еси;
     Радуйся, яко в сладость церковнаго чтения и пения послушал еси.
     Радуйся, от юности навыкший богоугодному добронравию;
     Радуйся, возлюбивший красоту дома Божия и место селения славы Господни.
     Радуйся, изволивый приметатися в дому Божии паче, неже жити в селениих грешничих;
     Радуйся, во дни и в нощи непрестанно молитвы к Богу возносивый.
     Радуйся, в чисту жертву Богови не точию тело, но и душу всю принесый;
     Радуйся, всего себе на служение Богу предавый.
     Радуйся, яко превыше сверстник твоих в разумении слова Божия быша паче меда и сота устом твоим;
     Радуйся, яко маслина в дому Божии насажденная.
     Радуйся, блаженне, яко уподобился еси древу, насажденному при исходищих вод, приносящему плоды;
     Радуйся, Макарие, предивный чудотворче.

Кондак 3
     Согревающу Духу Святому сердце твое, проподобне отче, возжелал еси вельми иноческого чина, возлюбив Отца Небеснаго паче земных родителей твоих, и изшел еси отай из дому родителей в иноческую обитель; обрет же на пути нища, худу одежду носяща, испросил еси ту себе, дав ему свое доброе одеяние ради Господа Бога Иисуса Христа, нас ради обнищавшаго, да мы нищетою Его обогатимся и вопием Ему выну: Аллилуиа.

Икос 3
     Пришед во святую обитель, преподобне отче наш Макарие, молил еси святаго Дионисия Архимандрита, да принят будеши в чин иноческий, сказуя себе безродна, сиротствующа, нища, желающа работати Богу. Архимандрит же проразуме в тебе имуща быти сосуд избранный Святому Духу, прия и облече тя в ангельский образ. Ты же вся добродетели, подобающия иноком, исполнял и во всем угождал еси Богу и наставнику твоему, якоже самому Христу, такожде и братиям, и показался еси в новоначалии своем совершен быти инок и добрый подвижник. Темже достойно вопием ти:
     Радуйся, от рук святаго Дионисия иночество любезне приявый;
     Радуйся, сожительство и собеседничество с преподобными избравый.
     Радуйся, иноческаго жития скорби и тесноту возлюбивый паче утешений и сладостей мира;
     Радуйся, поревновавый житию и подвигом древних преподобных отец.
     Радуйся, истиннаго послушания настоятелю и всей во Христе братии образ показавый;
     Радуйся, всякое послушание со смирением и кротостию совершивый.
     Радуйся, чистоты душевныя и телесныя крепкий ревнителю и хранителю;
     Радуйся, бдением, постом и коленопреклонениями плоть свою умертвивый.
     Радуйся, безмолвию и богомыслию от юности научивыйся;
     Радуйся, выну молчание с незлобием хранивый.
     Радуйся, словом Божиим, аки мечем, сопротивныя силы побеждавый;
     Радуйся, постничеством и добродетельми превозшедый бывших с тобою иноков.
     Радуйся, Макарие, предивный чудотворче.

Кондак 4
     Буря помыслов смущаше родители твоя, отче наш Макарие, егда внезапу оставил еси отай дом их; чрез три же лета обретше тя во святей обители, радовахуся и славяху Бога, вопиюще Ему: Аллилуиа.

Икос 4
     Слышавше, преподобне отче Макарие, ближнии и дальнии, яже о постническом житии твоем, удивляхуся и прославляху тя всюду, ты же, яко ищущий славы единаго Бога, бегал еси славы, яже от человек, скрываяся в пустынях. Вся же на пользу строяй, Бог прослави тебе, раба Своего, не точию в христианех, но и в агарянех. Темже мы вопием ти:
     Радуйся, граде верху стояй, не могий укрытися;
     Радуйся, светильниче, вся озаряющий чудесы и подвиги твоими.
     Радуйся, звездо, показующая солнце правды;
     Радуйся, заре Божественнаго Света.
     Радуйся, добрыми делы твоими всех, зрящих тя, подвизаяй к прославлению Отца, Иже на небесех;
     Радуйся, яко потщался еси прежде сам сотворити Волю Божию и после научити других.
     Радуйся, твердый столпе иночества;
     Радуйся, яко мудр вождь, приведый многих к вечному спасению.
     Радуйся, постничества, терпения, жажды и алчбы, и наготы образе предивный;
     Радуйся, благое иго и легкое бремя Христово из млада возлюбивый.
     Радуйся, на земли ангельски поживый;
     Радуйся, земный Ангеле и небесный человече.
     Радуйся, Макарие, предивный чудотворче.

Кондак 5
     Боготечная звезда всея страны явился еси, преподобне отче Макарие, всем быв образ словом, житием, любовию, духом, верою, чистотою, воспевая Господу Богу: Аллилуиа.

Икос 5
     Господь Бог, очищаяй скорбьми и напастьми избранныя Своя, яко злато и сребро, попусти разоритися созданней тобою обители, на нюже внезапу нападше, агаряне всех в ней бывших, мечным посечением, аки класы на ниве, пожаша, тебе же, преподобне отче наш, жива приведоша к воеводе своему. Сей же, узрев ангелоподобное лице твое и уведав, яко ты никомуже зло соделал еси, но всем едино добро творил еси. Богу жестокое сердце его умягчающу, даде свободу тебе и еще же тебе ради свободи прочия пленныя до четыредесяти мужей, разве жен и детей. Темже вопием ти сицевая:
     Радуйся, кротостию и благостию своею сердца неверных победивый;
     Радуйся, злобу на жалость преложивый.
     Радуйся, благочестивыя люди от плена агарянскаго свободивый;
     Радуйся, многия от тяжких напастей и скорбей избавивый.
     Радуйся, яко честному погребению предал еси братию обители, срацынами избиенную, якоже оныя древле преподобныя отцы, иже в Синае и Раифе;
     Радуйся, яко единою умерый мирови не о себе, а о ближних печалился еси.
     Радуйся, яко люди, с тобою отпущенныя из плена, тщаливе охранял еси, да не паки в агарянския руки впадут;
     Радуйся, яко научил еси изведенныя тобою люди возложити всю надежду на единаго Бога.
     Радуйся, яко был еси им в пути и вождь, и учитель, и утешитель;
     Радуйся, яко с молитвою изшел еси в страну Галическую.
     Радуйся, яко, шествуя путем, положил еси основание Свияжския обители;
     Радуйся, яко ревностию поревновал еси о спасении душ, искупленных Иисусом Христом.
     Радуйся, Макарие, предивный чудотворче.

Кондак 6
     Все житие твое, преподобне отче Макарие, есть немолчное проповедание веры, надежды и любве, яже к Богу и к ближним, влиянныя в душу твою Святым Духом, Емуже вопием: Аллилуиа.

Икос 6
     Новаго Моисея показа тя, преподобне отче наш Макарие, Господь Бог, егда люди, свободившияся от плена, безбедно провел еси непроходимыми лесами и блатами и изнемогающия от глада дивно препитал еси. Сего ради вопием ти:
     Радуйся, яко гладным людем возбранил еси разорити пост, от Святыя Церкве уставленный;
     Радуйся, яко утешил еси оныя словесы богодухновенными, укрепляя в терпении.
     Радуйся, яко от юности навыкший пощению, небрегл еси о себе;
     Радуйся, яко о народе гладнем истаевая печалию, твоими словесы и молитвами укрепил еси его в изнеможении от неядения.
     Радуйся, яко гладнии людие пищею духовною, аки хлебом, укрепляеми, мужествоваху;
     Радуйся, яко у Бога испросил еси скота, иже бысть на довольную пищу алчущим.
     Радуйся, яко вся люди привел еси безбедно в пределы Галические страны, во град Унжу;
     Радуйся, яко благовернии людие сретоша тебе честне, прията любезне, яко Ангела Божия.
     Радуйся, яко ведомыя тобою люди исповедаша пред всеми на себе милость Божию;
     Радуйся, яко слышащии, како Господь Бог свободи благоверныя люди от пленения и гладныя насыти, прославиша Бога и тебе, Его угодника.
     Радуйся, яко Галическую страну чудесы твоими озарил еси;
     Радуйся, яко светильник горяй и светяй явился еси.
     Радуйся, Макарие, предивный чудотворче.

Кондак 7
     Почитания и славы, яже от человек, во граде не терпя, паки пустынннаго безмолвия возжелал еси, преподобне отче, и, обрет пустынное место, возлюбил е, водрузил еси крест, водворился еси в созданной тобою келлии, да поеши выну Богу: Аллилуиа.

Икос 7
     В пустыни, в нюже вселился еси, преподобне отче Макарие, по малом времени обитель иноком в пребывании устройся Божиим изволением, и якоже обыкл еси, в преподобии и в правде дни и нощи работал еси Богови. Мы же, прославляюще о тебе Господа Бога, вопием ти:
     Радуйся, единое на потребу всегда искавый;
     Радуйся, ищущему добрый бисер уподобивыйся и ради сего вся земная оставивый.
     Радуйся, очи ума и сердца своего на высоту небесную вперивый;
     Радуйся, труды и подвиги своими Ангелов и человеков удививый.
     Радуйся, нищетою телесною и духовною Царствие Божие обретый;
     Радуйся, умиления и сокрушения слезами на небесех вечное утешение приявый.
     Радуйся, яко ради алчбы и жажды на земли насыщаешися блаженством на небеси;
     Радуйся, яко кротостию твоею и незлобием твоим наследовал еси вечную землю.
     Радуйся, яко мир Божий и сам тщился имети со всеми, и водворял еси среди враждующих, и сего ради вчинен еси в лик сынов Божиих;
     Радуйся, имене ради Христова многи скорби, болезни, всенощная бдения, коленопреклонения, подвиги и труды понесый.
     Радуйся и веселися, яко мзда твоя многа на небесех;
     Радуйся, Макарие, предивный чудотворче.

Кондак 8
     Дивный во святых Господь Бог дивно прославляется в тебе, преподобне отче Макарие; облече бо тя силою свыше целити недуги и болезни душевныя и телесныя и подавати полезная всем, с верою и любовию вопиющим к Нему о тебе: Аллилуиа.

Икос 8
     Благодать Божию, сущую в тебе, преподобне отче Макарие, неоскудно подавая требующим, отроковицу некую бесну и слепу крестным знамением с молитвою исцелил еси. Дивящеся силе Божией, обитающей в тебе, взываем ти:
     Радуйся, благодатный источниче исцелений;
     Радуйся, туне приявый благодать от Господа Бога, туне и подаваяй.
     Радуйся, имеяй велие дерзновение ко Господу Богу;
     Радуйся, яко никтоже с верою просяй тощь отходит от тебе.
     Радуйся, яко всенощными молитвами всю бесовскую прелесть посрамивый;
     Радуйся, слепым зрение и всем болящим исцеление подаваяй.
     Радуйся, сокровище дарований божественных;
     Радуйся, яко ходатайством твоим даров Духа Святого, укрепляющих в брани против врагов спасения, сподобляемся.
     Радуйся, яко крин неувядаемый, в пустыни явился еси;
     Радуйся, цвете, благоуханием своим вся исполняяй.
     Радуйся, реки воды живыя источаяй;
     Радуйся, верных Господа рабов благую часть избравый.
     Радуйся, Макарие, предивный чудотворче.

Кондак 9
     Егда преставился еси от земли к небесным обителем, лики Ангелов и избранных Божиих радостно сретоша тебе, с ними же ты выну вопиеши к Богу: Аллилуиа.

Икос 9
     Егда приближися время преставления твоего по Божию смотрению, ты, преподобне, пришел еси в град Унжеск, идеже исполнь дней и богоугождения, святую душу твою предал еси в руце Божии. Абие исполнися чуднаго благоухания весь град, и окрестнии людие обоняху благоухание дивное, аки от фимиама и смирны исходящее. Вси удивляющеся, яко аще Господь Бог почтил есть преставление тебе, угодника Своего, прославляху Господа Бога. Стечеся к нетленному и благоухающему телу твоему множество народа, и со свещьми и со псалмы несоша е в пустынную обитель, идеже погребоша честно и вопияху ти:
     Радуйся, Господу до конца послуживый;
     Радуйся, кончину свою предуведевый.
     Радуйся, к сонму избранных Божиих сопричтенный;
     Радуйся, воздаяние от Бога по правым делом твоим восприявый.
     Радуйся, с пророки водворивыйся;
     Радуйся, со апостолы вселивыйся.
     Радуйся, венцем нетленным увенчанный;
     Радуйся, яко Господа Бога со всеми святыми о нас грешных умоляеши.
     Радуйся, на браце Небеснаго Жениха быти достоин явльшийся;
     Радуйся, тленную жизнь на нетленную пременивый.
     Радуйся, угодниче Христов, блаженству тезоименитый;
     Радуйся, в радость Господа твоего вшедый.
     Радуйся, Макарие, предивный чудотворче.

Кондак 10
     Спасти хотяй вся, Господь Бог исполняет Своими великими дарованиями избранных рабов Своих, да их чудесами, молитвами и равноангельным житием мы возбуждаемся от жизни греховныя к жизни святей, воспевая выну Ему: Аллилуиа.

Икос 10
     Стена и помощник явился еси, блаженно Макарие, всем прибегающим к тебе; темже и нам, призывающим тя, буди заступник, избавляя ны от искушений, скорбей и напастей, да восхваляем тя, зовуще:
     Радуйся, яко твоими молитвами от грехов, падений, страстей и злых обычаев воздвигаеши нас грешных;
     Радуйся, яко присно возбуждаеши нас к подражанию твоему святому житию.
     Радуйся, истиннаго покаяния наставниче;
     Радуйся, обличителю немолчный нерадящим о вечном спасении.
     Радуйся, о всех верных, притекающих к тебе, предстателю;
     Радуйся, на невидимая и видимая враги поборниче.
     Радуйся, в бедах, напастех и нуждах душевных и телесных утешение и помощь подаваяй;
     Радуйся, от смертоносныя язвы избавляяй.
     Радуйся, нашествие сопротивных отгоняяй;
     Радуйся, пламень, губящий град, погашаяй.
     Радуйся, ум и смысл врагов помрачаяй;
     Радуйся, любящия Отечество и благочестивыя цари на победу умудряяй.
     Радуйся, Макарие, предивный чудотворче.

Кондак 11
     Пение благодарственное Господу Богу, в Троице покланяемому и славимому, приносим, яко даровал нам в тебе, преподобне отче Макарие, теплаго молитвенника, скораго помощника и дивнаго чудотворца, воспевающе Ему: Аллилуиа.

Икос 11
     Светоприемна светильника яви тя Господь Бог, преподобне Макарие, егда обретены быша честныя мощи твоя, благословенныя нетлением, благоухание испущающия и чудесами окрестныя страны озаряющия; темже вси радующеся, вопием ти:
     Радуйся, яко и по смерти жив пребывавши, являя в себе силы божественныя;
     Радуйся, чудесы твоими землю наполняя.
     Радуйся, яко благочестивую жену от плена агарянскаго свободил еси;
     Радуйся, яко немому уста отверзл еси.
     Радуйся, яко покаявшемуся во грехах зрение возвратил еси;
     Радуйся, яко разслабленному здравие даровал еси.
     Радуйся, яко многи слепыя и немощствующия исцелил еси;
     Радуйся, яко верныя люди от нападения ляхов избавил еси.
     Радуйся, яко молитвами твоими врази, нападшии с оружием на обитель твою, слепотою поражени и страхом смятени быша, и мнози в реце потопиша;
     Радуйся, ограждаяй выну обитель твою от бед и зол.
     Радуйся, отчаянных надеждо и помоще;
     Радуйся, от Бога просимая тобою приемляй.
     Радуйся, Макарие, предивный чудотворче.

Кондак 12
     По пленении и опустошении Желтоводския обители от агарян летом многим прешедшим трикраты явился еси некоему иноку богоугодну Аврамию, повелевая, да идет в Желтоводскую пустыню и вселится на месте, идеже бе обитель. Инок Аврамий водворися ту и ходи в обитель Унжескую, идеже икону твою списав, принесе ю на благословение, и начаша бывати чудеса от сея честныя иконы. Темже мы вопием прославльшему тя Богу: Аллилуиа.

Икос 12
     Поюще знамения и чудеса, яже твориши живущею в тебе благодатию Божиею, блаженне Макарие, восхваляем тя сице:
     Радуйся, яко и по преставлении твоем возставил еси запустевшую обитель твою;
     Радуйся, яко паки собрал еси ищущих спасения и обновил еси божественную хвалу.
     Радуйся, яко святое место, тобою любезне избранное, не оставляти заповедал еси Аврамию;
     Радуйся, яко тобою монахов множество в подвизех и скорбех своих укрепление приемлют.
     Радуйся, яко обители, тобою созданныя, молитвами твоими, аки покровом, покрываются;
     Радуйся, стране сей и Отечеству нашему украшение.
     Радуйся, надеждо и прибежище в мори жития сего плавающих;
     Радуйся, твердое ограждение усердно работающих Господу Богу.
     Радуйся, царем благочестивым помоще;
     Радуйся, патриархов и святителей утешение.
     Радуйся, всех, усердно притекающих к тебе, от искушений и бед скорое избавление;
     Радуйся, яко ходатайством твоим вернии жизнь вечную получают.
     Радуйся, Макарие, предивный чудотворче.

Кондак 13
     О преподобне и богоносне отче наш Макарие! Приими сие малое молитвенное приношение наше и со Пресвятою Владычицею Богородицею и всеми святыми принеси молитву к Господу Богу, да избавит нас от враг видимых и невидимых, от всяких скорбей и бед, от напрасныя смерти и от будущих мук, и сподобит Своего Небеснаго Царствия, идеже вси, присно веселящеся и торжествующе, немолчно вопиют к Богу: Аллилуиа.
Этот кондак читается трижды, затем икос 1-й и кондак 1-й

Молитва преподобному Макарию Желтоводскому и Унженскому
     О преподобне и Богоносне отче наш Макарие! Веруем, яко ты, предстоя престолу Пресвятыя Троицы, велие имаши дерзновение в молитвах ко Всемилостивому Господу Богу, иже всегда послушает тебе, вернаго раба и угодника Своего. Сего ради со умилением смиренно припадаем к тебе, святче Божий, не премолчи о нас молитися ко Господу Богу, в Троице покланяемому и славимому, да милостиво призрев на ны, не попустит нам погибнути во гресех наших, но да возставит падших, да подаст исправление злому и окаянному нашему житию, от грядущих грехопадений восхищая, и да простит нам вся, елика сами собою или чрез других кого, согрешихом мыслию, словом и делом, от рождения до сего часа. Ты, подвижниче добродетелей, отче наш Макарие, веси немощь естества нашего и тяжесть и скорбь, времен настоящих, моли убо выну Господа Бога, да николиже нас оставляет Его неизреченное милосердие, но да хранит нас от мирских искушений, от диавольских сетей и от плотских похотей, да приимем от Господа Бога тобою и вся потребная к жизни временней, освобождение от бед и напастей, а среди их неослабное терпение до конца. Испроси нам у Господа Бога в мире и покаянии скончати живот наш и невозбранно преити от земли на Небо, мытарств же и бесов воздушных и вечныя муки избавитися и сподобитися Царства Небеснаго, с тобою и со всеми святыми, угодившими Господу Богу и Спасителю нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым, и Благим, и Животворящим Его Духом, ныне и присно и во веки веков. Аминь.

