Шуҳратжон АҲМАДЖОНОВ

(228-мақолам, 2018 йил 25 январ) КАРИМОВ ҲУЖЖАТЛАРНИ ҚАНДАЙ СОХТАЛАШТИРГАНДИ?

Одамларга ҳақиқатни айтинг, ва мамлакат хавфсиз бўлади. [1]
АВРААМ ЛИНКОЛЬН (1809-1865)


Россия Федерацияси президенти Борис Елсин ва Ўзбекистон президенти Ислом Каримов. Москва, 1991 йил 26 октябр. [15]

Ислом Каримов (1938.30.01-2016.02.09) Ўзбекистонни 1989-2016 йиллар давомида 27 йил бошқарганлиги кўпчиликка маълум. Лекин у 1989 йил июн ойида Ўзбекистон Компартияси 1-котиби, яъни раҳбари бўлиш учун айрим ҳужжатларни қалбакилаштиргани ҳақида кўпчилик билмайди. Ушбу мақоламда Ислом Каримов 1989 йил июнда Ўзбекистонга раҳбар этиб тайинланиш тарихини ёритмоқчиман.

Яқин тарихимиздан маълумки, Совет Иттифоқининг 1985-1991 йиллардаги раҳбари Михаил Горбачев 1986 йил апрелда “қайта қуриш” (“перестройка”)ни эълон қилгач, воқеалар ривожланиб бориб Иттифоқчи жумҳуриятларда кўплаб ҳар хил ташкилотлар, жумладан халқ ҳаракатлари ташкил топа бошлади.

Ўзбекистонда “Бирлик” халқ ҳаракатига 1988 йил 11 ноябр куни таниқли хонанда Дадахон Ҳасан уйида йиғилган бир гуруҳ ўзбек зиёлилари асос солишди. Шундан сўнг Ўзбекистонда ҳам сиёсий воқеалар кескин тус ола бошлади. Айниқса ўзбек тилига Ўзбекистонда давлат тили мақомини бериш масаласи кўтарилгач бу борада янги қонун учун жиддий кураш бошланиб кетди. “Бирлик” халқ ҳаракати бутун жумҳуриятимизни қамраб, 1989 йил иккинчи ярмида “Бирлик” сафларида Ўзбекистоннинг бир миллиондан ортиқ фуқароси иштирок эта бошлади.

Сиёсий воқеалар тизгинини бой бермаслик учун Москвадаги раҳбарият Ўзбекистон раҳбари бўлмиш Рафиқ Нишоновни СССР Олий Совети Миллатлар советига раиси этиб сайлаш орқали Ўзбекистонга янги раҳбарни тайинлаш чора-тадбирларини кўра бошлади. Шу ерда журналист Фахриддин Файзиев хотираларидан муҳим маълумотларни келтириб ўтсам.

“1989 йилда КПСС Марказий Комитети СССР Олий Совети Миллатлар советига раислигига Ўзбекистон партия ташкилотининг раҳбари Рафиқ Нишоновни тайинлаш тўғрисида қарор қилган. Шунда унинг ўрнига кимни тайинлаш ҳақида савол туғилган. КПСС МК котиби Егор Лигачёв Сурхондарё вилоят партия қўмитасининг биринчи котиби Солижон Мамарасуловни бу лавозимга мўлжаллаганди. Негаки, олдин Андижон вилоят партия қўмитасини, унгача сув хўжалиги ва мелиорация вазирлигини бошқарган, деҳқонга ўхшаган бу одам республикада “пахта иши” дея аталган давр мобайнида ўз шаънига гард юқтирмаганди.

Мамарасуловга кўра, у бундай шарафли, аммо хатарли лавозимдан бош тортган ва ўз навбатида, қўшни вилоятни бошқарган Ислом Каримовни тавсия қилган.

