КОНДАК 1
Избранный премудрым Промыслом Божиим быти возродителем Святыя Православныя веры / и на степень священномонаха возведенный, / в Руси Карпатстей ревностно подвизался еси в распространении веры предков наших. / Сего ради мы, позднейшая чада твоя, / от сердечныя любве к тебе зовем: / Радуйся, преподобне отче Алексие, преславный исповедниче Христов и молитвенниче о душах наших.


ИКОС 1
Ангельскаго мира и всего видимаго Творец предуставивый тя быти проповедником спасительныя Православныя веры среди народа нашего, мудрованием латинским плененнаго, но к Богоугодному Православно-восточному исповеданию тяготеющаго, от младенческаго возраста избра тя, отче Алексие, да послужиши обращению и спасению многих. Сего ради со дерзновением тебе вопием:
Радуйся, от юности Христа всем сердцем возлюбивый;
радуйся, от утра жизни твоея Тому Единому поработавый.
Радуйся, усердною молитвою дух твой окрыливый;
радуйся, во отрочестве образ жития святаго показавый.
Радуйся, благочестием своим верныя возвеселяяй;
радуйся, от малых лет за вся сия Богом возлюбленный.
Радуйся, преподобне отче Алексие, преславный исповедниче Христов и молитвенниче о душах наших.


КОНДАК 2
Видя родителя твоего на смертнем одре лежаща, телесныя и душевныя страдания его облегчал еси, блаженне, молитвою же усердною и словом его утешая, тому честь, по заповеди Господней, воздал еси. Темже и мы, тобою научаемии заповеди Божия исполняти , небесе и земли Творцу поем: Аллилуиа.


ИКОС 2
Разум Богопросвещен имея, уразумел еси, всехвальне, яко нужнейши всего есть благочестие, имже и потщался еси обогатити душу твою, в Законе Господни поучаяся. Сего ради зовем ти:
Радуйся, кроткий Иисусов последователю;
радуйся, заповедей Господних ревностный исполнителю.
Радуйся, смиренный Христов подражателю;
радуйся, иноческаго равноангельнаго жития ревнителю.
Радуйся, ревностный благочестия защитниче;
радуйся, Православия светлый светильниче.
Радуйся, преподобне отче Алексие, преславный исповедниче Христов и молитвенниче о душах наших.


КОНДАК 3
Силою Вышняго наставляем, стопы твоя в Бискадскую обитель направил еси к прозорливому старцу игумену Аркадию, прося его, да наставит тя на путь добродетели. Темже, получив желаемое, воспел еси Господеви, вся во благо устрояющему, хвалебную песнь: Аллилуиа.


ИКОС З
Желание благое имел еси, преблаженне, девство твое сохранити и сочетатися с Церковью Православною, понести же труды и подвиги во спасение безсмертныя души своея и душ ближних твоих. Сего ради ублажаем тя и глаголем:
Радуйся, верный наставниче богомудрия;
радуйся, чистоты душевныя и телесныя хранителю.
Радуйся, проповедниче Православия дерзновенный;
радуйся, пламенною проповедию многих ко истинней вере обративый.
Радуйся, словом правды сильных мира сего обличивый;
радуйся, яко за сие многия скорби претерпевый.
Радуйся, преподобне отче Алексие, преславный исповедниче Христов и молитвенниче о душах наших.


КОНДАК 4
Буря гонений и скорбей не поколеба души твоея, отче преславне, но, в истинности избранного тобою пути ко спасению себе утверждая, непрестанно воспевал еси Богу: Аллилуиа.


ИКОС 4
Слышав сказание житий древних подвижников, како от Господа наставляеми и укрепляеми труды ко трудом прилагаху, тем подражати поревновал еси, отче преподобне, дни и нощи в молитве пребывая и на предстоящия подвиги себе уготовляя. Мы же, дивное твое подвижничество прославляюще, зовем ти таковая:
Радуйся, труды мнози, истины ради, подобно апостолом подъявый;
радуйся, сего ради Апостолом Православия в земли Карпатстей достойно именуемый.
Радуйся, отче благосердый, о спасении многих поревновавый;
радуйся, не своих си, но ближняго искавый.
Радуйся, непоколебимый столпе апостольских преданий;
радуйся, Христова стада добрый наставниче.
Радуйся, преподобие отче Алексие, преславный исповедниче Христов и молитвенниче о душах наших.


