Кондак 1
     Избраннаго Богом на служение Церкве Российския и преемника святителей Московских, яко архипастыря Христова, поборника истины и ревнителя благочестия, достойно чтуще тя, Филарете, благодарственное пение восписуем о тебе Господу. Ты же, ходатайственно предстояй Престолу Божию, о нас присно молися, да с любовию зовем ти:
     Радуйся, святителю Филарете, веры Православныя богомудрый учителю.

Икос 1
     Ангел паствы Российския явился еси в житии твоем, святителю Филарете, охраняя и защищая ю и болезнуя сердцем о Отечестве твоем. Ныне же, с лики Небесными совокуплен, наипаче молишися за ны, усердно прославляющих тя и зовущих:
     Радуйся, святителей Московских преемниче и в благодати им наследниче;
     Pадуйся, яко Петр град Москву возлюбивый.
     Радуйся, яко Алексий о нем усердно моливыйся;
     Pадуйся, яко Иона бодрственне град стрегий.
     Радуйся, яко Макарий русских святых ревностно почитавый;
     Pадуйся, Филипповым подвигом утверждавыйся.
     Радуйся, Иовлеву благочестию подражавый;
     Pадуйся, Ермогеновою любовию ко Отечеству распалаемый.
     Радуйся, святителю Филарете, веры Православныя богомудрый учителю.

Кондак 2
     Видяще Божия благодати обильное излияние, разумеем тя, святителю, яко сосуд, исполненный премудрости и разума, страха Божия и благочестия. Темже благодарственно вопием Подателю всех благ: Аллилуиа.

Икос 2
     Разумея промышление Божие о себе, святителю Филарете, во вся дни живота твоего тщался еси присно воли Божией покарятися и на Господа единаго все упование возлагати. Темже мы прославляем тя сице:
     Радуйся, от утробы матерни Господем избранный;
     Pадуйся, от пелен твоих Его возлюбивый.
     Радуйся, от юности твоея Бога взыскавый;
     Pадуйся, до конца Ему верен бывый.
     Радуйся, во вся дни Богу неленостно трудивыйся;
     Pадуйся, и в нощи Ему бодренно моливыйся.
     Радуйся, выну пред Господем ходивый;
     Pадуйся, в сердце твоем присно Его носивый.
     Радуйся, святителю Филарете, веры Православныя богомудрый учителю.

Кондак 3
     Сила Вышняго умножи ревность твою ко благочестию, святителю Филарете, егда восприял еси монашеский чин и основание крепкое лествицы добродетелей поставил еси. Сего ради, прославляюще подвиги твоя, вопием хвалебную песнь Богу: Аллилуиа.

Икос 3
     Имея разум богоприятный, востекл еси, святителю, к познанию истины Христовы. Мы же, словесы твоими в вере утвердившеся, похвалы, яко кадило умное и благовонное, приносим ти, взывающе сице:
     Радуйся, Богом Словом наученный;
     Pадуйся, Духом Святым вразумленный.
     Радуйся, богодухновенныя книги изъяснивый;
     Pадуйся, многия писания святых отец верным преподавый.
     Радуйся, исповедание веры уяснивый;
     Pадуйся, глад духовный словом Божиим утоливый.
     Радуйся, свобождение угнетенным возвестивый;
     Pадуйся, деяньми своими паству российскую духовно обогативый.
     Радуйся, святителю Филарете, веры Православныя богомудрый учителю.

Кондак 4
     Бурю внутрь имея помышлений сумнительных о житии своем, пиит российский в уныние прииде. Богомудрый же глагол твой услышав, святителю Филарете, яко не всуе жизнь от Бога нам дадеся, благодарне вразумися. Мы же, назидающеся сим, со умилением Богу вопием: Аллилуиа.

