Кондак 1
     Избранный страстотерпче и угодниче Христов Лаврентие, архидиаконе и непобедимый во страданиих великомучениче, песньми похвальными величаем тя нашего в бедах заступника, выну предстоящаго златозарному Престолу Царя славы. Ты же, яко огнем мучений вшедый в покой небесный, от огня страстей и скорби всякия свобождаяй нас, во уповании тебе взывающих:
     Радуйся, непобедимый великомучениче архидиаконе Лаврентие.

Икос 1
     Архангелов и Ангелов чины, Серафимов и Херувимов собори, и всех горних безплотных сил сонмы вельми удивишася толикому мужеству твоему, великомучениче Лаврентие, яко в немощнем телеси человечестем, безплотных сил явил еси образ, огнем бо на железнем одре жегомый и испекаемый, всесожжение живыя жертвы Христу был еси. Сие пачеестественное и страшное для единаго помысла человеческаго терпение точию воспоминающе, содрагаемся, и от всего сердца воспеваем тако:
     Радуйся, великомучениче, огнем и железом к небесному покою пришедый.
     Радуйся, во архидиаконстем чине служащий совершению безкровныя Жертвы, и сам всего себе в жертву Христови принесший.
     Радуйся, адаманте, ничим же одолеемый и не побежденный.
     Радуйся, каменю веры, на недвижимем основании заповедей Господних утвержденный.
     Радуйся, егоже подвигом дивящеся горния силы.
     Радуйся, егоже дивному терпению содрогаются человеческая множества.
     Радуйся, непобедимый великомучениче архидиаконе Лаврентие.

Кондак 2
     Видя святейший первосвятитель Римския Церкве богомудрый Сикст, твое велие дерзновение о Господе, святый великомучениче Лаврентие, возлюби тя, архидиакона своего, и прославляя Господа воздвизающаго на тя попечение о дому Божием, о нищих и убогих чадах Божиих, о всех скорбящих и озлобленных, милости Божия и помощи требующих и имея тя добраго делателя во храме святыни Господней, радовашеся духом, научая и нас воспевати о тебе благодателю нашему Богу: Аллилуиа.

Икос 2
     Разум богопросвещен имея, о доблий исповедниче Христов Лаврентие, и мира сего сладости презрев, устремился еси во след страждущаго учителя своего святаго Сикста и к нему от всея любящия души твоея взывал еси: «Камо, отче, без сына грядый? Камо, о архиерею святый, спешиши без архидиакона твоего? Ты никогдаже без мене приносил еси жертву, что во мне неугодно явися отеческой твоей милости? Егда ли не искусил мя еси, угодна быти тебе служителя? И аще общник бых тебе в действии Божественных таин Христовых, почто и во излиянии за Христа крове не общаюся тебе? Поими мя, отче, с тобою, сына твоего, поими, учителю, ученика твоего и даждь мя пред тобою в жертву Богу, якоже Авраам сына Исаака и яко верховный апостол Петр перваго архидиакона Стефана, и узрев мя совершившася мученичеством, сам послежде к венцу потщишися». Таковой любви твоей, великомучениче Христов, дивящеся, умиленно вопием ти похвальная:
     Радуйся, любовь к миру любовию Божиею в себе победивый.
     Радуйся, крепчайшую паче огня оную любовь явивый.
     Радуйся, возлюбивый всем сердцем, всею душею, всею мыслию, всем разумом Христа — небеснаго Учителя и Пастыреначальника.
     Радуйся, такожде возлюбивый и земнаго пастыря — отца, первосвятителя твоего и наставника.
     Радуйся, яко святая душа твоя серафимскою любовию пламенеющая, по апостолу: «вся любит, всему веру емлет, вся уповает, вся терпит».
     Радуйся, таяжде апостольския глаголы в себе вместивый, яко любы николиже отпадает.
     Радуйся, непобедимый великомучениче архидиаконе Лаврентие.

