zoloto7 все записи автора Тропарь блаженного Иоанна, Христа ради юродивого, Устюжского
глас 5
Наготою телесною и терпением/ обнажил еси вражия коварствия,/ обличая неподобное его деяние,/ зельне стражда солнечный вар/ и нуждныя великия студени мраза,/ и огня не чул еси,/ Божиею помощию покрываемь,/ Иоанне премудре,/ моли о верою творящих память твою честно/ и усердно притекающих к раце мощей твоих,/ избавитися от бед и падения избежати.

Кондак блаженного Иоанна, Христа ради юродивого, Устюжского
глас 8
Вышния красоты желая,/ нижния сладости телесное ядение тщательно оставил еси,/ нестяжанием суетнаго мира возлюбил еси ангельское житие,/ преходя скончався, Иоанне блаженне,/ с нимиже моли Христа Бога непрестанно о всех нас.

Ин кондак блаженного Иоанна, Христа ради юродивого, Устюжского
глас 1
Иоанне премудре,/ земныя славы не возлюбив,/ того ради яко неистов ся творя,/ желая Царство Небесное наследовати,/ ударения и укорения приемля,/ наготу и зной терпя,/ тем ныне со Ангелы ликуеши,/ моли Христа Бога о душах наших.

Тропарь преподобномученицы Феодосии
глас 4
Добродетель благоприятно, мученице, постигла еси,/ Христово приятелище бывши чистое/ и Святаго Духа дом возлюблен;/ отнюдуже посрамила еси врага, борющаго род человеческий,/ добре страдавшая,/ и посекла еси Копронима, Феодосие, мечем веры,/ и к чертогу Небесному преставилася еси, радующися./ Тебе верою чтущим/ присно проси велия милости.
Кондак преподобномученицы Феодосии
глас 2
Трудами живот нетрудный достигла еси,/ кровию же Копронима удавила еси, мученице,/ сквернаго врага Христовы Церкве, всеблаженная Феодосие,/ и с Вышними радуешися воинствы,/ чтущия память твою покрывающи.

Ин кондак преподобномученицы Феодосии девы, Тирской
глас 4
Божественная память твоя, Феодосие,/ днесь возсиявши,/ явися мирови яко солнце,/ сказующи житие твое./ Ты бо воздержанием плотская двизания разорши/ и страдания кровию уневестилася еси Христови./ Темже хвалящия тя избави от всяких зол,/ да зовем ти:/ радуйся, мати преподобная.

Тропарь Божией Матери пред иконой Ее Споручница грешных
глас 4
Умолкает ныне всякое уныние/ и страх отчаяния исчезает,/ грешницы в скорбех сердца обретают утешения/ и небесною любовию озаряются светло./ Днесь бо Мати Божия простирает к нам спасающую руку/ и от Пречистаго образа Своего вещает, глаголя:/ Аз Споручница грешных к Моему Сыну,/ Сей дал Мне за них руце слышати Мя выну./ Темже людие, обремененнии грехми и скорбьми многими,/ припадите к подножию Ея иконы со слезами, вопиюще:/ Заступнице мира, грешных Споручнице!/ Умоли Матерними Твоими молитвами Избавителя всех,/ да Божественным всепрощением покрыет грехи наша/ и светлыя двери райския отверзет нам,/ Ты бо еси предстательство и спасение рода христианскаго.

Ин тропарь Божией Матери пред иконой Ее Споручница грешных
глас 3
Тебе, милосердия источнику присно текущему/ и Споручнице грешных, недостойный раби Твой, Богородице,/ припадающе, скорбяще, вопием Ти:/ спасай нас от бед, Владычице,/ и матерним Твоим ходатайством испроси всем нам вечное спасение.
Кондак Божией Матери пред иконой Ее Споручница грешных
глас 1
Честное жилище бывшее/ неизреченнаго естества Божественнаго/ выше слова и паче ума/ и грешным еси Споручница,/ подававши благодать и исцеление,/ яко Мати всех Царствующаго:/ моли Сына Твоего/ получити нам милость в День судный.

Тропарь отцов
глас 8
Препрославлен еси, Христе Боже наш,/ светила на земли отцы наша основавый,/ и теми ко истинней вере вся ны наставивый,// Многоблагоутробне, слава Тебе.

Кондак блаженного Иоанна, Христа ради юродивого, Устюжского
глас 8
Вышния красоты желая,/ нижния сладости телесное ядение тщательно оставил еси,/ нестяжанием суетнаго мира возлюбил еси ангельское житие,/ преходя скончався, Иоанне блаженне,/ с нимиже моли Христа Бога непрестанно о всех нас.