Кондак 1
Избранная невесто Христова и скорая помощнице, преподобная мати Марфо, на земли небесно пожившая и дарами Духа Святаго украшенная, воспеваем ти похвальная сия. Ты же, яко имущая велие дерзновение ко господу, молитвами твоими от всяких бед и напастей свобождай нас, тебе зовущих: Радуйся, преподобная мати Марфо, всех страждущих предивная утешительнице.
Икос 1
Ангел Господень во образе светлаго юноши еще в детстве являшеся тебе в нощи и наставляше тя пробуждатися от сна и в молениих подвизатися, тако и нас подвигни, преподобная мати Марфо, от сна лености и нерадения возстати и с любовию вопити ти таковая:
Радуйся, от малых лет Богом избранная;
Радуйся, во утешение нам Господом низпосланная.
Радуйся, постную пищу измлада возлюбившая;
Радуйся, все житие твое в строгом воздержании проведшая.
Радуйся, сестер и сверстниц твоих еще в детстве Божественному учившая;
Радуйся,мнози люди ко спасению душ подвигшая.
Радуйся,житием твоим в Тамбовстей стране процветшая;
Радуйся,по отшествии твоем к Богу о нас молящая.
Радуйся, преподобная мати Марфо, всех страждущих предивная утешительнице.
Кондак 2
Видя Господь, яко ты, преподобная Марфо, не токмо иноческое одеяние возлюбила еси, но и душу твою в непорочности блюдеши, украси тя дарами совета и утешения, да вси, обращавшияся к тебе благодарственно воспоют к Богу: Аллилуия.
Икос 2
Разум Божественный просвети тя, Марфо, егда всех в дому закону Божию учила еси, мы же, дивящеся таковому о тебе Божию произволению, воспеваем сице:
Радуйся, о братиех и сестрех твоих материнския заботы на ся приявшая;
Радуйся, в попечении о ближних житие твое проводившая.
Радуйся,к Матери Божией в молитвах притекавшая;
Радуйся,ближних твоих сему присно наставлявшая.
Радуйся, любовь к иноческой жизни в отрочестве явившая;
Радуйся, крест наставницы с голубиною кротостию не приявшая.
Радуйся, сестру твою на тесный путь монашества направившая;
Радуйся, обитель дев в Кирсанове с нею устроившая.
Радуйся, преподобная мати Марфо, всех страждущих предивная утешительнице.
Кондак 3
Силою свыше осеняемая, преподобная Марфо, была еси приходящим к тебе за советом яко богомудрая наставница. Темже мнози, твоими наставлениями суету земную отвергшии и чин ангельский приявшии, воспеша дивному во Святых Своих Богу: Аллилуия.
Икос 3
Имущи велию любовь ко обителем Божиим, преподобная мати, странствия ко святым местом со усердием совершала еси, и тамо во умилении сердца молитвы ко Господу и Пречистей Его Матере пламенне возносила еси. Мы же, прославляюще Бога, даровавшего нам таковую предстательницу, вопием сице:
Радуйся, в кротости и смирении Агнцу-Христу подражавшая;
Радуйся, яко мудрая дева, елей благодатный сохраншая.
Радуйся, странствия ко святым местом возлюбившая;
Радуйся, Всемилостивую Владычицу непрестанно призывавшая.
Радуйся,душею твоею к Небу устремившаяся;
Радуйся, во обителех святых христианкому подвижничеству научившаяся.
Радуйся, путь в селения Небесныя терпением обретшая;
Радуйся, горняго Иерусалима по смерти достигшая.
Радуйся, преподобная мати Марфо, всех страждущих предивная утешительнице.
Кондак 4
Бурю мирскаго жития отвергши, преподобная мати, во ангельский чин с именем Маргарита облеклася еси в Киевском монастыре. Темже, покой Божий в сердце обретши, воспела еси Богу: Аллилуия.
Икос 4
Слышавше люди ангелоподобное житие твое, преподобная мати Марфо, прихождаша к тебе со упованием и, совет благоразумный получивше, Бога благодариша. Мы же воспеваем ти сице:
Радуйся, от юности сердце твое Небесному Жеиху обручившая;
Радуйся, в делех милосердия и любве к ближним пожившая.
Радуйся, дары Духа Святаго бдением и пощением умножившая;
Радуйся, яко многим христианом примером послужившая.
Радуйся, в житии твоем никого же без помощи оставлявшая;
Радуйся, всех сущих в скорби и нужде принимавшая.
Радуйся, яко и ныне болезнующих душею и телом приемлющая;
Радуйся, яко козни бесовския от нас отъемлющая.
Радуйся, преподобная мати Марфо, всех страждущих предивная утешительнице.
Кондак 5
Боготечною звездою возсияла еси в стране Тамбовстей, преподобная мати Марфо, и явилася воистину безсребренница, егда приносимыя тебе злато и дары благодарных людей раздавала бедным и в нуждах сущим. Темже благодаряще Человеколюбца Бога, даровавшаго нам таковую наставницу, воспеваем Ему: Аллилуия.
Икос 5
Видевше люди богоспасаемого града Кирсанова в тебе дивную попечительницу богадельни дев-тружениц, возрадовашася, яко мнози благоговейнии девицы обретоша зде тихое душеспасительное пристанище, провождающи вся дни своя в служении Богу и блшижним. Сего ради воспеваем ти сицевая:
Радуйся, прелести мира греховнаго в житии твоем поправшая;
Радуйся, в подвизех жизни духовныя сестер твоих утверждавшая.
Радуйся, святых жен-мироносиц служению подражавшая;
Радуйся, заповеди о любве к Богу и ближнему исполнити паче всего возжелавшая.
Радуйся, наставнице ко спасению верная;
Радуйся, к согрешающим и кающимся мати милосердная.
Радуйся, град Кирсанов дивною обителию украсившая;
Радуйся, иго заповедей Христовых на себе восприимшая.
Радуйся, преподобная мати Марфо, всех страждущих предивная утешительнице.
Кондак 6
Проповедати святость жития твоего, богоблаженная мати Марфо, кто достойно может, ты бо провинности ближних твоих на ся принимающи, от наказания тыя свобождала еси. Темже измлада Христу уподобляющися, научила еси верных пети Искупителю Богу: Аллилуия.
Икос 6
Возсиявый в сердце твоем свет истиннаго богоразумия, настави тя, преподобная мати Марфо, в странствиих, бдениих, пощниих, наипаче же в милостынях жительствовати. Мы же, взирающе на подвиги твоя, чистым сердцем взываем ти:
Радуйся, славу змную отвергшая;
Радуйся, суету мирскую презревшая.
Радуйся, путь монашества равноангельно прошедшая;
Радуйся, благую часть на пути сем обретшая.
Радуйся, узким и тернистым путем шествовавшая;
Радуйся, в светлости святых вшедшая.
Радуйся, в сонме преподобных жен на Небеси прославленная;
Радуйся, народа Божия заступнице милостивая и неослабная.
Радуйся, преподобная мати Марфо, всех страждущих предивная утешительнице.
Кондак 7
Хотящи мира сего тленнаго разлучитися и душею к Богу возлетети, заповедала еси ученице твоей Татиане начальство над общиной прияти, да не расточатся, яко овцы, не имущии пастыря, но вкупе поют Богу: Аллилуия.
Икос 7
Новое пророчество преподобнаго Серафима сестрам твоим открыла еси, преподобная Марфо: "в Кирсанове монастырь будет", сим веру в сердцах малодушных укрепляющи в дивныя дела Промыслителя-Бога. Мы же ныне воспеваем ти сицевая:
Радуйся, славу Божию нам являющая;
Радуйся, делами твоими Творца прославляющая.
Радуйся, печалей наших утолительнице;
Радуйся, скверн душевных благая очистительнице.
Радуйся, разслабленным крепость дарующая;
Радуйся, безплодных жен чадородием возвеселяющая.
Радуйся, недугов всяческих безмездная врачевательнице;
Радуйся, кающихся грешников пред Богом благая предстательнице.
Радуйся, преподобная мати Марфо, всех страждущих предивная утешительнице.
Кондак 8
Странное преселение твое из Кирсанова в Тамбов, преподобная Марфо, не уразумеша сестры обители до времене, егда ты весть о твоем скором отшествии получивши, заповедала еси им терпеливыми быти, послушания не оставляти и во всяких нуждах Матерь Божию призывати, Бога же всегда прославляти: Аллилуия.
Икос 8
Всею душею выспрь устремилася еси в час кончины, преподобная Марфо, аще и телом тяжце страждущи, сего ради облак светел осени тя, райскую ветвь тебе Ангел вручи и Сам Христос десницею благослови святое отшествие твое. Мы же ныне благоговейное пение ти приносим:
Радуйся, пред кончиною твоею славою Божественною осиянная;
Радуйся, от Ангела ветвь чудесную приявшая.
Радуйся, неизчетная чудеса по успении твоем явившая;
Радуйся, новый источник благодати открывшая.
Радуйся, со всеми святыми ныне пребывающая;
Радуйся, со Ангелы на небесех Господа воспевающая.
Радуйся, в чертозех небесных веселящаяся;
Радуйся, у Престола Божия присно о нас молящаяся.
Радуйся, преподобная мати Марфо, всех страждущих предивная утешительнице.
Кондак 9
Всяк возраст и сословие прославляша дивныя подвиги твоя, мати Марфо, в житии явленныя. Сестры же Тамбовския Вознесенския обители, приуготовляющи тя к погребению, узреша тайная: вериги и крест велий на теле твоем. Сего ради мы, грешнии, восхваляюще тя, оковы греха победившую, с благоговением и трепетом воспеваем Подвигоположнику всех - Спасу Христу: Аллилуия.
Икос 9
Ветия многовещаныя не возмогут достойно воспети силу любве твоея, преподобная, юже ныне являеши в чудесех исцелений и скорых вспоможениих, подаваемых всем, с верою приходящим ко святым мощем твоим. Темже, прославляюще прославльшего тя Господа, вопием ти таковая:
Радуйся, не плоть твою, но ближних возлюбившая;
Радуйся, и по отшествии твоем изрядно людем послуживая.
Радуйся, Духа святаго дивное селение;
Радуйся, стяжавшая ко Господу дерзновение.
Радуйся, молитвами твоими от недуга пиянства избавляющая;
Радуйся, усердно Богу служащим чудную помощь являющая.
Радуйся, Тамбовския страны неусыпная печальнице;
Радуйся, святителя Питирима усердная на Небесех сомолитвеннице.
Радуйся, преподобная мати Марфо, всех страждущих предивная утешительнице.
Кондак 10
Спасающи от соблазнов вражиих, преподобная мати Марфо, обличением твоим люди многажды вразумила еси. Се бо некоему святотатцу дерзкому во сне явилася еси, и камень надгробный им унесенный с твоея могилы, возвратити на место повелела еси. Вси же, с верою и благоговением память твою творящии, сподобляются твоея скорыя помощи и защиты, и воспевают Источнику всех благих Богу: Аллилуия.
Икос 10
Стена обители Кирсановския Пресвятая Богородица бысть, ты бо, преподобная мати, во всяких нуждах и печалех Царицу небеси и земли усердно призывала еси. Темже, восхваляюще тя, яко верную служительницу и послушницу Пречистыя Владычицы, вопием сицевая:
Радуйся, Всемилостивей Владычице похвалы умиленно воспевавшая;
Радуйся, Ея святыя обители благоговейно почитавшая.
Радуйся, Всепречистей Деве чистотою жизни твоея подражавшая;
Радуйся, Ея пресвятым именем козни вражия побеждавшая.
Радуйся, икону Богоматери "Тихвинскую" в благословение сестрам твоим оставившая;
Радуйся, Небесную Царицу делами твоими прославившая.
Радуйся, под кровом Божией Матери в радости ныне пребывающая;
Радуйся, о всех нас, многогрешных благочестно жити делающих, Ю умоляющая.
Радуйся, преподобная мати Марфо, всех страждущих предивная утешительнице.
Кондак 11
Пение сердечное приносят ти, преподобная Марфо, тамбовстии людие, от бед, скорбей, напастей и болезней молитвами твоими избавленнии, и, благодаряще Бога, даровавшаго им небесную ходатаицу, вопиют Ему: Аллилуия.
Икос 11
Светолепною зарею возсия нам житие твое, богомудрая Марфо, темже молящихся у раки святых мощей твоих, чающих утешения и помощи, николиже безответна оставила еси. Сего ради вопием ти сицевая:
Радуйся, твердостию веры твоея православных людей укрепляющая;
Радуйся, храбрая воительнице, мечем молитвы демонов посецающая.
Радуйся, благочестное житие семейств устрояющая;
Радуйся, от детоубиств во чреве матерей ограждающая.
Радуйся, от клеветы и суда неправедного защищающая;
Радуйся, всех враждующих примиряющая.
Радуйся, детские слезы на радость пременяющая;
Радуйся, вдов и сирот от нужд избавляющая.
Радуйся, преподобная мати Марфо, всех страждущих предивная утешительнице.
Кондак 12
Благодати исполненный сосуд явилася еси, преподобная мати Марфо, юже изливаеши изобильно на всех, чтущих память твою и ко гробу твоему с верою притекающих; темже и мы, грешнии, почитающе тя, молим ти ся: не остави нас без помощи твоея и попечения, обремененных грехми и немощами, но воздвигни в покаянии прославляти Господа: Аллилуия.
Икос 12
Поюще многая твоя явления и заступления, преподобная мати Марфо, прославляем Бога, даровавшего нам тя, якоже тихое пристанище в море5 житейском, да вси, по водам тем плавающии, обретут мир Христов и покой душам своим, воспевающе тя благодарным сердцем:
Радуйся, обидимых защищающая;
Радуйся, находящихся в распре умиряющая.
Радуйся, земное поприще достойно прешедшая;
Радуйся, от Царя Небеснаго венец славы приемшая.
Радуйся, Богом прославленная;
Радуйся, народом Божиим ублажаемая.
Радуйся, духовную рабость нам принесшая;
Радуйся, благоуханным крином в земле Тамбовстей процветшая.
Радуйся, преподобная мати Марфо, всех страждущих предивная утешительнице.
Кондак 13
О, преподобная мати Марфо, приими от нас грешных моления сия, тебе приносимыя, и огради ны от наветов духов тьмы, оковами страстей нас обдержащих, избави нас от суеверия, ересей, расколов и церковных нестроений, от всяких бед и напастей; умоли Вседержителя Бога крепость и терпение подати нам, да, вземше крест свой, во след Христу грядем, поюще Ему: Аллилуия, аллилуия, аллилуия.
 

 

Акафисты zvonnitsa.ru/orthodoxy/akafisti/384/13611/

Кондак 1
Избранный угодниче Христов и чудотворче, преподобне отче наш Мароне, похвальное пение приносим ти, любовию чтущии твоя подвиги и труды, ими же Богу угодил еси, от Него же и дар исцеления недугов приял еси, яко имеяй дерзновение к Подателю здравия, от всяких нас бед и болезней свободи, да зовем ти:

Радуйся, Мароне пустынниче, скорбных врачу и иноков наставниче.

Икос 1
Ангельский нрав имел еси, отче преподобне, и яко бесплотный, непорочное житие совершил еси на земли, дивный образ совершенства духовнаго нам оставив, да подражаем добродетелем твоим и зовем ти сице:

Радуйся, от юности Господа Единого всем сердцем возлюбивый; радуйся, вся красная мира сего нивочтоже вменивый.

Радуйся, постом и бдением молитвенным плоть твою удручивый; радуйся, непорочный сосуде Божией благодати.

Радуйся, жилище Духа Святаго, украшенное чистотою; радуйся, мужу желаний духовных.

Радуйся, главо, освященная десницею Всевышняго; радуйся, безмолвия рачителю.

Радуйся, молву суетную возненавидевый; радуйся, богомыслия высото.

Радуйся, Сирийския страны прозябение святое; радуйся, Церкви Кирския красото и похваление.

Радуйся, Мароне пустынниче, скорбных врачу и иноков наставниче.

Кондак 2
Видя Господь душу твою яко ниву благовозделанную, к плодоносию духовному, к исканию единаго на потребу направи твой помысл, преподобне. Тем же любве ради Христовы мир оставил еси и всякаго пристрастия суетнаго свободився, притекл еси в пустыню Кирскую Сирии Евфратской на подвиги иноческия, зовый спасающему тя Богу: Аллилуйя.

Икос 2
Разумом богопросвещенным познал еси суету мира сего и непостоянство, в нем же радость сменяется скорбию, благополучие - нечаянными бедами. Тем же вечных благ возжелал еси, отче преподобне, и сия взыскати потщался еси отречением мирских благ и вольною нищетою, подвизая нас звати тебе:

Радуйся, пустынного безмолвия любителю; радуйся, смирения и нестяжания рачителю.

Радуйся, истиннаго самоотвержения совершенный образе; радуйся, иноческаго равноангельнаго жития всеизрядное явление.

Радуйся, правило веры и благочестия; радуйся, зерцало терпеливаго послушания.

Радуйся, слезы духовныя стяжавый; радуйся, плачем временным блаженство вечное снискавый.

Радуйся, молитвами непрестанными прилоги вражия сокрушивый; радуйся, бдением и трудами плоть твою духови покоривый.

Радуйся, постом и воздержанием страсти укротивый; радуйся, суд Божий и муки вечныя приснопамятовавый.

Радуйся, Мароне пустынниче, скорбных врачу и иноков наставниче.

Кондак 3
Силой Всевышняго осененный и укрепленный, в иночестем пострижении власов главы твоея все плотское мудрование отложил еси, преподобне, и яко воин благоискусный, власяницу иноческую в броню спасения стяжав, и непобедимым оружием Креста Христова вооружився, крепко ратовал еси противу врага невидимаго, диавола, смирением глубоким побеждая его вознесенную гордыню и выну вопия ко Господу: Аллилуйя.

Икос 3
Имея помышление о совершенном отрешении от соблазнов мира сего, пришел еси в пустыню суровую сирийскую, обрел еси тамо гору высокую, на ней же древле требище идольское бяше, и Богу освятив, в нем пребывал еси, имея небо покровом и землю одром упокоения, и кожаныя ветхия ризы одеянием многотрудному твоему телу, зноем опаляему и мразом померзаему, емуже ни малого угождения попускал еси, да не возобладает плоть над духом твоим, любовию ко Господу пламеневшим. Тем же зовем ти:

Радуйся, пустыню подвиги твоими освятивый; радуйся, жестокое житие пустынное проходивый.

Радуйся, песнопениями немолчными Бога славивый; радуйся, молитвы непрестанныя Господеви возносивый.

Радуйся, постниче не изнемогаяй, былием пустынным питавыйся; радуйся, трудолюбче нелицемерный, праздность возненавидивый.

Радуйся, многошвенныя ризы носивый; радуйся, в терпении и смирении преуспевый.

Радуйся, равноангелен на земли бывый; радуйся, презревый славу человеческую.

Радуйся, сокрушивый сети фарисейского тщеславия и гордыни; радуйся, поправый высокоумия душевредную прелесть.

Радуйся, Мароне пустынниче, скорбных врачу и иноков наставниче.

Кондак 4
Буря искушений и устремлений диавольских не возможе поколебати храмины твоея душевныя, преподобне отче, основана бо бе на твердом камени веры во Христа и хранима трезвением, трудами и молитвами непрестанными, ими же непрестанно противоборствовал еси врагу рода человеческаго на месте древнего владычества его: тем же и ныне к тихому пристанищу притекл с лики искупленных в мире, победивших же мир, вопиеши Христу: Аллилуйя.

Икос 4
Слышавше мнози о богоугодном житии твоем, отче Мароне, прихождаху к тебе, ови послушати поучений твоих душеполезных, ови же иночествовати с тобою в обители твоей пустынней, их же ты с отеческою любовию приемля, руководствовал еси стезею правою ко спасению, яко всем звати тебе:

Радуйся, веры истинныя правило; радуйся, кротости духовныя образе.

Радуйся, человече Божий, преподобием украшенный; радуйся, воине Христов, полки невидимых врагов победивый.

Радуйся, мира дольняго мудрый странниче; радуйся, мира горняго достойный насельниче.

Радуйся, в добродетелех благоискусный подвижниче; радуйся, сопричтенный к лику великих пустынножителей.

Радуйся, богомудрый множества сирийских иноков начальниче; радуйся, многая души человеческия Христу уневестивый.

Радуйся, мнозии монастыри руками ученик своих в сирийских пустынех учредивый; радуйся, великий авво множества отцев.

Радуйся, Мароне пустынниче, скорбных врачу и иноков наставниче.

Кондак 5
Боготечное светило быв, всех к Солнцу Правды Христу путеводил еси, угодниче Божий, словом и примером жития твоего святаго, еже все посвящено бысть на служение Богу и ближним твоим. Темже блаженство со святыми унаследовал еси и с ними вечно поеши хвалебную песнь Спасителю Богу: Аллилуйя.

Икос 5
Видевше Ангельстии чинове равноангельное житие твое, отче богоблаженне, смирения твоего глубину, молитвы неотступность, воздержания твердость и велию ревность духа твоего о чистоте, удивишася и прославиша Человеколюбца Бога, укрепляющаго немощное естество человеческое. Мы же ублажаем тя и зовем:

Радуйся, светильниче пустынный, просветивый страну Сирийскую сиянием твоих добродетелей; радуйся, монашествующих дивное украшение.

Радуйся, цвете благоуханный пустыннаго прозябения; радуйся, древо благоплодное небеснаго насаждения.

Радуйся, преподобием и правдою одеянный; радуйся, союзом добродетелей удобренный.

Радуйся, помазание приемый Святаго Духа; радуйся, освященный сосуде благодати Божией.

Радуйся, рабе Христов благий и верный; радуйся, слуго Господень истинный.

Радуйся, заповеди Господни исполнивый и оным научивый учеников твоих; радуйся, великий учителю иноков пустыннолюбивых.

Радуйся, Мароне пустынниче, скорбных врачу и иноков наставниче.

Кондак 6
Проповедник был еси евангельских добродетелей братии твоей, преподобне отче Мароне, и чада твоя духовныя верно руководил еси к вышнему Сиону, идеже есть жилище всех спасенных милосердием Христа Бога, пришедшаго в мир спасти падшее человечество и давшаго Своя спасительныя заповеди во спасение всем, иже подобно тебе, возлюбиша Его сердцем чистым и навыкоша пети Ему: Аллилуйя.

Икос 6
Возсияв в пустыни твоей яко богосветлое светило, отче наш Мароне, светом добрых дел твоих озарил еси души и сердца человеков, искавших от тебе наставитися во спасение: мнози бо ведяху тя равноангельна житием и прихождаху к тебе, да слышат от тебе глаголы живота вечнаго. Тебе убо, святому учителю небесныя истины, сотворшему и научившему, и мы смиреннии зовем хвалебно:

Радуйся, Евангелия Христова немолчный проповедниче, радуйся, апостольских преданий ревностный хранителю.

Радуйся, Православия святыя догматы в душе твоей добре утвердивый; радуйся, верою правою и делы благими Богу угодивый.

Радуйся, во след себе собор учеников твоих ко Христу приведый; радуйся, с ними, яко отец со чады, прияти почести небесныя от Господа возшедый.

Радуйся, не скрывый талант, тебе врученный Всевышним Домовладыкою; радуйся, куплю многу им сотворивый, спасение душ человеческих.

Радуйся, яко твоими ученьми грешнии покаянием Богу угодиша; радуйся, яко твоими наставленьми заблудшии правый путь спасения обретоша.

Радуйся, ближния твоя искренне возлюбивый; радуйся, спасению их душевному усердно послуживый.

Радуйся, Мароне пустынниче, скорбных врачу и иноков наставниче.

Кондак 7
Хотение едино имел еси, преподобне отче, еже Богу благоугождати, и спасению душевному ближних твоих благочестно послужити, темже обитель твоя святая бысть пристанище благоутишное всякому человеку, треволнением моря житейскаго утомленному. Ты бо, яко кормчий добрый, вся ученики твоя и приходящия к тебе люди наставлял еси словом и примером твоим вдали мира и сует его, сердцем и усты немолчно возглашати Богу: Аллилуйя.

Икос 7
Новая звезда светозарная на тверди Церкви Христовой возсиял еси, богоблаженне отче, в пустыни в начале подвига иноческаго уединенно пребывая, в молитвах, лощениях и трудах непрестанных, еже видя Всевидец Господь, собра к тебе паству иноков пустыннолюбивых, иже хотяху жити с тобою и назидатися от тебе во спасение: и тамо среди разрушеннаго владычества древняго омрачителя языков, основал еси селение Богу Единому Истинному, обитель свою, яко крин в пустыни процветшую духовно. Темже прославляем тя сими достодолжными похвалы:

Радуйся, преподобне, святостию и чистотою светло украшенный; радуйся, богоносне, дарами божественными свыше одаренный.

Радуйся, пастырю добрый тобою собраннаго стада словесных овец; радуйся, пустыню непроходимую в вертоград духовный трудами твоими претворивый.

Радуйся, вся страхования и привидения вражия молитвами твоими посрамивый; радуйся, нищий духом, но многих богатящий.

Радуйся, постническаго лика украшение; радуйся, звездо сияющая в сонме преподобных.

Радуйся, яко тесный и прискорбный путь паче пространнаго возлюбил еси; радуйся, воздержанием вся страсти умертвивый.

Радуйся, прежде умертвия твоего мертв бывый греху; радуйся, плоть твою духови любомудренно покоривый.

Радуйся, Мароне пустынниче, скорбных врачу и иноков наставниче.

Кондак 8
Странное и преславное чудо видится всем притекающим к тебе, отче наш Мароне, яко дивно прослави тя Господь: приял бо еси от него дар демоны прогоняти, недуги врачевати, скорбящих утешати, ожесточенныя сердца умягчати, да вси воспевают чудодействующему тобою Господу: Аллилуйя.

Икос 8
Все твое, преблаженне и богоносне отче, тщание и все о том бяше попечение, да выну всезлобному рода христианскаго врагу сопротивлятися и гордую его злобу попирати дивным оружием смирения, поста, безстрастия, труда, молитв непрестанных с коленопреклонением и покаянными слезами, и сими сам улучив победу на супостаты, стяжал еси от Господа дар и всем от лукаваго стужаемым помогати. Помози убо и нам, отче преподобне, твоими молитвами противитися искушениям вражиим и подражати тебе в побеждении страстей наших, да зовем ти:

Радуйся, смирением гордость душепагубную поправый; радуйся, кротостию пламень гнева в себе погасивый.

Радуйся, яко воздержанием и бдением целомудренно душу и тело твое соблюл еси; радуйся, гордыни диавольстей низложителю.

Радуйся, бесов прогонителю; радуйся, силу вражию поправый.

Радуйся, в силе Божией преспевавый; радуйся, лжи лукаваго обличителю.

Радуйся, прельщения бесовскаго посрамителю; радуйся, власть на духи нечистыя приявый.

Радуйся, яко тобою гоними, тии из одержимых ими скоро убегают; радуйся, яко бесныя, к тебе приводимии, здравии и смыслящии от тебе отходят.

Радуйся, Мароне пустынниче, скорбных врачу и иноков наставниче.

Кондак 9
Всем приходившим к тебе, молитвы и благословения ради, преподобне отче, дивно бысть видети тя, в ветсей и многошвенней кожаней ризе ходяща и зело нищетно под древом или во дни болезни в пещере пребывающа, всех - богатых и убогих, вельмож и простых, равно с любовию принимал еси и коемуждо слово на пользу душевную изрекал еси. Смиренно молим тя и нам во дни напасти, искушения, недоумения и сомнений притекающим к тебе, возглаголи слово утешения, наставления и ободрения, да поем предстательством твоим чудодействующему нам Господу: Аллилуйя.

Икос 9
Ветий премудрых превзошел еси, преподобне отче, благодатным помазанием словес твоих, ими же грешныя на покаяние приводил еси, подвизающияся в добродетели укрепил еси, и всем путь спасительный ко Христу показал еси, по нему же сам неуклонно шествовал еси до блаженныя твоея кончины, достойный воистину похвал таковых:

Радуйся, Сирийския Православныя Церкве светильниче немерцающий; радуйся, и в Российстей стране яко целитель изрядный издревле чтомый.

Радуйся, во дни жития твоего на земли и язычники ублажаемый; радуйся, христианскому роду присное утешение.

Радуйся, любящим и чтущим тя ходатаю спасения душам и телесем здравия; радуйся, пустынный гражданине, грады и веси наполнивый славою твоих подвигов.

Радуйся, маслино Божия благословения, ея же плодами напиташася вернии; радуйся, приведый ко Христу ученики твоя в добродетелех преуспевшия.

Радуйся, уготовавый житием и наставленьми твоими Господеви подвижники совершенныя; радуйся, полка иноческаго воевода благоискусный.

Радуйся, пустынножителей руководителю предивный; радуйся, храму сему, имени твоему посвященному, покрове Богом данный.

Радуйся, Мароне пустынниче, скорбных врачу и иноков наставниче.

Кондак 10
Спасти хотя многих к тебе прибегавших, не точию с тобою иночествовати хотящих, руку помощи милостивно подавал еси, но и различными мирскими делы, напастьми и скорбми отягченных и утесненных тако утешал, якоже родитель чада своя во обстоянии скорбей и болезней сущия утешает, отраду им своим попечением подавая и отеческою любовию тяжесть печалей облегчая. За таковое твое благодетельство и язычники нечестивыми чтом бысть, преподобне, вернии же, облагодетельствованнии тобою, благодарственно воспеваху Богу: Аллилуйя.

Икос 10
Стена заступления быша молитвы твоя, чудотворче святый, всем с верою к тебе притекающим во всякой скорби, ибо чистоты ради твоея сердечныя, сила духовная от Бога тебе даровася болящих исцеляти, бедствующим помогати, яко славити ближним и дальним величие Божие, в тебе явленное, и звати тебе сице:

Радуйся, сосуде, источаяй елей Божия милосердия; радуйся, живоносный источниче, струи исцелений изливающий нам.

Радуйся, скорый возстановителю здравия в немощи лежащих; радуйся, всех недугов, паче же болезней лютыя трясавицы и огневицы, целителю.

Радуйся, сляченных и увечных здравых сотворивый; радуйся, печальных утешителю.

Радуйся, бедствующим на помощь ускоривый; радуйся, разслабленных благосердый укрепителю.

Радуйся, безмездный врачу болезней душевных и телесных; радуйся, подателю врачеваний всем, притекающим к тебе с верою.

Радуйся, совершителю многих дивных чудес; радуйся, яко обилие благодати Божия прияти сподобился еси.

Радуйся, Мароне пустынниче, скорбных врачу и иноков наставниче.

Кондак 11
Пение всеумиленное Пресвятей Троице принесл еси при исходе твоем, преподобне отче наш Мароне, и яко пшеница зрелая, во время пожатая, являя в краткой, но тяжкой болезни предсмертной и немощь плоти, и силу духа своего, кончиною благою преселился еси от земли в обители горния, прияти награду от руки праведного Мздовоздаятеля Христа, Иже вчини душу твою со духи святых, немолчно возглашающих пред престолом славы Его победную песнь: Аллилуйя.

Икос 11
Светозарный светильник Божия благодати, озаряяй Сирийскую страну, явился еси, преподобне, духовным сиянием подвигов и чудес просветивый пустыню и в ней обители иноческия многия устроивый, и сие сияние твое духовное побуди святителя церкве Кирския почтити тя, авву знаменитаго и преславнаго, благодатию священства славы ради Церкве Христовой. Аще и тужаше дух твой, ужасаяся высоты сея, но смиренное послушание явил еси святителю и священства благодать восприяти не уклонился еси, подвизая всех согласно звати тебе:

Радуйся, место, оскверненное языческими идоложертвенными приношениями, освятивый совершением безкровныя Евхаристическия жертвы; радуйся, сея Божественный литургийныя жертвы достойный совершителю.

Радуйся, Алтаря Господня благоговейный служителю; радуйся, преподобне, руце твои со многим дерзновением ко Господу воздеявый.

Радуйся, молитвы теплейшия от сердца чиста к Престолу Вседержителя возносивый; радуйся, мастию священства умащенная главо.

Радуйся, вождю благоискусный воинов духовных; радуйся, свеще в молитве к Богу возженная.

Радуйся, маслино, елей милостей Божиих источившая всесильными молитвами твоими; радуйся, чаше, жаждущих утешения и врачевания напоившая.

Радуйся, даром чудотворения облагодатствованный; радуйся, телес наших благодатное богодарованное врачевание и о душах наших благоприятное предстательство.

Радуйся, Мароне пустынниче, скорбных врачу и иноков наставниче.

Кондак 12
Благодать, данную ти от Бога ведуще, радостно имя твое воспоминаем, преподобне отче наш Мароне, и с теплым усердием ко всечестному образу твоему притекаем, прилежно моляще чудотворения даром от Господа прославленного: подаждь цельбу всем болящим, наипаче же страждущим огневицею и трясавицею с верою к тебе прибегающим, избави и всех нас от всякия нужды и печали, да поем Богу: Аллилуйя.

Икос 12
Поюще славную кончину твою, стекошася ко гробу твоему иноков лицы и верных множество и со благоговением подъемше святыя мощи твоя, изнесоша я в ближнюю весь, идеже последи создан бяше велий благолепный храм во имя твое, преподобне, в нем же и положены быша многоцелебныя мощи твоя. И мы молящеся в сем храме, имени твоему посвященном, предстояще пред цельбоносным образом твоим и частию святых мощей твоих, чудесы благоухающих, прилежно молим тя: услыши нас всегда, твоего предстательства просящих за скорбных, недугующих и страждущих, к тебе вопиющих:

Радуйся, дарования чудес исцеления исполненный; радуйся, печальных отрадо.

Радуйся, немощствующих врачу; радуйся, щедрот и милования струя неизсякаемая.

Радуйся, любве и сострадания явление обильное; радуйся, телес наших богодарованное врачевание. Р

адуйся, о душах наших благоприятное предстательство; радуйся, добрый наш наставниче.

Радуйся, о спасении нас грешных сильный ходатаю; радуйся, благосердый помощниче всех, благочестно совершающих память твою.

Радуйся, целителю наш скорый; радуйся, заступниче наш теплый.

Радуйся, Мароне пустынниче, скорбных врачу и иноков наставниче.

Кондак 13
О преподобне и богоносне отче наш Мароне Чудотворче! Приими сие похвальное пение, от нас недостойных во умилении тебе приносимое и не преставай молитися за всех недугующих и скорбящих, к твоему предстательству с верою притекающих, и подавай и всем нам твоими богоприятными молитвами вся благопотребная в жизни сей и к вечному спасению полезная, и сподоби вкупе с тобою во Царствии Небесном непрестанно пети Богу: Аллилуйя.

Сей кондак глаголи трижды, паки икос 1 и кондак 1.

Молитва Преподобному Марону

О возлюбленная и священная главо, преподобне и богоносне отче наш Мароне! Назирай свыше милостивно нас грешных и молися Владыце милостивому и всещедрому всех благ Подателю Богу о соблюдении страны нашея. Буди молебник и о нас грешных! К страшному Господу Саваофу честныя своя руце в час сей простри, и от Него милость и щедроты испроси, и приими ны во свое ходатайство и заступление, от всех бед и лютых болезней сохрани, и от всяких страстей свободи, и от нестерпимыя и неутешимыя огневицы и трясавицы молитвами твоими избави нас, и от нападения бесов, от видимых и невидимых врагов соблюди, и согрешениям нашим прощение испроси, и спасенны Христу представи ны, и милостивно, в день Страшнаго Суда, с радостию предстати нам пред лицем неизреченныя славы Его сподоби, и милостивное призвание в Царство Небесное от Него услышати, и в неизреченней радости зрети преславную Его лица доброту сподоби благодатию и человеколюбием Господа Бога и Спаса нашего Иисуса Христа: яко держава Его благословенна и препрославленна со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.


Тропарь, глас 4
Пресветлое житие твое, отче Мароне, Ангелы удивило есть, и бесовская шатания яве устраши. Верных же собрания светло украси. К Небесному Христову жилишу, повелевая шествовати всегда, Егоже моли от тли и бед избавитися, верою творящим всечестную память твою.
Кондак, глас 5
Страстей пещь, преподобне, угасил еси воздержания росою. Дарованием обогатился еси исцелений от Бога, Мароне, приял еси целити верным болезни тяжкия, и бесов отгонити полки. Сего ради с веселием почитаем тя.

 

Акафисты zvonnitsa.ru/orthodoxy/akafisti/290/13613/

Кондак 1
Избранной Богом от иновернаго языческаго рода Чешскаго, призванной в язык свят, служительнице новыя благодати святая всехвальная мученице Христова Людмило, во страдании Твоем мученический венец приявшая от руки Вседержителя нетленный, и со Ангелы ныне предстоя Его престолу, песньми восхваляем Тя любовию, Угоднице Христова, молимтися, яже молитвами Твоими от вечных мук, бед и скорбей свобождай ны зовущия: Радуйся, блаженная княгине Людмило, святая мученице и молитвеннице о душах наших.

Икос 1
Ангелов сожительнице и человеков заступнице воистину явилася еси, мученице Людмило достохвальная, благоволением всех Творца Христа Бога именуемая, Его же возлюбила еси и за Него же пострадала еси даже до смерти, во исповедании непоколебимем, темже приими от нас сия хваления: Радуйся, скорби многия за Имя Господне приявшая; Радуйся, венцом исповедническим от Бога украшенная. Радуйся, мучеников совсельнице; Радуйся, веры христианския небоязненная проповеднице. Радуйся, тленное богатство свое раздаяше нишим; Радуйся, за еже нетленное обретшая на небеси. Радуйся, душу свою Христа ради погубившая, во еже спасти ю; Радуйся, аки светило, во тьме нечестия преславно возсиявшая. Радуйся, блаженная княгине Людмило, святая мученице и молитвеннице о душах наших.

Кондак 2
Видя Христос Господь душу твою ко приятию семени слова Божия, чистотою и милостынею предуготованную, светом познания Своего просвети тя, блаженная Людмило, твоими добродетельми благоутробно спасаемых части сотвори тя общницу в Небесном Царствии, идеже со Ангелы поеши Пресвятей Троице песнь: Аллилуиа.

Икос 2
Разум Богопросвещенный даровася тебе, святая мученице Людмило, имже ясно проразумела еси тщету душепагубную зловерия невестки своей, хотящей погубити тя. Ты же ведяще сие, удалившись во град Течин, укрытися спасения ради души твоея, Христа же взыскати потщалася еси вседушно. Тем же взываем ти: Радуйся, блаженная последовательнице Христова; Радуйся, любительнице заповедей Его приискренняя. Радуйся, всемогущую силу благодати Христовой познавшая; Радуйся, лютаго демонскаго рабства избегшая. Радуйся, богатство земное нивочтоже вменившая; Радуйся, от юности идолослужение презревшая. Радуйся, руками убогих сокровища твоя горе предпославшая; Радуйся, идолослужительныя люди к истинному Богу призвавшая. Радуйся, блаженная княгине Людмило, святая мученице и молитвеннице о душах наших.

Кондак 3
Сила благодати Божией осени тя, блаженная Людмило, егда приясте святое Крещение со супругом твоим Боривоем, князем чешским, во имя Отца и Сына и Святаго Духа. Тояже сила Божия осени тя ко благочестию и научи тя славити Единаго Бога и воспевати Ему: Аллилуиа.

Икос 3
Имея неоскудное милосердие ко всякому человеку, но и более к присным, святая блаженная княгиня Людмило, ты в страхе Божием воспитывая чада твоя, явилась еси доброй праматерью внука твоего, святаго князя Вячеслава, воспита его в благочестии: помози и нам, мученице Христова, прейти сие земное поприще во благом делании, да величаем тя звании сими: Радуйся, блаженная мати Людмило, мученице Христова; Радуйся, понесшая вдовство твое благочестно и преславно. Радуйся, после смерти князя, супруга твоего, с полною преданностию воле Божией предавшаяся; Радуйся, и нам помощнице явися в скорбех наших. Радуйся, и в нуждах наших обратитися к Богу нас научающая; Радуйся, внука своего святаго князя Вячеслава в истинах веры воспитавшая. Радуйся, и он приял мученическую кончину яко же и ты, праматерь его; Радуйся, яко тебе за сие уготовано сокровище вечных благ. Радуйся, блаженная княгине Людмило, святая мученице и молитвеннице о душах наших.

Кондак 4
Бурею одержима помышлений злобных, нечестивая невестка твоя смятеся зело, увидев тя верную быти рабу Христову, в вере и благочестии просвещающую страну Чешскую и низлагающую идольския храмы и созидающую славословити Трисвятое имя Божие и пети хвалебную песнь тому: Аллилуиа.

Икос 4
Слышавши от Святаго равноапостольнаго Мефодия, Архиепископа Моравийскаго, слово о чистоте, посте, молитве и о всех добродетелях христианам подобающих, прияла еси в сердце свое, и за сии добродетели твои возлюби тя Господь и даде ти крепость и силу. Тем же и нас научи, блаженная Людмило, заповеди Господни исполняти и тебе величати: Радуйся, усердная слушательнице словес Божественных; Радуйся, ревностная исполнительнице закона Христова. Радуйся, ниву сердца твоего очистившая от терния душевредных страстей; Радуйся, оросившая ю слезами покаяния. Радуйся, вдовственную твою чистоту непорочно сохранившая; Радуйся, воздержанием, молитвою и мученическим подвигом Богу угодившая. Радуйся, страданием сочетавшаяся Христу, ради нашего спасения от бед и скорбей, веру и любовь к тебе имущих; Радуйся, блаженная княгине Людмило, святая мученице и молитвеннице о душах наших.