КОНДАК 5
Боготечная звезда, путеводившая иногда волхвы к Богомладенцу Христу, в Вифлееме рожденному, приведе тя во святый град Иерусалим, поклонения и молитвы ради, Ты же, славя Бога за велию сию милость, воспевал еси Спасителю нашему: Аллилуиа.


ИКОС 5
Видевше братия Афонския Пантелеимоновския обители твою святую ревность о вере истинней, вдаша ти икону Божией Матери "Акафистныя", да будет тебе и народу твоему Заступницею и Покровительницею во всем. Сего ради зовем ти:
Радуйся, на Святую Гору Афонскую — удел Божией Матери, пришедый;
радуйся, братиею Пантелеимоновския обители радостно сретенный.
Радуйся, тамо ко Святей Православней Церкви приобщивыйся;
радуйся, яко сего ради желание сердца твоего исполнися.
Радуйся, яко от братии Афонския во благословение земли нашей икона Богородицы "Акафистная" даровася;
радуйся, яко с сею иконою и многими православными святынями во отечество свое возвративыйся.
Радуйся, преподобне отче Алексие, преславный исповедниче Христов и молитвенниче о душах наших.


КОНДАК 6
Проповедником Православный веры и благочестия до скончания земнаго жития твоего был еси, преподобие, помощи во всем у Царицы Не-бесныя непрестанно прося, моляся пред Чудотворною Ея иконою "Акафистною", пред нею же и мы сподобляемся воспевати: Аллилуйя.


ИКОС 6
Возсия сугубая благодать Божия в тебе, отче Алексие, по рукоположении тя во иеромонаха для совершения Таинств церковных. Сего ради зело возрадовашеся людие земли Карпатския, зовуще ти:
Радуйся, Ангельский образ приявый;
радуйся, к Небесным Силам причтенный.
Радуйся, по приятии Ангельскаго образа благодати священства сподобивыйся;
радуйся, Таинств церковных совершителю благоговейный.
Радуйся, Святейшия Трапезы предстоятелю умиленный;
радуйся, за народ твой ходатаю пред Богом неустанный.
Радуйся, преподобне отче Алексие, преславный исповедниче Христов и молитвенниче о душах наших.


КОНДАК 7
Хотя Преблагий Господь явити в тебе новый сосуд благодати Своея, посла тя к многострадальному народу нашему просвещения ради и освящения Таинствами церковными, ихже усердно выну совершал еси, поя Богу: Аллилуиа.


ИКОС 7
Новаго тя исповедника показа Господь Бог, егда нечестивии невиннаго тя связаша и ведоша во узилище. Людие же православнии, видяще сие, велия скорби исполнишася, вопиюще ти таковая:
Радуйся, за веру Христову узы и темничное заключение мужественне претерпевый;
радуйся, яко святым мучеником тем последовал еси.
Радуйся, яко исповедничеству их подражал еси;
радуйся, яко терпением твоим диавола победил еси.
Радуйся, проповедию твоею на горах Карпатских апостолу Андрею Первозванному уподобивыйся;
радуйся, святых равноапостольных Мефодия и Кирилла славный подражателю.
Радуйся, преподобне отче Алексие, преславный исповедниче Христов и молитвенниче о душах наших.


КОНДАК 8
Странствие земное славно прошел еси, отче преблаженне, слово истины Христовой людем возвещая и к покаянию всех призывая, да покаявшеся во гресех своих, чистым сердцем воспоют Христу Богу: Аллилуиа.


ИКОС 8
Весь сердечною любовию к Богу и людем пламенея, не пощадил еси телесных и душевных сил твоих для проповеди слова Божия и возрождения веры Православныя в народе нашем. Мы же, благодарни суще, во умилении сердца взываем ти сице:
Радуйся, преподобне отче Алексие, светильниче Православия;
радуйся, угодниче Христов, преподобия и правды исполненный.
Радуйся, к возрождению Православный веры велию ревность имевый;
радуйся, к лику преподобноисповедников приобщивыйся.
Радуйся, пастырю добрый, душу свою за овцы твоя положити готовый;
радуйся, паству твою от волков лютых ограждавый.
Радуйся, преподобие отче Алексие, преславный исповедниче Христов и молитвенниче о душах наших.