Молитва иная
     Преподобне и Богоблаженне отче наш Макарие! Светильниче всемирный, монахов и подвижников удобрение, Галичския страны и всея Российския земли заступниче! Неусыпаемый и теплый за ны, грешныя, молитвенниче ко Всемилостивому Спасу нашему и Богу Иисусу Христу и ко Пресвятей и Пречистей Матери Его Владычице нашей Богородице и Приснодеве Марии! Молим твою всечестную святыню, недостойнии ученицы твои, не забуди ны, смиренныя чада твоя, но яко чадолюбивый отец, посещай духом присно душ наших немощь. И испроси молитвами твоими у Христа Бога нашего, яко да освятит души наша и телеса, и просветит наш ум и разум, и очистит совесть нашу от всякия скверны, и от нечистых помыслов, и лукавых умышлений, и вредных разумений, и губительнаго уныния, и избавит нас от всяких демонских непрестанных наветов же и озлоблений дневных и нощных. Даруй же нам искреннее покаяние, сокрушение сердцу, слезы и умиление, воздержание и трезвость, смиренномудрие, кротость же и безмолвие, и чистоту душевную и телесную, нищелюбие же и страннолюбие, и нелицемерную друг ко другу любовь и милосердие, и всякое иноческое благоговение. О всеблаженне отче наш Макарие, сподоби ны последовати, по силе нашей, святому твоему и равноангельному житию! Яко да всемилостивым предстательством Преблагословенныя и Препрославленныя Приснодевы Марии Богородицы, Небесныя Царицы, христианския заступницы и покровительницы, и твоими святыми молитвами Преблагий Христос Бог наш покажет на нас, грешных рабех Своих, благодать и милость Свою, и настоящих зол и будущих мук вечных свободит нас, и сподобит ны наследники быти Царствия Своего Небеснаго, славящих и величающих Его купно со Безначальным Его Отцем и Пресвятым, и Благим, и Животворящим Его Духом, ныне и присно и во веки веков. Аминь.

Тропарь преподобному Макарию Желтоводскому и Унженскому
Тропарь, глас 5:
     Днесь град твой Галич тобою хвалится, в концех 6о его пресветло, яко велие солнце, возсиял еси и чудесы твоими, преподобне Макарие, вся озарил еси. И ныне молися Господеви избавитися душам нашим от прелести вражия и спастися граду твоему от поганскаго наития.

Ин тропарь, глас 4:
     Богомудрый Желтоводския обители первоздателю, Богопоставленный монашескаго жития столпе, благописанный досточуднаго постничества образе, Богозданный Духа Святаго сосуде, златозарное Русския земли светило всесветлое, молим тя, отче Макарие, светозарною молитв твоих лучею разрешай мрачных страстей наших облак.

Кондак, глас 2:
     Вторый Моисей явился еси, преподобне: он бо жезлом море раздели, ты же страсти, яко Амалика, победил еси, и непроходную пустыню немятежным умом прошел еси, в нейже молитвами твоими велие чудо сотворил еси, гладныя люди до изобилия прекормил еси. И ныне молися Господеви подати всем печальным утешение, Макарие, отче приснопамятне, иже Галичестей стране и всей Российстей земли похвала и утверждение.

Величание
     Ублажаем тя, преподобне отче Макарие, и чтим святую память твою, наставниче монахов и собеседниче ангелов.

Акафисты zvonnitsa.ru/orthodoxy/akafisti/290/13348/

Кондак 1
     Избранный и дивный подражателю пророков Илии и Крестителя, пустынным житием им поревновавый и совершенно Богу угодивый, преподобне отче Макарие. Песньми восхваляем тя с любовию, святаго заступника нашего. Ты же, яко имеяй дерзновение ко Господу, молися непрестанно о спасении нас грешных, и от всяких бед свобождай зовущих ти:
     Радуйся, Макарие, великий пустынножителю.

Икос 1
     Ангелом любезную чистоту юности твоея возлюбив, преподобне отче Макарие, Ветхий Рим отечество твое оставил еси, и во страну Российскую яко нищ и странен пришел еси, да зде обрящеши пристанище благоприятное ко спасению. Темже славим тя, яко истиннаго последователя Христова, и зовем ти хвалебно:
     Радуйся, Рима доброе прозябение.
     Радуйся, Новаграда духовное украшение.
     Радуйся, Евангелиа Христова верный послушателю.
     Радуйся, заповедей Иисусовых ревностный исполнителю.
     Радуйся, Единаго Христа от всея души твоея возлюбивый.
     Радуйся, стезею правою вослед Его ходивый.
     Радуйся, постом умертвивый в себе душетленныя страсти.
     Радуйся, молитвами усердными отразивый вся искушения диавольская.
     Радуйся, возшедый на высоту совершенства духовнаго.
     Радуйся, приникий во глубину смирения святаго.
     Радуйся, слез твоих теченьми уплодоносивый пустыню неплодную.
     Радуйся, из глубины воздыханьми привлекий на ню Божию благодать.
     Радуйся, Макарие, великий пустынножителю.

Кондак 2
     Видев Всевидец Господь благое души твоея изволение, отче Макарие, еже служити и благоугождати Ему в безмолвии пустыннем, указа тебе пустыню блатную и непроходимую в пределех Великаго Новаграда, да вселишися тамо, един Единому Богу работати в пениих, бдениих и пощениих. Ты же пустыню, от Бога тебе указанную, обрет, вселился еси в ней, яко в раи сладости зовый: Аллилуиа.

Икос 2
     Разумев место, от Бога тебе указанное к совершению тамо подвигов пустынных, и возлюбив е, отче Макарие, со слезами теплыми Богу молился еси, да сподобит тя скончати на нем житие твое земное, и псаломски взывал еси: «Се покой мой, зде вселюся во век». Мы же воспоминающе таковое твое благое изволение, вопием ти сице:
     Радуйся, безмолвия любителю, пустыню подвиги твоими освятивый.
     Радуйся, жестокое пустынное житие проходивый.
     Радуйся, псалмопении немолчными Бога славивый.
     Радуйся, молитвы непрестанныя Господеви возносивый.
     Радуйся, постниче не изнемогаяй, былием пустынным питавыйся.
     Радуйся, трудолюбче нелицемерный, праздность возненавидевый.
     Радуйся, худыя и многошвенныя ризы носивый.
     Радуйся, вериги железныя Христа ради на ся возложивый.
     Радуйся, коленопреклонения многая совершавый.
     Радуйся, в терпении и смирении преуспеявый.
     Радуйся, слезами молитвенными орошенный.
     Радуйся, равноангелен на земли бывый.
     Радуйся, Макарие, великий пустынножителю.

Кондак 3
     Силою Божиею укрепляемь, Макарие преподобне, великия подвиги и труды пустынныя благодушно проходил еси, и вся страхования и искушения диавольская молитвою усердною отразил еси, знамением креста Христова враги невидимыя прогоняя и побеждая, во еже не можащи им приближитися к тебе, егда пел еси Богу хвалебную песнь: Аллилуиа.

Икос 3
     Имея помысл чист и непорочну душу, отче Макарие, в пустыннем безмолвии видений небесных сподобился еси, и ангелов собеседник был еси, иже утешении благодатными услаждаху тебе скорби пустыннаго пребывания. Сего ради слышиши от нас благохваления таковая:
     Радуйся, рабе Господень благий и верный.
     Радуйся, молитвенниче благоприятный и многослезный.
     Радуйся, ангельскаго посещения удостоенный.
     Радуйся, на земли небесная созерцавый.
     Радуйся, учителю благочестия.
     Радуйся, наставниче богомудрия.
     Радуйся, древо благосеннолиственное, в пустыни возрастшее.
     Радуйся, плоды сладкия Христу принесый.
     Радуйся, пустыню уплодоносивый.
     Радуйся, пустынное озлобление мужески терпевый.
     Радуйся, путем тесным шествовавый.
     Радуйся, пространство Царствия Божия обретый.
     Радуйся, Макарие, великий пустынножителю.

Кондак 4
     Бурю многомятежную житейскаго моря безбедно прешел еси, преподобне отче Макарие, и во пристанище безстрастия достигл еси, направляемь заповедьми Христа Бога, яже быша светильник ногама твоима и свет стезям твоим. Темже на земли достойно и праведно воспевал еси Триединому Богу: Аллилуиа.

Икос 4
     Слышавше глаголы твоя богодухновенныя, ловцы зверей дивиих, обретшии кущу твою в пустыни, отче Макарие, ангела паче, неже человека, мняху тя быти, и радовахуся зело, сподобльшеся твое благословение и молитвы получити. Ты же хлеб твой сухий с ними разделил еси, и путь им правый указав, слышал еси от них благодарственныя глаголы сицевыя:
     Радуйся, правило веры истинныя.
     Радуйся, образе кротости духовныя.
     Радуйся, человече Божий, преподобием украшенный.
     Радуйся, воине Христов, враги невидимыя победивый.
     Радуйся, мира дольняго мудрый странниче.
     Радуйся, пустыннолюбивый Господень избранниче.
     Радуйся, великих пустынножителей верный подражателю.
     Радуйся, древних богоносных отец ревностный последователю.
     Радуйся, пустыню непроходимую в жилище себе избравый.
     Радуйся, дебрь блатную славословии Божиими огласивый.
     Радуйся, богопросвещенный подвижниче.
     Радуйся, ангелонравный человече.
     Радуйся, Макарие, великий пустынножителю.

Кондак 5
     Боготечное светило быв, отче Макарие, к солнцу правды Христу приводил еси человеки, приходившыя к тебе в пустыню послушати от тебе глаголы жизни вечныя. Ибо дадеся тебе от Господа благодать поучения духовнаго, и бысть язык твой яко трость книжника скорописца, начертаваяй на сердцах человеческих спасительныя заповеди Христа Бога, Емуже умиленно пел еси: Аллилуиа.

Икос 5
     Видев люди, приходившыя к тебе в пустыню, отче Макарие, церковь тамо во имя Пресвятыя Богородицы, честнаго и славнаго Ея Успения, соорудил еси. И обитель иноческую устроил еси, таже священства благодать восприем, игумен тоя обители был еси, приводяй братию твою пустынную ко спасению. О сем тя хвалим и зовем:
     Радуйся, непорочный олтаря Господня служителю.
     Радуйся, Таинств Божественных достойный совершителю.
     Радуйся, преподобнии руце твои со дерзновением горе воздеявый.
     Радуйся, молитвы благоумиленныя у престола Божия приносивый.
     Радуйся, пастырю добрый собраннаго тобою стада пустынных овец.
     Радуйся, неусыпный делателю винограда Христова.
     Радуйся, сотворивый и научивый, и того ради велий нареченный во Царствии Небеснем.
     Радуйся, отечески возлюбивый всю о Христе братию твою.
     Радуйся, учивый благовременно чада твоя духовная богоугождению истинному.
     Радуйся, бывый образе преподобия твоим учеником.
     Радуйся, имя Господа Иисуса во устех и в сердце твоем непрестанно имевый.
     Радуйся, скорби и лишения пустынныя радостно терпевый.
     Радуйся, Макарие, великий пустынножителю.

Кондак 6
     Проповедник был еси евангельскаго учения братии твоей, преподобне отче Макарие, и чада твоя духовная верно руководил еси к Царствию Небесному, идеже есть жилище всех спасенных милосердием Христа Бога, пришедшаго в мир спасти падшее человечество и давшаго людем во спасение Своя божественныя заповеди, имже последовав, соделался еси истинный Его угодник, немолчно воспевая Ему песнь хвалы и благодарения: Аллилуиа.

Икос 6
     Возсиял еси в пустыни светом благоразумия, отче Макарие, и дебрь блатную и неудобопроходимую во училище благочестия претворил еси богомудрыми твоими словесы, имиже приходившыя к тебе верно наставлял еси на стезю богоугождения и спасения. Тебе убо, святому учителю небесныя истины, благодарно зовем:
     Радуйся, Евангелиа Христова немолчный проповедниче.
     Радуйся, апостольских преданий ревностный хранителю.
     Радуйся, верою правою и делы благими Богу угодивый.
     Радуйся, вослед тебе и чада твоя духовная к Нему приведый.
     Радуйся, не сокрывый таланта, тебе врученнаго Домовладыкою.
     Радуйся, куплю многу им сотворивый, спасение душ человеческих.
     Радуйся, пустыню облагоухавый сладким благоуханием Христовым.
     Радуйся, в ней насадивый духовныя цветы добродетелей.
     Радуйся, яко твоими ученьми грешнии к Богу в покаянии обратишася.
     Радуйся, яко твоими наставленьми заблуждшии правый путь спасения обретоша.
     Радуйся, ближних твоих искренно возлюбивый.
     Радуйся, спасению их душевному усердно послуживый.
     Радуйся, Макарие, великий пустынножителю.

Кондак 7
     Хотение имел еси, преподобне отче Макарие, еже Богу благоугождати и спасению душевному ближних твоих благочестно служити. Темже всех приходивших к тебе приимал еси с любовию, и яко кормчий добрый, утомленныя треволнением житейскаго моря приводил еси в тихое пристанище пустыннаго иноческаго жития, поучая их сердцем и усты немолчно возглашати Богу: Аллилуиа.

Икос 7
     Новаго тя Макариа Великаго, наставника душеспасительнаго, яви Христос во стране Российстей, преподобне отче, и дивными дары Божия благодати обогати тебе, душевныя ради твоея чистоты и многия святости: дадеся бо ти свыше благодать чудотворения и прозорливства, и был еси пророк и врач безмездный людем, иже научишася звати тебе:
     Радуйся, крине пустыннаго прозябения.
     Радуйся, маслино Божия благословения.
     Радуйся, пустыню духовно уплодоносивый.
     Радуйся, обитель иноческую в ней возградивый.
     Радуйся, чада послушания и смирения в ней населивый.
     Радуйся, отец истинный учеником твоим бывый.
     Радуйся, болящыя молитвою твоею исцеливый.
     Радуйся, скорбящыя словесы твоими богомудрыми утешивый.
     Радуйся, будущая яко настоящая созерцавый.
     Радуйся, помышления человеческая прозревавый.
     Радуйся, древним пророком равночестный.
     Радуйся, даров Святаго Духа преисполненный.
     Радуйся, Макарие, великий пустынножителю.

Кондак 8
     Странник и пришлец был еси во стране Российстей, преподобне отче Макарие, непрестанно взыскуяй Отечества Горняго, Иерусалима Небеснаго. Темже всякое попечение о земнем стяжании отложил еси, и в крайней нищете жизнь твою провождал еси, да обогатишися нетленным златом от праведнаго Мздовоздателя Христа Бога, Емуже присно пел еси: Аллилуиа.

Икос 8
     Весь в Бозе быв, преподобне отче Макарие, во глубочайшую пустыню от обители твоея удалился еси, и на острове посреде блата кущу себе поставив, в безмолвии совершеннем молитвами непрестанными с Богом беседовал еси, мшиц угрызение и пустынное озлобление мужественно терпя. Поминающе убо таковое твое терпение и злострадание, яко мучеников сострадальца чествуем тя звании сими:
     Радуйся, безстрастие совершенное стяжавый.
     Радуйся, безмолвия ненарушимаго возжелевый.
     Радуйся, молитвы непрестанныя возлюбивый.
     Радуйся, образ злострадания и долготерпения себе явивый.
     Радуйся, тело твое мшиц угрызением уязвивый.
     Радуйся, нищелюбец крайний бывый.
     Радуйся, блаженство нищих духом унаследивый.
     Радуйся, о едином на потребу всегда помышлявый.
     Радуйся, на земли небесно поживый.
     Радуйся, во плоти безплотным поревновавый.
     Радуйся, мучеников сострадальче.
     Радуйся, преподобных красото.
     Радуйся, Макарие, великий пустынножителю.

Кондак 9
     Всем приходившым к тебе в пустыню, преподобне отче макарие, бысть дивно видети тя, в раздранней и многошвенней ризе ходившаго, вериги тяжкия на раменах носившаго и в месте блатнем уединенно пребывавшаго, вне всякаго человеческаго утешения. Обаче ты вся приходившыя со светлым лицем и любовию отеческою приимал еси, богатыя и убогия, вельможи и простыя, и коемуждо слово душеполезно изрекал еси, увещавая их благоугождати Богу верою правою и делы благими и звати Ему: Аллилуиа.

Икос 9
     Витии премудрыя превозшел еси благодатным действом словес твоих, преподобне отче Макарие, зане теми грешныя на покаяние приводил еси, кающыяся уцеломудрил еси, подвизающыяся в добродетели укрепил еси, и всем путь спасительный ко Христу показал еси, по немуже сам неуклонно шествовал еси до блаженныя твоея кончины, достоин воистинну явився похвал таковых:
     Радуйся, написавый на скрижалех сердца твоего закон Христов.
     Радуйся, провозвестник его ближним твоим бывый.
     Радуйся, яко быша словеса твоя меда сладчайша жаждавшым учения духовнаго.
     Радуйся, яко твоими наставленьми спасошася мнози.
     Радуйся, из глубины пустыни светивый миру.
     Радуйся, от дебри блатныя возсиявый зарею благоразумия.
     Радуйся, Российския страны благодатное озарение.
     Радуйся, Новаграда духовное просвещение.
     Радуйся, главо святая, благодатию Божиею осененная.
     Радуйся, источниче обильный учения душеспасительнаго.
     Радуйся, проповедниче сладкоглаголивый, вещавый словеса жизни вечныя.
     Радуйся, уготовавый ученьми твоими Господеви подвижники совершенныя.
     Радуйся, Макарие, великий пустынножителю.