Кондак 5
Боготечною звездою явилася еси святая княгиня мученице Людмило, егда Боготканною одеждою святаго крещения облекшеся, и нетленною пищею пречистаго Тела и Крови Христовы духовно укрепльшеся, прилепилася еси всем сердцем твоим ко Единому Иисусу: темже вся страна Чешская, просвещенная тобою едиными усты поет Богу: Аллилуиа.

Икос 5
Видевши святая блаженная княгиня Людмило все люди земли Чешския во тьме идолослужения погруженныя, усердно потщися еси просветити тех светом Христовой веры, и в содании храмов Божиих, и в укреплении веры православной в стране Чешской, и заповедала нам воспевати и величати тя тако: Радуйся, яко тобою просветишася страна языческая; Радуйся, мудрыми твоими глаголы поучавшая люди оставити тьму языческого нечестия. Радуйся, яко от Бога токмо, а не от человек, утешение в скорбех искати и нас научающая; Радуйся, и внука твоего Вячеслава якоже Ольга Владимира, научившая поклонятися единому и истинному Богу. Радуйся, ум твой горе имевшая; Радуйся, сердце твое жилище Святаго Духа соделавшая. Радуйся, Христу Богу человеколюбцу всю себя предавшая; Радуйся, первая от земли Чешския к лику святых причтенная. Радуйся, блаженная княгине Людмило, святая мученице и молитвеннице о душах наших.

Кондак 6
Проповедникам духоносным Апостолом подражавши, блаженная Людмило славная княгиня, твоими слезными молитвами оросила и облагоухала еси вся грады и веси близлежащия града Праги, приводящи елико мощно те люди к вере Христовой и поучающи их воспевати Единому в Троице славимому Богу: Аллилуиа.

Икос 6
Возсияла еси паче солнца добродетельми твоими во граде Праге, и была еси материю княгинею для возлюбленных чад Церкви Православной, милосердная и досточудная угоднице Христова блаженная мати Людмило. Сердце же свое на прошение и нужды приходящих к тебе милостиво открывала еси, приими и нас, добрая мати, с любовию к тебе прибегающих и вопиющих сице: Радуйся, яко сиротам и вдовицам ты еси была мать и питательнице; Радуйся, и нищим ты еси была милостивая подательнице и обидимых благая защитнице. Радуйся, со князем супругом твоим в благочестии пожившая; Радуйся, и чада твоя в страхе Божиим воспитавшая. Радуйся, яко от корене твоего честнаго святый князь Вячеслав восприя мученическую кончину от брата своего; Радуйся, яко и той с праматерию своею вселися в Царствие Небесное. Радуйся, яко ты еси за всех христиан пред престолом Божиим верная молитвеннице; Радуйся, яко имущим пути ко спасению наставнице благодатная. Радуйся, блаженная княгине Людмило, святая мученице и молитвеннице о душах наших.

Кондак 7
Коль многими бисеры и камением драгоценным украшен есть венец правды, паче солнца сияющего образ святаго жития твоего, святая блаженная княгиня Людмило, ибо подвиг доброго исповедания веры дарова ти Господь, сего ради и мы прибегаем под кров твой, ища спасения, и благодарно о тебе поем Богу: Аллилуиа.

Икос 7
Новое изобрете безчеловечие злочестивая невестка твоя Драгомира, егда ты бежала во град Течин, укрытися хотя от оныя, святая благоверная Людмило, она же наученная сатанинскою силою, погубити душу твою хотяще позорною смертию, послаша вслед ти двух злочестивых боляр, предати тя на лютая страдания, аки агницу Христову, зависти ради. Тии же собраша множество нечестиваго народа, взломаше двери княжескаго дворца и позорною смертию - удавлением предаша непорочное тело твое. Мы же, воспоминающе страшную смерть твою, вопием ти сицевая: Радуйся, блаженная Людмило, от злых боляр схваченная и вервием удавленная по выи твоей; Радуйся, яко таковым образом угодившая Богу, пострадавшая мученически. Радуйся, яко случися сие в субботу во едином часе нощи; Радуйся, яко бе ти от рождения твоего шестьдесят и един год, Господом к мучению уготованная. Радуйся, яко тобою дивен Бог, во святых своих является; Радуйся, яко всем носящим имя твое скорая помощнице и молитвеннице. Радуйся, градов Чешских похвало и утверждение; Радуйся, яко мощи твоя прослави Господь нетлением благодатно. Радуйся, блаженная княгине Людмило, святая мученице и молитвеннице о душах наших.

Кондак 8
Яко укрытися не может град на верху горы стояй, тако и тебе святая мученице Людмило, воздвижеся лютое страдание нечестивою невесткою, но по кончине твоей прослави Господь мощи твоя, и место погребения твоего, иже под градскою стеною града Течина. Мы же тя угодницу Божию просим: буди нам ходатаица ко Господу о прощении грехов наших, и мы вкупе с тобою Великому и Чудному Богу воспоим: Аллилуиа.

Икос 8
Вся была еси объята неизреченною радостию блаженная мати Людмило, яко зриши обратившиеся крещаемыя люди твоя, повелением Ангелов и во умилении сердца воздала еси хвалу Спасителю Богу, усердно молила Его, да призрит на обратившиеся люди Своя, и да утвердит их в вере и в благочестии и да прославит Имя Свое в стране Чешской. Мы же воспоминающе убо прерадостное сих событие, приносим ти благодарственная и похвальныя песни сия: Радуйся, неоскудеваемый источниче милостей к народу сему; Радуйся, духовная наша мати, испросившая у Бога просвещение праотцам нашим. Радуйся, явлением на тя силы Божией христианы возрадовашася; Радуйся, именем Всесильнаго Господа и твоею к Нему молитвою вся идолы в стране Чешской сокрушившая. Радуйся, мученице добрая; Радуйся, молитвеннице пред Богом чудная. Радуйся, демонов коварствие Божественною силою упразнившая; Радуйся, победы венец от руки Христа Жизнодавца приемшая. Радуйся, блаженная княгине Людмило, святая мученице и молитвеннице о душах наших.

Кондак 9
Во всех концех земли Чешской и за ея пределами славится великоименитое имя твое, преблагостная мученице мати Людмило! Имела бо еси духа премудрости, яко мудрыми словесы безумных обуила еси, духа страха Божия, яко выну деланьми Богоугодными душу очистила еси. Темже представ престолу Вышняго с сонмом Ангелов, купно воспеваеши Ему: Аллилуиа.

Икос 9
Ветии многовещаннии не могут достойно изобразити величие твоих благодеяний, дарованных тобою, святая мученице Людмило, в стране Чешской и иных странах идолопоклонста, водворила бо Божественную веру, и избавила их от мрака языческаго и вечныя погибели, открыла путь ко истинному спасению. Сего ради с благодарением благочестно поем ти: Радуйся, многия в духовном разуме просветившая; Радуйся, сердце твое на прощение и нужды приходящих к тебе открывала еси. Радуйся, странники и нищия питала еси; Радуйся, яко с верою поклоняемся честной иконе твоей. Радуйся, чтуще память твою и мы ныне восхваляем Господа; Радуйся, страданием твоим Церковь Христову украсившая. Радуйся, взирая на страдания твоя, вернии прослаляют ими Вышняго; Радуйся, блаженная княгине Людмило, святая мученице и молитвеннице о душах наших.

Кондак 10
Спастися всем преискренне желая, молишься за ны горе у Престола Господня, избранница Христова, блаженная Людмило, якоже твоими молитвами пособствуеши нам в странствовании многотрудном земнаго жития, еже в покаянии и благочестии скончати, яко облече тя Господь Божественною силою, да обратиши вся неверныя и научиши всех со умилением сердец воспевати Творцу Богу: Аллилуиа.

Икос 10
Стена явилася еси стране твоей несокрушимая, богомудрая и необоримая защитнице всем призывающим тя, зане тако благоволи о тебе небеси и земли Творец Господь, прославляя угодницу свою и огради ю, яже при гробнице твоей совершашася знамения и чудесы и изыде молва по всей стране, и понуди князя Вячеслава торжественно перенести нетленное тело твое из града Течина во град Прагу, в сооруженную его отцем церковь Святаго великомученика Георгия. Мы же из глубины сердца с воздыханием к Богу глаголем ти, молитвенница наша, песни таковы: Радуйся, молитвенница наша перед Богом теплая; Радуйся, яко изыде по всей стране вещание о чудесех твоих. Радуйся, яко внука твоего святаго князя Вячеслава понуди принести торжественно, яко мученицу Христову, тело твое; Радуйся, яко некий слепец прозре еже прикоснулся земле с могилы твоея. Радуйся, яко успение твое торжествует Православная Церковь; Радуйся, прославленная Богом на Небеси и на Земли. Радуйся, явлением мощей твоих, младенческую Церковь Чешскую возвеселившая; Радуйся, блаженная княгине Людмило, святая мученице и молитвеннице о душах наших.

Кондак 11
Пение умиленное приносим ти, угоднице Божия, и смиренно молим тя: моли о нас Единаго Человеколюбца Бога, да не отвратит Он от нас лица Своего, и дарует нам по молитве твоей, святая мученице Людмило, прощение многих наших согрешений, Мы же, прославляя Бога о тебе, вопием: Аллилуиа.

Икос 11
Святоносным Троическим сиянием горе осиянная, святая мученице Людмило, озари наша сердца, тьмою греховною покровенныя, да елеем благих дел возжегша угасшия светильники наша, яже и сподобимся брачнаго чертога Христова, идеже ты веселишися со святыми и слышиши сия от нас благохваления: Радуйся, предстояй ныне Агнцу Божию в лике мученическом; Радуйся, яко и по преставлении твоем с нами пребываеши. Радуйся, яко Христос по мучении твоем в чертог Свой тя всели; Радуйся, яко особливая покровительница именуешися Чешскаго народа Православнаго. Радуйся, и о нас сродних ти людех, присная пред Богом молитвеннице; Радуйся, Луна просвещения от незаходимаго Солнца Правды. Радуйся, путеводительнице, правую стезю к вечному спасению нам показующая; Радуйся, блаженная княгине Людмило, святая мученице и молитвеннице о душах наших.

Кондак 12
Благодать Пресвятаго Духа испроси нам, угоднице Христова, святая мученице Людмило, от Всещедраго Бога и Спаса нашего, вразумляющую и укрепляющую нас в деле спасения, да не безплодно будет в нас всеянное тобою семя святой веры, но да прозябнет и плод сотворит, имже возмощи нам питати души наша в будущей жизни, идеже вси святии воспевают Богу песнь: Аллилуиа.

Икос 12
Поюще твое преставление ублажаем мученическую кончину, почитаем духовную память твою, святая мученице мати Людмило, яко многомощную молитвенницу не токмо земли Сербския и Чешския, но буди и нам российским людем благая молитвеннице ко Господу, да вопием ти: Радуйся, благодатию Святаго Духа одеянная; Радуйся, представшая Живущему во свете неприступнем. Радуйся, вдовицам правило богоугоднаго жития; Радуйся, теплая ходатаице от Бога всем православным дарованная. Радуйся, соучастнице на Небеси жребия праведников веры Хростовой; Радуйся, и со Святыми слуги Его, Трисвятую песнь воспевати сподобльшася. Радуйся, от Господа всех благ нам, молящимся ти, подательнице; Радуйся, яко всем православным христианам, имя твое молитвенно призывающим, на помощь скоро притекаеши. Радуйся, блаженная княгине Людмило, святая мученице и молитвеннице о душах наших.

Кондак 13
О, Святая мученице и верная угоднице Христова Людмило! Малое сие песнословие от нас приемля, моли милостиваго Бога нашего, да вселяется и благоухает в сердцах наших святыня Православныя веры, да умножается в житии нашем елей дел благих, да не угаснут светильники наши в полунощный час сретения Небеснаго Жениха, и да сподобимся купно с тобою выну воспевати Ему в вечном Царствии: Аллилуиа, Аллилуиа, Аллилуиа.
(Этот кондак читается трижды, затем икос 1 и кондак 1)

Молитва святой мученице княгине Людмиле
О, Святая угоднице Христова, мученице княгиня Людмило, Первоугоднице чешския страны и стольнаго града Праги украшение, теплая о нас пред Богом молитвеннице, се, мы, многогрешнии, смиренно припадая, молим тя, не попусти нам погибнути в тине грехов наших, но вознеси о нас моление.
О, Преблагая мати Людмило, не забуди присещати чад твоих, аще бо и преставилася еси от нас в небесныя обители. Вкупе ж и со Святым мучеником и внуком твоим Вячеславом, егда подрасте отрок Вячеслав, отец его, твой же сын, по обычаю того времени испроси Епископа и иереев со всем причтом церковным призвать на него благоловение Божие. Епископ, отслужив в Церкви Пресвятыя Богородицы и постави отрока на ступени храма, и благослови его тако: «Господи Боже Иисусе Христе, благослови сего отрока, яко же благословил еси праведных Твоих, Авраама, Исаака и Иакова, и венчай его, яко же венчал еси правоверных царей, равноапостольных Константина и Елену».
Тако же и ты, святая праматерь его, испроси и нам, грешным, Божие благословение на чада наша, и на всех нас, да и мы многогрешнии, возблагодарим Господа за подаяние Его благодати. Да купно с тобою прославим Отца и Сына и Святаго Духа и твое великое заступление о нас во веки веков. Аминь.

Тропарь святой мученице княгине Людмиле

Светло во страдании твоем возсияла еси страстотерпице, от кровей твоих преиспещрена, и яко красная голубице к небеси возлетела еси, Людмило, тем же моли присно за чтущия тя.

 

Акафисты zvonnitsa.ru/orthodoxy/akafisti/286/13615/

Кондак 1
Избранная от юных лет любовию Христовою, Егоже ради в подвизе юродства просиявшая, молитвеннице и заступнице дивная земли Рязанския, святая блаженная мати наша Любовь, хвалебное пение приносим ти, чтущии святую память твою, ты же ныне предстоящи со дерзновением Царю и Владыце всяческих, не престай взывати к Милостивому Спасу о нас, зовущих ти:
Радуйся, святая блаженная мати Любовь, угоднице Христова и молитвеннице о душах наших.

Икос 1
Ангелом подражавшая в земном житии своем, еще от купели Любовию наречена бе, и сию добродетель измлада стяжавши, безумием мнимым безумие мира презрела еси, темже призри на молитвы с любовию глаголющих тебе сице:
Радуйся, от святыя купели Любовию нареченная.
Радуйся, сею добродетелию щедро обогащенная.
Радуйся, от страждущия твоея плоти скорбь терпевшая.
Радуйся, пред образом святителя Николая молитвы возносившая.
Радуйся, чрез святаго угодника Божия исцеления сподобльшаяся.
Радуйся, по егоже глаголу в ризу юродства облекшаяся.
Радуйся, подвиг сей яко крест свой на рамена вземшая.
Радуйся, во след за Христом его тако понесшая.
Радуйся, святая блаженная мати Любовь, угоднице Христова и молитвеннице о душах наших.

Кондак 2
Видящи матерь твоя, блаженная Любовь, дивное твое исцеление, и чудящися таковому странному тебе явлению, обуреваема сомнениями, шедше во храм, в немже вразумися пресвитером, рекшим: се воля Господня, темже благослови тя на подвиг сей многотрудный, Богу воспев: Аллилуиа.

Икос 2
Разум юродством сокрывшая в суетной жизни града большаго, смирением пламень страстей погашала еси, богоблаженная мати, тайных молитв твоих слезы и воздыхания кто изочтет? Мы же сие воспоминающе, зовем тебе сице:
Радуйся, образ терпения и незлобия явившая.
Радуйся, мнимым безумием сияние благодати сокрывшая.
Радуйся, чуждая миру, сущих же в нем не чуждавшаяся.
Радуйся, о людях скорбящих Богу молившаяся.
Радуйся, в доме своем добровольно себе затворившая.
Радуйся, дивный сей подвиг от нас утаившая.
Радуйся, пути указание от Бога приявшая.
Радуйся, на путь сей с радостию вступившая.
Радуйся, святая блаженная мати Любовь, угоднице Христова и молитвеннице о душах наших.

Кондак 3
Силою Вышняго укрепляемая и промышлению Его повиновавшаяся, блаженная мати Любовь, ближним своим послужити хотящи, домашний затвор свой оставила еси, и яко истинная угодница Божия, непрестанно взывала еси Богу: Аллилуия.

Икос 3
Имущи в себе, о блаженная мати, огнь любве Божественныя, возсияла еси яко светильник на свещнице, тьму наших грехов просвещая, и подобно безплотным ангелом всегда воспаряла еси горе. Мы же во умилении глаголем тебе сицевая:
Радуйся, странствию Христову поревновавшая.
Радуйся, стогны града Рязани прохождавшая.
Радуйся, суеты земнаго мира отвергшаяся.
Радуйся, сладости райския вкусити сподобившаяся.
Радуйся, жилище твое ради служения людям презревшая.
Радуйся, Небеснаго крова взыскавшая и получившая.
Радуйся, вся красная мира ни во что же вменившая.
Радуйся, таковою жизнию любовь Божию людям показавшая.
Радуйся, святая блаженная мати Любовь, угоднице Христова и молитвеннице о душах наших.

Кондак 4
Буря мирской суеты не возмогла есть поглотити тя, богомудрая Любовь, ты бо яко по суху пешешествовала еси по бездне житейскаго моря, уподобившися Спасителю нашему, благодарственно поя Тому: Аллилуия.

Икос 4
Слышаще и видяще жители града Рязани таковое житие твое богоугодное, с любовию тя приимаху под кровы своя. Ты же чудесно их вразумляла еси, странным образом показующи уготованное им от Господа. Помози и нам, блаженная мати, творити волю Его всеблагую, да тако тя величаем:
Радуйся, граду Рязани дивное украшение.
Радуйся, яко от беззаконий наших приводиши ны в сокрушение.
Радуйся, грядущая, яко близ сущая созерцавшая.
Радуйся, славы людския, яко змия лукаваго избегавшая.
Радуйся, мудростию на благое нас наставляющая.
Радуйся, потемненныя очи душ наших просвещающая.
Радуйся, страсти яко гонителя фараона потопившая.
Радуйся, благодать Святаго Духа яко манну Небесную вкусившая.
Радуйся, святая блаженная мати Любовь, угоднице Христова и молитвеннице о душах наших.

Кондак 5
Боготканною одеждою благодати облаченная, не взирала еси на лица и звания, ни на почести временныя, мати наша, избегающи похвал и тщеславия, научи же и нас о единей славе Небеснаго Царствия пещися, и Единому в Троице Богу славу возносити, вопия Тому: Аллилуия.

Икос 5
Видевше людие благочестивыя многотрудное твое странствие, егда во утруждении на степенях домов отдохнути тебе приключалося еси, хотяще умалити страдания твоя, брашно и питие приношаху. Ты же, подвиг свой сохранити желающи, блаженная мати, убогим сие раздавала еси. Мы же, дивящеся нищете твоей вольней, с любовию поем ти таковая:
Радуйся, юрода словущи, мудрости нас наставляеши.
Радуйся, яко безумие мира юродством обличаеши.
Радуйся, сладость райскую в нищете духовной вкусившая.
Радуйся, ради тоя сладости вся земная нивочтоже вменившая.
Радуйся, поношения и насмеяния к сердцу своему не допускавшая.
Радуйся, вся приносимая тебе нищим раздававшая.
Радуйся, нестяжанию нас научающая.
Радуйся, богатство свое во Царстве Небеснем собравшая.
Радуйся, святая блаженная мати Любовь, угоднице Христова и молитвеннице о душах наших.

Кондак 6
Проповедница велегласная явилася еси, богоблаженная мати, егда в годину смутную грядущия на нас напасти заведомо прорекла еси. Но и в тяжкия дни испытаний, егда мнози, страхом объяты бывше, бежаша, образом своим научала еси вопияти с надеждою Богу: Аллилуиа.

Икос 6
Возсиявше яве истинность словес твоих, в притче глаголанных, егда падоша стены иерихонския и держава Российская предана бысть поруганию. Умоли же Христа Владыку, о блаженная мати, да поможет нам иго сие понести и страдания наша умалит. Мы же тако тя ублажаем:
Радуйся, посреде напастей нас не оставляющая.
Радуйся, страсти наша Небесною прохладою орошающая.
Радуйся, из пучины отчаяния нас изводящая.
Радуйся, к тихому пристанищу нас приводящая.
Радуйся, уныние сердец наших возвеселяющая.
Радуйся, изнемогающия силы наша ободряющая.
Радуйся, во времена гонений твердо в вере стоявшая.
Радуйся, на милость Божию уповати нас научающая.
Радуйся, святая блаженная мати Любовь, угоднице Христова и молитвеннице о душах наших.

Кондак 7
Хотя проявити величие любве и милосердия Своего к падшему роду человеческому, егда приближися время разорения обители Казанския от безбожник, не остави Господь в печали раб своих и посла тя, блаженная мати наша Любовь, во утешение сестрам скорбящим, да тыя во дни искушений не отчаянием повергаются, но напасти сносяще безропотно, Богу хвалебную песнь воспоют: Аллилуия.

Икос 7
Новое чудо явивше, достоблаженная мати, егда сестрам во смятении сущим, грядущее прорекла еси, и слезныя рыдания их умалила еси надеждою несумненною на Заступницу Матерь Божию. Сие убо изволение похваляюще, зовем ти тако:
Радуйся, во ограду Казанския обители входившая.
Радуйся, тамо в келиях долгия дни пребывавшая.
Радуйся, во страдании сущих утешавшая.
Радуйся, в бедах и напастех отраду подававшая.
Радуйся, Христовых избранниц на путь к Небесному Жениху наставлявшая.
Радуйся, тяготы узкаго пути с ними разделявшая.
Радуйся, яко путь грядущий им прорекла еси.
Радуйся, наказавшая путь сей благодарящи Бога проити.
Радуйся, святая блаженная мати Любовь, угоднице Христова и молитвеннице о душах наших.

Кондак 8
Странно и дивно бе житие твое непорочное, великими знаменьми бо многих от сна греховнаго возставляла еси к покаянию: овым исцеления подаваше, овым же скорую кончину возвещаше, иных же тайныя помыслы обличаше. Темже молим тя, Любовь блаженная, просвети нашу тьму безверия, ко исправлению нас наставляющи, да на Страшнем Судище Христове не постигнет нас участь шуия, но да сподобимся со избранными Всемогущему Богу взывати: Аллилуиа.

Икос 8
Вся исполньшися любве Божественныя, даров Святаго Духа вместилище явилася еси: скорбящих утешающая, немощных защищающая, нищих оделяющая, недужных же исцеляющая, сего ради вопием ти:
Радуйся, сирым и убогим помогавшая.
Радуйся, бедных и вдовиц окормлявшая.
Радуйся, немощных верное защищение.
Радуйся, недужных скорое исцеление.
Радуйся, теплыя молитвы за ны возносящая.
Радуйся, тем и всех нас к Богу прибегати научающая.
Радуйся, дара прозорливости крайним смирением стяжавшая.
Радуйся, туне от сего дара требующим раздававшая.
Радуйся, святая блаженная мати Любовь, угоднице Христова и молитвеннице о душах наших.

Кондак 9
Вся добродетелей исполнена бывши, Любовь блаженная, с молитвою на устех предала еси дух твой в руце Божии, Иже всели тя в Небесныя обители, идеже ангельстии чини и святых собори радостно прияша тя. Ты же испроси и нам у Господа мирную кончину христианскую, да воспоем Ему хвалебную песнь: Аллилуиа.

Икос 9
Ветии многовещанныя недоумеют, како восхвалити тя, достоблаженная мати, ибо пачеестественная многая преславная чудодействия еще в житии своем показала еси, но и по преставлении тая благодатию Божиею творити не престаеши. Мы же, любовию понуждаеми, дерзаем пети тебе сице:
Радуйся, многими добродетельми украшенная.
Радуйся, молитвеннице наша пред Богом дерзновенная.
Радуйся, тесным путем юродства до врат Небесных шедшая.
Радуйся, в чертог Небеснаго Жениха во гласе радования возшедшая.
Радуйся, дивная мати, благия памяти достойная.
Радуйся, по блаженней кончине твоей Богом возвеличенная.
Радуйся, века сего суемудрия отвергатися ны научающая.
Радуйся, чтущим любовию память твою в бедах и скорбех помогающая.
Радуйся, святая блаженная мати Любовь, угоднице Христова и молитвеннице о душах наших.

Кондак 10
Спастися хотяй всем Господь откры чрез кончину твою благодатную, како достоит готовыми быти ко преставлению, егда девице некоей наказала еси, блаженная мати наша Любовь, гроб твой розовым тканием облещи, ибо не печаль, но радость в смертнем часе прияти сподобилася еси. Тако и ныне в Горнем Иерусалиме пребывающи, радостно поеши Богу: Аллилуиа.

Икос 10
Стеною непроходимою жители рязанския, в рыдании и горести о сиротстве своем, заполниша стогны града нашего, блаженная Любовь, уразумеюще тела твоего погребальное шествие, мняху бо ся оставленных быти твоим заступлением. Мы же, ныне празднующе память твою, прибегаем к молитвенному покрову твоему и в надежде восхваляем тя звании сими:
Радуйся, Царство Небесное унаследившая.
Радуйся, любовию Божественною блаженство бессмертныя жизни нам открывающая.
Радуйся, яко злато в горниле искусившаяся.
Радуйся, яко всеплодие жертвенное прият тя Господь.
Радуйся, венче из мира, радования и благости сплетенный.
Радуйся, многоценная кадильнице, фимиам хвалы к Богу возносящая.
Радуйся, лампадо, к Богу сердцем своим горящая.
Радуйся, сосуде благодати неизсякаемый.
Радуйся, святая блаженная мати Любовь, угоднице Христова и молитвеннице о душах наших.

Кондак 11
Пение сие похвальное, аще бы и тьмочисленное приношахом ти, мати наша Любовь, не довлело бы к прославлению добродетелей и чудес твоих, обаче хвалу Богу возсылающе за вся, яже во святых Своих нам являет, Тому поем: Аллилуиа.

Икос 11
Трисиянным светом осияваема, со всеми святыми предстоиши ныне на Небеси престолу Царя царствующих, Любовь многоблаженная, и оттуду, яко светозарное светило просвещаеши землю Рязанскую, разгоняющи мрак заблуждения и показующи путь к Небесному блаженству. Сего ради прославляющи тя, глаголем:
Радуйся, пророком еси сопричастница.
Радуйся, яко с преподобными пребываеши.
Радуйся, праваго пути верная наставнице.
Радуйся, чистоты и целомудрия предивная хранительнице.
Радуйся, Солнцем Правды озаренная.
Радуйся, простотою смиренномудрия благоукрашенная.
Радуйся, мглу сомнений наших разгоняющая.
Радуйся, свеще, горением к Богу сердца наша возжигающая.
Радуйся, святая блаженная мати Любовь, угоднице Христова и молитвеннице о душах наших.

Кондак 12
Благодати обилие прияла еси, многоблаженная, по обилию любве твоея ко Христу Богу, ныне же прилежно взываем к тебе, мати наша Любовь, пролей теплую о нас ко Господу нашему молитву, да сохранит Церковь Свою Святую невреждену от ересей и расколов и вся православная да помилует и спасет, вопиющия Ему: Аллилуиа.

Икос 12
Поюще пресветлую память твою, восхваляем тя, блаженная мати Любовь, обаче не могуще достойне изобразити высоту смирения и любве твоея к нам, с благоговением и радостию зовем ти:
Радуйся, свободу от всякия тщеты улучившая.
Радуйся, многим очи духовныя и сердца к покаянию открывшая.
Радуйся, в скитаниих жизнь проведши, к желанному раю пришедшая.
Радуйся, любимаго Господа узревшая.
Радуйся, яко никая скорбь, ни теснота не возмогоша тя разлучити от любве Христовы.
Радуйся, явившая нам, како любовь Божественная приводит к жизни вечной.
Радуйся, приявшая на ся безумие Христа ради.
Радуйся, обретшая мудрость во Христе.
Радуйся, святая блаженная мати Любовь, угоднице Христова и молитвеннице о душах наших.

Кондак 13
О блаженная мати наша Любовь, хранительнице и заступнице земли Рязанския. Приими ныне малое сие моление наше и призри на прилежно просящия тя, ты бо еси молитвенное к Богу предстательство наше. Испроси нам у Христа чистоту телесную и душевную, да в мире и покаянии прочее время живота скончавше, достигнем Небесных обителей, идеже с тобою и всеми святыми сподобимся воспевати в Троице славимому Богу: Аллилуиа.
Трижды.

 

Акафисты zvonnitsa.ru/orthodoxy/akafisti/284/13617/

Кондак 1

Богоизбранные отцы Киево-Печерския Зверинецкия и Древлекиевские, строгого жития подвижницы и молитвенницы, сие дерзаем Вам принести похвальное пение, Вы же, яко имущие дерзновение ко Святей Троице, молитеся о нас грешных, да избавимся от всех зол и напастей, с верою зовущих: Радуйтеся, преподобные отцы пещер Зверинецких, насельницы и мученицы Древлекиевские.

Икос 1

Ангелы предстатели помогаше Вам в подвигах и трудах Ваших и в житии пещерном, идеже труды тайные и велии подъяли Вы, яко молитвенницы ко Господу нелицемернии, да Отечество Небесное обрящете и зовем Вам таковая: Радуйтеся, исповедникам древлехристианским уподобившиеся; Радуйтеся, жертвы благоприятные. Радуйтеся, обидимым и страждущим неложное упование; Радуйтеся, веры Православныя, яко адамант, твердое основание. Радуйтеся, преславное иноков похваление; Радуйтеся, земли Киевской украшение. Радуйтеся, преподобные отцы пещер Зверинецких, насельницы и мученицы Древлекиевские.

Кондак 2

Видяще труды Ваша, Господь и Бог наш Иисус Христос, яко во имя Его и собрашася, то и посреди Вас обретеся, благословляя Вас на молитву и на подвиги в пещерах темных и тесных, да со смирением и благодатию воспоете Богу песнь: Аллилуиа.

Икос 2

Разум недоразумеваемый имуще и веру в Бога нелицеприятную, да обрящете путь спасения и молитвою подвиги Ваша украсите, и преславно с помощью Христа и Пречистей Матери Его, богоугодное житие свое совершите, да молитвенно взываем Вам сице: Радуйтеся, напасти и страдания от иноплеменных претерпевшия; Радуйтеся, веру православную да конца сохранившия. Радуйтеся, на подвиг мученичества самим Христом благословенные; Радуйтеся, благословение сие до смерти и уз страдания возлюбившие. Радуйтеся, любве ради Господа от страдания на земли не отрекшиеся; Радуйтеся, прелести мира ни во что вменившие. Радуйтеся, преподобные отцы пещер Зверинецких, насельницы и мученицы Древлекиевские.

Кондак 3

Сила Вышняго посети место сие святое, благодатию укрепляя вас, отцы и пещерники Древлекиевские Зверинецкие, половецкого бо нашествия не убояшеся, но за град Киев молящиеся, и мученически житие за други своя скончавшия, поя Богу: Аллилуиа.

Икос 3

Ко имущим веру, а такожде любовь и тщание поработати Церкви Христовой, Господь наш Иисус Христос трижды во времена тяжкие и последние благослови открыти людем своим место спасения вашего, да от сердца чистого и нелицемерного поработают они Богу, славяще житие Ваше и сице, воспевая Вам таковая: Радуйтеся, иго Христово всем сердцем возлюбившие; Радуйтеся, всем сердцем Его приявшие. Радуйтеся, в долготерпении жития нашего учители; Радуйтеся, за христиан православных молитвенницы. Радуйтеся, святых заповедей Христовых исполнители; Радуйтеся, любве ко ближним даже до крове ревнители. Радуйтеся, преподобные отцы пещер Зверинецких, насельницы и мученицы Древлекиевские.

Кондак 4

Бурею нашествия иноплеменник многажды Русь святую посещал Господь, но и миловал ее ради тех, кто за други и соотчизники своя подвизался даже до крове и смерти лютой, не щадя живота своего. Тем же благослови Бог и Ваша имена, да написани будут в книге животней, Ему одному ведомые. Вас же, молитв ради пред Царем Славы за нас грешных, почитаем и поим Богу песнь: Аллилуиа.

Икос 4

Слышаще и видяще земли Киевской разорение и пленение от воев половецких и нестроений Державных, от вельмож сущих, вознесли Вы глас свой мученический за страну нашу Православную. Благодаряще Вас за предстательство о нас пред Богом, взываем Вам таковая: Радуйтеся, кадило молитвы теплой благовонное; Радуйтеся, лампадо веры Православныя неугасимая. Радуйтеся, неутешных в скорбях утешение; Радуйтеся, творящих злое вразумление. Радуйтеся, Правды Христовой ревнители; Радуйтеся, Отечества Небесного любители. Радуйтеся, преподобные отцы пещер Зверинецких, насельницы и мученицы Древлекиевские.

Кондак 5

Боготечные звезды и молитвенницы неустанные, церкви нашей явилися еси от лет древних и молитвенницы за нас и землю нашу во дни годин смутных. Тем же величаем Вас, яко мучеников у Престола Христа Спасителя непостыдных и предстателей за нас нелицемерных, поя Богу: Аллилуиа.

Икос 5

Возсияли есте светом невещественным, Отцы и подвижницы Зверинецкие в Царстве Христа Бога нашего, - имена же Ваша Един Бог веси. Мы же, прославляя Вас и житие Ваше, воспеваем и чтим мученическую кончину Вашу и поем Вам сице: Радуйтеся, венцев небесных мученических стяжатели; Радуйтеся, смерти вечной победители. Радуйтеся, Святыя Церкви похвало и вечное радование; Радуйтеся, подвижников киевских слава и украшение. Радуйтеся, за землю Древлерусскую жертва усердная; Радуйтеся, к ближним своим любы преизобильная. тРадуйтеся, преподобные отцы пещер Зверинецких, насельницы и мученицы Древлекиевские.

Кондак 6

Яко проповедницы жития вечнаго, желая быти люди богоугодныя, в начале века сего подвизалися на месте страданий Ваших, Отцы наши Зверинецкия, труждаясь на раскопках пещер сих и храм во имя Рождества Пресвятыя Богородицы и святителя Иосафа Белгородскаго созидали наземный. Мы же, дивящеся Богоугодному делу сему, на месте мученических страданий Ваших, воспоим песнь Богу: Аллилуиа.

Икос 6

Возсияли еси яко звезды в обители Зверинецкой и на Святой Руси Древлекиевской, Отцы и первомученицы обители первопещерной, и освятили землю нашу благодатиею Божиею и Святый Киев - град. Тем же вам, яко подвижникам, зовем таковая: Радуйтеся, Правды Христовой свет неистощимый; Радуйтеся, кротости и чистоты светила незаходимыя. Радуйтеся, подвигов праведников и молитвенников прославление; Радуйтеся, вразумители благие нас грешных. Радуйтеся, хлебом жизни вечной и блаженной насытители; Радуйтеся, питием воды, текущей в жизнь вечную, напоители. Радуйтеся, преподобные отцы пещер Зверинецких, насельницы и мученицы Древлекиевские.

Кондак 7

Хотяй благочестие и веру Православную в земле нашей утвердити, в пещерах тесных вселитися изволили еси. Когда же пришло время испытаний, тогда душу и тело за люди предали еси, стяжавше венец мученический на небеси, да вси вопием Богу: Аллилуиа.

Икос 7

Новое житие ныне обретаху пещеры Киево-Зверинецкие: церковь подземную люди вновь сооруди и пещеры обнови во времена последния. Тем же иноцы и люди, молящиеся там, прославляют житие Ваше равноангельское, но и скорбят о церкви наземной, врагами веры разрушенной. Мы таковая все ведуще, зовем Вам сице: Радуйтеся, Отцы - преподобномученицы, Господа всею душею возлюбили еси; Радуйтеся, яко сего ради и труды Ваша, и воздаяние от Царя Славы восприяли еси. Радуйтеся, в бедах и скорбех наших помощницы; Радуйтеся, душ смятенных умирители. Радуйтеся, безбожных хулителей веры посрамители; Радуйтеся, славы Божия ревнители. Радуйтеся, преподобные отцы пещер Зверинецких, насельницы и мученицы Древлекиевские.

Кондак 8

Странное чудо видя люди Киева древняго, узрев вновь житие пещер Зверинецких и службы Божии в них братией иноков творимыя. Радуемся сему и мы с Вами, преподобномученицы Киево-Печерския Зверинецкия и поим Богу: Аллилуиа.

Икос 8

Все Вы от рук половецких пострадавшия, мученицы пещер Зверинецких, были во вся времена заступницы града Киева. Мы же, сия разумея, в похвалу Вам поим таковая: Радуйтеся, любящим и чтущим Вас ходатаи Спасения Вечнаго; Радуйтеся, вразумители грешных ко исправлению. Радуйтеся, пламенную любовь ко Господу показавшия; Радуйтеся, огнем молитвы стрелы вражия попаливыя. Радуйтеся, светильники, светящиеся дарованиями; Радуйтеся, свещи неугасимыя, огнем молитвы пламенеющия. Радуйтеся, преподобные отцы пещер Зверинецких, насельницы и мученицы Древлекиевские.

Кондак 9

Всякое мудрование житейское отвергше и житию Вашему дивящеся, мы, грешнии, к покаянию призываеми Вами и вместе с Вами вопием Богу: Аллилуиа.

Икос 9

Витии многовещании, но не Богопросвещеннии, своими языки не возмогут достойно житие ваше, многострадальнии мученицы Зверинецкие, воспевати. Мы же, убозии и грехми обремененные, дерзаем по милости Божией воспевати Вам сице: Радуйтеся, в монастырь пещерный вселивыеся, да добродетели приобрящете; Радуйтеся, да сими добродетельми ближним своим послужите. Радуйтеся, Духа Святаго и благодать Его стяжавшие; Радуйтеся, кротости и смирения исполненные. Радуйтеся, за любовь Вашу святую обителей райских сподобившиеся; Радуйтеся, и там за нас молитвы творите у Престола Божия. Радуйтеся, преподобные отцы пещер Зверинецких, насельницы и мученицы Древлекиевские.

Кондак 10

Спасти хотяй многих из нас грешных, всех обращения и спасения милостивно иский, Христос Бог наш, иже на крови мученической и Церковь Свою основа. Тем же и пещеры Зверинецкие вновь обнови и основание покаяния по молитвам Вашим тем положи, научая вси вернии вместе с Вами воспевати Богу: Аллилуиа.

Икос 10

Стена еси всем к Вам с верою и молитвою прибегающим и помощи просящим. Мы же, грешнии и недостойные дивящеся таковому о нас пред Богом молитвенному Вашему предстательству, от глубины скорбнаго сердца взываем Вам и поим: Радуйтеся, праведною и мученическою кончиною святость жития Вашего показавшия; Радуйтеся, чудес велиих неоскудеваемые помощницы. Радуйтеся, венцом бессмертия от Бога Вседержителя увенчанные; Радуйтеся, любовию своею нас объявшия. Радуйтеся, по молитвам Вашим от Бога благословение нам посылается; Радуйтеся, оскудевающих богатством добродетельми многими восполняющие. Радуйтеся, преподобные отцы пещер Зверинецких, насельницы и мученицы Древлекиевские.

Кондак 11

Пение Пресвятей Троице воспеваете есте и яко мученицы веру соблюли. Мы же, подвиги Ваша таковая почитая, вместе с Вами возглашаем Христу Богу нашему: Аллилуиа.

Икос 11

Светоподатели были есте издревле в земле нашей, яко агнцы непорочнии заклани быша за греси наша во искупление их, да вси мы непрестанно славословим: Радуйтеся, жертвы за люди православнии у Христа Бога благоприятныя; Радуйтеся, любвеобилие к нам неистощимое. Радуйтеся, веры Православныя похвало; Радуйтеся, обилие Духа Святаго незримое. Радуйтеся, ненадеющихся надеждо; Радуйтеся, Церкви нашея похвало. Радуйтеся, преподобные отцы пещер Зверинецких, насельницы и мученицы Древлекиевские.

Кондак 12

Божественная благодать, вся немощная врачующая и оскудевающа восполняющая и в сердцах Ваших пребывающая, да молитвенно предстоите за нас и чад наших у Престола Царя Славы, вопия Богу: Аллилуиа.

Икос 12

Поюще страдания Ваша, святыя страстотерпцы и преподобномученицы, отцы наши Зверинецкия, поклоняемся терпению Вашему, яко силе благодатней, явльшейся в Вас, да вси согласно вопием: Радуйтеся, Церкве нашея Православныя украшение; Радуйтеся, подвига мученичества похвало. Радуйтеся, Силою Божиею многия и велия чудеса содеваете; Радуйтеся, помощь свою просящим ея нелицемерно подаете. Радуйтеся, теплое чаяние на молитвенную помощь Вашу за ны недостойнии; Радуйтеся, да не посрамимся и мы грешнии, надеясь на предстательство Ваше у Царя Славы. Радуйтеся, преподобные отцы пещер Зверинецких, насельницы и мученицы Древлекиевские.

Кондак 13

О, пречудныя и славныя страстотерпцы и отцы наша Зверинецкие! Приимите малое сие моление наше, в славную похвалу возносимое Вам, честным предстателям у Престола Царя Славы, Господа нашего Иисуса Христа. Да обрящем Милость Его по молитвам Ваших в жизни вечной и нескончаемой, поюще Ему: Аллилуиа, Аллилуиа, Аллилуиа.