КОНДАК 9
Всякия скорби и беды претерпел еси от нечестивых, отче многострадальне, но ничтоже возможе разлучити тя от любве Божия. Вся же напасти претерпевая благодатию Христовою, непрестанно воспевал еси Ему: Аллилуиа.


ИКОС 9
Витии суемудреннии не могут уразумети истинности Православный веры, ниже постигнути спасающий силы ея, ибо в гордыне своей от-падоша от Единыя Святыя Соборныя и Апостольския Церкви. Мы же, яко чада Божия, научении тобою, отче Алексие, право веровати во Святую Троицу, ублажаем тя приветствии сими:
Радуйся, Православия светильниче неугасаемый;
радуйся, народа нашего благодатное украшение.
Радуйся, венцем исповедническим от Христа увенчанный;
радуйся, Церковью Его славно возвеличенный.
Радуйся, преселивыйся от юдоли сия плачевныя во Иерусалим Горний — Царствие Небесное;
радуйся, яко и тело твое нетлением зде на земли прославися.
Радуйся, преподобне отче Алексие, преславный исповедниче Христов и молитвенниче одушах наших.


КОНДАК 10
Спасти хотя люди от лжеучений и ересей, труды апостольския понесл еси, всюду проповедуя слово Правды Божия и всех научая православно пети Богу: Аллилуиа.


ИКОС 10
Стеною твердою и непреоборимою был еси народу твоему, отче преподобне, непрестанно моляся ко Господу, да призрит на люди Своя и да утвердит в них Веру Правую. Мы же, прославляя труды и подвиги твоя, умиленно вопием ти:
Радуйся, твердое Православия утверждение;
радуйся, света Евангельскаго сияние.
Радуйся, правило веры и благочестия;
радуйся, молитвенниче о нас пред Богом неусыпный.
Радуйся, совершенства христианскаго изящнейший учителю;
радуйся, во искушениих житейских всегдашний нам пособниче.
Радуйся, преподобне отче Алексие, преславный исповедниче Христов и молитвенниче о душах наших.


КОНДАК 11
Пение всякое побеждается звездочисленными твоими труды, отче Алексие. Кто бо от земнородных прославит многотрудное житие твое, кто возвеличит священныя подвиги твоя, смирение изрядное, молитву непрестанную, любовь нелицемерную, за няже сподобился еси со всеми от века Богу угодившими воспевати вечное: Аллилуиа.


ИКОС 11
Светозарный светильник явился еси, всеблаженне отче, разгоняя тьму неверия и озлобления в стране нашей светом веры Христовой, сего ради воспеваем ти:
Радуйся, славу мирскую, яко суетную, презревый;
радуйся, нищету духовную, Христа ради, восприемый.
Радуйся, Православия цвете прекрасный;
радуйся, светлостию своею мрак душ наших осиявающий.
Радуйся, апостольскаго служения сопричастниче;
радуйся, ревностию о вере Православней сердца наша распаляяй.
Радуйся, преподобне отче Алексие, преславный исповедниче Христов и молитвенниче о душах наших.


КОНДАК 12
Благодать сугубая от Господа дадеся ти, егда приближался к блаженной кончине земнаго жития твоего, Великий Ангельский образ прияти сподобился еси, да с лики небесными воспевати имаши Богу: Аллилуиа.


ИКОС 12
Поюще апостольския труды и подвиги твоя, ублажаем блаженную кончину твою, величаем прославление твое в лике преподобных исповедников Христовых и, предстоя пред многоцелебными мощами твоими, духовно торжествуем, яко имамы новаго молитвенника и предстателя пред Богом, вопиюще ти таковая:
Радуйся, Царствие Небесное унаследовавый;
радуйся, яко лицем к лицу славу Божию зриши.
Радуйся, всех святых сожителю;
радуйся, яко купно с ними на небесех Бога о нас грешных умоляеши.
Радуйся, яко нетленными мощами твоими на земли чудеса являеши;
радуйся, яко благодатную помощь всем притекающим к тебе подавши.
Радуйся, преподобие отче Алексие, преславный исповедниче Христов и молитвенниче о душах наших.


