Наконт перайменаваньняў.
http://president.gov.by/rus/president/news/archive/may2005/1-8/#n0700505-7
Машэраў -- сам адзін з пераможцаў, у гонар якіх пераймяноўваецца праспэкт. Стварыў падпольную арганізацыю, у партызанах быў камандзірам атрада, камісарам брыгады. Героем Савецкага Саюза стаў у 1944 годзе. На пасадзе першага сакратара ЦК КПБ апекаваўся будаўніцтвам Паркавай магістралі; калі загінуў, то яна і стала праспэктам Машэрава.
Мікалай Дрозд (падпольная мянушка -- Дзядзя Вася) -- падпольшчык, рабочы лямцавай фабрыкі "Чырвоны Кастрычнік". Хаваў у сваёй кватэры зброю і лекі, ягоныя жонка і дзьве дачкі былі партызанскімі сувязнымі. Удзельнічаў у замаху на Вільгельма Кубэ. У верасьні 1943 г. немцы арыштавалі самога, жонку і адну з дачок, катавалі і забілі ў Трасьцянцы. Жыў на Заслаўскай, 33 -- таго дома цяпер няма. Калі там праклалі новую вуліцу, то назвалі ягоным імем.
Іван Варвашэня -- таксама падпольшчык, потым партызанскі камісар на Случчыне. У адрозьненьне ад Дразда, дажыў на партыйных пасадах да 1957 г., пахаваны на Вайсковых могілках. Вуліца ягонага імя -- паблізу.
Старабарысаўскі тракт - адна з нешматлікіх вуліц, якія захавалі даваенную і нават дарэвалюцыйную назву. Пераносіць гэтую назву на іншую вуліцу няма сэнсу. То і ня будуць.
Вуліца Іерусалімская атрымала сваю назву зусім нядаўна, калі сьвяткавалася 3000-годзьдзе Іерусаліму, раней гэта быў адрэзак вул. Дразда. Паблізу -- абедзьве менскія сынагогі, на Даўмана і на Крапоткіна. Здаецца, ніводнага дома з адрасам на гэтай вуліцы няма; каб відно было, як яна завецца, з боку вул. Варвашэні паставілі адмысловы знак.
Спасылаюцца на ініцыятыву вэтэранскіх арганізацыяў. Хто чуў пра такую ініцыятыву? Што за арганізацыі, калі і з якой ініцыятывай яны выступалі? Можна паверыць, што прасілі нешта неяк ушанаваць. Немагчыма паверыць, каб прасілі перайменаваць праспэкт Машэрава.
У жыхароў адпаведных вуліц не пыталіся, вядома. Як жыхар перайменаванага праспэкта кажу гэта з пэўнасьцю.
Зянон Пазьняк (яшчэ за талакоўскім часам, да сваёй палітычнай кар'еры) распавядаў, што Паркавая магістраль // праспэкт Машэрава ўпершыню зьявілася на менскім генплане, запраектаваным немцамі ў вайну. Асноўныя ідэі гэтага генплану, казаў З.П., пасьля вайны праводзіліся ў жыцьцё бальшавікамі. Калі так, -- іронія сітуацыі яшчэ большая.
UPD: як нагадвае vadim_i_z, партызанскі парад 1944 г. адбыўся не "ў раёне плошчы Незалежнасьці", а на Чырвонаармейскай, дзе быў іпадром -- далекавата.
(C) miram
http://www.livejournal.com/users/miram/374903.html
LI 3.9.25