Кондак 3
     Силою Всевышняго укрепляеми, святии мученицы, дерзновенно проповедаху Света истиннаго Христа, Имже просвещаемии, ко славе небесней устремишася: глаголаше бо Сикст святый диаконом и соузником своим Феликиссиму и Агапиту: «Братия и своенственники мои, не убойтеся мук временных — весте кая мучения претерпеша прежде нас святии, да получат венец вечныя жизни. Сам Христос Бог наш оставил нам образ, не убойтеся убо пострадати за Христа да с ним воцаритеся». Сему убо исповеданию внемля и ты, великий страдальче Лаврентие, к достижению небесных чертогов устремился еси, воспевая сам, и нас воздвизая пети, вся промышляющему о нас Богу: Аллилуиа.

Икос 3
     Имеет весь мир христианстий молитвенницы о себе святии мученицы, радостию просвещается о сем, и тебе, великий страдальче Христов Лаврентие, прославляя, воздвизает храмы имени твоему, покланяется иконам лика твоего, ведяще тя, яко усерднаго печальника и заступника и в похвалу сицевая тебе вопиет:
     Радуйся, земный ангеле и небесный человече.
     Радуйся, мужу деланий святых.
     Радуйся, великий во страданиих, крепкий в терпениих, мужественный в скорбех.
     Радуйся, мощный силою десницы Господней, дивный в подвизех, славный в родех родов.
     Радуйся, имже красуется доблественный мученический полк.
     Радуйся, егоже непобедимому терпению дивятся Ангельския горния силы.
     Радуйся, непобедимый великомучениче архидиаконе Лаврентие.

Кондак 4
     Бурею ярости на имя Христово дышуще невернии людие, устремишася на христианы, во еже предавати их мукам лютейшим, растерзанию зверьми, усечению мечному и огню. Ты же, великомучениче, паче оных лютейшую смерть приял еси, испечен быв огнем, аки брашно печеное, на снедь кровожадным людем, зверьское существо имущим, обаче сила вражия ничтоже успе, любовию бо ко Христу пламенея, взывал еси со Апостолом: «Кто ны разлучит от любве Божия, скорбь ли, или теснота, или гонение, или глад, или нагота, или беда, или меч, якоже есть писано: яко Тебе ради умерщвляеми есмы весь день, вменихомся, яко овцы заколения, но во всех сих препобеждаеми за Возлюбльшаго ны», сию убо велию любовь имети испроси и нам, угодниче Божий, научая воспевати Подвигоположнику: Аллилуиа.

Икос 4
     Слышавши Сикст святый, твоя любовию понуждаемыя глаголы, и духом провидя будущая, сице отвещаше тебе: «Не оставляю тя, о чадо, но на множайшия муки блюду тя, предлежат бо тебе большия подвиги за веру Христову. Аз, яко стар, на легчайшее исхожду борение, тебе же подобает славнейшее показати над мучителем одоление и торжество; не плачи убо, но веждь, яко по триех днех скончания нашего, пойдеши, левите, за своим священником, не потребно есть тебе присутствия моего, аки бы каковыя помощи: Илия остави Елисея, но не отъя ему чудодейственныя силы. Иди тем временем и церковная сокровища раздаждь нищим и требующим — по твоему разсмотрению». Сие обетование и волю архиерея своего слышавше ты, яко послушлив архидиакон того, велиим тщанием устремися да сотвориши сия, поучая нас взывати тебе:
     Радуйся, любве и веры ради за Господа и послушания архипастырю к мучениям устремивыйся.
     Радуйся, в путь узкий шедый и прискорбный, и крест, яко ярем, вземший и Христу последовавый.
     Радуйся, надеждею вечнаго покоя водимый, к борению мужественно притекший.
     Радуйся, славы вечныя осияния, паче земных сластей вожделевший.
     Радуйся, обещание лютейших мук, яко райския утехи сладость из уст учителя твоего услышавый.
     Радуйся, яко обетованием тем утешивыйся и возвеселивыйся.
     Радуйся, непобедимый великомучениче архидиаконе Лаврентие.

