Свт. Митрофану Воронежскому

чудотворцу.

***

Святителю отче Митрофане , нетлением честных мощей твоих и многими благодеяньми ,чудесно содеянными и содеваевыми тобою с верою к тебе притекающим, уверившеся , яко имаши велию благодать у Господа Бога нашего, всемиренно припадаем вси и молимся тебе : моли о нас Христа Бога нашего,да низпослет всем ,чтущим святую память твою и усердно к тебе прибегающим ,богатыя милости Своя: да утвердит в святей Своей Православной Церкви живый дух правыя веры и благочестия , дух ведения и любве , дух мира и радости о Духе Святе ,да вси члены ея ,чисты от мирских искушений и плотских похотей и злаго действия злых духов , духом и истиною поклоняются Ему и усердно пекутся о соблюдении заповедей Его ко спасению душ своих.Пастырем ея да даст святую ревность попечения о спасении людей , им вверенных , да неверующих просветят , неведующих наставят , сомневающихся вразумят и удостоверят , отпадших от Православныя Церкве обратят в святые недра ея, верующих соблюдут в вере , грешных подвигнут к покаянию ,кающихся утешат и укрепят в исправлении жизни , раскаявшихся и исправившихся утвердят в святости жизни: и тако всех введут указанным от Него путем в уготованное вечное Царство святых Его. Ей , святителю Божий , да устроиши молитвами твоими вся благая душам и телесем нашим : да и мы прославим в душах и телесех наших Господа и Бога нашего,Иисуса Христа ,Ему же со Отцем и Святым Духом слава и держава во веки веков . Аминь.