zoloto7 все записи автора Тропарь святителя Леонтия
глас 4
Апостолом сопричастник/ и к Богу молебник верен,/ добродетельми возшед на Небесная,/ и любовь возложил еси к Любящему тя,/ и неверныя люди обратил еси в веру./ Тем ныне, со Ангелы ликуя,/ предстоиши престолу славы всех Царя Христа Бога:/ молися, святителю Леонтие,// да спасет души наша.

Тропарь святителей Ростовских Леонтия, Исаии, Игнатия
глас 4
Апостольским преданием, истинней вере проповедницы,/ и от тьмы к свету Богоразумия человеком наставницы,/ и за ны к Богу молебницы,/ на Небесная любовь возложисте к Любящему вы./ И ныне на Небеси со Ангелы и со всеми святыми ликовствующе/ у Престола славы всех Царя, Христа Бога нашего,/ святии чудотворцы Леонтие, и Исаие, и Игнатие,/ молите даровати стране нашей мир,/ на враги одоление,/ Церкви единомыслие/ и душам нашим велию милость.

Тропарь святителям Ростовским
глас 4
Святителие премудрии,/ паствы вашея учителие богопросвещеннии,/ веру евангельскую в людех преумножившия,/ любве Небесныя на земли достоподражательнии образи,/ люди страны Ростовския и Ярославския приобщавшии спасению,/ служителие воистинну Божий/ и сопричастницы апостолов достойнии явилися есте,/ Леонтие священномучениче, Исаие, Игнатие, Иакове, Феодоре/ и златословесниче Российский Димитрие,/ Христа Бога молите/ о архиереех, на престоле вашем преемницех,/ о людех, благочестно вас почитающих,/ о стране нашей православной/ и о всей Христовой Церкви.

Кондак святителя Леонтия
глас 4
Жития ради чистоты,/ Всевидец Господь свет Свой насади в души твоей,/ вразумити люди многия/ твоими учении,// Леонтие преподобне.
Кондак святителей Ростовских Леонтия, Исаии, Игнатия
глас 8
Яко во вселенней трие велицыи святителие,/ бысте вы благочестием и добродетелию наставницы Ростову/ и, благоверием приимше паству, стадо Христово упасосте/ и вечный покой наследовасте./ Молим вас, святии чудотворцы,/ подати добродетелем исправление,/ и болезнем нашим исцеление, и соблазном избавление,/ и душам спасение, да зовем вам:/ радуйтеся, граду нашему Ростову похвала и утверждение.

Кондак святителям Ростовским
глас 4
Новаго Завета Бога с человеки хранителие,/ евангельских заповедей исполнителие,/ в добрых делех совершеннии,/ святителие мудрии, преподобнии и праведнии Богоноснии,/ землю Ростовскую и Ярославскую/ облагоухавшии молитвами,/ именуемии вси и неименуемии,/ явленнии и сокровеннии,/ предстояще Живоначальней Троице,/ не отступайте от нас духом/ и Божественное милосердие преклоните к нам,/ да с дерзновением славу в Вышних Богу вси приносим,/ да пребудет на земли мир нерушимый,/ любовь же и благоволение/ посреде всех человек.

Кондак преподобного Михаила
глас 8
Яко архиерей всечестен и благочестия священнострадалец,/ прещения злоименитаго не убоявся,/ еретическое того противление победил еси,/ свободным гласом велегласно вопия:/ иконе покланяюся Христове и Пречистыя Того Матере.// Сего ради тя почитаем, Михаиле.

Тропарь Собору Ростово-Ярославских святых
глас 4
О благочестный соборе,/ о людие избраннии,/ святителие преподобнии и праведнии,/ и благовернии граждане российстии,/ яко звезды, на тверди церковней/ страны Ростовския и Ярославския к Богу предстателие,/ величаем с любовию вас, по плоти наших сродников./ Вы же молитеся даровати мир стране и Церкви нашей,/ благословение и милость Божию всем людем,/ всепрощение и спасение,/ ходатаи бо есте приснии о нас ко Святей Троице.
Тропарь преподобного Паисия Галичского
глас 8
Днесь возсия нам память твоя, славне Паисие,/ яко солнце светозарное, лучами озаряющи весь мир,/ тако и ты, преподобне,/ чудесы своими тьму нощи злых духов от нас отгоняя;/ днесь Небесныя силы, и святых Ангел,/ и души праведных мысленно торжествуют, радующеся;/ днесь и мы, грешнии, припадающе честному твоему образу молимся:/ о, преподобне Паисие,/ Христа Бога моли непрестанно/ спасти град и люди, иже тебе почитающия.

Кондак преподобного Паисия Галичского
глас 3
Возсия, Господи, граду Твоему Галичу,/ яко светозарное солнце, угодник Твой Паисий,/ радостно вселенную озаряя своими чудесы,/ и приходящих с верою ко гробу его святому;/ тако молитвами Пречистый Богородицы от бед всех нас избави,/ и упраздни варварская шатания,/ яко мы, людие Твой, Господи,/ и град наш и страна вельми Тобою хвалится,/ и спасается молитвами преподобнаго Паисия.

Тропарь преподобной Евфросинии, княжны и игумении Полоцкой
глас 4
Подражающи дванадесятолетна дванадесятолетну Христу,/ учившему во святилищи Божию слову,/ последовала еси, Евфросиние./ Славу временную и земнаго обручника оставльши/ и вся мирская презревши,/ краснейшему паче всех Христу себе уневестила еси,/ крест вземши, путем ангельскаго жития шествующи/ и многия к Нему наставляющи,/ во благоухании мира в Небесный Чертог востекла еси,/ идеже моли, Егоже возлюбила еси,/ о чтущих благочестно память твою.

Ин тропарь преподобной Евфросинии Полоцкой
глас 4
Богатство свое нищим расточивши/ и славу княжескую ни во что же вменивши,/ обручника временнаго, красная дево, возгнушалася еси/ и, уневестившися Жениху Христу,/ Тому, якоже вено, чистоту душевную и телесную принесла еси, Евфросиние./ Емуже ныне в веселии предстоя,/ поминай нас, чтущих память твою.
Кондак преподобной Евфросинии Полоцкой
глас 8
Избранней Богом от самаго рождения/ и признанней на служение Ему,/ в чине ангельстем Господеви послужившей свято,/ и преподобно пожившей,/ и ныне с Небесными силами Господа восхваляющей,/ о нас же, грешных, пред Господем ходатайствующей,/ с радостию и любовию воззовем:/ радуйся, Евфросиние, невесто Христова всечестная.

Ин кондак преподобной Евфросинии Полоцкой
глас 8
Чистое свое девство и честное/ милостынею, яко светильник елеем, украсившую/ и с мудрыми девами в пресветлый чертог Христов вшедшую,/ Евфросинию славную ублажим/ и, припадше к честным ея мощем, насладимся ея благоухания/ и умильне к ней возопием:/ яко имея дерзновение ко Христу Богу/ моли избавитися зловония страстей и спастися душам нашим.

Ин кондак преподобной Евфросинии Полоцкой
глас 4
Превитавши от земли Полотския,/ отечество свое, яко Авраам, наследовавши, Евфросиние,/ землю высоку сообразну — Горний Сион,/ темже тело твое душевным благомужествием, страданием постным/ яко жертву приносила еси/ милосердием Своим, Давшему Себе за человеки Жертву благоприятну.