 

(Этот кондак читается трижды, затем икос 1 и кондак 1)

 

Молитва преподобномученикам Зверинецким

О Святии Отцы, преподобномученицы и страстотерпцы Зверинецкие!

Молитеся о нас грешных Всемилосердному Богу о ниспослании нам милости и благодати Духа Святаго и благого во многогрешном житии нашем покровительства Матери Божией и всех святых, от века Богу послуживших в Духе и Истине.

Надеясь на молитвы ваши за нас грешных, да исправим жизнь нашу, и испросим прощение согрешений наших у Царя Славы, и достигнем Небесного Отечества, где пребывают правда, любовь и бесконечное блаженство жизни Вечной.

Да прославим вместе с Вами Отца и Сына и Святаго Духа ныне и присно и во веки веков. Аминь.
 

 

Акафисты zvonnitsa.ru/orthodoxy/akafisti/290/13633/

Кондак 1

Избранный угодниче Христов и Его Пречистыя Матери неленостный служителю! Теплый о нас молитвенниче к Богу и Его любве образ чудный и совершенный! Приими от нас недостойных подобающую ти похвалу и, яко имеяй дерзновение ко Господу, от всяких нас бед и скорбей избавляй, да зовем ти: Радуйся, преподобне отче Гаврииле, любве Божия источниче неоскудеваемый.

Икос 1

Архангелу тезоименитаго и его житию подобника провиде тя всея твари Зиждитель словесы пророческими:- “Се, Мой еси!” Ты же от юности глас сей с Небеси услышав, всем сердцем возлюбил еси Бога возлюбившаго тя, преподобне отче Гаврииле. Сего ради зовем ти:

Радуйся, от юности Богом избранный;

Радуйся, в гражданство Небесное званный;

Радуйся, мира сего красоту ни во чтоже вменивый;

Радуйся, ангельское житие измлада возлюбивый;

Радуйся, иго Христово верно восприявый;

Радуйся, благодать онаго житием оправдавый;

Радуйся, издетска образ молитвы слезныя;

Радуйся, родителей благочестивых отрасль боголюбезная;

Радуйся, преподобне отче Гаврииле, любве Божия источниче неоскудеваемый.

Кондак 2

Видев красоту Божественнаго видения, осенившаго тя благодатию Духа Святаго, родителей твоих удивил еси, не их чадом ся называя, но Божиим. Темже усердно последовал еси Своим тя Назвавшему, непрестанно взывая к Нему: Аллилуиа.

Икос 2

Разумом богопросвещенным постиг суету и непостоянство мира сего, преподобне Гаврииле, от юности твоея вечных благ возжелал еси и сотворил себе обиталище Святаго Духа. Мы же творим тебе пение сицевое:

Радуйся, воздержанию от юности себе обучивый;

Радуйся, постом и молитвою стрелы лукаваго до конца отразивый;

Радуйся, сподобивыйся Божественнаго призвания;

Радуйся, удостоивыйся от Господа оправдания;

Радуйся, Христа Бога всем сердцем возлюбивый;

Радуйся, яко по заповедем Его право ходивый;

Радуйся, бранею праведности облеченный;

Радуйся, светом боговедения просвещенный;

Радуйся, преподобне отче Гаврииле, любве Божия источниче неоскудеваемый.

Кондак 3

Силою свыше от раны своея избавлен был еси, преподобне Гаврииле, в немощи праведному Симеону Верхотурскому помолився, и его молитвами исцелився пел еси Богу, Дивному во святых Своих: Аллилуиа.

 

Икос 3

Идущу тебе во обитель Верхотурскую издалеча ко многоцелебным мощем угодника Божия во исполнение обета, ему данного, узрел еси святаго в виде странника дивнаго. Милостыню же ему сотворив, услышал еси от него: “ Монах будеши, схимник будеши, зде будеши”. Мы же, дивящеся Божию о тебе благоволению, зовем ти:

Радуйся, всего себя водительству Божию предавый;

Радуйся, узкий и прискорбный путь монашескаго жития Его волею избравый;

Радуйся, древних подвижников усердный соревнителю;

Радуйся, добродетелей христианских рачителю;

Радуйся, молитвами праведнаго Симеона исцеленный;

Радуйся, в монашестве его предстательством предвосхищенный;

Радуйся, любве ради Господа отечество оставивый;

Радуйся, к воздержанному житию себе от юности наставивый;

Радуйся, преподобне отче Гаврииле, любве Божия источниче неоскудеваемый.

Кондак 4

Бурею сомнений смутився и родительскаго гнева убоявся, яко класы хлебныя градом уязвленныя увеща отца оставити, у Самаго Бога испросити изобилия нивы дерзнул еси. Услышав же громоподобный глас с Небеси и зря велия дары Божия, воспе Ему: Аллилуиа.

Икос 4

Слыша велие житие Богомудрых отцев и старцев Оптиной пустыни и благочестию их подражати желая, благословения родительскаго испросил еси, отче преподобне. Они же, смирению твоему дивящеся, благословиша тя на тесный путь иноческаго жития. Мы же, восхваляюще твое благое изволение, поем ти:

Радуйся, любовь велию к Богу показавый ;

Радуйся, в силе Его преспевавый;

Радуйся, любовию божественною распаленный;

Радуйся, образом жития отцев пустынных плененный;

Радуйся, преподобным Амвросием благословенный;

Радуйся, старцем Мелхиседеком от уныния и скорбей огражденный;

Радуйся, пустыннолюбцев в искании Бога усердный сподвижниче;

Радуйся, за враги своя и за вся теплейший молитвенниче;

Радуйся, преподобне отче Гаврииле, любве Божия источниче неоскудеваемый.

 

Кондак 5

Боготечная великая светила, сияющия в пустыни Оптиной, облисташа тя, отрасль благую, ты же, духовным учителем подражая незлобием и кротостью, возсиял еси новою звездою и вкупе с ними взывал еси Богу: Аллилуиа.

Икос 5

Видел еси со скорбию яко, игумен, иноческаго пострижения тя лишает, обаче не возможе то поколебати крепости произволения твоего. Ты же, старческаго благословения испросив, во град Москву пришел еси. Мы же, видяще тя тяжкий крест на себе сим возложившаго, поем ти:

Радуйся, не ради риз, но покаяния ради монашество приемый;

Радуйся, сладости плотския богомудре презревый;

Радуйся, братолюбия прилежный строителю;

Радуйся, постнически испытавый в Московских обителех;

Радуйся, таланты своя в земли не сокрывый;

Радуйся, сети тщеславия и гордыни сокрушивый;

Радуйся, унывающих столпе утешения;

Радуйся, монашествующим образе терпения;

Радуйся, преподобне отче Гаврииле, любве Божия источниче неоскудеваемый.

Кондак 6

Проповедует стольный град Москва труды твоя и подвиги, богомудре Гаврииле, идеже во двою обителех потрудился еси, да новоначальному монашеству образ древнеотеческий будеши, научающий братию достойно воспевати Богу: Аллилуиа.

Икос 6

Возсиял еси от Уральския страны яко светило светозарное, преподобне отче, светом богопросвещенным освящая обителей множество. Посреде же них и Раифская пустынь, идеже священства удостоился еси. О сем тя ублажающе, воспеваем ти сице:

Радуйся, хранителю старческих повелений;

Радуйся, сопричастниче тайных откровений;

Радуйся, восприявый древних отец слéды;

Радуйся, на зловерныя и враждотворцы от Бога получив победы;

Радуйся, яко тобою зависть попирается;

Радуйся, яко молитвами твоими к Богородице бесы изгоняются;

Радуйся, в любви Христу дивный подражателю;

Радуйся, тоя яко единаго богатства стяжателю;

Радуйся, преподобне отче Гаврииле, любве Божия источниче неоскудеваемый.

Кондак 7

Хотя верен быти подражатель Агнца Божия, кротость и смирение Его себе усвоив, от завистных человек всякия обиды и скорби безропотно претерпел еси, егда из обители во град Казань удален бе; но вéдый, яко скорбьми временными подается вечное спасение, взывал еси Спасу всех: Аллилуиа.

Икос 7

Новым повелением архиереовым стопы своя направил еси, отче присноблаженне, в пустынь при седми езерах, идеже Пресвятыя Богородицы чудотворный образ стояше. Ты же, прославляя Ю, и обитель сию, паче прежняго прославил еси, егда поставлен бысть архимандритом тамо. Мы же тя прославляем сице:

Радуйся, крине благоуханный пустыннаго прозябения;

Радуйся, Божия Матери чадо возлюбленное и верное;

Радуйся, Ея почитателю непоколебимый и благоусердный;

Радуйся, союзом добродетелей удобренный;

Радуйся, пустыни Седмиезерской благоукрасителю;

Радуйся, иноческих подвигов ревнителю;

Радуйся, путем к Небеси Боголюбие избравый;

Радуйся, в злостраданиих смирением вся поправый;

Радуйся, преподобне отче Гаврииле, любве Божия источниче неоскудеваемый.

Кондак 8

Страшный недуг порази тя, отче преподобне, имже на одре болезни пять лет держимо бе многострадальное тело твое, якоже иногда и души то него разлучатися. Ты же, прославление прп. Серафима предвосхищая, к помощи его в немощи взывал еси. По исцелении же образ его на немже идеже Мати Божия со мученики чудотворцу Саровскому явися, написа, поя Богу: Аллилуиа.

Икос 8

Всего себе предал еси воздвижению новаго храма, прп. отче, по приятии великия схимы помышляя, яко в храме сем по всем усопшим непрестанно Псалтирь чтома будет. В нем же литургисая, узрел еси светозарное видение всех святых, молящихся у Престола Владыки, Себе Самаго в жертву приносяща за ны, поющия Тебе:

Радуйся, созерцателю лучезарнаго Божественнаго видения;

Радуйся, всех святых увидевый пред Господом на молении;

Радуйся, благоволением Богоматере осененный;

Радуйся, боголюбче, дарами свыше одаренный;

Радуйся, равную любовь к ближним живым и почившим простиравый;

Радуйся, храм для неусыпнаго чтения Псалтири создавый;

Радуйся, яко ничтоже имея ко строению, подвижеся к оному, на Бога уповая;

Радуйся, яко по благословении архипастыря чудно создася церковное здание;

Радуйся, преподобне отче Гаврииле, любве Божия источниче неоскудеваемый.

Кондак 9

Все множество человеческое удивися еже на земли во плоти твоему терпению и незлобию, преподобне отче, егда непорочна и праведна тя зряще и о благочестии ревнующа возмутишася против тебе братия законопреступная хотяща убити тя. Ты же, моля Господа, взывал еси Ему: Аллилуиа.

Икос 9

Велие твое терпение и теплую ко Христу любовь никтоже по достоянию поведати возможет, еда бесовским обещаниям угождая, изгнаша тя из обители клеветы ради, преподобне отче Гаврииле. Ты же пресели во Спасову обитель в пределех Псковских, идеже премного потрудился еси. Мы же, волю Божию в сем разумевающе, поем ти:

Радуйся, правило благочестия и веры;

Радуйся, за оныя поношения и изгнания претерпевый;

Радуйся, от братии поруганный, бесчестие в почесть себе вменивый;

Радуйся, козни нечестивых человек смирением победивый;

Радуйся, потоками слез спасительных орошенный;

Радуйся, истиннаго незлобия и братолюбия образ совершенный;

Радуйся, чашу поругания, яко врачевство чистительное, испивший;

Радуйся, за ненавидящих тя с любовию Господа моливший;

Радуйся, преподобне отче Гаврииле, любве Божия источниче неоскудеваемый.

Кондак 10

Хотящу ти спасти чада твоя, к тебе во множестве притекающая и предвидящу тебе годину лихолетия и на Церковь Христову гонения, ихже своим житием изобразил еси, любовь ко Господу яко корень всех благих заповедал еси им имети и тако претерпевати вся, до конца взывающе Богу: Аллилуиа.

Икос 10

Стены Спасовы обители не возмогоша укрыти тя отче Гаврииле, мнози бо видяху тя равноангельна житием и прихождаху к тебе; слышавше же глаголы жизни вечныя, прославиша духовныя твоя подвиги во многих градах и весех Российских. Тем же и мы чествуем тя сими похвальными словесы:

Радуйся, великия княгини Елисаветы духовный наставниче;

Радуйся, архипастырем и пастырям тихое и верное пристанище;

Радуйся, иночествующим помощниче богомудрый и скорый;

Радуйся, чадом своим и нам путеводителю на неудобовосходимыя горы;

Радуйся, вослед себе собор учеников ко Христу приведый;

Радуйся, с ними, яко отец со чады, прияти мзду Небесную к Нему возшедый;

Радуйся, слезами твоими землю и воды наша освятивый;

Радуйся, житием своим будущия скорби Церкви Русския изобразивый;

Радуйся, преподобне отче Гаврииле, любве Божия источниче неоскудеваемый.

Кондак 11

Пение всякое не довлеет к похвале твоей, отче преподобне, кто бо возможет по достоянию прославити многотрудное житие твое или восхвалити подвиги твоя? Токмо видяще тя паки, аще бо и в час смертный, людие града Казани плачуще взываша к Призывающему тя: Аллилуиа.

Икос 11

Светильника тя добрых дел, преподобне, исповедуем быти, яко теплыми молитвами ко Христу Богу и Пречистой Его Матери, о граде нашем и обители твоей ныне пред Ними ходатайствуеши и светом Божественныя любве согреваеши души и сердца приходящим к тебе и поющим тебе сице:

Радуйся, светильниче Божественного света;

Радуйся, молитвенниче усердный к Богу и Его Матери Всепетой;

Радуйся, боголюбче, еще на земли созерцавый Свет Небесный;

Радуйся, ради онаго избравый путь тяжкий и тесный;

Радуйся, почитающим святую память твою Небесный покровителю;

Радуйся, в горния обители нам путеводителю;

Радуйся, вестниче любве Божия, к примирению с Господом всех призываяй;

Радуйся, подвигом веры в любви к Нему нас укрепляяй;

Радуйся, преподобне отче Гаврииле, любве Божия источниче неоскудеваемый.

Кондак 12

Благодати Божия светлое жилище быв в житии твоем, преподобне отче Гаврииле, и по смерти не оставляеши нас твоим предстательством пред Господом, научая и ныне учащихся, како подобает идти тесным путем спасения, прославляя, благодаря и взывая Ему: Аллилуиа.

Икос 12

Поюще твоя труды и подвиги, ублажаем тя, дивный старче, яко аще и преставился еси от нас, но жив сый и предстоя духом твоим пред Богом, ходатайствуеши за ны. Мы же, предстояще раце многоцелебных мощей твоих, прославляем тя:

Радуйся, Российския земли духовное укрепление;

Радуйся, граду Казани похвало и утверждение;

Радуйся, Ангелов и всех святых собеседниче;

Радуйся, Царствия Христова наследниче;

Радуйся, молитвенниче за ны неусыпный;

Радуйся, предстателю о нас непостыдный;

Радуйся, яко на Небеси Богоначальную Троицу зриши;

Радуйся, яко оставив мощи твоя на земли всем помощь твориши;

Радуйся, преподобне отче Гаврииле, любве Божия источниче неоскудеваемый.

Кондак 13

О, пречудный старче, преподобне отче наш Гаврииле! Приими малую сию похвалу от недостойных и неразумных чад твоих. Присно моли о нас Пречистую Богородицу, яко пред честным Ея образом изливал еси слез потоки прося мира отечеству нашему, здравия и спасения всем живущим в нем. И ныне Сыну Ея Христу Богу нашему возноси молитвы и о нас, чтущих память Твою и вкупе с тобою поющих Ему: Аллилуиа.

 

Акафисты zvonnitsa.ru/orthodoxy/akafisti/290/13641/

Кондак 1

Предвечный Царю веков, Творче и Господи, Судие Праведнейший и нелице-приятный, множество содеян-ных мною лютых помышляя, окаянный аз, трепещу Страшнаго Дне Суднаго, но, надеяся на милость неизреченнаго благоутробия Твоего, давидски молю Тя: по велицей Твоей милости прости мя недостойнаго, и не осуди мя по деянием моим, яко да благою совестию очищен, на всяк день и час Ангельскую песнь приношу Ти: Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Икос 1

Архангельския трубы возглашение, на Суд Господень Страшный и Последний, живыя и мертвыя от всех конец земли собирающее, уже во ушесех предносится. Душе моя, душе моя, востани, что спиши? Конец приближается, и имаши смутитися. Воспряни убо, яко мало есть еще время на покаяние; бодрствуй, молися и трезвися и дела добрая твори, непрестанно вопиющи ко Владыце своему таковая: Свят еси, Господи, Боже наш, и Пресвят, и да святится и в сем грешном и во зле лежащем мире имя Твое, паче всякаго имене. Свят еси, Господи, Боже наш, да приидет Твое славное Царствие. Свят еси, Господи, Боже наш, да будет во всем воля Твоя святая на земли, якоже пребывает и на небеси. Свят еси, Господи, Боже наш, хлеб земный насущный даяй нам, паче же небесный даждь ми на всяк день. Свят еси, Господи, Боже наш, остави ми согрешения моя, якоже и аз оставляю брату своему согрешения его. Свят еси, Господи, Боже наш, не введи мя в напасть, но избави мя от сетей лукаваго миродержителя тьмы века сего, ибо поистине опасно ходим и дние наша лукави суть. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 2

Вижду, Господи мой, Господи, яко вся знамения кончины века сего уже исполняются: вера святая в людех оскуде, беззакония умножишася, и любовь охладе; востают бо народ на народ, царство на царство, отец на сына и сын на отца, глады и трусы и пагубы изобилуют по местом, прельстители и предатели явишася, и гонения на верных Твоих воздвигошася, таже и проповедание Евангелия во свидетельство всем языком уже совершается, и скорбь великая посреди верных по вселенней распространяется, и по сих всех, разумея, яко близ есть кончина века сего, со страхом вопию Ти: Аллилуиа.

Икос 2

Разум неуразуменный времени страшнаго и неизглаголаннаго пришествия Твоего открыти верным хотя, Всеблагий Господи, дал еси нам в подобие того притчу смоковницы, глаголя: егда бо ваия ея будут млади и листвие прозябнет, ведите, яко близ есть лето. Тако и вы, егда видите сия вся, - бодрствуйте, яко близ есть, при дверех. Тем же и мы, пришед на конец веков, со умилением зовем Ти: Свят еси, Господи, Боже наш, притчами тайноводя нас во Царствие Свое, да всяк имеяй уши духовныя слышати, да слышит, даруй и мне уразумение Твоего евангельскаго проповедания, да плотския похоти попраше, духовно жительствую и к жатве всемирной уготовляюся. Свят еси, Господи, Боже наш, притчею жерновною поучай нас, яко от двоих, вкупе труждающихся и живущих, в той день един поемлется и един оставляется, - не остави мене тогда со грешники, делающими беззаконие, но очищение даруй и введи во Твое славное Царствие. Свят еси, Господи, Боже наш, глаголяй: молитеся, да не будет бегство ваше в зиме или в субботу, о веце кончины мира, яко о зиме гадательствуя; даждь ми, в сие осьмое тысячелетие живущему, стопы моя к бегству великому в сретение Твое уготовати и непрестанно помышляти грядущее помози ми. Свят еси, Господи, Боже наш, рекий: в чем застану, в том и сужду, - возбуди мя, множицею во грехи впадающа, к частому покаянию, да не обрящеши, пришед, мя неготоваго. Свят еси, Господи, Боже наш, Праведный и Милостивый, не вниди в суд с рабом Твоим, яко не оправдится пред Тобою всяк живый, - от лица же Твоего судьба моя изыдет. Свят еси, Господи, Боже наш, рекий: не всяк глаголяй Ми: Господи, Господи, внидет в Царствие Небесное, но творяй волю Отца Моего, - научи мя творити волю Твою. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 3

Силою Божества Твоего, Господи, воздвигл еси из гроба Лазаря, бездыханна четверодневна, и телеса усопших святых в час смерти и крестных страданий Твоих возставил еси; последи же и Сам тридневен воскресл еси от мертвых тою же силою Твоею. Веруем, яко грядет час и ныне уже есть, егда по гласу Твоему воскреснут мертвии, и востанут сущии во гробех, и изыдут сотворшии благая в воскрешение живота, а сотворшии злая в воскрешение суда. Не осуди тогда и мя, Владыко, по деянием моим, но помилуй со всеми в вере и надежде жизни вечныя усопшими, и пети не возбрани: Аллилуиа.

Икос 3

Имеяй ключи ада и смерти, аще и глаголал еси, Господи, верному рабу Твоему Иоанну тайновидцу, стоявшему посреде седми светильников: Аз есмь Первый и Последний, и живый, и бых мертв, и се жив есмь во веки веков, аминь, - повелел же еси ему написати имже подобает быти вскоре. Сия страшная и близкая скончания мира сего быти помышляя, не с суетным любопытством, но со страхом и трепетом взываю Ти: Свят еси, Господи, Боже наш, Свидетелю верный, Первенец из мертвых, и Княже царей земных; любяй ны и омываяй ны от грех наших Кровию Своею, и ключи Царствия Небеснаго человеком вручивый, - укрепи мя в вере Твоей, да николиже отрекуся Тебе, но, аще понудитися, до крове постою за имя святое Твое. Свят еси, Господи, Боже наш, грядый на облацех небесных, да узрят Его всяко око и иже прободоша Его, и плачь сотворят о Нем тогда вся колена земная, - даруй и мне прежде дне того страшнаго плачь за грехи моя. Свят еси, Господи, Боже наш - Альфа и Омега, начало и конец, Первый и Последний - скажи ми кончину мою и число дней моих возвести ми. Свят еси, Господи, Боже наш, давый Откровение великому Иоанну, да уразумеем и мы, имже подобает быти вскоре. Того молитвами спаси мя в день великий гнева Твоего, егда ни горы, ни ущелья, ни камение возмогут укрыти грешники, бежащия от лица Твоего. Свят еси, Господи, Боже наш, апостолом Твоим Павлом поучаяй, яко аще имам пророчествия и тайны вся и веру, якоже и горы преставляти, любве же не имам, кая ми польза есть? Даждь ми любовь нелицемерну, да тяготу брата моего, якоже и свою, понесу, и душу мою положу за други своя. Свят еси, Господи, Боже наш, Любы неизреченная, даруй ми возлюбити Тя, якоже иногда возлюбих грех свой, и принеся плоды покаяния, сподоби поработати Тебе, якоже поработах прежде сатане льстивому, да из глубины души воспою: Свят, Свят, Свят еси, Господи, Боже Вседержителю, Иже беи сый и грядый, помилуй мя!

Кондак 4

Буря велия, разрушающая горы, предъидяще, трус и мрак, громы и молнии бываху, егда являлся Господь Илии в Хориве и Моисею на Синае; но сей страх малый есть прообраз последняго дне мира, о немже глаголал Господь учеником на горе Елеонстей и Иоанну на Патмосе. Тогда бо вся вселенная сотрясется: и огнь, вода и вся стихии смятутся; и свет, и мрак, и кровь, и дым, и трубы Ангельския, и мертвецев востание и вопль людей соединятся, возвещая Второе пришествие и Страшный Суд Его, и час отмщения. О, ужаснаго зрелища и испытания! Невозможно есть нам и изобразити сие: горе - грешным, и слава - праведным тогда. Милосерде Господи! Спаси мя тогда, молюся, да пою Ти: Аллилуиа.

Икос 4

Слышах Тя, Господи, усты Петровы глаголюща: яко нынешняя небеса и нынешняя земля Словом Твоим содержимы и огню блюдомы на День Суда и погибели нечестивых человек, аз содрогаюся, но на неизреченное милосердие Твое дерзая, новаго небеси и новыя земли по неложному Твоему обетованию чаю, в них же вся правда живет. Сия убо желанныя земли жителя мя сотвори тогда, Спасе, зовуща: Свят еси, Господи, Боже наш, неизследимый и непременимый вчера и днесь, и во веки Той же еси, и лета Твоя не оскудеют; имеяй небеса и землю, яко ризу ветху сняти, в ризу нову и нетлену облецы мя. Свят еси, Господи, Боже наш, стояй у двери и стучаяй, и к слышащему глас Твой, и двери сердца отверзающему - входящий к нему и свечеряющий с ним. Вниди в дом смиренныя и грешныя души моея и свечеряй со мною, якоже с Лукою и Клеопою, ибо преклонился уже есть день жизни моея. Свят еси, Господи, Боже наш, Путь, Истина и Живот мой, настави мя на путь Твой, и пойду во истине Твоей. Свят еси, Господи, Боже наш, рекий древле: Марфо, Марфо, печешися и молвиши о мнозе, едино же есть на потребу, - даждь и ми ни о едином земном пещися, но и о небесном помышляти. Свят еси, Господи, Боже наш, рекий богатому: безумне! В сию же нощь душу твою истяжут от Тебе, а еже уготовал еси кому будет? Помози ми сокровище не земное, а небесное собирати, идеже ни червь, ни тля тлит, ни татие подкапывают и крадут. Свят еси, Господи, Боже наш, освяти мя во всей полноте Своей, да всесовершен дух мой и душа и тело непорочно в пришествие Твое да сохранятся. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 5

Боже, Боже мой, пришедый взыскати и спасти погибшаго, - призри на скорбь души моея: век бо мой скончавается, и Страшный Твой Престол предуготовляется, житие мое мимоидет, Суд же мне предлежит, грозя мне огненною мукою и пламенем неугасимым. Вонми, убо, молитве моей и не отрини слез моих, яко суетных: кто убо прииде к Тебе плача и не абие спасен бысть? Веру мою вместо дел вмени мне, Господи, и не взыщи дел, отнюдь оправдающих мя, яко тщуся творити тыя, но не имам их; но та вера моя да довлеет вместо всех, та да отвещает, та да оправдит, та да покажет мя причастника славы Твоея вечныя в невечернем дни Царствия Твоего, воспеваюша: Аллилуиа.

Икос 5

Провидя Даниил пророк, муж желаний, древле ясно Божественное Твое Второе пришествие, Владыко Господи, глагола: дондеже престолы поставишася, и Ветхий денми седе, одежди Его белы, аки снег, и власы главы Его, аки волна, чисты, и Престол Его пламень палящь; река огненная течет исходящи пред Ним; тысяща тысящ служаху Ему, и тмы тем предстояху Ему, на судищи седящему, и книги отверзошася. Пощади убо, пощади, Спасе, тогда Твое создание, слезно вопиющее Ти таковая: Свят еси, Господи, Боже наш, на Престоле Славы почиваяй, Ему же дадеся власть и честь, и Царство, и вси людие; племена и языцы Тому работают; Его же власть - власть вечная, яже не прейдет, и Царство Его не разсыплется. Свят еси, Господи, Боже наш, Великий и Страшный, Его же Даниил пророк святый видев, духом вострепета и смутися, - аз же, грешный, како дерзну узрети Тя и отвещати Тебе? Свят еси, Господи, Боже наш, Боже милости и щедрот и человеколюбия, - молитвами Пророка Твоего избави мя потока страшнаго реки огненныя, хотящаго поглотити мя за грехи моя. Свят еси, Господи, Боже наш, праведныя любяй и грешныя милуяй, горы мерилом разума поставивый, лик звездам исчитаяй и капли росныя ко ветров дыханию приложивый, - услыши стенание души моея, и вопль сердца моего к Тебе да приидет. Свят еси, Господи, Боже наш, Сердцеведче, Ему же вся, не токмо словеса, но чувствия и помышления содеянныя и несодеянныя наша ведомы суть, - не осуди мя по благости Твоей за всякое слово праздное и помыслы скверныя, яже аз изрекох и помыслих в житии моем. Свят еси, Господи, Боже наш, продолжи ми век к покаянию и на посечение со смоковницею безплодною не осуди мене. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 6

Проповедник Твой, Господи, духоносный Иоанн Богослов, видев во откровении славный Престол Небесный и под Престолом души убиенных за слово Божие, от великия скорби пришедших, иже и возопиша велегласно глаголюще: доколе, Владыко Святый и Истинный, не осудиши и не отмстиши за кровь нашу живущим на земли? и даны быша коемуждо им ризы белы, и заповедано бысть им пождати еще время мало, дондеже скончаются соратницы их, подобно им имущия избиены быти, яко да восполнится предопределенное число. О, великаго и неизреченнаго долготерпения Твоего, Владыко! Яко и до сего дне отмщение нечестивым отлагаеши. Но горе миру, егда Судия внезапу приидет и коегождо деяния обнажатся, тогда погибнут грешницы от лица Божия, а праведницы возвеселятся и возрадуются пред Богом во веки зовуще Ему: Аллилуиа.

Икос 6

Возсиял еси на Фаворе, Христе Боже наш, и ученицы Твоя, елика вмещаху, славу Твою видеша; но и убояшася, и вострепеташа, и ниц падоша. С тою же неизреченною, но пребольшою всею славою приидеши на облацех в день он судити живых и мертвых, и явиши знамение великое, иже есть Крест Твой Честный, от конец земли и до конец небес простираяйся; егоже узревше, восплачут вся колена земная, ибо страх явления Лица Твоего земнородным страшнее по премногу есть всякаго в мире сем разрушения и пременения. Како срету Тя тогда, Боже мой, кий плач и ответ воздам Ти, не могий, бедный, вместити и иоты славы Твоея. Но на Твое несказанное милосердие уповая, всякий грех истинно кающагося побеждающее, дерзаю прежде конца возопити Ти: Свят еси, Господи, Боже наш, во свете живый неприступнем, - осени мя, грешнаго, светом Лица Твоего, и не опали огнем Божества Твоего, егда приидеши во Славе святей Своей. Свят еси, Господи, Боже наш, даяй знамения на небеси и на земли, посылаяй огнь, язву и глад на люди за множество беззаконий их, - сохрани мя от язв будущих и от чаши гнева Твоего проклятия, приключитися имущих в последнии дни мира сего. Свят еси, Господи, Боже наш, Слове необыменный, даруй ми слово благо отвещати на Страшнем Суде Твоем. Свят еси, Господи, Боже наш, глаголяй: побеждаяй наследит вся, и буду Ему Бог, и той мне будет в сына, - помози мне греха победителем явитися. Свят еси, Господи, Боже наш, рекий: яко страшливых и неверных, скверных, убийц и блудодейц, идолослужителей и всех лживых часть в озере, горящем огнем и серою, ожидает, - спаси и избави мя от части тоя. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 7

Хотящу Ти, о, Преблагословенный Господи Иисусе Христе, Боже наш, в день пакибытия, во Второе пришествие, явитися миру на облацех яко Судии и Мздовоздаятелю, - о, каковый Страшный Суд будет тогда, Ангелом во тьмах и тысящах предстоящим, Апостолом председящим, человеком во ужасе вводимым, книгам разгибаемым и делом и помыслом истязуемым? Кий суд будет мне, зачатому во гресех? Кто ми пламень, жгущий мя, угасит? Кто ми тьму просветит? Кто мя тогда защитит, аще не Ты Сам - Любы и Милость бесконечная! Молитвами Пречистыя Матери Твоея и Ангела-хранителя моего спаси мя тогда, зовуща: Аллилуиа.

Икос 7

Новое и последнее торжество явити сатане льстивому в мире попустивый, Владыко мой Господи, егда и пред кончиною века сего открыется человек беззакония, сын погибели, сиречь - антихрист, егоже пришествие со всякою силою и знамениями и чудесы ложными будет; иже, число звериное имеяй, совратит многия люди от пути праваго, и печать свою страшную на тыя положит, гонение на верныя великое воздвигнет и мерзость запустения на месте святе поставит, и три лета с половиною владычествовати будет, егоже и последи убиеши Духом уст Своих. О, горе мне, грешному, в день той тогда! Како спасение обрящу и отцу лжи противостану, когда избранных часть прельстится и праведник едва спасется? Но, о, Премилостиве! Аще и не понесох тяготы и зноя дневнаго, обаче с наемники единонадесятаго часа сопричти мя и веру крепку во дни искушений во мне утверди, да зову Ти таковая: Свят еси, Господи, Боже наш, по неизреченному промышлению Твоему попустити имеяй в последнии дни воцаритися сыну гордому и погибельному, да верныя прославятся, неверныя же в конец посрамятся. Свят еси, Господи, Боже наш, два свидетеля тогда с небесе послати имеяй, да избранныя укрепят и антихристу окаяннному противостанут, и истину Твою смертию своею засвидетельствуют. Свят еси, Господи, Боже наш, прежде всех предрекий нам сия, быти подобающая, да зрим и не ужасаемся, и, избранных ради, сократити дни оныя хотяй. Свят еси, Господи, Боже наш, в терпении души нам стяжати заповедавый и до конца сия претерпевшему спасение обещавый, - посли и мне дух кротости и терпения с упованием перенести напасти тыя. Свят еси, Господи, Боже наш, изми мя тогда от сетей лукавого века сего и печати антихристовы избави мя. Свят еси, Господи, Боже наш, сохрани мя в малом стаде Твоем, имже дати Царство благоволил еси. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 8

Страннаго и страшнаго Втораго Твоего, Господи, пришествия помышляя сретение, трепещу, прещения Твоего боюся и гнева Твоего. Егда приидиши грешныя мучити, праведныя же спасти, - плачу и рыдаю, день оный воспоминая, и молю Тя прежде сего: Спасе мой, спаси мя! Да не прииду тогда в землю плача, да не вижду места тьмы, Христе Спасе мой! Ниже связан буду рукама и ногама вне чертога Твоего изверженный, одежду нетления имый оскверненную и не могий проглаголати, якоже глаголю Ти ныне: Аллилуиа.

Икос 8

Весь еси желание и сладость моя, Сладчайший Господи Исусе, Упование всех концев земли. Поучаеши ныне о дне славнаго пришествия Твоего, глаголя: бдите и молитеся, не весте бо дне и часа, воньже Сын Человеческий приидет. Сие же ведите: яко аще ведал бы домовладыка, в кую стражу нощи тать приидет - бдел бых убо и не бы дал подкопати храма своего; сего ради и вы будите готови. Внимая убо сему словеси Твоему, благодарне взываю Ти: Свят еси, Господи, Боже наш, на всякое время и на всякий час бдети и ожидати дне великаго пришествия Твоего верным повелевый. Свят еси, Господи, Боже наш, о дне том и часе никому не открывый: ни людем праведным, ниже Ангелом Своим. Но якоже молния исходит от восток и является до запад, тако пришествие Свое, имущее быти яве и внезапу, изобразивый. Свят еси, Господи, Боже наш, обновивый водою во дни Ноя мир, грехами растлевший, егда внезапу потопи люди нечестивыя, ныне же огнем попалити хотяй землю беззаконную с человеки неверными. Свят еси, Господи, Боже наш, правы пути Твоя и словеса Твоя истинны и непреложны и не мимо идут они, аще небо и земля прейдут. Свят еси, Господи, Боже наш, не даждь ми отягчити сердце мое объядением, пиянством и печальми житейскими, или иным непотребством, да не внезапу найдет на мя день той. Свят еси, Господи, Боже наш, рекий: яко на Святаго Духа хулившему не оставится ни в сем веце, ни в будущем, - соблюди мя не износити хулу ни словесную, ни мысленную на имя Святое Твое. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 9

Все естество земных и преисподних ужасом многим содрогнется, и Силы Небесныя подвигнутся в той час, егда солнце померкнет, луна не даст света своего и звезды спадут с небес; небеса же с шумом мимо идут земли, пламенем горящей, и человеком, рыдающим, и ко Владыце всяческих, к Богу Страшному, со трепетом вопиющим: Аллилуиа.

Икос 9

Витии мира безумствуют, якоже и во дни Давида царя глаголюще: несть Бог, не видим Его! О, слепии! Почто не помышляете, яко неверием окамененнаго сердца своего себе огнь вечный готовите, и богоотступлением и прочими беззакониями кончину мира приближаете? Не слышасте ли из Писаний: яко невидимая Его от создания мира твореньми помышляема, видима суть: и присносущная сила Его и Божество. Очистите, убо, сердца своя и Бога узрите. Но пощади, Господи, от таковаго ожесточеннаго заблуждения и неверия ум, сердце и душу мою, да с верою, упованием и любовию образ пришествия Твоего всегда себе представляю и зову Ти: Свят еси, Господи, Боже наш, праведным судом Твоим всем нам в землю, от неяже взяты есмы, возвратитися повелевый и паки в день всеобщаго Воскресения из нея востати положивый. Свят еси, Господи, Боже наш, солнцу, луне и звездам некогда померкнути, а земли и всему, яже на ней, огнем преобразитися предопределивый, да вместо их явится небо ново и земля нова, в нихже правда живет. Свят еси, Господи, Боже наш, утаивый день, в оньже предстанут на суд вся племена и языцы, да восприимет кийждо по делом своим. Свят еси, Господи, Боже наш, Пастырю добрый и Судие Праведнейший, имеяй сести в день воздаяния Твоего на Престоле разсуждения, во еже разлучити же вся народы друг от друга, якоже пастырь разлучает овцы от козлищ; да поставиши овцы и уз одесную себе, а козлища ошуюю, и речеши праведным сладкий глас: приидите, благословеннии Отца Моего, и наследуйте Царствие, уготованное вам от сложения мира. Свят еси, Господи, Боже наш, от Него же нераскаянные грешницы услышат тогда со страхом: отъидите от Мене, проклятии, во огнь вечный, уготованный диаволу и аггелом его. Свят еси, Господи, Боже наш, обещавый Церковь Свою до конца мира непоколебиму соблюсти, во еже неодоленней быти ей от всех врат адовых. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 10

Спасти хотя древле Лота праведнаго от запаления с содомлянами нечестивыми, Владыко Господи, извел еси его вон из града и рекл еси рабу Своему Аврааму: яко аще бы и десять праведник имел град сей, не бы тогда погибл бысть, но оскудения ради святых в нем и мерзости грешных огню предается. Последи же и учеником Своим в притче плевел сельных глаголал еси, яко плевелы и пшеница, обоя купно имут расти до жатвы, да никогда прежде жатвы восторгающе плевелы восторгнется купно с ними и пшеница. От сего убо и назидаемся: яко токмо праведники Твоими мир сей стоит доселе, и ради святых Твоих, в мире живущих, даеши еще время и мне, грешному, покаятися, сего ради, неизследиме Боже, благодарно вопию Ти: Аллилуиа.

Икос 10

Царю царей, Господи Спасе, Агнче непорочный, на Престоле Славы седяй, яко лев, от колена Иудова и корене Давидова возсиявый и мир победивый. Ты един достоин еси разгнути Книгу Жизни великую и разрешити печати ея! Ты, яко Агнец, закланный, достоин еси прияти силу, богатство и премудрость, крепость и честь, и славу, и благоволение - ихже воспевают Ти чины Ангельстии и дуси праведных на небеси. Сподоби убо и мя, недостойнаго, с ними славити Тя в день великий и в сей час звати тако: Свят еси, Господи, Боже наш, Содетелю и Промыслителю наш, сияяй светом солнечным и одождяй на добрыя и злыя; наказуяй и милуяй, нарицаяй не сущая, яко сущая; низводяй даже до ада и паки возводяй. Свят еси, Господи, Боже наш, имеяй праведники просияти, яко солнце во Царствии Своем, - не погуби мя ради святых Твоих, но в Книзе Животней напиши мя и имя Твое начертай на челе моем. Свят еси, Господи, Боже наш, день весь жития моего совершен, свят, мирен и безгрешен даруй ми. Свят еси, Господи, Боже наш, Ангела мирна, верна наставника и хранителя души и тела моего на всяко время неотлучна посли ми. Свят еси, Господи, Боже наш, по благодати Твоей, изобильно на ны излиянной, презри моя прегрешения и подаждь вся добрая и полезная души моей. Свят еси, Господи, Боже наш, прочее время живота моего сподоби мя в мире и покаянии скончати, ожидающу дне славнаго явления Твоего. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 11

Пение всеумиленное приношу Ти, Господи, Спасе и Содетелю мой, и молю Тя, егда приидеши судити миру всему на облацех, не постыди мя, студныя дела сотворшаго, и не погуби мя, якоже погубил еси Вавилон -великую блудницу, но, веры ради моея и любве к Тебе, жителя Сиона Горняго соделай мя, идеже есть глас и велий народа многаго, яко глас вод многих и яко глас грома крепкаго, глаголющих: Аллилуиа.

Икос 11

Светильник мой угасе, елея же благих дел, во еже возжещи той, несть ми; и где обряшуся окаянный, сном греховным отягченный, егда постигнет мя внезапу полунощь - час кончины моея, или Суд Божий, яко тать найдет на вся живущая на земли? Но да не услышу аз, якоже юродивыя девы, грознаго гласа Жениха: не вем тя. Помози ми, о, Господи, наполнити сосуды души моея елеем благих дел, паче же милосердия и смирения, и звати Ти: Свят еси, Господи, Боже наш, даждь ми послужити меньшей братии Твоей, якоже Самому Тебе: алчущии и жаждущии насытити, странныя приютити, нагия одеяти, больныя и в темницех страждущия посещати, да сподоблюся части десныя стояния на Суде Твоем. Свят еси, Господи, Боже наш, отъими от мене дух гордости, праздности и уныния бесовскаго и подаждь ми дух смиренномудрия, целомудрия, кротости и радости духовныя. Свят еси, Господи, Боже наш, вложи в мысль мою мудрость сына Сирахова: помнити последняя моя, дабы вовеки не согрешити. Свят еси, Господи, Боже наш, Женише, красный добротою паче всех человек, грядый в полунощи, - с мудрыми девами в рай введи мя. Свят еси, Господи, Боже наш, приими мольбу о нас и предстательство всех святых Твоих паче же простирающую к Тебе всегда о нас руце Своя Деву Пречистую, Тебе рождшую. Свят еси, Господи, Боже наш, огради нас святыми Твоими Ангелы и отжени от нас духов злобы поднебесных. Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 12

Благодать Твою, Господи Боже наш, грешныя милующую, сведуще, аще и недостойное житие явихом; обаче надежду Воскресения и жизни вечныя имуще, христианския кончины живота нашего, безболезнены, непостыдны, мирны. Божественных Тайн причастны, и добраго ответа на Страшнем Судищи Твоем всегда просим, во умилении зовуще: Аллилуиа.

