zoloto7 все записи автора Кондак мученика Василиска
глас 8
Во страдании крепок и мужественен явился еси и в чудесех предивен,/ явленно Христово имя преднося, мучителя посрамил еси./ Тем тя почитаем, Василиске, присно зовуще, всечестне:// радуйся, мучеников светлая доброто.

Тропарь блаженного Иакова Боровичского, Новгородского чудотворца
глас 1
Божественною благодатию просветився,/ и по смерти даруеши исцеление/ притекающим к тебе, премудре Иакове:/ темже и мы ныне чтим честных мощей пренесение,/ веселяще вкупе души и телеса./ Тем вси вопием:/ слава Давшему ти крепость!/ Слава Венчавшему тя!/ Слава Действующему тобою всем исцеления!

Кондак блаженного Иакова Боровичского, Новгородского чудотворца
глас 8
Верою и любовию/ твое честное пренесение празднующих, блаженне,/ сохрани и соблюди от веяния злобы и соблазна змиина,/ имаши бо дерзновение ко Владыце всех, Христу Богу./ Егоже моли спасти православныя люди,/ молящия тя, да вси вопием ти:/ радуйся, отче Иакове,/ всея Российския земли удобрение.

Ин кондак блаженного Иакова Боровичского, Новгородского чудотворца
глас 8
Яко звезда многосветлая, отче, на востоце возсия./ к западу пришел еси, блаженне, во твое принесение,/ яко солнечная луча, испущаеши исцеления притекающим к раце мощей твоих,/ молися Христу Богу спасти православныя люди, молящияся ти,/ да вси вопием ти:/ радуйся/ Богомудре Иакове.
Тропарь мученика Иоанна-Владимира
глас 4
Крест, явльшийся тебе с Небесе, светел проповедал еси,/ просветив языки ясно, Владимире славне,/ обагреньми кровей твоих украсився,/ сподобился еси почестей нетленных,/ предстояй Троице,/ тем со дерзновением/ моли спастися нам.

Ин тропарь мученика Иоанна-Владимира
глас 4
Крест, явльшийся тебе с Небес в блистании, всем проповедал еси,/ просветив языки верно, Владимире славне./ Искуплением же, кровьми твоими возблистав,/ сподобился еси мзды нелестныя, предстоя Троице./ Темже дерзновенно моли Христа спастися нам.

Кондак мученика Иоанна-Владимира
глас 8
Яко сокровище многоценное/ и источник, точащ земным токи,/ недуги очищающий,/ нам подадеся тело твое священное,/ болезнем различным подающе исцеление/ и благодать Божественную притекающим к нему, да зовем ти:/ радуйся, княже Владимире.