Кондак 5
     Чудо велие помощию силы Божия действующия в тебе, по крепцей любве твоей ко Христу, сотворил еси, славный страстотерпче Христов, егда по скончании словес архипастыря твоего и учителя ты, святый Лаврентие, якоже повествует житие твое, «вся церковная утвари и сокровища взем, искаше по всему граду крыющихся клириков и убогих христиан, и еликих обреташе, даяше им на нуждныя потребы» и тамо, исцеляя вся недужныя очима и главою, чудотворец явился еси дивный во славнем житии твоем. Темже и по кончине святыми мощами своими и дивными чудотворящими иконами целиши всякия недуги, ко твоему заступлению вседушно притекающых, Богу же, Подателю всякия милости, поющих: Аллилуиа.

Икос 5
     Узре свет слепый Крискентион, емуже ты, помолившеся, рекл еси: «Господь наш Иисус Христос, отверзый очи слепорожденному, Той да просветит тя» и сотворив, якоже глаголет житие твое, «крестное знамение на очесех слепаго, и абие той прозре, и виде лице Лаврентиево, и возрадовася». Сие бяше в дому Наркисса христианина: пре сим же, абие по речении Сикста святаго, пришедый в дом вдовы Кириакии, к горе Хелион нарицаемой, идеже мнози христианы собрашася, исцелил еси тую от болезни главы, чрез возложение рук твоих и речение: «Во имя Господа нашего Иисуса Христа буди здрава», учредив убо довольны христианы тамо, такожде и в дому Наркисса сущия, пришел еси в пещеры Непотиановы, несый крыющимся тамо христианом «яже на пищу и иныя потребы», идеже бо собрани быша душ яко седмьнадесят и три, с ними же обрет и пресвитера Иустина. Мыслию убо и любовию, сретая тя на сем пути твоем, возглашаем тако:
     Радуйся, страннолюбче, нищым и убогим богатства церковная истощивый.
     Радуйся, церковная имения спасая от неверных хищения, Церкви живой — убогим вручивый.
     Радуйся, сокровищами земными небесное сокровище — славу святых приобретый.
     Радуйся, нищих и убогих, в беде сущих, теми сокровищами препитавый.
     Радуйся, рукама убогих богатство тленное в приобретение нетленних сокровищ предпославый.
     Радуйся, за страннолюбие и страдания венец нетления стяжавый.
     Радуйся, непобедимый великомучениче архидиаконе Лаврентие.

Кондак 6
     Проповедницы истины, богоноснии мученицы святии, сквозь огнь и воду внидоша к небесному покою, о нихже глаголати подобает словесы апостольскими, яко сии страстотерпцы велиими и неисчислимыми муки умучени «камением побиени быша, претрени быша, искушени быша, убийством меча умроша, ихже не бе достоин весь мир». Темже убо и мы, по сему глаголу апостолову, «толик имуще облежащ нас облак свидетелей, бремя всякое отложше и удобь обстоятельный грех, терпением да течем на предлежащый нам подвиг, взирающе на Начальника веры и совершителя Иисуса», Емуже с веселием, от всего сердца нашего, возопием: Аллилуиа.

Икос 6
     С светлым лицем представ судилищу Декиеву, святе Лаврентие, радовался еси грядущему венцу мученическому, паче венца мирския славы и вопрошаемь от него быв «где суть сокровища церковная», ничтоже отвещал еси безумному, подобяся Подвигоположнику Христу Богу, Иже не даде ответа вопрошавшему Его Ироду. Разгневася убо Декий, вдаде тя Валериану епарху, тойже в темницу заключи тя, идеже ты слепыя многия исцелив, подвизаеши всех верных взывати тако:
     Радуйся, врачу телесных немощей.
     Радуйся, ходатаю горних чертогов.
     Радуйся, слепоту телесную именем Христовым исцеляяй.
     Радуйся, слепоту душевную познанием истиннаго Бога отгнавый.
     Радуйся, истины Христова учения среди мглы неверия и безбожия прекрасный проповедателю.
     Радуйся, света Евангельскаго во тме и сени смертней безбожия седящим великий показателю.
     Радуйся, непобедимый великомучениче архидиаконе Лаврентие.