Икос 12

Поюще Твое непостижимое о людех и о мире, Тобою сотворенном, промышление, Вседержителю Отче,Сыне и Душе, Господи наш, славлю Тя, создание и раб Твой, и, яко чадо Церкве Православныя, чаю Воскресения мертвых и жизни будущаго века; в веце же настоящем молю Тя, Блаже: избави мя искушений, от мира, плоти и диавола находящих на мя, и укрепи в вере несумненней и любви к Тебе; да благочестне, чисто и свято прочее время живота поживу и сподоблюся части правыя в день пакибытия, зовуща Ти: Свят еси, Господи, Боже наш, Мздовоздаятелю Праведный, судити имеяй на велицем Престоле Своем, от Егоже Лица побегнут небо и земля,и место их не обретется. Свят еси, Господи, Боже наш, всем нам явитися пред Судище Твое положивый, да воздаши коемуждо яже с телом содела: благая или злая; еже предопределил еси мне прежде дне того скончатися, - даждь ми безбедно прейти мытарства воздушныя бесовския и оправдатися на первом, частном, суде Твоем. Свят еси, Господи, Боже наш, сатану и аггелы его, зверя и лжепророка во езеро огненное на мучения вечныя Архангелом Твоим Михаилом ввергнути имеяй; того предстательством избави мя муки страшныя, тартара и тьмы кромешныя и геенны огненныя, идеже червь не умирает и огнь не угасает. Свят еси, Господи, Боже наш, всех Твоих ради святых, изряднее же святых Твоих щедрот и Крове Твоея, за ны пролиянныя, жителя мя сотвори Иерусалима Небеснаго, идеже несть ни смерти, ни плача, ни вопля, ни болезни, ни скверны некия, но жизнь безконечная, и слава Твоя присно осеняет его. Свят еси, Господи, Боже наш, прежде сих всех помози ми соблюдати словеса евангельския, творити волю Твою и прилежно внимати пророчеству Откровения Иоаннова, яко время близ есть. Свят еси, Господи, Боже наш, рекий в конец Богослову: яко, дондеже суд приидет, скверный - да сквернится еще, а святый - да святится еще. Ей, гряду скоро, и мзда Моя со Мною есть. Аминь! Ей, гряди, Господи Иисусе, молит Тя Церковь Твоя, зовущи: Свят, Свят, Свят еси, Господи, Боже Вседержителю, Иже бе и сый и грядый, помилуй мя!

Кондак 13

О Великий и Непостижимый Боже! Альфа и Омега, начало и конец всему сущему, Иже вчера, днесь и во веки Той же, и у Него же несть пременения, погоже и лета не оскудеют. Приими сие малое акафистное моление мое в память грядущаго и Страшнаго Суда Твоего, всегда мною Тебе приносимое, и, по множеству щедрот Твоих, очисти беззакония моя, и имя мое в Книзе Живота напиши, и в юдоль плача не осуди, егда судити сядеши; и от пресветлаго лица Твоего не отлучи мене. Да егда скончаются дни века сего, и небеса и земля сия мимо идут, и светила, яко воск истаят, тогда, о, Всемилостиве, да узрю и аз стены Горняго Иерусалима, и купно со избранными десными Твоими овцами вниду во святый град сей и тамо насыщуся славы Твоея и буду пети Ти песнь нову во вся веки веков: Аллилуиа.

(Этот кондак читается трижды, затем икос 1 и кондак 1)

Акафисты zvonnitsa.ru/orthodoxy/akafisti/278/13644/

Кондак 1
Избрал еси, Господи, угодника Твоего Василиска, / из млада сердце чисто созиждя в нем, / и, дары духовными изрядно его украсив, / явил еси земли Сибирстей подвижника дивнаго, / иже, пустыни тяжкая волею претерпевая, / молитвы чистыя благодать воистинну стяжа, / темже подвигни и нас, Христе Боже, горняя помышляти, / предстательством блаженнаго отца нашего, да поем тому: / Радуйся, преподобне отче Василисче, умнаго безмолвия велий рачителю.

Икос 1
Ангелов крилами к Богу воспаряющих, образы святыя издетска с любовию зрел еси, отче Василисче, темже, возрастом еще младенствуя, к Вышнему вознестися помыслил еси, во еже телесныма очима славу Божию видети, отонудуже крилы духовныя Господь тебе дарова, имиже в Небесныя обители воистинну вознеслся еси. Мы же, сим поучаеми, приносим ти таковая:
Радуйся, издетска в служение Богу избранный;
радуйся, светом божественнаго разума осиянный.
Радуйся, от млада познавый нищету телесную;
радуйся, воистинну стяжавый нищету духовную.
Радуйся, кротостию и незлобием ангелом подобниче;
радуйся, истиннаго смирения верным наставниче.
Радуйся, монахом и мирским красоту восхождения явивый;
радуйся, богоугодными делы страну Сибирскую просветивый.
Радуйся, преподобне отче Василисче, умнаго безмолвия велий рачителю.

Кондак 2
Видя желание твое, токмо единому Богови работати, и нрав послушливый, Господь Всеведец умягчи жены твоея сердце, юже родитель твой избра тебе, и тако три леты воздержанием себе испытующа, супружества соуз согласно расторгли еста; ты же, отче, душу твою Христу уневестив, радостне воспел еси Богу: Аллилуия.
Икос 2
Разумея волю Божию и закону Христову кротко повинуяся, блаженне, тяготы брата твоего, подвижника тайнаго, с любовию понесл еси, в немощах его служа ему усердно; наипаче же вкупе в молитвах прилежаща, вашим изрядным в Боге радением многия нерадивыя к исправлению призвали еста. Мы же, братолюбие христианское твое зряще, сице тебе взываем:
Радуйся, Бога паче всего земнаго возлюбивый;
радуйся, Того Единаго в животе твоем взыскавый.
Радуйся, яко любовь божественную мирстей любви предпочел еси;
радуйся, яко житейскую радость на тяготы пустынныя пременил еси.
Радуйся, образе смиренномудрия и послушания;
радуйся, правило постническаго воздержания.
Радуйся, помысла чистотою просиявый;
радуйся, яко Мария, благую часть избравый.
Радуйся, преподобне отче Василисче, умнаго безмолвия велий рачителю.

Кондак 3
Силою любве ко Господу мира красная отвергл еси, отче Василисче, отшельническое житие избрав, идеже ревностно подвизаяся, к вящшему постничеству приступил еси, и тако тело твое поклоны и бдении зело утруждая, страсти плотския воздержанием крайним уставил еси, вопия в смирении Богу: Аллилуия.
Икос 3
Имущу велие стремление богоугодно жити, Подвигоположник Господь показа тебе ума самочиннаго пагубу, и в леса брянския стопы твоя направи, идеже старцу пустынному Адриану в послушание себе вдал еси, отче, и, яко лоза благораслена, в трудех пустынных зело преспев, иноческим одеянием достойно украсился еси. Мы же взываем ти тако:
Радуйся, в пустыню, яко в цветник, с радостию вшедый;
радуйся, подвиги твоими, яко крин сельный, процветый.
Радуйся, нестяжанием зело обогативыйся;
радуйся, воздержанием крепким украсивыйся.
Радуйся, обет пустынничества при постриге твоем давый;
радуйся, егоже в подвизе добром до конца исполнивый.
Радуйся, псалмы и молитвы Господу присно возлиявый;
радуйся, поклоны земными от сна себе воставлявый.
Радуйся, преподобне отче Василисче, умнаго безмолвия велий рачителю.

Кондак 4
Буря искушений и бесов наветы обступиша тя, хотяще унынием душу твою поборити, ты же, отче Василисче, болезньми воздержания силу вражию посрамил еси, на камени смирения терпением велием веру твою утвердив, и тако немощь естества о Господе укреплял еси, денно и нощно возывая к Тому: Аллилуия.

Икос 4
Слышавше людие о твоем, отче Василисче, благочестном житии пустынном, стекахуся к тебе, желающе с тобою купно жительствовати и во спасении тобою наставлятися, ты же, святе, смирения истиннаго исполненный, невежду себе пред всеми почел еси, во еже в безмолвии един с Единым всегда пребывати. Мы же, богомудре, глаголем тебе тако:
Радуйся, сердце твое мирови затворивый;
радуйся, воле Божией всего себе покоривый.
Радуйся, благоуветия и благочестия смиренный учителю;
радуйся, словесным и безсловесным кроткий благодетелю.
Радуйся, с усердием на врага спасения противоставый;
радуйся, постом и молитвою демоны отгнавый.
Радуйся, духа нищету паче славы человеческия возлюбивый;
радуйся, не в многословии твоем глубину мудрости показавый.
Радуйся, преподобне отче Василисче, умнаго безмолвия велий рачителю.

Кондак 5
Боготочный источник духовныя благодати зря в тебе юный Зосима, тепле моляше тя, да ученик тебе прилежен будет, ты же, отче, духовными очами промысл Божий в сем прозрев, яко друга искренняго любовию того приял еси; темже словесы и делы на путь иночества тобою наставляемый Зосима радостне воспе Богу: Аллилуия.

Икос 5
Видя помышление духовника твоего, хотяща во обитель Коневскую тебе, отче, преселити, тепле моля просил еси того, да в отшельстве своем недвижимо пребудеши; обаче послушания ради, яко воли Божией повинуяся, с Зосимою вкупе, егоже возлюби душа твоя, за старцем своим последовал еси. Мы же, кротость твою ублажающе, взываем ти сице:
Радуйся, Авраамле послушание познавый;
радуйся, Иовлю терпению поревновавый.
Радуйся, иноче, в смирении и кротости совершенный;
радуйся, в безстрастия ризу оболченный.
Радуйся, скудною пищею тело твое изнуривый;
радуйся, хлебом Живота вечнаго душу твою насытивый.
Радуйся, простоты жития монашескаго наставниче;
радуйся, чистоты души христианския хранителю.
Радуйся, преподобне отче Василисче, умнаго безмолвия велий рачителю.

Кондак 6
Проповедуемым словесем Христовым, яко кроток есмь и смирен сердцем, воистинну поучился еси, труженниче пустынный, темже и Господь тя зело утеши, благоволив чрез Зосиму открыти ти сокровище молитвы сердечныя учения; ты же, преподобне Василисче, благодарен сый воспел еси Богу о сем: Аллилуия.

Икос 6
Возсиял еси на острови Коневстем высотою жития твоего, отче досточудне, идеже в молитвы делании вельми возрастая, ум твой священным безмолвием просветил еси, и сладость молитвенную о имени Иисусове, рекою из сердца обильно изливаему, вкусил еси, богоблаженне. Мы же, толикое дарование в тебе зряще, смиренно взываем ти:
Радуйся, словес евангельских послушателю благодатный;
радуйся, ига Христова благаго носителю благодарный.
Радуйся, добродетель благую, трезвение, стяжавый;
радуйся, ума хранением сердце твое очистивый.
Радуйся, благодати Божией хранилище преисполненное;
радуйся, Духа Святаго жилище достойное.
Радуйся, высоты Христова разумения достигнувый;
радуйся, ум твой с сердцем в молитве срастворивый.
Радуйся, преподобне отче Василисче, умнаго безмолвия велий рачителю.

Кондак 7
Хотя, преподобне, в Бозе Единем всегда пребывати, ум твой памятованием Христовым от всякия страсти очистил еси, и Духа Святаго благодатию молитву самодвижиму в сердце твоем стяжал еси, темже непрестанно Господеви в любви предстоя, в умилении чистом вопиял еси Ему: Аллилуия.

Икос 7
Новую лествицу восхождения чтим тя, богомудре, ты бо любве ради благоволил еси, молитвенных твоих деяний рукописание, егоже сподвижник твой и сотаинник Зосима прилежный списатель бысть, по преставлении твоем на полезное мирови явити. Мы же, отче Василисче, молитвенно светильник сей приемлюще, в спасительной ревности взываем ти:
Радуйся, Христа Бога в сердце твоем вместивый;
радуйся, имя Его спасительное в уме всегда носивый.
Радуйся, молитвенную сладость сердцем твоим познавый;
радуйся, слез благодатных поток умилительный источивый.
Радуйся, к Богу пламеневый любовию великою;
радуйся, яко действом ея сердце твое взыграся.
Радуйся, молитвы чистыя священнодейства стяжателю;
радуйся, сокровенных Божиих предивный тайнозрителю.
Радуйся, преподобне отче Василисче, умнаго безмолвия велий рачителю.

Кондак 8
Странен быв всякия славы человеческия, единыя славы Божия иский, блаженне, в пустыню внутреннюю с Зосимою верным удалитися возжелал еси, Василисче, темже, старцем твоим благословенный, предел Сибирских достигл еси, идеже лишения многа претерпевая, Богу в надежде воспевал еси: Аллилуия.

Икос 8
Все упование возложив на промысл Божий и к Пречистей в молитвах всегда прибегая, пустынниче святый, яко птица небесная попечением малым о телесе твоем тщался еси, паче же воздержанием многим дух твой укрепив, красоту исправлений твоих верным уяснил еси, темже приими от нас сицевая:
Радуйся, узок путь во Царствие небесное избравый;
радуйся, пустынничества крест волею подъявый.
Радуйся, страны мразныя не убоявыйся;
радуйся, ветра хладнаго не устрашивыйся.
Радуйся, скорби и болезни мужественно понесый;
радуйся, Заступницею усердною всегда хранимый.
Радуйся, молитвы храм в сердце твоем воздвигнувый;
радуйся, труд, терпение и усердие в основание того положивый.
Радуйся, преподобне отче Василисче, умнаго безмолвия велий рачителю.

Кондак 9
Всего себе Господу освятив, отче Василисче, в болезнях жестоких Христу сраспялся еси воистинну, и в пустыни, яко во гробе, Тому спогреблся еси, блаженне, и Того ради многая злострадания претерпел еси, но любве Божия никако же отпал еси, присно поя Ему: Аллилуия.

Икос 9
Витии многоречивии умолкают, зряще твоего, отче Василисче, жития безмолвнаго подвиг, ибо яко пламя прилежит свещи, тако ты, блаженне, умом и сердцем твоим воистинну Христу в молитве срастворился еси. Мы же, таковое действо в тебе зряще, любовию взываем ти:
Радуйся, Богу в любви непрестанно предстоявый;
радуйся, благодать Богообщения стяжавый.
Радуйся, великих дарований небесных приятелю;
радуйся, духов поднебесных велий устрашителю.
Радуйся, на высоту добродетелей восшедый;
радуйся, Царствие Божие внутрь себе имый.
Радуйся, Владыки вышняго верный служителю;
радуйся, истинныя радости о Боге благий стяжателю.
Радуйся, преподобне отче Василисче, умнаго безмолвия велий рачителю.

Кондак 10
Спасения ради души твоея, отче Василисче, многая лета в пустыне неисходно подвизался еси, и тамо старости честныя достигнув, высоту добродетели стяжал еси, темже Господь на ину стезю направи тя, во еже ближних спасению послужити, отонудуже малую братию собрав, воспел еси Богу: Аллилуия.

Икос 10
Стена крепкая в молитве братии пустынней был еси, святый Василисче, духом сокрушенным, яко мечем, научал еси тех коварства вражии посекати, и нас ныне от сна лености житием твоим богозарным пробуждая, явился еси утешения духовнаго податель. Мы же, подвиги твоя ублажающе, воспеваем тя сице:
Радуйся, в горении духа ангелом уподобивыйся;
радуйся, в доброделании душею обновивыйся.
Радуйся, чистою молитвою изрядно благоукрашенный;
радуйся, во брани невидемей воине совершенный.
Радуйся, правды Божией всегда алкавый;
радуйся, рая сладости еще на земли вкусивый.
Радуйся, блаженнаго смирения доброту стяжавый;
радуйся, Иерусалим небесный воистинну наследивый.
Радуйся, преподобне отче Василисче, умнаго безмолвия велий рачителю.

Кондак 11
Пение умиленное тебе приносим, блаженне отче, и успению твоему с трепетом внимаем, ибо всельшагося в тя Святаго Духа действо благодатию обильно сердце твое напита, якоже и по изшествии души твоея ко Господу молитвы чистыя двизанием сердце твое исполненно бе. Мы же, сему дивящеся, вопием Богу о тебе: Аллилуия.

Икос 11
Светом божественным просвещенный, отче Василисче, внутренняго делания высоты молитвы непрестанныя достигл еси, отонудуже умными очами сердечными Свет присносущный воистинну сподобился еси зрети, имже вельми озаренный сам световиден верным показался еси, темже приими от нас таковая:
Радуйся, главо, о Господе присно любомудрствующая;
радуйся, заре, от нощи к Богу утреннюющая.
Радуйся, яко руце твоя в молитве многажды простирал еси;
радуйся, яко нозе твоя во бдениих зело претрудил еси.
Радуйся, заповеди Евангельския до конца совершивый;
радуйся, обетования Евангельския вправду восприемый.
Радуйся, яко житием твоим ко благочестию нас пробуждаеши;
радуйся, яко деянии твоими на путь спасения нас наставляеши.
Радуйся, преподобне отче Василисче, умнаго безмолвия велий рачителю.

Кондак 12
Блажен воистинну еси, отче Василисче, ибо в клеть сердца твоего вшед, собеседник любезен Господеви был еси, и яко Серафими любовию к Нему горел еси, и якоже Херувими всегда умно Его зрел еси; ныне же в нескончаемой радости пребывая, и нас научаеши славословити Бога: Аллилуия.

Икос 12
Поюще честную память твою, отче Василисче, благодарная приносим ти, и молитв благоухание от мощей твоих приемлюще, веселия духовнаго исполняемся, и твоя, пустыннолюбче, труды и болезни, Христа ради подъятыя, ублажающе, достойно величаем тя словесы таковыми:
Радуйся, звездо, спасения путь ко вратом небесным нам указующая;
радуйся, сокровищнице, пребезценный камень, Христа, в себе имущая.
Радуйся, кладезю, духовною влагою обильно нас напаяяй;
радуйся, столпе, несокрушимую силу молитвы во брани являяй.
Радуйся, стамно, чудесы доныне богатно преизливаемая;
радуйся, реко, деянии твоими души верных орошающая.
Радуйся, в скорбех пребывающим скорый и благий поспешниче;
радуйся, тебе чтущих теплый и верный к Богу молитвенниче.
Радуйся, преподобне отче Василисче, умнаго безмолвия велий рачителю.

Кондак 13
О, пустынниче дивный, преподобне отче Василисче, к тебе в смирении припадаем, яко стяжавшему велию Духа Святаго благодать: призри с высоты райския на нас, дольними обуреваемых, и подаждь душам нашим молитвами твоими возрастание духовное, во еже чистым умом и сердцем достойно пети Христу Богу нашему: Аллилуия, аллилуия, аллилуия.
Сей кондак чтется трижды, затем Икос 1 и Кондак 1.
 

Акафисты zvonnitsa.ru/orthodoxy/akafisti/290/13653/

Кондак 1
Избранной от всех родов Пречистей Деве Владычице, источающей неоскудныя милости всему миру и сугубо стране нашей Российстей; похвальная восписуем о Ея чудесах, явлениях и чудотворных иконах. Ты же, Обрадованная, не отрини наших песнопений, но приими их и подаждь радость нам, зовущим Ти: Радуйся, Пречистая Дево, всемирная Славо и Радосте!

Икос 1
Архистратиг Михаил и вся небесныя силы песнословят Тя, Владычице, Честнейшую Херувим и Славнейшую без сравнения Серафим, сущую Богородицу; и мы грешнии на земли, подобяся сим безплотным силам, и радуяся первым глаголам радости, принесенным Тебе Архангелом Гавриилом и праведною Елисаветою, купно с ними из глубины сердца нашего вопием Ти: Радуйся, благодатная. Радуйся, яко Господь с Тобою. Радуйся, Благословенная в женах. Радуйся, обретшая благодать у Бога. Радуйся, яко Дух Святый найде на Тя, и сила Вышняго осени Тя. Радуйся, заченшая во чреве, рождшая Сына и нарекшая имя Ему Иисус. Радуйся, яко рожденное Тобою Свято есть и наречеся Сын Божий. Радуйся, яко благословен Плод чрева Твоего. Радуйся, Мати Господа нашего. Радуйся веровавшая, еже совершитися глаголенным ти от Господа. Радуйся, яко возрадовася при сих приветствиях дух Твой о Бозе Спасе Твоем. Радуйся, Пречистая Дево, всемирная Славо и Радосте!

Кондак 2
Разум человеческий не может постигнути, како Сам Господь вселися в девственную утробу Твою и како Ты пребыла еси Девою и по рождестве Сына Твоего, преклоняяся пред велиею тайною воплощения Бога Слова, радостно вопием Тебе, заимодавшей Ему плоть Твою, питавшей Его млеком и носившей Его руками Своими, Ангельскую песнь: аллилуиа.

Икос 2
Во вся дни жития Твоего на земли от сретения Тобою во храме праведного Симеона, прорекшаго Ти, яко оружие пройдет душу Твою. Всякая в мире сама радость вся печали бысть причастна, до утра перваго дне по субботе, егда, Ты паки услышала глас Ангела, рекшаго Тебе: "Радуйся, Благодатная, Твой Сын воскресе тридневен от гроба." И мы с сим радостным гласом приносим Ти хваления наша: Радуйся, Прородительнице вечнаго Царя. Радуйся, израстившая нам плод живота. Радуйся, верная раба Господня. Радуйся, яко блажат Тя вси роди. Радуйся, всех нас при кресте Сына Твоего усыновившая. Радуйся, всегда матернюю любовь к нам являющая. Радуйся, веры христиан вожделенная Помощнице. Радуйся, яко за всех молиши Сына Твоего Христа Бога нашего. Радуйся, Присноблаженная и Пренепорочная. Радуйся, во славе небесной одесную Бога пребывающая. Радуйся, чистотою сияющая паче солнца. Радуйся, Пречистая Дево, всемирная Славо и Радосте.

Кондак 3
Како многообразно Ти, Пречистая Владычице, укрепляла еси род человеческий в вере в Бога и Сына Твоего? Колико даровала еси Ты нам чудотворящих икон Твоих? Коль множицею Ты являлась и вьявь и в сонниих подвижником благочестия? Кто может исчислити вся чудеса Твоя? Кий глагол может вознести Тебе достойную похвалу? Кто не ублажит Тебя, Пресвятая Дево? Кии уста умолчат, егда о Тебе радуется, Благодатная, всякая тварь, Ангельский собор и человеческий род! Не умолчим и мы никогда, Богородице, силы Твоя глаголати недостойнии, и вопием о Тебе Богу: аллилуиа.

Икос З
Святии Игнатий Богоносец и Дионисий Ареопагит, взирающе на Тя, Пречистая Владычице, не обретоша словес описати Твой сияющий лик, и Твою божественную благодать и силу, и паства не сокрушашеся, яко не вси возмогоша зрети тя, Небесная Дево. Ты же от любви к верующим в Сына Твоего повелела еси Святому Апостолу и евангелисту Луце изображити образ Твой честный с Богомладенцем и Сыном Твоим, да вси языцы и колена земная, взирая нань, имут во вся веки возноситеся мыслию к Самой Тебе, Преблагословенная Владычице: и мы грешнии, преклоняюще колена пред сим образом, взываем Ти, Всепетая: Радуйся, рекшая к сему первописанному образу: "С ним благодать Моя и сила пребудет." Радуйся, даровавшая его стране нашей Российстей во град святый Владимир. Радуйся, яко днесь сим образом светло красуется славнейший град Москва. Радуйся, сию иконою благодать и милость нам сугубо дарующая. Радуйся, чудотворно изобразившая Лик Свой во храме Твоем во граде Лидде. Радуйся, Апостолов и всех верных сим чудом обрадовавшая. Радуйся, поклоняющимся Тебе пред сим образом чудеса источившая. Радуйся, научившая Алостолов взывати к Тебе: "Пресвятая Богородице, помогай нам!" Радуйся, посетившая при жизни Твоей на земле Святую гору Афонскую и избравшая сие место в удел Свой. Радуйся, пославшая равноапостольную Нину просветити жребий Твой земной, страну Иверскую. Радуйся, светлое пророческое сбытие и Апостолов похвало. Радуйся, Пречистая Дево, всемирная Славо и Радосте!

Кондак 4
Егда враг рода человеческаго возведе на христиан гонения и предаде телеса верующих на мучения и смерть, коль краты являлася еси Ты укрепительнице их в сем подвиге, наставницею в вере Христовой, подательницею им силы и премудрости. И ныне сии Святии мученицы, претерпевшия велия мучения, Христовы невесты: Екатерины, Варваро и иныя, сопутствуют Тебе в Твоих посещениих избранников Божиих на земли, и вопиют о Тебе Богу песнь: аллилуиа.

Икос 4
Благоверный и равноапостольный князь Владимир, приведый ко Христу людей земли Российской, по крещении Своем сооруди первый храм во граде Киеве в честь Пречистаго Рождества Твоего, Владычице мира, и даяще десятину стяжаний Своих на украшение Его. И от тех дней до ныне Ты, Преблагословенная, изливаеши неустанно сугубую благодать над страною нашею и даруеши ей велия милости Твоя. И яко особый дар Твоего благоволения и Твоего избрания града Киева в удел Себе, чудесно даровала еси ему чудотворный образ "Успения" Твоего и повелела еси соорудити Тебе храм во обители Святых Антония и Феодосия. Кто изочтет множество людей, кои преклоняху со слезами колена своя пред Пречистым образом сим? Кий град и кая весь не ведят о сих многочудесных образех и обители? Кто повесть вся чудеса, у сего образа явленныя? Не таим Твоих благодеяний, Пречистая, и мы, со умилением взываем Ти: Радуйся, Обрадованная, во успении Твоем нас не оставляющая. Радуйся, восприемлемая от земли дланьми Сына Твоего. Радуйся, ко превышним возшедшая, наслаждаешися славы Его. Радуйся, уверившая чрез Апостола Фому о Твоем с плотию на небеса восхождении. Радуйся, престоле Господень огнезрачный, вознесенный от земли в Царствие Небесное. Радуйся, в видении показавшая образ великий Церкви КиевоПечерския. Радуйся, Сама давшая мощи Святых мучеников и злато для созидания ея. Радуйся, вручившая и Святую икону "Успения" Твоего Своими руками Святым здателям. Радуйся, чудеса показавшая на место храма Твоего с огнем небесным очистившая место сие. Радуйся, Ангелоподобное пение иноков похвалы пред Твоею чудотворною иконою "Успения" приемлющая. Радуйся, скорбь всех притекающих к Тебе в радость претворяющая. Радуйся, пречистая Дево, всемирная Славо и Радосте!

Кондак 5
Видяще, Всенепорочная, с высоты небеснаго жилища Своего, идеже с Сыном Твоим во славе пребываеши, скорбь рабов Твоих во граде Казани, яко гневнаго ради Божия посещения вера Христова поругана бысть агарянским зловерием, - благоволила еси явити икону Свою чудесы ю прославляющи, да утверждаемы знаменьми Твоя благодати христолюбивые люди верно вопиют Тебе: Радуйся, Заступнице усердная рода христианского, и Творцу всех Богу: аллилуиа.

Икос 5
Хотящи явити токи чудес всем скорбящим, печальным, обидимым и заблудшим, даровала еси, Всемилостивая Владычице, сугубую благодать Твоим чудотворным иконам, именуемые: "Всех скорбящих Радосте," "Утоли моя печали" и "Взыскание погибших." Все море слез пред ними пролито в скорбех и печалех сущими? Кая душа не притекала к Тебе в житии своем, припадающе к сим иконам Твоим? Чьи скорби ты не претворила еси на радость? Кому из погибающих, но молящихся Тебе, Ты не простерла еси руку помощи? Благодарим Ты, Всепетая, за вся милости, грешному роду человеческому дарованные, и всею душею вопием Ти умильно: Радуйся, благодатная Богородице Дево, всех скорбящих радосте! Радуйся, Мати милосердия! Радуйся, скорая Помощнице сущим в бедах и напастех. Радуйся, Радосте наша, избави нас от всякаго зла и утоляющая наша печали! Радуйся, Твоим предстательством временная наша скорби разрушающая. Радуйся, явлением икон сих знамения благодати в Церкви являющая. Радуйся, сими яко столпом огненным, мрак греха отгоняющая. Радуйся, прославившая икону Твою, именуемую "В скорбех и печалях утешение." Радуйся, восхваляемая в обителей на Афоне и в земли нашей пред образом Твоим "Отрадо и Утешение"! Радуйся, Пречистая Дево, всемирная Славо и Радосте!

Кондак 6
Всем верным утешительно есть взирати на икону Твою, изреченную Тобою "Скоропослушнице," поклонятися Тебе пред Нею, не токмо во обители Дохиарстей, но и во многих градех и весех страны нашея, взывая Ти: Радуйся, Всеблагая Скоропослушнице, прошения наша во благо исполняющая, и поя со умилением сердечным Сыну Твоему, Христу Богу нашему: аллилуиа.

Икос 6
Сила Вышняго осеняет с верою и благоговением прибегающих к Твоему Всечестному Покрову, Пречистая Владычице, и от лет древних до ныне Ты покрываеши Своим омофором весь род христианский, и наипаче страну нашу Российскую, и многия обители в ней созданныя. И люди православныя, взирающе на Твою икону, на Ней же Ты со Архангелы, Ангелы, Предтечею, Богословом и всех Святых ликом ходатайствуеши о нас пред Господом, преклонше колена и главу Своя, взывают Ти умильно: Радуйся, Радосте наша, покрывающая нас от всякаго зла честным Твоим омофором. Радуйся, святых обителей Христовых Покров и спасение. Радуйся, Святых храмов и алтарей первейшее украшение. Радуйся, благословение домов и семейств благочестивых. Радуйся, верных пастырей Церкви бодрость и вразумление. Радуйся, богобоязненных иноков и инокинь наставнице. Радуйся, явных подвижников благочестия явное укрепление. Радуйся, тайных среди мира рабов Божиих тайное вразумление. Радуйся, и нас обнаженных добрых дел не оставляющая Своим Покровом и благодатию. Радуйся, крепкая Заступнице сущих в плену и изгнании. Радуйся, неусыпающая попечительнице во узах и темницех седящих. Радуйся, Пречистая Дево, всемирная Славо и Радосте!

Кондак 7
Видяще рыбарие над пучиною вод носимую невидимою силою и светом подобно солнцу сияющую Твою, Богомати, Тихвинскую икону, возопиша ко Господу: "Яви нам сей Божественный дар; не скрый сокровища, имже надеяхомся душевную нищету нашу обогатити: отри слезы и рыдания наша.".. и получив желаемое, вси возопиша Тебе, Пречистая: "Радуйся, Владычице, милостивая о нас пред Богом Заступнице," Сыну же Твоему и Богу поя песнь Ангельскую: аллилуиа.

Икос 7
Кий верный, посетив град Москву, не поклонится, Госпоже Богородице, пред Пречистыми иконами Твоими "Иверския" и "Боголюбивыя"? Кто не умилится, видя в полунощи множество людей, коленопреклоненно сретающих Твою "Иверскую" икону? Кто изочтет день и ночь лобызающих во дни празднества Твой "Боголюбивый" образ? Не отступи от нас во вся дни нашея жизни, Мати Всемилостивая, и услыши наше пение Тебе приносимое: Радуйся, Благая Заступнице, двери райския нам отверзающая. Радуйся, яко вси благоговейныя люди Московстии пред Пречистым Твоим "Иверским" образом. Радуйся, яко день и ночь Твоя икона сия приносится в дома скорбящих и болящих. Радуйся, яко чудодействовавшая сим образом еще на пути Его с Афонския горы в землю Российскую. Радуйся, повелевшая благочестивому Мануилу дати выкуп неверным, возбранявшим шествие Святыя иконы в страну Русскую. Радуйся, яко после же сугубо ему сей выкуп отдавшая. Радуйся, яко и многия списки и с иконы сея прославившая великими чудесы. Радуйся, Боголюбивая Царице Богородице, надеждо и прибежище наше! Радуйся, явившаяся князю Андрею, рекшия волю Твою и на месте явления Твоего повелевшая соорудити обитель иноческую во имя Рождества Твоего. Радуйся, изображенная на иконе Твоей, еже во граде Москве, с первосвятители Московскими, блаженными, преподобными и мученицами. Радуйся, прославившая чудесы Своими "Боголюбивыя" иконы во градех Угличе, Туле и иных. Радуйся, Пречистая Дево, всемирная Славо и Радосте!

Кондак 8
Возсия нам, яко пресветлая заря, чудотворная икона Твоя "Нечаянныя Радости," пред Нею же людие во гресех, бедах, скорбех и озлоблениих суще, многажды с верою в молитве колена преклоняют, взывая: Радуйся, нечаянную радость верным дарующая, и получившая милость Твоя, вопиют о Тебе Богу: аллилуиа.

Икос 8
Благовестник Твой Архангел Гавриил по Божию повелению дивным явлением научи нас на земли восхваляти Тя такожде, яко же Ангели воспевают Тя на небеси, даровав песнь сию: Достойно есть яко воистину блажити Тя Богородицу, Присноблаженную и Пренепорочную, и Матерь Бога нашего. И мы от дней тех, взывая Тебе выну, Всепетая, сию, Ангелом принесенную, песнь, взываем Ти такожде: Радуйся, христианом помощнице и милосердая о грешных предстательнице. Радуйся, превысшая всех сил Небесных... Радуйся, даровавшая Святей горе Афонстей, чрез многия иконы Твоя, чудотворения, благословения и вразумления. Радуйся, пророчество святаго Саввы освященнаго чрез икону Твою "Млекопитательница" исполнившая. Радуйся, моления иноков Афонских пред образом Твоим "Предвозвестительница" и изобилие елея для храма Своего давшая. Радуйся, игуменство в Хилендарском монастыре иконою Твоею "Троеручица" приявшая. Радуйся, восхваляемая пред образами Твоими "Вразумившая экклесиарха" и "Герондиса," еже есть старица. Радуйся, именуемая "Акафистная," рекшая от иконы Твоея старцу, чтущему Ти акафист: "Радуйся и Ты, старче Божий." Радуйся, икону Свою "Одигитрия" чудесно преносившая двакраты из обители Ватопедской во обитель Ксенофскую. Радуйся, дивная чудеса явившая на Афоне от иконы "Закланная" и "Ктиторская." Радуйся, дщерь царя Плакидию воспитавшая, яко жену, от посещения обителей Афонских и милостиво ей сей грех оставльшая. Радуйся, Пречистая Дево, всемирная Славо и Радосте!

Кондак 9
Во дни Светлыя Пасхи, егда Церковь радостно поет о Воскресении Христовом, воспоминаем мы, Пречистая, и о Твоих чудесех, ихже ради написашася иконы Твоя "Живоносный Источник" и "Прозрение очес" и чудесно сохранися от рук иконоборца Твой образ "Сладкое лобзание," и благодаряще Воскресителя душ и телес наших, поем Ему радостно песнь: аллилуиа.

Икос 9
Витии многовещаннии не возмогут при всей любви к Тебе, Владычице, достойно наименовать Ти, Пречистая, и от избытка сердца именуют иконы Твоя многими радостными имены, каковыя приими и от нас ныне: Радуйся, "Цвете Неувядаемый," и "Благодатное Небо." Радуйся, "Блаженное чрево" и "Звездо Пресветлая." Радуйся, "Радосте ангелов" и "Три радосте." Радуйся, милостивая и "Милующая." Радуйся, "Недремлющее око" и "Подательнице ума." Радуйся, "Призри на смирение" и "Ключу разумения." Радуйся, "Умягчение злых сердец" и "Спасительница утопающих." Радуйся, "Непорочная Дево" и "Помоще в родах." Радуйся, "Споручнице грешных" и "Целительнице." Радуйся, "Слово плоть бысть" и "Прежде рождества и по рождестве Дево." Радуйся, "Всеблаженны" и "Седмистрельная." Радуйся, Пречистая Дево, всемирная Славо и Радосте!

Кондак 10
Проповедит Новград преславное заступление Твое, Пречистая Владычице, како во дни нашествия врагов сильных и вооруженных, от Твоея святыя иконы "Знамения," помощь Твою благодатную людем Твоим явила еси, враждебные полки со страхом вспять обративши, град же Твой цел и невредим от них сохраньше; да вси вопиют благодаряще Тебе: Радуйся, Владычице, знамение милости Твоея нам являющая, и Спасителю Богу поя: аллилуиа.

Икос 10
Силою Всевышняго действующи, Владычице Преблагая, силу естества огненнаго укрощаеши Святою иконою Твоею "Неопалимая купина" и многия чудеса содеваеши Ю во Вселенней. Такожде исчести не может разум человеческий всех благодеяний Твоих источаемых от чудотворных икон Твоих, иже пребывают на Почаевской горе, в Ченстохове, в веси Ахтырки, от именуемых "Феодоровская," "Толгская" и иных, ихже не леть есть воспомянути. Не таим Твоих благодеяний, Всеблагословенны, и в радости сердечной вопием Тебе сицевыя хвалы: Радуйся, Благодатная Купино неопалимая, огненнаго запаления нас избавляющая. Радуйся, Похвало Почаевская, надеждо наша и утешение. Радуйся, Мати Божия, Предстательнице и Заступнице наша усердная, даровавшая нам икону "Обнорскую." Радуйся, Софие, еже есть Премудрость Божия, создавшая Себе храмы во градех: Киеве, Новеграде и иных. Радуйся, чудотворно окончившая писание иконы Твоея "Знамение" в Серафимо-Понетаевской обители. Радуйся, во Святую Киево-Братскую обитель в чудотворней иконе Своей "Киево-Братской" пришедшая и до сих пор в ней пребывающая. Радуйся, обитель инокинь собравшая окрест Твоея чудотворныя иконы, яже в "Козельщанах." Радуйся, даровавшая утешение градем Одессе и Херсону, икону Твою "Касперовскую." Радуйся, освятившая град Вильну образом Твоим "Острабрамская." Пред ним же всяк благочестивый преклоняет колена своя. Радуйся, "Нерушимая стено" и "Спорительнице хлебов." Радуйся, "Взыграние" и "Плачущая." Радуйся, Пречистая Дево, всемирная Слава и Радосте!

Кондак 11
Благочестивые пастырие и людие всякую седьмицу восхваляют Тя, Пречистая, яко "Одигитрию" - Путеводительницу; и несть кому исчислити Твоя иконы сии по всем странам христианским Тебе, Пречистая, сооруженныя. Наипаче других восхвыяет Ти благодарный град Смоленск, его же спасла еси от ига татарскаго, давши дивное повеление гласом Твоим воину Меркурию сразиться со врагом; да всяк язык взывает Тебе: Радуйся, Всеблагая Одигитрие, всемирное чудо и слышание, и поет Сыну Твоему хвалебную песнь: аллилуиа.

Икос 11
Кий глас изобразит радость избранников Божиих, егда Ты по любве Своей к ним являлася еси им на земли, укрепляя, утешая и наставляя. В ти часы небо соединяшеся с землею, и свет, паче солнечнаго, осияваше убогия келлии преподобных. И мы грешнии, воспоминая сие и причащаяся духовной сей небесной радости угодников Божиих, во смирении вопием Ти: Радуйся, повелевшая Богослову преподати учение о Святей Троице Святителю Григорию Неокессарийскому. Радуйся, наставившая в Гефсимании преподобнаго Досифея на пост и молитву, и призвавшая его во иночество. Радуйся, спасшая ученика преподобнаго Павла Препростаго от адских мучений, двакраты явившися преподобному и научивши Его молитве об усопших. Радуйся, обрадовавшая Косму Маюмскаго, рекши ему, коль приятна Тебе составленная им песнь: Честнейшую Херувим и Славнейшую без сравнения Серафим. Радуйся, со апостолы Петром и Иоанном яве посетившая преподобнаго Сергия Радонежскаго и ученика Его Михея. Радуйся, многажды являвшаяся преподобному и Богоносному Серафиму Саровскому и давшая ему повеление об устройстве Твоего последняго жребия на земли - Серафимо-Дивеевской обители. Радуйся, в день Благовещения посетившая его со Апостолом Иоанном и Предтечею, и двенадесятью девамимученицами, и возвестившая ему о скором преселении его в небесныя обители. Радуйся, благословившая при сем и смиренную монахиню Дивеевскую Евпраксию. Радуйся, в дивных сониях являвшаяся святителю Кириллу Александрийскому, Петру Афонскому, Роману Сладкопевцу и многим иным святителем и преподобным. Радуйся, сладким Твоим гласом, исходящим от Святыя иконы Твоея Едесския, введшая во храм Алексия человека Божия. Радуйся, таковым гласом наставившая на путь покаяния преподобную Марию Египетскую. Радуйся, Пречисты Дево, всемирная Славо и Радосте!