Кондак 10
     Спасения надежду стяжал еси при исходе твоем, преподобне отче Макарие, и якоже пшеница зрелая, во время пожатая, кончиною святою преселился еси от земли во обители горния, прияти мзду от руки праведнаго Мздовоздателя Христа, Иже вчини душу твою со святыми, немолчно возглашающими пред Престолом Славы Его победную песнь: Аллилуиа.

Икос 10
     Царя Небеснаго Христа верный раб и угодник был еси, преподобне отче Макарие. Темже и доныне место пустынное твоих подвигов ясно свидетельствует о твоем богоугождении, яко ты со Христом во обителех блаженства вечнаго водворяешися, благоухание чудное испущая от честнаго твоего гроба. Сего ради вопием ти:
     Радуйся, радостно предавый душу твою в руце Божии.
     Радуйся, святую кончину получивый в возмездие трудов твоих.
     Радуйся, благоухание сладостное испустивый от мертваго твоего телесе.
     Радуйся, сие благоухание и доныне испущаяй верным от честнаго твоего гроба.
     Радуйся, мощами твоими в пустыни твоей погребенный.
     Радуйся, душею безсмертною в Сионе Горнем водворенный.
     Радуйся, в недрех земных смиренно почиваяй.
     Радуйся, от раки твоея преславно исцеления источаяй.
     Радуйся, чудесы многими прославленный.
     Радуйся, сострадания к людем преисполненный.
     Радуйся, благий целебниче недугов душевных и телесных.
     Радуйся, небесный заступниче с верою к тебе притекающих.
     Радуйся, Макарие, великий пустынножителю.

Кондак 11
     Пение Пресвятей Троице горе приносиши, преподобне отче Макарие, и присно ходатайствуеши за люди, молитвенно тя почитающыя, прося им мира свыше и благопоспешения во всем благом. Молися, угодниче Божий, и за нас смиренных и грешных, подвиги твоя хвалебно воспоминающих и имя твое святое в помощь призывающих, да не лишени будем наследия небеснаго и пения со святыми: Аллилуиа.

Икос 11
     Светильника тя благодатнаго вемы, преподобне отче Макарие, и прославляем прославльшаго тя Господа, Иже чудесы многими гроб твой ознаменова. Струи бо исцелений благодатных источаеши верным, во еже вопити тебе:
     Радуйся, земный ангеле.
     Радуйся, небесный человече.
     Радуйся, безмезднаго врачевания источниче.
     Радуйся, милости духовныя подателю.
     Радуйся, мироположнице благоухания Христова.
     Радуйся, услаждаяй душы наша вонею сладкою от святаго твоего гроба.
     Радуйся, скорбящих утешителю.
     Радуйся, болящих целителю.
     Радуйся, в сониих и видениих верныя посещаяй.
     Радуйся, пустыню твою чудесы прославляяй.
     Радуйся, смирением высокая стяжавый.
     Радуйся, дерзновение многое ко Господу получивый.
     Радуйся, Макарие, великий пустынножителю.

Кондак 12
     Благодать от Господа испроси нам, преподобне отче Макарие, почитающым с любовию святую память твою и усердно притекающым к честней раце мощей твоих святых, от неяже чудесная исцеления подаеши недужным. Темже прилежно молимся тебе: исцели наша недуги душевныя и телесныя, и помози нам предстательством твоим спасение вечное получити, да вкупе с тобою воспоем Дивному во святых Своих Богу: Аллилуиа.

Икос 12
     Поюще подвиги твоя пустынныя, преподобне отче Макарие, ублажаем равноангельное житие твое, имже поучаеши нас ко славословию Христа Бога, явившаго тя чудотворца преславна. Темже припадающе к раце мощей твоих, умильно глаголем:
     Радуйся, Пресвятыя Троицы верный угодниче.
     Радуйся, Пресвятыя Богородицы усердный славителю.
     Радуйся, ангельских ликов собеседниче.
     Радуйся, всех святых сожителю.
     Радуйся, пустынножителей славо и похвало.
     Радуйся, Российския Церкве духовная лепото.
     Радуйся, пустыни твоея сокровище благодатное.
     Радуйся, недугующих врачевство Богом дарованное.
     Радуйся, приходящих на поклонение мощем твоим святым благий предстателю.
     Радуйся, почитающих святую память твою небесный покровителю.
     Радуйся, душ и телес наших целебниче.
     Радуйся, преславный и предивный чудотворче.
     Радуйся, Макарие, великий пустынножителю.

Кондак 13
     О преподобне и богоносне отче Макарие! Вонми милостивно гласу моления нашего, и приими сие малое похвальное пение, с верою и любовию тебе приносимое от нас недостойных, и умоли Господа и Владыку нашего, избавити нас от погибели вечныя и сподобити блаженства святых, вопиющих Ему вечно хвалебную песнь: Аллилуиа.
Этот кондак читается трижды, затем икос 1-й и кондак 1-й

Молитва святому преподобному Макарию Римлянину, Новоградскому чудотворцу
     О священная главо, земный ангеле и небесный человече, преподобне и богоносне отче Макарие! Припадаем ти с верою и любовию и молимся прилежно: яви нам смиренным и грешным святое твое заступление. Се бо, грех ради наших, не имамы свободы чад Божиих просити о потребах наших Господа и Владыку нашего, но тебе молитвенника благоприятнаго к Нему предлагаем, и просим тя со усердием многим: испроси нам у благости Его благопотребныя дары душам и телесем нашым; веру праву, надежду спасения несомненну, любовь ко всем нелицемерну, во искушениих мужество, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и безмятежное житие, благую христианскую кончину и добрый ответ на Страшнем Суде Христове. Испроси, угодниче Божий, у Царя царствующих и Господа господствующих: страждущую страну Российскую от лютых безбожник и власти их да свободит, и да возставит престол православных правителей; верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш. Не забуди, преподобне отче, и пустынное место подвигов твоих, но благоволи о нем и прослави е чудотворении твоими: и всех, приходящих на поклонение мощем твоим святым, от искушений диавольских и всякаго зла милостивно избави. Ей, чудотворче святый! Не лиши нас помощи твоея небесныя, но молитвами твоими вся ны приведи во пристанище спасения, и наследники яви нас всесветлаго Царствия Христова, да поем и славим неизреченныя щедроты Человеколюбца Бога, Отца и Сына и Святаго Духа, и твое святое отеческое заступление, во веки веков. Аминь.

Тропарь святому преподобному Макарию Римлянину, Новоградскому чудотворцу
Тропарь, Глас 4:
     Рим Отечество твое оставив, в пустыню вселился еси, и тамо в пусте месте обрет жилище себе, отбегл еси суеты мира сего, и в безмолвнем пристанищи добре направлял еси себе ко Господу. Сего ради и мы чтущии тя, притекающе к раце мощей твоих и любезно тую облобызающе, молим тя, отче Макарие: моли о нас Господа, да помилует нас в день судный.

Кондак, Глас 7:
     От Рима возсиял еси, якоже звезда пресветлая, преподобне отче наш Макарие, и в пустыни вселився, просветил еси чистым житием твоим верно притекающия к тебе. Темже и мы, прославляюще светлую память твою, вопием ти: радуйся, преподобне отче Макарие.

Ин кондак, Глас 8:
     Якоже пресветлая звезда, от Рима возсиял еси, преподобне, и, Богом наставляемъ, Российскую страну светом чудес твоих озарил еси духовно, созывая верныя к мощем твоим, от нихже исцеления недужным подаеши. Темже молимся тебе: научи нас, отче, твоему богоразумию и уврачуй недуги наша душевныя и телесныя, да зовем ти: радуйся, преподобне отче Макарие.

Величание
     Ублажаем тя, преподобне отче Макарие, и чтим святую память твою, наставниче монахов и собеседниче ангелов.
 

Акафисты zvonnitsa.ru/orthodoxy/akafisti/290/13350/

Кондак 1
     Возбранный чудотворче, и изрядный угодниче Христов, многоцелебный источниче и молитвенниче о душах наших, преподобне отче Макарие, яко имеяй дерзновение ко ко Господу, молитвами твоими от всяких нас бед свободи, да зовем ти:
     Радуйся, Макарие, скорый помощниче и преславный чудотворче.

Икос 1
     Ангела тя земнаго и человека Небеснаго, преподобне отче Макарие, киими пении и песньми восхвалим, киими венцы увязем трудолюбивую главу твою, и киими словесы возвеличим многоболезненныя подвиги твоя; темже благоговейно притекающе к раце многоцелебных мощей твоих, усердно припадающе, со умилением взываем ти:
     Радуйся, ревностный Христов подражателю.
     Радуйся, заповедей его истинный блюстителю.
     Радуйся, ангелов собеседниче.
     Радуйся, преподобных похвало.
     Радуйся, верных слуге Господень.
     Радуйся, усердный чистоты и воздержания хранителю.
     Радуйся, столпе терпения.
     Радуйся, образе незлобия и кротости.
     Радуйся, смиренномудрия наставниче.
     Радуйся, светильниче многосветлый.
     Радуйся, непостыдное христиан прибежище.
     Радуйся, безмездный врачу немощствующих.
     Радуйся, Макарие, скорый помощниче и преславный чудотворче.

Кондак 2
     Видяще благороднии твои родителие во младости тя, богомудре, совершенная мудрствующа, Господу, даровавшему ти таковая, воспеваху благодарственную песнь: Аллилуиа.

Икос 2
     Разум неуклонный имел еси, преподобне Макарие, аще и юн быв телом, но стар сый умом: вся бо мира сего красная от юности твоея пренебрег, детская игралища презрел еси, псалмы же и песни духовныя Богу Спасителю сердцем и усты непрестанно воспевал еси, научи и нас таяжде мудрствовати и деяти, вопиющих ти:
     Радуйся, христианския мудрости истинное зерцало.
     Радуйся, яко божественному желанию ум твой от юности вперил еси.
     Радуйся, яко во младости твоей временная и земная уметы быти вменил еси.
     Радуйся, яко единая небесная от сосцу матере твоея возлюбил еси.
     Радуйся, яко от юности ярем Господень на рамена своя возложил еси.
     Радуйся, яко плоть поработил еси духу.
     Радуйся, яко противу кознем диавольским, еще юн сый, стати не устрашился еси.
     Радуйся, яко от младенчества чтения Божественных Писаний всем сердцем возлюбил еси.
     Радуйся, яко день и нощь в чтении и пении богодухновенных псалмов пребывал еси.
     Радуйся, яко неплененный страстьми ум твой словом Божиим просветил еси.
     Радуйся, яко Христа еще в невинней души твоей вселил еси.
     Радуйся, яко непорочным сердцем возжелел мирскаго мятежа уклонитися, и в пустыню вселитися.
     Радуйся, Макарие, скорый помощниче и преславный чудотворче.

Кондак 3
     Силою Духа Святаго свыше облечен быв, и юности твоей безсильна врага сотворил еси: укрепи, Богоблаженне Макарие, молитвами твоими и нас, во всех благих изнемогающих, да сподобимся с тобою воспевати выну песнь Богу: Аллилуиа.

Икос 3
     Имея богатство чистоты душевныя, и высоту смирения, родительское богатство и рабов послужение ни во что же вменил еси, и по разрешении плотскаго соуза, имже на малое время связан был еси, яко елень жаждущий на источники водныя, устремился еси, всеблаженне, в пустыню: в нейже твое высокородство на смиренномудрие, богатство на убожество пременил еси, совлекийся одежды многосветлыя и облекийся в рубище. Темже удивляющеся таковому твоему смиренномудрию, сице ублажаем тя, вопиюще:
     Радуйся, всяку гордость мира презревый.
     Радуйся, яко оставив временная, взыскал еси вечная.
     Радуйся, яко дом велелепный и чертоги украшенны возненавидел еси.
     Радуйся, яко возлюбил еси убогую хижину паче чертогов преизящных.
     Радуйся, яко рубищи украсился еси паче одежды златотканныя.
     Радуйся, яко вместо брашен сластопитательных, возлюбил еси изнуряти плоть твою постом и многим воздержанием.
     Радуйся, яко не пожелал еси от рабов послужения, но паче сам послужити всем изволил еси.
     Радуйся, яко возлюбил еси паче одра мягкаго на земли повержение.
     Радуйся, яко верою правою, аки щитом, защитился еси от всех искушений вражиих.
     Радуйся, яко неистощимым терпением твоим, паче копия острейшим, врага нашего спасения смертельно уязвил еси.
     Радуйся, яко неусыпными твоими молитвами, запинателя на пути благочестия безсильна сотворил еси.
     Радуйся, яко столпе и утверждение добродетели нам явился еси.
     Радуйся, Макарие, скорый помощниче и преславный чудотворче.

Кондак 4
     Бурю сумнительных помышлений укрощая и пролагая в тишину Божественными учении, имиже уверяя себе, яже о Царствии Небеснем, преблаженне Макарие, непрестанно воспевал еси песнь Богу: Аллилуиа.

Икос 4
     Слышав преподобне Макарие в Евангелии глас Спасителя взывающ: иже хощет по Мне ити, отвержется себе, и возмет крест свой, и по Мне грядет, отверглся еси себе, и взем на рамо крест твой, ходил еси по стопам Христовым невозвратно. Темже мы, недостойнии, восписуем ти таковая, глаголюще:
     Радуйся, евангельских велений верный блюстителю.
     Радуйся, Христовых словес твердый хранителю.
     Радуйся, креста своего усердный носителю.
     Радуйся, иго Христово и бремя Его благодушно подъемый.
     Радуйся, яко не обративыйся вспять в шествии к Горнему Иерусалиму.
     Радуйся, неизсякаемый сосуде благодати Христовы.
     Радуйся, чистое приятелище Духа Святаго.
     Радуйся, яко вся страсти плотския воздержанием многим умертвил еси.
     Радуйся, вертограда Христова всеусердный насадителю.
     Радуйся, яко ум твой к безстрастию возвысил еси.
     Радуйся, вся благая земли, Небеснаго ради Царствия, за уметы вменивый.
     Радуйся, равноангельное житие до конца возлюбивый.
     Радуйся, Макарие, скорый помощниче и преславный чудотворче.

Кондак 5
     Богом направляем, всеблаженне отче, безмолвное в пустыни житие обрел еси, и псаломски воспел еси: се покой мой в век века, зде вселюся: в нейже и подвизался еси добльственно в посте и бдении, и от очию многи слезы изливая, непрестанно воспевал еси Богу: Аллилуиа.

Икос 5
     Видев суетных имений рачитель неуклонное твое в пустыни пребывание, диавольским наущением возжигаемь, восхоте умертвити тя: но ради постигшия его смертныя болезни пришел в чувство, паде пред ногама твоима, прося у тебе прощения и в пустыни с тобою пребывания. Ты же яко пастырь добрый и незлобивый, приял еси его с радостию, яко овча погибшее, прощая ему вся и причитая его к избранному твоему стаду. Таковое убо твое незлобие, и о спасении заблуждших многое попечение слышавше, по долгу воспеваем ти сице:
     Радуйся, незлобия присный хранителю.
     Радуйся, смиренномудрия искренний любителю.
     Радуйся, образе кротости и терпения.
     Радуйся, наставниче целомудрия.
     Радуйся, светоносный столпе, просвещаяй сущия во тьме.
     Радуйся, обители иноков великое украшение.
     Радуйся, яко широкий путь, ведущий в пагубу, ненавидети поучал еси.
     Радуйся, яко тесною и прискорбною стезею шествовати благоискусно внушал еси.
     Радуйся, древо благоплодное, при исходищах вод Божественныя благодати насажденное, и многи питающее.
     Радуйся, древо благосеннолиственное, многи от зноя прохлаждающее.
     Радуйся, избраннаго твоего стада стражу неусыпный.
     Радуйся, благохотных подражателей твоих житием и учением на Небо руководителю и сопутствователю.
     Радуйся, Макарие, скорый помощниче и преславный чудотворче.

Кондак 6
     Проповедницы быша твоего незлобия и прозорливости татие, егда похищенная ими животная к тебе возвратиша, и вместо наказания прияша от тебе отеческое наставление, видевше же такое твое незлобие, со многим удивлением отшедше, воспеша песнь Богу: Аллилуиа.

Икос 6
     Возсиял еси в пустыни, яко заря пресветлая, преподобне отче, просвещая и наставляя на путь спасения вся к тебе притекающия, сего ради со многим удивлением взываем ти сице:
     Радуйся, заре пресветлая, от пустыни восходящая и души верных озаряющая.
     Радуйся, заблуждших истинный наставниче.
     Радуйся, целомудрия зерцало.
     Радуйся, истинный образе благочестия.
     Радуйся, алтаря Господня благоговейный служителю.
     Радуйся, иноческаго равноангельнаго жития ревнителю.
     Радуйся, безмолвия древних Богоносных отец подражателю.
     Радуйся, столпе огненный, наставляяй на путь спасения.
     Радуйся, солнце светозарное, яко своими лучами души наша, от мраза греховнаго погибающыя, согреваеши.
     Радуйся, луна пресветлая, яко нощь нашего неразумия прогоняеши.
     Радуйся, Божественнаго о людях промышления всеусердный служебниче.
     Радуйся, вечныя нашея радости теплый ходатаю.
     Радуйся, Макарие, скорый помощниче и преславный чудотворче.

Кондак 7
     Хотя разслабленный Захария совершенное получити себе здравие, моли принести себе и положити пред ногама твоима, преподобне отче, да твоими молитвами получит исцеление. Ты же яко врач премудрый, уврачевал недуги его телесныя вкупе же и душевныя, воспел еси Господу благодарственную песнь: Аллилуиа.

Икос 7
     Дивное имел еси житие, и дивныя чудеса сотворил еси на земли, преподобне отче Макарие, егда узрев единаго юношу, многое время бесом мучима, умилився прослезился еси, и воздохнув сотворил еси молитву к Богу: абие же изыде бес из страждущаго, и бысть здрав. Мы же таковая слышавше, с радостию взываем ти сице:
     Радуйся, лукавых духов крепкий победителю.
     Радуйся, душепагубных волков прогонителю.
     Радуйся, воине Христов непобедимый.
     Радуйся, рабе Божий, благий и верный.
     Радуйся, врачу скорый с верою тебе призывающих.
     Радуйся, лозо благоплодовитая.
     Радуйся, яко твоим пособием сокрушаются козни вражия.
     Радуйся, совоителю премудрый, ратующим противу сил адовых.
     Радуйся, неоскудный поток чудесем.
     Радуйся, обильный благодатию источниче исцелений.
     Радуйся, трисолнечнаго света пресветлая луче.
     Радуйся, человече Божий, преподобием и истиною, аки поясом златым, пропоясанный.
     Радуйся, Макарие, скорый помощниче и преславный чудотворче.