Икос 4
     Слышавше пастыри Христовы по всей России славное имя твое, святителю Филарете, к тебе, яко премудрому архипастырю, притекаху, ищуще совета, наставления и защищения. Такожде и мы, от тебе наставление приемлюще, радостно взываем сице:
     Радуйся, архиерейством от Бога почтенный;
     Pадуйся, крест сего служения смиренно понесый.
     Радуйся, тайн Божиих премудрый строителю;
     Pадуйся, вечери Господней благоговейный совершителю.
     Радуйся, апостолов и святителей преемниче;
     Pадуйся, благодати их достойный наследниче.
     Радуйся, лика святых сопричастниче;
     Pадуйся, Царствия Небеснаго присный жителю.
     Радуйся, святителю Филарете, веры Православныя богомудрый учителю.

Кондак 5
     Боготечная звезда на небе церковнем возсиял еси, святителю Филарете, мрак греховный озаряя и тьму неверия просвещая. Темже явился еси всем ищущим спасения яко светильник путеводный, научая воспевати Христу Богу: Аллилуиа.

Икос 5
     Видяще людие российстии, святителю Филарете, усердное твое служение во дни бедствий народных и сугубое попечение о сущих во узах, возблагодариша Господа, даровавшаго тя, столпа Церкве нашея. Мы же, прославляюще и тайная благая деяния твоя, ныне Промыслом Божиим явленная, воспеваем сице:
     Радуйся, Коломны благое прозябение;
     Pадуйся, Лавры Сергиевы благоуханный цвете.
     Радуйся, града Петрова преизящный столпе;
     Pадуйся, Твери преименитое укращение.
     Радуйся, Ярославля преславное величание;
     Pадуйся, первопрестольныя Москвы похвало.
     Радуйся, Руси святыя ликование;
     Pадуйся, всем притекающим к тебе радование.
     Радуйся, святителю Филарете, веры Православныя богомудрый учителю.

Кондак 6
     Проповедника златоустаго вемы тя, святителю Филарете, словом Истины нравы благия утверждая, заблуждшыя исправляя, грешныя обличая. Сего ради, восхваляюще тя, песнь Богу воздаем: Аллилуиа.

Икос 6
     Возсиял еси евангельски на свещнице церковнем яко светильник, верху горы стояй, святителю Филарете, образ верным показав словом, житием, любовию, верою и чистотою. Сего ради вопием ти:
     Радуйся, Христа ради во уметы вся вменивый;
     Pадуйся, подвигом добрым подвизавыйся.
     Радуйся, от юности себе воли Божией предавый;
     Pадуйся, молитву всем сердцем возлюбивый.
     Радуйся, слову Божию наученный;
     Pадуйся, послушанию навыкнувый.
     Радуйся, в терпении душу твою спасый;
     Pадуйся, в смирении Богом превознесенный.
     Радуйся, святителю Филарете, веры Православныя богомудрый учителю.

Кондак 7
     Хотя в монашестве смиренно житие проводити, потщался еси, святе, суеты мира сего избегнути. Промысл же Божий, вящшее о тебе промышляя, постави тя священноархимандрита обители Сергиевы и святителя Церкве Российския. Мы же, дивящеся сему, поем Богу: Аллилуиа.

Икос 7
     Новый показася рачитель и устроитель скитов и обителей, святителю Филарете, да вси, хотящии шествовати узким путем, спасительную жизнь в них обрящут. Темже вопием ти:
     Радуйся, соблазнами мира не прельстивыйся;
     Pадуйся, обеты монашества исполнивый.
     Радуйся, преподобнаго Сергия от юности возлюбивый;
     Pадуйся, посещением его утешенный.
     Радуйся, преподобнаго Антония, яко духовнаго отца и собеседника имевый;
     Pадуйся, преподобнаго Серафима усердно почитавый.
     Радуйся, пустынное житие в сердце носивый;
     Pадуйся, яко сего ради скиты в Лавре Троицстей насадивый.
     Радуйся, святителю Филарете, веры Православныя богомудрый учителю.