Кондак 7
     Мира дольняго красоту, богатство и славу земную оставил еси, непобедимый воине Христов, великомучениче архидиаконе Лаврентие, и к небесным горним селениям лютою стезею мучений мужественне востекл еси, идеже предстоя Престолу Господа славы с лики ангельскими, поеши Ему победную песнь: Аллилуиа.

Икос 7
     Егда узре Ипполит, начальник темницы, исцеленнаго тобою слепаго узника Лукиллия, егоже и крещением просветил еси, и иныя многия слепцы приходившия к тебе, яко ты, по словеси жития твоего, «призывая имя Иисус Христово и руку с знамением крестным на очеса их возлагая, творяше их прозрети», сим убо дивяся, обаче не оставляя и заблуждения неверных, испытовше тя: «покажи мне сокровища церковная»; к нему же ты, великомучениче, рекл еси: «О Ипполите, аще веровати будеши в Бога Отца всесильнаго и в Сына Его Господа Иисуса Христа, показано тебе будет сокровище и жизнь вечная дастся ти». Посем убо, изведен быв из темницы в дом Ипполитов и, огласив его, крести: просвещен же быв Ипполит крещением, рече: «Видех души неповинныя в велицей радости», якоже повествует житие, — «то бяху сокровища, о нихже Лаврентий ему извествоваше, яко будут откровенна, в час бо крещения показа ему Господь дивным видением небесная радования»; сим обрадован Ипполит быв, приведе ко Христу весь дом свой. От негоже похваляемый, великомучениче, такожде и от нас приими сия:
     Радуйся, великий мучениче, апостоле и проповедниче.
     Радуйся, скорый врачу, крестителю и исповедниче.
     Радуйся, в мучениих сущий, проповеди Христовы не оставивый.
     Радуйся, с венцем мученика звание апостола вместивый.
     Радуйся, устремляяйся к мукам, дела проповедания не оставивый.
     Радуйся, и самыя мучения в живую проповедь славы Христовы обративый.
     Радуйся, непобедимый великомучениче архидиаконе Лаврентие.

Кондак 8
     Сокровищем земным прилежа, Валериан мучитель истязаше тя, святый Лаврентие, емуже ты и обещал еси показати сокровища: «Даждь ми время на два или три дни и аз покажу ти сокровища». Отпущену же бывшу ти из темницы и извещенну бывшу о сем Декию царю, ты великомучениче, собрал еси многое множество нищих, и вдовиц, и сирот, и слепих, и хромых, и немощных в дом Ипполитов, по триех же днех, приведши оных пред лице Декия и Валериана, воззва к ним: «Се имате сокровища вечная в тех, ихже зрите сосудех вложенная, и кто имения своя в тыя сосуды влагает — приемлет оныя с лихвою в Небеснем Царствии». Даждь убо и нам молитвами твоими, святый великомучениче, сокровища наша земная, тленная, без сожаления влагати в таяжде честныя сосуды, чающе небеснаго воздаяния и поя Богу песнь хвалы: Аллилуиа.

