Шуҳратжон АҲМАДЖОНОВ

САХАРЛИКНИ ЗАҲАР ҚИЛГАН ПРОВОКАТОР ВА НОМАРД ПОЛИЦИЯЧИ


Қизиқарли ҳолат: ер юзидаги одамлар, жумладан ватандошларимизнинг бир қисми АҚШни демократия, инсон ҳуқуқлари учун курашувчи давлат сифатида ҳурмат қилишади ва мақташади. Инсонларнинг иккинчи қисми эса АҚШни турли хил масалаларда, жумладан Ислом динига муносабат, Қуръон ва Муҳаммад пайғамбарга карши уюштирган турли провокаторларга сиёсий бошпана бергани, Муҳаммад пайғамбарга қарши доир туҳматдан иборат фильм “ижодкор”ларига нисбатан чора кўрмагани, Чикаго аэропортида 2012 йил 21 январ куни ҳибсга олинган ва бугунги кун - 2014 йил 27 июлда ҳам қамоқда сақланаётган ўзбек қочқини Жамшид Мухторовга қарши суд маҳкамаси 2,5 йилдан бери ўтказилмаётгани ва АҚШ раҳбарияти шунга ўхшаш инсон ҳуқуқлари бузилишига беэътибор қолаётганлигига урғу бериб қаттиқ танқид қилишади.

Менимча, ҳар иккала тараф ҳақлидир. Чунки АҚШни икки хил куч бошқармоқда. Биринчиси, демократик қонунлар ва эркин сайловлар асосида сайланган АҚШ Президенти, Сенати, 50 та штат губернаторлари, бир ёки икки палатали штат легистратураси (парламенти), шаҳарлар ва туманлар раҳбариятидан иборат куч бўлиб, улар ички ва халқаро қонунлар доирасида демократик сиёсат олиб боришга ҳаракат қилишмоқда.

Лекин АҚШ бошқарувига бевосита ва билвосита аралашаётган иккинчи кучлар ҳам бор: булар АҚШдаги 16 хил махсус хизматлар ва улар таркибида ишлаётган миллионлаб махсус хизмат раҳбарлари ва ходимларидир. Булар ўз фаолиятида қонуний ва ноқонуний услубларни ишлатиб айрим фуқароларга, жумладан мен каби фуқароларга қарши провокациялар, таъқиб-тазйиқлар уюштиришаётгани, айрим фуқароларга қарши етарлича асосга эга бўлмай туриб уларни ҳибсга олиб 2,5 йиллаб қамоқда сақлаб суд қилаолмаётгани (ўзбек қочқини Жамшид Мухторов), айрим фуқаролар заҳарлаб ўлдирилгани (ўзбек қочқинлари Олимжон Собиров (1973) ва Зоҳид Махмедов (1977)), айримлари отиб кетилаётгани (ўзбек қочқини Фазлиддин Ёқубов (1959)), айрим фуқароларга, жумладан менга қарши йиллаб тазйиқ қилишиб уч марталаб ишдан ҳайдашгани ва турли провокациялар уюштираётган кучишлатар тизимлар, жумладан махсус хизматлардир.

Мен олдинги ва ушбу мақоламда АҚШнинг ички ва ташқи бошқарувида катта роль ўйнаётган иккинчи куч бўлмиш кучишлатар тизимлар, жумладан махсус хизматлар провокатори ва номард полициячи ҳақида ёзмоқчиман.

Аввалги мақолаларимда ёзганимдек мени Бойси шаҳрида (Айдаҳо штати) 2010 йил июлидан 2012 йил январига қадар ноқонуний равишда уч марта ишдан ҳайдашди. Шу сабабли 2012 йил 2 март куни Вашингтон шаҳрига келдим. Вирджиния штати ва Вашингтон шаҳрида иш топишимга орқаваротдан махсус хизматлар қаршилик қилишди, яъни телефонимни блокировка қилишди, мен ишга йўлланма олиб борган жойда махсус хизмат ходими пайдо бўлиб, менеджерга нималарнидир тайинлади ва ҳоказо.

Мен 2012 йил октябридан Вашингтон шаҳрида “Street Sense” газетасини сотиш билан тирикчилик қилаяпман. АҚШда квартира ижара ҳақи энг қиммат бўлган учта шаҳардан бири Вашингтон шаҳридир. Газета сотаётганимда махсус хизматлар уюштираётган қаршилик туфайли газета сотгиш орқали топган пулим ҳозирча ижара ҳақига етмаётир. Бу масалада ҳам алоҳида мақола ёзиб, кўпгина қизиқарли фактларни келтириш ниятим бор, Аллоҳ хоҳласа.