Кондак 8
     Дивное и неизреченное чудо благодати Небесныя, является ныне во очию всех верных: долготерпеливый бо и многомилостивый Господь не прогневался на ны до конца за беззакония наша, но, помянув щедроты Своя, дарова нам тебе, досточудне отче, заступника изрядна, и тако вознесе рог спасения нашего, да выну поем ему: Аллилуиа.

Икос 8
     Весь еси в вышних, но и нижних не оставлявши, преподобне отче Макарие, присно со Христом царствуеши, и о нас, грешных, молитвы к Нему возносиши: не точию бо припадающих к цельбоносным мощем твоим, но и далече отстоящих, призывающих же всечестное имя твое, предстательством твоим соблюдаеши от всякаго зла. Темже во умилении зовем ти:
     Радуйся, прибежище наше во всех скорбех.
     Радуйся, скорый помощнице всех в бедах сущих.
     Радуйся, целителю болезней душевных вкупе и телесных.
     Радуйся, на невидимыя враги наша сильный поборниче.
     Радуйся, посетителю благосердый в немощи лежащих.
     Радуйся, утешителю в печали сущих.
     Радуйся, яко тобою престает рыдание.
     Радуйся, яко тобою подается радование.
     Радуйся, яко Христу добльственно последовал еси.
     Радуйся, яко Сладчайшему Иисусу до конца послужил еси.
     Радуйся, яко наслаждаешися лицезрения Божия.
     Радуйся, яко сподобился еси зрети невечерний день Царствия Его.
     Радуйся, Макарие, скорый помощниче и преславный чудотворче.

Кондак 9
     Всякия скорби претерпел еси, и многи труды и подвиги добльственно совершил еси, шествуя по пути спасения до маститыя старости, облечен во всеоружие Божие, во плоти аки безплотен, умерщвляя страсти и сокрушая наветы миродержителя тьмы века сего, темже к Небесным сопричислен силам, купно с ними воспеваеши Богу: Аллилуиа.

Икос 9
     Ветия многовещанныя недоумеют достойно восхвалити тя, богомудре Макарие: кто бо доволен разумети вся борения твоя с миродержители тьмы века сего; или кто изочтет труды, болезни и подвиги твоя, в них же пустыннолюбное житие совершал еси; обаче мы, любовию твоею побеждаеми, благодарно тебе зовем:
     Радуйся, закона Божия исполнителю всеусердный.
     Радуйся, чистотою и целомудрием, многоценнаго бисера честнейший.
     Радуйся, в терпении и борении противу плоти, адаманта твердейший.
     Радуйся, смиренномудрием и кротостию паче славных земли прославленный.
     Радуйся, во плоти аки безплотен на земли поживый.
     Радуйся, живыми и спасительными слезами огнь похоти угасивый.
     Радуйся, борющимся со страстьми и похотьми помощниче благоуспешный.
     Радуйся, в трудех, бдении и воздержании великим постником подражателю ревностнейший.
     Радуйся, в духовней мудрости наставниче благоискуснейший.
     Радуйся, подвигов иноческих показателю рачительнейший.
     Радуйся, пустынножителей красото.
     Радуйся, горлице пустынолюбная и добровидная.
     Радуйся, Макарие, скорый помощниче и преславный чудотворче.

Кондак 10
     Храняй вся кости праведных, яко ни единей от них сокрушитися, Господь и Бог наш Иисус Христос явил нам твое тело нетленное на земли, преподобне отче, яко живоносную купель, врачующую всяку болезнь и всяку язю в людех. Темже приявше таковаго целебника и молитвенника, благодарственно вопием ему: Аллилуиа.

Икос 10
     Стену тя тверду и молитвенника изрядна стяжав святая обитель твоя, и вси страны Российстии хвалятся заступлением твоим. Темже и мы грешнии, яка чада отца молим: заступи и сохрани нас от искушений и скорбей, бед и напастей молитвами твоими, да взываем ти радостно:
     Радуйся, благовонный крине райскаго вертограда.
     Радуйся, кипарисе, верных сердца благовонием исполняяй.
     Радуйся, немощных целебниче.
     Радуйся, жезле, падающих подкрепляяй.
     Радуйся, надежде и отишие в мори жития сего плавающих.
     Радуйся, твердое ограждение и прибежище усердно Богу работающих.
     Радуйся, всех усердно притекающих к тебе, искушений и бед скорое избавление.
     Радуйся, всех обуреваемых покрове твердый.
     Радуйся, яко от обители земныя в обитель Небесную преселился еси.
     Радуйся, яко от обители Небесныя в обитель земныя благотворя нисходиши.
     Радуйся, яко и по отшествии твоем с нами пребываеши.
     Радуйся, яко и по преставлении твоем, умерщвленныя грехми души наша молитвами твоими воскрешаеши.
     Радуйся, Макарие, скорый помощниче и преславный чудотворче.

Кондак 11
     Пения и песни духовныя Троице Единосущней, сердцем и усты на земли выну приносил еси, блаженне Макарие: темже и ныне на Небесех, с ангельскими чинми Троическому предстоя Престолу, непрестанно воспеваеши Божественную песнь: Аллилуиа.

Икос 11
     Светоподательнаго светильника, просвещающаго души наша, верою видим тебе, преблаженне отче, пред Престолом Божиим стояща, и твоим блистанием озаряеми, зовем ти таковая:
     Радуйся, облаче светозарный, просвещаяй души наша.
     Радуйся, вода спасительная, всех напаяющая.
     Радуйся, пастырю предивный.
     Радуйся, учителю премудрый.
     Радуйся, чистоты селение.
     Радуйся, печальных утешение.
     Радуйся, сирых питателю.
     Радуйся, обидимых предстателю.
     Радуйся, премудрости Божия приятелище.
     Радуйся, неисчерпаемый источниче благодати исцелений.
     Радуйся, превозвестниче Божиих велений.
     Радуйся, сокровище милосердия Божия неистощимое.
     Радуйся, Макарие, скорый помощниче и преславный чудотворче.

Кондак 12
     Благодать свыше ти данную познавше, благоговейно лобызаем честныя мощи твоя, яже Господь благоволил дивно явити нам. Темже благодарственно вопием Христу Богу нашему: Аллилуиа.

Икос 12
     Поюще твое к Богу отшествие, преподобне Макарие, почитаем священную память твою, величаем твое смиренномудрие, хвалим твое долготерпение, славим незлобие твое, ублажаем подвиги твоя и кончину течения твоего, яко венец правды приял еси от Господа, Судии праведнаго. Темже молящеся усердно, о еже сподобитися и нам неосужденно предстати Страшному Судищу Христову, взываем ти:
     Радуйся, у Престола Божия теплый о нас предстателю.
     Радуйся, мужу, прославивый Бога в души и в теле твоем.
     Радуйся, совершенный в добродетелех человече.
     Радуйся, дивный подражателю Отца нашего Небеснаго.
     Радуйся, устроителю обители монашествующих.
     Радуйся, преблагий и добрый наставниче иноков.
     Радуйся, всех православных скорый помощниче и заступниче.
     Радуйся, Царя Небеснаго известный умилостивителю.
     Радуйся, многажды заступлением твоим прошения предваряяй.
     Радуйся, Небесный гражданине.
     Радуйся, яко с преподобными и праведными веселишися.
     Радуйся, яко со всеми избранными Божиими присно торжествуеши.
     Радуйся, Макарие, скорый помощниче и преславный чудотворче.

Кондак 13
     О преславный и предивный отче Макарие, приими благоутробно сие малое моление наше, и твоим сильным и благоприятным пред Богом ходатайством, избави нас от всех враг видимых и невидимых, от всякия напасти и скорби, от внезапныя смерти и будущия муки, да сподобимся с тобою и со всеми святыми во веки воспевати Богу Спасителю нашему благодарную песнь: Аллилуиа, Аллилуиа, Аллилуиа.
Этот кондак читается трижды, а затем икос 1 и кондак 1

Молитва преподобному Макарию, игумену Калязинскому, чудотворцу
     О священная главо, преподобне отче, преблаженне авво Макарие! Не забуди убогих своих до конца, но поминай нас во святых своих и благоприятных молитвах к Богу. Помяни стадо свое, еже сам упасл еси, и не забуди посещати чад своих. Моли за ны, отче священный, за дети своя духовныя, яко имея дерзновение к Небесному Царю. Не промолчи за ны ко Господу, и не презри нас, верою и любовию чтущих тя. Поминай нас, недостойных, у Престола Вседержителева, и не престай моляся о нас ко Христу Богу: ибо дана тебе бысть благодать за ны молитися. Не мним бо тя суща мертва: аще бо и телом преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих, и всякия прелести бесовския, и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа с ангельскими воинствы, с безплотными лики, с Небесными Силами у Престола Вседержителева предстоящи, достойно веселится. Ведуще бо тя воистину и по смерти жива суща, тебе припадаем и тебе молимся: еже молитися о нас Всесильному Богу о пользе душ наших и испросити время на покаяние, и о невозбранном преитии от земли на Небо, мытарств же горьких, бесов воздушных князей и вечныя муки избавитися, и Небесному Царствию наследником быти со всеми праведными, от века угодившими Господу нашему Иисусу Христу: Емуже подобает всякая слава, честь и поклонение со Безначальным Его Отцом, и Пресвятым и Благим и Животворящим Его Духом, ныне и присно, и во веки веков. Аминь.

Тропарь преподобному Макарию, игумену Калязинскому, чудотворцу
Тропарь, глас 8:
     Плотская мудрования, отче Макарие, воздержанием и бдением умертвил еси: место бо, на немже поты твоя излиял еси, яко труба вопиет к Богу, поведающи твоя исправления: и по смерти честныя твоя мощи источают исцеления. Темже вопием ти: моли Христа Бога, да спасет душы наша.

Ин тропарь, глас 2:
     Яко древо насажденное при водах воздержания, струями слез твоих напояем, преподобне отче Макарие, сеяв бо слезами, в радости жнеши добродетельныя рукояти; тем Великий Мздодавец плоды трудов твоих прият и в житницах Небесных тя сокровище положи, но поминай чтущих любовию пресветлую память твою и моли Святую Троицу, преподобне Макарие, спастися душам нашим.

Ин тропарь, глас 8:
     Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Макарие отче наш, моли Христа Бога спастися душам нашим.

Кондак, глас 2:
     Вышних желая, воздержанием и труды, и поты насладився, желание плоти твоея обуздав, чудес дар прием от Христа Бога, светильник явился еси пресветлый. Темже Христова Церковь песньми славит тя, преподобне Макарие отче наш.

Ин кондак, глас 8:
     Яко финикс псаломский во удолиих постнических процвел еси, трудов своих поты, яко плоды духовными, возвеличил еси над всеми Бога, но яко имея дерзновение ко Святей Троице, поминай нас, чтущих любовию святую память твою, да зовем ти: радуйся, преподобне Макарие, отче наш.

Величание
     Ублажаем тя, преподобне отче Макарие, и чтим святую память твою, наставниче монахов и собеседниче ангелов.

Акафисты zvonnitsa.ru/orthodoxy/akafisti/290/13352/

Кондак 1
     Избранный чудотворче и преславный угодниче Христов, святителю отче Макарие, присно от лютых и напастей молитвами твоими избавляеми приносим ти похвальная. Ты же, яко имеяй дерзновение ко Господу, не престай от всех бед свобождати любовию тебе зовущих:
     Радуйся, Макарие, архиереом честное украшение.

Икос 1
     Ангела земнаго званием и человека небеснаго житием, яви тя небесе и земли Создатель: Емуже предстоя и ликовствуя непрестанно с небесными чинми, славословие возсылаеши и молением грешных людей от земли внемлеши, услыши и нас ко предстательству твоему усердно взывающих:
     Радуйся, яко по имени твоему и житие твое блаженное;
     Радуйся, Троическим единством священнотайне пpосвещаяйся.
     Радуйся, к Триипостасному Свету и наши души возводяяй;
     Радуйся, волю избравшаго тя Господа Христа творивый.
     Радуйся, и нас творити волю Его своим житием научаяй;
     Радуйся, Спасителя Бога любве искренний подражателю.
     Радуйся, и наши души любовию Креста Его просвещаяй;
     Радуйся, Духа Пресвятаго сосуде избранный.
     Радуйся, и на нас благодать Его призываяй;
     Радуйся, с Царицей Небесной пред Спасителем нашим предстателю.
     Радуйся, непрестанный ангелов собеседниче;
     Радуйся, о роде человечестем усердный молитвенниче.
     Радуйся, Макарие, архиереом честное украшение.

Кондак 2
     Видяще святыя мощи твоя, многая чудеса источающия, и покланяющеся им, яко дивному знамению милости Господней в земли нашей, радостно благодарим Бога, благоговейно поюще Ему: Аллилуиа.

Икос 2
     Разумом просвещенным свыше вразумляя заблуждшия, сильный поборник был еси истины Христовой, святителю Макарие, егда в стране Литовстей царие земстии и князи людстии собрашася вкупе на верных чад Церкви Христовой, мы же трудами и молитвами твоими от иноплеменнаго и иновернаго ига избавльшеся, вопием ти сице:
     Радуйся, града Вильны славное прозябение;
     Радуйся, верный хранителю апостольских преданий.
     Радуйся, истины Православия страже неусыпный;
     Радуйся, столпе благочестия несокрушимый.
     Радуйся, святителей древних подражателю;
     Радуйся, крепосте наша духовная.
     Радуйся, твердое веры и правды охранение;
     Радуйся, пастырем и пасомым образе благочестия.
     Радуйся, Церкви преславная красото;
     Радуйся, архиереев доброто.
     Радуйся, православия светило;
     Радуйся, яко духовную жертву непрестанно ко Господу возносиши.
     Радуйся, Макарие, архиереом честное украшение.

Кондак 3
     Сила свыше осени тя, истинный пастырю душ христианския, егда противу волков злых, ищущих стадо Христово расхитити, твердо стоял еси, и духовныя чада твоя и благоверную княгиню в Православии укрепил еси, и ныне на небесех предстоя Христу Богу, моли Господа Славы, да умножит в земли нашей благочестие и единомыслие: оступившия же от православныя Церкви светом познания Своего да озарит, да и тии с нами воззовут Ему: Аллилуиа.

Икос 3
     Имея воистинну, блаженне Макарие, великую любовь стаду своему, людем Русским явился еси наставник мудрый ко спасению, нам же молитвенник теплый и скорый помощник показался еси, вся подвизая благодарно взывати тебе:
     Радуйся, от рук агарянских смертную испивый чашу;
     Радуйся, от уст верных сего ради присно восхваляемый.
     Радуйся, мучениче, к небесным селениям дух наш присно возводяяй;
     Радуйся, подвижниче, нас, от юности страстьми обуреваемых, безстрастию поучаяй.
     Радуйся, пастырю, благовествуяй нам глагол Христов силою многою;
     Радуйся, отче, чадом своим путь ко спасению показавый.
     Радуйся, града Киева небесный покровителю;
     Радуйся, священнослужителем добрый наставниче.
     Радуйся, монахов и мирских людей мудрый учителю;
     Радуйся, страны нашей преславный светильниче.
     Радуйся, всех молящихся прибежище;
     Радуйся, скорбящих утешителю.
     Радуйся, Макарие, архиереом честное украшение.

Кондак 4
     Бурею латинскаго еретическаго неистовства и блуждания обуреваеми русскии людие обретоша в тебе, священномучениче Макарие, кормчаго изрядна во спасение, темже и мы, зря житейское море, воздвизаемое бурею страстей и неверия, притекаем к тихому пристанищу молитв твоих и к Богу, возводящему от тли живот наш, вопием: Аллилуиа.

Икос 4
     Слышавше и видевше, святе Макарие, ближнии и дальнии души твоея доброту и святость жития твоего, избра тя в архипастыря Церкве литовско-русския и обретоша в тебе пастыря добраго, за овцы свою душу положити готоваго, с веселием взываху:
     Радуйся, избранниче Божий, преславный;
     Радуйся, сосуде чистоты и ревности исполненный.
     Радуйся, церковная похвало;
     Радуйся, лести латинския посрамителю.
     Радуйся, Православия догматов уяснителю;
     Радуйся, гонимых правды ради защитниче.
     Радуйся, любомудрствующих в Бозе благий советниче;
     Радуйся, лукаваго мудрования обличителю.
     Радуйся, воздержания учителю;
     Радуйся, в простоте сердца верующим светлое веры правило.
     Радуйся, в уничижении житие свое проводящим образе кротости и смирения;
     Радуйся, спасающихся ободрение.
     Радуйся, Макарие, архиереом честное украшение.

Кондак 5
     Боготечною звездою востекл еси, святителю Макарие, ко святому граду Киеву, ревностию снедаем о доме Божием и о спасении врученных ти душ, аще и ведал еси о нашествии агарян, с мечем смерти ожидавших тя на пути, обаче вся презрел еси во еже исполнити должная. И совершая хотение твое, в соборной церкви града Киева ныне нетленно почиваеши и чадам твоим выну предстоиши, научи, о блаженне, и нас, разслабленных духом, путь спасению в Бозе совершати и на сем пути вся препоны молитвами твоими препобеждати, да ни смерть, ни живот не разлучат ны от любве Божия, ниже заключат устен наших, вопиющих Спасителю Богу: Аллилуиа.

Икос 5
     Увидевше веси Скрыголовстии людие, в церкви сущие, агарян нечестивых губительное нашествие, смертным ужасом одержими бывше, бежаху. Ты же, о досточудне, яко доблий воин Христов, на страже служения твоего пребыл непоколебим, и тако мечем нечестивых от служения временнаго преставлен еси к славословию вечному пред Господом всяческих, Ему же с горними чинми сослужа, приими наша хваления таковая:
     Радуйся, с безкровною жертвою кровь свою в жертву угодную Богу принесый;
     Радуйся, с херувимы Животворящей Троице Трисвятую песнь присно припеваяй.
     Радуйся, небесными чинми невидимо дориносимо, к Богу вознесенный;
     Радуйся, с праведными вечное Аллилуиа воспеваяй.
     Радуйся, до крове исповедавый Троицу единосущную;
     Радуйся, горе имеяй пламенеющий дух.
     Радуйся, достойно возблагодаривый Господа;
     Радуйся, с шестикрылатыми и многоочитыми победную песнь поющий.
     Радуйся, Пречистых Таин Христовых воистинну в жизнь вечную причастивыйся;
     Радуйся, святая во освящение вкусивый.
     Радуйся, апостольския власти в чести преемниче;
     Радуйся, чудес источниче.
     Радуйся, Макарие, архиереом честное украшение.