Лекин МК ташкилий ишлар бўлимига бошқа номзодлар, хусусан, Ўзбекистон ССР Олий Совети Президиуми раиси Мирзаолим Иброҳимов, Фарғона обкомининг биринчи котиби бўлиб ишлаган Мамажон Йўлдошев ва Самарқанд обкомининг собиқ биринчи котиби Назир Ражабовни ҳам тайинлаш таклифлари бор эди. Аммо уларга тўлиқ ишонч билдирилмаган. Шунда КПСС МК қишлоқ хўжалиги бўлими мудири, энг аввало, сектор мудири, олдин Тошкент обкомининг иккинчи котиби бўлиб ишлаган Борис Истоминнинг фикри эътиборга олинган. У Ислом Каримовни Ўзбекистонда аграр сиёсатда тўғри позицияда турган, деб ҳисоблаганди.

Бу таклифни яна бир неча омиллар кучайтирган: Каримов қўшиб ёзишларга олиб келган ўзбек халқининг салбий томонларини кескин танқид қилиши ва Москва тарафидан Навоий вилоятига раҳбар этиб тайинланган Ефимовдан ташқари бошқа вилоятлар раҳбарлари билан намойишкорона алоқа қилмаслиги шулар жумласидандир. Бундан ташқари, Ислом Каримовнинг икки марта рус хотинга уйлангани ҳам ўз самарасини бермай кўрсатмай қолмаган.

Бу ерда Ўзбекистон Компартияси Марказий Комитетининг биринчи раҳбари Акмал Икромовнинг хотини яҳудий миллатига мансуб бўлганини эслаш жоиз. Ундан кейин республика партия ташкилотини бошқарган Усмон Юсуповнинг хотини украин аёл бўлган. Ўша пайтда Ўзбекистон Вазирлар Кенгаши раиси лавозимида ишлаган Абдужаббор Абдураҳмонов бўлса ўзига Татаристондан хотин танлаганди. Бундай амалиёт бошқа раҳбарлик лавозимларида ҳам тарқалганди. КПСС МК, Москва ва Россияга нисбатан Ўзбекистоннинг раҳбари томонидан мутлақ садоқатнинг кафолати сифатида Татьяна Каримованинг чиқиши кутилганди, аммо бу борада Кремль кадрлари катта хато қилдилар.

Ўтган асрнинг саксонинчи йилларида Москва газеталарининг Тошкентдаги вакили сифатида ишлаган журналистнинг хотираларидан:

“1989 йили Москвага кетаётганимда мендан “Қишлоқ ҳақиқати” газетасининг муҳаррири Аҳмаджон Мухторовга посилка олиб кетишимни сўрадилар. Аҳмаджон Мухторовни ҳамкасблари республика Журналистлар уюшмасига раис этиб сайлагандилар. СССР Олий Советига сайловларда журналистлар ижодий уюшмаси уни депутатликка номзодини кўрсатганлар. Унинг рақиби “Известия” газетасининг шарҳловчиси Александр Бовин бўлган. Ўшанда Мухторов ғалаба қозонган ва СССР Олий советига депутат бўлган.”

Москвага келишим билан Аҳмаджон акага телефон қилдим. Депутатлар яшайдиган “Москва” меҳмонхонасида учрашишга келишдик. Айтилган вақтда етиб бордим. Хонага кирганимда стол атрофида ўтирган уч кишини кўрдим. Ўша пайтда ТошДУ ректори бўлиб ишлаётган ва депутат бўлиб сайланган академик Эркин Юсуповни дарров танидим. Учинчисини зўрға эсладим – Қашқадарё обкомининг биринчи котиби Ислом Каримов.

Хонага кирганимда Ислом Каримовнинг “Билмадим, эплай олармиканман, партия ишлари бўйича тажрибам кам, иқтисодчиман”, деган гапини эшитдим. Бунга Аҳмаджон ака “Эплашингизга ишонамиз, керак бўлса, ёрдам берамиз”, дея жавоб берди.

Каримов мени кўриб ўрнидан туриб кетди ва менга тикилиб қолди. Хона эгаси бизни таништирди. Тез орада Каримов хайрлашиб чиқиб кетди. Шундан кейин Эркин Юсупов ҳам узоқ ўтиргани йўқ. Мен суҳбатнинг белига тепганим учун узр сўрай бошладим, Аҳмаджон ака парво қилмаслигимни, гапириладиган гаплар айтиб бўлинганини айтди. Фақат тез орада Ўзбекистонда катта ўзгаришлар юз беришини қўшиб қўйди ва Ўзбекистондаги ишлар ҳақида суриштира бошлади.