Кондак 8
     Странное и дивное чудо являет днесь храм Христа Спасителя, тобою, святителю Филарете, в воспоминание победы христолюбиваго российскаго воинства основанный, в годину же безбожия до основания разрушенный и ныне милостию Божиею возрожденный. Мы же, о сем благодаряще Бога, вопием: Аллилуиа.

Икос 8
     Весь был еси всем, святителю Филарете, яко архипастырь милостивый и отец добрый чадолюбивый и всякое дело с разсуждением во благо Церкве Божия творяй. Темже зовем ти:
     Радуйся, храма Христа Спасителя основателю;
     Pадуйся, благолепия церковнаго ревнителю.
     Радуйся, священства богомудрый архипастырю;
     Pадуйся, монашествующих наставниче.
     Радуйся, церковных уставов хранителю;
     Pадуйся, лжемудрствований искоренителю.
     Радуйся, во благих делех помощниче;
     Pадуйся, в добрых намерениих поспешниче.
     Радуйся, святителю Филарете, веры Православныя богомудрый учителю.

Кондак 9
     Всяк возраст и чин человеческий удивишася обилию благодати Божией, в тебе действующей, еюже, немощь телесную духом препобеждая, многая труды подъял еси, Богу взывая: Аллилуиа.

Икос 9
     Ветии многовещаннии и мудрецы века сего умолкаху при гласе богомудрых словес твоих, святителю. Мы же, дивящеся Духу благодати премудрости и разума, обильно действующу в тебе, верно вопием:
     Радуйся, философе велемудрый;
     Pадуйся, проповедниче преизящный.
     Радуйся, благовестниче златоустый;
     Pадуйся, наставниче предобрый.
     Радуйся, заблуждших исправление;
     Pадуйся, безбожных вразумление.
     Радуйся, суемудрых посрамителю;
     Pадуйся, боголюбцев покровителю.
     Радуйся, святителю Филарете, веры Православныя богомудрый учителю.

Кондак 10
     Спасти хотя душу твою, святителю Филарете, крест Христов яко благое иго на рамо подъял еси и с любовию за Господем последовал еси, поя Ему: Аллилуиа.

Икос 10
     Стена крепкая был еси, святителю Филарете, Церкве и пастве твоей Российстей, защищая и ограждая от нападающих и гонящих ю. Темже мы, прославляюще тя яко поборника веры и благочестия, зовем:
     Радуйся, о пастве твоей присно сердцем болезновавый;
     Pадуйся, о благостоянии отечества твоего слезно моливыйся.
     Радуйся, грядущая России, яко темный облак, предведевый;
     Pадуйся, во искушениих к терпению паству твою призывавый.
     Радуйся, ересей мужественный посрамителю;
     Pадуйся, раскола ревностный врачевателю.
     Радуйся, заблуждших кроткий вразумителю;
     Pадуйся, отеческих обычаев твердый блюстителю.
     Радуйся, святителю Филарете, веры Православныя богомудрый учителю.

Кондак 11
     Пение всякое подобает воздати ти, святителю Филарете, ты бо смирением приобрел еси высокая, послушанием воли Божией стяжал еси благодать Святаго Духа. Сего ради прославльшему тя Богу вопием: Аллилуиа.

Икос 11
     Яко светоприемное зерцало Христа, Солнца умнаго, начертал еси, святителю Филарете, в сердце твоем зраки Горних вещей, к разуму Божественному наставляя зовущия ти:
     Радуйся, светильниче, миру Богом данный;
     Pадуйся, к святительству Господем призванный.
     Радуйся, под иго Христово выю преклонивый;
     Pадуйся, бремя Его кротко подъемый.
     Радуйся, искушения мужественне претерпевый;
     Pадуйся, язвы Господа Христа в сердце твоем носивый.
     Радуйся, любовию Христовою осиянный;
     Pадуйся, светом ея просвещенный.
     Радуйся, святителю Филарете, веры Православныя богомудрый учителю.

Кондак 12
     Благодать святительства дарова Господь ти, богомудре Филарете, да грешныя обличиши, немощныя укрепиши, кающияся возставиши и всем вся будеши, да всяко некия спасеши. Сего ради благодарственно Богу поем: Аллилуиа.