Кондак 6
     Проповедник истины Православия явился еси, богомудре Макарие, якоже бо древле во святем граде равноапостольная Елена с патриархом Макарием честный Крест Христов воздвизаше людям взывавшим: «Господи, помилуй», сице и ты, русскаго Сиона первосвятителю, с княгинею Еленою в сердцах верных оный Крест утверждал еси, да вси единым сердцем и едиными усты взывают на нем пригвожденному Богу: Аллилуиа.

Икос 6
     Возсия в храме премудрости Господней чудный свет от пречистых мощей твоих, предивный чудотворче, его же видевше два мужа, поведаста благоговейнейшему первосвятителю Иову и всем людем прославляюще Бога, таковую благодать ти давшего, роди же русскии от лет древних навыкоша воспевати ти:
     Радуйся, светильниче, огнем божественныя благодати возжженный;
     Радуйся, благовестителю света Христова.
     Радуйся, ангельское житие являй;
     Радуйся, грешником наставниче покаяния.
     Радуйся, яко твоим ходатайством благодать спасения всем даруется;
     Радуйся, яко твоими молитвами расточенная чада церковная собираются.
     Радуйся, яко твоим молением злоба и коварство посрамляются;
     Радуйся, яко предстательством твоим миром ограждаемся.
     Радуйся, подателю милости тоя требующим;
     Радуйся, ходатаю небесных и земных благ почитающим память твою.
     Радуйся, о людех теплое моление возносяй;
     Радуйся, всех молящихся прибежище.
     Радуйся, Макарие, архиереом честное украшение.

Кондак 7
     Хотяй представити Господу овцы своя люди избранны, потщался еси всемерно княгиню Елену и люди утвердити в правоверии, всех наставляяй к житию богоугодному. Не престай, святителю, и ныне о стаде твоем молитися Вседержителю Богу, да подаст народоправителем мудрость и силу, пастырем ревность о доме Господнем и всем вся, яко же спасения полезная, о них же благодаряще Бога, да вопиют: Аллилуиа.

Икос 7
     Новое знамение милости твоея яви щедродатель Господь, граду Киеву множае четыреста лет нетленны сохраняя честныя мощи твоя, священномучениче блаженне Макарие, о сем благодаряще дивнаго во святых Господа, с любовию ублажаем тя:
     Радуйся, яко кровию твоею, аки багряницею, Церковь украсися;
     Радуйся, яко нетленным телом твоим, аки алмазом безценным, храм премудрости Господней просветися.
     Радуйся, яко тобою лик мученический преумножися;
     Радуйся, яко кровию твоею семена веры в земли нашей возрастишася.
     Радуйся, яко тобою небеса возвеселишася;
     Радуйся, яко о тебе и земля радуется.
     Радуйся, о Дусе Святе души благочестивыя возвеселяй;
     Радуйся, печаль по Бозе кающимся подаваяй.
     Радуйся, в терпении крест скорбей несущих утверждаяй;
     Радуйся, бодросте во обстоянии сущих.
     Радуйся, напутствуемым мужеством снабдение;
     Радуйся, Макарие, архиереом честное украшение.

Кондак 8
     Странное купно же и дивное видение явися обретшим тя в церкви Скрыголовстей магометаном, егда узревша тя, святителю Христов, единаго токмо безтрепетно престолу Господню предстояща и моление о соединении всех возсылающа, обаче сим не вразумишася, нечестивии, христиански воспети Владыце всех: Аллилуиа.

Икос 8
     Весь в Бозе живеши, преблаженне отче наш, но и нас грешных не оставляеши, славу в вышних Богу воспеваеши, и зде пречистыми мощами твоими пребываеши, темже яко живу сущу с нами от всего сердца глас хвалы приносим ти:
     Радуйся, яко по слову апостольскому, всем вся был еси;
     Радуйся, яко спасения ради чад твоих себе на смерть предал еси.
     Радуйся, посещавый стадо твое не нуждою, но волею и по Бозе;
     Радуйся, рабе Господень благий и верный.
     Радуйся, вшедый в радость Господа твоего;
     Радуйся, данный тебе талант преумноживый.
     Радуйся, в мзду приявый благодать исцелений;
     Радуйся, болящих здравие.
     Радуйся, скорбящих утешение;
     Радуйся, явлением мощей твоих в Православии нас утверждаяй.
     Радуйся, яко твоего нетленнаго телесе демоны трепещут;
     Радуйся, и нас пред гробом твоим стоящих умиления исполняеши.
     Радуйся, Макарие, архиереом честное украшение.

Кондак 9
     Все естество ангельское удивися преславней кончине твоей, еюже житие твое достойно венчал еси, лик страстотерпцев с любовию тя преуспеваяй, такожде и Церковь Русская, купно со Владимиром и Ольгою, со страстотерпцы Борисом и Глебом, с Михаилом святителем, с Антонием и Феодосием и всеми чудотворцы Печерскими в молитвенники тя приемше, благодарно о тебе вопиют: Аллилуиа.

Икос 9
     Витийства нашего немощь, восхвалити тя хотяще, добре вемы, обаче да не отринет нас благостыня твоя, из глубины сердца вопиющих:
     Радуйся, архиерею Бога вышняго;
     Радуйся, пастырю нам добрый.
     Радуйся, правды служителю нелицеприятный;
     Радуйся, в безвестности начало жития своего сохранивый.
     Радуйся, тем пастыреначальнику Христу подражавый;
     Радуйся, яко тебе безвестная и тайная премудрости Божия явлена быша.
     Радуйся, яко края желаний достигл еси;
     Радуйся, яко в тебе мудрствовася, еже и во Христе Иисусе.
     Радуйся, яко послушлив был Ему даже до смерти, смерти же мученическия;
     Радуйся, яко всяко колено небесных и земных восхваляет тя.
     Радуйся, во славу Христову потрудивыйся;
     Радуйся, любве божественныя исполненный.
     Радуйся, Макарие, архиереом честное украшение.

Кондак 10
     Спасти хотя от вечныя гибели стадо твое, злоухищрении латинскими прельщаемое, подъял еси, блаженне, труды многия и болезни, обходя бо грады и веси, князи и люди утешал еси, пастыри поучал еси, противящихся истине обличал еси, всяко тщание прилагая, да вси православнии воспевают Богу согласную песнь: Аллилуиа.

Икос 10
     Стена твердая был еси православным россиянам противу врагов видимых и невидимых, и ныне, угодниче Христов, молитвами твоими, волны неверия и лжеучений отврати от нас, отечество твое сохрани от глада, губительства, нашествия иноплеменников и междуусобныя брани, и от всяких бед, да благодарно зовем ти:
     Радуйся, на Церковь святую восстающим сильный противоборниче;
     Радуйся, провозвестником Евангелия неутомимый споспешниче.
     Радуйся, во тьме заблуждений сидящих светом Христовым просвещаяй;
     Радуйся, столпе Церкви, его же утверди Премудрость Божия.
     Радуйся, на языки, брани хотящи, гнев Божий проливаяй;
     Радуйся, миротворцам милость Господню посылаяй.
     Радуйся, славо и благопоспешение правителем нашим;
     Радуйся, на враги победы воинству нашему ходатаю.
     Радуйся, устрашение агарянских полчищ;
     Радуйся, злочестия и неприязни искоренителю.
     Радуйся, мира и незлобия учителю;
     Радуйся, на подвиг брани духовныя вдохновителю.
     Радуйся, Макарие, архиереом честное украшение.

Кондак 11
     Песнь Трисвятую с херувимы и серафимы Животворящей Троице припевая, отче наш Макарие, пособствуй и нам, житейския попечения отлагающе во вся времена гласы преподобными воспевати на херувимех Седящему: Аллилуиа.

Икос 11
     Светильник горяй и святяй, показался еси, святителю Христов, егда из под спуда смиреннаго иноческаго жительства поставлен был еси на свещнице митрополии Киевския, да светиши всем чадом Церкве русския сущим, благодарно тебе зовущим:
     Радуйся, яко свет твой просветися пред верными и неверными;
     Радуйся, яко о тебе вси вернии прославиша Отца Небеснаго.
     Радуйся, свете, его же не объят тьма латинская;
     Радуйся, яко тобою мати градов русских Киев хвалится.
     Радуйся, яко тебе ради и вся Русская земля веселится;
     Радуйся, единокровных учителю единения.
     Радуйся, в междуусобии сущим мира проповедниче;
     Радуйся, взыскующим Царствия Божия незримый наставниче.
     Радуйся, яко всем труждающимся и обремененным образ подвига сего являеши;
     Радуйся, яко нас хладных подвигом любве твоея возгреваеши.
     Радуйся, ревновати о своем спасении нас научаеши;
     Радуйся, Божий избранниче.
     Радуйся, Макарие, архиереом честное украшение.

Кондак 12
     Благодать Пресвятаго Духа испроси нам, предстателю наш, да вся немощная в нас уврачуется, и оскудевающая восполняется; невернии и заблудшии к вере Христовой да обратятся, подражающе вере твоей; малодушнии и отчаянии надеждою несумненною да утвердятся, упованием на молитвы твои укрепляемы; жестоковыйнии и немилостивии любовию неоскудевающей да воспламенятся и твоею любовию распаляеми вси согласно да воззовут к Источнику всякия благостыни: Аллилуиа.

Икос 12
     Поющим великия добродетели твои и честным мощам твоим покланяющимся, достохвальне отче Макарие, умоли Господа сил даровати коемуждо потребная и возбуди нас тепло взывати ти:
     Радуйся, от Господа достойно венчанный;
     Радуйся, ангелы радостно восхваляемый.
     Радуйся, чудесы от честных мощей твоих паче слова прославляемый;
     Радуйся, Михаила, Иллариона и прочих святителей киевских достойный приемниче.
     Радуйся, аще и внезапную, но преславную кончину приявый;
     Радуйся, пред престолом Господним неусыпный наш молитвенниче.
     Радуйся, на небесную высоту воспаривый;
     Радуйся, мудрость змиину и кротость голубину сочетавый.
     Радуйся, заблудшия овцы на раменах своих ко Отцу принесый;
     Радуйся, крепкая палица Христова.
     Радуйся, истинная закона Божия скрижаль и источник чистыя благодати;
     Радуйся, яко память твоя присно с похвалами.
     Радуйся, Макарие, архиереом честное украшение.

Кондак 13
     О предивный и преблаженный угодниче Христов, святый священномучениче, услыши нас грешных чад твоих и приими сие малое благохваление наше, многомощным предстательством твоим, отврати гнев Божий, праведно за грехи наши на ны движимый, и испроси нам прощения множества беззаконий наших, умоли даровати христианскую кончину живота нашего, да по велицей милости Господней муки вечныя избавльшеся, сподобимся улучити небесных благих, их же ты ныне наслаждаешися, поя Богу: Аллилуиа.
Этот кондак читается трижды, а затем икос 1-й и кондак 1-й

Молитва священномученику Макарию, митрополиту Киевскому
     О великий угодниче Христов, святителю отче Макарие! В житии твоем чад твоих любовию смерти крепчайшею возлюбивый и за них душу свою предавый, призри от Горних Обителей на нас, вонми воздыханиям нашим сердечным, и помози нам недостойным и смиренным. Молися, святителю милостивый, да речет Он мир на люди Своя и на преподобныя Своя и на обращающия сердца к Нему. Даруй нам, отче наш, дух любве твоея ко святей матери нашей Церкви Христовой, укрепи ны, разслабленныя духом, отеческия предания хранити и о мимошедших напастех память спасительную имети и всегда благодарственная благодетелю Богу воспевати научи. Предстательством твоим у престола Господа сил испроси Церкви Христовой от ересей и расколов ограждение; к честным мощам твоим притекающим и чтущим святую намять твою исполнение благих их прошений, и всем христианом вся ко временней и вечней жизни потребная, да прославляется о тебе пречестное и великолепное Имя Отца и Сына и Святаго Духа и ныне и присно и во веки веков. Аминь.

Тропарь священномученику Макарию, митрополиту Киевскому
Тропарь, глас 8:
     Божественныя безкровныя совершая жертвы, кровь твою, от безбожных агарян излиянную, в жертву непорочную принеся еси Владыце твоему, Пастыреначальнику Христу, Егоже моли, молим тя, пролити гнев на языки, хотящия браней, христолюбивое воинство наше на враги укрепи и стадо твое от всяких бед неврежденно соблюди. Тебе бо крепкаго заступника почитаем, новый священномучениче Российский, святителю, блаженне Макарие.

Кондак, глас 8:
     Веселится град Киев, великое сокровище стяжав, твое тлению непричастное тело, святителю блаженне Макарие, твой бо престол даже до крове от лютых врагов нашествия хранил еси. И ныне небесному предстоиши Престолу, идеже молитвенно пред Творцем поминай нас, отче наш, да во всех бедах имеем тя прибежище и тобою хвалимся, зовуще: радуйся, Макарие, архиереом честное украшение.

Величание
     Величаем тя, священномучениче Макарие, и чтим святую память твою, ты бо молиши за нас Христа Бога нашего.

Акафисты zvonnitsa.ru/orthodoxy/akafisti/299/13354/

Кондак 1
     Избранный и чудный архиерею Церкве Российския, града Москвы первопрестольниче, блаженне святителю Макарие! Восхваляем тя ныне мы, недостойнии, но, яко имея дерзновение у Святыя Троицы, предстательством твоим Небесным помогай нам, сущим в бедах и скорбех, радостно взывающим ти:
Радуйся, блаженне Макарие, похвало церкве Христовы и предивный чудотворче.

Икос 1
     Ангела земнаго и человека Небеснаго прославляем тя, яко ревнителя Православия: от земных бо к Небесным обителем возшел еси. И ныне, предстоя Престолу Святыя Троицы вкупе с лики чудотворцев Российских, не престай моляся о воспевающих тя:
     Радуйся, корене благаго ветве многоплодная;
     Радуйся, благочестивых родителей плоде богодарованный.
     Радуйся, от юности возлюбивый Бога всем сердцем твоим;
     Радуйся, яко Ему Единому работати возжелел еси.
     Радуйся, яко измлада мудрости прилежал еси;
     Радуйся, поста и молитвы ревностный блюстителю.
     Радуйся, блаженне Макарие, похвало Церкве Христовы и предивный чудотворче.

Кондак 2
     Видя тщету мирскаго жития, блаженне святителю Макарие, во ограду обители преподобнаго Пафнутия Боровскаго удалился еси, идеже имя египетскаго пустынника, монашествующих наставника, Макария Великаго, приял еси и, яко звезда небосветлая возрастая на тверди церковней, весь живот свой от младых ногтей Богу предал еси, сердцем и усты непрестанно поя Ему: Аллилуиа.

Икос 2
     Разум твой богодухновенный, научением книжным в Пафнутиево-Боровстем монастыре просвещаемый, богомыслию предал еси, блаженне Макарие, молитвою и пощением во служение Богу себе уготовляя. Восхваляюще же ныне твоя благая тщания, взываем ти сице:
     Радуйся, яко, отложив вся мирския сласти, Христов ярем носити изволил еси;
     Радуйся, юность твою, яко жертву непорочну, отвержением мира Богу принесый.
     Радуйся, в постех и подвизех твоих добродетельми украсивыйся;
     Радуйся, ангельски во плоти поживый.
     Радуйся, монашескаго послушания светлый облаче;
     Радуйся, иноков обители Боровския украшение.
     Радуйся, блаженне Макарие, похвало Церкве Христовы и предивный чудотворче.

Кондак 3
     Силою Вышняго, уготовлявшаго тя во спасение многих, досточудне святителю, ведом был еси от силы в силу во святем житии твоем, день и нощь поучался еси в Законе Господнем, присно взывая Богу: Аллилуиа.

Икос 3
     Имея чистое житие и душу непорочну, в монашеския ризы облеклся еси, еще млад сый, и, подвигом добрым труждаяся, искус жестокаго жития прошед и саном архимандрита обители Лужецкия от первосвятителя Даниила почтен быв, ревностно подвизался еси о спасении Богом данного тебе стада словеснаго, с нимже и мы днесь радостно взываем:
     Радуйся, красото смиренномудрия и воздержания;
     Радуйся, образе кротости и послушания.
     Радуйся, соборов иноческих похваление;
     Радуйся, преподобных и праведных сонаследниче.
     Радуйся, премудрый монахов наставниче;
     Радуйся, добрый о них попечителю.
     Радуйся, блаженне Макарие, похвало Церкве Христовы и предивный чудотворче.

Кондак 4
     Бури страстей избежав, архипастырски трудился еси, святителю отче Макарие; достойный служитель святыя Софии, Премудрости Божия, явился еси, и сокровища премудрости ревностно собирати потщался еси, ко просвещению народов российских, научая разумно пети Богу: Аллилуиа.

Икос 4
     Слышавше ближнии и дальнии людие, дивляхуся о трудех твоих неустанных, имиже трудился еси на кафедре богоспасаемых градов Великаго Новаграда и Пскова, и радовахуся, яко приял еси жезл архипастыря от митрополита Российскаго Даниила. Мы же, овцы пажити твоея, светом твоего богораэумия озаряеми, вопием ти:
     Радуйся, на престоле святительстем достойно возседый;
     Радуйся, архиерею и премудрый учителю.
     Радуйся, в подвизе учительства неустанный ревнителю;
     Радуйся, винограда Христова усердный делателю.
     Радуйся, яко твоим благословением некрещеная лопь светом Евангелия просвещена бысть;
     Радуйся, благочиния монастырскаго мудрый устроителю.
     Радуйся, блаженне Макарие, похвало Церкве Христовы и предивный чудотворче.

Кондак 5
     Боготечному солнцу уподобился еси, блаженне Макарие, егда волею Пастыреначальника Христа на свещнице Церкве Российския собором архиереев поставлен был еси, да светиши светло отечествию твоему. Мы же Небесному Царю, Триединому Богу, дивно прославльшему тя, поем: Аллилуиа.