Мен маълум муддат Москвада юрдим ва юртдош депутатлар билан суҳбатлашдим. Уларнинг гапларидан Ўзбекистон МК биринчи котиби лавозими учун анчагина жиддий жанглар кетаётганини англадим.

КПСС МК бир неча номзодларни кўраётганди. Аммо Аҳмаджон Мухторов бу лавозимга ўзининг юртдоши Ислом Каримовни ўтқазишга ҳаракат қилди. Унга халқ депутатларидан академик Эркин Юсупов, шоир Абдулла Орипов ҳамфикр бўлиб, халқ депутати қурултойи минбаридан ҳам, сиёсий саҳна ортида ҳам МК раҳбарлигига Ислом Каримовни сайлаш учун ҳаракат қилишдан тинмадилар. Пировардида унинг тарафдорлари улоқни олиб кетишга муваффақ бўлди ва Ислом Каримов МКнинг биринчи котиби этиб тайинланди» [3]

Мана шу тадбир доирасида 1989 йил 10 июн куни Москвада Кремлда Ислом Каримов номзоди муҳокамага қўйилди. Ушбу муҳокама қандай ўтганлиги ҳақида раҳматли Ислом Каримов 1995 йилда Л.Левитин ва Д.Карлайлга гапириб берган эди. Улар ўзларининг рус тилидаги [4]-китобида, шунингдек ушбу китобнинг ўзбек тилига ўгирилган [5]-китобда ёзишди. Мен ушбу китобларни интернетда 2018 йилда топа олмадим. Шу сабабли Л.Левитиннинг [6]-китобидан ушбу воқеа баёнини аввал рус тилида, сўнгра ўзимнинг таржимам асосида ўзбек тилида келтираман.

«Случай на Политбюро

Каримов вспоминает: «Как я стал первым секретарем ЦК компартии Узбекистана? Вышли на меня через Нишанова в первых числах июня 1989 года. Пригласили в Москву. Состоялись соответствующие встречи, беседы.

10 или 11 июня (1989 года, А.Ш.), сейчас точно не помню, пригласили на заседание Политбюро. Неожиданно для меня начались разного рода придирки со стороны Лигачева. И вообще тональность обсуждения, чего я тоже не ожидал, была не столько критической, сколько недоброжелательной и даже неуважительной. Тогда я, стоя на трибуне, сказал, обращаясь к Горбачеву: «Михаил Сергеевич! Снимите мою кандидатуру. Я вижу, что не устраиваю кое-кого здесь. (Имел я при этом в виду прежде всего Лигачева.) Предлагаю оставить еще месяцев на шесть Рафика Нишанова. Он наведет порядок, и после можно будет вернуться к вопросу о новом партийном руководителе Узбекистана. А мне разрешите уйти».

Горбачев пытался удержать меня, но я повторил: «Разрешите мне уйти».

Он резко сказал: «Что ж, если вы настаиваете — идите».

Я тут же улетел в Ташкент. Жене сказал, что возвращаюсь на завод. Мы оба работаем, семья небольшая, много ли нам надо.

Однако через два дня мне домой позвонил Нишанов и сообщил, что Москва санкционировала мое выдвижение первым секретарем». [6, стр. 20-21]

Бу матнни ўзбек тилига мен ўгирдим.

“Сиёсий бюродаги воқеа

Каримов хотирлайди: “Мен қандай қилиб Ўзбекистон Компартияси Марказий қўмитасининг биринчи котиби бўлдим? 1989 йил июн ойи бошида Нишонов орқали мен билан алоқа боғлашди. Москвага таклиф қилишди. Тегишли учрашувлар ва суҳбатлар бўлиб ўтди.