Икос 12
     Поюще честное преставление твое, святителю Филарете, в немже Господу с радостию предстал еси, прославляем тя, яко воистину умножившаго во сто крат данный ти талант, и с любовию вопием:
     Радуйся, христианския кончины сподобивыйся;
     Pадуйся, от родителя твоего усопшаго кончину предузнавый.
     Радуйся, яко в день преставления твоего Божественную литургию совершил еси;
     Pадуйся, яко на Небеси со святыми водворился еси.
     Радуйся, во обители преподобнаго Сергия погребенный;
     Pадуйся, от безбожных по смерти телесное поругание претерпевый.
     Радуйся, яко мощи твоя во время благоприятно обретошася;
     Pадуйся, яко в стольный град мощами святыми твоими возвратился еси.
     Радуйся, святителю Филарете, веры Православныя богомудрый учителю.

Кондак 13
     О богомудре святителю Христов Филарете, учителю премудрый и златоусте Российский! Приими молебное сие пение и умоли Господа нашего Иисуса Христа сохранити в чистоте и святости Церковь Русскую, отечеству нашему благостояние даровати, нам же, ученьми и писаньми твоими наученным, Царствие Небесное улучити, идеже вкупе с тобою радостно будем воспевати Ему: Аллилуиа.
Этот кондак читается трижды, затем икос 1-й и кондак 1-й

Молитва святителю Филарету, митрополиту Московскому и Коломенскому
     О преславне и богомудре святителю Христов Филарете, Российския Церкве светильниче, земли нашея похвало и граду Москве украшение! Ты житием и служением твоим трием вселенским святителем был еси подобник: Василию Великому – яко бытие сущих изъяснил еси, Церкве Божия и Таин Христовых строитель добрый явился еси, иноческих уставов быв ревностный исполнитель и покровитель; Григорию Богослову – яко неботаинственных созерцаний о Святей Троице и о Бозе Слове сподобился еси и сих искусный провозвестник явился еси; Иоанну Златоустому – яко неустанный проповедник и учитель покаяния народа Божия был еси. И ныне, вкупе с ними предстоя во славе Престолу Божию и ходатайствуя о нас, моли Церкви Российстей на камени исповедания Православныя веры утвержденней быти, стране нашей мир и единение даровати, пастырем слово Божественныя Истины право правити, град Москву и паству твою от всяких напастей сохранити. Призри с Небесе, святителю, на ны, чада твоя, и даруй нам теплым твоим ходатайством ко Господу в заповедех Его преспевати, веру тверду, любовь нелицемерну и благочестие до последняго часа смертнаго сохранити, да непостыдно предстанем Спасителю нашему Господу Иисусу Христу, Емуже со Отцем и Святым Духом подобает слава, честь и поклонение ныне, и присно, и во веки веков. Аминь.

Тропарь святителю Филарету, митрополиту Московскому
Тропарь, глас 4:
     Духа Святаго благодать стяжав, богомудре святителю Филарете, истину и правду разумом просвещенным людем проповедал еси, мир и милость сердцем умиленным, страждущим явил еси, яко учитель веры и страж неусыпный паству Российскую жезлом правости сохранил еси. Сего ради ко Христу Богу дерзновение имея, моли даровати Церкве утверждение, людем и душам нашым спасение.

Кондак, глас 2:
     Яко истинный подражатель преподобнаго Сергия, добродетель измлада возлюбил еси, богоблаженне Филарете. Яко пастырь праведный и исповедник непорочный, по святем преставлении от безбожных поругание и поношения приял еси, Бог же знаменми и чудесы тя прослави и заступника Церкве нашея яви.

Величание
     Величаем тя, святителю отче Филарете, и чтим святую память твою: ты бо молиши за нас Христа Бога нашего.
 

 

Акафисты zvonnitsa.ru/orthodoxy/akafisti/291/13526/