zoloto7 все записи автора Тропарь великомученика Иоанна Нового, Сочавского
глас 4
Житие на земли добре окормляя, страдальче,/ милостынями, и частыми молитвами, и слезами,/ паки же ко страданию мужески устремився,/ персское обличил еси нечестие./ Темже Церкве был еси утверждение/ и христиан похвало,/ Иоанне приснопамятне.

Кондак великомученика Иоанна Нового, Сочавского
глас 4
Морскую плавая пучину куплею,/ от востока тщался еси к северу,/ но Богу призвавшу тя,/ якоже Матфей мытницу, ты же куплю оставль,/ и Тому последовал еси кровию мучения,/ временными искупив непроходимая,/ и венец приял еси непобедимый.

Тропарь святителя Никифора
глас 4
Правило веры и образ кротости,/ воздержания учителя/ яви тя стаду твоему/ Яже вещей Истина:/ сего ради стяжал еси смирением высокая,/ нищетою богатая,/ отче Никифоре,/ моли Христа Бога// спастися душам нашим.

Ин тропарь святителя Никифора
глас 4
Иже первороднаго Царства отец,/ правоверный службы истинный пастырь бысть, преподобне,/ Царя града, Церкви всех матере явися светильник, Никифоре,/ моли Христа Бога,/ да спасет души наша.
Кондак святителя Никифора
глас 4
Победы венец с Небесе,/ о Никифоре преславне,/ яко прием от Бога,/ спасай верою почитающия тя,// яко священноначальника Христова и учителя.

Тропарь праведной Иулиании Новоторжской
глас 2
Благочестно в законе поживши/ и благими делы украсившися,/ яко крепкий адамант, явися,/ целомудренная святая благоверная княгине Иулиание,/ тленную славу и добротство телесное презревши,/ злокозненнаго врага победила еси,/ целомудрия ради мученическую смерть прияла еси./ Сего ради от Христа Бога нетленным и вечным венцем венчавшися,/ ныне с лики мученик ликуеши/ и нам велия чудеса, приходящим ко гробу твоему,/ обильно источавши./ Темже ти вопием:/ молися Христу Богу о всех нас,/ верою и любовию страдания твоя почитающих.

Кондак праведной Иулиании Новоторжской
глас 2
Воспоем днесь Благодетеля всех Бога,/ прославльшаго в России Иулианию Богомудрую,/ да молитвами ея подаст душам нашим/ грехов оставление и велию милость.