Кондак 12
Благодать сугубую источаеши Ти, Пречистая, от иконы Твоея "Умиление," во обители Серафимо-Дивеевской пребывающей; пред Нею же избранник Божий и Твой, предстатель Божий и Твой предстатель за землю Русскую, преподобный Серафим денно и нощно моляшеся Тебе, именуя Тя "Радостию всех радостей" и поя Тебе в пустыннем затворе Своем песнь: "Всемирную славу от человек прозябшую." С ним же купно и мы восхваляем Тя, Пречистая Владычице, сими же словами, и приносим Богу Ангельское пение: аллилуиа.

Икос 12
Поюще Твоя неисчетныя милости, чудеса и явления, всему миру дарованныя Тобою, припадающе к Тебе во умилении сердца нашего, благодарим Тя, Пречистая Владычице, хвалим Тя, поем и превозносим имя Твое, и молим Тя, не отвержи и впредь от нас лица Твоего, заступи, защити и спаси всех нас во гресех погибающих: умири нашу жизнь, настави заблуждающихся на путь правый, воспитай в духе благочестия чад наших, укрепи наших пастырей, соблюди нас в чистой вере, да уста наша выну восхваляют Тя, Высшую небес и чистшую светлостей солнечных, таковыми гласы: Радуйся, Невесто неневестная и Царица Цариц. Радуйся, Небесный Кивоте и носило Слова Божия. Радуйся, горлице Богогласная и голубице кроткая и тихая. Радуйся, неизмеримое глубино и неизреченная тайна. Радуйся, несведомое чудо и источниче святыни. Радуйся, девствующих чистото и матерей тихое веселие. Радуйся, младенцев охранительнице и вдов защито. Радуйся, болящих здравие и пленных избавление. Радуйся, труждающихся благое покоище и ненадеющихся надеяние. Радуйся, Едина наша надежда в жизни и по отшествии нашем от земли. Радуйся, на мытарствах нас защищающая и на страшном суде Христовом наша Заступнице. Радуйся, Пречистая Дево, всемирная Славо и Радосте!

Кондак 13
О, Пречистая Дево, Владычице небеси и земли! Приими от всея души нашея возносимое Тебе сие хвалебное пение и сподоби нас грешных в вечных селениих зрети Тя, нашу всемирную Славу и Радость всех радостей, поя Тебе и о Тебе Богу песнь великую, в Вышних трегубо песнословимую: аллилуиа.

(Этот кондак читается трижды, затем икос 1 и кондак 1).


Молитва Божией Матери

О Пресвятая Дево, Матерь Господа Вышняго, Заступнице и покрове всех к Тебе прибегающих! Призри с высоты святыя Твоея на мя грешнаго, припадающего ко пречистому образу Твоему; услыши мою теплую молитву и принеси ю пред возлюбленнаго Сына Твоего, Господа нашего Иисуса Христа; умоли Его, да озарит мрачную душу мою светом Божественныя благодати Своея, да избавит мя от всякия нужды, скорби и болезни, да низпослет мне тихое и мирное житие, здравие телесное и душевное, да умирит страждущее сердце мое и исцелит раны его, да наставит мя на добрая дела, ум мой убо от помышлений суетных да очистит, исполнению же заповедей Своих мя научив, от вечныя муки да избавит и Своего Небеснаго Царствия да не лишит мя. О Пресвятая Богородице! Ты, Всех скорбящих Радосте, услыши и мя скорбнаго; Ты, именуемая Утоление печали, утоли и мою печаль; Ты, Купино Неопалимая, сохрани мир и всех нас от вредоносных огненных стрел врага; Ты, Взыскание погибших, не попусти и мне погибнути в бездне грехов моих. На Тя бо по Бозе вся моя надежда и упование. Буди мне в жизни временней Заступнице и о жизни вечней пред возлюбленным Сыном Твоим, Господем нашим Иисусом Христом, Ходатаица. Тебе же, Пресвятая Мати Божия, Преблагословенная Марие, благоговейно чтити до скончания дней моих. Аминь.
 

Акафисты zvonnitsa.ru/orthodoxy/akafisti/279/13686/

Кондак 1
Избранней Царем Небесным от чреды служителей Царя земнаго, верность Христу и любовь к ближним смертию крестной запечатлевшей, теплой о нас моливеннице, благодарственная пения приносим ти, святая дево- мученице Анно, ты же предстательством твоим от всяких бед нас свободи и наследники Царствия Божия нас соделай, да всерадостно зовем ти сице:
Радуйся, богоносная страстотерпице болярыне Анно, светом вечней любви Христовой нас озаряющая!

Икос 1
Ангельским чином радость сотворила еси, всехвальная новомученице Анно, яко всем благочестивым и богоугодным житием твоим, служением Царю земному и страданием правды Христовой ради венец нетленный и благодать молитися за ны пред престолом Всемогущего и Всеблагаго Господа господствующих стяжала еси. Сего ради и мы, благодаряще Творца Нашего, показавшего в тебе силу благодати Своея, с любовию вопием ти сице:
Радуйся, чистоту душевную от младых ногтей возлюбившая.
Радуйся, дом Духу Святому себе соделавшая.
Радуйся, Христу Распятому всепобедно последовавшая;
Радуйся, благоволение Отца Небеснаго стяжавшая;
Радуйся, Милосердие Триипостаснаго Бога Нашего к нам приклоняющая;
Радуйся, с Царицею Небесною у Престола Царя царей предстоящая;
Радуйся, с ангелы и всеми святыми заступлением своим нас приосеняющая;
Радуйся, ходатаице усердная, прибегающих к тебе не посрамляющая;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 2
Видевше, яко в мире сем вся суете и тлению причастна, измлада Христа возлюбила еси, всечестная дево Анно, преподобною аммою Таисею во училище, иже досточудной обители Леушинской во всяком благочестии и делании духовнем наставляема, к небесем взоры духа твоего обратила еси, всеславная целомудрия рачитильнице. Темже от страстей душевных молитвами твоими свободи почитающих тя и поющих о тебе Богу: Аллилуиа.

Икос 2
Разум свой просветив книжным учением, чтение Божественных писаний, наипаче же душеполезных повествований о житии угодников Божиих и людей именитых и благочестивых, зело возлюбила еси, премудрая Анно; преподаваемая же тебе о мире Божием учения, силою действовавшия в тебе благодати, в духовный сот превращала еси, добрая точию держала еси. Мы же ныне таковую мудрость твою хваляще, взываем ти:
Радуйся, теплотою учения родительскаго, огнь любве к Господу в сердце твоем возгревшая.
Радуйся, живыя стремления юности от земных к небесным возведшая.
Радуйся, ветве Лозы Истинныя, Вертоград Христов измлада украшавшая.
Радуйся, путь правый в Царствие Небесное обретшая;
Радуйся, сим путем невозвратно шествовавшая;
Радуйся, разум свой в послушание веры предавшая;
Радуйся, сердцем своим единому Христу служити вожделевшая;
Радуйся, во всю жизнь осенением Приснодевы в непорочном девстве сохранившая;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 3
Силою благодати Божия укрепляемая, крестным путем евангельским в житии твоем шестовала еси, святая Анно Леушинская, на Пречистую Владычицу по Бозе все упование возлагая. Темже и нас молитвами твоими от всех козней лукаваго укрепи, да непреткновенно возможем проити путем заповедей Божиих и сподобимся Господеви выну воспевати: Аллилуиа.

Икос 3
Имуще пред умныма очима своима образ Христа Господа, усердная ученица и благая последовательница Спасителя Нашего в житии твоем явилася, яко вся стези твоя в Евангельском благовестии полагала еси, благая Анно, милосердием к бедным любовь и уважение насельников града Череповца стяжала еси. Мы же о тебе путем Божиим чудящеся, взываем ти:
Радуйся, мудрая взыскательнице Христа, бисера вожделеннаго и драгаго;
Радуйся, люботрудная носителительнице Христова бремене, легкаго и благаго.
Радуйся, тайно творити добродетели нас научающая;
Радуйся, к благочестия подвигам и милосердию нас призывающая.
Радуйся, мир Божий в сердца привносящая.
Радуйся, миру дольнему путь горе указующая.
Радуйся, к тебе прибегающих скорая помощнице.
Радуйся, всех скорбящих благодатная утешительнице;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 4
Буря страстей и треволнений житейских не возможе поколебати тя, преблаженная мати Анно, сице молим тя: научи благоискусно искати пристанище спасения твердое: темже сугубо возсия в души твоей нетленная лепота благодати, угодная Вседетелю Богу, Ему ты и в радости и в печали с надеждою на вечную победу Его воспевала еси: Аллилуиа.

Икос 4
Слышавше святая благоверная царица Александра глаголы преподобней и богоносней матери нашей Таисии о тебе, всечестная Анно, благоволи взяти тя в чертози своя и к лику ближних служителей своих сопрчислити. Ты же волю Государыни, аки волю Господню восприяла еси и благою наставницею для младых царевен и верною наперсницею императрицы явилася еси. Мы же, сие ныне поминающе просим тя: утверди нас в любви к Богу и ближнему, да зовем ти:
Радуйся, учение Спасителя о блаженствах Евангельских житием своим исполнившая;
Радуйся, чад наших в благочестии и радости возрастати научающая;
Радуйся, нашу юность светом истины Христовой просвещающая;
Радуйся, от тленнаго богатства и служения мамоне сердца наша отводящая;
Радуйся, отчуждающей от Бога славы человечи искати нам возбраняющая;
Радуйся, душевныя раны маловерия нашего елеем милосердия твоего умащающая;
Радуйся, присногорящая лампадо, умы и сердца верных дивно озаряющая;
Радуйся, образе целомудрия, ревновати о стяжании сея добродетели нас научающая;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 5
Боготечною звездою возсияла еси нам, богоблаженная Анно, в земной юдоли сей; внегда бо обуреватися нам волнами житейских попечений и направляти путь житейскаго шествия своего к тихому пристанищу, твоими молитвами избавляеми есмы от блуждения в суете сует и потопления среди волн житейскаго моря, воздвизаемаго зря напастей бурею; сего ради, славяще Господа, тобою благодеющего нам, вопием: Аллилуиа.

Икос 5
Видя мысленныма очима Начальника веры и Совершителя Иисуса, всю себе принесла еси Богу жертву живую, чистую и угодную, егда людие богоуступныя воздвигоша брань против Всемогущего Бога Нашего и Помазанника Его, в дни дни убо потече, яко вода кровь мученик и страстотерпцев, за Христа и правду Его умерщвляемых. Мы же, ведующе тя, за Спаса Нашего купно с Государем пострадавшая, всеблаженная Анно, яко молитвенницу и покровительницу предивную дерзновение велие ко Христу имущую, с любовию тебе воспеваем ти сицевыя похвалы:
Радуйся, Царствие Божие внутрь себе восхитившая;
Радуйся, о Бозе Вседержителе поревновавшая;
Радуйся, вольныя страдания за имя Его претерпевшая;
Радуйся, нетленный и вечный венец мученический стяжавшая;
Радуйся, в дому Отца Небеснаго обитель себе сотворившая;
Радуйся, яко о спасении нашем присно ходатайствующая;
Радуйся, твердость веры в час трудный проявити помогающая;
Радуйся, от равнодушия и страха суетнаго сердца наша изцеляющая;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 6
Проповедует днесь Церковь Всероссийская небесную славу твою, благоверная болярыне Анно, ибо ты сугубый венец у Подвигоположника Иисуса стяжала еси, зане от дней детства твоего в житии добродетельном в обители Леушинской подвизалася еси, послеже во граде Петрове верно послужила еси Августейшему семейству, за правду Христвову даже до крове от рук богоборцев пострадала еси; ныне же во славе купно с Царственными страстотерпцы и всеми новомученики Российскими предстоиши престолу Триипостаснаго Бога Нашего и молишися о всех о тебе со умилением поющих Господеви : Аллилуйя.

Икос 6
Возсияла еси во всем земном житии твоем, богоблаженная мати Анно, светом благочестия, яко светило богосветлое, светоносными лучами подвига любви и добродетелей богоугодных просвещающе всех ближних твоих. Ныне у бо и мы к тебе с надеждою прибегаем и твоего молитвеннаго заступлення просим, яко во свете деяний твоих зрим верный путь ко спасению, помози нам недостойным в деланиех наших и в нашем прилежании ко Спасителю и Единому Искупителю душ наших, да славяще вопием ти:
Радуйся, игу Христовой кротости рамо свое подклонившая;
Радуйся, во след Распятаго Учителя последовавшая;
Радуйся, Небесному Жениху красоту девства своего посвятившая;
Радуйся, во всякой святыни, всеми делы Тому благоугодившая;
Радуйся, мысль свою в Бозе утвердившая;
Радуйся, милосердием твоим всех утешавшая;
Радуйся, людем, в суете пребывающим, правду Божию открывающая;
Радуйся, любити ближних своих с самоотвержением научающая;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 7
Хотя змий лукавый искусити тя, якоже Иова многострадальнаго, воздвиже бурю злобы нечестивых, изгнавших тя в заточение. Обаче благодатию Всесвятаго Духа укрепляема, всякая злострадания и болезни добре претерпела еси, святая Анно, и мученическия кончины сподобилася еси. Ныне же пребывая в невечернем дни Царствия Христова, не престай молитися за ны у Престола Триипостаснаго Бога, да со умилением вопием: Аллилуиа.

Икос 7
Дивную показуя любовь к Богу, ближняго своего паче себе возлюбила еси, ради заповеди Христовой, всеблаженная мати Анно, ничтоже предпочитавши паче любве Христовы, преходящи путь земный, по учению апостола, в Дусе Святе, в силе Божией, с оружием правды в деснице и шуйце. Того ради услыши от нас, тщащихся подражати ти, с любовию возносимые похвалы сия:
Радуйся, благий образ служения Богу явившая;
Радуйся, твоих трудов и подвигов плоды вожделенныя стяжавшая;
Радуйся, достойно от Бога славу и величие, от нас же пение приемлющая.
Радуйся, наша сердца огнем божественныя ревности воспламеняющая;
Радуйся, бедныя души наша на подвиг любве согревающая и укрепляющая;
Радуйся, на всех путех жития нашего зрети Бога Вышняго нас наставляющая;
Радуйся, растления душевнаго и совести лукавства нас избавляющая;
Радуйся, утешение благое и радостное в сердца наша низпосылающая;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 8
Странное и непостижимое разумению человеков чудо днесь являеши нам, святая новомученице Анно Леушинская. С радостию воспоминаем, яко, в гонениих и теснотах сохранити возмогла еси помазание Святаго Духа, сице молим тя: испроси и нам животворную благодать Всеблагаго Утешителя, да сердцем воспоем Ему: Аллилуйя.

Икос 8
Всем сердцем Богу предалася еси и всею душею Того возлюбила еси, святая мати наша Анно, верующе несомнено, яко ничто возможе отлучити тя от любви Небеснаго Жениха Твоего. Всею душею послужив Господу и всем житием благоугодив Ему, прославилася еси терпением твоим, взирая на начальника веры и совершителя Иисуса, за ним бо с царственными страстотерпцы купно последовала еси даже до смерти крестной, ведая убо яко Христос смертию своею смерть попра, и за него убиенныя вечно с Ним соцарствуют в обителех Отца Небеснаго. Мы же, торжество веры твоея ныне славословим и ублажаем тя, глаголюще:
Радуйся, терпению Христову верно подражавшая.
Радуйся, силу заповеди Христовы, яже о любви ко врагом, премудре уразумевшая.
Радуйся, во искушении от людей богоборных хитрость лукаваго прозревшая.
Радуйся, яко горлица прекрасная, к Солнцу Правды воспарившая;
Радуйся, к Свету Невечернему из юдоли плача возтекшая;
Радуйся, наслаждающаяся духом мира, веселия и любве во Христе;
Радуйся, хладную любовь нашу согревающая и преображающая.
Радуйся, огнем веры нас воспламеняющая и вдохновляющая;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 9
Вси Ангели Божии возрадовашеся и Господа восхвалиша, даровавшаго тебе таковое терпение, премудрая Анно, яко и во страданиях твоих не преставала еси хвалу и благодарение Богу приносити, ибо Бог прославляющих Его прославляет и, аки свещи, на свещнице Царствия Небеснаго поставляет, да бы яснее и мы зрели путь в долину вечней радости ведущий. Таковому Божию милосердию радующеся, победную песнь Богу поем: Аллилуиа.

Икос 9
Витии многовещанныя не возмогут изрещи, яже уготова Бог любящим Его, их же око не виде и ухо не слыша и яже на сердце человеку не взыдоша. Ты же, всехвальная мати наша Анно, ныне наслаждаяся сих изобильно купно со мученики Царственными и слузи верными: врачем Евгением, Иоанном и Алексием. Сице молим тя: купно с пострадавшими с тобою вознеси молитвы о спасении и благополучии нашем, да зовем ти:
Радуйся, богомудрых умов услаждение;
Радуйся, боголюбивых душ увеселение.
Радуйся, исповеднице новая и преславная;
Радуйся, веры истинныя ладия непотопляемая;
Радуйся, молитвеннице о нас пред Богом теплейшая;
Радуйся, в скорбех грядущих на ны, помощнице вернейшая;
Радуйся, во бранех со диаволом терпению нас научающая;
Радуйся, духом же нам соприсутствующая и молитвенно тя призывающыя посещающая.
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 10
Спасение души твоея от Бога улучившая, святая мати наша Анно, в радость Господа вошла еси, и ныне, венцем нетленным увенчавшаяся, со Ангелы ликуеши, взирая на престол небесный Всецаря Творца, ликами огнезрачных серафимов и херувимов окруженный; Сие же убо ведующе, просим тя, небесная наставнице наша, научи и нас, призывающих тя в помощь к Богу с дерзновением взывати: Аллилуйя.

Икос 10
Стена быв при жизни всем приходящим к тебе, такожде и по смерти ны не оставляеши твоим заступлением твоим, благоверная болярыне Анно; духом ныне пребываеши в чертозех Отца Небеснаго, за всех с верою и любовию тебе молящихся тепле предстательствуеши и помощь неоскудную подаеши. Тебе бо, яко мощной заступнице о душах наших, благодарственно поем сицевая:
Радуйся, Пресвятыя Владычицы и преподобней Таисии достойная избраннице;
Радуйся, со Царственными мученики у Престола Божия неусыпная о нас, грешных, ходатаице;
Радуйся, со святым праведным Иоанном Кронштадтским присная о нас печальнице;
Радуйся, почитающих светлую память твою небесная покровительнице;
Радуйся, благочестия и братолюбия хранительнице;
Радуйся, в беде спасительныя руки подательнице.
Радуйся, уничиженных и гонимых миром покровительнице;
Радуйся, о молящихся тебе неусыпная пред Богом предстательнице;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 11
Пение молебное приносим ти, угоднице Божия, и с верою и любовию припадающе ко образу Твоему святому, молим тя всеусердно: молися за нас ко Господу Богу, да дух благочестия твоего, благости и милости не оскудевает и в нас немощных и грешных: да будем чада и твоя не по имени токмо, но делом и всем житием нашим, и сподобимся вкупе с тобою во блаженней вечности пети Богу: Аллилуиа.

Икос 11
Светом трисолнечным, горе озаренная, святая мати Анно, озари наша души сиянием Божия благодати и настави ны верно исполняти заповеди Христа Бога: вемы бо, яко много может молитва твоя пред благостию Его, яко верной Невесты и всепобедной страстотерпецы, купно со мученики царственными предстоящей в радости престолу Его на небесех, и внемлющей молитве христиан, долу сущих, печалиями и заботами многобразными колеблемых, обаче с надеждою на предстательство твое взывающих ти сице:
Радуйся, лампадо небеснаго блистания;
Радуйся, горнило молитвеннаго воздыхания;
Радуйся, маслино, елей милостей Господних источающая;
Радуйся, лозо, упованием обетований непреходящих напояющая;
Радуйся, благодеяния многая верным источающая;
Радуйся, милостию твоея вся чтущих тя покрывающая;
Радуйся, в немощех сущих благодатная посетительнице;
Радуйся, в напасти впавших скорая заступнице;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 12
Благодать и милость испроси нам у Христа Владыки нашего, благоверная мати Анно, окорми предстательством твоим, отжени от нас всякого врага и противника, научи подражати тебе, да избавльшеся искушений, прелести и бед, прославляем тя по достоянию, воспевая песнь благодарения Господу: Аллилуиа.

Икос 12
Поюще песнь благодарения Всещедрому и Человеколюбцу Богу, прославльшему тя, яко добропобедную страстотерпицу Церкве Русския, величаем благочестивое житие твое во обители Леушинской и граде Петрове, честное служение твое Августейшей семье, ублажаем болезни и труды твоя, имиже во славу Божию поработала еси, восхваляем подвиги и страдания твоя, яже за правду Христову претерпети сподобилася еси, и просим тя: истиннаго Бога познавати нас научи всех нас, в надежде на предстательство твое воспевающих ти сице:
Радуйся, свеще неугасимая, в молитве к Богу ярко пламенеющая;
Радуйся, фимиам молитвы твоея, яко кадило богоприятное, к небеси возносящая;
Радуйся, мир Божий в сердца привносящая.
Радуйся, пламень злобный струями любве твоея угашающая;
Радуйся, детям благопослушливым благословение подающая;
Радуйся, на труд духовный нас повизающая;
Радуйся, от сетей вражиих избавляющая;
Радуйся, бремя скорбей людских облегчающая;
Радуйся, богоносная страстотерпице болярыне Анно, светом вечней любви Христовой нас озаряющая!

Кондак 13
О преславная угоднице Христова, всехвальная мати Анно, отрадо и утешение всех с верою к тебе прибегающих! Приими от нас, недостойных, сие малое похвальное пение с любовию тебе приносимое, и теплым ходатайством твоим ко Господу испроси всем нам прощение прегрешений, наполни миром Христовым жизнь нашу, да сподобимся купно с тобою благодарственно Господеви во веки воспевати: Аллилуиа, Аллилуиа, Аллилуиа!

http://zvonnitsa.ru/orthodoxy/akafisti/282/13732/

Кондак 1

Избранного чудотворца и светильника церкве Медиоланския святаго Амвросия, приидите, вернии, почтим по достоянию усердною хвалою. Ты же, угодниче Божий милостивый, приими с любовию сие приношение наше, да зовем ти:
Радуйся, Амвросие, святителю Христов и чудотворче.

Икос 1
Ангельских сил и всея твари Содетель, еще от младенческих пелен твоих предуказавый доброту души твоея, святе Амвросие, подаде тя, в возраст пришедша, ангела церкви Медиоланстей, пастыря и учителя словесному стаду Своему, и сим научи нас звати тебе сице:
Радуйся, от колыбели младенческия на служение Церкви роем пчел предуказанный;
радуйся, ко святительству чрез немотствующаго младенца Богом призванный.
Радуйся, богатство, славу и почести мира презревый;
радуйся, единому Господу служити восхотевый.
Радуйся, апостолов Христовых достойных преемниче;
радуйся, архиереев святых преподобный сопрестольниче.
Радуйся, Амвросие, святителю Христов и чудотворче.

Кондак 2
Видя небесное промышление, совершившееся в чудном призвании твоем ко служению Церкви, премудре, посвятил еси прочее время жития твоего на угождение воли Божественней, и принесл еси всего себе и вся своя в жертву призвавшему тя Господу, поя ему: Аллилуия.

Икос 2
Разумом богопросвещенным, напоенным же от слова Божия, уразумев яко сонование всех добродетелей и союз совершенства духовнаго любы к Богу и ближнему есть, благочестне, потщался явития ю в себе не словом токмо, но делом и истиною. Темже бедствующим руку скорыя помощи простирал еси, имения своя вся убогим расточил еси, и тако наставил еси на звати тебе сице:
Радуйся, яко путем нестяжания апостольскаго шествовати возлюбил еси;
радуйся, яко все свое попечение на промысл Божий возложил еси.
Радуйся, милосердия яже во Христе подражателю;
радуйся, нищеты его дольния добровольный последователю.
Радуйся, меньших братий Христовых друже и благодетелю;
радуйся, скорбящих и озлобленных скорый утешителю.
Радуйся, Амвросие, святителю Христов и чудотворче.

Кондак 3
Силою Вышняго укрепляем, преподобне, труды и скорби великаго служения святительскаго на пользу церкве Медиоланския, во славу же Господа Иисуса, благодушно понесл еси, о всех же благословлял еси Бога, поя Ему: Аллилуия.

Икос 3
Имея жезл силы, крепость евангельскую, посланную ти от Сиона небеснаго, святителю, господствовал еси посреде врагов твоих и не дал еси волком ходящим во овчих кожах, в сердце же носящим яд пагубы, расхитити стадо твое. Темже похвальная восписуем ти сия:
Радуйся, слуго Спаса вернейший;
радуйся, страже дому Божия бдительнейший.
Радуйся, пастырю Христов честнейший;
радуйся, поборниче веры, во прениих с ересеучительми мудрейший.
Радуйся, злочестия арианскаго потребителю;
радуйся, правых догматов насадителю.
Радуйся, Амвросие, святителю Христов и чудотворче.

Кондак 4
Бурю крамолы, воздвигшуюся на церковь Медиоланскую, зря, Амвросие, сладкоглаголивую беседою твоею, содействием же Божиим утишил еси мятеж людский, и тако научил еси чад мира пети Богу: Аллилуия.

Икос 4
Слыша Феодосий царь прещение твое, имже возбраняшеся ему яко убийце внити в церковь Божию, во еже приобщитися Тайн святых, повиновася ти, яко грешник смиренно кающийся и примирения с Господом жаждущий. Того ради по достоянию возглашаем ти:
Радуйся, Таин Божиих мудрый строителю;
радуйся, постановлений отеческих верный хранителю.
Радуйся, Нафану и Предтечи соревнителю;
радуйся, законопреступных нелицемерный обличителю.
Радуйся, наставниче покаяния и исправления;
радуйся, церкве Медиоланския неумирающая слава и украшение.
Радуйся, Амвросие, святителю Христов и чудотворче.

Кондак 5
Боготечная звезда на тверди церковней был еси, отче Амвросие, светлостию учения и жития твоего мглу ересей разгоняющая и мрак безбожия потребляющая, неверных от тьмы неверия к свету невечернему привлачающая и всех ко спасению путеводящая, поющим Богу: Аллилуия.

Икос 5
Видевше тя медиоланстии людие мудраго пестуна и любвеобильнаго отца пастве своей, святителю, притекаху к милосердию твоему во всех скорбех и нуждах своих. Ты же, милостиве, никогоже отринул еси, но всем всяк помощник был еси, достойный сицевых похвал:
Радуйся, сирых покровителю;
радуйся, обидимых защитителю.
Радуйся, плененных от варвар искупителю;
радуйся, от козней сатанинских свободителю.
Радуйся, яко достойно сладостное имя носил еси;
радуйся, яко воистину сладостен наставник и пособитель всем был еси.
Радуйся, Амвросие, святителю Христов и чудотворче.

Кондак 6
Проповедник вещаемых ти от ангел к уху глаголов Божиих был еси, святителю Амвросие, темже словеса уст твоих паче меда и сота услаждаху всех послушающих тебе и Богу вопиющих: Аллилуия.

Икос 6
Возсия аки солнце свет добродетельнаго жития твоего на земли, богомудре отче, в тебе бо зрим вся елика честна, елика праведна, елика пречиста. Сих ради славящее Святаго Духа, виновника благих, от силы в силу священнотайне ведшаго тя, зовем:
Радуйся, добродетелей евангельских пребогатое сокровище;
радуйся, всегдашних воздыханий и молитв яже к Богу пречестное святилище.
Радуйся, кротости и смирения боголепное жилище;
радуйся, терпения твердое хранилище.
Радуйся, церквей Божиих украсителю и пречудный поборниче;
радуйся, чистоты девственный учителю и неоскудный слез источниче.
Радуйся, Амвросие, святителю Христов и чудотворче.

Кондак 7
Хотя улучити спасение во мнозе совете, смиренномудре, имел еси друга души твоея пресвитера состаревшася и мудра, почитая его яко отца и с ним совешался о делех своих; вразуми и нас творити вся с советом богомудрых отцев, да окормлением их спасаеми, поем Богу: Аллилуия.

Икос 7
Знамение евангельския любве к ближнему явил еси, отче Амвросие, егда врагом своим благотворил еси и со грешники кающимися горько плакал еси. Темже ти яко непамятозлобному пастырю и отцу, болезновавшу о спасении духовных чад твоих, вопием:
Радуйся, незлобия Христова подражателю;
радуйся, кающимся грешником теплый сострадателю.
Радуйся, Иустине, враждовавшей ти, благотворивый;
радуйся, злодею твоему руку усохшую исцеливый.
Радуйся, яко весь кротость и любовь был еси;
радуйся, яко высоты совершенства достигл еси.
Радуйся, Амвросие, святителю Христов и чудотворче.

Кондак 8
Странныя и дивныя силы перст Божий сотвори в житии твоем, святителю, егда умерша отрока воскреси тобою, разслабленную исцели, арианина, почитания ради святых мощей хулившаго тя, бесу преда, безстудную жену сирмийску уничижившую тя, карою порази. И кто от слышащих вся сия не прославит дивнаго в житии твоем Бога песнию: Аллилуия.

Икос 8
Весь исполнен быв ревности по Бозе, отче Амвросие, таковую власть над демоны стяжал еси, яко ниже к дверем дому твоего приблизитися можаху: огнь бо исходяй оттуду гнаше их, яко прах, егоже возметает ветр от лица земли. Толико страшный демоном угодниче Божий, огради и нашу немощь предстательством твоим от губительных стрел их, да вопием ти сицевая:
Радуйся, от козней лютаго миродержца крепкий верных хранителю;
радуйся, от злобных слуг его, зияющих пожрети ны, верный наш обличителю.
Радуйся, яко пламень лица бесов попаляющий;
радуйся, яко гром кичение падшаго денницы поражающий.
Радуйся, всю силу его силою крестною поправый;
радуйся, нечистых духов от притекающих к тебе отгоняй.
Радуйся, Амвросие, святителю Христов и чудотворче.

Кондак 9
Все житие наше во юдоли земнаго странствования сего исполено безчисленных искушений и бед, грехов и страстей, воюющих на ны: како убо избыти возможем вечных мук, окаяннии, егда постигнет нас смерть неумолимая, аще не ты, отче, с надеждою нашею Богоматерию, предстательствовати за ны будеши, поя Богу: Аллилуия.

Икос 9
Ветия многовещанныя видим тобою посрамленныя, святителю: Ария бо хульных последователей препрел еси, Симмаха высокоумнаго низложил еси, мудрецы, иже от востока, глубиною богословия своего удивил еси, и вся верныя учением истинным просветил еси. Темже молим тя: осияй и нас светом богоразумия твоего, да отбегше скверн тлетворнаго духа времене и соблазнов борителя, вопием ти:
Радуйся, душ наших просветителю;
радуйся, веры православныя поборниче.
Радуйся, велений Божиих учителю;
радуйся, плевел вражиих, всеваемых в души спящих человек, искоренителю.
Радуйся, яко многих колеблемых неверием в правой вере укрепил еси;
Радуйся, яко догмат о единосущном и равночестном Отцу и Духови Божестве Сына уяснил еси.
Радуйся, Амвросие, святителю Христов и чудотворче.

Кондак 10
Спасение совершенное улучив от привременных бурь и бед, угодниче Божий Амвросие, не забуди нас, потопляемых напастей бурею. Но в нихже сам искушен был еси, и нам искушаемым помози, да поем Богу: Аллилуия.

Икос 10
Стену тя твердую и известно утверждение граду твоему и всем чтущим память твою исповедающе, святителю, дерзаем по достоянию воспети тебе хваление сие:
Радуйся, царей бранелюбивых умиротворителю;
радуйся, благоденствия отечественнаго хранителю.
Радуйся, яко тобою царю Гратиану победа на готы даровася;
радуйся, яко тобою многим мир от Феодосия исходатайствовася.
Радуйся, яко тобою прощение грехов улучаем;
радуйся, яко тобою от бед спасаеми, мир с Богом обретаем.
Радуйся, Амвросие, святителю Христов и чудотворче.

Кондак 11
Песнь «Тебе Бога хвалим, Тебе Господа исповедуем…» паче всякаого воздушнаго органа услаждающую верных, воспел еси в честь Божественней Троице, святителю. Ныне же в Церкви небесней поеши со ангелы ину песнь тойжде Троице: Аллилуия.

Икос 11
Светоподательна светильника, еще на земли просиявша невещественным светом, ведуще тя, отче святый, кую достойную похвалу принесем ти грешнии, коею песнию ублажим тя недостойнии, о святителю Христов. Един токмо сведый глубины сердечныя и рекий: «Аз прославляющия Мя прославлю», – един Он весть, како по достоянию прославити тя. Обаче ведый, яко человек, нашу немощь, не отрини яко отец милостивый, и наша убогия, но от искренних сердец приносимыя ти хвалы сия:
Радуйся, ангеле земный, еще на земли светом невещественным озаренный;
радуйся, человече небесный, еще во плоти лицезрением сладчайшаго Иисуса почтенный.
Радуйся, светильниче божественнаго света, учением своим мира концы озаривый;
радуйся, луче мысленнаго Солнца, теплотою любве своея вертоград Его ожививый.
Радуйся, звездо, твердь церковную светло украшающая;
радуйся, позвало и доныне Медиолан осиявающая.
Радуйся, Амвросие, святителю Христов и чудотворче.

Кондак 12
Благодатию небеснаго покрова твоего не лиши нас никогда, о милостиве отче, но присно молися о нас к щедрому Господу, Емуже с лики святых немолчно поеши: Аллилуия.

Икос 12
Поюще чудеса и подвиги преподобнаго жития твоего, святителю, славим кончину твою, еюже мирно отшел еси на небо, и ублажаем соцарствование тове тамо с Богом вечным. Ты же, угодниче святый, призри с высоты онаго блаженнаго пристанища твоего на нас, плавающих в молве житейских попечений и к тебе, невидимому окормителю нашему, из глубины души вопиющих:
Радуйся, плавание свое в житейском мори добре свершивый и безценное сокровище веры в безднах его не потопивый;
радуйся, ко пристанищу райскому безбедно приплывый и венец нетленный от Христа улучивый.
Радуйся, яко тамо ликовствуя, и нас, долу сущих, любовию твоею досязаеши;
радуйся, яко духом твоим нам выну спребываеши.
Радуйся, яко тобою гнева Божия избавляемся;
радуйся, яко мольбами твоими к пристанищу горнему направляемся.
Радуйся, Амвросие, святителю Христов и чудотворче.

Кондак 13
О святый и милостивый угодниче Божий Амвросие! Приими с любовию приносимое сие малое, но от усердия приносимое тебе хваление наше, и потщися избавити нас от болезней душевных и телесных, от всех бед и зол, да тобою улучившее царство небесное, во веки поем Богу: Аллилуия.

Этот кондак читается трижды, затем 1-й икос и 1-й кондак.