Икос 5
     Видевше тя православнии людие, яко светило безоблачно сияюща многими дарованьми, радовахуся. Ты же, добрый пастырю Христов, мучениколюбец сый, соборне уставил еси празднования творити святым новым чудотворцем земли нашея, ихже Господь Бог прослави, якоже Своя угодники, многими различными чудесы и знаменьми. Мы же, чудящеся о таковей неизреченней благости Божией, Церкви нашей Российстей дарованней, умильно взываем ти сице:
     Радуйся, святителю, други Божия достолепно прославивый;
     Радуйся, деяния подвижников российских писанию предавый.
     Радуйся, труды и подвиги мужей святых в песнех славословивый;
     Радуйся, образы новых чудотворцев благоговейно писавый и лобызавый.
     Радуйся, научивый паству достойно покланятися святым новым чудотворцем;
     Радуйся, яко купно с сими святыми ныне и от нас славословие приемлеши.
     Радуйся, блаженне Макарие, похвало Церкве Христовы и предивный чудотворче.

Кондак 6
     Проповедник веры Православныя и ревнитель благочестия словом и житием был еси, достославне святителю, блаженне Макарие, потщался еси труды неленостными нравы и обычаи людей российских исправити, научая непрестанно воспевати Богу: Аллилуиа.

Икос 6
     Возсиял еси, яко звезда лучезарная, в Церкви Российстей светом Христова учения и ревностию твоею о славе Божией, иерарше блаженне, и созвал еси великий собор, Стоглав нарицаемый, ко исправлению и утверждению в добродетелех верных чад, внимающих учению Христову и похваляющих тя сице:
     Радуйся, благочиния церковнаго строгий блюстителю;
     Радуйся, яко тобою вера Христова утвердися.
     Радуйся, чтения и пения Божественнаго искусный учителю;
     Радуйся, соблазнов и нестроений мудрый искоренителю.
     Радуйся, яко страх Божий, начало премудрости, в сердцах пасомых насаждал еси;
     Радуйся, яко праведныя жизни образ верным подавал еси.
     Радуйся, блаженне Макарие, похвале Церкве Христовы и предивный чудотворче.

Кондак 7
     Хотяй враг спасения рода человческаго нарушити мир Церкве нашея, воздвиже еретическое мудрование в людех о Божестве, и о Церкви, и о православных догматех веры христианския. Мы же, трепетни суще о таковем злочестии, прославляем святителя Макария, православных догматов защитителя, взывающе Богу: Аллилуиа.

Икос 7
     Новаго тя Петра Александрийскаго и Николая Мирликийскаго зрим, святителю Макарие: овии отсекоша Ариа безумнаго, раздравшаго, яко ризу Церковь Христову, ты же еретическая лжемудрования соборне осудил еси, прелесть их посрамив да не сеют злобы своея в роде человечестем, и тако утвержден бысть истинный Закон Христов. Мы же, чада Церкве Православныя, благодарно прославляем тя, блаженне Макарие:
     Радуйся, Православия великий ревнителю;
     Радуйся, стада Христова от волков хищных верный оградителю.
     Радуйся, жезлом догматов лжемудрствование посрамивый;
     Радуйся, небрегущия о святыни от Церкве Божия отлучивый.
     Радуйся, презрители законоположений церковных низложивый;
     Радуйся, громе, поражаяй злочестивых.
     Радуйся, блаженне Макарие, похвало Церкве Христовы и предивный чудотворче.

Кондак 8
     Странника и пришельца в мире сем себе помышляя, святителю отче наш Макарие, в подвизех и постех присно пребывая, кроток же, смирен и милостив был еси, отроком в незлобии подражая всегда, совершен умом быв, поя Всемилостивому Богу: Аллилуиа.

Икос 8
     Весь ум твой, святителю, вперил еси к Богу, пастырски врученное тебе от Христа стадо упасл еси: лица бо сильных не стыдяся, наставлял еси их на путь спасения, его ради чтуще святую память твою, любовию ти вопием:
     Радуйся, великий благочестия столпе;
     Радуйся, святопомазанная главо, честный наш учителю.
     Радуйся, Христа Господа всею душею и сердцем возлюбивый;
     Радуйся, христианскаго благочестия истинный ревнителю.
     Радуйся, неутомимый проповедниче Евангелия Христова;
     Радуйся, каменю драгий, всю землю Российскую украшаяй.
     Радуйся, блаженне Макарие, похвало Церкве Христовы и предивный чудотворче.

Кондак 9
     Всего себе вперив в премудрость книжную, составил еси многими труды и подвиги Великия Четия Минеи во славу Божию, в похвалу святых и в научение всему роду православному. Мы же, дивящеся дарованней ти от Бога премудрости, прославляем тя, зовуще Богу: Аллилуиа.

Икос 9
     Витии любомудрии прославляют деяния славных мира сего, ты же, пчеле уподоблялся, воедино собирал еси жития иже в постех просиявших и за Христа кровь свою пролиявших. Мы же, писании твоими просвещаеми, поем и благодарим тя за толикие труды твоя и преусердно приносим ти сицевая:
     Радуйся, книжную премудрость, яко бисер, собравый;
     Радуйся, сокровища премудрости чадом Божиим явивый.
     Радуйся, имиже люди российския просветивый;
     Радуйся, деяния святых писанию предавый.
     Радуйся, начало книгопечатанию положивый;
     Радуйся, духовный пастырю словесных овец.
     Радуйся, блаженне Макарие, похвало Церкве Христовы и предивный чудотворче.

Кондак 10
     Спасти хотя душу твою, святителю, покоя духовнаго возжелел еси, хотя оставити первосвятительский престол и паству российскую, но, умолен быв от собора святителей и самодержцем державным, показал еси нам пример послушания Церкви Христове, да поем Богу: Аллилуиа.

Икос 10
     Стена и крепкое ограждение земли Российстей был еси, святителю, многими добродетельми украсивыйся, постнически пожив, течение скончав, ко отшествию от земнаго бытия приблизился еси и предал еси душу свою в руце Бога Жива. Собор же народа многа, стекшеся ко одру твоему и видевше лик твой, яко свет сияющий, чистаго и непорочнаго жития твоего ради, прославиша Бога, даровавшаго таковаго светильника, вопиюще:
     Радуйся, святителю, пред кончиною твоею явления Богоматере сподобивыйся;
     Радуйся, мирно и радостно час кончины твоея сретивый.
     Радуйся, яко пресветлое житие твое на земли прешел еси;
     Радуйся, святителю, и по смерти твоей нас не оставляяй.
     Радуйся, яко и по преставлении твоем с нами пребываеши;
     Радуйся, гражданине Иерусалима Небеснаго.
     Радуйся, блаженне Макарие, похвало Церкве Христовы и предивный чудотворче.

Кондак 11
     Пение наше молебное презри, богомудре и блаженне отче, любовию подвизаеми, к честному образу твоему притекаем и, прославляюще Триединаго Бога, молимтися: молися выну у Престола Господа Славы избавитися нам от мятежей и треволнений, да благодарне зовем Богу: Аллилуиа.

Икос 11
     Светодательная свеща явился еси стране нашей, Макарие чудный, и по смерти своей. Темже сиянием учений и трудов твоих озаряеми, почитаем святую память твою, просвети убо очи наша душевная, да благодарно взываем ти:
     Радуйся, бедствия, грядущая на землю Российскую, предзревый;
     Радуйся, о всех людех российских усердный молитвенниче.
     Радуйся, вместо временных вечная блага нам подаваяй;
     Радуйся, бисере честный, сиянием Небесныя славы сердца наша увеселяяй.
     Радуйся, светильниче многосветлый, светом истиннаго богопознания нас озаряяй;
     Радуйся, святителей Московских достойный преемниче.
     Радуйся, блаженне Макарие, похвало Церкве Христовы и предивный чудотворче.

Кондак 12
     Благодать Господню и благовременную помощь испроси нам, святителю Макарие, во дни нестроений, и буди нам в скорбех утешитель и в бедах заступник. Молим тя, иерарше блаженне, пролей за нас теплую молитву ко Господу, да сохранит Церковь Российскую невреждену от ересей и расколов и спасет вопиющих Ему: Аллилуиа.

Икос 12
     Поюще преславное житие твое и богомудрая деяния, святителю отче Макарие, блаженству тезоименитый, восхваляем Подателя всех благих, Бога, даровавшаго в последняя времена стране нашей великаго чудотворца. Озари, иерарше чудный, нас светоизлиянием твоея благодати, увеселяя сердца наша пети ти со умилением:
     Радуйся, Православия поборниче нелицемерный;
     Радуйся, архиереев доброто, священников и иноков похвало.
     Радуйся, звездо, сияющая во тьме сущим;
     Радуйся, первопастырю и учителю христоименитых людей земли нашея.
     Радуйся, иконописче благоговеен, дела рук своих посвящаяй Богу;
     Радуйся, от Царя Небеснаго венец славы приемый.
     Радуйся, блаженне Макарие, похвало Церкве Христовы и предивный чудотворче.

Кондак 13
     О чудотворче преславный и боголюбезный пастырю, первопрестольниче изрядный, великое украшение церковное, всем архиереем и иереем неленостный учителю, всея российския паствы истинное управление, святителю Макарие чудный! Милостивно прием сие малое моление наше, в похвалу тебе приносимое, умоли Господа Бога даровати мир душам нашим, Церкви и стране, да взываем присно: Аллилуиа.
Этот кондак читается трижды, затем икос 1-й и кондак 1-й

Молитва святителю Макарию, митрополиту Московскому и всея Руси
     О великий святителю, Церкве Российския первопрестольниче, града Москвы пастырю и учителю, отче наш Макарие блаженне, добре подвиг жития твоего совершивый и дерзновение у Господа стяжавый! К тебе во умилении сердец наших припадаем и усердно молим: буди о нас теплый предстатель у Престола Вседержителева и умоли Всеблагаго Бога: да не презрит нас, во многая и лютыя грехи впадших, но дарует нам вся благая и потребная, яже ко спасению. Вемы бо, яко немощни есмы, но молим тя усердно, святителю Божий, предстательством твоим сохрани невредимо всероссийскую паству, юже во святительстве твоем добре упасл еси. Архиереем и пресвитером у Господа испроси мудростъ, во еже право правити слово Божественныя истины, жертвенную любовь и ревностъ о спасении, да не погибнет ни един от паствы их; иночествующих в подвизех укрепи, в мире живущим истинный и потребный им, иже во Христе Иисусе образ жительствования покажи; веру нашу укрепи, любви нелицемерней друг ко другу научи, в надежде на милосердие Божие утверди. Еще же молим тя, святителю, испроси нам у Всемилостиваго Бога духа разума и премудрости, да украсимся истинным боговедением спасительных писаний святых отец и мудростию их творений. Ей, святителю Божий, о мире всего мира Господа умоли, страну нашу твоим предстательством в мире и безмятежии соблюди; вся люди отечества нашего в добрем расположении друг ко другу сохрани и чужды междоусобных нестроений покажи; вся грады и веси добре сохрани, святую веру в людех непорочну соблюди. Буди всем нам скорый помощник в нуждах наших, да тобою окормляеми, мирно и благочестно поживем в жизни сей, да сподобимся и вечных благ восприятия на Небеси, славяще и превозносяще Отца и Сына и Святаго Духа и твое милостивное о нас предстательство во веки веков. Аминь.

Тропарь святителю Макарию, митрополиту Московскому и Всея Руси
Тропарь, глас 4:
     Яко великим пастырем единонравна, и учителем вселенныя единомысленна, Божии Премудрости служителя изрядна, иже блаженству тезоимениту днесь вернии вси воспоим: Христа Бога моли, святителю Макарие, умирити мир и спасти души наша.

Кондак, глас 3:
     Богомудрым учением и книжным списанием потщался еси, святителю Макарие, люди Российския просветити, и святых земли нашея прославити. Сего ради чуден пронаречеся, преемниче первопрестольников Российских. Моли сохранитися нам в вере и благочестии невредимо.

Величание
     Величаем тя, святителю отче Макарие, и чтим святую память твою, ты бо молиши за нас Христа Бога нашего.
 

Акафисты zvonnitsa.ru/orthodoxy/akafisti/291/13356/

Кондак 1
     Избранней от Господа во образ спасения всем грешным и отчаянным, из глубины греха востекшей на высоту безстрастия, похвальная пения приносим ти, мати преподобная. Ты же, яко имущи дерзновение к щедрому Богу, молитвами твоими настави на стезю твоего покаяния любовию зовущих ти:
     Радуйся, преподобная мати Марие, чудо Божия милосердия.

Икос 1
     Ангел возбрани тебе, в тине блудней пребывающей, внити в церковь с народом, текшим на поклонение Честному Кресту Господню. Егда же ты отступи в студе и нечаянии, коснуся очесем сердца твоего свет разума спасительнаго. И начат убо плакати, и рыдати, и в перси бити, воздыхания из глубины сердца износящи. Мы же таковое покаяние твое прославляюще, со благоговением я радостию глаголем ти сице:
     Радуйся, мглы греха избежавшая;
     Радуйся, тучами слез душу свою уяснившая.
     Радуйся, к ревности жития непорочнаго усердно себе воздвигшая;
     Радуйся, покаяния светом сердце свое озарившая.
     Радуйся, целомудрия зерцало;
     Радуйся, Духа Святаго жилище.
     Радуйся, Горняго мира украшение;
     Радуйся, Ангелов и человеков радование.
     Радуйся, преподобная мати Марие, чудо Божия милосердия.

Кондак 2
     Видящи, святая, в притворе храма икону Владычицы, рече к Ней: «О, Дево; рождшая плотию Бога Слова! Буди ми Ты Поручница достовернейшая к Рожденному из Тебе, яко уже ктому телесе моего не имам осквернити блужением. Повели, Владычице, да и мне, недостойней, невозбранен вход будет в церковь, да узрю Честное Древо, на немже пригвоздися Сын Твой, и воспою Ему с благодарением: Аллилуия».

Икос 2
     Уразуме, Марие, тайны Божия, и како готов есть приимати кающихся, егда без труда вниде внутрь церкве и Животворящего Креста древо видети сподобися. Сего ради паки притекла еси к честному образу Пресвятыя Богородицы и смиренно молила еси Владычицу, да будет ти спасения Учительница, руководствующи к покаянию, и да управит путь твой. Мы же, видяще твое неотступное упование на милость Царицы Небесныя, радующеся, поем ти:
     Радуйся, яко креста образ возжелавши видете, себе миру распяла еси;
     Радуйся, яко Христа всем сердцем возлюбила еси.
     Радуйся, с верою и любовию понесшая крест свой и Христу последовавшая;
     Радуйся, Поручницею Матерь Божию стяжавшая.
     Радуйся, яко сласти отбегши, чистоты возжелала еси.
     Радуйся, яко показала еси нам стезю ведущую к жизни негиблющей.
     Радуйся, ищущим пути ко спасению наставнице благодатная;
     Радуйся, крепостию произволения твоего демоны посрамившая.
     Радуйся, преподобная мати Марие, чудо Божия милосердия.

Кондак 3
     Силою любве утверждающися, день той в пути к реце Иордану ты, блаженная Марие, сконча по гласу Владычицы: «Аще, Иордан прейдеши, добр покой обрящеши». Достигши же святыя реки, от ея воды руце и лице умы и в церкви святаго Иоанна Крестителя причастися Животворящих Таин Христовых. И посем воспела еси со умилением Богу: Аллилуия.

Икос 3
     Имущи полтретья* хлеба, не устрашилася еси, яко горлица пустыннолюбивая и яко елень, жаждущий на источницы водныя, устремитися, всеблаженная мати, в пустыню. Темже таковую твою ревность ублажающе, со умилением зовем ти:
     Радуйся, в церкви проповедника покаяния причастившаяся;
     Радуйся, в Крестителеве обиталищи, пустыни, вселившаяся.
     Радуйся, прелести мира сего спасения ради презревшая;
     Радуйся, временная и земная уметы быти вменившая.
     Радуйся, яко равноангельскому житию подражала еси;
     Радуйся, яко вся прилоги мира, плоти и диавола победила еси.
     Радуйся, скорогибнущих благ мира сего отвержение;
     Радуйся, пустынножителей красото.
     Радуйся, преподобная мати Марие, чудо Божия милосердия.

Кондак 4
     Бурю внутрь имела еси страстей губительных, яко со зверьми лютыми, с похотьми безумными борющися в пустыни. Огнь бо внутрь сердца страстнаго возгарашеся и всю паляше тя. Ты же, слезящи и в перси биющи, воспоминала еси обеты, яже сотворила бе, исходящи в пустыню сию, и молила Матерь Божию отгнати от тебе помышления, сице тя смущавшая. Темже мы, недостойнии, Богу, укреплявшему тя, поем: Аллилуия.

Икос 4
     Имела еси, Марие преславная, небо покровом и землю одром упокоения телу, зноем опаляему и мразом померзаему, емуже ни малаго угождения не попускала еси, да не возобладает плоть над духом твоим, любовию ко Господу пламеневшим. Мы же, слышаще твое пачеестественное терпение и многая злострадания, приносим ти от усердия нашего песноглашения сия:
     Радуйся, многия скорби и беды претерпевшая;
     Радуйся, молитвою твоею вся побеждавшая.
     Радуйся, самоотвержение чудное показавшая;
     Радуйся, столпе терпения и утверждение добродетели.
     Радуйся, яко страсти плотския мечем воздержания посекла еси;
     Радуйся, яко струями слез твоих пустыню всю напоила еси.
     Радуйся, мученице безкровная, за Христа в пустыни страдавшая;
     Радуйся, в женстем естестве крепость мужескую показавшая.
     Радуйся, преподобная мати Марие, чудо Божия милосердия.

Кондак 5
     Боготечную звезду зрящи пред собою, Поручницу твою, Матерь Божию, помышляла еси Ю преступление твое судящую и мучение за преступление грозно показующую, повергала себе на землю и не восставала еси день и нощь, непрестанно просящи помощи у Пречистыя Богородицы, Юже и воистинну Помощницу имела еси, вопиющи Богу: Аллилуия.

Икос 5
     Видевше, блаженная мати, свет сладкий, тя осиявающий, от треволнения изымающий и помыслы греховныя отгоняющий, удивлялася еси несказанному милосердию Божию, и яко вся возможна человеку о укрепляющем Бозе, Егоже силою в немощней плоти Великия подвиги совершила еси и многия страдания претерпела еси любве ради Христовы. Мы же приносим ти многохвальное пение, с веселием зовуще:
     Радуйся, от единаго Господа спасения искавшая;
     Радуйся, к Матери Его со слезами горькими припадавшая.
     Радуйся, яко, на икону Владычицы мысленне взирающи, страстей наветы посрамляла еси;
     Радуйся, яко болезньми многими здравие души стяжала еси.
     Радуйся, телесная движения и разжжения воздержанием поистинне изсушившая;
     Радуйся, страстей свирепство жительством своим угасившая.
     Радуйся, высотою подвига твоего Ангелы удивившая;
     Радуйся, житием твоим духи тьмы посрамившая.
     Радуйся, преподобная мати Марие, чудо Божия милосердия.

