zoloto7 все записи автора Тропарь Всех преподобных и богоносных отцев, во Святой Горе Афонской просиявших
глас 1
Пустыни Афонския отцы,/ Ангелы во плоти,/ исповедники вкупе и преподобнии,/ святители же и мученики в пениих почтим,/ подражающе добродетелем их,/ зовуще согласно и глаголюще:/ слава Прославльшему вы,/ слава Венчавшему вы,/ слава в бедах предстатели нам вы Показавшему.

Кондак Всех преподобных и богоносных отцев, во Святой Горе Афонской просиявших
глас 4
Онебесившия Гору сию,/ и показавшая в ней житие ангельское,/ и множество монахов собравшия отцы,/ приидите, благохвалим вси, к ним взывающе:/ всякия беды и искушения нас избавите,/ множество преподобных,/ Афонская похвало.

Тропарь святителя Трифиллия
глас 4
Правило веры и образ кротости,/ воздержания учителя/ яви тя стаду твоему/ Яже вещей Истина./ Сего ради стяжал еси смирением высокая,/ нищетою богатая,/ отче Трифиллие,/ моли Христа Бога// спастися душам нашим.

Кондак святителя Трифиллия
глас 8
Изрядством жития чистоту девства прием, Трифиллие,/ первопрестольник показался еси Левкусии/ и явился еси тем провозвеститель и богоразумия наставник./ Сего ради радостно взываем ти:// радуйся, святителей украшение.
Тропарь мученицы Акилины
глас 4
Агница Твоя, Иисусе, Акилина/ зовет велиим гласом:/ Тебе, Женише мой, люблю,/ и, Тебе ищущи, страдальчествую,/ и сраспинаюся, и спогребаюся крещению Твоему,/ и стражду Тебе ради,/ яко да царствую в Тебе,/ и умираю за Тя, да и живу с Тобою,/ но яко жертву непорочную приими мя,/ с любовию пожершуюся Тебе.// Тоя молитвами, яко Милостив, спаси души наша.

Кондак мученицы Акилины
глас 2
Девства твоего добротами предочистивши душу твою,/ на высоту мучением востекла еси,/ Акилино всечестная,/ любовию Жениха твоего Христа уязвившися,/ Емуже со Ангелы предстоиши, веселящися,// с нимиже не престай моляся о всех нас.

Тропарь преподобных Андроника, Саввы и Александра Московских, Даниила Черного, Андрея Рублева
глас 2
Плоды добродетелей на земли принесше,/ преподобнии отцы,/ в Небесных чертозех ныне благоухаете, яко райстии цвети,/ и лицем к лицу зрите Пресвятую Троицу,/ Юже дерзновенно молите/ спастися душам нашим.
Ин тропарь преподобных Андроника и Саввы Московских
глас 8
От юности своея, преподобнии отцы Андрониче и Савво, / в пустыни вселистеся Сергия великаго, / того житию последующе, / плоды смирения и послушания возрастили есте, / сего ради сподобившеся быти строители и первоначальники / обетныя обители святителя Алексия, / с нимже испросите у Христа Бога верным людем здравие и спасение / и душам нашим велию милость.

Ин тропарь преподобного Андроника Московского
глас 1
Безмолвие от юности возлюбив,/ на гору Маковец пришел еси, Андрониче блаженне,/ обитель общаго жития устроил еси в земнем граде Москве,/ во обители Небеснаго града ныне ликовствуеши,/ молися Христу Богу/ спастися душам нашим.

Кондак преподобных Андроника, Саввы и Александра Московских, Даниила Черного, Андрея Рублева
глас 3
Вас молим, преподобнии отцы наши,/ телом почивающий на земли,/ духом же Божию престолу предстоящий:/ молитеся о граде Москве/ и о всех, почитающих честную память вашу.