zoloto7 все записи автора Седмица 23-я по Пятидесятнице. Глас 5.

Поста нет.
Мч. Арефы и с ним 4299 мучеников (523). Иконы Божией Матери "Всех скорбящих Радость" (1688). Прп. Зосимы(1833).

Сщмчч. Лаврентия, еп. Балахнинского, Алексия пресвитера и мч. Алексия (1918). Прп. Арефы исп. (1932). Сщмчч. Иоанна и Николая пресвитеров (1937). Сщмч. Петра пресвитера (1938).

Блж. Елезвоя (Калеба), царя Ефиопского (553-555). Мц. Синклитикии и двух дщерей ее (VI). Прпп. Арефы (XII), Сисоя (XIII) и Феофила (XII-XIII), затворников Печерских. Свт. Афанасия, Патриарха Цареградского (после 1311). Прп. Георгия (1959).


Тропарь Божией Матери пред иконой Ее 'Всех скорбящих Радость'
глас 4
К Богородице прилежно ныне притецем,/ грешнии и смиреннии, и припадем,/ в покаянии зовуще из глубины души:/ Владычице, помози, на ны милосердовавши,/ потщися, погибаем от множества прегрешений,/ не отврати Твоя рабы тщи,// Тя бо и едину надежду имамы.
Тропарь Божией Матери пред иконой Ее 'Всех скорбящих Радость'
глас 4
Не умолчим никогда, Богородице,/ силы Твоя глаголати недостойнии:/ аще бо Ты не бы предстояла молящи,/ кто бы нас избавил от толиких бед,/ кто же бы сохранил доныне свободны?/ Не отступим, Владычице, от Тебе,// Твоя бо рабы спасаеши присно от всяких лютых.
Ин тропарь Божией Матери пред иконой Ее Всех скорбящих радосте
глас 4
Днесь пресветло красуется славнейший град Москва,/ имея чудотворную икону Владычицы нашея Богородицы:/ та бо, верным являющи чудеса,/ низпосылает дары целебныя./ Сего ради и мы с верою припадающе молимся,/ и на Тоя пречистый образ взирающе,/ яко истинную Самую зрим Владычицу нашу Присно деву Богородицу,/ и умильно глаголем:/ воззри, Мати Божия, оком милости,/ простри к нам руце Твои пречистыя,/ якоже на иконе Твоей сие зрится,/ и подаждь всем скорбящим радость,/ больным от всех недугов исцеление и от бед избавление,/ яко Ты еси скорая Предстательница о душах наших.
Ин тропарь Божией Матери пред иконой Ее Всех скорбящих радосте
глас 8
Ко источнику приснотекущему милосердия,/ Пречистей Деве Богородице,/ притецем, людие вси, священницы же и иноцы,/ мужие, и жены, и чада, здравии и болящие,/ в покаянии вопиюще и умильно глаголюще:/ Владычице, помози грешным рабом Твоим,/ яви яко Благая славу Твою,/ присно потщися умилосердитися на ны,/ испросити очищение душ и телес наших/ от Источника жизни нашел, Бога,/ Егоже родила еси, едина Благословенная.
Кондак Божией Матери пред иконой Ее 'Всех скорбящих Радость'
глас 6
Не имамы иныя помощи,/ не имамы иныя надежды,/ разве Тебе, Владычице,/ Ты нам помози:/ на Тебе надеемся/ и Тобою хвалимся,/ Твои бо есмы раби,// да не постыдимся.
Тропарь мученика Арефы и с ним 4299 мучеников
глас 1
Мужествовавше во Христе противу безбожнаго царя,/ мученицы святии,/ и того неверие иудейское во Христа обличивше,/ прияша мук томление и главам усечение;/ тем восхвалиша тя Ангели,/ и верных роди тя прославляют, Арефо,/ и пострадавших с тобою,/ яко молящихся присно о душах наших.
Кондак мученика Арефы и с ним 4299 мучеников
глас 4
Веселия ходатай нам наста/ светоносный днесь страстотерпец праздник,/ егоже совершающе, славим в Вышних сущаго Господа.
Тропарь преподобного Арефы, затворника Печерского, в Ближних пещерах
глас 2
Богатство твое душевное погубити хотя враг,/ помрачил тя бяше богатством тленным исперва,/ но всех спасаяй Господь / богатство гибнущее окрасти попусти,/ душевное же невредно соблюд,/ Небесных сокровищ наследника тя показа, Арефо,/ тем тя чтим и ублажаем.
Кондак преподобного Арефы, затворника Печерского
глас 2
Иова терпеливодушнаго ревнуя благодарению,/окра дений тленнаго своего имения претерпел еси благодарив, преподобне Арефо,/ тем с ним обрет нетленное имение на Небеси,/ моли Христа Бога о всех нас.
Тропарь святителя Афанасия, патриарха Цареградского
Чистоты жития светом страстное терние попалил еси/ и течением слез безплодную землю напоил еси,/ многоплодну ниву душевную соделав,/ Афанасие преблаженне,/ светило Царюграду, Патриархом удобрение,/ моли Христа Бога спастися душам нашим.
Кондак святителя Афанасия, патриарха Цареградского
глас 2
В светлую священия одежду одеявся,/ мысленно в Небесныя радостно достигл еси Царства/. Тем восприяша тя селения праведных,/ идеже есть неизглаголанно веселие,/ и слова, и всех святых лицы,/ святителю Афанасие,/ моли непрестанно о всех нас.
Тропарь блаженного Елезвоя
глас 4
Иже Божественным рачением подвигся/ на отмщение пролитыя крови праведных,/ яко Давид от Самуила,/ ты же от Зинона предивнаго,/ пророчески яже сбытися тебе предрекша,/ еже обещанием к нему,/ и того благословением победы на враги и одоления показавшу,/ отнюду же со отложением царства/ постных селений горы жизнь соверши, Елезвое царю,/ моли Небеснаго Царя Христа/ спасти души наша.
Кондак блаженного Елезвоя
глас 4
Высоту земнаго царства, и венца венец светлости,/ и багряницу отложшаго любве ради Царя Христа,/ от Негоже на Небесех славно венчана, Елезвоя царя мудраго,/ иже тленным царством и мимоходящим, Царство Вечное изменшаго,/ в пениих песненных восхвалим,/ молитвенника о мире велика.