10 ёки 11 июн куни (1989 йил, А.Ш.), ҳозир аниқ эсимда йўқ, Сиёсий бюро йиғилишига таклиф қилишди. Мен учун кутилмаганда Лигачев томонидан турли хилдаги айбситишлар бошланди. Умуман муҳокамада товуш оҳанги, буни ҳам мен кутмагандим, шунчаки танқидий бўлмай, ичи қоралик ва ҳатто ҳурматсизлик билан олиб борилди. Мен шунда минбарда туриб, Горбачевга мурожаат қилиб дедим: “Михаил Сергеевич! Менинг номзодимни олиб ташланг. Мен кўриб турибман, бу ердаги айримларга маъқул келмаяпман. (Мен авваламбор Лигачевни назарда тутгандим.) Рафиқ Нишоновни яна олти ойларга (ўз вазифасида) қолдиришни таклиф қиламан. У тартиб ўрнатади, ва шундан кейин Ўзбекистоннинг янги партиявий раҳбари масаласига қайтсак бўлади. Менга эса кетишга рухсат беринг».

Горбачев мени тўхтатиб қолишга ҳаракат қилди, лекин мен такрорладим: “Кетишимга рухсат беринг”.
У кескинроқ деди: “Нима ҳам деяр эдик, агар ўзингизникини маъқуллаб туриб олсангиз – боринг”.
Мен дарҳол Тошкентга учқичда жўнаб кетдим. Хотинимга заводга қайтаётганимни айтдим. Биз иккаламиз ишлаймиз, оиламиз катта эмас, бизга кўп нарса керакми.

Лекин икки кун ўтгач Нишонов уйимга қўнғироқ қилди ва Москва биринчи котибликка кўрсатишга розилик билдирганини хабар қилди”. [6, 20-21-б.]

Москвада Сиёсий бюро аъзолари муҳокама пайти кулиб, пичингли саволлар беришининг сабаби бор эди. Ислом Каримов жияни Жамшид Каримовнинг [7]-интервюсидан маълумки, Ислом Каримовнинг укаси Хуршид Каримов (1941-2010) 10 нафар шериги билан 64 минг рубллик давлат мулкини талон-тарож қилганликда айбланиб 1986 йил сентябрда 10 йилга қамалганди ва жазони ўташ учун Наманган зонасига юборилганди. Шу сабабли 1989 йил 10 июн куни Ислом Каримовни КПСС Сиёсий бюроси Президиумида Ўзбекистон Компартияси 1-котиби лавозимига тавсия этмасликлари мумкин эди. Менимча, шунда Ислом ака ҳужжатларни қалбакилаштиради: у “Хуршид Каримов амакимнинг ўғли” (рус тилида “Хуршид Каримов мой двоюродний брат”) деб расмийлаштиради.

Совет Иттифоқида раҳбарликка тайинлаш масалаларида номзодга нисбатан Давлат хавфсизлик қўмитаси (ДХҚ – Комитет государственной безопасности (КГБ)) раҳбарияти КГБ ва бошқа архивлардан олинган яширин маълумотларни ҳам илова қиларди. Сиёсий бюро аъзоларига мўлжалланган ва Ислом ака масаласи кўриладиган расмий қоғозлар солинган папкага Хуршид Каримов Ислом Каримовнинг туғишган укаси эканлигини тасдиқловчи ДХҚ ҳужжати ҳам илова қилинган, деб ҳисоблайман.

Ислом Каримов масаласи кўриладиган вақтда айрим Сиёсий бюро аъзолари ўзаро кулишиб ўтиришади ва пичингли саволлар беришади. Ислом Каримов минбарга чиқиб саволларга жавоб бера бошлагач, унга ноқулай саволларни кўпроқ Лигачев беради. Ислом ака бу саволлар сабабини тушунади ва йиғилиш раислигини олиб бораётган КПСС Бош котиби М.Горбачевга мурожаат қилиб йиғилишни тарк этади. Эътибор беринг: у ўз иш жойи бўлмиш Ўзбекистон Компартияси Қашқадарё вилоят ташкилоти 1-котиби лавозимидаги ишга қайтиш ҳақида эмас, балки кўп йиллар олдин ишлаган Чкалов номли Авиация заводидаги етакчи конструктор лавозимидаги ишига қайтиши ҳақида турмуш ўртоғи Татяна Каримовага гапирган.

Икки кун ўтгач Кремлдаги раҳбарият Ислом Каримов номзодини биринчи котибликка кўрсатишга розилик билдирган. Бундай розиликнинг ҳам қизиқарли тарихи бор. Менга бу ҳақда 2018 йил 18 январ куни Бабур Маликов гапириб берди. Шу ерда Бабур ака ҳақида қисқача маълумотни http://www.centrasia.ruсайтидан келтираман. Рус тилидан ўзбек тилига мен ўгирдим.

