Распятие. Византийская икона XV в.

Сегодня Страстная Пятница. Самый скорбный день в году...
Сегодня совершается Вынос Плащаницы и Чин Погребения. И опять потрясают слова канона св.Симеона Логофета о распятии Господни и на Плач Пресвятой Богородицы...

 На службе не всегда чётко и полностью слышны эти потрясающие слова. И я решила привести их здесь (исключая ирмосы и славы).

Песнь 1
Обешена яко видя на Кресте Сына и Господа Дева Чистая, терзающися вопиюше горце, со другими женами стенящи глаголаше.

Вижу Тя ныне, возлюбленное Мое Чадо и любимое, на Кресте висяща, и уязвляюся горце сердцем, рече Чистая: но даждь слово, Благий, Рабе твоей.

Волею, Сыне Мой и Творче, терпиши на древе лютую смерть, Дева глаголаше предстоящи у Креста со возлюбленным учеником.

 Ныне Моего чаяния радости и веселия, Сына Моего и Господа лишена бых: увы Мне, болезную сердцем, Чистая плачущи глаголаше.

Песнь 3

Страха ради иудейска Петр скрыся, и вси отбегоша вернии, оставльше Христа, Дева рыдающе глаголаше.

О страшном Твоём рождестве и странном, Сыне Мой, паче всех матерей возвеличена бых Аз: но увы Мне, ныне Тя висяща на древе, распалаюся утробою.

Хощу утробу Мою на руку, имаже яко Младенца держах, с древа прияти, вещаше Чистая: но никтоже, увы Мне, Сего даде.

Се свет Мой сладкий, надежда и живот Мой благий, Бог Мой, угасе на Кресте, распалаюся утробою, Дева стенящи глаголаше.

Песнь 4

Солнце не заходяй Боже Превечный, и Творче всех тварей, Господи, како терпиши страсть на Кресте, Чистая плачущи глаголаше.

Плачущи глаголаше Браконеискусная, ко благообразному: потщися Иосифе к Пилату приступити, и испроси сняти со древа Учителя Твоего.

Видев Пречистую горце слезящу, Иосиф смутися, и плачася приступи к Пилату, даждь ми, вопия с плачем, тело Бога моего.

Уязвена Тя видящи, и без славы, нага на древе, Чадо Мое, утробою распалаюся, рыдающи яко Мати, Дева провещаваше.

 

 Снятие со креста. икона XV в.

Песнь 5

Растерзаяся и рыдая, и дивяся, вкупе с Никодимом снят Иосиф, и уцеловав пречистое тело, рыдаше, и стеняше, и поя Его яко Бога.

Приимше Его с плачем Мати Неискусомужняя, положи на колену, молящи Его со слезами, и облобызающи, горце же рыдающи и восклицающи.

Едину надежду и живот, Владыко Сыне Мой и Боже, во очию свет Раба Твоя имех, ныне же лишена бых Тебе, сладкое Мое Чадо и любимое.

Болезни и скорби, и воздыхания обретоша Мя, увы Мне Чистая горце рыдающи глаголаше, видящи Тя Чадо Мое возлюбленное, нага и уединена, и вонями помазана мертвеца.

Песнь 6

Мертва тя зрю, Человеколюбче, оживившаго мертвыя, и содержаща вся, уязвляюся люте утробою. Хотела бых с Тобою умрети, Пречистая глаголаше: не терплю бо без дыхания мертва Тя видети.

Дивлюся зрящи Тя, Преблагий Боже и Прещедрый Господи, без славы и без дыхания, и безобразна, и плачуся держащи Тя, яко не надеяхся увы Мне, видети Тя Сыне Мой и Боже.

Не изглаголещи ли Рабе Твоей слова, Слове Божий? Не ущедриши ли, Владыко, Тебе рождшую? глаголаше Чистая, рыдающи и плачущи, облобызающи тело Господа Своего.

Помышляю Владыко, яко ктому сладкого Твоего не услышу гласа, ни добрОты лица Твоего узрю, якоже прежде Раба Твоя: ибо зашел еси, Сыне Мой, от очию Моею.

Кондак

Нас ради Распятого, приидите вси воспоим, Того бо видя Мария на древе, и глаголаше: аще и распятие терпиши, Ты еси Сын и Бог Мой.

Икос

Своего Агнца Агница зрящи, к заколению влекома, последоваше Мария простертыми власы со инеми женами, сия вопиюще: камо идеши, Чадо, чесо ради скорое течение совершаеши? Еда другий брак паки есть в Кане, и тамо ныне тщишися, да от воды им вино сотвориши? Иду ли с Тобою Чадо, или паче пожду Тебе? Даждь Ми слово, Слове, не молча мимоиди Мене, чисту соблюдый Мя: Ты бо еси Сын и Бог мой.

Песнь 7

Где Сыне Мой и Боже благовещение древнее, еже Ми Гавриил глаголаше? Царя Тя, Сына и Бога Вышняго нарицаше: ныне вижу Тя, Свете Мой сладкий, нага и уязвена мертвеца.

Избавляяй болезни, ныне приими Мя с Тобою Сыне Мой и Божий, да сниду, Владыко во Ад с Тобою и Аз, не остави Мене едину, уже бо жити не терплю, не видяще Тебе сладкого Моего Света.

С другими женами мироносицами, рыдающи Непорочная горце, и носима видящи Христа, глаголаше: увы Мне, что вижу! Камо идеши ныне Сыне Мой, а Мене едину оставляеши?

Изнемогающи и рыдающи Непорочная, мироносицам глаголаше: срыдайте Ми и сплачитеся горце: Се бо Свет Мой сладкий и Учитель ваш гробу предается.

 Положение во гроб. Икона XV в.

Песнь 8

Деву рыдающу Иосиф видев, растерзашеся весь, и вопияше горько: како Тя, о Боже мой, ныне погребу раб Твой? Какими плащаницами обвию тело Твое?

Паче ума превзыде странное Твое видение носящего тварь всю Господа: сего ради Иосиф яко мертва Тя на руку своею, и с Никодимом носит и погребает.

Странную вижу и преславную тайну, Дева вопияше Сыну и Господу: како в худом гробе полагаешися, мертвыя повелением возставляяй во гробех?

Ни от гроба Твоего востану, Чадо Мое, ни слезы точащи престану Раба Твоя, дондеже и Аз сниду во ад: не могу бо терпети разлучения Твоего, Сыне Мой.

Песнь 9

Радость Мене николиже отселе прикоснется, рыдающи глаголаше Непорочная: Свет Мой и Радость Моя во гроб зайде. Но не оставлю Его единаго, зде же умру и спогребуся Ему.

Душевную Мою язву ныне исцели, Чадо Мое, Пречистая вопияше слезящи: воскресни и утоли Мою болезнь и печаль, можеши бо, Владыко, елико хощеши и твориши, аще и погреблся еси волею.

О како утаилася Тебе есть бездна щедрот? Матери в тайне изрече Господь: тварь бо мою хотя спасти, изволих умрети. Но и воскремну, и Тебе возвеличу, яко Бог небесе и земли.

Воспою милосердие Твое, Человеколюбче, и покланяюся богатству милости Твоея, Владыко: создание бо Твое хотя спасти, смерть подъял еси, рече Пречистая. Но воскресением Твоим, Спасе, помилуй всех нас.