Икос 8
     Видяще царь Декий и Валериан епарх себе постыжденных, разгневашася зело и уже не о сокровищах тебе, святый великомучениче, истязаху, но к поклонению идолом привлекаху, биему убо нещадно и устрашаему разновидными орудии мучений тебе бывшу, взывал еси Декию: «О, окаянне, всех сих аз давно желах, аки пиршества, то бо вам видятся быти мучения, нам же слава». Повелевающу мучителю, да приведеши на пиршество сие вся христианы, глаголаше: «Не достойна суть скверная очеса ваша видети тех, ихже имена написана суть на небесех». Биему же паки, и опаляему, и молящуся ти уже о исходе души твоея, слышашеся глас с небесе: «Еще множае страдати имаши», егоже аще слышаху невернии, но не можаху уразумети откуду есть, и паки лютейшия муки приложиша, ихже мы воспоминая, благоговейно тебе вопием:
     Радуйся, биение за Христа, нас ради биеннаго и страдавшаго, приемый.
     Радуйся, душу твою положивый за Господа и вечную жизнь обретый.
     Радуйся, узким путем страданий вшедый в покой небесный.
     Радуйся, опаляемый огнем, угасивый вечный огнь геенский.
     Радуйся, яко непрестанно в муках моливыйся, тем подражая в Гефсимании и на Кресте молившемуся Господу.
     Радуйся, непрестанно в молитве и любве пламеневый, даждь и нам сей дар молитвы ко Творцу всея твари.
     Радуйся, непобедимый великомучениче архидиаконе Лаврентие.

Кондак 9
     Всею душею твоею возлюбив Господа, Егоже и посреде лютых мучений, яко среди веселия, великий в мученицех Лаврентие, непрестанно прославлял еси: темже и Христос знамение силы Своея являше на тебе, посылая ангела Своего, егоже виде един от воин, именем Роман, возопи: «Святый Лаврентие, вижду юношу пресветла при тебе стояща и лентием отирающа язвы и все тело твое. Заклинаю убо тя Христом Господем, пославшим тебе ангела Своего, не остави мене». Сему дивному знамению мучители не восхотеша внимати, волшебством оное разумея, и заключиша тя паки в темницу, идеже ты крестив Романа, уготови его на подвиг мучения, он же, приклонив выю свою под меч острый, взываше якоже и ты, радостно Господу песнь хвалы: Аллилуиа.

Икос 9
     Вития многовещаннии не возмогут изобразити и уразумети лютейшия муки, егда, якоже глаголет житие твое, великий Лаврентие, «принесен бысть одр железный, и на том положиша мученика нага пред Декием и Валерианом, и углие огненное подложиша, железными же вилами слуги сверху пригнетаху на одре том тело мучениково и поджигаху пекуще, аки снедное мясо». Сие страдание твое точию воспоминая, содрагаемся, и прилежно приносим ти похвальная песни сия:
     Радуйся, на огни испекаемый и жегомый, огнь страстей палящий ны утоли молитвами твоими.
     Радуйся, на одре железном возлегий, от одра лености предстательством твоим возстави нас.
     Радуйся, лютыя страсти терпевый великодушно, от страстей облежащих ны исхити.
     Радуйся, страданиями небрегий да вечную славу приобрящеши, тоя же славы улучити и нам умоли.
     Радуйся, телесными скорбями вшедый в горняя обители, и нам помози оных достигнути.
     Радуйся, высоту терпения показавый, узкий и прискорбный путь терпения в житии сем нам облегчи.
     Радуйся, непобедимый великомучениче архидиаконе Лаврентие.

Кондак 10
     Спасти хотя душу твою, о телеси твоем небрегл еси, принося себе в жертву Господу, якоже и глаголал еси мучителем твоим: «Аз принесох мене самаго жертву Богу моему в воню благоухания в дусе сокрушеннем» и, егда мучителие разжигаху вельми одр, паки рекл еси царю: «Виждь, окаянне, яко углие то огненное мне прохладу готовит, тебе же — вечныя муки, весть бо Господь мой, яко о святем имени Его оклеветанный — не отвергохся, вопрошенный — исповедах Его, ныне жегомый — благодарю Ему». Сицевому благодушию в лютых страданиих научи и нас, доблестный великомучениче, да достигши обетованных благих, воспоем с тобою песнь победную Христу Богу: Аллилуиа.