“МАЛИКОВ Муҳаммад-Бабур Мажидович
[02.09.1948 — ..]

Тошкентда туғилган. Онаси орқали Йўлдош Охунбобоевнинг невараси.

1949-1957 йилларда Фарғона вилоятидаги қишлоқда яшаган. Отаси колхоз раиси эди. Онасининг барча қариндошлари деҳқонлар сулоласидан эди. 8 синфгача мактабда ўқиди, кейин эса 1967 йилда авиация техникумини «техник-механик» мутахассислиги бўйича тугатди. У бир йил давомида Чкалов номли Тошкент Авиация Ишлаб Чиқариш Бирлашмаси (ТАПОиЧ)нинг 34-цехида (Ан-22 «Антей» номли учқич йиғиш цехида) слесар-йиғувчи бўлиб ишлади.

1972 йилда Тошкент Давлат университети ҳуқуқшунослик (юридик) факултетининг кундузги бўлимини рус тилида тугатди.

1972-1977 йилларда прокуратура органларида ишлади. Миш-мишларга зид ўлароқ прокуратуранинг туман бўлимларида ишламаган.

1977 йилдан адлия органларида ишлаган.

1983 йилда Тошкент вилоят суди аъзоси, 1985 йилда — Ўзбекистон Олий суди аъзоси этиб сайланган. 1987-1989 йилларда Андижон вилоят суди раиси.

1989 йил январда ЎзССР Олий суди раиси этиб сайланган. Бир вақтнинг ўзида мансабига кўра СССР Олий суди аъзоси. “Пахта ишлари” деб аталмиш суд ишларининг қайта кўриш ва 3,5 мингдан ортиқ деҳқонларнинг оқланиши ташаббускори. 1989 йилда СССР Олий суди пленумида биринчи бўлиб Гдлян ҳамда Ивановнинг тергов гуруҳига қарши нутқ сўзлади ва уларнинг қилган ишларини “ўзбек халқига қарши геноцид” деб атади. Судя бўлиб ишлаган даврда унинг бирорта ҳукми бекор қилинган ва ўзгартирилган эмас. “Гдлян ишлари”ни Олий судда қаралишига қатъий қарши туриб қабул қилмаган.

1991 йилда Ўзбекистон Адлия вазири этиб тайинланган ва ярим йил давомида Адлия вазирлигини Совет Иттифоқида етакчи ўринларга олиб чиққан.

1993 йил 19 февралдан 1993 йил охирига қадар Ўзбекистоннинг АҚШдаги биринчи элчиси. Каримов сиёсатига қўшилмаганлиги сабабли ва унинг режимини “фашизм”да айблаб АҚШда сиёсий бошпана сўради (Би-би-си, 1993 йил 23 ноябр).

Ҳозирги пайтда “Ўзбекистон Фуқаролик ҳаракати”нинг лидери.

Ичмайди, чекмайди. Уйланган, икки қизи бор. Қариб қолган онаси Тошкентда яшайди, у билан кўришмаганига деярли 12 йил бўлди.” [8]

Бабур аканинг айтишича, Совет Иттифоқи Олий Кенгашига Ўзбекистондан сайланган беш нафар депутат, яъни Ўрта Осиё ва Қозоғистон мусулмонлари муфтийси шайх Муҳаммад Содиқ Муҳаммад Юсуф (1952-2015) [9], Тошкент Давлат университети ректори, академик Эркин Юсупов (1929-2003) [10], “Қишлоқ ҳақиқати” газетаси муҳаррири Аҳмаджон Мухторов , Ўзкомпартия Сурхондарё вилоят ташкилоти 1-котиби Солижон Мамарасулов (1930.01.06) [11] ва Хоразм вилоят ташкилоти 1-котиби Мирахат Мирқосимов (2.10.1941) [12] Совет Иттифоқи Компартияси Бош котиби Михаил Горбачев қабулига кириб, Ўзбекистонга раҳбар этиб Ислом Каримовни сайлашни илтимос қилишган. Шу илтимосдан кейин М.Горбачев рози бўлган ва Рафиқ Нишоновга (1926.15.01) [13] бу ҳақда хабар қилишган.