Кондак 6
     Проповедника дел твоих избра Господь Зосиму и приведе его в пустыню. Он же надеяся обрести некоего от отец, тамо подвизающагося, иже бы могл пользовати его, и узрев тя, нагу и черну телом, начат вслед тебе тещи и слезно вопити: «Стани и подаждь ми молитву твою и благословение ради истиннаго Бога, Егоже ради в пустыни сей живеше и Емуже поеши непрестанно: Аллилуия».

Икос 6
     Возсияла еси в пустыни, яко свеща многосветлая, преподобная мати, подвиги твоими. Сего ради узре тя Зосима во время молитвы твоей возвышену яко на лакоть един от земли и на воздусе стоящую. Страхом же множайшим содержимь, поверже себе на землю и глагола:
     Радуйся, пустынное сокровище, от мира утаенное;
     Радуйся, прозрения даром украшенная.
     Радуйся, наготу Христа ради носивая;
     Радуйся, словом Божиим покрывавшаяся.
     Радуйся, научающая нас презирати плоть свою, преходит бо;
     Радуйся, поучающая прилежати о души, вещи безсмертней.
     Радуйся, великая угодница Христова, в мире премирно пожившая;
     Радуйся, первее блудница, ныне же невеста Христова, целомудрием блистающая.
     Радуйся, преподобная мати Марие, чудо Божия милосердия.

Кондак 7
     Хотя Господь явити дела твоя миру, да величия Божия явлены будут, внуши старцу Зосиме припадати к ногама твоима, умоляя тя не скрыта от него жития твоего. Ты же, яко неимущая добродетелей, поведала еси первее старцу токмо о греховней жизни твоей, скрывающи подвиги и борения в пустыни, всех нас научающи в смирении взывати Богу: Аллилуия.

Икос 7
     Новое чудо явил есть Господь, показав тя, книгам никогдаже учившуюся, словеса от Священнаго Писания произносящую. Ты же рече Зосиме, удивльшемуся о сем: «Слово Божие живо и действенно учит разуму человека». Мы же, прославляюще Бога, творящего славная и неизреченная, дающаго великая любящим Его, зовем ти сице:
     Радуйся, воздержанием ум твой просветившая;
     Радуйся, добродетелей добротою душу твою облиставшая.
     Радуйся, смирением высокая стяжавшая;
     Радуйся, нищетою богатство нетленное снискавшая.
     Радуйся, Божественными видении и детельми душу свою украсившая;
     Радуйся, честне приятелище Духа Святаго.
     Радуйся, непостыдное христиан прибежище;
     Радуйся, Ангелов собеседнице и преподобных жен похвало.
     Радуйся, преподобная мати Марие, чудо Божия милосердия.

Кондак 8
     Странное и дивное смирение явила еси, егда просила старца: «Заклинаю тя воплощением Слова Божия молитися за мя, блудницу, и да никомуже речеши о мне, дондеже Бог от земли возьмет мя. В пост же грядущаго лета не преходи Иордан, но в день таинственныя вечери возьми от Тела и Крови Христовы и пожди мя на оной Иордана стране, да, пришедше, причащуся Пречистых Даров, ихже усердно желаю, и абие прославлю Всещедраго Бога, зовущи Ему: Аллилуия».

Икос 8
     Весь бе трепетом объят, Зосима поклонися до земли и целова место, идеже стояху стопы ногу твоею, и возвратися, хваля и благословя Христа Бога нашего. Лету прешедшу, сотвори Зосима завещанное ему и седе на брезе Иорданове, ждый тя, честная мати, слезя и помышляя: «Увы мне, несть корабля, и како Иордан прейдет и приидет ко мне, недостойному». Мы же, благодать, данную ти свыше, познавше, ублажаем тя звании сими:
     Радуйся, из глубины греха на высоту безстрастия востекшая;
     Радуйся, в пустыни непроходней едина с единым Богом пребывшая.
     Радуйся, яко душу твою к безстрастию возвысила еси;
     Радуйся, яко чистоту душевную и телесную стяжала еси.
     Радуйся, даров Святаго Духа вместилище;
     Радуйся, Церкве Христовы Божественное удобрение.
     Радуйся, яко Ангели Божии дивятся чистоте твоей;
     Радуйся, постников высото и преподобных славо.
     Радуйся, преподобная мати Марие, чудо Божия милосердия.

Кондак 9
     Всякое естество ангельское удивися, егда виде тя знамением крестным Иордан знаменавшую и купно с тем взошедшую на воду и ходящую верху ея, яко посуху. Зосима же в страхе хоте поклонитися ти, но ты возбрани ему. Он же, послушав тя, токмо рече Богу: Аллилуия.

Икос 9
     Ветии многовещаннии недоумеют, како восхвалити твою ангелоподобную чистоту, терпение и покаяние, имиже Богу угодила еси и явилася еси равноангельна на земли. Зосима, ужасом содержимь быв от предивнаго видения на Иордане, рече: «Воистинну Бог неложен есть, обешавый уподобити Себе тех, иже по силе своей очищают себе». Темже и мы, ублажающе тя, глаголем сице:
     Радуйся, иорданския воды немокренными ногами прешедшая;
     Радуйся, на земли небесно пожившая.
     Радуйся, страстей твоих образы благочестно истребившая;
     Радуйся, изображение добродетелей в души твоей написавшая.
     Радуйся, подвигом добрым подвизавшаяся;
     Радуйся, плоть твою духови поработившая.
     Радуйся, мертвость Иисуса в теле носящая;
     Радуйся, воскресения Его славою сияющая.
     Радуйся, преподобная мати Марие, чудо Божия милосердия.

Кондак 10
     Спасительных Таин Христовых причастившися, рече преподобная: «Ныне отпущаеши рабу Твою, Владыко, по глаголу Твоему с миром...» После сего проси Зосиму в грядущее лето прийти на оный поток, идеже ему первее собеседова. Он же отвеща ти: «Хотел бы, аще бы мощно было, в след тебе ходити и выну зрети честное лице твое, поя купно с тобою Богу: Аллилуия».

Икос 10
     «Стена есть мне и подкрепление глагол Божий, — рече, мати, вземше у старца, просящаго тя подкрепитися, токмо три зерна сочива. — Довлеет сие благодати духовней, хранящей естество души нескверненное». Мы же о сем дивимся и хвалебно зовем ти:
     Радуйся, озарившая ум свой сиянием добродетелей;
     Радуйся, соделавшая душу твою Божественныя Троицы жилище.
     Радуйся, яко коварства вражия оскудеша вся крепким постом и молитвою твоею;
     Радуйся, яко слезами твоими уранила еси страстная взыграния.
     Радуйся, воздержанием тела своего плотская стремления истончившая;
     Радуйся, мольбами твоими пред Господом и нас от страстей избавляющая.
     Радуйся, долготерпеливно упованием на Господа укреплявшаяся;
     Радуйся, и нам крепкую веру и надежду подающая.
     Радуйся, преподобная мати Марие, чудо Божия милосердия.

Кондак 11
     Пение надгробное тебе сотвори Зосима, достигнув, лету мимошедшу, места, еже поток знаменавше, и обрет тя лежащую мертву, лице на восток обращенно имущую. Позна же из надписи на земли при главе твоея имя твое и ужасеся, уразумев, яко ты, Божественных Таин причастившися, во един час прешла еси путь, иже сам он прейде, двадесять дний трудяся. Тем же дивящеся сему возопи Богу: Аллилуия.

Икос 11
     Видев Зосима льва, телу твоему предстояща и лижуща нозе твои, трепетен быв. Знаменався же крестным знамением, верова, яко невредно будет сохранен силою лежащия. Лев же, ископав ров, елико довольно бе покрыти тело твое погребаемое, в пустыню, яко тихо овча, удалися. Зосима же во своя возвратися, хвали Бога и тебе взывая сице:
     Радуйся, яко небесную достигла еси жизнь нескончаемую;
     Радуйся, яко сподобилася еси с девами внити внутрь чертога Жениха твоего и Владыки.      Радуйся, венцем безсмертныя жизни от Господа увенчанная;
     Радуйся, во обители райския со славою восприятая.
     Радуйся, яко ныне со Ангелы ликуеши;
     Радуйся, яко ныне на небесех Владыце всех предстоиши.
     Радуйся, молитвеннице о нас непостыдная;
     Радуйся, заступнице наша непобедимая.
     Радуйся, преподобная мати Марие, чудо Божия милосердия.

Кондак 12
     Благодать, данную ти от Бога, ведуще, восхваляем твое в подвизех изрядное житие и просим тя, мати блаженная, помози нам в чистоте и целомудрии пожити, укрепи, богоблаженная, молитвами твоими и нас, да сподобимся выну воспевати хвалебную песнь Богови: Аллилуия.

Икос 12
     Поюще подвиги многострадальнаго и предивнаго жития твоего, славим и ублажаем тя, преподобная, яко многомощную молитвенницу о нас пред Господем. Не забуди нас, почитающих имя твое святое и взывающих ти:
     Радуйся, призывающим тя теплая молитвеннице;
     Радуйся, от Господа всех благих нам подательнице.
     Радуйся, изнемогающих в брани укрепляющая;
     Радуйся, унывающих скоро ободряющая.
     Радуйся, в бедах и скорбех помощнице нам благодатная;
     Радуйся, страждущих целительнице скорая и чудная.
     Радуйся, от плотския брани молящияся к тебе избавляющая;
     Радуйся, яко твоим пособием сокрушаются козни вражия.
     Радуйся, преподобная мати Марие, чудо Божия милосердия.

Кондак 13
     О преславная и предивная мати Марие! Молися присно Христу Богу нашему даровати нам грехов оставление и жития исправление, да тако Небеснаго Царствия наследницы будем, в радости поюще с тобою и со всеми святыми Спасителю нашему благодарственную песнь: Аллилуия.
Этот кондак читается трижды, затем 1-й икос «Ангел возбрани тебе...» и 1-й кондак «Избранней от Господа...».

Молитва преподобной Марии Египетской
     О великая Христова угодница, преподобная мати Марие! Услыши недостойную молитву нас, грешных (имена), избави нас, преподобная мати, от страстей, воюющих на души наша, от всякия печали и находяшия напасти, от внезапныя смерти и от всякаго зла, в час же разлучения души от тела отжени, святая угодница, всякую лукавую мысль и лукавые бесы, яко да приимет души наша с миром в место светло Христос Господь Бог наш, яко от Него очищение грехов, и Той есть спасение душ наших, Емуже подобает всякая слава, честь и поклонение, со Отцем и Святым Духом, ныне и присно и во веки веков.

Молитва иная
     О великая Христова угоднице преподобная Марие! На Небеси Престолу Божию предстоящи, на земли же духом любве с нами пребывающи, имеющи дерзновение ко Господу, моли спасти рабы Его, к тебе с любовию притекающыя. Испроси нам у Великомилостиваго Владыки и Господа веры непорочное соблюдение, градов и весей наших утверждение, от глада и пагубы избавление, скорбящым утешение, недугующым — исцеление, падшим — возстание, заблуждшым — укрепление, в делах благих преспеяние и благословение, сиротам и вдовицам — заступление и отшедшим от сего жития — вечное упокоение, всем же нам в день Страшного Суда одесную страны общники быти и блаженный глас Судии Моего услышати: приидите, благословеннии Отца Моего, наследуйте уготованное вам Царствие от сложения мира, и тамо пребывания во веки получити. Аминь.

Молитва третья
     О равноангельная и всесветлая Марие преподобная, убелившая ризу души своея в Крови Агнчей и зрящая ныне на небеси невечерний свет Царствия Небеснаго Христова, помяни мя, грешнаго и убогаго раба твоего, в богоприятных твоих к Богу молитвах к защити мя от ловления врага, веси бо его козни и лютую в сем житии на ны брань, даруй ми слезы покаяния, омывающия душевную мою скверну, испроси ми оставление грехов и жития исправление, избави мя от злых моих обычаев, лености и нерадения, научи мя постоянству и крепости в борьбе с моими греховными навыками, напечатлей в сердце моем и уме пресветлый образ тобою любимаго Христа, уязви мою душу Его всепрощающею любовию, да не оскорблю милосердие Его новыми грехами. Умоли о мне и милостивую Поручницу твою, Пречистую Деву Богородицу, да и мне, недостойному, дарует всесильную Свою помощь и наставит на стезю спасения. Во исходе же от сего мира, о мати преподобная, сподоби мя причащения Святых Божественных Таин, в страшный час смерти помози, на воздушных мытарствах заступи и предстательством твоим отверзи ми двери Небеснаго Царствия, идеже по трудех и подвизех ныне водворяешися, зрящи и прославляющи пресладкаго Искупителя твоего, пришедшаго в мир грешныя спасти и Божественною Своею Кровию омывающаго нас от всякаго греха. Емуже слава, честь и поклонение со Безначальным Его Отцем и Пречистым и Животворящим Духом в безконечныя веки. Аминь.

Тропарь преподобной Марии Египетской
Тропарь, глас 8:
     В тебе, мати, известно спасеся еже по образу: приимши бо крест последовала еси Христу, и дающи учила еси презирати убо плоть, преходит бо: прилежати же о души, вещи безсмертней. Темже и со Ангелы срадуется, преподобная Марие, дух твой.

Кондак, глас 3:
     Блудами первее преисполнена всяческими, Христова невеста днесь покаянием явися, ангельское жительство подражающи демоны Креста оружием погубляет. Сего ради Царствия невеста явилася еси, Марие преславная.

Кондак, глас 4:
     Греха мглы избежавши, покаяния светом озаривши твое сердце славная, пришла еси ко Христу: сего всенепорочную и святую матерь молитвенницу милостивную принесла еси. Отонудуже и прегрешений обрела еси оставление, и со Ангелы присно срадуешися.

Величание
     Ублажаем тя, преподобная мати Марие, и чтим святую память твою, ты бо молиши за нас Христа Бога нашего.

Акафисты zvonnitsa.ru/orthodoxy/akafisti/384/13358/

Кондак 1
     Уготованная Господом к равноапостольному служению, святая Марие Магдалино, возлюбленному ти Христу последовала еси; темже песньми с любовию восхваляем тя: ты же, яко имущая дерзновение велие ко Господу, от всяких нас бед молитвами твоими избави, да с радостию непрестанно зовем ти:
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Икос 1
     Ангелов Творец и Господь сил, предуведевый благое произволение твое, святая мироносице, от града Магдалы избра тя, свободив от диавольския сети: ты же по сих верная служительница Господеви явилася еси, ревнующи о прославлении Его житием и служением. Мы же, чудящеся таковому о тебе Божию смотрению, во умилении сердец зовем ти:
     Радуйся, от Сына Божия из тьмы диавольския в чудный свет Его призванная;
     Радуйся, того благодатию телом и духом до конца чиста пребывшая.
     Радуйся, с чистотою сердца и нищету духовную до конца сохранившая;
     Радуйся, первее всех воскресшаго Христа узрети сподобившаяся.
     Радуйся, силу вражию добре победившая;
     Радуйся, крепкою верою и теплою любовию ко Христу Богу просиявшая.
     Радуйся, всем сердцем Спаса Христа возлюбившая;
     Радуйся, верно тому даже до смерти послужившая.
     Радуйся, душею твоею благодатно обновившаяся;
     Радуйся, проповедь Евангелия в сокровище сердца своего вместившая.
     Радуйся, проповедь Воскресения апостолом возвестившая;
     Радуйся, ангельскою беседою почтенная.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 2
     Видящи святая Мария себе от седми лютых бесов избавление, всем сердцем победителю ада Христу Богу прилепися, вся люди научающи не усты токмо, но и всем житием Богу служити, вопиющи Тому: Аллилуиа.

Икос 2
     Разум человеческий недоумевает, помышляя, из каковыя беды на высоту ангелоподобнаго жития благодатию Христовою возшла еси, достохвальная Марие Магдалино. Темже и мы, добрую тя предстательницу имуще, молимся тебе тепле: избави и нас от бездны греховныя, да любовию вопием ти таковая:
     Радуйся, лютаго демонскаго рабства избегшая;
     Радуйся, лесть лукавых бесов яве обличившая.
     Радуйся, в напасти вражией ко Христу Богу прибегати всех научившая;
     Радуйся, никомуже отчаяватися в велицей греховней скорби побуждающая.
     Радуйся, ко святости всем грешником путь показавшая;
     Радуйся, всемощную силу благодати Христовы познавшая.
     Радуйся, достойнаго Богу благодарения добрая наставнице;
     Радуйся, истиннаго богохваления верная учительнице.
     Радуйся, в житии твоем правый путь земнаго течения нам показавшая;
     Радуйся, всем грешником пред Богом благая заступнице.
     Радуйся, душ наших от лести сатанинския защитнице;
     Радуйся, во всякой скорби теплая ко Христу наша ходатаице.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 3
     Силою божественныя благодати, купно же и своим благим произволением безпечально оставила еси дом отца твоего, якоже древле Авраам, и радостно последовала еси Христу Богу: темже молим тя, ученице Христова, славная Марие, молитвами твоими и наша сердца просвети любовию к Богу, да и ныне и присно взываем Тому: Аллилуиа.

Икос 3
     Имущи богодарованную ти премудрости силу, мужески отвергла еси, Марие Магдалино, сего мира красная, и яко ученица добрая, премногим милосердием обнищавшему за ны Слову истинно послужила еси. Сего ради и мы со умилением вопием ти:
     Радуйся, добрая Христова ученице;
     Радуйся, истинныя любве к Богу наставнице.
     Радуйся, суету мира сего добре познавшая;
     Радуйся, мужески его радости отвергшая.
     Радуйся, красная мира нивочтоже вменившая;
     Радуйся, чину иноческому добрый путь жития предпоказавшая.
     Радуйся, всех ко Христу Богу путеводствующая;
     Радуйся, для дел милосердия из дому земнаго изшедшая.
     Радуйся, Христово милосердие зде и на небеси обретшая;
     Радуйся, яко тем блаженства вечнаго достигшая.
     Радуйся, мудрая агнице, от злых волков к доброму пастырю Христу прибегшая;
     Радуйся, во двор словесных овец его вшедшая.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 4
     Буря бесовския ярости превеликою силою устремися на храм души твоея, святая Марие, но того поколебати до конца не возможе: обрела бо еси спасение на твердем веры Христовы камени, на немже ты, мудрая жено, недвижимо стоящи, учиши всех всеблагому Богу воспевати песнь: Аллилуиа.