zvonnitsa.ru/orthodoxy/akafisti/291/13746/
 

Кондак 1
Возбранный от Царя Славы и Почаевской Божией Матери Воеводо, данный всей Вселенной, в последняя лета подпавшей под иго богоборца антихриста. Православия истинный проповедниче, демонских полчищ грозный прогонителю. Беззаконных, маловерных, своекорыстных служителей Церкви нелицеприятный обличителю, преподобный отче наш Амфилохие, прославленный от Господа Сил за ненарушимое исполнение догматов Церкви Христовы. К твоей помощи прибегаем с мольбой, да Твоими молитвами и Своею благодатию Господь Бог вразумит и научит нас воспети Тебе сице: Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Икос 1
Ангелов Творец по предивному Своему смотрению избра Тя от младенства да в последствии Богоугодными делами служения ближним, прославиши Имя Всесвятыя Троицы. Ей Единой безбоязненно, благочестно, неуклонно послужити обещавый, егда услышал еси от родителя отца: «Яко приидут времена тяжкия и отпадут волы от яслей, и приидут волки в овечьих шкурах и расхитят стадо, и разыдутся овцы устрашенныя и оболыценныя наемниками антихриста», а ты, отче, с детским пылом горячей любви к людем воскликнул: «А я его не убоюсь, и овцы упасу, и к Богу приведу». И Господь, провидя чистоту души Твоея и будущее служение, благословил Тя на подвиг, добраго пастыря, душу свою полагающего за овцы. Мы же, благодаряще Господа за Его дивное милосердие к людем, просим Его благость да и нас благословит воспети «Дивен Бог во святых своих»! и тя, отче, яко единаго из них, дерзаем прославити похвалами сими: Радуйся, благочестивым родителем от Бога дарованное чадо; Радуйся, из детства на служение Богу избранный; Радуйся, прежде Пастыря словесных овец, пастухом гусей бывый; Радуйся, за пределами Иловецкой веси целебный источник открывый; Радуйся, с ранних лет о келейном уединении помышлявый; Радуйся, от юности паче земныя невесты Божию Матерь возлюбивий; Радуйся, с непоколебимым стремлением послужити Ей в Почаевскую Лавру вселивыйся; Радуйся, тамо в великом служении сорок лет подвизавыйся; Радуйся, еще с ранних лет притеснителей и гонителей православия не боятися обещавый; Радуйся, благодатию в Тебе сущей бесов изгонявый; Радуйся, трудолюбием, послушанием, смиренномудрием, нестяжанием любовь благочестивых братий снискавый; Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 2
Яко град не может укрытися верху горы, тако и твое православное житие во святой обители молитвенными подвиги и труды от Бога благодатию исцелений, прозрения и силою проповеди не скры Господь, но показа людем в Тебе милостиваго и скораго помощника, и тепле состраждующаго о всех людех молитвенника, и яко добраго Пастыря, пекущагося о спасении пасомых, ревностнаго служителя, воинствующаго за истину и непрестанно вопиющаго Единому в Троице славимому Богу: Аллилуиа.
Икос 2
Православные люди всея Руси от великия скорби, болезней и нестерпимых напастей в Почаевскую обитель стекахуся и припадая к цельбоносной Стопе Пречистыя Богоматере, с велием воплем взываху о помощи к Преблагословенной Владычице и к Твоему пред Нею о нас ходатайству; и наша Всемилостивая Заступнице, Почаевская Похвало, предстательством благоговейнейшим и дерзновенною молитвою своего угодника, внимала смиренным мольбам страждущых труждающыхся и обремененных. Внемли же и нам ныне, Пречистая Мати Дево, желающым от избытка любви и благодарения воспети Твоего слугу, нашего Небеснаго покровителя похвалении сицевыми: Радуйся, верою, делами веры и любви, и всем житием твоим сонм святых дополнивый; Радуйся, язвы Господа нашего Иисуса Христа на теле и в сердце своем терпеливо носивый; Радуйся, от юности с ревностию о прославлении и сыновнею любовию Царице всего мира послуживый; Радуйся, в бдениях и в пениих к Ней, аки в райских чертогах духом веселивыйся; Радуйся, яко страж неусыпный у раки преподобного Иова бодрствовавый и венец на главы возлагавый; Радуйся, благословением Твоим скорбные сердца неземною радостию наполнялись; Радуйся, чрез тебя, яко благоговейного и истиннаго служителя, преподобный Иов благодать верующим ниспосылавый; Радуйся, посещая больных почаевские храмины своим приходом освящавый; Радуйся, святыми Дарами многонедужных причащавый и исцелявый; Радуйся, Тайны Евхаристии в Лавре в пламени огненном стоя совершавый. Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 3
Весть о данной ти благодати и о дивных чудесах исцелений, прозрений и действенной помощи святых молитв твоих, яко на крылах, любовию страждущых сердец, разнеслась по всей России и за пределами ея, и все стекахуся на молитву в святую Лавру и твое служение истиннаго пастыря, скорого помощника, теплаго заступника и вернаго раба Господня, аки великое торжество святыя православныя веры, всех укрепляло, ободряло, и воспламеняло возлюбившему тя Господу Богу и Его Пречистой Матери, от очищенных Твоею молитвою благодарных устен и сердец, единодушно в радости духовней возглашати Ему: Аллилуиа.
Икос 3
Силу разума еще в юностнем возрасте Троицу Святую прославити, Иисус Христос даровал ти; веру истинную, надежду непоколебимую, любовь пламенную к Нему имети возблаговолил еси. Сподоби тя, святый отче, жилищем Пресвятыя Троицы быти и в храмах Почаевския Лавры и «на всяком месте Владычества Его» денно и нощно служити. Сего ради мы, грешнии, удивляясь подвигом твоим и силе духа, дерзаем воспети тебе тако: Радуйся, постом, молитвою и неосуждением благодать Святаго Духа стяжавый; Радуйся, Славу Божию чистыми усты и сердцем непрестанно лобызавый; Радуйся, веры в Бога истиннаго и святых догматов ея не посрамивый; Радуйся, священныя Заповеди Иисуса Христа чрез все житие твое пронесый и непогрешимо исполнивый; Радуйся, чашу с Пречистым Телом и Кровию Божественною и Крест высоко возносивый: Радуйся, преисполненный сострадания к мучимым демонами страдальцев исцелителю; Радуйся, гонений от нечестивых, козней различных и клеветы их не устрашивыйся: Радуйся, чародеев, блудниц и всех великих грешников, дышущей в тебе праведностию, снисходительностию и любовию к покаянию призывавый. Радуйся, упорно закосневших во зле и не кающихся нещадно бивый и изгонявый; Радуйся, благими деяньми братолюбия и иноверных ко Крещению возбудивый; Радуйся, православный веры светильниче неугасимый; Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 4
Даром прозрения за Богомыслие, непрестанныя молитвы и чистоту, Господь обогатил Тя. Еще с ранней юности келейное житие и сан иеромонаха провидел еси. Глад и мор, и страшныя язвы, раки, проказы, грибки, коросты за беззаконное наше житие предвещал еси и к всенародному покаянию, исправлению жития, и извержению из жилищ христианских наглых глашатаев тьмы века сего, лживых и лестных растлителей душ человеческих призывавый, и сам в великой скорби о гибели человеческой на молитве день и ночь пред Богом и Заступницею рода Христианского до последняго издыхания немолчно взывал еси: Аллилуиа.
Икос 4
Православные людие дивляхуся твоему, преславне отче, житию и укрепляеми силою молитв твоих и Богоуветливому твоему гласу, радуяся и благодаря Бога, даровавшаго им такового молитвенника и теплаго предстателя, яко преподобного Серафима, умильно глаголют: Радуйся, сосуде, всех даров Божия благодати исполненный; Радуйся, прелестьми, аки сетями, князя мира сего не уловленный; Радуйся, молитву с поклоны паче всех деланий возлюбивый; Радуйся, милосердие к ближним, молитву к Богу своим примером показавый; Радуйся, за неустанное служение Богу, презрение мира и иже в нем, сан схиигумена получивый; Радуйся, к Заступнице усердной и под Ея милость прибегати в скорбех научивый: Радуйся, неусыпаемым пением Псалтири и «Пресвятая Богородице, спаси нас» всю Вселенную огласивый; Радуйся, каждодневным поклоном Ангела хранителя почитати повелевый: Радуйся, за апостольскую ревность по Бозе и обличения прислужников сатаны из Лавры изгнанный: Радуйся, служителей недостойно приявших священство, работающих миру, плоти и диаволу, строгий наказателю; Радуйся, священников, их жен и детей, монахов и монахинь, одержимых бесами пребыстрый целителю; Радуйся, батюшку, повсенощно устрашаемаго бесами, пятиюстами поклонами от их страхований свободивый. Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 5
Бурное мятежное море жития сего, пенящееся злостраданьми, напастьми искушеньми и прельщеньми многоразличными преплыл еси, преподобне отче Амфилохие, помощию Креста, подвигов духовных и благодатию Божиею и вшел еси во светлую, тихую Пристань Царство Христово, уготованное любящим Господа «его же око не виде, ухо не слыша, и на сердце человека не взыдоша», очима зриши Божию Славу, ушима слышиши вечно ликующее ангельское пение, и веселяся со всеми небесными силами, и душею, преисполненною несказанной радости и веселия, в блаженстве непрестанном взываеши «Свят, Свят, Свят, Господь Саваоф»! И с Боголепною честию священства, предстоя Престолу, поеши Всемогущему Богу: Аллилуиа.
Икос 5
Ты добрый, любезнеший отче наш Амфилохие, в Богоподражательнем житии твоем просиял еси, яко светило богосветлое, осиявающее всю Российскую страну и всю Вселенную, ибо молитвою твоею Господь предотвращал еси напасти, беды и гонения; и вси бывшыя с Тобою воочию зрели, яко одержимии бесами исцеляются; раны, язвы душевные и телесныя врачуются, прокаженныя очищаются, злыя страсти и похоти укрощаются, сердца немилосердные смягчаются, люди совращенныя с истиннаго пути на путь правый возращаются, маловерныя при виде чудес совершаемых тобою, Благодатию Божиею в вере укрепляются; и вси избавлении от недугов различных, болезней, наветов вражиих и проказ душевных и телесных, в добром здравии веселящеся, прославляют Бога и тебя, яко великаго молитвенника, поборника за правду Божию и чудотворца восхваляют сими словесы: Радуйся, молитву паче всех спасительных деланий избравый; Радуйся, тую пламенным огнем, пожигающим грехи людския, именовавый; Радуйся, распинаемый за грехи наша, с прошениями о помиловании нас грешных, пред Богом день и нощь стоявый; Радуйся, непрестанным призыванием Иисуса Христа демонов попалявый; Радуйся, Божию Матерь, Избавительницу мира паче всех возлюбивый; Радуйся, Ей вопиющих «Радуйся» неопустительно Ею обрадованным быти на страшном суде обещавый; Радуйся, в любви к Ней и в подвизех духовных преподобному Иову подражавый; Радуйся, мирских людей по полчаса утром и вечером на молитву уделяти увещавый; Радуйся, истинным служителям алтаря семь-девять часов в сутки на молитве стояти заповедавый; Радуйся, изнемогающим духом пети «Царю Небесный» и тропарь Святей Троице, благословивый; Радуйся, обуреваемым напастьми, видимых и невидимых врагов в час беды восклицати: «Отойди, сатана, на мне Крест отца Иосифа» разрешивый; Радуйся, на сие свыше благословение от Господа, яко великий угодник Божий и чудотворец, носитель правды, испросивый; Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 6
Во дни богохульного антихриста, под действом сатаны, духом блуда, пьянства, богоборства, злобы, ненависти, сатанинской гордости, неутвердженныя сердца растлившаго, и всю Вселенную мерзостным зловонием беззаконных дел, аки смрадным вином, упоившаго. Ты же, отче, яко чистая струя, благорастворяющая воздух, являешися многоразличными дарами благодати Духа Святаго, светом познания истины и правды Церковь Невесту Христову, колеблемую нововведениями безконечными и раздираемую разногласиями, и в лице ея истинных пастырей сопротивляющуюся влиянию римокатолического костела и усиленной подготовке, якобы для мира и безопасности, к слиянию всех вер и церквей, т.е. овец и волков, в истине утверждаеши. Служителей наемников, нерадящых о овцах, связанных прельщеньми диавола, обличаеши, и яко служитель Солнца Правды - Христа, силою благодатною, духом разума и твердости сердца верных озаряеши. Мрак мира сего и иже в нем любления праздности, славолюбия, честолюбия, двоедушия, лицемерия, сребролюбия, плотолюбия, маловерия, суеверия, волшебства и колдовства разсеиваеши. Мглу страстей, искушений, напастей, сетей вражиих, яко паутину разрываеши и своею проповедию, огнедохновенным мудрым словом, молитвенным противоборством диаволу, из челюстей рыкающих львов тьмочисленных грешников исхитивый. И по исходе души твоея из мира сего всех кающыхся грешников, помнящих твоя благодеяния и любовь, к месту погребения с верою притекающых, милостивно приемлеши и всем, к помощи твоей прибегающым, помогаеши, сердца веселиши, скорби разгоняеши, в вере нераздельной Троице укрепляеши и из двух путей погибели и спасения, на путь, ведущий к вечному упокоению, наставляеши, идеже вси праведнии со святыми несмолкаемо поют Искупителю и Богу нашему: Аллилуиа.
Икос 6
Провидя прозорливыми очима, служителю Господень, и ни вочтоже вменяя вся суетная века сего и во мгновение ока, яко стог соломы попалены быти, тобою предреченная. Вся силы духа, воли и разума во услужение Единому Богу покорил еси и неленостно благоугождая Ему и восходя от подвига к подвигу, великих дарований от Щедродавца Господа сподобился еси, и за сие у Престола Святыя Троицы с лики ангельских воинств громогласно возглашаеши: «Свят, Свят, Свят Господь Саваоф»! Приклони Господа на милость да и нас сподобит присно возгласити тебе, благому рабу Его, тако: Радуйся, древо в Почаевской Лавре возросшее, процветшее и в столп православия претворенное; Радуйся, о оскудении братии и в них духа благочестия и любви скорбел еси; Радуйся, весь мир, и иже в нем, духом провидевый; Радуйся, Бога неустанно в веси твоей под открытым небом и «на всяком месте владычества Его» прославлявый; Радуйся, сильных мира сего, яко паутина есть, боятися возбранивый; Радуйся, тако боятися Бога, яко боимся «их», тлена и червя вразумлявый; Радуйся, ум и сердце свободными имети от страха и житейских сует увещавый; Радуйся, Царицей Небесной присланных к Тебе на укрепление и исцеление с любовию принимавый; Радуйся, изнемогающих чад Ея под бременем скорбей и грехов с улыбкой и словами «мои хорошие!» у ворот встречавый; Радуйся, Крестным Знамением одержимых бесами на землю повергавый; Радуйся, силою благодати в Тебе сущею, и возложением рук на главу, легионы темных сил, в бездну на веки изгонявый; Радуйся, мирских человек, работающих бесам, обилием чудес, мудростию и любовию, служителями Богу соделавый. Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 7
Проповедует вся Православная Русь Богоизбранне отче, утруждения плоти твоея, болезни, раны, биения, гонения, клеветы и досаждения от сродник, властей, завистливых лжебратий, с Богом воюющих прислужников, яко все сие за Христа претерпел еси, и усердно о помиловании их Богу моливыйся: «оболгаху, за не моляхся». Хотящых отняти у Тебе ключи от Святыя Лавры, Ты, мужемудренный отче, яко искренний друже и воин Христов, прещений их не убоявыйся, смело обличив и со словами: «Бог был, есть и будет, а вас, «проклятием заклейменных», не будет!, изгнал еси, и Лавру от закрытия, с помощию Божиею и святых Его Ангел, отстоял еси. За сие, в скором времени, яко гадарянами, трусливыми христопродавцами, боящимися благодатной свободы и величия духа, в Тебе обитающых, предательски ночию притворно сотворив молитву и не открывшу Ти, вероломно взломав двери, прямо из келий в руки предерзых богоотступников, палачей, истязателей, предан был еси. И ими нещадно за власы и браду влачимый, биенный, в дом умалишенных иже в Буданове близ Тернополя, отправленный. И тамо дивными чудесы прославляя и благодаря Бога, сподобившаго Тя за Христа и Церковь Его мучения претерпети, и за терпение еще большую силу благодатную восприяти, и исцеленный Им, в радости духовней воспевал страстоположнику Христу благодарственную песнь: Аллилуиа.
Икос 7
Сияяй многоразличными добродетельми, трудами, потами в угождении Богу и служении ближним, в меру возраста, в мужа совершенна и в разум истинный пришед, досточудне отче Амфилохие. Отошел от нас, пастырь добрый, и разбрелись овцы по всей земли русской. Вси мы, чада Твоя, прославляем и благодарим Премилостиваго Спаса, Господа нашего, Иисуса Христа, яко по Твоим святым молитвам Он нас, недостойных милости, питает, греет, исправляет и милует. И не престанем благодарить Его и за то, что Он во дни мерзости и запустения, по отступлении от Апостольских Правил, и на седми Вселенских Соборах, Духом Святым возвещенных и Святыми отцами дополненных и узаконенных постановлений, даровал Православней Церкви и всем искренним чадам Ея Тебя, отче Амфилохие, яко истиннаго поборника за Правду Божию, Православную веру и Церковь Христову. Ты же, отче, уготовлял души человеческия в нерукотворенныя храмы Христу, ибо только сердца очищенныя от злобы и всякие нечистоты, озаренныя Духом Святым врата адова не одолеют, а в храмы, приидет время, ходить будет нельзя, ты тако возвещал. За сие прославляешися в земли Волынской и Галичской, и во всех градех великия России, Богом прославленный Отче. И от всех нас, любящых и чтущых Святую память Твою, приими в похвалу твою и в Божию Славу словеса сии: Радуйся, пристанище для странников, по предивном освобождении из заточения, во отечестве Твоем устроивый; Радуйся, при обители и храм во имя Святой Троицы с помощию Божией и твоими трудами воздвигнувый; Радуйся, в том храме благоговейно Божественную литургию трижды служивый и всех бывших с Тобою причастивый; Радуйся, яко боголепно, свято, приношениями боголюбцев и святыми иконами ту украсивый; Радуйся, изречением «Ахиерею церковь, полковнику казарма» до последняго издыхания святыя храмы защищавый; Радуйся, молитву и псалмопение жизнию души своея именовавый; Радуйся, на молитву и Богослужения от Самой Владычицы мира благословение принимавый; Радуйся, в душе монастырь и все полезное ко спасению содержати учивый; Радуйся, терпением, смирением и непрестанным призыванием Иисуса Христа мысленных врагов победивый; Радуйся, не боятися глада, гонений, мучений за Христа многих укрепивый; Радуйся, яко молитва, славословие и пение во обители Твоей день и ночь не умолкали; Радуйся, яко вси жаждующии правды, чающии утешения и исцеления тем пением и молитвою с поклоны в вере, надежде и любви утверждались и исцелялись; Радуйся, яко имени твоего монашеского Иосиф бесы трепещут. Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 8
Хотяще вверенное ти Господом и Царицей Небесною стадо Христово уготовати ко Второму славному Пришествию, ты, отче наш предивне, научал всех словесам и деланиям твоим: молитве, чистоте, безстрастию, милосердию, терпению, воздержанию, незлобию, нестяжанию, любви, благости, часто повторяя: «Где Бог, там любовь», сам сиял всеми добродетельми сими. От юности избрал тернистый путь, и восходя от подвига к подвигу, от силы в силу, сияеши различными дарами Благодати Духа Святаго, милосердствуя коегождо, одаряя щедро и духовно, и телесно, побуждая и увещавая нас с отеческою любовию и долготерпением: постом, непрестанною молитвою, чистотою, кротким незлобивым нравом внити, аможе ничтоже скверно входит, ибо и ты сказал и показал: «Кто будет иметь хотя на ноготь злобы, не спасется». Той и не узрит, и не услышит, где Ты ныне упокоеваешися от праведных трудов, и тамо в вечных райских чертозех со всеми святыми ликуеши, и не воспоет Всевышнему Богу благословенную песнь: Аллилуиа.
Икос 8
Нового и последняго угодника Божия, пред кончиною мира, всех Творец и грозный Судия иже вскоре грядет с силою и славою многою, показа Тя, отче, добраго, любящаго пастыря, душу свою полагающаго за овцы, ибо большей любви, какова царила в твоем сердце к Богу, к молитве, к людем и пребывала в Твоей обители - нет, и не будет, и не ищите! Ты сам изволил сие сказать. Тьмами тем болящые, страждущыя, удрученныя горем, скорбящыя, странные, нищие и дети, одержимые ехали и шли непрерывным потоком, дабы под сению Твоих благотворных молитв успокоить, укрепить свои истерзанныя, мятущиеся души и подкрепить свою немощную, утружденную и изнемогающую плоть. И всем, по коегождо потребе и по вере: утешения, исцеления, безчисленныя благословения, милостыни щедро подавая, понуждают нас за сии благодеяния от благодарных сердец едиными усты с любовию Тебе вопити: Радуйся, к Всемогущему Богу и к тебе, яко послушному рабу Его, любовь в сердца вливавый; Радуйся, попечением о странниках, гонимых, нищих, хромых, слепых Бога прославлявый; Радуйся, многих жен и дев покаянием, аки вторым крещением, Христу, Жениху душ обручивый; Радуйся, приходом своим в полунощи к молящымся и пением: «Се Жених грядет», приход Небеснаго Обручника предвозвещавый; Радуйся, чтением акафистов, водосвятными молебнами, неусыпаемой Псалтирию, поклонами и пищею Тобою благословленной, болящых исцелявый; Радуйся, нетерпения, раздражения, поспешности, небрежения, сонливости и лени на молитве николиже проявивый; Радуйся, с величием видимым и кротостию душевною, в благодати редчайшей служения молитвенныя совершавый; Радуйся, всем бодрствующым и воздевающым руки к Божией Матери в прошениях и нуждах, покровительство Ея в совокупной молитве с преподобным Иовом, испросивый; Радуйся, пищею духовною жаждущих благодати познания истины питавый; Радуйся, пищею телесною алчущих до сытости, «по шею», кормивый и насыщавый; Радуйся, множество покаявшыхся молитве обучивый, и их от служения диаволу к служению Богови обративый; Радуйся, всех ищущих истиннаго пути ко спасению, на подвиги духовныя окриливый; Радуйся, молитвенно очи в нощи на небо возводивый и тамо Ангельския чины, служащие Богу, и все небо отверстым зревый; Радуйся, явлением облачным Святыя Троицы с Архангелами, яко изображено на иконе, пред каноном АнгелуХранителю, во свете заходящаго солнца наслаждавыйся. Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 9
Велиими чудесы жизнь твоя ознаменовася, предивне угодниче Христов, ибо данною тебе свыше необоримою силою демонския полки в бездну изгоняеши, проглаголевшему бесу внити во свинию, словами «свинину люди едят», возбранивый. За одержимых ими милостивно моливыйся, и всех страждущых многоразличными болезньми душевными и телесными безмездно исцеляеши, от бед и напастей сохраняеши, в скорбех и гонениих утешаеши, во искушениях многоразличных руку помощи простираеши, в трудных обстояниих и недоумениих во сне являешися и правый путь указуеши, и всякое душеполезное наше прошение всем, с верою к твоему изображению (яко обещался еси) обращающыхся, исполняеши. Странных и сирых питаеши, изнемогающых духом подкрепляеши, обленившихся и вспять возвращающыхся грозно обличаеши, оскудевших и поврежденных умом к разуму возращаеши, неверующых сими чудесы к вере обращаеши. Боятися не сильных века сего, а единого греха научаеши, и не любити мира и иже в нем, но Единаго Бога и Тому непрестанно в радости Духа, аще Бог изволит, купно с тобою немолчными гласы воспевати хвалебную песнь: Аллилуиа.
Икос 9
Ветия многия, в мудрости словес преуспевшыя, не возмогут по достоянию восхвалити тя, и словесы изобразити любовь твою к Богу и страждущым людем, глубину познания Божественных Писаний, мудрость, разум духовный, тонкое знание внутреннего состояния человека. Силою благодатною ты, досточудне отче, яко тростию из глубин многомятежнаго житейскаго моря многих извлекл еси, совершая дивныя и премногая чудеса еще жив сущ, но и по отшествии Твоем не престаеши творити, такожде еще и большая. Мы же, любовь твою воспоминая, благодарни суще и со скорбию в сердцах вопием тебе сице: Радуйся, яко об исходе твоем из жития сего накануне Рождества Христова, за год предсказавый; Радуйся, яко за седмицу Господь, яркою звездою и восходящим лучем вверх и снежною бурею, кончину Твою ознаменовавый; Радуйся, яко тем лучем Твой восход к небеси осветися; Радуйся, с Богохвалебной песнью во устех Богу святую душу твою предавый; Радуйся, яко услышав о преставлении твоем, не взирая на стужу и метель, люди из окрестных весей и градов от мала до велика ко пречудному гробу твоему стекахуся; Радуйся, козням и напастем от видимых и невидимых врагов день и ночь подвергавыйся; Радуйся, яко враг рода человеческаго, не терпя видети Тобою спасаемых, нещадно тебе мстивый; Радуйся, страхований бесовских и козней диавольских не устрашивыйся; Радуйся, твою богомудрую, убеленною сединою главу, пред ним не приклонивый; Радуйся, яко грозный воевода бил их палицею, яко мечем, страх и трепет наводивый и в бегство обращавый; Радуйся, святыми мученики Вонифатием и Игнатием Богоносцем, яко их подражатель и соратник, сретенный; Радуйся, яко душа Твоя, седалище Триипостасного Бога, святыми Ангелы ко Престолу Царя Славы вознесенная. Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 10
Ангельския силы и человеческий род зело удивишася редкому в тебе дарованию и неусыпному попечению о спасении души своея, ибо отринув всякое житейское попечение от юности твоея, во святую Лавру Почаевскую вселивыйся и тамо весь многотрудный путь от инока до схиигумена за сорок с лишним лет прошедый. И во плоти сущи, яко Ангел пожил еси. За труды праведныя, чистоту, смирение и любовь Господь возложи на тя, токмо тобою удобоносимое и исполнимое в наше врем послушания: изгонять бесов, открытой проповедию обличать неправду, гонения, притеснения, разорение святых храмов, попирание Креста, «Ибо храм без креста, якоже человек без главы», так ты рекл еси правдивыми усты твоими. За сие служение по Бозе Духу Животворящему, а не букве убивающей, за труды и подвиги, Сам Подвигоположник Христос Бог со Отцем и Духом избра чистое сердце Твое в жилище себе. Ты же, преславне отче, прикасаяйся к груди своей вещал еси: «Здесь у меня Пресвятая Троица, Божия Матерь, Крест, преподобный Иов, Лавра, вси святии и вся святыня, яко есть мы храмы Бога Живаго», и с сим храмом переселился Ты с радостию о земли на Небо, идеже предстоя Верховному Творцу чудес - Богу, поеши Ему с сонмом святых священную песнь: Аллилуиа.
Икос 10
Стена еси и ограждение всем с верою несумненною и любовию к тебе взывающым: «Отец Иосиф, помози!». Тем же и на святое место погребения твоего приходящым, идеже почивают твоя нетленныя мощи и совершаются дивныя дела исцеления, яви милость твою, помози нам сирым и безпомощным: в бедах, напастех, скорбех, болезнех, и во всех нуждах сущым, и в волнах злосмрадных житейского моря потопающым. Простри руку свою и изми нас из рова страстей, соблазнов и искушений, ибо ныне самое благоприятное время для спасения души, но мы окаянныя, околеваем в ленности, нерадении, небрежении и безстрашии. Нынешнее видимое благополучие, благоденствие и изобилие земных благ, усыпило нас; пробуди нас, отче, вдохни страх Божий, и испроси нам у Царя Небеснаго время для покаяния и исправления; силы вся претерпети до конца и не изнемочь под тяжестию спасительного Креста, дабы улучити благую кончину. Мы же в надежди на Твою помощь, умильно вопием Ти таковая: Радуйся, словами «Молитва избавляет от смерти души наша» ко страждущым взывавый; Радуйся, прославлением Божия Матери делами милосердия, любовию к Ней сердца наполнявый; Радуйся, врачевство на все недуги и болезни благодатию Божиею постигнувый; Радуйся, неподдающиися другим врачем ко исправлению, переломы удов искусно складывавый; Радуйся, искалеченныя грехом души умело врачевавый; Радуйся, сим даром исцелений всех врачей превосшедый и удививый; Радуйся, пратися с лютыми вепрями: духами блуда, чревоугодия и винопития, не устрашивыйся; Радуйся, сими страстьми всех людей века сего зараженными определивый; Радуйся, бесов во устах человеческих, мозгах, в крови, волосах, детородящих удех, кишках и в сердце живущих, видевый; Радуйся, касатися тех мест для исцеления, в коих они гнездятся, яко врач-мама, не возгнушавыйся: Радуйся, вкушением Тобою благословенных брашен и вина благодать покаяния исцеления всем, с верою приступающим к сему угощению, подававый; Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 11
Богохвалебными песньми благодарственно взываем Щедрому Богу, даровавшему земли Российстей таковаго молитвенника и вернаго сына своего отечествия, не восхотевшаго преселитися в иноземную державу, егда освободив тя, по Промыслу Божию из заточения в дому умалешенных, одна знатная жена дочь бывшаго правителя, в свое время исцеленная тобою от беснования, видя в тебе искуснаго врача не токмо телес но и душ человеческих, вознамерилась увезти тя в иную, далекую страну. Покидая Родину, хотела увезти с собою таковое сокровище, схиигумена-молитвенника за всех живущих на земли. Ты же, отче, по милости Божией, во граде Львове был избавлен от сея ловушки полковником Филиппом, чие имя ты часто поминал с благодарением и пожеланием ему Царствия Небеснаго. Он же и помог тебе добраться в твою родную весь, Малую Иловицу, ставшую великой, благодаря тем велиим делам Божиим, которыя свершались в ней при стечении многочисленнаго народа. Еще десять последних зим ты потрудился в постоянном подвиге, в непреклонной борьбе с врагами рода человеческаго, в непрестаной горячей молитве. Был в послушании Самой Царице Небесной для спасения избранных Божиих и принятия ими ангельскаго Чина. Мы же, по благоволению Пресвятыя Богородицы, Тобою на истинный путь наставляемые, но падающие в ров страстей и изнемогающыя чада твоя, просим тя, любимый отче: твоими святыми молитвами возведи нас из сего погибельнаго рова, оживи угасший дух в сердцах нашых, во еже возмощи нам прославити дивныя дела Божии в житии Твоем, и воспети Творцу чудес, Дивному во святых Своих, Богу Израилеву ангельскую песнь: Аллилуиа.
Икос 11
Многосветлое светило, сладкозвучная свирель и несмолкающый орган оглашавшый всю Вселенную громогласным пением: «С нами БОГ, Разумейте, языцы, и покоряйтеся, яко с нами Бог», «Елице во Христа крестистеся, во Христа облекостеся, аллилуиа!», «Верую во Единаго Бог Отца Вседержителя». В последний раз Святая Лавра и весь Почаев огласишася твоим пением, егда ты, Отче Святый, пред кончиною посетил святую Обитель, преклоняя колена и горячо со слезами моляся у святаго Престола, и облобызал Стопу Пресвятыя Богородицы и мощи преподобного Иова прощаясь с братиею и нищими духом. Некия двоедушныя лжебратия, боящыяся сильных мира сего, снедаемыя завистию, дышущыя злобою, не выдерживавшии благодати, исходящей изо уст твоих и увлекавшей всех истинно верующых пети купно с тобою, с яростию претяще восклицали: «Сие поется раз в году». Ты же, мужемудренный отче, отвещавал им тако: «С вами Бог раз в году, а со мною всегда. С нами Бог и преподоный Иов был, есть и будет, и, обращаясь к претящему служителю, предстоящему у святых мощей предрек: «А тебя у преподобного Иова не будет», что и сбылося вскоре. И ныне, прославляя Светозарное Солнце Правды Христа, немолчно поеши небесную песнь, осеяваемь Божественными лучами в великой радости и благолепии, яко одной из чад твоих было показано во сне, предстоя Престолу Святыя Троицы, Юже сподобился еси, еще живя на земи, прославити, благочестивейший отче, восшествием на Крест духовный и сияя добротетельми воздержания, чистоты и целомудрия, восклицая со апостолом: «Все могу об укрепляющем мя Иисусе», совершил еси непревзойденный подвиг, в который вступити, не ручаясь за свое безстрастие, не дерзали и древние подвигоположники, посрамляя и в бездну ввергая сатану. За сие великое терпение приими от раскаянных и благодарных сердец похваления сицевая: Радуйся, по благословению Божьему и по воле Пречистыя Владычицы нашея Богородицы, вышшему искусу себе подвергнувый; Радуйся, яко противное противным врачуют, и клин клином вышибают, тако и Ты вкушением мяс, питием вина, лобзанием жен, демонов посрамивый; Радуйся, многия и из духовных лиц клеветою, презрением к тебе, омрачались и деяньми сими соблазнялись; Радуйся, в сем непостижимом для многих подвиге, чужд страстей плотских пребывый; Радуйся, в целомудрии и несоизволении на грех, ум и сердце, добре сохранивый; Радуйся, сими деяньми высоту безстрастия души и мертвенность плоти твоея, миру явивый; Радуйся, духов блуда, винопития и чревоугодия, безпощадно паливый; Радуйся, ибо сим всех нас: грехолюбцев, плотолюбцев, сластолюбцев, обличивый; Радуйся, своим подвигом гнушатися плотския нечистоты, воздержанию и чистоте, многих обучивый; Радуйся, Господь Бог за несение Креста сего еще большею благодатию тебя осенивый; Радуйся, в терпении непоколебимом с Крестом сим духовным, на Голгофу восшедый; Радуйся, за наше неверие, измену, непонимание и невежество, далее оставатися на земли Господь милосердный возбранивый и в Чертог Небесный тебя вселивый; Радуйся, преподобномучениче прямо с Креста Голгофскаго в райския обители, хваля Бога с веселием, преселивыйся; Радуйся, яко за послушание и восшествие на Крест духовный, самой Царицей Небесной тебе нетленный венец уготован. Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 12
Благодать обретенную тобою и данную ти свыше, яркою звездою с огненным широким лучем, идущим вверх, над обителию твоею Сам Бог явил еси. Ты же, всех бывших с тобою, в нощи разбудив, показал знамение, предвещавшее о твоем преселении на Небо. Одна, изумленная послушница, с восторгом воскликнула: «Такая звезда, как на Рождество!». Ты же, кротко и спокойно, с присущим тебе величием, ответил: «На Рождество яркий луч был направлен вниз, а эта звезда с восходящим лучем вверх». Мы не уразумели и не внимали словам твоим, ибо многими притчами и знаменьми ты нам предвещал о своей кончине. И нас, безпечностию помраченных, внезапно постигло горе. Ты многократно говорил: «Моя кончина такая: сегодня с вами повечеряю, а утром встанете, и меня уже не будет». Теперь мы грешныя каемся и вспоминаем каждое твое слово, припадаем со слезами к могиле твоей из холодного, тяжелого, белаго мрамора, где почивают нетленныя мощи твоя. И в великой скорби и с сокрушением сердечным просим тебе, непамятозлобнаго, добраго отца нашего: прости нас, приими наша воздыхания и горькия слезы раскаяния и помоги нам исправиться. Как ты говорил одной монахине, обличая всех: «Вера, где Твоя вера?!» Прости нас отче. Умилостиви Премилосерднаго Бога и Его Преблагославенную Пречистую Матерь, Деву Марию, и умоли в минуту огненнаго запаления всея Вселенныя, да спасет нас живых и отшедших, и преобразит, чтобы нам милостию Божиею и покаянием очищенных на облацех воздушных сретить Господа, грядущаго со славою многою, с сонмом всех ангелов и всех святых, и чистою душею, и усты воспети Сладчайшему Иисусу, яко Вселюбезнейшему, Всежеланному Жениху душ нашых: Аллилуиа.
Икос 12
Восхваляюще дивнаго во святых Своих Бога Израилева, прославившаго прославляющаго, тя, дивне отче Амфилохие, милостиваго и скоропослушливаго исполнителя прошений нашых, и во всех нуждах, болезнех и злоключениих надежнаго помощника. Твоим Богоугодным житием и чудесы показуется сила, величие и милость Святыя Троицы и торжество веры Православныя не иныя какия, а токмо Православныя. Ты еще предрекал о вскрытии твоих и отца Прохора мощей, о чесом веселящеся, в радости духовней вопием Ти сице: Радуйся, любимче Божия Матери Почаевския и всея Росии заступниче; Радуйся, многажды с Царицею Небесной воочию беседовавый и Ею на богоугодныя послушания благословенный; Радуйся, свои благодатныя дарования и подвиги великия словами: «В гробу лежу, а девочку на руках держу» и иными делами самоуничижения, скрывавый; Радуйся, славы не от людей и сильных мира сего, а от Единаго Бога искавый; Радуйся, яко вси вернии, воспоминая Твою любовь и благодеяния, горячими слезами обливаются; Радуйся, тако возлюбити Господа и беседу с Ним, яко любим грех, празднословие, брашна и питие, увещавый; Радуйся, львовских, московских, питерских, мурманских, киевских, почаевских и прочих всех к любви и единомыслию призывавый; Радуйся, кончину непостыдну, мирну, безболезненну, праведною жизнию у Бога заслуживый; Радуйся, Крест Честный, оружие на враги, во гробе, яко живый, над грудию рукою зажатою, высоко державый; Радуйся, яко тело твое честное почаевскою братиею собором отпето и на монашеском кладбище с честию при множестве молящихся погребено; Радуйся, яко обещавый при жизни по отшествии твоем у Престола Святой Троицы об открытии на братском кладбище храма, Бога умолити; Радуйся, яко Ты, отче, своим пришествием, ко усопшей братии, кладбище обновивый; Радуйся, к ликованию и общению живых и отшедшых твоим ходатайством, вскоре Господь храм на нем открывый; Радуйся, яко слова Твои «Когда я умру, тогда узнаете кто я был», сбываются; Радуйся, к месту упокоения нетленныя плоти Твоея любящыя и чтущыя память твою стекаются; Радуйся, и не ведущыя тя, но по вере приходящыя, у могилы (на гробе твоем) исцеляются; Радуйся, преподобне отче наш Амфилохие, в последняя лета Православия непоколебимый столпе и о всем мире пламенный молитвенниче.
Кондак 13
О всехвальный и вселюбимый отче наш Амфилохие, всем нам в скорбех, напастех и бедах сущым, скорый заступниче, в болезнех душевных и телесных врачу и милосердный целителю; в тяжких обстояниих и житейских нуждах пребыстрый помощниче; за веру и чистоту православия истинный поборниче; богоборных духов тьмы, скверных навыков века сего искоренителю. Приими со воздыханием и слезами приносимое тебе прошение наше и в твоих пламенных молитвах пред Престолом Святыя Троицы воспомяни нас грешных, изнемогающих под бременем скорби, каковой не было от создания мира, омраченных суетою, оглушенных шумом и быстротою бесовских чудес и знамений, зараженных сатанинской гордостию, сластолюбием, ненавистию, злобою и многими другими пороками, разобщенных подозрениями и клеветою. Приклони на милость Всемилостиваго Спаса и Его Пречистую Матерь, да очистив искупительным наказанием и Своею благодатию, и неизреченным милосердием, избавит нас вечных мук, огня геенского, и страшнаго леденящаго тартара, и сподобит богоугодным житием, искреннею любовию к Богу и друг ко другу, глубоким покаянием, смирением и терпением внити в Горний Иерусалим и тамо, в Торжествующей Церкви пети Царю славы, Творцу веков, Создателю мира, Искупителю, Сладчайшему Жениху душ нашых вечно несмолкаемое: Аллилуиа, Аллилуиа, Аллилуиа.
 
(Этот кондак читается трижды, затем икос 1 и кондак 1)

Молитвы преподобному Амфилохию Почаевскому


Молитва первая

О, великий Православия светильниче, возженный благодатною любовию от Незаходимого Света - Христа, воинствословием апостольским, верою твердою, надеждою незыблемою, любовию горячейшею, терпением адамантовым, чистотою ума и сердца, милосердием к людем, уготовавый себе во обитель Пресвятыя Троицы.

Отверстыми Небеса зревый, видения ангельских Сил, лицезрения и бесед Самою Царицей Небесной, Пречистою Девою Мариею сподобившыйся. Благодатныя дары в чистый ум твой и сердце восприявый и теми дарми послужил еси; во дни оскудения веры, духа благочестия и любви, дух подвижничества, запустения; а если и ремонтируют и строят храмы, то подготовительныя работы ведутся для встречи антихриста. Церковь лукавнующых делает все, чтобы ускорить его приход. Больше людей в омрачении диавольскими прельщеньми, поблажающыми услаждениям плоти и развлекающими ум; во дни беззаконий, чревоубийств и грехопадений, паче вавилонских, ты, дивный отче, преискреннейший друже и славный воин Христов, неустрашимо, безбоязненно прославлял Господа и обличал лживых клеветников на истину. Огненными словам правды утверждал сердца в вере истинней, надежде, долготерпении и любви. Все силы ума и души непрестанно направлял к Богу в молитве. И по отшествии Твоем от земных к небесным, по проречению Господа: «Последнии будут первыми», и ты, отче, понесший всю тяготу духовнаго внутренняго Креста последнего времени, яко первый приблизивыйся к Престолу Вседержителя, и тамо Небесныя силы приобщивыйся, и на нас с любовию назираеши якоже и обещался еси, духом с нами на молитве пребываеши. Помози нам неленостно молитися и быти с тобою всегда. Честное, нетленное тело твое, яко сосуд полный преизливающийся Божественною благодатию, нам оставивый. Имея велие дерзновение ко Всемилостивому Спасу и его Пречистей Матери, взывая о нас верующых, смиренно просящых Твоея помощи и заступления, помози нам, в скорбных обстояниих сущым; пастырем Православную веру держати, славолюбие, сребролюбие, сластолюбие, многостяжание презирати, в подвизех люби, терпения, молитвы о пасомых и их спасении благочестие сохранити, вси прелести диавольския нивочтоже вменяти, яко сор и паутину ногам попирати. Умоли Господа, да зажжет огнь в сердцах всех верующых и даст нестерпимое желание молитися, славити и благодорити Господа за Его неизреченную милость и долготерпение. И вместо злобного, малодушного ропота, осуждения, хулы, сквернословия и пустословия да исходят изо уст человеческих слова благодарения и славословия.

Во дни мира и сдружения с диаволом, и яростной, свирепой, непримиримой войной с Богом, ибо предреченныя с древних лет слова святых отцев, сбываются: «Когда духовенство будет участвовать в делах властей и, наоборот, власти в делах Церкви» знайте, то конец уже при дверях, да обновит и укрепит Господь, наши расслабленныя страстьми и растленныя грехом силы. С таким же постоянством, неутомимостью и жадностию устремляться к Богу в молитве, с какою ненасытимостию мы стремимся к еде и ко всяким плотским утешениям, послаблениям и удовольствиям. Многия и из духовных прельстились разглагольствованиями еретиков, сектантов, и прочими слугами сатаны, сдружившимися с духом времени сего, ожиданием лучшых времен для спасения, якобы более благоприятных. Но ты, честный отче, со всею силою мужественной души твоея увещевал всех, приходящых к тебе, что лучшаго времени, как сейчас не будет для спасения, что всем верующим, истинно верующим, а их, как ты сказал: «В городе десять, а на селе два-три», со страхом и трепетом бодрствуя на молитве, надлежит ожидать Второго Славнаго Пришествия Господа нашего Иисуса Христа, грядущаго со «Славою и силою многою».

Видимым миром и благоденствием, пресыщением и изобилием, лукавый усыпляет нашу бдительность, отгоняет страх, отягощает тела и сердца, делает нас неспособными противоборствовать ему. Твоими святыми молитвами, да спасет нас Господь от сетей диавола и воцарит среди избранных чад Божиих мир духовный, единомыслие и любовь, дающие нам силы и крепость противостоять антихристу и его споспешникам, и безбоязненно исповедывать Христа Бога нашего до последняго издыхания. Во дни изобилия телеснаго, но глада духовнаго, испроси нам отче от Великодаровитаго Бога, Спаса нашего и Его Пречистыя Матери просвещения разума, способность мыслить духовно и распознавать коварство и ухищрения темных сил сатаны, который тайными внушениями своими помрачает ум, растлевает волю человеческую, ввергает людей с неутвержденными сердцами в бездну блуда, пиянства, и хулы, разгула, затем отчаянием, насильственною наглою смертиею калечит тела и пожирает человеческия души. Во дни разорения градов монастырских и церквей, утверди и соблюди храмы сердца наша, в вере Православной. Да упокоются они на недвижимом камени памяти о Господе Иисусе Христе и с призывом этого священного Имени да воцарится в них: смирение, терпение и любовь. Испроси нам у Бога, святый отче Амфилохие, всякий дар, коемуждо благопотребный для спасения.

За грехи и беззакония наша мы не имеем дерзновения просить избавления от напастей, искушений, испытаний и бед, а только смиренно вопием: испроси, честный отче, у Господа Сил нам недостойным силы претерпети все, и праведно наносимыми болезньми, испытаньми, гонениями, клеветою, поношениями, да смирим свою превознесенную гордыню, истребим леность, самоцение и жестокосердие. Да познаем, что сими испытаниями Господь смиряет и очищает душы нашя от всякия скверны плоти и духа. Возблагодари милостиваго Отца Небеснаго за нас и испроси прощения, что мы своими непотребствами, грехопадениями безпрерывными унижаем в себе Его пречистый Образ. Еще молим тя, отче пречестный, да и мы, очищенныя всеми испытаньми в жизни сей временней, восприимем благодатныя воздаяния: в скорби утешение, в болезнех исцеления, в падениих восстание, в заблуждениих на путь истины и спасения возвращение, в подвизех - укрепление, в молитвах бодрость, чистоту и постоянство со смирением. Испроси нам благословение на вся добрыя дела и начинания: уст хранение, преспеяние разума и вся благая и полезная для нашего спасения. Отец Иосиф! Не остави любимых тобою детей невинных жертв взрослых и родительских заблуждений! Буди покровителем младенцев живых и безыменных, погибших во чреве православных матерей.

Юным наставником и наказателем, чистоты и целомудрия хранителем. Старцам утешение, скорбящым радование, вдов и сирот заступление, согрешающим исправление. Твоею помощию и предстательством, да оградит нас Господь Бог силою Честнаго и Животворящего Своего Креста от всех враг видимых и невидимых и избавит нас не токмо от лукавого беса, но и от лукавых человек, от лукаваго ока, от лукавыя мысли, от лукаваго правления, от лукаваго языка и от всех дел лукавого. И данною ти от Бога властию изжени их в бездну. И в час кончины нашея избави души наша от их прельщения, страхований и ловления. Излей очистительный елей милосердия, да пройдем страшныя мытарства, и твоими святыми молитвами и покровительством Богоматери и св. АнгелаХранителя да неосужденно предстанем пред Престолом Царя Славы, и сподобимся с мудрыми девами внити в брачный Чертог и вкусити от духовных яств трапезы, уготованныя Самим Женихом, Иисусом Христом, и тамо со ангелы и со всеми святыми, с благословенными и мудрыми рабами Божиими да сподобимся воспевати Отца и Сына и Святаго Духа, ныне и присно и во веки веков. Аминь!


Молитва вторая

О, всеблаженне отче наш Амфилохие, земный Ангеле и небесный человече! Припадаем к тебе с верою и любовию и молим ти ся прилежно: яви нам смиренным и грешным святое свое заступление: се бо грех ради наших не имамы дерзновения просити о потребах наших Господа и Владыку нашего, но тебе молитвенника благоприятнаго к Нему предлагаем и просим тя со усердием многим: испроси нам от благости Его благопотребная дары душам и телесем нашим, веру праву, любовь ко всем нелицемерную, в злостраданиих терпение, тяжкими болезнями одержимым - от недугов исцеление, под бременем скорбей и напастей неудобоносимых падающих и жития своего отчаявшихся твоими молитвами получити скорое облегчение и избавление.