Икос 10
     Стены безчувственныя твердее показася безбожный мучитель, повествует бо житие твое, Лаврентие славне, яко «вси тамо предстоявшии удивляхуся цареву мучительству таковому, яко жива человека испещи повеле». Ты же, великомучениче, глаголал еси молитвенно: «Благодарю тя, Господи Иисусе Христе, яко укрепил мя еси», и обращся к мучителем рекл еси: «Се, о окаяннии, испекосте едину тела моего страну, обратите на другую и ядите испеченное мясо мое», и паки ко Господу: «Благодарю тя, Господи Иисусе Христе, яко сподобил мя еси внити во врата Твоя» и сия рек, испусти дух. Поклоняяся таковей славней кончине твоей, умиленно вопием ти:
     Радуйся, кончиною своею посрамивый зело мучителей твоих.
     Радуйся, устыдивый вельми беззаконнующих.
     Радуйся, кротким терпением твоим удививый все естество человеческое.
     Радуйся, в терпении сем явивый себе, яко безтелесна, подобна горним силам.
     Радуйся, благодарственно вся терпевый, живота вечнаго явился еси славный наследниче.
     Радуйся, подвигом добрым подвизавыйся, показался еси вечныя славы сопричастниче.
     Радуйся, непобедимый великомучениче архидиаконе Лаврентие.

Кондак 11
     Песнь исходную первее принесе тебе, страдальче Лаврентие, Ипполит темничник, крещенный тобою, иже похити в ту нощь тело твое и плащаницею со ароматы обви е и со Иустином пресвитером принесе в дом Кириакии вдовицы, пребыв в той день в пощении со слезами, в вечер же глубок, якоже повествует житие твое, «мощи твоя несоша в пещеру, яже на селе вдовы тоя. Собравшимся же многим христианом, и плачущим много, сотворивше тамо всенощная моления, погребоша честно мученика, а святый Иустин пресвитер и вси прочии быша причастницы пречистых Таин Тела и Крови Христовых». Воспоминающе сие и мы, вместо мира — слезы молитвы принесем тебе и песнем исходным воздыханьми подражая, воспоем о тебе Богу: Аллилуиа.

Икос 11
     Свет Христов, просвещаяй и освящаяй всяческая, озари душу твою, богомудрый великомучениче, темже и по кончине твоей честныя мощи и иконныя подобия лика твоего неоскудно источают исцеления, утешение и радость всем болящым, скорбящым и унылым, подвизая оных подражати тебе во исповедании, терпении, мужестве и крепцей любве ко Христу, еюже пламенея, дивный образ терпения в злостраданиих явил еси и нас научаеши воспевати тебе тако:
     Радуйся, велию любовь и веру ко Христу до последняго издыхания сохранивый.
     Радуйся, в любви сохранивый веру, верою стяжавый мужество и теми козни вражия победивый.
     Радуйся, путем тесным в горняя восшедый.
     Радуйся, праведным житием обители вечныя достигнувый.
     Радуйся, в мире живый, надмирную красоту очами духовными созерцавый.
     Радуйся, Рима великаго и мира всего славо и украшение.
     Радуйся, непобедимый великомучениче архидиаконе Лаврентие.

Кондак 12
     Благодать данную ти от Господа в земнем житии твоем, святый великомучениче, во еже исцеляти недужныя, почитая веруем, яко и по смерти ты целиши с верою приходящых ко всечестным мощем твоим и прославленным божественною благодатию иконам: уповаем же, угодниче Божий, яко исцеляя телесныя очи прибегающых к тебе недужных, вкупе просвещаеши и душевныя очеса и ныне, якоже и древле, научая просвещенныя тобою воспевати Творцу всяческих: Аллилуиа.