КОНДАК 13
О преблаженне, новопрославленне отче Алексие, Православия проповедниче и благочестия наставниче, приими от нас, грешных и недостойных, малое сие моление и испроси у Всещедраго Бога Церковь Святую укрепити и от ересей, расколов и нестроений оградити, нам же всем в истинней вере до последняго нашего издыхания пребыти, да чистым сердцем непрестанно воспеваем Спасителю нашему: Аллилуиа.


(Сей КОНДАК глаголем трижды) и паки:


ИКОС1
Ангельскаго мира и всего видимаго Творец предуставивый тя быти проповедником спасительныя Православный веры среди народа нашего, мудрованием латинским плененнаго, но к Богоугодному Православно-восточному исповеданию тяготеющаго, от младенческаго возраста избра тя, отче Алексие, да послужиши обращению и спасению многих. Сего ради со дерзновением тебе вопием:
Радуйся, от юности Христа всем сердцем возлюбивый;
радуйся, от утра жизни твоея Тому Единому поработавый.
Радуйся, усердною молитвою дух твой окрыливый;
радуйся, во отрочестве образ жития святаго показавши.
Радуйся, благочестием своим верныя возвеселяяй;
радуйся от малых лет за вся сия Богом возлюбленный.
Радуйся, преподобие отче Алексие, преславный исповедниче Христов и молитвенниче о душах наших.


КОНДАК1
Избранный премудрым Промыслом Божиим быти возродителем Святыя Православныя веры / и на степень священномонаха возведенный, / в Руси Карпатстей ревностно подвизался еси в распространении веры предков наших. / Сего ради мы, позднейшия чада твоя, / от сердечныя любве к тебе зовем: / Радуйся, преподобие отче Алексие, преславный исповедниче Христов и молитвенниче о душах наших.


МОЛИТВА ПРП. АЛЕКСИЮ КАРПАТОРУССКОМУ, ИСПОВЕДНИКУ


О священная главо, преподобне отче наш Алексие, вемы, яко ты, предстоя Престолу Пресвятыя Троицы, велие имаши дерзновение в молитвах пред Господем. Воззри и ныне на нас грешных и недостойных чад твоих, к тебе ныне припадающих и усердно молящихся: умоли Господа, да подаст нам решимость стяжати благочестие отцев наших, егоже стяжал еси от юности твоея. Ты в житии твоем ревностный защититель и хранитель истинныя веры был еси, помози и нам незыблемо соблюсти веру Православную. Тихая бо душа твоя зело преуспела в Божественном смиренномудрии, научи и нас разум наш питати, не многомятежной мудростию человеческой, но смиренным познанием воли Божией. Ей, угодниче Божий, не презри нас, молящихся тебе, ибо не токмо от бед и скорбей избавления просим, но силы и твердости, великодушия и любве просим, дабы без роптания переносити оныя напасти, восстающия на ны. Испроси нам и неослабное терпение даже до конца жития нашего, мир с Господом и грехов отпущение. Отче святый, укроти в стране нашей ветры неверия и смуты, да водворит Господь на земли нашей тишину, благочестие и любовь нелицемерную. Молитвами твоими да сохранит ю от междоусобныя брани, да укрепит Святую Церковь нашу Православную, да не оскудеет она истинными пастырями, добрыми делателями, право правящими слово Евангельския истины. Упаси и заблуждшия овцы стада Христова, да обратятся на путь благочестия и спасения. Наипаче же моли Господа сил, да возродится земля наша святым покаянием и единым сердцем, и едиными усты, да прославит дивнаго во святых Своих Бога в Троице славимаго Отца и Сына и Святаго Духа во веки веков. Аминь.


ВЕЛИЧАНИЕ


УБЛАЖАЕМ ТЯ, / ПРЕПОДОБНЕ ОТЧЕ АЛЕКСИЕ, / И ЧТИМ СВЯТУЮ ПАМЯТЬ ТВОЮ, / НАСТАВНИЧЕ МОНАХОВ / И СОБЕСЕДНИЧЕ АНГЕЛОВ

 

 

Акафисты zvonnitsa.ru/orthodoxy/akafisti/290/13573/