Не забуди, блаженне отче, и обитель сию святую, в ней же подвизался еси, присно тя чтущую, но соблюди ю и всех живущих и подвизающихся в ней и на поклонение в ню приходящих невредимыми от искушений диавольских и всякаго зла. Егда же приспеет наше от временнаго сего жития отшествие, и к вечности преселение, не лиши нас помощи твоея небесныя, но молитвами твоими всех нас приведи в пристанище спасения и наследники яви нас быти всесветлаго Царствия Христова, да поем и славим неизреченныя щедроты Человеколюбца Бога Отца и Сына и Святаго Духа и твое вкупе с преподобным Иовом отеческое заступление во веки веков. Аминь.


Молитва третья

О, Преподобный Отче Амфилохие. Ты, просвещенный познанием славы Божией, делами веры утвержденный на силе Бога, а не на мудрости человеческой, имея надежду на единого Господа, не тщетно потрудился в мире сем лукавом и прелюбодейном, и приобрел еси плод духа: любовь, радость, мир, долголетие, воздержание и сим стяжал еси истинную благодать Божию, на и паче же благодать веры, действующею любовию, которая вся может, всех терпит, всему веру имеет, не ищет своего, но ищет пользы другого и николиже престает, проходит небеса и вселяется во обителях подателя любви самого Всевышнего Бога, его же ты подобно апостолу прославлял и небоязненно исповедовал еси делами дивных чудотворений, исцелений и страннолюбия и был еси пастырь добрый, душу свою полагавший за овцы, подавший пример стаду и, спасая заблудших словесных овец, совратившихся в рабство тления, обилием благодати обновлял их духовно, подкрепляя их в немощах, свобождая от греха смерти и приводя к познанию истины, которая есть сам Бог наш Иисус Христос, распявшийся плотию за грехи человеческия и открывший тем вход во Царствие небесное идеже ты со всеми праведниками и мучениками ныне воспевающи пречестное имя Пресвятыя Троицы и приносишь хвалу и благодарение Пречистой Деве Марии со Архангелом и Ангелом и всеми святыми. Молим тя, Великий Угодниче Божий, будучи нам посредник и ходатай крепкий пред Господом о спасении нас грешных от врагов видимых и невидимых от нашествия иноплеменных и междусобныя брани, да укрепляемие твоими всесильными к Богу молитвами, возможем твердо противостояти невидимыми врагам спасения нашего и в подражение тебе мужественно ополчатися на видимых врагов, тщащихся низложити веру истинную - святое православие, его же ты превозносил и торжественно исповедовал еси всею жизнью и за, это увенчаный от Бога венцем неувядаемым, ныне сияеши во Царствии небесном пред престолом Царя Вседержителя ему же единому подобает всякая слава, честь и поклонение с Отцом и святым Духом во веки Веков. Аминь!



Тропарь Прп. Амфилохию Почаевскому, гл. 4

Земли Волынския преславна подвижника / и обители Почаевския достойна насельника/людей православных изрядна целителя /яви тя Церкви Своей Христос Бог наш, /преподобие отче Амфилохие, /Ему же усердно молися/ от навет вражиих свободитися / и спастися душам нашим.

Кондак, гл.3

Яко веры Православныя ревнитель и благочестнаго жития учитель, в болезнех и скорбех изрядный помощник и защититель, пред Господом предстоиши преподобне Амфилохие, сего ради вопием ти: сохрани обитель, в ней же подвизался еси, и спасай нас молитвами твоими, отче блаженне.


Тропарь, гл. 4.

О страждущых людех пламенный молитвенниче, постом, бореньми со страстьми, бдением молитвенным, делами милосердия любовь Царицы Небесной снискав. Истинныя веры столп был еси непоколебимый, и Православия яркий светильниче, многонедужным скорый помощниче и безмездный целителю, полчищ демонских неустрашимый прогонителю, в подвизех великих самому Подвигоположнику Христу и всем святым подражал еси, в честь Святыя Троицы триех имен носителю: Иакове, Иосифе и отче Амфилохие, моли Всемилостиваго Бога да очистит сердца зараженныя грехом и Твоим предстательством спасет души наша.



Кондак, гл. 8.

Любовию ко Святей Троице, Божией Матери и ко всем святым от юности уязвился еси, тем благочестно подвигом монаха, пресвитера и схиигумена угодил еси, Почаевскую обитель твоими молитвами и сорокалетним житием в ней украсил еси, Христиан последнего времени, непрестанным возглашением: «С нами Бог»! «Елицы во Христа креститеся, во Христа облекостеся» укрепил еси. За безбоязненную проповедь, безропотное несение Креста и милосердием к ближним Христос дарами чудес, прозрений и исцелений обогати тя. Теми дарми Единому Богу, а не Богу и мамонепослужил еси. Всех чтущых с любовию святую память твою, поминай пред Престолом Вседержителя преподобне отче наш Амфилохие.



Величание.

Ублажаем тя, преподобно отче наш Амфилохие, и чтим святую память твою, наставниче монахов и собеседниче ангелов.
 

 

Акафисты zvonnitsa.ru/orthodoxy/akafisti/290/13744/

Кондак 1

Избранного чудотворца и светильника церкве Медиоланския святаго Амвросия, приидите, вернии, почтим по достоянию усердною хвалою. Ты же, угодниче Божий милостивый, приими с любовию сие приношение наше, да зовем ти:
Радуйся, Амвросие, святителю Христов и чудотворче.

Икос 1
Ангельских сил и всея твари Содетель, еще от младенческих пелен твоих предуказавый доброту души твоея, святе Амвросие, подаде тя, в возраст пришедша, ангела церкви Медиоланстей, пастыря и учителя словесному стаду Своему, и сим научи нас звати тебе сице:
Радуйся, от колыбели младенческия на служение Церкви роем пчел предуказанный;
радуйся, ко святительству чрез немотствующаго младенца Богом призванный.
Радуйся, богатство, славу и почести мира презревый;
радуйся, единому Господу служити восхотевый.
Радуйся, апостолов Христовых достойных преемниче;
радуйся, архиереев святых преподобный сопрестольниче.
Радуйся, Амвросие, святителю Христов и чудотворче.

Кондак 2
Видя небесное промышление, совершившееся в чудном призвании твоем ко служению Церкви, премудре, посвятил еси прочее время жития твоего на угождение воли Божественней, и принесл еси всего себе и вся своя в жертву призвавшему тя Господу, поя ему: Аллилуия.

Икос 2
Разумом богопросвещенным, напоенным же от слова Божия, уразумев яко сонование всех добродетелей и союз совершенства духовнаго любы к Богу и ближнему есть, благочестне, потщался явития ю в себе не словом токмо, но делом и истиною. Темже бедствующим руку скорыя помощи простирал еси, имения своя вся убогим расточил еси, и тако наставил еси на звати тебе сице:
Радуйся, яко путем нестяжания апостольскаго шествовати возлюбил еси;
радуйся, яко все свое попечение на промысл Божий возложил еси.
Радуйся, милосердия яже во Христе подражателю;
радуйся, нищеты его дольния добровольный последователю.
Радуйся, меньших братий Христовых друже и благодетелю;
радуйся, скорбящих и озлобленных скорый утешителю.
Радуйся, Амвросие, святителю Христов и чудотворче.

Кондак 3
Силою Вышняго укрепляем, преподобне, труды и скорби великаго служения святительскаго на пользу церкве Медиоланския, во славу же Господа Иисуса, благодушно понесл еси, о всех же благословлял еси Бога, поя Ему: Аллилуия.

Икос 3
Имея жезл силы, крепость евангельскую, посланную ти от Сиона небеснаго, святителю, господствовал еси посреде врагов твоих и не дал еси волком ходящим во овчих кожах, в сердце же носящим яд пагубы, расхитити стадо твое. Темже похвальная восписуем ти сия:
Радуйся, слуго Спаса вернейший;
радуйся, страже дому Божия бдительнейший.
Радуйся, пастырю Христов честнейший;
радуйся, поборниче веры, во прениих с ересеучительми мудрейший.
Радуйся, злочестия арианскаго потребителю;
радуйся, правых догматов насадителю.
Радуйся, Амвросие, святителю Христов и чудотворче.

Кондак 4
Бурю крамолы, воздвигшуюся на церковь Медиоланскую, зря, Амвросие, сладкоглаголивую беседою твоею, содействием же Божиим утишил еси мятеж людский, и тако научил еси чад мира пети Богу: Аллилуия.

Икос 4
Слыша Феодосий царь прещение твое, имже возбраняшеся ему яко убийце внити в церковь Божию, во еже приобщитися Тайн святых, повиновася ти, яко грешник смиренно кающийся и примирения с Господом жаждущий. Того ради по достоянию возглашаем ти:
Радуйся, Таин Божиих мудрый строителю;
радуйся, постановлений отеческих верный хранителю.
Радуйся, Нафану и Предтечи соревнителю;
радуйся, законопреступных нелицемерный обличителю.
Радуйся, наставниче покаяния и исправления;
радуйся, церкве Медиоланския неумирающая слава и украшение.
Радуйся, Амвросие, святителю Христов и чудотворче.

Кондак 5
Боготечная звезда на тверди церковней был еси, отче Амвросие, светлостию учения и жития твоего мглу ересей разгоняющая и мрак безбожия потребляющая, неверных от тьмы неверия к свету невечернему привлачающая и всех ко спасению путеводящая, поющим Богу: Аллилуия.

Икос 5
Видевше тя медиоланстии людие мудраго пестуна и любвеобильнаго отца пастве своей, святителю, притекаху к милосердию твоему во всех скорбех и нуждах своих. Ты же, милостиве, никогоже отринул еси, но всем всяк помощник был еси, достойный сицевых похвал:
Радуйся, сирых покровителю;
радуйся, обидимых защитителю.
Радуйся, плененных от варвар искупителю;
радуйся, от козней сатанинских свободителю.
Радуйся, яко достойно сладостное имя носил еси;
радуйся, яко воистину сладостен наставник и пособитель всем был еси.
Радуйся, Амвросие, святителю Христов и чудотворче.

Кондак 6
Проповедник вещаемых ти от ангел к уху глаголов Божиих был еси, святителю Амвросие, темже словеса уст твоих паче меда и сота услаждаху всех послушающих тебе и Богу вопиющих: Аллилуия.

Икос 6
Возсия аки солнце свет добродетельнаго жития твоего на земли, богомудре отче, в тебе бо зрим вся елика честна, елика праведна, елика пречиста. Сих ради славящее Святаго Духа, виновника благих, от силы в силу священнотайне ведшаго тя, зовем:
Радуйся, добродетелей евангельских пребогатое сокровище;
радуйся, всегдашних воздыханий и молитв яже к Богу пречестное святилище.
Радуйся, кротости и смирения боголепное жилище;
радуйся, терпения твердое хранилище.
Радуйся, церквей Божиих украсителю и пречудный поборниче;
радуйся, чистоты девственный учителю и неоскудный слез источниче.
Радуйся, Амвросие, святителю Христов и чудотворче.

Кондак 7
Хотя улучити спасение во мнозе совете, смиренномудре, имел еси друга души твоея пресвитера состаревшася и мудра, почитая его яко отца и с ним совешался о делех своих; вразуми и нас творити вся с советом богомудрых отцев, да окормлением их спасаеми, поем Богу: Аллилуия.

Икос 7
Знамение евангельския любве к ближнему явил еси, отче Амвросие, егда врагом своим благотворил еси и со грешники кающимися горько плакал еси. Темже ти яко непамятозлобному пастырю и отцу, болезновавшу о спасении духовных чад твоих, вопием:
Радуйся, незлобия Христова подражателю;
радуйся, кающимся грешником теплый сострадателю.
Радуйся, Иустине, враждовавшей ти, благотворивый;
радуйся, злодею твоему руку усохшую исцеливый.
Радуйся, яко весь кротость и любовь был еси;
радуйся, яко высоты совершенства достигл еси.
Радуйся, Амвросие, святителю Христов и чудотворче.

Кондак 8
Странныя и дивныя силы перст Божий сотвори в житии твоем, святителю, егда умерша отрока воскреси тобою, разслабленную исцели, арианина, почитания ради святых мощей хулившаго тя, бесу преда, безстудную жену сирмийску уничижившую тя, карою порази. И кто от слышащих вся сия не прославит дивнаго в житии твоем Бога песнию: Аллилуия.

Икос 8
Весь исполнен быв ревности по Бозе, отче Амвросие, таковую власть над демоны стяжал еси, яко ниже к дверем дому твоего приблизитися можаху: огнь бо исходяй оттуду гнаше их, яко прах, егоже возметает ветр от лица земли. Толико страшный демоном угодниче Божий, огради и нашу немощь предстательством твоим от губительных стрел их, да вопием ти сицевая:
Радуйся, от козней лютаго миродержца крепкий верных хранителю;
радуйся, от злобных слуг его, зияющих пожрети ны, верный наш обличителю.
Радуйся, яко пламень лица бесов попаляющий;
радуйся, яко гром кичение падшаго денницы поражающий.
Радуйся, всю силу его силою крестною поправый;
радуйся, нечистых духов от притекающих к тебе отгоняй.
Радуйся, Амвросие, святителю Христов и чудотворче.

Кондак 9
Все житие наше во юдоли земнаго странствования сего исполено безчисленных искушений и бед, грехов и страстей, воюющих на ны: како убо избыти возможем вечных мук, окаяннии, егда постигнет нас смерть неумолимая, аще не ты, отче, с надеждою нашею Богоматерию, предстательствовати за ны будеши, поя Богу: Аллилуия.

Икос 9
Ветия многовещанныя видим тобою посрамленныя, святителю: Ария бо хульных последователей препрел еси, Симмаха высокоумнаго низложил еси, мудрецы, иже от востока, глубиною богословия своего удивил еси, и вся верныя учением истинным просветил еси. Темже молим тя: осияй и нас светом богоразумия твоего, да отбегше скверн тлетворнаго духа времене и соблазнов борителя, вопием ти:
Радуйся, душ наших просветителю;
радуйся, веры православныя поборниче.
Радуйся, велений Божиих учителю;
радуйся, плевел вражиих, всеваемых в души спящих человек, искоренителю.
Радуйся, яко многих колеблемых неверием в правой вере укрепил еси;
Радуйся, яко догмат о единосущном и равночестном Отцу и Духови Божестве Сына уяснил еси.
Радуйся, Амвросие, святителю Христов и чудотворче.

Кондак 10
Спасение совершенное улучив от привременных бурь и бед, угодниче Божий Амвросие, не забуди нас, потопляемых напастей бурею. Но в нихже сам искушен был еси, и нам искушаемым помози, да поем Богу: Аллилуия.

Икос 10
Стену тя твердую и известно утверждение граду твоему и всем чтущим память твою исповедающе, святителю, дерзаем по достоянию воспети тебе хваление сие:
Радуйся, царей бранелюбивых умиротворителю;
радуйся, благоденствия отечественнаго хранителю.
Радуйся, яко тобою царю Гратиану победа на готы даровася;
радуйся, яко тобою многим мир от Феодосия исходатайствовася.
Радуйся, яко тобою прощение грехов улучаем;
радуйся, яко тобою от бед спасаеми, мир с Богом обретаем.
Радуйся, Амвросие, святителю Христов и чудотворче.

Кондак 11
Песнь «Тебе Бога хвалим, Тебе Господа исповедуем…» паче всякаого воздушнаго органа услаждающую верных, воспел еси в честь Божественней Троице, святителю. Ныне же в Церкви небесней поеши со ангелы ину песнь тойжде Троице: Аллилуия.

Икос 11
Светоподательна светильника, еще на земли просиявша невещественным светом, ведуще тя, отче святый, кую достойную похвалу принесем ти грешнии, коею песнию ублажим тя недостойнии, о святителю Христов. Един токмо сведый глубины сердечныя и рекий: «Аз прославляющия Мя прославлю», – един Он весть, како по достоянию прославити тя. Обаче ведый, яко человек, нашу немощь, не отрини яко отец милостивый, и наша убогия, но от искренних сердец приносимыя ти хвалы сия:
Радуйся, ангеле земный, еще на земли светом невещественным озаренный;
радуйся, человече небесный, еще во плоти лицезрением сладчайшаго Иисуса почтенный.
Радуйся, светильниче божественнаго света, учением своим мира концы озаривый;
радуйся, луче мысленнаго Солнца, теплотою любве своея вертоград Его ожививый.
Радуйся, звездо, твердь церковную светло украшающая;
радуйся, позвало и доныне Медиолан осиявающая.
Радуйся, Амвросие, святителю Христов и чудотворче.

Кондак 12
Благодатию небеснаго покрова твоего не лиши нас никогда, о милостиве отче, но присно молися о нас к щедрому Господу, Емуже с лики святых немолчно поеши: Аллилуия.

Икос 12
Поюще чудеса и подвиги преподобнаго жития твоего, святителю, славим кончину твою, еюже мирно отшел еси на небо, и ублажаем соцарствование тове тамо с Богом вечным. Ты же, угодниче святый, призри с высоты онаго блаженнаго пристанища твоего на нас, плавающих в молве житейских попечений и к тебе, невидимому окормителю нашему, из глубины души вопиющих:
Радуйся, плавание свое в житейском мори добре свершивый и безценное сокровище веры в безднах его не потопивый;
радуйся, ко пристанищу райскому безбедно приплывый и венец нетленный от Христа улучивый.
Радуйся, яко тамо ликовствуя, и нас, долу сущих, любовию твоею досязаеши;
радуйся, яко духом твоим нам выну спребываеши.
Радуйся, яко тобою гнева Божия избавляемся;
радуйся, яко мольбами твоими к пристанищу горнему направляемся.
Радуйся, Амвросие, святителю Христов и чудотворче.

Кондак 13
О святый и милостивый угодниче Божий Амвросие! Приими с любовию приносимое сие малое, но от усердия приносимое тебе хваление наше, и потщися избавити нас от болезней душевных и телесных, от всех бед и зол, да тобою улучившее царство небесное, во веки поем Богу: Аллилуия.

Этот кондак читается трижды, затем 1-й икос и 1-й кондак.

Акафисты zvonnitsa.ru/orthodoxy/akafisti/
 

Кондак 1
Избранней от всех родов Пречистей Деве и Матери Бога, даровавшей нам дивное утешение - мироточивую Свою икону, благодарственное пение приносим Ти - Неискусобрачней. Ты же, яко Милостивая и Благая наша Заступница, услыши потщавшихся Тебе послужити и уневеститися Сыну Твоему. Испроси у Него нам прощение грехов, да неосужденныя на Суде Своем ны одесную поставит. Тебе же, яко Ходатаице нашей, Всеблагой Царице и Владычице, зовем: Радуйся, надеждо и прибежище наше, Твоею иконою нас утешающая.

Икос 1
Ангели и праведных души воспевают Тя непрестанно, Царицу всех, Богородице. Мы же, грешнии и непотребнии раби Твои, смиренно взирающе на пречистый образ Твой, во обители сей мироточением прославленный, с умилением взываем Ти сице: Радуйся, Избраннице предвечнаго Совета, Радуйся, Мати Создателя всяческих. Радуйся, Отроковице, вместилище Божественной благодати, Радуйся, Ковчеже златый, вместивший не токмо скрижали завета, но и Христа Господа. Радуйся, сподобившаяся неизреченныя благодати Богоматерию нарещися, Радуйся, израстившая Спасителя миру. Радуйся, первая поклоншаяся Отрочати, яко Богу и Создателю Своему, Радуйся, Царице небесе, Сама Ему служившая на земли. Радуйся, Царице, с Сыном Твоим вечно царствующая, Радуйся, Госпоже, с Господом вечно господствующая. Радуйся, горняго мира украшение, Радуйся, дольняго мира защищение. Радуйся, надежде и прибежище наше, Твоею иконою нас утешающая.

Кондак 2
Видевше дивное истечение мира от преславнаго Твоего образа, Пресвятая Дево, мы, аще и ленивии и грешнии, но на всяк день с верою и упованием прибегаем под пречистый покров Твой и тепле вопием: не отврати лица Твоего от нас, но, яко Благая, скоро услыши и в скорбех не остави ны, вопиющия Богу: Аллилуиа.

Икос 2
Разум подаждь нам достойно песньми восхвалити Тя, Пренепорочная Дево, яко многая чудеса от сия иконы явила еси, миро точащи от нея, многих болящих исцелила еси, бесы одержимых, - власти их свободила еси, и здрави быта. Темже убо прославляем Тя, святому образу Твоему покланяющеся и благодарственно вопиюще Ти: Радуйся, славою дивнаго врачевания образ Твой украсившая, Радуйся, благодать ему даровавшая. Радуйся, многих немощных исцелившая, Радуйся, бесных власти бесовския свободившая. Радуйся, прошения наша не отвергающая, Радуйся, истинно молитися нас научающая. Радуйся, прощати обидящим нас силы дарующая, Радуйся, любити враги наша научающая. Радуйся, ненависть и вражду искореняющая, Радуйся, посреде нас мир водворяющая. Радуйся, Царице небесе и земли, Радуйся, Госпоже всякаго создания. Радуйся, надеждо и прибежище наше, Твоею иконою нас утешающая.

Кондак 3
Силою, данною от Тебе, Владычице наша, честная Твоя икона источением мира цельбоносно прославися; и в сонном видении трикраты явилася еси старице, образ Твой имущей, и повелела еси его во обитель сию, яко место Твое избранное, даровати. Мы же, видяще дивная от Тебе, смиренно припадаем пред чудотворною Твоею иконою, восхваляюще Тя, яко Матерь Бога нашего, Емуже поем: Аллилуиа.

Икос 3
Имущи богатую милость и теплую любовь к людем, искупленным Кровию Сына Твоего, Владычице, Ты насельниц обители Твоея в годину скорби выну внимала еси слезным мольбам, вопиющих: Радуйся, уповающим на милость Твою помогающая, Радуйся, в смирении молившихся возвеличившая. Радуйся, милостей небесных Подательнице, Радуйся, Материнское попечение о нас имущая. Радуйся, Своими молитвами от бед избавляющая, Радуйся, Твоим предстательством от напастей скоро изымающая. Радуйся, славити покров Твой научающая, Радуйся, хвалити Тя выну побуждающая. Радуйся, милосердием сердца согревающая, Радуйся, от вечной погибели извлекающая. Радуйся, надежде и прибежище наше, Твоею иконою нас утешающая.

Кондак 4
Имущая небесную милость к роду человеческому, Пресвятая Владычице, не оставила еси обитель сию во дни скорбей и напастей, слезно молившихся избавила еси от злых искушений. Темже благодарственно взываем Богу: Аллилуиа.

Икос 4
Слышавше весть о скорби грядущей, насельницы обители Твоея, Владычице, все упование на Тя возложиша и, к чудотворной иконе Твоей притекающе, слезные мольбы вознесоша Ти, смиренно просяще: Радуйся, Путеводительнице, шествовати по пути благочестия рабом Твоим помогающая, Радуйся, в добрых делех преуспевающих укрепляющая. Радуйся, обитель Свою от напастей охраняющая, Радуйся, злая начинания расторгающая. Радуйся, послушанию старшим нас научающая, Радуйся, умы наша от заблуждений на путь правый направляющая. Радуйся, душевредныя замыслы разрушающая, Радуйся, житие наше на земле устрояющая. Радуйся, к Царствию Небесному путь нам показующая. Радуйся, надеждо и прибежище наше, Твоею иконою нас утешающая.

Кондак 5
Пресветлей звезде уподобися Твоя икона, егда сия миро источи, еже и доныне хранимо на образе Твоем, яко залог Твоея благодати и силы с образом сим, к немуже мы, припадающе, наше усердное моление Ти приносим: не презри нас, требующих Твоея помощи, умягчи противу нас враждующая сердца и любовию Христовою согрей, да во утешении духовнем Сыну Твоему зовем: Аллилуиа.

Икос 5
Видевше икону Твою, о Госпоже Богомати, чудесы прославленную, страха и радости исполнихомся, уразумевающе, яко в сем явлении бысть Твое к нам благоволение. Сего ради поклоняемся Ти и, лобызающе образ Твой, со благодарением взываем Ти сице: Радуйся, сосуде златый мира многоцелебнаго, Радуйся, сокровищнице драгая, на всяк недуг врачевство содержащая. Радуйся, многоцелебный чудес источниче, Радуйся, неисчерпаемыя благодати Ходатаице. Радуйся, Церкви Святей и обителем утверждение, Радуйся, святителей православных укрепление. Радуйся, всех верных удобрение, Радуйся, грешником страх и посрамление. Радуйся, скорая помощнице борющимся со страстьми и похотьми, Радуйся, Облаче росоносный, погашающий пламень вожделений греховных. Радуйся, Судии Праведнаго умоление, Радуйся, грехов наших прощение. Радуйся, надеждо и прибежище наше, Твоею иконою нас утешающая.

Кондак 6
Проповедует Святая Церковь о величии Твоем, Пресвятая Дево, и светло красуется Твоими чудотворными иконами, явленными по всей вселенней. Сия же Твоя икона, яко звезда пресветлая, сияет в храме сем, пред неюже мы повержени, усердно молим: не остави в суете скорбей страну нашу, но светом истиннаго Богопочитания просвети, Церковь Святую в ней возвеличи и мир ей ниспосли, да, осияннии Тобою, поем Богу: Аллилуиа.

Икос 6
Возсияша, яко пресветлыя звезды, Твоя чудотворныя иконы, освещающия вси концы земли и светом боговедения озаряющия умы, пред нимиже выну преклоняяся, Тя величаем и неседальное Ти поем: Радуйся, Заступнице усердная рода христианскаго, Радуйся, нечаянную радость верным дарующая. Радуйся, Всеблагая Скоропослушнице, прошения наша во благо исполняющая, Радуйся, похвало наша и всего мира надежде и утешение. Радуйся, Радосте наша, покрывающая нас от всякаго зла, Радуйся, Царице Богородице, надежде и прибежище наше. Радуйся, благодатная Богородице Дево, всех скорбящих Радосте, Радуйся, помощнице наша, молящимся пред иконою Твоею помогающая. Радуйся, благая Вратарнице, двери райския верным отверзающая, Радуйся, Христианом Помощнице и милосердная о грешных Предстательнице. Радуйся, благодатная Купино Неопалимая, огненнаго запалення нас сохраняющая, Радуйся, Радосте наша, от всякаго зла нас избавляющая и печали наша утоляющая. Радуйся, надежде и прибежище наше, Твоею иконою нас утешающая.

Кондак 7
Хотящим быти наследниками мира горняго человеколюбивый Господь, имеяй милостей и щедрот бездну, Тебе нам - Матерь Свою - в покров и защиту дарова, да ходатайствуеши присно за ны пред Сыном Твоим и Судиею нашим, Емуже вопием: Аллилуиа.

Икос 7
Новы и вечны обители уготованы любящим Сына Твоего. Мы же, немощию плоти обложени, преступивше заповеди Его, впадше во грехи и далече от сих обителей сотворшеся, к кому убо прибегнем, аще не к Тебе, о Богородительнице? Ты - наша защита и, Тя величающе, поем: Радуйся, у Престола Божия теплая о нас предстательнице, Радуйся, ищущим спасения душевнаго Ходатаице. Радуйся, от небесных высот к земнородным милостиво приникающая, Радуйся, чтущих Тя прошения скоро исполняющая. Радуйся, на стропотнем пути греха стоящим вразумление подающая, Радуйся, искушаемым от диавола скорую помощь являющая. Радуйся, грешныя на покаяние наставляющая, Радуйся, всех шествовати ко спасению направляющая. Радуйся, спасительных благ небесных и земных подательнице, Радуйся, душевных и телесных недугов наших целительнице. Радуйся, яко Тобою от внезапныя смерти сохранени быти чаем, Радуйся, яко Тобою обитель вечну на небеси получити уповаем. Радуйся, надежде и прибежище наше, Твоею иконою нас утешающая.

Кондак 8
Странники и пришельцы есмы на земли, бурею страстей одержими, паки к кому прибегнем в скорбех странствия нашего, аще не к Тебе, чадолюбивая Мати, при Кресте Сына Твоего нас всех усыновившая. Не отвержи, не рцы нам: «Не вем вас, грех ради ваших», - но, яко удобь послушливая, в скорби и в печали утешающая, защити, спаси, помилуй Царю славы Христу вопиющих: Аллилуиа.

Икос 8
Весь мир христианский блажит Тя, Матерь Божию, и все упование на Тя возлагает: мы же, зряще Твою чудотворную икону, яко сокровище многоценное, со гласом радования поем: Радуйся, при Кресте Сына Твоего всех нас усыновившая, Радуйся, пречистыя язвы Его слезами Своими омывшая. Радуйся, по Бозе - Царе царствующих - Богородице Царице, Радуйся, яблоко благовонное в Христовой деснице. Радуйся, в странствии нашем тихое пристанище, Радуйся, в стране сей наша скорая помощнице. Радуйся, чистоте и целомудрию нас научающая, Радуйся, кротости и смирению нас наставляющая. Радуйся, унывающих благодатное ободрение, Радуйся, изнемогающих внезапное подкрепление. Радуйся, мрак душ наших благодатно просвещающая, Радуйся, в милости к страждущим никогдаже оскудевающая. Радуйся, надежде и прибежище наше, Твоею иконою нас утешающая.

Кондак 9
Всякия утоли болезни, и бурею житейскаго моря потопляемых к тихому пристанищу приведи; нас же, мирский мятеж оставлыпих и Ангельский образ на рамо свое возложших, яко зело любящая, от блата страстей возведи: отверзи двери милосердия Твоего и в чертог славы Сына Твоего нас введи, да с лики Ангельскими поем Ему: Аллилуиа.

Икос 9
Витийствующий язык не может восхвалити Тя, недоумеет воспети величия Твоего и чудес по достоянию, обаче, Благая, и скудоумныя наша песни прийми, Тебе поющих: Радуйся, Заступнице, от навета клеветническаго нас защищающая, Радуйся, поношения от человек нас избавляющая. Радуйся, яко образ Твой благоволи Бог прославити чудесы, Радуйся, яко взирающим на него с верою сей благодать дарует. Радуйся, в созданием храме, на прославление имени Твоего, незримо обитающая, Радуйся, яко никтоже, в нем с верою моляся, тощь и неуслышан исходяше. Радуйся, Пресветлая Звездо, на путь ко спасению. Радуйся, нищету иноческую до конца хранити научающая. Радуйся, с небесных высот на мольбы наша призирающая, Радуйся, предстательством Твоим безконечныя жизни сподобляющая. Радуйся, коегождо прошения предварити тщащаяся, Радуйся, и самых отчаянных грешников моления не отвергающая. Радуйся, надежде и прибежище наше, Твоею иконою нас утешающая.

Кондак 10
Спасти хотящи люди от всяких бед и скорбных обстояний, притекающим под Твой покров ниспосылавши Твоя богатыя милости. И икону Свою чудотворную даровала еси обители сей, яко залог непрестаннаго о ней Твоего попечения, на нюже мы взирающе, и на руку Твоею сидящему Богомладенцу поем: Аллилуиа.

Икос 10
Стена еси нерушимая и покров иночествующим, красоты мирския оставившим и крест на рамо свое вземшим, и крепкое заступление всем к тебе прибегающим, образ Твой почитающим и Тебе поющим: Радуйся, стено и покрове к Тебе прибегающих, Радуйся, Отрадо утешения чающих. Радуйся, иночеству благоскорбящему подательнице вечнаго радования, Радуйся, благоподвизающимся им - Ходатаице спасения. Радуйся, возбраняющая грехом нашим, Радуйся, гласом моления Твоего отражающая грехи наша, вопиющия на ны к Богу. Радуйся, всегда Матернюю любовь к обители сей являющая, Радуйся, оскудение брашен в ней чудесно восполняющая. Радуйся, во дни тяжких испытаний обители не оставляющая, Радуйся, в плену и изгнании насельниц ея дивно заступающая. Радуйся, неправедно гонимых и обидимых защитнице, Радуйся, гонящих и обидящих правосудная наказательнице. Радуйся, надежде и прибежище наше, Твоею иконою нас утешающая.

Кондак 11
Пение сугубое и всеусердное дерзаем принести Тебе, но оскудевает слово, недоумевает ум, како глаголати. Веси бо, яко от полноты любве и усердия приносим Ти сицевая. Ты же, Пречистая, просвети ум наш и Сама научи непрестанно пети Богу: Аллилуиа.

Икос 11
Светоприемная свеща, любовию к Богу горящая, просвети и наша ожесточенная сердца и любовию к Богу и ближним воспламени, да Тебе поем: Радуйся, слезам покаяния добрая учительнице, Радуйся, множество душ уневестившая Христу. Радуйся, живущих в обители сей подкрепляющая, Радуйся, благопромышление о ней являющая. Радуйся, Православия крепкая стено, Радуйся, сего единая защитнице. Радуйся, душам огорченным утешения духовнаго подательнице, Радуйся, обителей иноческих неусыпная блюстительнице. Радуйся, во обитель райскую душею Твоею руками Господа вознесенная, Радуйся, яко всеми Ты прославлена. Радуйся, в грозный час смерти всем нам крепкая защитнице, Радуйся, добраго ответа нам пред Судиею Праведным усердная Ходатаице. Радуйся, надеждо и прибежище наше, Твоею иконою нас утешающая.

Кондак 12
Благодать и милость испроси нам у Сына Твоего и Бога, Егоже родила еси несказанно, Человеколюбивая Владычице! В терпении в бедах утверди, братолюбие ниспосли нам и памятозлобия избави, да, радующеся милосердию Твоему, велегласно поем Господеви: Аллилуиа.

Икос 12
Поюще Тя, милосердную нашу Покровительницу, иконою мироточивою милость Свою нам являющую, яко єдину надежду и прибежище Тя имуще, чистым сердцем Тебе хвалу приносим: Радуйся, трилетствовавшая Отроковице, в храм Божий со славою введенная, Радуйся, от Архангела Гавриила о зачатии Сына и Бога извещенная. Радуйся, Царя Христа во спасение человеков рождшая, Радуйся, Чистейшая, закон очищения исполнившая. Радуйся, многих грешников ожесточенное сердце умилившая, Радуйся, пришествием в землю Египетскую рукотворныя идолы сокрушившая. Радуйся, Сына Своего, распята на Кресте, рыдавшая, Радуйся, Жизнь, во гробе положенную, недоуменно зревшая. Радуйся, язвы Сына Твоего в сердце носившая, Радуйся, глубиною страдания и терпением всю тварь удивившая. Радуйся, первее всех воскресение Сына Твоего узрети сподобившаяся, Радуйся, прежде всех беседы Его насладившая. Радуйся, надеждо и прибежище наше, Твоею иконою нас утешающая.

Кондак 13
О Всепетая Мати, пресветлая звездо, Солнце Правды - Христа нам явльшая! Приими ныне пред Твоею иконою смиренно приносимая нами Тебе моления. Избави нас напастей всех и вечныя муки своботи, да во обителех райских вечно поем Богу: Аллилуиа, Аллилуиа, Аллилуиа.
http://www.zvonnitsa.ru/orthodoxy/akafisti/279/13691/

96101099.39463928.1281641810.1209112143a163dd05533f3dca6d1524

 Православный портал Звонница. Каталог православных сайтов

zvonnitsa.ru/content/links/
 

Православный портал Звонница. Православный каталог.

zvonnitsa.ru/content/links/

zvonnitsa.ru/orthodoxy/akafisti/

 Кондак 1
     Избранный угодниче Христов и великий в скорбех помощниче, праведный отче Алексие! К тебе яко к теплому предстателю мы грешнии со дерзновением притекаем и умильно взываем: умоли о нас всесильнаго Бога, не попустити нам блуждати по распутиям греховным, но просветити и наша сердца духом твоея любве, да зовем ти:
     Радуйся, праведный старче Алексие, утешителю благостный.
 

     Ангелов Творец яви в рождении твоем молитвенное заступление святителя Филарета, егда, не могущу матери разродитися тобою, родитель твой притече к нему, и того молитвою явлен был еси в мир сей во время совершения Божественныя Евхаристии, показуя тем, яко будеши великий служитель таинств церковных. Сего ради взываем ти:
     Радуйся, святителем Филаретом благословенный и воспитанный;
     Pадуйся, от пелен того подвижническому житию научивыйся.
     Радуйся, отрасль родителей пречестных, плод благий принесшая;
     Pадуйся, яко издетска гласом своим Бога прославлял еси.
     Радуйся, благоговение и любовь ко службам Божиим от отца унаследовавый;
     Pадуйся, от матери твоея странноприимство и попечение о ближних восприявый.
     Радуйся, ушеса своя к пению церковному от рождения приклонивый;
     Pадуйся, во еже не видети суеты, очеса своя в горняя вперивый.
     Радуйся, праведный старче Алексие, утешителю благостный.

     Видя Человеколюбец Господь широту сердца твоего, готоваго послужити ближним своим, яви в благословении матери твоея волю Свою, да будеши не врач телес, но пастырь Церкви Христовы, врачуяй души притекающих к тебе, темже вси людие, видяще образ добраго пастырствования твоего, воззовут Богу: Аллилуиа.

     Разумом Божественным просвещен, узрел еси путь спасения во отсечении воли своей, егда поставлен был еси причетником во храм Богоматере, с велием терпением восприял еси суровство начальствующаго и тако возрастил еси в сердце твоем плод Христова смирения. Многолетнее твое терпение славяще, возглашаем ти тако:
     Радуйся, послушниче усердный;
     Pадуйся, яко Богу работал еси неленостно.
     Радуйся, укорения и поругания, яко Божие изволение, восприявый;
     Pадуйся, осуждати и укоряти других всегда избегавый.
     Радуйся, поучавый обличающих нас яко благодетелей почитати;
     Pадуйся, призывавый ради блага ближних своих себе утесняти.
     Радуйся, благим супружеством своим и нам образ честнаго брака явивый;
     Pадуйся, в супружнице твоей добраго помощника на пути Христовом обретый.
     Радуйся, праведный старче Алексие, утешителю благостный.

     Сила Вышняго обрете в тебе сосуд честен и по посвящении во иерея продолжаше вести тя чрез горнило испытаний. Служил бо еси не в веси дальней, якоже хотяше, но во граде Москве, в церкви малаго прихода, идеже осемь лет богомольцев не имев, николиже возроптал еси. Ныне же предстоиши со дерзновением Престолу Божию, поя песнь: Аллилуиа.

     Имея тщание к совершению служб церковных, на кийждо день служение Божественныя Литургии учинил еси и к покрову Богоматери и заступничеству святителя Николая прибегая, весь путь жития твоего молитвою озарил еси. Сего ради воспеваем тя сице:
     Радуйся, служителю олтаря ревностный;
     Pадуйся, яко бодрствовал еси в молитвенном подвизе непрестанно.
     Радуйся, в Бозе все упование твое полагавый;
     Pадуйся, в долгих испытаниих непоколебим пребывый.
     Радуйся, яко крест на перси прияв, сраспинал еси Христу плоть свою со страстьми и похотьми;
     Pадуйся, яко получив епитрахиль на выю свою, Дары Духа Святаго неоскудно источал еси.
     Радуйся, яко поясом препоясав чресла своя, заутро на нивы делания Господня изшел еси;
     Pадуйся, яко взявся за рало Христово, не направлял еси вспять стопы твоя.
     Радуйся, праведный старче Алексие, утешителю благостный.

     Бурю моря житейскаго, сластолюбием, злобою и гордынею волнуемаго, всем житием твоим научал еси преплывати в кораблеце покаяния, да и мы, являя живую веру и трепетную любовь ко Господу, сподобимся воспевати Ему и на небесех песнь хвалебную: Аллилуиа.

     Слыша о богоугоднем житии твоем, начата прибегати к тебе ищущии спасения, обретая в тебе чадолюбиваго отца и утешителя, ты же неленостно поучал еси я покаянию и служению ближним самоотреченному. Темже и нас, якоже и чад твоих, научи истинному деланию на пажитех душ наших, да славим тя, благодаряще:
     Радуйся, в век оскудения благочестия несокрушимым сосудом веры явивыйся;
     Pадуйся, неленостным проповеданием в обмирщенная сердца семена благих деяний сеявый.
     Радуйся, глашатаю любве Божия всем скорбящим и отчаявшимся;
     Pадуйся, ожесточенных злобою любовию своею к покаянию обращал еси.
     Радуйся, научивый в живущих с нами образ Божий почитати;
     Pадуйся, призывавый почивших неустанно поминати.
     Радуйся, не отревая немощных, им по силе их делание полагавый;
     Pадуйся, в постоянстве малого делания залог духовнаго возрастания указавый.
     Радуйся, праведный старче Алексие, утешителю благостный.

     Звезда еси, на небесех святости возсиявшая, светиши светло, в сонме праведных и исповедников российских землю нашу просвещая, темже, зряще тя, праведный отче Алексие, прославляем прославльшаго тя Господа, зовуще Ему: Аллилуиа.

     Видя обильным любовию сердцем своим окрест тебе в нищете живущия, подавал еси им, елико имеяше, уповая, яко не оставит Господь и дом твой. Даждь и нам стяжати сердце милосердное и научи ны невозбранно внимати воле Божией, да восхваляюще глаголем ти сицевая:
     Радуйся, Христа бо возлюбив, не прилеплялся еси к сокровищам земным;
     Pадуйся, яко великий купец, небесное богатство стяжал еси.
     Радуйся, милосердием души наша обогащати научаяй;
     Pадуйся, некрадомое богатство душам верных испрошаяй.
     Радуйся, светом трисолнечным сердца человеческая просвещаяй;
     Pадуйся, выну о пользе душевной пекийся.
     Радуйся, рачителю целомудрия;
     Pадуйся, хранителю чистоты.
     Радуйся, праведный старче Алексие, утешителю благостный.

