zoloto7 все записи автора Кондак преподобного Виссариона
глас 2
Вышних сил подражав, преподобне,/ образом птиц житие пожил еси,/ временная в забытии положив,/ непрестанным желанием влеком к Небесным добротам Христа Царя,/ дондеже Того достигл еси, Висарионе,// моли непрестанно о всех нас.

Тропарь преподобных Виссариона и Илариона
глас 4
Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.

Кондак преподобного Илариона
глас 2
Ограды живоносныя твоея пажити,/ пастырски невредимо стадо соблюл еси/ и явился еси высотою дел велик, новый Иларионе,/ по благочестии многи муки и скорби прием:/ тем во всерадостный живот вселився Горняго Сиона,// моли за ны, преподобне.

Тропарь святителя Ионы, епископа Великопермского
глас 4
Святителю Церкви Великопермстей,/ истинный хранителю апостольских преданий,/ столпе непоколебимый Православия,/ благочестия учителю,/ Ионо святителю блаженне,/ Владыку всех моли/ мир пастве твоей/ и всей Русстей земли даровати/ и всем нам спастися.
Тропарь преподобного Ионы Климецкого
глас 4
Ангельскому житию поревновав, блаженне Ионо,/ оставил еси отечество твое, великий Новград,/ и, пришед в пределы Олонецкия/ и в пустыню вселився,/ в трудех, молитвах и слезах подвизался еси,/ и, яко мудрый купец, Царствие Небесное наследовал еси./ Темже любовию вопием ти:/ моли Христа Бога,/ да спасет души наша.

Кондак преподобного Ионы Климецкого
глас 2
Христовым стопам последователь быв, блаженне Ионо,/ радуяся, вселился еси в пустыню,/ Вышняго Промыслом наставляемь,/ и, не убоявся вражиих приражений,/ якоже столп непоколебим,/ уготовал еси себе в жилище Духу Пресвятому,/ мы же, память твою совершающе, вопием радостно:/ радуйся, яко озарявши нас чудесы твоими;/ радуйся, яко оставил еси временная ради будущих благ./ Радуйся, яко возставляеши ленивых ко спасению./ Моли убо Христа Бога, отче преподобне,/ да спасет души наша в День Судный.

Тропарь преподобного Паисия Угличского
глас 8
Христовы ради любве отечество и род оставил еси,/ и, ангельскому житию поревновав,/ в пустыню вселился еси,/ в нейже многотрудное житие явил еси/ и чудес дарования от Бога приял еси,/ Паисие преподобне,/ моли Христа Бога спастися душам нашим.

Ин тропарь преподобного Паисия Угличского
глас 8
Христовы ради любве отечество и род оставил еси/ и, ангельскому житию поревновав,/ духовному отцу твоему преподобному Макарию, подражатель быв,/ града Углеча достигл еси,/ и близ того при водах в пустыню, Ангелом показанную, вселился еси,/ и обитель прекрасну Матери Божией воздвигл еси,/ и множество монахов собрал еси,/ имже и наставник ко спасению быв,/ и чудес дарования от Бога приял еси,/ Паисие преподобне,/ моли Христа Бога спастися душам нашим.
Ин тропарь преподобного Паисия Угличского
глас 8
Слез твоих теченьми пустыни безплодное возделал еси/ и, иже из глубины воздыханьми, во сто трудов уплодоносил еси,/ и был еси светильник вселенней, сияя чудесы, Паисие, отче наш,/ моли Христа Бога/ спастися душам нашим.

Кондак преподобного Паисия Угличского
глас 2
Чистотою душевною божественно вооружився/ и непрестанный молитвы, яко копие, имый,/ крепко ссекл еси бесовское ополчение,/ Паисие, отче наш,/ моли непрестанно о всех нас.

Тропарь преподобных Виссариона и Илариона
глас 4
Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.