Алал-оқибат 1989 йил 23 июн куни Ўзкомпартия Сиёсий бюросининг йиғилишида Ислом Каримов номзоди кўрсатилган ва у Ўзбекистон раҳбари этиб тасдиқланган.

Бабур Маликовнинг яна айтишича, 1989 йил ёз охирида унинг олдига — Олий судга Ўзбекистон Ички ишлар вазири Вячеслав Камолов (1940) келган ва қўлидаги папкани кўрсатиб, бу Ислом Каримов укаси бўлмиш Хуршид Каримовнинг иши эканлиги ва уни қамоқдан озод қилиш кераклигини айтади. Натижада тегишли ҳужжатлар расмийлаштирилади ва Хуршид Каримов 1989 йил сентябрда қамоқдан озод этилади. Эътибор беринг: Хуршид Каримов 1986 йил сентябрда 10 йилга қамалган бўлсада уни 3 йил ўтгач 1989 йил сентябрда қамоқдан озод қилишди.

Ислом аканинг ўз укаси Хуршид акага муносабати ҳам ғалати бўлган. 1989 йил куз ойларида Олий суд раиси Бабур Маликов бир иш билан Ўзбекистон раҳбари бўлмиш Ислом Каримов қабулига боради. Шунда Ислом ака биринчи бўлиб Хуршид ака тўғрисида гапира бошлайди: “Хуршид ота-онам боқиб олган бола…” Ислом аканинг бу гапларига Бабур ака бундай жавоб беради: “Менга бу ҳақда нега гапираяпсиз? Мен сиздан бир нарса сўраб келдимми? Қамоқдан чиқариб юбордик. Олам гулистон.”

Ислом ва Хуршид Каримовлар воқеасининг давоми бор. 1992 йил куз фаслида Тошкентдаги Ғалабанинг 40-йиллиги даҳасидаги фаоллар йиғилишига Содиқжон Йигиталиев ва мени таклиф қилишди. С.Йигиталиев 1984 йилдан 1989 йил январ ойигача Ўзбекистон Олий судининг раиси бўлиб ишлаган. У Эрк демократик партияси (ЭДП) 1991 йил сентябр Таъсис қурултойида ЭДП раҳбарларидан бири этиб сайланганди. Содиқжон Йигиталиев Тошкентда Олой бозори қаршисидаги маҳаллада кўпқаватли уйда оиласи билан яшарди. Мен унинг уйида 1993 йилда икки марта бўлганман.

Маҳалла клубидаги йиғилиш давомида Содиқжон ака Хуршид Каримов билан учрашганига доир қуйидаги воқеани гапириб берди. У 1980-йиллар охирида қандайдир сабаб билан қамоқхоналарни инспексия қилишга Наманган вилоятига борган. Борган қамоқхонада Хуршид Каримов жазо муддатини ўтаётган бўлади. У қамоқхонадаги хоналардан бирида Хуршид ака билан суҳбат қилади. Содиқжон ака унга шундай савол беради: “Ислом Каримов сизни “Амакимнинг ўғли” дебди. Сиз Ислом ака билан туғишган ака-укамисизлар ёки амакиваччамисизлар?” Шунда бироз жаҳли чиққан Хуршид ака бундай жавоб берган: “Бир тешикдан тушган икки фарзанд ака-ука бўладими ёки амакивачча бўладими?”

Раҳматли Ислом Каримов 1989 йил июн ойида мана шундай йўллар ва усуллар билан Ўзбекистон раҳбари лавозимини эгаллади. Шундан кейин яна турли йўллар билан демократик сайловлар ўтказмади ва ўла-ўлгунча бу олий раҳбарлик амалини бошқа ватандошига бермади. Кейинги мақоламда раҳматли Ислом Каримов Ўзбекистонга 27 йил раҳбарлик қилган даврда ижобий ва салбий ишлари рўйхатини қисқача изоҳлар билан келтираман, иншааллоҳ.