Мен шу сабабли 2012 йил 3 мартдан 2014 йил 26 май кунига қадар шелтерда тунадим. Шелтер - бу уйсизлар тунайдиган бошпана бўлиб, у кечқурун соат 19:00 да очилиб, эрталаб соат 7:00 да ёпилади, яъни уйсиз фуқаро эрталаб соат 7:00 га қадар шелтердан чиқиб кетмоғи керак.

Менга қарши профессионал ўғри ва муттуҳамлар ёрдамида 2012 йил октябридан 2014 йил 26 май кунига қадар 9 марта ўғирлик, икки марта босқинчилик ҳужуми уштиришди ва менинг журналистлигимга доир нарсаларимнинг барчасини олиб кетишди.

2014 йил 23 май кечқурун ушбу ўғри шундай ҳужумлардан бирини қилиб, менинг шим чўнтагимдаги флэшкаларни ўғирлаб кетишга ҳаракат қилди. Мен бу ҳақда 7-полиция бошқармаси бошлиғи номига рапорт ёзиб 25 май кечқурун олиб бориб бердим. Полициячилар айтайлаб рапортимни қабул қилмай, мени 2014 йил 25 дан 26 майга ўтар кечаси соат 1:00 гача полиция бошқармасида кутиб ўтиришимга мажбур қилишди. Полиция бошқармасидан уйга қайтаётганимда менга қуролли ҳужум уюштиришди ва сумкам ҳамда рюкзакимда бўлган барча нарсаларимни босқинчилик йўли билан олиб кетишди.

Бу ҳам камлик қилганидай, махсус хизматлар 2014 йил 25 дан 26 майга ўтар кечаси қулфланган темир шкафчамни очиб ҳужжатларим ва 35 доллар пулим солинган ҳамёнимни ўғирлаб кетишни уюштиришди.

Мен шундай ҳавфли шароитда 2014 йил 26 майдан бошлаб шелтерга бормадим ва Вашингтондаги темир йўл вокзали бўлмиш Union Station (Иттифоқ шоҳбекати)да тунай бошладим. Шу ерда ҳам кучишлатар тизимлар турли хил провокациялар уюштиришди. Мен шулардан бири ҳақида ёзмоқчиман.

Вашингтон метроси якшанбадан пайшанбагача соат 5:00 дан 24:00 гача, жума куни соат 5:00 дан кечаси соат 3:00 гача, шанба куни соат 7:00 дан кечаси соат 3:00 гача, якшанба куни эса соат 7:00 дан кечаси соат 24:00 гача ишлайди. Мен кечқурун соат 21-ларда метрога тушиб, метро вагонида бир неча соат ухлаб олардим ва кеч соат 24-ларда Union Station вокзалига келардим.

Мен вокзалга бориб тунай бошлагач кучишлатар органлар кечасига вокзални назорат қилиш бўйича қўшимча кучларни ташкил этишди, деб ҳисоблайман. 3-4 кишидан иборат гуруҳ яшил рангдаги камзулча кийиб вокзалда айланиб юриб ён-атрофни кузата бошлашди.

Мен вокзалда кутиш залидаги ўриндиғлардан бирида 2-3 соат ухлардим. 2014 йил май ойи охирида ухлаганимда менга қарши битта провокация уюштирилди. Мен бу ҳақда алоҳида мақола ёзиб чоп этиш ниятим бор, Аллоҳ хоҳласа.

Вокзалда тун давомида фақат битта қаҳвахона (кафе) ишлайди. Менга қарши яна провокация уюштиришлари мумкинлигини ҳисобга олиб, соат 24:00 дан соат 5:00 гача ухламаслик ва ёзув-чизув қилишни режалаштирдим. Эрталаб соат бешларда метро бекати очилгач уйқумнинг қолган қисмини метро вагонида бир-икки соат ухлаш орқали компенсация қилишга қарор қилдим.

Вокзалда овқатланишим билан боғлиқ провокацияни икки марта содир этишди.

2014 йил 30 июн ёки 1 июл кечаси вокзалдаги кафеда бир стакан кофе олиб столчалардан бири ортидаги креслога ўтириб овқатландим. Сахарликни тугатгач дуо ўқиб оғзимни ёпдим. Ичилган кофедан кейин бир оз яхши кайфият билан рюкзагимдан қоғозларни олиб “Вооруженное ограбление меня в Вашингтоне” (“Вашингтонда менга қарши босқинчилик қилишди”) номли катта мақоламни давом эттириб ёзув-чизув қила бошладим.

10 дақиқадан кейин столчам олдига полициячи жаноб Жонсон (Gohnson) келди ва столчани бўшатишим кераклиги ҳақида айтди. Унинг кўкрагидаги нишонда унинг исми ва Private Security Services (P.S.C.) (Хусусий хавфсизлик хизмати) деган ёзув бор эди. Мен сабабини сўрадим. Полициячи сабабини тайин айтмади ва қаергадир қўнғироқ қила бошлади.

