zoloto7 все записи автора Тропарь священномученика Панкратия
глас 4
И нравом причастник,/ и престолом наместник апостолом быв,/ деяние обрел еси, богодохновенне,/ в видения восход,/ сего ради слово истины исправляя,/ и веры ради пострадал еси даже до крове,/ священномучениче Панкратие,/ моли Христа Бога// спастися душам нашим.

Тропарь священномученика Панкратия, епископа Тавроменийского
глас 8
Яко стрела огнезрачная,/ от Верховнаго послан был еси Тавроменийскому престолу/ уязвляти безбожных злочестие,/ верных же сердца просвещати,/ яже боговещанными твоими словесы в вере утвердив/ и течение совершив, пострадал еси до крове,/ священномучениче Панкратие,/ моли за вся, поющия память твою.

Кондак священномученика Панкратия
глас 4
Светлая тавромениом, Панкратие,/ звезда показался еси/ и священнострадалец явился еси за Христа,/ Емуже ныне предстоя,// моли за чтущия тя, блаженне.
Тропарь священномученика Кирилла, епископа Гортинского
глас 3
Гласом божественным от темницы изведен,/ в Риме братию в божественней вере утвердил еси,/ и, от Ангела глаголы приим о святительстей пастве,/ во страдании своем паки гласу с Небесе сподобися,/ богоповеленный святителю и страдальче Кирилле,/ моли за души наша.

Кондак священномученика Кирилла, епископа Гортинского
глас 3
Видев себе ради темничныя двери отверсты в полунощи/ и идолы сокрушены,/ и Гортинскую паству святительскую,/ от Бога повеленную, добре упас,/ и по Христе надеждно пострадав,/ священномучениче Кирилле,/ молися за чтущия тя.

Тропарь святителя Феодора, епископа Едесского
глас 4
Апостолом подражатель/ и божественных учений столп бысть,/ тем ко Христу притече,/ молением, блаженне, Моавия царя светом Крещения просвещена показа, Феодоре,/ и исповедания ради кровь свою излиял есть,/ исходатайствен тому явися венец от Христа Царя,/ Егоже моли спасти души наша.
Ин тропарь святителя Феодора, епископа Едесского
глас 4
Неволею паству святительскую приим,/ но волею подвигнувся о Божий Церкви,/ и перстию Христова гроба невернаго Моавия царя уверив,/ и с телесною слепотою вкупе и душевную ему исцелив, благоверна показа,/ с нимже и еретики от Божия Церкве, яко волки, отгнав,/ честный святителю Феодоре,/ моли спастися душам нашим.

Кондак святителя Феодора, епископа Едесского
глас 4
Яко солнце, осиявая светлым житием, Феодоре, яве,/ вавилонскому царю явися чудесы/ и сего угодника Христу, святителю, показа,/ с нимже ныне Троице предстоя,/ нас поминай, светло торжествующих память твою, мудре.

Ин кондак святителя Феодора, епископа Едесского
глас 4
Благохотения ради/ просвещеннаго тобою по благодати чада, честнаго Моавия,/ животворящаго древа получения,/ подвигнуся во царствующий град,/ и тамо Христовою перстию доблей царице Феодоре ока зрение очисти,/ и оттуду с яселаемым сокровищем паки в Вавилоне честнаго Моавия по Христе на мучение утверди,/ сего ради ти вопием:/ радуйся, честный Феодоре,/ учениче Христов, пастуше добрый.