ФОЙДАЛАНИЛГАН АДАБИЁТЛАР

1. Русские афоризмы. Изречения, крылатые выражения. Афоризмы про правду. — http://aphorismos.ru/truth/3.php
Авраам Линкольн (1809-1865) – АЫШнинг 16-президенти.

2. Ислам Каримов: биография бессменного лидера Узбекистана (24 фото, А.Ш.). — https://kp.ua/photo/politics/411268-yslam-karymov-byohrafyia (www.kp.ua/photo/politics/ Газета «Комсомольская правда в Украине», 31.08.2016).

3. ФАЙЗИЕВ Ф. Ўзбекистон: Тахтга ўтириш сирлари ёки Ислом Каримовнинг биринчи марта республикага қандай раҳбар бўлгани ҳақида. — http://uzbek.fergananews.com/article.php?id=1170 (www.uzbek.fergananews.com 2007.12.11).

4. ЛЕВИТИН Л., КАРЛАЙЛ Д. Ислам Каримов – Президент Нового Узбекистана. – Т., Ўзбекистан, 1996.

5. ЛЕВИТИН Л., КАРЛАЙЛ Д. Ислом Каримов – Янги Ўзбекистон Президенти. – Т., Ўзбекистан, 1996.

6. ЛЕВИТИН Л. Узбекистан на историческом повороте (Ўзбекистон тарихий бурилишда). — https://www.e-reading.club/bookreader.php/33256/Levitin_-_Uzbekistan_na_istoricheskom_povorote.html (www.e-reading.club/bookreader.php/33256/ ), М., 2001.

7. Жамшид Каримов: Ислом Каримовнинг бир опаси, беш акаси ва бир укаси бўлган (интервью, 1-қисм). — http://mutabar.org/uz/cat/qq/qq-malumotlari (www.mutabar.org/uz/cat/ “Ўтюраклар клуби” сайти, Суҳбатни Норвегиядан журналист Улуғбек Бакир олиб борган, 2017.05.11).

8. МАЛИКОВ Мухаммед-Бабур Маджидович. — http://www.centrasia.ru/person.php

9. БАРНО АНВАР. Муҳаммад Содиқ Муҳаммад Юсуф. — http://www.ozodlik.org/content/article/27145803.html (www.ozodlik.org 2015.22.07).

10. Юсупов, Эркин Юсупович. — https://ru.wikipedia.org/wiki/%D0%AE%D1%81%D1%83%D0%BF%D0%BE%D0%B2,_%D0%AD%D1%80%D0%BA%D0%B8%D0%BD_%D0%AE%D1%81%D1%83%D0%BF%D0%BE%D0%B2%D0%B8%D1%87 (www.ru.wikipedia.org/wiki/ Материал из Википедии — свободной энциклопедии).

11. МАМАРАСУЛОВ Салиджан. — http://www.centrasia.ru/person.php

12. МИРКАСЫМОВ Мирахат Мирхаджиевич. — http://www.centrasia.ru/person.php

13. НИШАНОВ Рафик Нишанович. — http://www.centrasia.ru/person.php

14. КАМАЛОВ Вячеслав Мухтарович. — http://www.centrasia.ru/person.php

15. Вечный президент Узбекистан Ислама Каримова: фотоистория. – www.meduza.io/galleries/2015/03/31/vechnyy-prezident (www.meduza.io 31.03.2015).

Шуҳражон Аҳмаджонов

E-mail: jiz54@mail.ru

2018 йил 24 январ

АҚШ, Вашингтон шаҳри

АҲМАДЖОНОВ Ш. Каримов ҳужжатларни қандай сохталаштирганди? - https://siyosat.wordpress.com/2018/01/25/%D0%BA%D0%B0%D1%80%D0%B8%D0%BC%D0%BE%D0%B2-%D2%B3%D1%83%D0%B6%D0%B6%D0%B0%D1%82%D0%BB%D0%B0%D1%80%D0%BD%D0%B8-%D2%9B%D0%B0%D0%BD%D0%B4%D0%B0%D0%B9-%D1%81%D0%BE%D1%85%D1%82%D0%B0%D0%BB%D0%B0%D1%88/ (www.siyosat.wordpress.com 2018.25.01).