Икос 12
     Поюще твоя великая страдания, Лаврентие, великий Христов угодниче, хвалим твое непостижимое нам немощным долготерпение, ублажаем твердое исповедание Христово и, почитая священную и славную память твою, заступниче наш и целителю, ведаем, яко по слову псалмопевца, «в память вечную будет праведник». Темже любовию прославляя тя, от чистаго сердца и благоговейныя души, устнами, аще и грешными, но усердными, вопием со умилением сице:
     Радуйся, даров великих Божиих присный нам ходатаю.
     Радуйся, преизящный угодниче и непобедимый в мучениих страстотерпче.
     Радуйся, крепким терпением стяжавый душу твою, оным терпением и нам явивый образ спасения вечнаго.
     Радуйся, тем же терпением мучителеву дерзость победивый, научая оным и нас побеждати дерзость исконнаго врага нашего.
     Радуйся, в том же терпении себе равнаго серафимам безплотным явивый.
     Радуйся, сим величайшым терпением звание непобедимаго от всех родов христианских получивый.
     Радуйся, непобедимый великомучениче архидиаконе Лаврентие.

Кондак 13
     О великий, всехвальный, непобедимый во страданиих великомучениче и архидиаконе Лаврентие, приими от всея души нашея сия похвалы тебе возносимыя, и нас, чающых милости Божия, помощи и спасения, от всяких бед, болезней и зол соблюди: воздыханий наших в болезнех и скорбех не презри, слезы наши собери и Престолу Утешителя Господа принеси, в час же кончины нашея предстани нам и Престолу Господа славы нас представи воспети Ему в горних селениих песнь ангельскую: Аллилуиа.
Этот кондак читается трижды, затем икос 1-й и кондак 1-й

Молитва святому мученику архидиакону Лаврентию
     О всесвятый и предивный страстотерпче Христов, архидиаконе Лаврентие! Восхваляя веру и страдания твоя, почитаем победу и венценосное прехождение твое чрез горящее углие от тмы века сего ко свету невечернему Престола величества Божия. Тем убо молим тя: якоже утвердил еси миром и чудесы притекающых с верою к покрову твоему в бедах и напастех, ангел сый во плоти, тако да приимеши и нас под кров твой в болезнех и печалех наших, и якоже исцелил еси Крискениона приложением рук от слепоты телесных очес его и множайшими чудесы удивил еси прибегающых к тебе, тако да исцелиши предстательством ныне у престола Божия и нашу душевную слепоту; призри на всякое разслабление наше телесное и укрепи нас бодренностью противу врагов наших видимых и невидимых, удручающих нас выну бедами и напастьми, да путь маловременной жизни сей прешед неискушенны от бед, скорбей и всякаго лютаго обстояния, достигнем тобою и мы неприступныя славы величества Божия, идеже предстоиши, моля со дерзновением за люди прибегающия с верою к тебе, воспевая дивнаго во святых Своих Бога во веки веков. Аминь.

Тропарь святому мученику архидиакону Лаврентию
Тропарь, глас 4:
     Мученик Твой, Господи, Лаврентие во страдании своем венец прият нетленный от Тебе, Бога нашего; имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Тропарь, глас 8:
     Серафим во плоти явился еси Лаврентие, огнем бо божественныя любве распаляемь, ярящийся огнь мучителя ни во что же вменил еси и угасил еси того ревность безбожную, темже и венец победоносен о имени и страдании твоем от Христа приял еси мужественно, сего ради победительно взываем тебе: радуйся, мучениче непобедимый Лаврентие.

Кондак, глас 2:
     Огнем бежественным распалив сердце твое, огнь страстей до конца испепелил еси, страдальцев утверждение, богоносне мучениче Лаврентие, и в страданиих вопиял еси верно: ничтоже мя разлучит любве Христовы.

Величание
     Величаем тя, страстотерпче святый Лаврентие, и чтим честная страдания твоя, яже за Христа претерпел еси.

 

Акафисты zvonnitsa.ru/orthodoxy/akafisti/296/13334/