Мен тушундимки, ҳозир кетмасам қўшимча ноқулайликларга қолишим мумкин. Мен нарсаларим ва қоғозларимни сумкам ҳамда рюкзакимга солдим ва вокзалдан ташқарига чиқиб кетдим. Ташқаридаги бетон устида ўтириб овқатланишимни давом эттирдим. Овқатланиб бўлгач мен оғзимни ёпиш дуосини ўқиб, сахарликни тугатдим.

Полициячи жаноб Жонсоннинг иккинчи провокацияси 2014 йил 4 дан 5 июнга ўтар кечаси бўлди. Мен сахарлик қилиш учун кафега кирдим. Иккита тешик кулча олиб, кассада тўлаб, столчалардан бири ортидаги креслога ўтирдим. Сумкамдан сахарлик учун егуликларни стол устига қўя бошладим. Кафеда 20 га яқин стол бор. Шулардан 15 талари бўш бўлишига қарамай бир провокатор чап ёнимдаги стол ортига ўтирди. У лэптоп компютерини очиб, мен томонга тўғрилаб нималардир қила бошлади. Балким менинг овқатланаётганимни қаергадир видео сифатида узата бошлади.

Эслатиб ўтаман: махсус хизматлар ўзига ёқмаган шахслар ҳақида қандай озиқ-овқатни қандай қилиб еяётгани, нимани ҳуш кўриши каби маълумотларни тўплашади. Кейин шу маълумотлар асосида ўша фуқарони тинчитиш жуда осонлашади.

Мен ўзим ҳақимдаги бундай ахборотни махфий хизмат ходими ва/ёки лайчаси тўплашига унчалик хушим йўқ. Шу сабабли столим четига сумкамни қўйиш орқали ўша нусхага бироз қийинчилик яратишга ҳаракат қиламан. Шу сафар ҳам столим устига чап томонимга битта сумкамни қўйдим ва овқатланишда давом этдим.

Ёнимдаги столда ўтирган шахс бориб овқат олиб келди ва овқатлана бошлади.

7-8 дақиқалар ўтгач столчам олдига яшил рангдаги камзулча кийиб вокзалда айланиб юриб ён-атрофни кузататаётган ва провокацияга тайёр бўлганлардан бири келди. Бу провокатор менга бирор нарса демай телефони ёрдамида мени столчам билан биргаликда суратга олди. Кейин қандайдир бланкани ўз чўнтагидан чиқариб мен кетишим кераклигини айтди. Мен сабабини тушунмай савол бердим. Шу пайт полициячи жаноб Жонсон (Gohnson) келди. У кафедан чиқиб кетишим кераклигини айтди. Мен эътироз билдириб “Кафедан иккита тешик кулча харид қилдим ва овқатланаяпман. Нега кетишим керак?” деб сўрадим.

Жаноб Жонсон назоратчи-провокатор қўлидаги бланкани олди ва менга ўқиб бера бошлади. Бу қоғозда мени нимададир айблаб, нимадандир огоҳлантирув эди. Менимча, бу қандайдир муддатга Union Station вокзалига менинг келишим мумкин эмаслиги ҳақидаги огоҳлантирув эди. У ўқиб бўлгач бланкага нималарнидир ёзди. Кейин менинг исмим ва фамилиямни сўради. Ёнимда турган провокатор шоша-пиша полициячига мурожаат қилиб ўз исми шарифини ёзмаслигини сўради. Полициячи жаноб Жонсон бош ирғаб унга жавоб берди.

Мен жаноб Жонсонга исмим ва фамилиямни айтдим ва бланкадан битта нусха беришини илтимос қилдим. У рад жавобини берди. Мен икки марта сўрадим ва у икки марта рад жавобини айтди. Мен кўчириб олишга рухсат сўрадим. У рухсат бермади. Мен нарсаларимни олиб вокзалдан чиқиб кетдим. Мен 2014 йил 5 июлдан кейин вокзалга қайтиб борганим йўқ.

Полициячи жаноб Жонсоннинг номардлигига қаранг: Менга огоҳлантирув ёздинг ва ўқиб бердинг. Марҳамат қилиб шу ҳужжатдан бир нусха бер, номард. Ёки ҳеч бўлмаганда кўчириб олишга рухсат бер.

АҚШ пойтахти Вашингтон шаҳрида сахарлик қилишга рухсат бермай, ёзган ҳужжатидан нусха бермайдиган мана шунақа номард полициячилар ва провокаторлар ҳам бор.

28 июл куни Ер юзидаги мусулмонлар Рамазон ҳайит байрамини нишонлашади. Мақолам охирида имкониятдан фойдаланиб барча биродарларимизни Рамазон Хайит байрами билан табриклайман!

Email: jiz54@mail.ru , ergash1955@yahoo.com

2014 йил 27 июл

АҚШ, Вашингтон шаҳри