     Проповедал еси пастве своей покаяние и вкушение безсмертныя Трапезы Агнчи, да не взалчут более страстей, но восприимут мир и любовь Христову и поучаются любити ближних своих с самоотвержением и утеснением себе, да благо им будет, и да взывают радостно: Аллилуиа.

     Возсиял еси в первопрестольнем граде Москве глашатаем жизни неветшающия, древним отцем, в пустынех подвизавшимся, равный; людем, в суете пребывающим и различными злоучении прельщаемым, открывал еси любовь, милосердие и правду Божию. Таковому о тебе произволению Божию дивящеся, вопием ти:
     Радуйся, неустанный проповедниче любве к Богу и ближним;
     Pадуйся, яко вслед за апостолом наставлял еси друг друга тяготы носити.
     Радуйся, во граде яко в пустыни живый;
     Pадуйся, пустыню града богатством слез твоих оросивый.
     Радуйся, яко пожил еси в мире премирно;
     Pадуйся, яко и на земли выну предстоял еси Христу.
     Радуйся, ожесточенная сердца теплотою твоея любве возделавый;
     Pадуйся, и ныне помогаеши страждущим душевный покой обретати.
     Радуйся, праведный старче Алексие, утешителю благостный.

     Хотя Человеколюбец Господь поставити тя в трудную годину утешителем скорбящих и страждущих, посла тебе скорбь великую в тяжкой болезни и смерти супружницы твоея, да ничто уже земное не связует сердце твое, но да приложиши к ревности ревность и приимеши благодать на благодать, научая пети всех: Аллилуиа.

     Новый путь духоноснаго старчествования на стогнах града Москвы яви тебе Господь в словесех праведного Иоанна, пресвитера Кронштадтскаго, указуя, да восприимеши всю скорбь человеческую, яко свою, молитвою и теплотою любве сию врачуя. Темже и наша скорби отыми от нас, да радующеся, взываем ти:
     Радуйся, благодать кронштадтскаго светильника обильно восприемый;
     Pадуйся, яко врач искусный душ человеческих явивыйся.
     Радуйся, вставший на страже скорбных сердец человеческих;
     Pадуйся, от обращавшихся к тебе именование добраго пастыря стяжавый.
     Радуйся, заблудших овец к Пастыреначальнику приводивый;
     Pадуйся, от волков хищных тех неврежденно сохранивый.
     Радуйся, яко широтою любве твоея всех объял еси;
     Pадуйся, яко надежду на Бога полагати научал еси.
     Радуйся, праведный старче Алексие, утешителю благостный.

     Странноприимная деяния совершати тщашеся, учинил еси при храме приют чадом, не имущим родителей, назидая их словом и житием своим, да возрастая в благом попечении и любве, благодарственно воспевают Богу: Аллилуиа.

     Весь еси, праведный отче Алексие, николиже суетою связанный, посреде людей пребывая, выну Богу предстоял и работал еси. И нас, в суету погруженных, научи твоему в мире премирному житию, да усердно тебе воспоим:
     Радуйся, детскую младость души твоея сохранивый;
     Pадуйся, тою младая сердца к Богу приводивый.
     Радуйся, явивыйся сиротствущим чадолюбивая мати;
     Pадуйся, порождаяй души чад своих духовных для вечнаго живота.
     Радуйся, преизряднейший пастырю;
     Pадуйся, яко от скверн мира сего ограждатися чад своих научал еси.
     Радуйся, чтущим тя верный пред Богом ходатаю;
     Pадуйся, призывающим тя непреложное упование.
     Радуйся, праведный старче Алексие, утешителю благостный.

     Всем, притекающим к тебе в скорби, наставник изрядный явился еси, отче Алексие, подвизая людей к покаянию и самоукорению, терпению же в скорбех неистощимому, да за сие благодаряще, Богу поют: Аллилуиа.

     Витийствующий язык умолча, зря, како ты, старче Алексие, служение свое в простоте совершая и мудрость века сего посрамляя, всяку гордыню человеческую, яко прах от лица ветра, возметал еси. Сего ради похваляем тя сице:
     Радуйся, яко не хитросплетением словес, но силою правды Божия души призывал еси;
     Pадуйся, яко вознесенную гордыню века сего смирением сокрушал еси.
     Радуйся, словесы своими не крепость человеческую, но силу Божию являвый;
     Pадуйся, яко нестареющую мудрость евангельскую живу и действенну показавый.
     Радуйся, исполненный ревности по Бозе Вседержителе;
     Pадуйся, ревнителю уставов церковных.
     Радуйся, искусный властителю совести человеческия;
     Pадуйся, всем бе вся, да спасеши души, Богом тебе врученныя.
     Радуйся, праведный старче Алексие, утешителю благостный.

     Спасения от временных тягот поучал еси в переселении во слывшия хлебородными земли не искати, егда глад, мор и междуусобныя брани постигоша страну нашу. Заповедал еси жительства своего не оставляти и восприяти трудности яко наказание Божие, за умножение беззакония попущенное, Богу взывая: Аллилуиа.

     Стена непоколебимая упования на Господа явился еси, отче Алексие, яко скала крепкая сокрушая треволнение житейскае, малодушие и уныние в душах людей, к тебе прибегающих и с любовию зовущих ти:
     Радуйся, адаманте веры несокрушимый;
     Pадуйся, узревший с богомольцы храма пред годиною бедствии, како лияше слезы Богоматерь на чудотворней иконе Ея Феодоровской.
     Радуйся, разделивый с народом российским скорби, Богом низпосланные;
     Pадуйся, глад и хлад приявый яко наказание Божие.
     Радуйся, злато, в горниле скорбей очищенное;
     Pадуйся, надеждею на милосердие Божие страждущия души врачевавый.
     Радуйся, помощниче скорый;
     Pадуйся, призывающим тя в скорбных обстояниих щит и ограждение.
     Радуйся, праведный старче Алексие, утешителю благостный.

     Пение всеумиленное приносим ти, отче досточудне, прославляя блаженную кончину и погребение твое, молитвами первосвятителя и исповедника Тихона, Патриарха Всероссийскаго, напутствованное. Веруем, яко предстоиши в свете невечернем Престолу Пресвятыя Троицы, выну поя: Аллилуиа.

     Светозарным светильником явился еси, даров Божиих исполнен и умножаяй таланты, яже даде тебе всех Бог, в житии бо твоем являл еси дары прозрения и исцеления, подвизая нас глаголати тебе похвалы сия:
     Радуйся, яко от детских лет был еси Господу верен;
     Pадуйся, многих дарований от Него сподобивыйся.
     Радуйся, луче благодати, в мире явленная;
     Pадуйся, ризами света Христова одеянный.
     Радуйся, помогий обрести сына отчаявшейся матери из града Тобольска, юже к тебе преподобный Серафим направи;
     Pадуйся, яко и ныне в трудных обстояниях о нас к Богу ходатайствуеши.
     Радуйся, прозорливостию и чудотвореньми люди в вере стояти утвердивый;
     Pадуйся, отеческим попечением и молитвою не имевшия веры души к Богу обративый.
     Радуйся, праведный старче Алексие, утешителю благостный.

     Благодати исполнен, яко сосуд Духа Святаго избранный, породил еси духом многая чада твоя, да зряще житие их, окрест живущии уразумеют, яко любовь в Бозе к ближнему залог мира и благоденствия есть, и тако благодарственно воззовут Богу: Аллилуиа.

     Поюще житие твое и прославление, веруем, яко многомощно есть пред Престолом Владычним твое за ны ходатайство, мощи же твои сокровище многоценное имуще, к ним припадаем, яко к сосуду благодати неистощимому, и согласно ублажаем тя:
     Радуйся, гражданине Иерусалима небеснаго;
     Pадуйся, благий наставниче, возрастивый в чадех своих преславных отцев.
     Радуйся, яко был еси на земли храм живый, Господу посвященный;
     Pадуйся, яко предстоиши днесь Престолу Вседержителя.
     Радуйся, старцев оптинских собеседниче;
     Pадуйся, кронштадтского светильника сомолитвенниче.
     Радуйся, яко община твоя образ бысть купножительства христианскаго;
     Pадуйся, яко чада твоя свидетельством кровей своих Христа исповедаша.
     Радуйся, праведный старче Алексие, утешителю благостный.

     О предивный пастырю и теплый о нас к Богу молитвенниче, праведный отче Алексие! Не отрини нас немощных, совершающих похвальное пение сие, и научи волю Божию невозбранно творити, да сподобимся и в будущем веце благодарственно воспевати Творцу и Богу нашему: Аллилуиа.

     К тебе, о праведный отче Алексие, мы, грешнии и недостойнии, притекаем и со умилением взываем ти: призри ныне милостивно с высоты святыя своея на Отечество наше и нас, тя прославляющих. Приявший в житии своем тяготы людей и сердцем милующим понесый скорби их, приими в молитвенное твое предстательство и нас, грехи многими обремененных и суетою мира сего утружденных. В тебе, о дивный старче, прославися Господь, явив тя таинником милости Божией. Тя призываем неотступно: буди врач душам и телесем нашим, унывающим — утешитель, малодушным дерзновение низпосли, помраченных злобою всепрощению научи, воздержанию способствуй. Воспламени, благий делателю винограда Христова, хладная сердца наша ревностию служения твоего, научи молитве непрестанной и деятельной любве с утеснением себе ради блага ближних наших. Укрепи молитвами твоими чада Церкви нашея, да поживем в любве и мире, а вне ограды церковныя пребывающии да уразумеют Христову истину и вкупе с нами прославят Животворящую и Нераздельную Троицу и твое милостивное предстательство во веки веков. Аминь.

     О всечестный и преблаженный отче наш Алексие, дивный старче Московский и всея Церкви Российския похвало и радование! Велию любовь ко Господу имея, заветы евангельския непреложно исполняя, душу твою за паству полагал еси, милующим сердцем болезнуя о всех, просящих твоея помощи. Приими малое сие моление наше, и яко в земном житии твоем отирал еси всяку слезу, облегчал еси всяку скорбь, так и ныне, милосердый молитвенниче и ходатаю наш, возьми тяготы, болезни и скорби наша, исполни страждущая сердца радостию, умоли человеколюбца Бога о прощении безчисленных прегрешений наших, да очистив душу покаянием, к деланию доброму приступим. Ей, старче благий, буди и нам пастырю добрый, наставляя на стезю спасения, да молитвами твоими безпорочно прейдем путь жития нашего и обрящем Отечество Небесное, идеже ты со ангелы и всеми святыми предстоиши Престолу Святыя Троицы, славяще Безначального Отца со Единородным Его Сыном и Пресвятым, и Благим, и Животворящим Его Духом во веки веков. Аминь.

     О всечестный и преславный священномучениче Сергие, святости отеческия наследниче, веру православную во страданиях и до смерти исповедавше, богословия истиннаго действенный поборник и учитель явился еси. Темже велие дерзновение ко Господу имея, испроси и нам подати благодать и крепость во испытаниях, разумети премудрость велию писаний святоотеческих и божественныя службы премирность. Аминь.

     О всечестнии и преславнии пастыри наша, праведный Алексие, старче Московский, и священномучениче Сергие! К вам, о чадолюбивыя предстатели и заступницы наша, со умилением припадаем и, величая труды, болезни и страдания ваша, молим: призрите на ны, унывающия, немощныя, и всесильными молитвами вашими вся злая от нас отвратите. Сподобите и нас подражати вере, терпению и любве вашея; испросите, о всеблаженнии, у Всещедраго Бога оживотворити благодатию души наша, да со упованием непреложным на милость Его течем на предлежащий подвиг спасения души и да сподобимся унаследовати Царствие Небесное и тамо вкупе в радости безконечней воспевати в Троице славимаго Бога во веки веков. Аминь.

 

http://zvonnitsa.ru/orthodoxy/akafisti/

Кондак 1
Избраннии и всехвальнии страстотерпцы Христовы Борисе и Глебе, благословеннии чада просветителя нашего равноапостольнаго Владимира, от идольскаго нечестия в чудный свет веры Христовы пришедший, и кровь проливший за веру во Христа Бога нашего, похвальная пения вам приносяще, мы, недостойнии, во гресех и скорбех наших прибегаем к вашему заступлению, вы же яко дерзновение имущии ко Господу, молите Его, Всеблагаго Царя Славы, даровати милость почитающим святую память вашу и во умилении сердца поющих вам: Радуйтеся, Борисе и Глебе, великии и славнии страстотерпцы.

Икос 1
Ангельски поживше на земли, венец мученический улучили есте, святыя братия по плоти Борисе и Глебе, все бо упование свое возложивши на Господа, от руки братней, яко овчата незлобивая, заклани бывше, всех себе, своя души и юная телеса Господу предали есте; сего ради, ублажая всечестную вашу память, от всей души нашея воспеваем вам:
Радуйтеся, незлобивии агнцы, Господу, яко овча на заколение веденному, подражавшии;
Pадуйтеся, кротции голубие, заповедь Христову в кротости сохраншии.
Радуйтеся, от руки брата по плоти смерть без ропота приявшии;
Pадуйтеся, Авелю ветхозаветному, рукою брата убиенному, уподобившиися.
Радуйтеся, венцем небесныя славы увенчаннии;
Pадуйтеся, онаго венца небеснаго мученьми достигшии.
Радуйтеся, Борисе и Глебе, великии и славнии страстотерпцы.

Кондак 2
Весть о кончине отца своего великаго Владимира слышавши, святый князь Борис много плакашеся, глаголя: «Увы мне, отче мой, свете очию моею, сияние и заре лица моего, увы мне, како зашел еси свете мой, не бывшу мне при твоем скончании, да сам бы честное твое погребл тело, почто не сподобился лобызати честная седины твой, отче мой». Таковым рыданием много тужаше на брезе реки Альты, идеже стояше с воинством; во время же сие Святополк, Каину подобный, брат сый, умышляше: погублю братию мою всю и единовластвовати буду. Собра же убийцы, повеле им убити тебе, святый Борисе; ты же сего лукаваго брата своего почитал еси, воздавая честь ему, яко старейшему, и смерть от него прияв, Богу за вся воспевал еси: Аллилуиа.

Икос 2
Разум Божественный испроси нам, святый Борисе, еже подражати, якоже и ты, Господу рекшему: «Не убойтеся убивающих тело, души же не могущих убити», и в саду Гефсиманстем волею в руце мучителей вдавшемуся, ты бо, всеблаженне страстотерпче, не сопротив стал еси врагу твоему, и по услышании яко хощет тя убита, стоящу бо ти на Альте реце рекоша киевский бояре: «Гряди в Киев и сиди на престоле отчем, се бо и вои отчии с тобою суть», ты же рекл еси им: «На старейшаго брата не иду, его же, яко отца имам». Слышавше убо сия, разыдошася вои, точию ближняя слуги осташася с тобою, с ними же и шел еси ко брату твоему Святополку еже поклонитися яко старейшему князю; сретше же на сем пути твоем вестник некий глаголаше ти о злом умышлении Святополковом: сему такожде не ял веры, ведуще себе ни в чесомже согрешивша противу брата твоего. Ведуще убо сия добрая нрава твоего, вкупе с блаженным братом твоим Глебом, вопием вам:
Радуйтеся, кротции агнцы противу вепря, брата, ничем же противуставшии;
Pадуйтеся, чистии сердцем праведницы ничтоже злое о нем помышлявшии.
Радуйтеся, велиции исповедницы имене Христова даже до крове вашея;
Pадуйтеся, земнии ангели, чистотою душ ваших небесных чертогов достигшии.
Радуйтеся, мира сего мученицы, горних же высот блажении насельницы;
Pадуйтеся, мира дольняго странницы, горняго же блаженства вечнии наследницы.
Радуйтеся, Борисе и Глебе, великии и славнии страстотерпцы.

Кондак 3
Силою Вышняго укрепляем, небоязненно приял еси смерть, блаженне Борисе, молитвою и верою в Создателя своего быв укреплен, еще же яко человек и тужил еси, обаче и Сам Господь Иисус Христос в нощь лютых страданий в Гефсимании молился со слезами до пота кровава: своему убо Владыце уподобляяся, и ты печалию одержим был, но возложивши все упование свое на Господа, в день той же бяше суббота, вшед в шатер свой молился еси с плачем Христу Богу и Пречистей Богоматери, во утрии же недели, певаемей утрени, весть приим яко убийцы твои близ есть ждуще молитвы твоея скончания, прилежне молился еси и егда совершися служба божественная всего себе предал воле Творца всяческих, Ему же за вся воспел еси: Аллилуиа.

Икос 3
Имуще душу твою устремленную в горняя в чаянии смерти ты, святый Борисе, прилежнее убо начен молитися глаголя: «Господи, что ся умножиша стужающии ми, мнози востают на мя», — и прочее псалма того и паки чтуще Псалтырь со многим умилением, глаголаше псалом оный, в нем же суть словеса сии: «К тебе привержен есмь от ложесн, от чрева матере моея. Бог мой еси Ты, да не отступиши от мене, яко скорбь близ, яко несть помогаяй ми; Ты же, Господи, не удали помощь Твою от мене, на заступление мое вонми», — и прочая Псалтири Давидовы, от ней утешение почерпая и подавая образ терпения во злостраданиих и еже вяшще поучатися в законе Господни день и нощь. Сего ради тебе и святому брату твоему Глебу во умилении сердца глаголем:
Радуйтеся, яко крини сельнии, во утрии дне жития дерзновенно урезаннии;
Pадуйтеся, красотою чистых душ ваших паче оных украшеннии.
Радуйтеся, гроздие винограда Божественнаго, кровь вашу аки вино в жертву Господеви источившии;
Pадуйтеся, древа светлоплодовитая, врата рая всечестнаго шумом листвий своих Содетеля всех отверзти молящая.
Радуйтеся, древа, псалмопевцем воспетая, плодами духовными любве и веры Церковь возвеселившая;
Радуйтеся, двоице святая, во псалмех воспитанная и сладчайшими псаломскими словеси в час смертный укрепленная.
Радуйтеся, Борисе и Глебе, великии и славнии страстотерпцы.

Кондак 4
Бурею скорбных помышлений одержим бе святый Борис по скончании утренняго пения и взирая на икону Христову, с плачем глаголаше: «Господи Иисусе Христе, сим человеческим образом явлейся на земли спасения ради нашего и изволивый на Кресте пригвоздитися грехов ради наших, Ты и мене сподоби о имени Твоем претерпети страдание сие, еже не от сопротивных, но от брата моего неповинно приемлю, и не постави ему, Господи, в грех сего». Таковей молитве, великий страдальче Борисе, дивящеся, да сподобимся и мы грешнии подражати тебе, якоже и ты подражал Господу на Кресте возносимому и глаголавшему: «Отче, отпусти им, не ведят бо, что творят», и первомученику архидиакону Стефану, камением побиваему бывшу и вопиявшему: «Господи, не постави им греха сего», сего ради воспеваем присно песнь хваления за вся Господу: Аллилуиа.

Икос 4
Слышавше сии молитвенная и кроткая о мучителех своих глаголы святаго Бориса, жестокосердии убийцы никакоже умягчишася, но паче исполняхуся злобою и яко зверие лютии внезапу нападоша на тя, святый страдальче, со оружием, обнаженными мечи и копии и ударив тя прободоша и повергоша на землю. Сие убо воспоминая, содрогаемся, и тебе, и блаженному Глебу похвальная восписуем сия:
Радуйтеся, велиею любовию пламеневшии даже до крове;
Pадуйтеся, веру до лютаго скончания жития вашего непорочно сохраншии.
Радуйтеся, словом и житием своим агнца Христа велегласно проповедавшии;
Pадуйтеся, и сами за Него заклани бывше якоже агнцы.
Радуйтеся, от временныя жизни сея преставившиися к жизни нестареемей;
Pадуйтеся, от суетныя скорогибнущия славы преселившиися ко славе вечней.
Радуйтеся, Борисе и Глебе, великии и славнии страстотерпцы.

Кондак 5
Чужде убийцем милосердие воистину, егда заклавши тя, святе Борисе, нечестивии, зря тя повержена на земли, абие взяша и обвивше в шатер якоже плащаницею, возложиша на колесницу и везоша с собою и сретоша два варяга послании от Святополка и тии приникше видеша еще дышуща, обаче сие подвиже их паче на ярость и извлек един от них меч свой вонзе в сердце твое и тако скончался еси, о великий мучениче, от зверонравных людей люте терзаемый, Господу же Мздовоздятелю воспевший немолчно: Аллилуиа.

Икос 5
Узре смерть святого Бориса, верный слуга его Георгий, паде на тело господина своего и сице глаголаше: «Не оставлю тебе, господине мой любимый, но идеже красота тела твоего увядает, тамо и аз скончаю живот мой». И сия убо любовь слуги никакоже коснуся злых сердец: вземше убо копия прободоша и Георгия якоже и Бориса, таже Иудину нраву поревноваше, прельщени бывше златою гривною на выи Георгиевой, даром Бориса верному рабу своему, иже снята никакоже бе мощно, отсекоша того ради главу Георгиеву и мнози отроцы Борисовы таможде побиени бывше, сострадальцы господину своему явишася. Сие лютое дело чад сатанинских умными очима нашима созерцая, благоговейне поем ученицем:
Радуйтеся, Борисе и Глебе, Руси святыя новии страстотерпцы;
Pадуйтеся, прославленнии в лице святых мученик.
Радуйтеся, с собою приведшии лик сострадальцев;
Pадуйтеся, увенчаннии нетленною славою мученических венцев в горних обителех.
Радуйтеся, земную плачевную юдоль пренебрегшии, зря умными очима славу небеснаго чертога;
Pадуйтеся, онаго чертога достигшии и венец победы от Христа приявшии.
Радуйтеся, Борисе и Глебе, великии и славнии страстотерпцы.

Кондак 6
Проповедует мир христианский величие страданий святых мучеников Бориса и Глеба, имея их, яко путеводителей своих к Горним Селениям, глаголет бо святый Симеон Метафраст, списатель деяний святых Божиих, яко «жития и подвиги святых подобятся светлости звезд, якоже бо звезды положением на небеси утверждени суть, всю же поднебесную просвещают, таяжде и от индиан зрится, не сокрываются и от скифов, землю озаряют и морю светят, и плавающим корабли управляют, ихже имен аще и не вемы, множества ради, обаче светлей доброте их чудимся, сице светлость святых, аще и затворены суть мощи их во гробех, но силы их в поднебесней земными пределы не суть определены». Чудимся тех житию и удивляемся славе, юже Бог угодившия Ему прославляет, воздвигая и нас хладных ко славословию имени Его пети со умилением: Аллилуиа.

Икос 6
Светом Троическим просвещаемии в горних обителех души мученическии, выну предстоящии Престолу Того, за Него же лютыя муки претерпеша на земли, свыше от оных горних чертогов молитвами своими ниспосылают нам от Творца всяческих мир и благоденствие, аще токмо память их чтим и просим помощи их усердно, не усты токмо, но и паче сердцем, почитая тако и память святых страстотерпцев Бориса и Глеба, во умилении сердечном глаголем:
Радуйтеся, доблестнаго лика мученическаго светлое сияние;
Pадуйтеся, всего рода христианскаго славо и украшение.
Радуйтеся, добродетелей евангельских честная вместилища;
Pадуйтеся, взыскателие небеснаго вечнаго сокровища.
Радуйтеся, венцем вечнаго веселия на Небеси увенчаннии;
Pадуйтеся, и нас сущих на земли помощию своею не оставляющии.
Радуйтеся, Борисе и Глебе, великии и славнии страстотерпцы.

Кондак 7
Мира суетнаго сладости не удержаша вас на земли, мученицы святии Борисе и Глебе, от княжеския славы ко славе вечней прешедше, оную бо вечную святую красоту Небес умными очима зрели есте. Ея сладости лютым путем мучения достигосте и тамо во храме небесныя дивныя Божия славы, у Престола Вседержителя Бога, воспеваете выну: Аллилуиа.

Икос 7
Егда прободен бе святый Борис и тайно без единыя почести погребен в Вышгороде, Святополк зверонравный помышляше в себе, како и Глеба убити; сей же убо Глеб от единыя со святим Борисом матере сын бе Владимиру, юн сый, нравом кроток, тих и незлобив. Сему убо княжащу в Муроме, посла Святополк лестно глаголюще: «Отец велми болит и зовет тя к себе, хотяще видети тебе, гряди убо борзяся с малой дружиной». Вняв убо сим глаголам, Глеб святый скоро потщися иде в Киев, не испытуя вести сия, любяше бо отца своего и крепким желанием горя облобызати его честныя седины. Мысленне воспоминая сие скорое твое течение ко смерти, тебе и брату твоему Борису умильно зовем:
Радуйтеся, лестию уловленныя и к смертному пределу земныя жизни вашея скоро текшия;
Pадуйтеся, лютыми страданьми небеснаго покоя достигшии.
Радуйтеся, о телесех своих всячески небрегшии;
Pадуйтеся, души ваша Господеви приобретшии.
Радуйтеся, земную плачевную юдоль без сожаления оставльшии;
Pадуйтеся, небесную славу улучити сподобльшиися.
Радуйтеся, Борисе и Глебе, великии и славнии страстотерпцы.

Кондак 8
Странно есть людем христолюбивым видети, како брат окаянный избиваше братию за почести великаго на Руси князя и богатство многих градов и областей, но таковы убо мысли людей нечестиваго века сего, и таковы козни людей, яже не Богу служат, не о Бозе помышляют, но похотем своим и миру погибельному усердно работают, в помрачении ума и сердца своего дерзкия хулы изрыгая на Господа Творца всяческих, мы же благоговейно почитая память мучеников, Богу Благодетелю нашему вопием выну песнь хвалы: Аллилуиа.

Икос 8
Весть прием от сестры своея Предиславы из Киева, брат святых мученик Ярослав, князь Новгорода, возвести святому Глебу о лукавствии Святополка, текущу же скоро в Киев Глебу и пришедшу ему на устие Волги, нощию потчеся под ним конь в рове и вреди ему мало ногу, того ради седе в ладию плывше до Смоленска и в урочище, Смядень глаголемое, приставшу ему ко брегу достиже тая весть Ярославова: «Не иди в Киев ко Святополку, понеже отец наш уже умре, Святополк же уби Бориса и тебе хощет убити». Сию весть слышавши, святый Глеб много плакася по отце и убиеннем брате, мы же внемлюще сему благосердому плачу, от глубины души взываем святым страстотерпцем сице:
Радуйтеся, земному отцу послушествоваше и любве Отце Небеснаго сподобистеся;
Pадуйтеся, яко от отца земнаго Небесному Отцу сопричтостеся.
Радуйтеся, велию любовь ко отцу своему земному даже до смерти своея неослабно имевшии;
Pадуйтеся, любовию Небесною, аки огнем пламеневшии и ею в чертоги Отца Небеснаго притекшии.
Радуйтеся, небеснаго утешения паче земнаго во псалмех Давидовых взыскавшии;
Pадуйтеся, всякую земную радость презревшии.
Радуйтеся, Борисе и Глебе, великий и славнии страстотерпцы.

Кондак 9
Вести о убиении брата Бориса пришедшей и сами убийцы от Святополка достигоша тебе, Глебе святый, и нападоша на ладию твою, ты же узрев разбойники тыя, воздев руце свои со слезами моляшеся псаломскими словесы, якоже и Борис, сими спасительными словеси Давида Псалмопевца, егоже ради во святей купели Крещения наречен был еси: «Суди, Господи, обидящия мя, побори борющия мя, приими оружие и щит и востани в помощь мою; изсуни меч и заключи сопротив гонящих мя, рцы души моей: "Спасение твое есмь Аз"». Посреде тоя молитвы трапезарь твой, имея вражду на тя, ем тя созади за главу, вонзе нож в гортань, и аки агнца непорочна закланием предаде смерти. Да умягчит жестокая сердца наша Господь и наставит посреде сени смертныя воспевати, якоже и тии страстотерпцы, песнь хваления: Аллилуиа.

Икос 9
Витийство всякое суетных мудрецев века сего окаяннаго не постигнет и не разумеет доблественнаго страдания страстотерпец святых Бориса и Глеба, како сии в юныя леты победиша страх смертный, како не прилежали миру, но Бога возлюбивше, Ему Единому всех себе предали есть, смерть приявши, хвалу воспевая Господеви; сего суетнии люди постигнути не могут, и врази Креста Христова сущи, Христа Бога уничижают, хулы глаголют и на святых Его, обаче не ведают Писания, яко Бог поругаем не бывает. Мы же, ублажая житие и кончину страстотерпец святых Бориса и Глеба, усердно им вопием:
Радуйтеся, юродивую мудрость мира презревшии и горния мудрости взыскавшии;
Pадуйтеся, в скорбех земных небрегшии и радость небесную обретшии.
Радуйтеся, Агнца ради Христа, и сами в подобии агнцев заклание претерпевшии;
Pадуйтеся, от мрака земного к Небесному свету устремившиися.
Радуйтеся, горняго мира святии наследницы;
Pадуйтеся, дольняго мира, по слову апостола, мудрии страницы.
Радуйтеся, Борисе и Глебе, великии и славнии страстотерпцы.

Кондак 10
Спасению душ наших послужиша, мученицы святии, показаша бо нам, яко болезни тела Христа ради душу спасают и очищают от грехов. Темже молим вас, мученицы Христовы Борисе и Глебе, молитеся за ны ко Господу, спасите души наша предстательством своим, правдивыя страстотерпцы, и истинные Евангелия Христова послушителя, да молитвами вашими управляеми, достигнем Небеснаго Царствия и тако воспоем Господу Победителю смерти и ада: Аллилуиа.

Икос 10
Свет чудес и исцелений воссия от телес ваших, святии страстотерпцы, положенным бывшим мощем вашим в Вышгороде, первее под спудом, таже изнесенным от земли во храм, от брата вашего Ярослава созижденный; по мнозех же летех князь Мономах Владимир, храму каменну созданну бывшу, внесе в онь святая телеса ваша, чудесы сияющая. Сия благоговейне воспоминая, умиленно глаголем вам, святии:
Радуйтеся, вместилища благодатных дарований Духа Божественнаго, Его же храмы нерукотворенныя телеса ваша суть;
Pадуйтеся, сокровища благодати немощная врачующей, в телесех ваших пребывающей.
Радуйтеся, даром благодати сия отроку скорчену имуще ногу, исцеление явлением своим подавшии;
Pадуйтеся, слепцу прозрение даровавшии, и хромому отсечену ногу имущу и принесену бывшу к раце мощей ваших, ногу во единем часе во удивление всех зрящих возрастившии.
Радуйтеся, жену некую, не почетшую дне святителя Николая, усушением руки вразумившии и по слезном покаянии у мощей ваших исцелившии;
Pадуйтеся, тому святителю Николаю поревновавшии, оклеветанных князю Михаилу неправедно мужей от темницы свободившии.
Радуйтеся, Борисе и Глебе, великии и славнии страстотерпцы.

Кондак 11
Пения похвальная приносит вам, святии страстотерпцы, земля ваша от дней преставления вашего страдальческаго и до днесь, воздвигает храмы имени вашему, почитает дни страданий ваших, величается о имени вашем. Переяслав древний град отца вашего Владимира совершая во вся лета в память вашу крестная хождения по брегу реки Альты, на нейже святый Борис заклан бысть, радуется. Радуется и весь Бориспольская, яко весь Борисова нареченная воспоминанием страстей ваших. Сего ради в радости духовней вопием: возсия днесь преславная память ваша, страстотерпцы Христовы Романе и Давиде, созывающи нас к похвалению Христа Бога нашего, тем притекая к вам исцеления дар приемлем, вы же с лики ангельскими предстояще Святей Троице, молитеся спастися нам, поющим во умилении сердца Богу: Аллилуиа.

Икос 11
Страшную казнь прия от правосуднаго Господа новый Каин — Святополк, иже прозвание окаяннаго от потомства ему дадеся, по убиении бо страстотерпцев святых Бориса и Глеба и третиято брата Святослава умертвил есть, абие же по сих Ярослав собра вои, подвижеся ратию на Святополка и победив его на месте убиения Бориса святого по мнозей молитве сицевой: «Кровь братии моих вопиет от земли к тебе, Владыко, Господи Боже мой, но молю Тя, Всеблагий Творче, Судие Праведный, отмсти кровь праведных сих, якоже кровь Авелеву на Каине, положив на него трясение, тако положи трясение и на сем окаяннем Святополке, яко да не возможет проливати более крове братния и христианския». И бысть тако по молитве сей: стеня и трясыйся, якоже Каин, бежа Святополк чрез всю землю Ляшскую, вопия: «Се женут нас, бежите, бежите», и в пустынех Ляхии и Чехии сконча живот свой. Ужасом одержимии, зря лютую кончину окаяннаго, вопием вам, мученицы святии:
Радуйтеся, незлобиво смерть приявшии, научите смирению и нас, гордостию возносящихся;
Радуйтеся, от властолюбия мученнии, свободите ны от духа любоначалия.
Радуйтеся, несопротив ставшии врага, сущу брату вашему, дадите и нам крепость в несении скорбей;
Pадуйтеся, не противльшиися злому ухищрению, ниспошлите и нам дивный дар терпения.
Радуйтеся, крепости Божественной исполненнии, укрепите ны на пути спасения;
Pадуйтеся, от соблазнов суетнаго мира отвергшиися, молитвами вашими нас вечнаго плача исхитите.
Радуйтеся, Борисе и Глебе, великии и славнии страстотерпцы.

Кондак 12
Благодатию, данною вам от Бога, во еже помогати скорбящим и озлобленным, помощь даровали есте, святии, князю Александру на реце Неве противу свеев, виде бо вас при захождении солнечном воевода Филипп на реце посреди корабли стоящих и плывущих, гребцы же седяху аки мглою одеяни, и слаша глаголание сие: «Брате Глебе, пойдем скоро да поможем сроднику нашему», и во утрий день Александр победи враги и короля их уязви мечем в лице. Такожде и Димитрию во одоление Мамая явили есте помощь, воздвизая пети Богу благодеющему сицевая: Аллилуиа.

Икос 12
Поюще ваша, святии страстотерпцы Борисе и Глебе, страдания, ублажаем ваше дивное непостижимое терпение и почитая святую память вашу, молимся вам: сохраните мирну страну нашу великим отцем вашим святым Владимиром во Святем Крещении просвещенную, укрепите дух и руце православных, борющихся со мглою неправды, даруйте совершенную победу истины и света над тьмою неверия и безбожия и приимите похвальная сии:
Радуйтеся, истинные Евангелия послушателя, даруйте и нам оное разумение Евангелия;
Pадуйтеся, Закона Христова скрижали, дадите и нам сего Закона разумное ведение.
Радуйтеся, целомудрия хранителие от младости, научите и нас воздержанию плоти в веце сем прелюбодейнем и грешнем;
Pадуйтеся, незлобия учителие, покажите и нам незлобия путь к Царствию Небесному.
Радуйтеся, о убиении телесе небрегшии, дадите и нам мужество против убивающих тело, души же не могущих убити;
Pадуйтеся, правую веру до конца сохраншии, обличите тыя, иже от веры отеческия правыя отпадают.
Радуйтеся, Борисе и Глебе, великии и славнии страстотерпцы.

Кондак 13
О всехвальнии страстотерпцы Христовы Борисе и Глебе, во святей купели Крещения Романе и Давиде нареченнии, призрите с высоты небесныя на нас грешных, скорбящих и озлобленных, милости Божия и помощи требующих, услышите глас моления нашего, тепле вам возносимый и от всяких зол, болезней и бед свободите ны. В час же кончины нашея укрепите слабеющий дух наш, да во исходе нашем от бреннаго сего тела, таможде, у дивнаго Престола Царя Славы, с лики Ангельскими воспоем: Аллилуиа.
Этот кондак читается трижды, затем икос 1-й и кондак 1-й.

Молитва
О двоице священная, братия прекрасная, доблии страстотерпцы Борисе и Глебе, от юности Христу верою, чистотою и любовию послужившии, и кровьми своими, яко багряницею, украсившиися, и ныне со Христом царствующии! Не забудите и нас, сущих на земли, но, яко теплии заступницы, вашим сильным ходатайством пред Христом Богом сохраните юных во святей вере и чистоте неврежденными от всякаго прилога неверия и нечистоты, оградите всех нас от всякия скорби, озлоблений и напрасныя смерти, укротите всякую вражду и злобу, действом диавола воздвигаемую от ближних и чуждих. Молим вас, христолюбивии страстотерпцы, испросите у Великодаровитаго Владыки всем нам оставление прегрешений наших, единомыслие и здравие, избавление от нашествия иноплеменных, междоусобныя брани, язвы и глада. Снабдевайте своим заступлением страну нашу, всех чтущих святую память вашу во веки веков. Аминь.

Молитва иная
О двоице священная, страстотерпцы Борисе и Глебе! Не забудите нас, раб Божиих (имена), но яко заступницы, вашим сильным ходатайством пред Христом Богом нас помилуйте; от нечистоты сохраните, от скорби, озлоблений и внезапный смерти избавите. Испросите у Великодаровитаго Владыки нам оставление прегрешений наших, единомыслие и здравие. Снабдевайте заступлением вашим приход сей, дом (святый храм) сей и вся чтущия святую память вашу во веки веков.

Тропарь благоверным князьям Российским Борису и Глебу, во Святом Крещении Роману и Давиду
Тропарь, глас 4:
Днесь церковная разширяются недра, приемлюще богатство Божия благодати, веселятся русстии собори, видяще преславная чудеса, яже творити приходящим к вам верою, святии чудотворцы Борисе и Глебе, молите Христа Бога, да спасет души наша.

Ин тропарь, глас 2:
Пречестнии и целомудреннии, и незлобивии страстотерпцы, Романе славный и Давиде чудный, иго бо Господне евангельски на рамо вземше, последовасте Христу и Крест Его, яко скипетр, в руку имуще, врага брата и злаго властолюбца соодолесте, и той ныне в геенне мучится, вы же радуетеся, с лики ангельскими предстояще Святей Троице, молитеся о державе сродник ваших, богоугодней быти, и сыновом русским спастися.

Ин тропарь, глас 4 (обретение мощей):
Мученицы Господни спасшиися, преславнии блаженнии князи Борисе и Глебе, труждающимся быстрии помощницы, недужным целители, вы бо болезни врачуете притекающих в Церковь с верою. Темже и мы молимся: от бед избавите нас, чтущих с любовию пренесение мощей ваших.

Ин тропарь, глас 8 (обретение мощей):
Днесь всякая душа верных веселится, в пренесении честных мощей ваших, Борисе и Глебе: слепыя просвещаете, немым уста отверзаете и печальныя утешаете, прияли бо есте от Христа Бога благодать исцелений. Молитеся о душах наших.

Ин тропарь, глас 4:
Мученическою кровию порфиру окропивше светло, украшени предстоите, страдальцы славнии, Царю Безсмертному, и, венцы славы от Него приимше, молитеся стране нашей подати на враги одоление и душам нашым велию милость.

Тропарь, глас 4 (Перенесение мощей):
Днесь Церковная расширяются недра, приемлющи богатство Божия благодати, веселятся русстии собори, видяще преславная чудеса, яже творите приходящым к вам верою, святии чудотворцы Борисе и Глебе, молите Христа Бога, да спасет души наша.

Ин тропарь, глас 2:
Правдивая страстотерпца и истинная Евангелия Христова послушателя, целомудренный Романе с незлобивым Давидом, не сопротив стаста врагу сущу брату, убивающему телеса ваша, душам же коснутися не могущу. Да плачется убо злый властолюбец, вы же радующеся с лики ангельскими, предстояще Святей Троице, молитеся о державе сродников ваших, богоугодней быти, и сыновом российским спастися.

Кондак, глас 4:
Явися днесь в стране Русстей благодать исцеления всем, к вам, блаженнии, предстоящим и вопиющим: радуйтеся, заступницы теплии.

Ин кондак, глас 3:
Возсия днесь преславная память ваша, благороднии страстотерпцы Христовы, Романе и Давиде, созывающи нас к похвалению Христа Бога нашего. Тем притекающе к раце мощей ваших, исцеления дар приемлем молитвами вашими, святии, вы бо божественнии врачеве есте.

Ин кондак, глас 3:
Приидите, вси русстии собори, чудотворцу и мученику Бориса и Глеба восхвалим, законно бо пострадавше, победиста сопротивнаго врага. Тем святым заступлением князи русстии враги побеждают, тем память ею весело и любовию похвалим, вопиюще: за ны молите Святую Троицу умирити мир и спасти души наша.

Ин кондак, глас 4 (обретение мощей):
От гроба знамения показасте в стране Русстей: явися днесь благодать исцеления всем, к вам, страстотерпцы, притекающим с верою, Борисе славный со Глебом чудным. Крепцы верою, добропобеднии мученицы, за Христа подъемше различныя муки, и на многа лета сокровени быша ваши святии мощи; ныне же являетеся от земли, возсиявше лучами, яко богатство многоценно, и в церковь Божию честно носими архиерей Божиих дланьми. Темже вопием вам: радуйтеся, князи, русстии заступницы.

Величание
Величаем вас, страстотерпцы святии Борисе и Глебе, и чтим честная страдания ваша, яже за Христа претерпели есте.

Ино величание
Величаем вас, святии благовернии князие страстотерпцы Христовы Романе и Давиде, и чтим честная страдания ваша, яже за Христа претерпели есте.

zvonnitsa.ru/orthodoxy/akafisti/
 

Православные молитвы и акафисты