Икос 4
     Слышаще, богомудрая Марие, яко в последовании Христу обрела еси истинное веселие сердца, правду, мир и радость о Дусе Святе, тщимся и мы явитися в лице причастник сего Царства Божия. Тебе же, яко причастнице того сущей и путь нам к нему показавшей, рцем вси таковая:
     Радуйся, небесную Иисусову сладость возлюбившая;
     Радуйся, жизнь истинную во Христе обретшая.
     Радуйся, тояжде образ и нам верно показавшая;
     Радуйся, в радости небесней ныне присно живущая.
     Радуйся, райския снеди непрестанно вкушающая;
     Радуйся, огнь любве к Богу в сердце твоем возжегшая.
     Радуйся, Христом Богом, яко раба ему верная, возлюбленная;
     Радуйся, прилежная о нас к Богу молитвеннице.
     Радуйся, в бедах наших помощнице;
     Радуйся, наша благая и кроткая учительнице.
     Радуйся, Духа Святаго Пречестное жилище.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 5
     Боготечная звезда спутствующи Христу, славная Марие, посреде мироносиц явилася еси. С ними же ныне непрестанно предстоящи святей Троице, и нас молитвами твоими к священному тех лику совокупи, путь темный жития нашего светом твоим озаряющи, да радостно возопием Богу: Аллилуиа.

Икос 5
     Видящи, святая Марие, Христа Бога на кресте висяща, дивное мужество показала еси: мнози бо от ученик Учителя своего оставивша: ты же, непрестанными божественными ученьми Того душу и мысль разжегши, немощь естества женскаго превозмогла еси, и тако причастилася еси спасительней Христовой страсти. Сего ради мы, сицевое твое доблественное мужество зряще, вопием ти:
     Радуйся, мудрых жен красото и удобрение;
     Радуйся, христиан всех доброе радование.
     Радуйся, Христу Богу, на кресте висяшу, сострадавшая;
     Радуйся, непоколебимей любви к тому нам путь показавшая.
     Радуйся, сицевою любовию в предстательстве о нас к Богу дерзновение велие обретшая;
     Радуйся, женам доброто и похваление.
     Радуйся, Христианом крепкое прибежище;
     Радуйся, паче сильных мужей крепчайшая.
     Радуйся, мудрецов мира сего мудрейшая;
     Радуйся, яко тебе тайная премудрости своея Бог явил есть.
     Радуйся, яко тебе истинному богословию Сам Бог Слово научил есть;
     Радуйся, Христа Бога паче жизни своея возлюбившая.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 6
     Благодатию Твоею немощная врачуеши и некрепкия сосуды тверды соделоваеши, Христе Царю. Мироносицы бо жены у креста твоего мужески предстоят и благодать крестную всем небоязненно возвещают: лицы же мудрых жен, ликам ангельским уподобитися тщащеся, бодренно непрестанно взывают Троице Святей: Аллилуиа.

Икос 6
     Взыскующе озаритися светом истиннаго богоразумия, егда Бога на кресте висяща видела еси, глаголала еси слезящи, дивная Марие: како Жизнь смерть вольную ныне приемлет? Мы же, славное просвещение твое благодатию Святаго Духа ведуще, вопием ти сицевая:
     Радуйся, Христа распята от глубины души оплакавшая;
     Радуйся, веселие вечное в селениих небесных обретшая.
     Радуйся, нам образ добраго плача показавшая;
     Радуйся, яко ты еси наше непрестанное радование.
     Радуйся, всех скорбящих утешение неложное;
     Радуйся, яко Христу, Его ради, на земли спострадала еси.
     Радуйся, яко с Ним о Нем на небеси прославляешися;
     Радуйся, всех врагов наших крепкая победительнице.
     Радуйся, во всех скорбех наших скорая помощнице;
     Радуйся, яко всем христианом воспоминание твое пресладко.
     Радуйся, яко всей Церкви Христовой имя твое пречестно;
     Радуйся, истинная лозо винограда Христова.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 7
     Хотящи уразумети креста всепобедительную силу, до конца Христовой страсти предстояла еси у креста Спасова со иными женами, преславная Марие. Матери же Господни болезненно состраждущи, тако недоуменно вопияла еси: что сие есть странное чудо; содержай всю тварь пострадати изволи. Мы же на живоносный крест волею вознесшемуся любовию вопием: Аллилуиа.

Икос 7
     Дивная жена явилася еси, блаженная Марие, любовию твоею ко Христу Богу: тую бо горестными изъявляя рыданьми, ко снятому со креста припадающи, слезами пречистыя язвы Его омыла еси. Еще же благообразному Иосифу и правдолюбивому Никодиму последующи, ко гробу Спасову со иными святыми женами текла еси, ово плачущи, ово плачущую неутешно Матерь Его Пренепорочную, Ейже душу лютое оружие пройде, утешающи. Мы же, такову твою доблесть ведуще, смиренно взываем ти:
     Радуйся, пречистыя язвы Христовы слезами омывшая;
     Радуйся, Матери Того Пренепорочней яве сострадавшая.
     Радуйся, Христа даже до гроба неоставившая;
     Радуйся, во гроб полагавшуюся Жизнь недоуменно зревшая.
     Радуйся, слезам покаяния наша добрая учительнице;
     Радуйся, теми слезами греховныя скверны омывати нас наставляющая.
     Радуйся, теми же сердце наше окамененное умягчати побуждающая;
     Радуйся, образ истинной мудрости нам показавшая.
     Радуйся, памятовати выну страсти Христовы нас научающая;
     Радуйся, славная Марие, купно с пренепорочною Девою Мариею, наша верная ходатаице.
     Радуйся, добрая слуго Христова;
     Радуйся, Господеви, а не человеком угождавшая.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 8
     Странно, богомудрая Марие, явися тебе погребение всем жизнь подающаго Жизнодавца: Того любовию уязвляема, еще сущей тьме, ко гробу Его принесла еси миро и слезныя пролила еси ароматы. Темже и пребываеши ныне во благовонных рая селениих со ангельскими лики взывающи непрестанно Богу: Аллилуиа.

Икос 8
     Весь сладость, весь радость, весь жизнь тебе бысть Иисус, святая Марие: Того ради, видевши камень взят от гроба. Сего же не обретши, рыдающи текла еси к живому веры камени Симону и другому, егоже любляще Иисус, ученику, болезненно глаголющи има: взяша Господа от гроба и не вем, где положиша Его. Ныне же ты, свободившися от скорби тоя, со Христом вечно радуешися на небеси. Мы же на земли в таковую радость молитвами твоими внити чающе, со умилением вопием ти тако:
     Радуйся, сиянием любве твоей ко Христу тьму ночную победившая;
     Радуйся, нощному бдению в молитве нас научившая.
     Радуйся, светом вечным на небеси осиянная;
     Радуйся, и нищетою духовною Царство Небесное купившая;
     Радуйся, яко по скорби о страстех Христовых обрела еси обильное утешение;
     Радуйся, жено кроткая, наследнице земли небеснаго рая.
     Радуйся, алкавшая и жаждавшая правды Христовы, яко ты ныне насыщаешися трапезы небесныя;
     Радуйся, милостивая, милость Владыки обретшая, и о нашем помиловании того усердно просящая.
     Радуйся, ты бо ныне, яко чистая сердцем, Бога лицем к лицу зриши;
     Радуйся, яко сподобилася еси первее всех видети Воскресение Христа, вечнаго мира.
     Радуйся, изгнанная правды ради Христовы, яко твое есть Царство Божие;
     Радуйся, приобретшая вечное веселие и мзду многу на небесех.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 9
     Всяк чин ангельский удивися великой тайне славнаго Воскресения Твоего, Христе Царю, ад же притрепетен бысть, видев, яко снизшел еси в преисподная земли и сокрушил еси вереи вечныя, содержащия связанныя, Христе. Мы же радости жен мироносиц сорадующеся, с веселием вопием: Аллилуиа.

Икос 9
     Ветий многовещанных языки не довлеют достойно изрещи великую скорбь твою, славная Марие, егда стояла еси вне гроба плачущи. Кто бо возможет рещи болезнь души твоея, егда не обрела еси во гробе паче жизни своея возлюбленнаго ти Господа; прискорбное сердце твое не возможе внимати утешению ангелов светлых. Сицевую скорбь твою со умилением воспоминающе, воспеваем ти таковая:
     Радуйся, видети Христа Иисуса в пещеру проникшая;
     Радуйся, ныне того на Престоле Славы седяща зрящая;
     Радуйся, светлых небожителей еще сущи на земли узревшая;
     Радуйся, от тех глас радости Воскресения Христова приимшая.
     Радуйся, яко ты с ними ныне присно радуешися;
     Радуйся, любовию миро Христу принесшая.
     Радуйся, во благоухающую мира Христова воню сладце притекшая;
     Радуйся, отвергшая радостей мира греховнаго горечь.
     Радуйся, возлюбившая небесную Иисусову сладость;
     Радуйся, добрая леторасле сада Иисусова.
     Радуйся, благоплодная лозо вертограда Божия;
     Радуйся, преукрашенный Храм Духа Всесвятаго явльшаяся.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 10
     Спасти хотя мир, аще и во гроб снизшел еси безсмертне, но адову разрушил еси силу и воскресл еси, яко победитель, Христе Боже, женам мироносицам вещавый: Радуйтеся. С ними же и мы ныне песнь радости приносим ти: Аллилуиа.

Икос 10
     Стены каменныя твердее бысть любовь твоя к возлюбльшему тя Христу, мироносице славная Магдалине Марие. Темже едина видела еси прежде инех Живота нашего из гроба возставша: вертоградаря же того непщевала еси быти и вопияла еси тому, забывши естества немощь: аще ты еси взял Его, повеждь ми, где еси положил Его, и аз возму Его. Но сладостный того глас показа ти Учителя, нас же глашати научи тебе сице:
     Радуйся, истиннаго Вертоградаря воскресша первее инех узревшая;
     Радуйся, в вертограде небесном водворившаяся.
     Радуйся, гроздием Божия благодати ныне непрестанно питающаяся;
     Радуйся, вином райских радостей веселящаяся.
     Радуйся, яко твоя любовь к Богу естество победила есть;
     Радуйся, яко тая и нас ревности Божией научила есть.
     Радуйся, из уст Христовых вещание Воскресения первее приемшая;
     Радуйся, Апостолом глаголы радости первее возвестившая.
     Радуйся, вечную радость на небеси обретшая;
     Радуйся, яко ты и нас к той радости тобою зовеши.
     Радуйся, яко о сем о нас к Богу непрестанно ходатайствуеши;
     Радуйся, яко Тому молитвы о нас тепле приносиши.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 11
     Ни едино же слово довлеет воспети по достоянию божественную радость Воскресения Христова, юже со иными женами, славная Марие, апостолом возвести в сей нареченный и святый день, праздников праздник и торжество из торжеств. Темже, пред величием неизреченных щедрот твоих, Христе Царю, на нас бывших, преклоняющеся, со смирением и любовию зовем ти: Аллилуиа.

Икос 11
     Светозарная звезда греховному миру явилася еси, Магдалино Марие, егда по славнем Спасове Вознесении, грады и веси преходящи и слово Евангелия всюду возвещаюши, многи подклонила еси под благое иго Христово. Достигши же даже до древняго Рима, мужески Тиверию кесарю предстала еси и тому образом краснаго яйца и мудрыми словесы живоносную силу Христа уяснила еси, лукаваго же Пилата и безбожнаго архиерея обличила еси, да по беззаконным делом своим достойная приимут: таковому подвигу апостольства твоего дивящеся, радостно вопием ти сице:
     Радуйся, Христова учения славная благовестительнице;
     Радуйся, языческия тьмы светозарная прогонительнице.
     Радуйся, греховныя узы многих человек разрешившая;
     Радуйся, Христовей мудрости всех научившая.
     Радуйся, многия люди из тьмы неведения в чудный Христа свет приведшая;
     Радуйся, образ твердаго стояния за правду Христову нам показавшая.
     Радуйся, спасение душ грешников паче своея жизни возлюбившая;
     Радуйся, заповеди Христовы добре уразумевшая.
     Радуйся, тем верно последовавшая;
     Радуйся, тьму языческую дерзновенно обличившая.
     Радуйся, гнева кесарева не убоявшаяся;
     Радуйся, злобу и коварство врагов Христовых тому показавшая.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 12
     Благодати от Бога изобильно исполненная, множество душ ко Христу привела еси, славная Марие: по сем же пришла еси во Ефес, идеже апостольски любовию со апостолом любве спасению человек послуживши, блаженным успением ко Господу преставилася еси, емуже ныне с многочисленными небесными певцы непрестанно поеши: Аллилуиа.

Икос 12
     Поюще твое достохвальное житие на земли и славу, яже на небеси, радостно славим, поем и величаем дивнаго во святых своих Царя Небеснаго: зане не токмо сама ты, святая Марие, того благодатию, в селениих праведных ныне ликуеши, но и нас веселиши на земли, оставивши нам многоценное миро мощей твоих, яже мудрый Лев-царь, из Ефеса в Константин-град пренести повеле. Тыя и мы, яко источающыя благодать неоскудную всем любовию притекающым, верою и любовию мысленно лобызающе, умильно воспеваем ти таковая:
     Радуйся, на земли любовию ко Христу горевшая;
     Радуйся, на небеси в райския обители того вселившаяся.
     Радуйся, верным твердое заступление;
     Радуйся, благовонное миро, Церковь благоухающее.
     Радуйся, кадильнице златая, фимиам молитвы о нас к Богу непрестанно приносящая;
     Радуйся, источник исцелений неоскудный.
     Радуйся, сокровище Божией благодати неиждиваемое;
     Радуйся, ангельских ликов верная соучастнице.
     Радуйся, небесных чертогов славная жительнице;
     Радуйся, яко мзда твоя многа есть на небесех.
     Радуйся, яко радость твоя вечна есть во обителех святых;
     Радуйся, яко ты и нам прияти радость, благодать же и славу непрестанно ходатайствуеши.
     Радуйся, святая равноапостольная Марие Магдалино, паче всех благ сладчайшаго Господа Иисуса возлюбившая.

Кондак 13
     О, пречудное и предивное жен украшение, всем же Христианом похвала и радование, Апостолом равная явльшаяся, мироносице славная Магдалино Марие! Нынешнее наше моление приемши, от всяких нас бед и скорбей душевных и телесных и от враг видимых и невидимых, на нас находящих, избави и к Царствию Небесному ходатайством твоим направи всех, со умилением и любовию поющих о тебе Богу: Аллилуиа.
Этот кондак читается трижды, затем икос 1-й и кондак 1-й

Молитва ко святой равноапостольной Марии Магдалине
     О, святая мироносице и всехвальная равноапостольная Христова ученице Магдалино Марие! К тебе, яко верней и мощней о нас к Богу ходатаице, грешнии и недостойнии ныне усердно прибегаем и в сокрушении сердец, наших молимся. Ты в житии своем страшныя козни бесовския испытала еси, но благодатию Христовою явно тех свободила еси; и нас молитвами твоими от сети бесовския избави, да непрестанно во всем житии нашем делом, словом, мыслию и тайными помышлениями сердец наших верно послужим единому Святому Влaдыце Богу, якоже тому обещалися есмы. Ты паче всех благ земных сладчайшаго Господа Иисуса возлюбила еси и тому чрез все житие добре последовала еси, Божественными учении Его и благодатию не токмо свою душу питающи, но и множество людей от тьмы языческия ко Христа чудному свету приводящи: то ведуще просим тя: испроси нам у Христа Бога благодать просвещающую и освящающую, да ею oceняеми преуспеваем в вере и благочестии, в подвизех любве и самоотвержения, да неленостно тщимся служити ближним в их нуждах духовных и телесных, памятующе пример твоего человеколюбия. Ты, святая Марие, бодренно благодатию Божиею протекла еси житие на земли и мирно отошла еси ко обители небесныя: моли Христа Спаса, да молитвами твоими сподобит нас непреткновенно соверщити странствие наше в сей юдоли плача и в мире и покаянии скончати живот наш, да тако и в святости на земли поживше, вечныя блаженныя жизни на небеси сподобимся и тамо с тобою и всеми святыми вкупе выну восхвалим Троицу нераздельную, воспоим Едино Божество, Отца и Сына и Духа Всесвятаго во веки веков. Аминь.

Молитва иная
     О, святая мироносице, равноапостольная Магдалино Марие! Ты теплою любовию своею ко Христу Богу попрала еси злыя козни вражия и обрела еси безценный бисер Христа и достигла еси Царства Небеснаго. Сего ради к тебе припадаю и умиленною душою и сокрушенным сердцем вопию ти аз недостойный: призри с высоты небесныя на мя боримаго греховными искушениями; виждь, коль многими грехи и беды на всяк день враг запинает мя, ищя моея погибели. Славная и всехвальная ученице Христова, Марие! Умоли возлюбленнаго тобою, и возлюбившаго тя, Христа Бога, да подаст ми оставление многих моих прегрешений, укрепит мя благодатию своею трезвенно и бодренно шествовати путем святых заповедей Его и да соделает мя благоуханным храмом Духа Святаго: да тако в мире непостыдно скончаю многотрудное житие мое на земли и вселюся во светлыя и блаженныя обители рая небеснаго, идеже ты со всеми святыми непрестанно радостно славословиши единосущную Троицу, Отца, Сына и Духа Всесвятаго. Аминь.

Тропарь Марии Магдалине, Мироносице
Тропарь, глас 1:
     Христу, нас ради от Девы рождшемуся, честная Магдалино Марие, последовала еси, Того оправдания и законы хранящи: темже днесь всесвятую твою память празднующе, грехов разрешение молитвами твоими приемлем.

Кондак, глас 3:
     Предстоящи, преславная, у Креста Спасова со иными многими, и Матери Господни состраждущи, и слезы точащи, сие в похвалу приношаше, глаголющи: что сие есть странное чудо, Содержай всю тварь, пострадати изволи: слава державе Твоей.

Величание
     Величаем тя, мироносице святая равноапостольная Марие Магдалино, и чтим болезни и труды твоя, имиже трудилася еси во благовестии Христове.

Акафисты zvonnitsa.ru/orthodoxy/akafisti/287/13360/